quinta-feira, 29 de janeiro de 2015

1 YOHANE (TSONGA)

Vumbhoni bya Yohane.
1Lexi ngi xi ri kona eku sunguleni lexi hi xi tweke, lexi hi xi voneke hi mahlo ya hina, lexi hi xi languteke, lexi mavoko ya hina ma xi khumbeke, ri nga Rito ra vutomi; 2(hikuva vutomi byi kombisiwile, hi byi vonile, kambe hi timbhoni ta byona, kutani ha mi byela vutomi lebyi nga heriki, lebyi ngi byi ri eka Tatana, kambe byi kombisiwile hina) 3lexi hi xi voneke, lexi hi xi tweke, hi lexi hi mi byelaka xona, leswaku, na n'wina, mi va ni ku hlangana na hina; kambe ku hlangana ka hina na Tatana ku kona, ni le ka N'wana wa yena, Yesu Kriste. 4Kutani hi mi tsalela timhaka leti, leswaku ku tsaka ka n'wina ku hetiseka.
Ku hlangana na Xikwembu.
5Mhaka leyi hi nga yi twa eka yena, leyi hi mi byelaka yona, hileswaku Xikwembu i ku vonakala, kutani a ku na munyama eka xona, nikutsongo. 6Kungakuloko hi vula leswaku hi ni ku hlangana na xona kasi hi famba emunyameni, ha hemba, kutani a hi fambi entiyisweni. 7Kambe kungakuloko hi famba eku vonakaleni, kukota xona xi nga eku ku vonakaleni, hi ni ku hlangana swin'we, kutani ngati ya Yesu Kriste, N'wana wa xona, ya hi hlantswa, yi susa swidyoho hinkwaswo swa hina.
8Kungakuloko hi vula leswaku a hi na vudyoho, ha tixisa, kutani ntiyiso a wu kona eka hina. 9Loko hi tivula swidyoho swa hina, Xikwembu xa tshembeka, xi lulamile ku hi rivalela swidyoho, ni ku hi hlantswa ku homboloka hinkwako. 10Loko hi vula leswaku a hi dyohanga, hi xi endla muhembi, kutani rito ra xona a ri kona eka hina.

La tivaka Yesu Kriste u hlayisa milawu ya yena.
1Vana vanga, ndzi mi tsalele timhaka leti, leswaku mi nga tshuki mi dyoha; kambe kungakuloko munhu a dyohile, hi ni Muyimeri eka Tatana, a nga Yesu Kriste la lulameke. 2Kutani hi yena, hi xiviri xa yena, a nga mhamba ya swidyoho swa hina; swi nga ri swa hina ntsena, kambe ni swa vanhu hinkwavo.
3Kutani laha hi tivaka leswaku ha n'wi tiva, hi loko hi hlayisa milawu ya yena. 4La nge: “Ndza n'wi tiva,” kasi a nga hlayisi milawu ya yena wa hemba, kutani ntiyiso a wu kona eka yena. 5Kambe, kungakuloko munhu a hlayisa rito ra yena, rirhandzu ra Xikwembu ri hetisekile eka yena swinene; hikwalaho hi tivaka leswaku hi le ka yena. 6La vulaka leswaku u tshame eka yena, u fanele ku famba hi mukhuva lowu na yena a fambeke ha wona.
Ku rhandzana.
7Vamakwerhu, a ndzi mi tsaleri ku lerisa lokuntshwa, kambe i ku lerisa ka khale loku ngi mi ri na kona eku sunguleni; ku lerisa kuloko ka khale i rito leri mi ri tweke. 8Hambiswiritano, ndzi mi tsalela ku lerisa lokuntshwa, wu nga ntiyiso eka yena ni ka n'wina, hikuva munyama wu hundzile, kutani ku vonakala ka xiviri ku humelele. 9La vulaka leswaku u le ku vonakaleni, kasi a ri karhi a venga makwavo, wa ha ri emunyameni, ni sweswi. 10La rhandzaka makwavo u tshame eku vonakaleni, kutani ku khunguvanyisa ku hava eka yena. 11Kambe la vengaka makwavo u le munyameni, na swona u famba emunyameni, kutani a nga tivi laha a yaka kona, hikuva munyama wu dlele mahlo ya yena.
12Vana lavatsongo, ndza mi tsalela hikuva mi rivaleriwile swidyoho hikwalaho ka vito ra yena. 13Vatatana, ndza mi tsalela, hikuva mi tivile la nga kona kaharhi eku sunguleni. Lavantshwa, ndza mi tsalela, hikuva mi hlurile lowo biha. Vana, ndzi mi tsalele, hikuva mi tiva Tatana. 14Vatatana, ndzi mi tsalela, hikuva mi tivile la nga kona ka ha ri eku sunguleni. Lavantshwa, ndzi mi tsalela, hikuva mi ni matimba, kutani rito ra Xikwembu ri tshame eka n'wina, kambe mi hlurile lowo biha.
Ku rhandza misava.
15Mi nga rhandzeni misava, hambi swi ri leswi nga emisaveni; kungakuloko munhu a rhandza misava, rirhandzu ra Tatana a ri kona eka yena. 16Hikuva hinkwaswo swa la emisaveni, ku navela ka nyama, ni ku navela ka mahlo ni ku tidzunisa ka vutomi, a swi humi eka Tatana, kambe swi huma emisaveni. 17Kambe misava ya hundza, ni ku navela ka yona; kambe la endlaka ku rhandza ka Xikwembu, u tshama hilaha ku nga heriki.
Vafundhisi lava kanganyisaka.
18Vana, i nkarhi wa makumu kutani kukota leswi mi swi tweke leswaku Antikriste u ta ta, ni sweswi va Antikriste lavo tala va kona; hikwalaho hi tivaka leswaku i nkarhi wa makumu. 19Va humile exikarhi ka hina, kambe a va nga ri va ka hina, hikuva loko ngi va ri va ka hina, ingi va tshamile na hina; kambe ku humelerile sweswo leswaku swi ta vonaka leswaku hinkwavo a hi va ka hina.
20Loko mi ri n'wina, mi amukerile ku cheriwa hi la kwetsimeke, kutani mi tiva hinkwaswo. 21Ndzi mi tsalele swi nga ri hi leswi mi nga tiviki ntiyiso kambe hi leswi mi wu tivaka, kutani a ku na vunwa lebyi humaka entiyisweni. 22Wa mavunwa i mani, loko a nga ri la landzulaka leswaku Yesu i Kriste. La nga Antikriste hi loyi a landzulaka Tatana ni N'wana. 23Un'wana ni un'wana la landzulaka N'wana, a nga na Tatana, kambe la pfumelaka eka N'wana, u na yena Tatana.
24Loko mi ri n'wina, lexi mi xi tweke ka ha ri eku sunguleni, a xi tshame eka n'wina, na n'wina mi ta tshama eka N'wana ni le ka Tatana. 25Kutani ku tshembisa loku a hi nyikeke kona, i vutomi lebyi nga heriki.
26Ndzi mi tsalela timhaka leti, hikwalaho ka lava mi xisaka. 27Kambe loko mi ri n'wina, ku cheleriwa loku mi ku amukeleke eka yena ku tshame eka n'wina, kutani a swi mi faneri ku dyondzisiwa hi munhu, kambe hilaha ku cheleriwa kuloko ku mi dyondzisaka hinkwaswo leswi nga ntiyiso, ma nga ri mavunwa, mi ta tshama eka yena hilaha ku mi dyondziseke.
28Kutani sweswi, vana, tshamani eka yena, leswaku siku a humelelaka, hi ta va ni ku tshemba loku tiyeke, hi nga tshuki hi khomiwa hi tingana emahlweni ka yena, eku humeleleni ka yena. 29Loko mi tiva leswaku u lulamile, tivani leswaku un'wana ni un'wana la endlaka leswi lulameke, u tswariwe hi yena.

Ku thyiwa vana va Xikwembu.
1Vonani rirhandzu leronghasi leri Tatana a hi rhandzeke ha rona, loko hi vuriwa vana va Xikwembu! Loko misava yi nga hi tivi, hi leswi yi nga n'wi tivangiki. 2Varhandziwa, sweswi, hi vana va Xikwembu, kambe lexi hi nga ta va xona, a xi si vonaka; kambe ha swi tiva leswaku siku a humelelaka, hi ta fana na yena, hikuva hi ta n'wi vona hi xiviri xa yena. 3Kutani un'wana ni un'wana la nga ni ku tshemba kuloku ka yena, wa titengisa kukota yena a tengeke.
4Un'wana ni un'wana la dyohaka u tlula nawu; hikuva ku dyoha i ku tlula nawu. 5Kambe ma swi tiva leswaku yena u humelerile leswaku a susa swidyoho swa hina; na swona a ku na ku dyoha eka yena. 6Un'wana ni un'wana la tshamaka eka yena a nga dyohi; un'wana ni un'wana la dyohaka, a nga n'wi vonanga, na swona, a nga n'wi tivanga.
7Vana, mi nga tshuki mi xisiwa hi munhu; la endlaka leswo lulama, u lulamile, kukota leswi na yena, a lulameke. 8La dyohaka, i wa Diyavulosi, hikuva Diyavulosi u dyohile ka ha ri eku sunguleni. Hikwalaho N'wana wa Xikwembu a humeleleke, leswaku a herisa mitirho ya Diyavulosi.
9Un'wana ni un'wana la tswariweke hi Xikwembu a nga tshami a dyoha, hikuva mbewu ya Xikwembu yi tshamile eka yena; kutani a nga swi koti ku dyoha, hikuva a tswariwe hi Xikwembu. 10Hikwalaho ku vonakalaka lava nga vana va Xikwembu, ni lava nga vana va Diyavulosi. Un'wana ni un'wana la nga endliki swo lulama, a hi wa Xikwembu, kukotisa loyi a nga rhandziki makwavo.
Vana va Xikwembu va rhandzana.
11Hikuva mhaka leyi mi yi tweke ka ha ri eku sunguleni, hileswaku hi rhandzana; 12hi nga kotisi Kayini la ngi a ri wa lowo biha, kutani u dlele makwavo. Kutani u n'wi dlayele yini xana? Hikuva mitirho ya yena a yi ri leyo biha; kasi ya makwavo a yi lulamile. 13Mi nga hlamaleni, vamakwerhu, loko misava yi mi venga.
14Loko hi ri hina, ha tiva leswaku hi rhurhile eku feni ku ya nghena evutomini, hikuva hi rhandza vamakwerhu. La nga rhandziki makwavo, u tshame eku feni. 15Un'wana ni un'wana la vengaka makwavo i mudlayi; kambe ma swi tiva leswaku a ku na mudlayi loyi vutomi lebyi nga heriki byi tshamaka eka yena.
16Laha hi nga tivaka rirhandzu hakona, hi leswi Yesu a hi tshikeleke vutomi bya yena; na hina, hi fanele ku tshikela vamakwerhu vutomi bya hina. 17Kambe kungakuloko munhu a ri ni swilo swa vutomi bya misava, kutani a vona makwavo a pfumala, kutani a n'wi pfalela mbilu ya yena, rirhandzu ra Xikwembu ri nga tshamisisa ku yini eka yena? 18Vana vanga, hi nga tshuki hi rhandzana hi ku vulavula, ni ririmi, kambe a ku ve hi ku endla, ni ntiyiso.
19Hi tiva hakona leswaku hi vantiyiso, kutani hi tiyisa timbilu ta hina emahlweni ka yena. 20Hikuva loko timbilu ta hina ti hi avanyisa Xikwembu i xikulu eka timbilu ta hina, kambe xi tiva hinkwaswo. 21Varhandziwa, loko timbilu ta hina ti nga hi avanyisi, hi ni ku tshemba loku tiyeke eka Xikwembu. 22Kutani lexi hi xi kombelaka, hambi yi ri yini na yini, hi nyikiwa hi xona hikuva hi hlayisa ku lerisa ka xona kutani hi endla leswi xi tsakisaka.
23Kutani ku lerisa ka xona hileswaku hi pfumela vito ra N'wana wa xona Yesu Kriste, ni leswaku hi rhandzana hilaha xi hi leriseke hakona. 24La hlayisaka ku lerisa ka xona, u tshama eka xona, na xona xi tshama eka yena; kutani ha tiva leswaku xi tshame eka hina, hi Moya lowu xi hi nyikeke wona.

Ku ringeta mimoya.
1Varhandziwa, mi nga tshuki mi pfumela mimoya hinkwayo, kambe mi ringeta mimoya ku tiva xana yi huma eka Xikwembu, hikuva vaprofeta va mavunwa va tile emisaveni, va tele. 2Tivani Moya wa Xikwembu hakona: Moya wun'wana ni wun'wana lowu vulaka leswaku Yesu Kriste u tile enyameni, i wa Xikwembu. 3Kambe moya wun'wana ni wun'wana lowo nga vuriki leswaku Yesu Kriste u tile enyameni a hi wa Xikwembu; hi wona moya wa Antikriste, loyi mi n'wi twaka leswaku wa ta, kambe, ni sweswi, wu kona emisaveni.
4Loko mi ri n'wina, vana vanga, mi va Xikwembu, kutani mi va hlurile hikuva la nga na n'wina, u tlula hi vukulu la nga emisaveni. 5Vona i va misava; hikwalaho va vulavulaka hi swa misava; kutani misava ya va yingisa. 6Hina hi va Xikwembu; la tivaka Xikwembu wa hi yingisa; la nga riki wa Xikwembu a nga hi yingisi; hikwalaho hi tivaka moya lowu nga wa ntiyiso, ni moya lowu nga wa mavunwa.
Rirhandzu ri huma eka Xikwembu.
7Varhandziwa, a hi rhandzaneni, hikuva rirhandzu ri huma eka Xikwembu kutani un'wana ni un'wana la nga ni rirhandzu, u tswariwe hi Xikwembu, na swona u tiva Xikwembu. 8La nga rhandziki, a nga tivi Xikwembu; hikuva Xikwembu i rirhandzu.
9Rirhandzu ra Xikwembu eka hina ri vonakile hakona; hi leswi Xikwembu xi rhumeke N'wana wa xona, la nga tswariwa a ri swakwe emisaveni, leswaku hi hanya ha yena. 10Laha rirhandzu ri nga rona, hi leswi ku nga riki hina lava rhandzeke Xikwembu, kambe hi xona xi hi rhandzeke, kutani xi rhumile N'wana wa xona, leswaku yi va mhamba ya swidyoho swa hina.
11Varhandziwa, loko Xikwembu xi hi rhandzile swonghasi, na hina, hi fanele ku rhandzana. 12A ku na munhu la tshamaka a vona Xikwembu, ni siku ni rin'we; loko hi rhandzana, Xikwembu xi tshama eka hina, kutani rirhandzu ra xona ri hetisekile eka hina. 13Leswi hi tivaka ha swona leswaku hi tshama eka xona, na xona eka hina, hi loko xi hi nyikile moya wa xona.
14Kutani, na hina, hi swi vonile, hi va hi tiyisa leswaku Tatana u rhumile N'wana leswaku a va Mulondzovoti wa misava. 15Un'wana ni un'wana la vulaka leswaku Yesu i N'wana wa Xikwembu, Xikwembu xi tshama eka yena, na yena u tshama eka Xikwembu. 16Kutani na hina hi swi tivile, hi va hi pfumela rirhandzu leri Xikwembu xi hi rhandzeke ha rona. Xikwembu xi ni rirhandzu, kutani la tshamaka erirhandzwini, u tshama eka Xikwembu, na xona Xikwembu xi tshama eka yena.
17Laha rirhandzu ri hetisekeke hakona eka hina leswaku hi va ni ku tshemba loku tiyeke hi siku ra ku avanyisa, hileswaku lexi xi nga xona, na hina hi va xona emisaveni leyi. 18A ku na nchavo erirhandzwini, kambe rirhandzu leri hetisekeke ri susa ku chava; hikuva ku chava ku ni ku biwa, kutani la chavaka a nga hetisekanga erirhandzwini. 19Loko hi ri hina ha xi rhandza, hikuva hi xona xi rhangeke xi hi rhandza.
20Kungakuloko un'wana a ku: “Ndzi rhandza Xikwembu,” kasi a venga makwavo, u ni vunwa; hikuva la nga rhandziki makwavo loyi a n'wi vonaka, a nga swi tivisa ku yini ku rhandza Xikwembu lexi a nga xi voniki? 21Kutani ku lerisa loku hi ku nyikiweke hi xona, hileswaku: “La rhandzaka Xikwembu, u rhandza ni makwavo.”

La rhandzaka Xikwembu u hlayisa milawu ya xona.
1Un'wana ni un'wana la pfumelaka leswaku Yesu i Kriste, u tswariwe hi Xikwembu; kutani un'wana ni un'wana la rhandzaka mutswari wa yena, u rhandza ni la tswariweke hi yena.
2Laha hi tivaka leswaku hi rhandza vana va Xikwembu, hi loko hi rhandza Xikwembu, ni loko hi hlayisa ku lerisa ka xona. 3Hikuva ku rhandza Xikwembu, hi loko hi hlayisa ku lerisa ka xona, kambe ku lerisa ka xona a ku tiki. 4Hikuva hinkwaswo leswi tswariweke hi Xikwembu, swi hlula misava: kutani ku hlula loku hlulaka misava, i ku pfumela ka hina. 5I mani la hlulaka misava, loko a nga ri loyi a pfumelaka leswaku Yesu i N'wana wa Xikwembu?
Vumbhoni lebyi tiyisaka ku pfumela ka hina.
6Yesu Kriste, hi yena la nga ta hi mati ni ngati; ku nga ri hi mati ntsena, kambe hi mati ni ngati; kutani moya, hi yona mbhoni, hikuva Moya i ntiyiso. 7Hikuva timbhoni ti kona, ti nga tinharhu: 8Moya, ni mati, ni ngati; kutani vunharhu lebyi, i xilo xin'we.
9Swi tsandza ni loko hi amukela vumbhoni bya vanhu, vumbhoni bya Xikwembu byi tlula ngopfu; hikuva hi byona vumbhoni bya Xikwembu lebyi xi vuleke N'wana wa xona ha byona. 10La pfumelaka eka N'wana wa Xikwembu, u ni vumbhoni eka yena; la nga pfumeriki Xikwembu, u xi endla wa mavunwa; hikuva a nga pfumeri vumbhoni lebyi Xikwembu xi yimeleke N'wana wa xona ha byona. 11Kutani vumbhoni byebyo, hi lebyi nge: Xikwembu xi hi nyikile vutomi lebyi nga heriki; kutani vutomi byebyo byi le ka N'wana wa xona. 12La nga ni N'wana u ni vutomi, la nga riki na N'wana wa Xikwembu, a nga na vutomi.
13Ndzi mi tsalerile timhaka teto, n'wina lava pfumelaka eka vito ra N'wana wa Xikwembu, mi ta tiva leswaku mi ni vutomi lebyi nga heriki.
Ku khongela loku yingisiwaka.
14Kutani ku tshemba loku tiyeke loku hi nga na kona ka xona, hileswaku, loko hi kombela lexi rhandziwaka hi xona, xa hi yingisa. 15Kutani loko hi tiva leswaku xa hi yingisa loko hi kombela yini na yini ha swi tiva, hikuva hi kumile leswi hi swi kombeleke eka xona.
16Kungakuloko munhu a vona makwavo a dyoha hi ku dyoha loku nga yisiki eku feni, a a n'wi khongelele, kutani Xikwembu xi ta n'wi nyika vutomi, loko va nga ri lava dyohaka hi ku dyoha loku yisaka eku feni. Xidyoho xi kona lexi yisaka eku feni, a ndzi vuri leswaku ku khongeleriwa xona. 17Ku homboloka hinkwako i xidyoho, kambe xidyoho xi kona lexi nga yisiki eku feni.
18Ha swi tiva leswaku un'wana ni un'wana la tswariweke hi Xikwembu a nga dyohi; kambe la tswariweke hi Xikwembu wa tihlayisa, kutani lowo biha a nga n'wi khumbi. 19Ha swi tiva leswaku hi va Xikwembu, ni leswaku misava hinkwayo yi tshama eku biheni. 20Ha swi tiva na swona leswaku N'wana wa Xikwembu u tile, kutani u hi nyikile ku twisisa leswaku hi tiva lowu nga ntiyiso, kutani hi va eka Loyi a nga ntiyiso, eka N'wana wa xona Yesu Kriste. Hi yena loyi xi nga Xikwembu xa ntiyiso, ni vutomi lebyi nga heriki.
21Vana, chavani swifaniso swa swikwembu.
 https://www.bible.com/pt/bible/607/1jn.1.tso29no

Nenhum comentário:

Postar um comentário