segunda-feira, 23 de fevereiro de 2015

1 JEAN: Azumeina

1 JEAN 11Ami nga b’irigi yam Zla d’a Ari d’a nga avok ahle suma lazina peta. Ami humud’u, ami wamizi ki iramiya, ami golod’u, ami dot kabomi mi. 2Ata yima Ari ndata ti nde woina, ami wamiziya. Kayam ndata, ami nga dagiya, ami nga lagi glangâsâ yam ari d’a didin nda nga zlapa kAbui adjeu dei d’a nde tat tei iramid’a. 3Vama ami wamizina, vama ami humumizina, ami nga lagi glangâsâ kam mi, kayam agi lagi darigïd’a ki sed’emiya. Darigï meid’a ni kAbui Alona ki Goroma Jesus Christ. 4Ami nga b’irigi ahle ndazina, kayam furî meid’a ti ndak memet. 5Wana ni zla d’a ami humumizi avun Jesus Christ sa ami nga dagizi woid’a mi: Nala, Alona ni b’od’a, nduvunda nga kurum mbi. 6Le ei dei ala: Ei nga lei darigïd’a ki sed’emu, wani le ei nga tid’i kur nduvunda tua ni, ei kei ni zlad’a, ei nga tid’i yam gagazid’a d’i. 7Wani le ei nga tid’i kur b’od’a d’igi mam tamba nga mi tit kur b’od’a na ni, ei lei darigïd’a aduk teya, buzuna hi Goroma Jesus-na nga mi mbuzi woi yed’et kur tcho meid’a pet mi. 8Le ei dei ala: Ei nga ki tchod’a d’uo ni, ei lobei ni teya, zla d’a gagazid’a nga kuri d’i. 9Wani le ei dei woi yam tcho meid’a avok Alona ni, Alona ni Ma d’engzeng ma d’ingêrâ, mba mi vat hurum mbei yam tcho meid’a, mba mi mbuzi woi yed’et kur tcho meid’a pet mi. 10Le ei dei ala: Ei lei nga tchod’a d’uo ni, ei mbut Alona ni ma ka zlad’a, zla mamba nga kuri d’uo mi. 

1 JEAN 21Grona, an nga ni b’irigi ahle suma wana kayam me agi lagi tchod’a d’i. Le sa adigagi mi le tchod’a ni, ei nga ki Grangâ gen Abui Alona, nala, Jesus Christ ma d’ingêrâ. 2Ni ma he tam mbei vama ngat buzuna kei kayambala Alona mi vat hurum mbei yam tcho meid’a d’a. Nga ni yam tcho meid’a hol li, wani ni yam tchod’a hi suma pet mi. 3Le ei nga gei yei kä ad’u vun ma hed’a hAlonina ni, ei wei ala ei wei Alona. 4Sama dala: An wumu, wani nga mi ge yam kä ad’u vun ma he mama d’uo na, ni sama ka zlad’a, zla d’a gagazid’a ti nga kurum mbi. 5Wani sama nga mi ge yam kä ad’u zla mambina, ni sama nga mi le yam Alona ki o d’a gagazi d’a ndak memetina. Wana ni zla d’a ei wei ala ei nga zlapa tu kAlona. 6Sama dala mam nga kaka zlapa tu kAlona na, djivid’a mi tit d’igi Jesus tamba na. 7Buniyôn suma od’a, an nga ni b’irigi ni vun ma he ma awilina d’i, wani ni vun ma he ma adjeu ma agi nga ki sed’em avok deina. Vun ma he ma adjeu máma ni zla d’a agi humuta. 8Wan tua ba, an nga ni b’irigi vun ma he ma awilina. Ni ma gagazi mamba ti nde woi ata Christ-sâ, ti nga kurugi mi, kayam nduvunda nga d’i kal leyo, b’o d’a gagazid’a ti b’o wa da’. 9Le sana nga mi dala mam nga mi tit kur b’od’a, wani le nga mi noî wiyema woyo ni, mi nga ni kur nduvunda tua. 10Sama nga mi le yam wiyemina, mi nga ni kaka kur b’od’a, vama puk wiyema kur tchod’ina mi nga atam mbi. 11Wani sama nga mi noî wiyema woina, mi nga ni kur nduvunda, nga mi tit ni kur nduvunda mi. Mam nga mi we yima mi i kuana d’i, kayam nduvunda ti dugum iram mbeyo. 12Grona, an nga ni b’irigi kayam Alona mi vat hurum mbei yam tcho magid’a yam simiyê Christ da’. 13Abuyonu, an nga ni b’irigi kayam agi wagi wa mam ma nga ei avok deina. Azungeîna, an nga ni b’irigi kayam agi kuzugi wa yam Ma tchona da’. 14Gugureina, an nga ni b’irigi kayam agi wagi wa Abui Alona da’. Abuyonu, an nga ni b’irigi kayam agi wagi wa mam ma nga ei avok deina. Azungeîna, an nga ni b’irigi kayam agi ni suma ad’enga, zlad’a hAlonid’a ti nga kaka kurugiya, agi kuzugi wa yam Ma tchona da mi. 15Ar agi lagi yam duniyad’a d’oze ahle suma kurutna d’i. Le sama nga mi le yam duniyad’a ni, nga mi le yam Abui Alona d’i. 16Kayam ahle suma kur duniyad’ina pet ni djib’er ra tchod’a hi hliu tad’id’a ki d’od’oka hi irid’a ki subur ta d’a hawa yaka. Ahle ndazina a tcholï nga nata Abui Alona d’i, wani a tcholî kur duniyad’a ka hî. 17Duniyad’a nga d’i kal lei ki d’od’ok mata pet, wani sama nga mi le minda hAlonid’ina mba mi kak didin. 18Grona, ad’u dabid’a ar go. Agi humugi adjeu ala Ma djangûna hi Christ-sâ nga mi mba; ki tchetchemba, suma djangûna hi Christ-sâ ablaud’a a mba wa da’. Ni na ba, ei wei ala ad’u dabid’a mba wa go. 19Gagazi, sum ndazina a nga ni meina d’i. Ni kayam ndata ba, azi wal ki sed’ei wana. Ladjï azi nga ni meina ni, azi nga ni kaka ki sed’eya. Wani azi wal wa ki sed’eya, kayam ei wei tetet ala azi nga ni meina d’i. 20Agi tagiya, agi vagi Muzuk ma bei tchod’a ma Christ mi vom kagi d’igi a vo mbulâ na. Kayam ndata, agi pet wagi gagazid’a. 21An b’irigi nala agi wagi nga gagazid’a d’uo na d’i, wani agi wad’u, agi wagi ala zla d’a kad’a nga ndeï kur gagazid’a d’i. 22Ma ka zlad’a ni nge ge? Ni ma tin vunam ala: Jesus ni Christ máma d’uo na. Wana ni Ma djangûna hi Christ-sâ, nala, ni ma tin vunam yam Abui Alona ki Goromina. 23Sama tin vunam yam Alona Goromina, mi nga kAbum mbi, wani sama de woi yam Alona Goromina, mi nga kAbum mi. 24Kayam ndata, agi ngomogi zla d’a agi humugizi avok deid’a kurugiya. Le zla d’a agi humugizi avok deid’a nga kaka kurugiya ni, agi mba kagagi zlapa tu kAlona Goroma kAbum mi. 25Wana ni vama Christ mi hle vunam kam á heizina: Nari d’a didinda. 26An b’irigi ahle ndazina ni yam suma a hal á vid’igi woina. 27Christ mi vo Muzuk máma kagiya. D’igi Muzu’â nga kaka kurugi na, kid’ak magi d’ala sama dingâ mi had’agiya d’a ti nga d’i. Muzuk mama nga mi had’agi yam ahlena pet, ni zla d’a irat ta bei ka zla d’a ba d’a. Kayam ndata, agi gagi yagi kä ad’u hata hi Muzuk mamid’a, agi kagagi zlapa tu ki Christ mi. 28Grona, ki tchetchemba, agi kagagi zlapa tu ki Christ, kayam fata mam nde woid’a, ei mba kagei bei mandarâ ba. Kur bur ma mba mambina, zulona mba mi lei avorom mbuo mi. 29Le agi wagi Christ ala ni Ma d’ingêrâ ni, ar agi wagi ala nge nge pî ma nga mi le d’ingêrina ni ma Alona mi vud’uma mi. 


1 JEAN 31Agi gologi andjaf o d’a ngol la Abui Alona mi lat kei á yï ala ei ni groma d’a. Ni ei wana. Suma duniyad’a a wei nga d’i, kayam azi wum nga d’i. 2Buniyôn suma od’a, ki tchetchemba, ei nAlona groma. Ei wei nga d’uo tua ei mba mbud’i ni nana, wani ei wei ala fata Christ mi nde woid’a, ei mba mbud’i dedege d’igi mam na, kayam ei mba wum mbei tetet. 3Nge nge pî ma nga ki hur ma tin mama yam Christ-sâ, nga mi ngom tam yed’et, d’igi Christ tamba ni Ma bei tchod’a ba na mi. 4Nge nge pî ma nga mi le tchod’ina, nga mi tchila ni yam gata hAlonid’a, kayam tcho d’a led’a ni tchila yam gata. 5Agi wagi ala Jesus Christ mi nde tam mbei ná hle tchod’a hi sumid’a woyo. Tchod’a nga kurum mbi. 6Nge nge pî ma nga mi tit zlapa tu ki Christ-sâ, nga mi le tchod’a d’i. Nge nge pî ma nga mi le tchod’ina, mi gol nga Christ si, mi wum nga d’uo mi. 7Grona, ar sa vid’igi woi d’i. Sama nga mi le d’ingêrina ni d’ingêr d’igi Jesus Christ tamba ni ma d’ingêr na mi. 8Sama nga mi le tchod’ina ni ma hi Diable-na, kayam Diable nga mi le tchod’a ni kad’u tinda dei. Alona Goroma mi nde tam mbei ná b’lak sunda hi Diable-d’a woyo. 9Nge nge pî ma Alona mi vud’uma, nga mi i avok kur tcho d’a led’a d’i, kayam mi hle ni zlad’a hAbum Alonid’a. Nga mi i avok kur tcho d’a led’a d’uo d’a, kayam Alona mi vud’um mi mamu. 10Lovot ta ei wei Alona groma ki Diable groma teteta ba wana: Nge nge pî ma nga mi le d’ingêra d’uo na, nga mi le yam wiyema d’uo mi ni, nAlona goroma d’i. 11Wana ni zla d’a agi humugizi avok dei ala: Ei lei yam teya d’a. 12Ar ei lei d’igi Kain na d’i. Mam mi ma hi Ma tchonina, mi tchi wiyema. Mi tchumî yam me ge? Kayam sun nda Kain mi lata ni tchod’a, wani sun nda wiyema mi lata ni d’ingêr. 13B’oziyona, le suma duniyad’a a nga noyôgi woyo ni, agi lagi atchap pi. 14Ei weya, ei buzugi wa woi kur matna, ei kalei wa kur arid’a. Ei weizi ni kayam me ei nga lei yam b’oziyoina. Sama nga mi le od’a d’uo na, mi nga ni kur matna tua. 15Nge nge pî ma nga mi noî wiyemina, ni ma tchi matna. Agi wagi ala nge nge pî ma tchi matna, ari d’a didinda nga kurum mbi. 16Christ mi he tam mbei keya. Kayam ndata, ei wei wa od’a, mbeî ei teid’a hei tei woi yam b’oziyoina na mi. 17Le sana nga kahle suma kur duniyad’ina abomu, le mi we wiyema nga kur kid’aka ba, mi duk iram mbei kamu ni, ni nana ba, mi dala mam nga mi le od’a yam Alona ge? 18Grona, ar ei leigi od’a ki zla d’a ded’a d’oze ki vunei go d’i, wani ki sun nda led’a ki gagazid’a. 19Ni hina ba, ei mba wei ala ei ni kur gagazid’a, kayam ei nga ki hur ma bei mandarâ ba na avok Alona. 20Le huri nga mi vei ki zlad’a ni, Alona mi ngola kal huriya, mi wahlena pet mi. 21Buniyôn suma od’a, le huri nga vei ki zlad’a d’uo ni, ei nga ki mandarâ avok Alona d’uo mi. 22Vama lara pî ma ei nga tcheneizina, ei nga feizi abomu, kayam ei nga ngomei vun ma he mama, ei nga lei ahle suma a lum tam djivid’ina mi. 23Wana ni vun ma he mama: Ei hei gagazid’a ki simiyê Goroma Jesus Christ, ar ei lei yam tei d’igi Christ mi hei vuna na mi. 24Sama nga mi ngom vun ma hed’a hAlonina, mi nga ni kaka zlapa tu kAlona, Alona tamba mi nga kaka kurum mi. Ei wei ala Alona nga kaka kuri ni yam Muzuk mam ma mi heizina. 


1 JEAN 41Buniyôn suma od’a, ar agi hagi gagazid’a yam suma a nga dala azi nga ki Muzu’â na pet ti, wani agi kugugiziya, agi wagazi na ni muzuk máma tcholï ni gen Alona zu? Kayam suma djok vun suma lop ira ablaud’a a b’rau wa woi kur duniyad’a. 2Lovot ta agi wagi ki Muzu’â hAlonina ba wana: Muzuk ma lara pî ma nga mi de woi ala: Jesus Christ mi mbut sana na, ni muzuk ma tcholï gen Alonina. 3Wani muzuk ma lara pî ma nga mi de hina woi yam Jesus d’uo na, mi nga ki muzuk ma tcholï gen Alonina d’i. Ni ma nga ki muzu’â hi Ma djangûna hi Christ-sîna, ni ma agi humugizi zlam ala nga mi mbana; ki tchetchemba, mi nga kur duniyad’a da’. 4Grona, agi ni suma hAlonina, agi kuzugi wa yam suma djok vun suma ka zlad’a, kayam Muzuk ma nga kurugina, mi kal muzuk ma nga kur suma duniyad’ina ki ngola. 5Azi ni suma hi duniyad’ina. Kayam ndata, zla mazi d’a ded’a ni hi duniyad’id’a, suma duniyad’a a nga humuzi mi. 6Wani ei ni suma hAlonina. Sama wAlonina nga mi humiya, sama hAlona d’uo na nga mi humi d’i. Ni kayam ndata ba, ei wei ki Muzuk ma gagazina ki muzuk ma vit suma woina. 7Buniyôn suma od’a, ar ei leigi yam teya, kayam od’a tcholï nata Alona. Sama lara pî ma nga mi le od’ina, Alona mi vud’um mi mamu, mi wAlona mi. 8Sama nga mi le od’a d’uo na, mi we nga Alona d’i, kayam Alona tamba ni od’a. 9Wana ni od’a hAlona d’a mi tageizi woid’a: Alona mi sunï Gorom ma tu gid’engâ kur duniyad’a, kayam ei kagei karid’a kamu. 10Wana ni od’a: Ni ei ba, lei yam Alona d’i, wani ni mam ba, mi le keya, mi sunï Goroma á mbut tam vama ngat buzuna kayam mam vat hurum mbei yam tcho meid’a. 11Buniyôn suma od’a, le Alona mi le kei na ni, mbeî ei lei yam tei na mi. 12Sa tu pî mi we nga Alona ki iram mbi. Le ei nga lei yam teya ni, Alona mi nga kaka kuriya, o mamba ndak memet kuri mi. 13Hina wani, ei mba wei ala ei nga kaka zlapa tu kAlona, mam nga kaka kuri mi, kayam mi hei wa Muzuk mama. 14Ei wei wa, ei nga lei glangâsâ ala: Abui Alona mi sunï Goroma á sut suma kur duniyad’ina. 15Sama lara pî ma mi de woi ala: Jesus nAlona Goroma na, Alona mi nga kaka kurumu, mam mi nga kaka zlapa tu kAlona mi. 16Hina, ei wei od’a hAlona d’a mi lat keid’a. Kayam ndata, ei hei gagazid’a kad’u. Alona tamba ni od’a. Sama nga mi le od’ina, mi nga ni kaka zlapa tu kAlona, Alona mi nga kaka kurum mi. 17O d’a ndak memet kurid’a ba wana: Kayam ei mba tcholei avorom bei mandarâ ba kur bur ma ka sariyad’a. Kayam kak meid’a kur duniyad’a ka hid’a ni d’igi kaka hi Jesus Christ-sa na. 18Sama od’a nga mi le mandar ri, kayam o mam mba ndak memeta nga d’i dik mandarâ woyo. Hina, sama nga ki o d’a memeta d’uo na, nga mi le mandarâ, kayam mandarâ nga mi mba ki ndaka. 19Ei nga lei od’a, ni kayamba Alona mi le kei adjeud’a. 20Le sana mi dala: An le yam Alona, le mi noî wiyema woyo ni, mam mi ma ka zlad’a. Le mi le nga yam wiyem ma mam wum ki irama d’uo ni, ni nana ba, mi le yam Alo ma mam wum nga ki iram mbuo na ge? 21Wana ni vun ma he ma Christ heizina: Nala, sama nga mi le yam Alonina, djivid’a mi le yam wiyema mi. 


1 JEAN 51Nge nge pî ma mi he gagazid’a ala: Jesus ni Christ-zu na, Alona mi vud’um mi mamu. Nge nge pî ma nga mi le yam Abum Alonina, mi le ni yam goroma mi. 2Kayam ndata, le ei nga lei yam Alona, le ei gei yei kä ad’u vun ma he mama ni, ei wei ala ei nga lei ni yam Alona groma mi. 3O d’a lat yam Alonid’a ba wana: Ei gei yei kä ad’u vun ma he mama. Vun ma he mama nga ni vama anek ki, 4kayam nge nge pî ma Alona mi vud’uma, nga mi kus yam duniyad’a. Vama kus yam duniyad’ina ni he gagazi meid’a. 5Sama kus yam duniyad’a ni nge ge? Ni ma he gagazid’a ala: Jesus nAlona Goroma na hol. 6Jesus Christ ni ma mba ki mbina hi batem mamba ki buzuna hi mat mamina. Mi mba ni ki mbina hol li, wani ki mbina ki buzuna mi. Muzu’â hAlonina tamba ni ma nga mi le glangâsâ kama, kayam Muzu’â ni ma gagazina. 7Suma a le glangâsâ kama ni hindi, 8nala, Muzuk mama ki mbina ki buzuna; azi hindi zla mazid’a ni tu. 9Le ei nga vei glangâsâ hi sumina ni, glangâsâ hAlonina ba ngola kala. Glangâs máma ni glangâs ma Alona mi lum yam Goromina. 10Sama he gagazid’a yam Alona Goromina, mi nga ki glangâs mama kurumu. Sama he gagazid’a yam Alona d’uo na, mi mbut Alona ni ma ka zlad’a, kayam mi he nga gagazid’a yam glangâs ma Alona mi lum yam Goromina d’i. 11Wana ni glangâs mama ala: Alona mi hei wa ari d’a didinda, ari ndata ti nga kur Goroma. 12Sama nga kAlona Goromina, mi nga karid’a, sama nga kAlona Goroma d’uo na, mi nga karid’a d’i. 13An b’ir ahle suma wana mi agi suma hagi gagazid’a ki simiyê Alona Goromina, kayam agi wagi ala agi nga kari d’a didinda. 14Wana ni hur ma tin mei ma kama ala: Le ei tchenei ni me pî kur min mamba ni, nga mi humiya. 15Le ei wei ala nga mi humi yam me pî ma ei tchenem kama ni, ei wei ala nga mi heiziya mi. 16Le sana mi we wiyema mi le tcho d’a ndak á im kur matna d’uo d’a ni, mi tchen Alona kamu. Hina wani, Alona mba mi hum arid’a, nala, nga mi he arid’a mi suma le nga tcho d’a ndak á izi matna d’uo d’a. Wani tcho d’a le d’a ding nga ndak á i sana kur matnid’a ti nga. Ni kayam ndata ba, an nga ni dala: Ar mi tchen Alona kad’u d’i. 17Ahle suma led’a suma bei d’ingêrâ pet ni tchod’a; tcho d’a le d’a ndak á i sana kur matna d’uo d’a ti nga mi. 18Ei wei ala sama Alona mi vud’uma, nga mi le tchod’a d’i, wani Alona Goroma nga mi ngomomu, Ma tchona mi ndak á lum va d’uo mi. 19Ei wei ala ei ni suma Alona mi vud’ina, duniyad’a pet nga nabo Ma tchona mi. 20Ei wei ala Alona Goroma mi mba wa da’, mi hei wa ned’a á wei Alo ma gagazina. Ei nga zlapa tu kAlo ma gagazi máma ni yam Goroma Jesus Christ. Mam nAlo ma gagazina, mam nari d’a didinda mi. 21Grona, gologi tagi djivi ki fileina.

  http://www.bible.is/MPGABT/1John/1/D

Nenhum comentário:

Postar um comentário