quarta-feira, 18 de fevereiro de 2015

1 JOHN: Abau

 
1 John 1: 1Hromkwe hme kokwe Su-lwayr-ok, peyr-mon-ar ma lwak pie o, pokon o, sokwe mesor kow. Suw senkin, ok sokukwe hrom po lonuayk, hrom po lira, hrom hromo nene arian non po lira memeir nonkway, seyr hromo iha hom po sapou. 2Su-lwayr-yor hokwe po lousne, seyr hromkwe po lira, sa hromkwe seme me-sor kumay, seyr hromkwe su lwayr peyow peyow ey, Aio se nion ma non-wak, sa hromo mon ma lousne kokwe hme mesor sanion sow kow. 3Hrom ma lira o, ma lonuayk o, hme seme mesor sanion sow kow, hom hreme nion non-wawwaw e. Sa hromkwe Aio o, hyo Ney Jisas Krais o, hehe nion non-wawwaw. 4Hromkwe somokwe seme mey, hromo kar ley yor hom woki lwak e hokuaw. 5Ok yaprue, hrom Jisas so mon ma lonuayk kokwe, hromkwe hme senkin me-sanion sow kow: God hiykwe ey-yar; hyo mon kokwe eym lopa-ar. 6Sa hromkwe senkin me ankin, hromkwe hye nion non-waw-waw, sawk eym-nawp mon lanio ankin, hromkwe okrei-ok lohruw-a, seyr ok-ar-ok mon lwak pey. 7Sa hromkwe God hiy ey-yar mon ma lwak senkin, ey-yar mon lanio ankin, suw hromkwe wayh-wayh me nion non-wawwaw. Seyr Jisas, hyo Ney so nioh hokwe hreme hawr mnow-mnow kow, hromo weyn-paweyn piap-araw poya-poya ko me. 8Sei, sawk hromkwe senkin me ankin, hromkwe yor piap-araw lopa, suw hromkwe hromkiaw-ayay me-loior kow. Seyr ok-ar-ok kokwe hromo uron mon lwak pey. 9Sawk hromkwe hromo weynpaweyn piap-araw me me-hrorsay kow ankin, hiykwe ok-loray me nakruok wayr uwr, seyr yor luw-luw-aw meio uwr. Hiykwe hromo weynpaweyn piap-araw me ya lorionay kow a, seyr hromo yor naway-naway me ya nak-hawr mnow-mnow kow a. 10Sa hromkwe senkin me ankin, hromkwe yor piap-araw me mon pa, suw hromkwe God se senkin me, hiykwe okrei-uwr, seyr hyo ok kokwe hromo uron mon lwak pey. 
1 John 21Hano ney ihey-ar om, hakwe mamey okukwe hme seme mey kow ha, hom yor piap-araw mon lopa lwak e. Sawk uwrsa, yor piap-araw posokwaw mon e, hromkwe uwr prueyn non. Hiykwe Jisas Krais, Luw-luw-aw ma lwak hiy non. Hiykwe Aio se nion non-ohruw-a, hreme hiy-orok. 2Yerki, hromo weynpaweyn piap-araw me mon-say kow ey hokwe, mo Krais hiykiaw-aw. Seyr hromo homkwaw korey, sawk uwrsa kipay lowpwarowp mo weyn piap-araw seyn. 3Hromkwe God so me-kupaku-ok mo meyki ley ankin, suw hromkwe senkin nonkway popriy, hromkwe God se nonkway. 4Uwr prueyn hiykwe God se nonkway ok me ankin, sawk God so me-kupaku-ok me hyaw lwak ankin, hiykwe okrei-uwr-ar. Ok-ar-ok kokwe hyo mon lwak pey. 5Sawk God so ok ke uwr posokwaw lonuayk me e, hyo yor God se uron-pi ko-ar ma lwak hokwe mnow-mnow-aw ihey-ar po lousne. Sa hrom hye nion ma non-okin nasay mokwe, yerki senkin non nonkway: 6Uwr, God se nion non-okin nasay ok posokwaw me e, hiykwe Jisas hiykiaw po lanio, senkin kwa lanio. 7Hano wayh ihey-ar om, hakwe hme kokwe me-kupaku-ok iwon ke mey kow pey, sawk porih hom peyrmawk ma lonok pie hok non. Me-kupaku-ok paraw-uh sokukwe, ok hom ma lonuayk hok non. 8Sawk me-kupaku-ok sokukwe hakwe hme ok iwon ke hieyn ma-mey kow ha. Me-kupaku-ok sohok ko okar-ar kokwe Krais so mon o, hno mon o, senkin po lira. Payhokuaw, eym-nawp hokwe pa kiy-ey lowpway, sawk ey-ar hiykwe pa lyar. 9Uwr senkin posokwaw me e, “Hakwe ey-yar mon lwak”, sawk hiykwe hyo wayh se awnie awnie-aw lira ankin, hiykwe peyr eym-nawp mon-aw lwak. 10Uwr, hyo wayh-ih se uron-pi ko-ar posokwaw lwak e, hiykwe ey-yar mon lwayr. Hyo yor mokwe uwr prueyn se liy mon piapay kuayk ley. 11Uwr, hyo wayh-ih se awnie awnie-aw posokwaw lira e, hiykwe eym-nawp mon lwak, seyr serey lanio liyawriy kwawk. Hiykwe yerki, hiy ma ley hokwe nonkway lwak pey, payhokuaw, eym-nawp sokukwe hye po mon kopyo. 12Hano ney ihey-ar om, hakwe hme seme mey kow, payhokuaw, hmo weynpaweyn piap-araw mokwe po lorionay kow, Krais so uru so kueir nonaw. 13Aio-om, hakwe hme seme mey kow, payhokuaw, homkwe uwr, enekwei lowpwarowp mo peyr-ar ko sok ma lwayr hokwe po nonkway. Uwr warkiayr-om, hakwe hme seme mey kow, payhokuaw, homkwe poup piap-araw se po lakre-akre ha. 14Ney-om, hakwe hme seme mey kow, payhokuaw, homkwe Aio se po nonkway. Aio-om, hakwe hme seme mey kow, payhokuaw, homkwe uwr enekwei lowpwarowp mo peyr-ar ko sok ma lwayr hokwe po nonkway. Uwr warkiayr om, hakwe hme seme mey kow, payhokuaw, homkwe krai non, God so ok kokwe hmo mon lwak wayr, seyr homkwe poup piap-araw se po lakre-akre ha. 15Ki ohiy o, ki ohiy so omeme o, seme uron-pi ko-ar peie lwak o. Unsaney ki ehe uron-pi ko-ar posokwaw lwak e, Aio so uron-pi ko-ar lwak yor kokwe hyo mon lwak pey. 16Payhokuaw, ki ohiy so yor lowpwarowp senkin, uwr-nawp paraw-uh so uron ko piap-araw o, iwar mo nene mo lira way nan koukou-ay yor o, omeme uwrsa hom ma nak-wayr me nak-me-heyr yor o, somokwe Aio so mon le pey, sawk ki ko me le. 17Ki o, omeme lowpwarowp ki ko, uwrsa hom ma nan koukou-ay o, somokwe lira por ha. Sawk uwr, God so uron ko so meyki ma ley hiykwe lwayr peyow peyow. 18Hano ney ihey-ar om, enekwei pariawey hokwe pau ohriar. Homkwe po lonuayk, uwr, okrei-krais-ok ma me hiykwe ya le a. Mo enekwei enkin hi, okrei-krais kraiar homkwe papo lousne. Sa hromkwe senkin seme nonkway, enekwei pariawey hokwe pau ohriar. 19Okrei-krais somokwe kristen-uwrsa, hromo sios se ma lokriy hain hom non, sawk homkwe uron kamon-aw non-swa-hokruw meio pa. Payhokuaw, homkwe hreme nion uron kamon-awaw non-swa-hokruw meio hokwe, homkwe hreme nion-aw po non-wak. Sawk uwrsa sohom hreme ma lokriy hain hokwe, hreme senkin mesair kow, homkwe hromo korey. 20Sawk hmo owh mon kokwe Krais hiykwe Niohney Pekney-weys se po swanon-yay kow, sa hmo lowpwarowp homkwe ok-ar-ok ke seme nonkway. 21Hakwe hmekwe sehe mey kow pey, homkwe okar-ok ke lawk-lawk. Sawk hakwe hom okar-ok ke ma nonkway, seyr hom senkin ma nak-nonkway, okar-ok hokwe, okrei-ok liy mon ousne ley, seme hokuaw mey. 22Okrei-uwr hokwe posokwaw so? Hiykwe uwr senkin ma me-mey-a-mey hiy non, Jisas hiykwe Krais korey. Uwr senkin sohokwe okrei-krais. Hiykwe Aio o, Ney o, hehe me-puar. 23Uwr prueyn hiykwe Ney se me-puar ankin, suw hiykwe Orih se nak-me-puar. Sawk uwr Ney se posokwaw mesor hrorsay e, suw hiykwe seyr Aio non. 24Ok, hom peyr-mon ma lonuayk pie kokwe, hmo uron mon senkin-awaw kwa nakruok wayr. Ok sokukwe hmo uron mon lwak ankin, homkwe Aio o, Ney o, hehe nion senkinaw non-okin nasay ey. 25Sa maym yaprue, hiy hreme ma me-loray kokwe senkin: su lwayr peyow-peyow ey hok non. 26Hakwe ok somokwe seme mey kow, hom uwr, hme yerki meykyay mon hiy-ey e ma mon me iray-iray non lwak e. 27Sawk Krais so Niohney, hme ma swanon-yay kow hiykwe hmo mon lwak. Sa homkwe uwr prueyn, hme ma-hiymon sorasor e liy ma-me ley. Payhokuaw, hyo Niohney hme ma swanon-yay kow hiykwe hmekwe ok lowpwarowp me hiymon sorasor, seyr Niohney sohiy so ok hme ma hiymon sorasor mokwe okar, okrei korey. Homkwe Krais se nion-aw kwa non-okin nasay, Niohney, hiy hme ma hiymon sorasor, senkin. 28Hano ney-om, homkwe hye nion senkin-aw seme non-okin nasay e, sa hyo ma-le enekwei hiy lousne ankin, hromkwe hyo inour mon kokwe hok lopa, seyr owh-mar lopa, nakrok ira huon ey. 29Homkwe nonkway, Krais hiykwe luw-luw-aw, sa homkwe senkin seme nonkway e, uwrsa lowpwarowp yor luw-luw-aw ko meyki ma pyay homkwe God so ney. 
1 John 31Aio so uron-pi ko-ar hreme aiopey hay ma kow hokwe, homkwe kwa nanpanan. Hyo uron-pi ko-ar aiopey hay ma lwak se hokuaw, hremekwe God so ney-ok seme me. Suw mo okar, hromkwe mo hyo ney. Meyk, uwrsa ki ko hom hreme nonkway lopa ma lwak hokwe senkin, homkwe God se nonkway lwak pa. 2Hano wayh ihey-ar om, enekwei ohokwe hromkwe God so ney. Sawk omok hrom penkin lousne ey hokwe, peyr kumay lwak pey. Sawk hromkwe senkin nonkway, Krais hiy lousne ankin, hromkwe hye hieyn lwak ey, payhokuaw, hromkwe hiy penkin nuw-wak e, sehe nuw-ira ey. 3Uwrsa lowpwarowp, Krais se uron hyohyo senkin ma lon homkwe, homkiaw-ayay senkin-aw mon mnow-mnow wayr, hiykiaw mnow-mnow-aw ma lwak senkin. 4Unsaney weynpaweyn piap-araw posokwaw mon e, hiykwe God so sow ke kamaun sow. Payhokuaw, weynpaweyn piap-araw kokwe mo sow ke ma kamaun sow hok non. 5Sawk hunkwe nonkway, Krais hiykwe mo sehe le, hromo weynpaweyn piap-araw me mon-say kow e. Seyr hiykiaw kokwe weynpaweyn piap-araw lopa. 6Suw senkin, unsaney Krais se nion ma non-okin nasay homkwe, weynpaweyn piap-araw sankaw seyn mon wayr pey. Sawk uwr weynpaweyn piap-araw posokwaw mon wayr e, hiykwe Krais se kokwe lira pa, seyr nonkway pa. 7Hano ney-om, homkwe unsaney prueyn hiy hme mon anyan swakreik ha e ipan peie lon o. Uwr, yor luw-luw-aw me ma meio hiykwe luw-luw-aw, Krais hiykiaw luw-luw-aw ma lwak senkin lwak. 8Uwr, yor piap-araw mon nonaw lwak ankin, hiykwe Poup so. Payhokuaw, peyr-mon-ar kokwe yor piap-araw mokwe mo Poup hiy nuw-mon weynpaweyn ha pie, senkin-awaw, enekwei ohiy seyn. Meyk, God so ney hiy ma lousne hokwe, senkin, hiykwe Poup so mey ke mon piapay e le. 9Uwr, God so ney posokwaw lwak e, hiykwe weynpaweyn piap-araw sankaw liy mon nakyas wayr ley. Payhokuaw, God so kyai kokwe hyo mon lwak. Seyr God hiy hyo Aio ma lwak se hokuaw kokwe, hiykwe weynpaweyn piap-araw sankaw liy mon ley. 10God so ney posokwaw lwak e, seyr poup so ney posokwaw lwak e, hromkwe senkin lira nonkway: uwr yor luw-luw-aw meio lopa lwak ankin, seyr hyo wayh se uron-pi ko-ar lwak lopa lwak ankin, hiykwe God so ney korey. 11Ok okukwe hom peyrmawk ma nuw-onuayk pie hok non. Hromkwe wayh-wayh me uron-pi ko-ar kwa lwak. 12Hromkwe Kein se hieyn peie lwak o. Hiykwe poup so, sa hiykwe hyo nay-ih arian Abel se sehe lokin kwor okrue. Hai, hiykwe hyo nay-ih se panoke lokin kwor okrue so? Meyk hokwe senkin, hyo weynpaweyn mokwe piap-araw, sawk nay-ih so weynpaweyn mokwe, luw-luw-aw. 13Hano wayh-om, unsaney ki ko hom hme awnie awnie-aw lira ankin, homkwe peie preiryay o. 14Hromkwe senkin nonkway, hromkwe lokrue ko hokwe, su lwayr ey mon po ka-oreys yay ha. Payhokuaw, hromkwe hromo wayh me uron-pi ko-ar lwak. Unsaney uron-pi ko-ar lwak lopa lwak ankin, hiykwe lokrue ko krai ouon mon-aw lwak. 15Uwr, hyo wayh se awnie awnie-aw lira ankin, hiykwe unsaney lokin kwor okrue uwr. Seyr homkwe senkin po nonkway, su lwayr peyow ey hokwe, unsaney lokin kwor okrue uwr so mon lwak pey. 16Hromkwe uron-pi ko-ar lwak yor, hok penkin lwak e, hromkwe yerki senkin non nonkway: Jisas Krais hiykwe hreme lokrue kow. Hrom seyn, hromo wayh me lokrue kow e. 17Uwr prueyn omeme kraiar non hiykwe, hyo wayh ohna ma lwak se lira ankin, sa hiykwe hyo wayh se uron lowk pa lwak ankin, hai, God so uron-pi ko-ar yor hokwe uwr sohiy so mon penkin lwak o? 18Hano ney om, uron-pi ko-ar lwak yor kokwe ok o, woki o, sohom non-aw peie mesair kow o. Sawk hromo uron-pi ko-ar lwak yor kokwe, hromo weynpaweyn o, ok-ar yor o, sohom non mesair kow e. 19Sa hrom ok-ar ko uwrsa ma lwak mokwe, hromkwe mo yerki sohiy nonaw nonkway, seyr hromkwe God so inour mon hok lopa kokwe yerki sohiy non-aw nak-orok. 20Hromo uron hiy hreme heyn-non-ok me ankin, hromkwe senkin nonkway, God hiykwe hromo uron so eir mon lwak, seyr yor lowpwarowp mo meykyar hom penkin lwak e somokwe hiykwe nonkway nuw-wak. 21Hano wayh ihey-ar om, sa hromo uron hom hreme heyn-non-ok me lopa lwak ankin, hromkwe God so inour mon hok lopa liy nak-orok. 22Hromkwe omeme, hye ma mesopok mokwe seme lonokyaw, payhokuaw, hromkwe hyo me-kupaku-ok me lonuayk me, seyr yor, hrom ma mon mokwe hyo uron se kar mon ey ihey. 23Seyr God so me-kupaku-ok kokwe senkin, hromkwe hyo Ney Jisas Krais so uru se-aw nan kiykiy-ay e, seyr wayh-wayh me uron-pi ko-ar lwak e, Krais hiy hreme ma me-kupaku senkin. 24Hyo me-kupaku-ok me posokwaw lonuayk me e, hiykwe God se nion non-wayr okin nasay, seyr God seyn, hye nion non-wayr okin nasay. Seyr Niohney, hiy hreme ma kow se hokuaw kokwe, hromkwe senkin nonkway, God hiykwe hreme nion non-wayr okin nasay.
1 John 41Hano wayh ihey-ar om, homkwe uwr, God so Niohney-non-ok ma me mo niohney lowpwarowp me peie nan kiykiy-ay o. Sawk hunkwe uwr seme kwa mon ir, hmo niohney sohokwe God so mon po le pak. Payhokuaw, okrei-profet kraiar homkwe kipay lowpwarowp mon po ley-neyney. 2God so Niohney se nonkway yerki hokwe senkin lwak: Niohney, uwrsa mon ma lwak hiykwe senkin me-hrorsay ankin, Jisas Krais hiykwe ki mon kokwe iwar mo owhi non nake, niohney senkin sohokwe God so. 3Sawk niohney, uwrsa mon ma lwak Jisas se senkin me-hrorsay lopa lwak ankin, niohney sohokwe God so korey. Niohney sohokwe okrei-krais so. Hiy le ey hokwe, homkwe po lonuayk, mo enekwei enkin ohiy seyn, hiykwe ki mon papo lousne. 4Hano ney-om, sawk homkwe God so. Homkwe okrei-uwrsa seme papo mon kre-a-kre su ha. Payhokuaw, uwr, hmo mon ma lwak sohokwe seirpey-ar, poup piap-araw, ki erey mon ma lwak so eir mon lwak. 5Okrei-uwrsa somokwe ok, ki erey suko me lohruw-a. Uwrsa ki ko homkwe sa hmo ok me lonuayk, payhokuaw, homkwe mo ki erey suko. 6Sawk hromkwe God so. God se posokwaw nonkway e, homkwe hromo ok me lonuayk. Uwrsa God se ma nonkway lopa homkwe, hromo ok me seyn lonuayk pey. Yerki sohiy non kokwe, hromkwe Okar-Niohney o, okrei-niohney o, liy lira mesor anon-anon popriy. 7Hano wayh ihey-ar om, hromkwe wayh-wayh me uron-pi ko-ar lwak e, payhokuaw, uron-pi ko-ar hokwe God so mon le. Uron-pi ko-ar posokwaw lwak e, hiykwe God so ney, seyr hiykwe God se po nonkway. 8Uron-pi ko-ar lwak lopa posokwaw lwak e, hiykwe God se nonkway lwak pey, payhokuaw, God hiykwe uron-pi ko-ar. 9God hiy hreme uron-pi ko-ar ma lwak hokwe yerki senkin non mesair kow, hiykwe hyo ney prueyn-awaw se ki mon me-ha, hrom hyo kueir nonaw su lwayr e. 10Uron-pi ko-ar lwak yor kokwe senkin: Hromkwe God se uron-pi ko-ar lwak pie pa, sawk hiykwe hreme uron-pi ko-ar lwak pie. Sa hyo Ney se sehe me-ha, God hiy hromo weynpaweyn piap-araw me hyo kueir nonaw mon-say kow e. 11Hano wayh ihey-ar om, God hiy hreme uron-pi ko-ar ma nuw-wak ohokwe, hromkwe seyr wayh-wayh me uron-pi ko-ar lwak e. 12Uwr prueyn God se lira pa, sawk hromkwe wayh-wayh me uron-pi ko-ar lwak ankin, God hiykwe hreme nion non-wayr okin nasay, seyr hyo uron-pi ko-ar weyn kokwe hromo ompok mon po nak-meio sopsop-ay lowpway. 13Hromkwe senkin nonkway, hromkwe God se nion non-wayr okin nasay, seyr hiykwe hreme nion non-wayr okin nasay, payhokuaw, hiykwe hreme hyo Niohney se po kow. 14Hromkwe senkin po lira, seyr senkin po mesor kumay kow, Aio hiykwe hyo Ney se ki mon sehe me-ha, uwrsa ki ko mo huonokyaw prosue uwr lwak e. 15Unsaney senkin posokwaw me-sanion sow e, “Jisas hiykwe God so Ney”, God hiykwe hye nion non-wayr okin nasay, seyr hiykwe, God se nion non-wayr okin nasay. 16Sa God hiy hreme uron-pi ko-ar ma lwak hokwe, hromkiaw kokwe nonkway, seyr sehe-aw nyay-nyay. God hiykwe uron-pi ko-ar. Uron-pi ko-ar nonaw posokwaw lwak e, hiykwe God se nion non-wayr okin nasay, seyr God hiykwe hye nion non-wayr okin nasay. 17Yerki sohiy non kokwe, uron-pi ko-ar lwak yor kokwe hromo ompok mon sehe meio sopsop-ay lowpway, hrom hok lopa lwak e, Lira-mesor-anon Enekwei hokwe. Hromkwe hok lopa ya lwak a, payhokuaw, hromo lwayr yor ki erey suko kokwe, Krais so ke hieyn. 18Uron-pi ko-ar yor kokwe hok-yor lopa. Uron-pi ko-ar yor ma meio sopsop-ay lowpway hokwe, hok-yor lowpwarowp me lono akre-akre su ha. Unsaney posokwaw hok e, uron-pi ko-ar kokwe hyo mon kokwe peyr meio sopsop-ay lowpway pa. Payhokuaw, unsaney posokwaw hok e, hiykwe yor piap hiy ma mon me hokuaw hye ma-sahre mon piap-ay ame nak-hok. 19Hromkwe uron-pi ko-ar seme lwak, payhokuaw peyr-ar kokwe hremekwe uron-pi ko-ar hokwe God hiy lwak pie. 20Unsaney senkin me ankin, “Hakwe God se uron-pi ko-ar lwak”, sawk hiykwe hyo wayh se awnie awnie-aw lira ankin, hiykwe okrei-uwr. Payhokuaw, unsaney hyo wayh hyo nene arian non ma lira se uron-pi ko-ar lwak lopa lwak ankin, hai, hiykwe God, hyo nene arian non ma lira lopa se uron-pi ko-ar penkin lwak o? 21Me-kupaku-ok, Krais hiy hreme ma kow kokwe senkin, unsaney God se uron-pi ko-ar ma lwak homkwe, hmo wayh-wayh me uron-pi ko-ar kwa nuw-wak.
1 John 51Unsaney senkin posokwaw nan kiykiy-ay e, Jisas hiykwe Krais, hiykwe God so ney prueyn. Unsaney Aio se uron-pi ko-ar posokwaw lwak e, hiykwe seyr Aio sohiy so ney se uron-pi ko-ar lwak. 2Hrom God so ney me uron-pi ko-ar ma lwak hokwe, hromkwe yerki senkin non nonkway, hrom God se uron-pi ko-ar ma lwak, seyr hyo me-kupaku-ok mo meyki ma nak-pyay hiy non. 3God se uron-pi ko-ar lwak yor hokwe senkin, hrom hyo me-kupaku-ok me ma nakruok hiy non. Seyr hyo me-kupaku-ok mokwe hremekwe honon honon korey. 4Payhokuaw, God so ney lowpwarowp homkwe ki ohiy so krai mokwe liy lono akre-akre su ha. Seyr hromkwe ki ohiy so krai mokwe, hromo nan kiykiy-ay yor ko kueir nonaw lono akre-akre su ha. 5Ki ohiy so krai mokwe posokwaw lono akre-akre su ha a? Uwr senkin ma nan kiykiy-ay hiykwaw-aw, Jisas hiykwe God so Ney. 6Jisas Krais hiykwe hu hye prouk ey o, nioh hye lokrue non swa-nonsow ey o, sohom non nake. Hiykwe hu non-aw nake pa, sawk hu o, nioh o, sohom non nake. Niohney hiykwe senkin me-kumay, sohokwe ok-ar, payhokuaw Niohney hiykwe ok-ar. 7Jisas Krais se ma me-kumay mokwe krompri, 8Niohney o, hu o, nioh o. Hom krompri kokwe ok kamon-aw-aw sokwe-aw mesor kumay. 9Ok, iwar hom hreme ma mesor kumay kow mokwe, hromkwe nan kiykiy-ay. Sawk ok, God hiykiaw hreme ma me-kumay kow kokwe, krai ipey-ar non, iwar mo ok mo eir mon lwak. Payhokuaw, ok sokukwe God so ok arian, hiy hyo Ney se nian ma lohruw-a kumay hiy non. 10Unsaney, God so Ney se posokwaw nan kiykiy-ay e, me-kumay ok sokukwe hyo uron mon lwak. Unsaney, God se nan kiykiy-ay pa posokwaw lwak e, hiykwe God se okrei-uwr po mon wak, payhokuaw, hiykwe ok, God hiy hyo Ney se nian ma lohruw-a kumay kokwe nan kiykiy-ay pa. 11Me-kumay-ok sokukwe senkin, hremekwe God hiykwe su lwayr peyow-peyow ey hokwe po kow. Su lwayr ey sohokwe hyo Ney so mon lwak. 12Hyo Ney se posokwaw me-huonok yawriy e, hiykwe su lwayr ey non. God so Ney se me-huonok yawriy pa posokwaw lwak e, hiykwe su lwayr ey lopa. 13Homkwe God so Ney so uru se nan kiykiy-ay uwrsa. Sa hakwe hme kokwe ok somokwe seme mey kow ha, hom senkin nonkway e, homkwe su lwayr peyow ey non. 14Hromkwe God so inour mon kokwe hok lopa seme lwak, payhokuaw, hromo uron homkwe sayp-ar senkin lwak, hrom hyo uron ko so liy-liy-aw pyay mesopok ankin, hiykwe hreme lonuayk. 15Hrom hye enekwei pohiy sok mesopok e, hiykwe hreme lonuayk. Hromkwe nonkway, sohokwe okar. Hrom senkin ma nonkway se hokuaw kokwe, hromkwe seyr senkin nonkway, hrom hye pay me mesopok e, hiykwe hreme kow. 16Hunkwe hno wayh, hiy yor piap, hye lokrue mon hiy-ey pa lwak ey ke mon se lira ankin, hunkwe hye God se kwa hiy-mesopok, sa God hiykwe hye su lwayr ey se ka kow. Hakwe unsaney hyo weynpaweyn piap-araw hom hye nian lokrue mon ma hiy-ey pa ma lwak se lohruw-a. Sawk weynpaweyn piap-araw har mokwe unsaney me mon okrue. Sa hakwe senkin me pey, hunkwe God se kokwe hno wayh hiy yor piap senkin ma lon se kwa hiy-mesopok. 17Yor naway naway lowpwarowp mokwe weynpaweyn piap-araw. Sawk weynpaweyn piap-araw har mokwe unsaney me mon okrue pey. 18Hromkwe senkin nonkway, God so ney homkwe yor piap-araw sankaw seyn mon wayr pey. Payhokuaw, hmekwe God so Ney hiykiaw hiy-orok eym, poup piap-araw hiykwe hme liy mon piapay ley. 19Hromkwe senkin nonkway, mo poup hiy kipay lowpwarowp me hiy-wayr hi, hromkwe God so ney. 20Hromkwe seyr senkin nonkway, God so Ney hiykwe po le, sa hiykwe hreme nonkway po kow, hrom God-ar se nonkway e. Hromkwe God-ar se nion non-wayr okin nasay, seyr hyo Ney Jisas Krais se nion o. Hiykwe okar-God, seyr hiykwe su lwayr peyow peyow yor hok non. 21Hano ney om, homkwe okrei-god mo meiaw mon kwa lwak.


 http://www.bible.is/AAUWBT/1John/1/D

Nenhum comentário:

Postar um comentário