quinta-feira, 19 de fevereiro de 2015

1 Yohanes: Abun

 
1 Yohanes 11Men krom subot Sukdu gato ós men kem ndo to kapyo mato kapyo. Sukdu ne kem kadit ketke ne it. Sukdu ne men jam re. Sukdu ne men me su men gro re, men sokwa pe, men syimtok mó re. Sukdu ne men kibot subere nin jam re. 2Sukdu gato ós men kem ndo ne bor mó re, men me re, ete men waii ki nai ye yi jam dom. Sukdu gato ós men kem ndo to kapyo mato kapyo, ketke kem su men bi Ai, Yefun Allah. Sukdu ne bor, men me, sane men waii kibot nai nin jam o. 3Suk gato men me si men jam ne, sukdu ne anato men waii ki nai nin jam subere nin si men tepsu yedik mo Yefun bi de-i. Men ki nai nin jam subere nin si men si men bi Ai, Yefun Allah sisu An bi Gan, Yesus Kristus sino tepsu dik. 4Men krom sukdu ré subere nin si men tepsu yedik sino subere men mit iwa wai o re. 5Sukdu gato men jam kadit Yefun Allah bi Gan, Yefun Yesus anato men waii ki nai nin do, Yefun Allah ne tepsu nombrak rer, An ben sukndo sor. Yefun Allah yo tepsu ndendu nde, An yo ben sukibit yo mo nde. 6Men ben sukibit kamdik-kamdik tepsu ye gato kem mo ndendu tó, ete men ki do, men si Yefun tepsu dik, sane it yo, men kidar kone. Sane o, suk mwa gato men ben ne yo tepsu Yefun Allah mit dom nde. 7Sarewo men ben men bi suk-i ne ndo, men ben suk tepsu ye gato kem mo pe gato rer, mo Yefun Allah bi de-i yo, men sino kem ndo su yu tepsu yedik mo Yefun bi rus-i it anane. Yefun Yesus kwop wa sukibit gato men ben ne, ben sato Yefun Allah bi Gan dé mus men bi siri or wé kadit men re. 8Men do ki do, men yo ben sukibit yo mo nde yo, men kidar men dakai anane, ete Yefun Allah bi sukdu gato sangge yo kem mo men mit nde. 9Yefun Allah ben suk tepsu An tom su men ne, An ben An bi suk-i ri-roi su men, sane men rek sukibit gato men ben ne wa An jam yo, bere Yefun Allah yo maskwa men mo sukibit ne o nde, bere An nutbot sukibit gato men ben ne o nde. Orete An ós men subere sukibit gato men ben ne yo ut mo men o nde. 10Yefun Allah ki do, men yetu sino ben sukibit mó re. Sane men do ki do, men yo ben sukibit yo mo nde yo, tepsu men ki do, Yefun Allah kidar it anane, sane Yefun Allah bi sukdu yo kem mo men mit nde. 

1 Yohanes 21Ji krom surat ré wa nin, ji bi pá mo Kristus bi de-i ne subere nin yo ben sukibit yo o nde. Sarewo ye do ben sukibit mó yo, men bi yegweswai mó. Men bi yegweswai anato Yesus Kristus gato ben bi suk-i ri-roi. An ki sukndo wa men mo men bi Ai, Yefun Allah gwem. 2Yesus Kristus bi nggwa kwop wa tot men bi suktot mo sukibit gato men ben ne wé re. An tepsu suksom gato totwa sukibit gato men ben ne sor nde, wo An totwa sukibit gato men yetu mwa mo bur ré iwedewe ne sino ben ne or re. 3Men benbot Yefun Allah bi sukduno-i ne yo, bere men jam mone do, men jam Yefun Allah sisu ndo mone, men si Yefun Allah tepsu dik. 4Ye gato ki do, an sa, an jam Yefun Allah sisu ndo, sarewo an yo benbot Yefun Allah bi sukduno-i nde yo, ye ne kidar, Yefun Allah bi sukdu gato sangge yo kem mo an mit nde. 5Ye gato benbot Yefun Allah bi sukduno-i ne yo, ye ne bi sukjimnut sye kas subot Yefun Allah sisu sangge it. Men ben suk sane anato men jam do, men si Yefun Allah tepsu dik it. 6Ye to ki do, an sa, si Yefun Allah tepsu dik it yo, bere an ben an bi suk-i tepsu Yesus Kristus ben ne et. 7Ji bi nji, ji bi nyanggon gato ji jimnotku, sukduno gato ji krom ré, sukduno be nde, wo sukduno rok gato nin jam kadit ketke nin mit si nin onyar kem mo Yesus Kristus. Yefun Allah bi sukduno ré nin dakai jam mó re. 8Nin da jam, sarewo sukduno gato ji krombot ré anato sukduno gato be dom. Sukduno be ré bor mo suk gato Yesus Kristus ben ne. Or o sukduno be bor mo nin dakai dom. Sane ndendu bi suk-i ne titi wé, ete sukru gato sangge rer ku men it. 9Ye gato ki do, an sa, ben suk gato ndo, tepsu ye gato kem mo pe gato rer ete an bariket an bi nji ne yo, ye ne tepsu ye gato kem mo ndendu tó, an ben an bi suk-i ibit anane. 10Ye to bi sukjimnut sye kas subot an bi nji, an ben sukndo tepsu ye gato kem mo pe gato rer re. Sane an yo ben suk gato ben nje ges mo os ibit mo nde. 11Sarewo ye to bariket an bi nji ne, an tepsu ye gato kem mo ndendu tó, an ben sukibit petok sor. An jam nde pe gato an mu mone ware, ndendu kewa an gro ré, an ben an bi suk-i daret sor. 12Ji krom sukdu ré wa nin, ji bi pá, we men jam do, Yefun Allah yo maskwa nin mo sukibit gato nin ben ne o nde. An yo nutbot sukibit ne o nde, we Yesus Kristus tot wé re. 13Ji krom surat ré wa nin, ji bi yenggrás, we nin mit kem mo Yefun Yesus gato kem kadit ketke ne it. Ji krom surat ré wa nin, ji bi yemsok ji bi nggónnak, we nin sa, nin nggi wai kadit biris bi yekwesu re. 14Ji krom surat ré wa nin, ji bi pá, we nin mit kem mo men bi Ai, Yefun Allah it. Ji krom surat ré wa nin, ji bi yenggrás, we nin mit kem mo Yefun Yesus gato kadit ketke ne it. Ji krom surat ré wa nin, ji bi yemsok ji bi nggónnak, we nin bi sukjimnut nggi, nin grem Yefun Allah bi sukduno mo nin mit si nin onyar, nin nggi wai kadit biris bi yekwesu re. 15Nin mit iwa sukibit mo bur ré nde. Suk mwa ne sino gato ibit mo bur ré, nin bariwa. Ye gato iwa sukibit mo bur ré, ye ne bariwa men bi Ai, Yefun Allah it anane. 16Sukibit mwa gato mo bur ré sato, ye bi sukjimnut sye wa benbot sukjimnut gato tik ye mit wa ben sukibit ket ye í ne e, ye gro sye wa suk e, ye dakai un ye dakai mo suk gato ye ku si suk gato ye ben e ne. Sukibit mwa ne yo ma kadit men bi Ai mo gu nde, wo suk mwa ne ma kadit yetu mo bur ré kaii. 17Sukibit mwa gato mo bur ré si sukibit gato ye iwa ye ben ne, yo nam nde ge, bere or re. Sarewo ye gato ben bi suk-i tepsu Yefun Allah mit yo, bere ye ne kem ndo to kapyo mato kapyo. 18Ji bi pá, karowa bur ré kru it. Ye ki sukdu ré nai nin jam suga nyim sare do, karowa bur ré kru yo, yekwesu mo yeko wa Kristus ma. Ré ne biris bi yekwesu bi yeko wa Kristus ne deyo ma mó re. Sane men jam do, karowa bur ré kru it. 19Suga nyim ye gato sok mo yeko ne, án sisu men, orge án mu kadit men re. Ye gare da si men, sarewo án yo mit dik su men nde. Sato án mit dik su men yo, bere án yo mu kadit men nde, sarewo án mu kadit men, ete mone men jam do, án yo mit dik su men mo nde. 20Sarewo Yesus Kristus syo Yefun Allah Gen bok nggwa mo nin re. Sane anato nin yé mwa ne sino jam sukduno gato sangge it. 21Ji krom surat ré wa suma ne? Ji krom surat ré we nin yo jam sukduno gato sangge ne nde bado? Sane nde, wo nin jam sukduno gato sangge ne it. Nin jam do, sukduno gato sangge ne, sukdu mone mwa ne sino sangge sor, kwa yo gato sukkidar yo mo nde. 22Je u anato kidar suk ne? Ye gato kidar suk bere ki sato ré do, Yefun Allah yo bes Yefun Yesus gum Kristus nde. Yefun Allah yo syogat Yefun Yesus ma mo bur ré wa ós men yetu nde. Ye gato ki sukdu sane anato tepsu yekwesu mo yeko wa Kristus. Ye ne bariket men bi Ai, Yefun Allah si Yefun Allah bi Gan ne sino. 23Ye gato bariket Yefun Allah bi Gan, bere ye ne si Yefun Allah yo tepsu dik nde. Sarewo ye to ki do, an onyar kem mo Yefun Allah bi Gan yo, bere ye ne si Yefun Allah tepsu dik dom. 24Sane yo, sukduno gato nin jam kadit kam gato nin onyar kem mo Yefun su ketke ne, nin napawa pe. Nin do mewa sukduno ne sisu ndo yo, bere nin si nin bi Ai Yefun Allah si Yefun Allah bi Gan ne tepsu dik petok sor. 25Sane Yesus Kristus dakai tom su men do, bere men kem ndo to kapyo mato kapyo. 26Ji krom sukdu ré wa nin subot ye gato werwa ben kidar nin brek kadit os gato ndo ete simo os ibit. 27Yesus Kristus syo Yefun Allah Gen bok nggwa mo nin dakai mo re. Yefun Allah Gen kem mo nin mit si nin onyar sane yo, nin yo mitwa ye yi ma duno nin nde, we Yefun Allah Gen mo nin mit ne dakai duno nin subot suk mwa ne sino. Sukduno gato Yefun Allah Gen duno nin su ne sangge, yo siri mo nde. Sane nin jambot sukduno ne, nin si Yesus Kristus tepsu dik mo suk mwa gato nin ben mo bur ré sor. 28Sane ji kiwa nin, ji bi pá nin do, nin si Kristus tepsu dik petok sor, subere su kam gato An satu ma ne yo, bere nin ku An tepsu nin bi yesyim, bere nin damen wa An nde. 29Nin dakai jam do, Kristus ben An bi suk-i tepsu Yefun Allah mit. Sane nin jam o do, ye gato ben suk tepsu Yefun Allah mit ne anato tepsu Yefun Allah bi pá-i anane. 

1 Yohanes 31Yefun Allah bi sukjimnut kas subot men sye teker anato An kendo men do, An bi pá-i. Sangge, men anato Yefun Allah bi pá-i. Yé gato ben sukibit mo bur ré jam nde Yefun, sane anato án jam nde men dom. 2Ji bi nji ji bi nyanggon gato ji jimnotku, su ré men anato Yefun Allah bi pá-i it, sarewo suk gato bere bor mo men su kam sari ne ma, men jam ri nde tó. Su kam gato Yesus Kristus satu ma it yo, bere men kaim-i ne tepsu An kaim-i ne re. 3Ye gato kwabom kam mo sukdu gare gato bere bor ne, bere an mewa an nggwa subere an yo ben sukibit o nde, wo an ben an bi suk-i ne ndo sor, tepsu Yesus Kristus dakai ben ne. 4Ye gato ben sukibit bu, an ben an bi suk-i siri kadit Yefun Allah bi sukduno, we ye gato bariket Yefun Allah bi sukduno ne, bere an ben sukibit. 5Sarewo sukibit mwa gato men ben ne, Yesus Kristus ma mo bur ré wa tot wé kadit men re, nin dakai jam re. Sane dom, nin jam do, Kristus dakai yo ben sukibit yo mo nde. 6Sane ye gato si Yesus Kristus tepsu dik it yo, ye ne yo ben bi suk-i ibit gat o nde. Ye gato ben bi suk-i ibit gat yo, ye ne jam nde Yefun, ye gane yo jam Yefun wokgan yo dom nde. 7Ji bi pa, nin jammo ye gato werwa ben kidar nin brek kadit os ndo ete nin simo os ibit nde. Sukdu gato sangge anare, ye gato ben bi suk-i ndo tepsu Yefun Allah mit, ye ne anato Yefun Allah nai sok mo An bi rus-i, tepsu Yesus Kristus sok mo Yefun Allah bi rus-i re. 8Sarewo ye gato ben sukibit bu anato sok mo biris bi yekwesu bi rus-i, we biris bi yekwesu ben sukibit sane kadit ketke ne it. Sane anato Yefun Allah bi Gan ma mo bur ré subere An ben biris bi yekwesu bi os-i ibit or kai. 9Ye gato sok mo Yefun Allah bi rus-i, án yo ben bi suk-i ibit gat o nde, we Yefun Allah Gen kem pe mo án mit si án onyar it. Yefun Allah anato tepsu án bi Ai, sane án yo ben bi suk-i ibit gat o nde. 10Sane men jam Yefun Allah bi rus-i tara kadit biris bi yekwesu bi rus-i sato ré do, ye to bariwa ben suk tepsu Yefun Allah mit ne yo, ye ne yo sok mo Yefun Allah bi rus-i nde. Sane dom ye to bariwa bi sukjimnut sye kas subot ye yi ne yo, ye gane yo sok mo Yefun Allah bi rus-i dom nde. 11Kadit ketke men duno nin do, men bi sukjimnut sye kas subot yu et. 12Men ben suk tepsu Kain nde. Kain ne sok mo biris bi rus-i. An gu an dakai bi nji dowok kwop re. Suma ben anato Kain gu an bi nji dowok kwop ne? Kain bariket an bi nji dowok mo gato an bi nji dowok ne ben bi suk-i ndo, wo Kain ben bi suk-i ne ibit. 13Sane ji bi nji ji bi nyanggon, ye gato ben sukibit mo bur ré, bere bariket nin tepsu Kain bariket an bi nji dowok ne, nin yeket suk sane nde. 14Men bi sukjimnut sye kas subot men bi nji mo Kristus bi rus-i anato men jam do, men tepsu ye gato bere kwop o nde, men sok mo biris bi yekwesu bi de-i o nde, wo men sok mo Yefun bi de-i o re, men tepsu ye gato kem ndo to kapyo mato kapyo it. Sarewo ye gato bi sukjimnut sye yo kas subot ye yi nde, bere ye ne yo kem gesyos nde, wo bere an kwop rut re. 15Ye gato bariket ye yi ne yo, an tepsu ye gato gu ye yi kwop. Nin jam do, ye gato gu nje kwop daret, bere an yo kem ndo to kapyo mato kapyo nde. 16Men me mo Yesus Kristus sa, bere men jam suk gato men ben tepsu ye gato bi sukjimnut sye kas subot ye yi. An bi An nggwa wa kwop win men. Sane dom, men waii bi men nggwa wa men bi nji mo Kristus bi rus-i dom et. 17Sane ye gato ku suk mwa mo bur ré, ete an me an bi nji mo Kristus bi rus-i deyo gato yewa suk, wo an yo jimnotku ye ne nde, ete an yo ós ye ne su suk yo mo nde, or an ki do, an bi sukjimnut sye kas subot Yefun Allah, sane yo, men jam do, ye ne kidar ko ne. 18Ji bi pa, men ki su men syokwet do, men bi sukjimnut sye kas subot ye yi sane sor nde, wo men bi sukjimnut kas subot ye yi sisu sangge et, sane bere men ben suk yo bor mone. 19Men bi sukjimnut sye kas subot ye yi sisu sangge sane yo, men jam do, sangge, men sok mo Yefun Allah bi rus-i it anane. Sane dom, men ki suk su Yefun it yo, men nokwa An nde. Men do karowa Yefun Allah it yo, men kwabom dek bot suk yo o nde. 20Sane kapre men nut do men ye gato ben sukibit mwa, men yo nokwa Yefun nde, men karowa Yefun sor. Yefun Allah bi sukjimnut-i ne ko wai kadit men bi sukjimnut-i ne o re. Men jam do, Yefun jam suk mwa ne kom mo mit re. 21Sane ji bi nji ji bi nyanggon gato ji jimnotku, men ben sukibit mwa, ete men kwet su sangge it yo, men jam do Yefun Yesus tot suktot wa men ne. Sane men karowa Yefun sor, men yo nyuwa An nde. Men karowa An, men ki suk su An sor. 22Men do benbot An bi sukduno, ete men ben suk gato An iwa men ben ne yo, bere An syo suk gato men ndek mo An ne nai men sor. 23Yefun Allah duno men sare do, men mit si men onyar kem mo An bi Gan, Yesus Kristus, ete men bi sukjimnut sye kas subot yu, tepsu suk gato Yesus Kristus duno men su ne. 24Ye gato benbot Yefun Allah bi sukduno ne yo, bere ye ne si Yefun Allah tepsu dik. Sane dom Yefun Allah si ye ne tepsu dik. Men jam do, Yefun Allah si men tepsu dik, we An syo An Gen bok nggwa mo men it. 


1 Yohanes 41Ji bi nji ji bi nyanggon gato ji jimnotku, yé mwa ki do, Yefun Allah Gen bok nggwa mo án, sane sukdu gato án ki ne ma kadit Yefun Gen. Sarewo nin jammo án bi sukdu-i kekro nde, nin watbot sukdu ne kom-kem et, subere nin jam do, án ku án bi sukdu-i kadit Yefun Allah Gen bado, án ku án bi sukdu-i kadit suk yi neya e? Sane nin watbot sisu ndo et, we su ré yenabi mwa gato kidar suk mu ki bi sukdu-i bot peyo-peyo mó re. 2Nin watbot sukdu gato ye ki ne subere nin jam do, sukdu ma kadit Yefun Allah Gen bado, kadit biris bi yekwesu gato jom ye ne e? Nin nutbot sare do, ye gato ki do, Yesus Kristus ma mo bur ré su kaim tepsu yetu yo, Yefun Allah Gen kem mo ye ne. 3Sarewo ye gato ki do, Yesus Kristus ma mo bur ré yo tepsu yetu nde yo, Yefun Allah Gen yo kem mo ye ne nde. An ki an bi sukdu-i kadit biris bi yekwesu gato tepsu yeko wa Kristus ne. Nin dakai jam suga nyim ne do, biris bi yekwesu ne bere ma, ete ré ne, biris bi yekwesu ne ben bi suk-i bor mo bur ré re. 4Sarewo ji bi pa, nin anato sok mo Yefun Allah bi rus-i. Nin sa, nin misyar yenabi gato kidar suk ne si án bi sukdu-i, we Yefun Allah Gen gato bok Nggwa mo nin, An bi suktinggi nggi kadit biris bi yekwesu bi suktinggi-i gato jom ye gato jam nde Yefun mo bur ré. 5Yenabi gato kidar suk, án jam nde Yefun, sane án ki án bi sukdu-i ne ma kadit yetu bi sukjimnut-i sor re. Sane ye gato jam nde Yefun mo bur ré bere jambot yenabi ne bi sukdu-i. 6Sarewo men ré sok mo Yefun Allah bi rus-i, sane ye gato mit kem mo Yefun Allah, bere an jambot men bi sukdu-i. Wo ye gato jam nde Yefun Allah, bere an yo jambot men bi sukdu-i nde. Sane kadit ne men jam do biris gne pet moe ye ne. Men jam do Yefun Allah Gen bi sukdu-i ne sangge, tara kadit biris bi yewkesu bi sukdu-i gato gwat nje ges mo os ibit. 7Ji bi nji ji bi nyanggon gato ji jimnotku, men bi sukjimnut sye kas subot yu, we Yefun Allah ben men nggiwa men bi sukjimnut sye kas subot ye yi ne. Sane men bi sukjimnut sye kas subot ye yi, bere yé jam do, men anato ye gato mit kem mo Yefun Allah, gato Yefun Allah nai sok mo An bi rus-i ne. 8Yefun Allah bi sukjimnut sye kas subot yetu petok sor, sane ye gato bi sukjimnut yo kas subot ye yi nde, ye ne jam nde Yefun Allah re. 9Yefun Allah bi sukjimnut sye kas subot men yetu, An kadum nai men sare do, An syogat An bi Gan ka dik ne ma mo bur ré, subere men yetu ku os wa men kem ndo. 10Men jam sukjimnut sye gato kas subot yetu sisu sangge anare: Men yetu bi sukjimnut sye kas subot Yefun Allah sisu sangge nde, wo Yefun Allah sa, bi sukjimnut sye kas subot men yetu sisu sangge, anato bor mo gato An syogat An bi Gan ma bi nggwa kwop wa tot men bi suktot mo sukibit gato men ben ne wé re. 11Ji bi nji ji bi nyanggon gato ji jimnotku, Yefun Allah bi sukjimnut sye kas subot men, sane it yo, men waii bi sukjimnut sye kas subot yu dom et. 12Men yetu yo me Yefun Allah su men gro mo nde, sarewo men do bi sukjimnut sye kas subot yu it yo, bere Yefun Allah si men tepsu dik, ete An ben men nggiwa men bi sukjimnut sye kas subot ye yi sisu sangge tepsu Yefun re. 13Yefun Allah syo An Gen bok nggwa mo men anato men jam do, Yefun Allah si men tepsu dik, sane dom men si Yefun Allah tepsu dik. 14Men dakai me Yefun Allah bi Gan su men gro re, ete men ki sukdu subot An frekbot nje subere ye jam do, Yefun Allah syogat An bi Gan ma mo bur ré wa An nai men kadit sukye, ete kak os ndo wa men kem ndo to kapyo mato kapyo. 15Ye to ki an bi sukjimnut rer mo yé mwa gwem do, sangge, Yesus Kristus anato Yefun Allah bi Gan ne yo, bere Yefun Allah si ye ne tepsu dik. Sane dom, ye ne si Yefun Allah tepsu dik. 16Men dakai jam do, sangge Yefun Allah bi sukjimnut sye kas subot men. Men kwabom kam mo An do, bere An bi sukjimnut sye kas subot men petok sor. Yefun Allah bi sukjimnut sye kas subot men yetu petok sor. Sane ye to bi sukjimnut sye kas subot ye yi petok ne yo, ye ne si Yefun Allah tepsu dik. Sane dom Yefun Allah si ye ne tepsu dik. 17Sane men jam do, men bi sukjimnut sye kas subot ye yi sisu sangge yo, bere kam gato Yefun Allah ma ndobot men yetu, men yo nyuwa nde. Men ben men bi suk-i mo bur ré tepsu Yesus Kristus ben An bi suk-i, sane su kam ne yo, bere men yo nyuwa nde. 18Yefun Allah bi sukjimnut sye kas subot men, sane men yo nyuwa Yefun nde. Yefun bi sukjimnut sye kas subot men sisu sangge anato syun sukjimnut gato ben men nyu ne or wé kadit men re. Sane ye gato nyuwa kam gato bere Yefun ma ndobot men yetu ne, ye ne yo jam Yefun bi sukjimnut sye kas subot an sisu sangge nde tó. 19Yefun Allah bi sukjimnut sye kas subot men nyim, anato men waii bi sukjimnut sye kas subot An re. 20Ye gato ki do, an bi sukjimnut sye kas subot Yefun Allah, sarewo an yo bi sukjimnut sye kas subot an bi nji mo Kristus bi rus-i nde yo, ye ne kidar kone, we ye gato ku an bi nji, ete an yo bi sukjimnut sye kas subot an bi nji nde yo, sane bere an bi sukjimnut sye kas subot Yefun Allah gato an yo me su an gro nde sa u ne? Bere yo mo nde. 21Sane Yefun duno men su sukduno dik yo sare do, "Ye to bi sukjimnut sye kas subot Yefun Allah, an bi sukjimnut sye kas subot an bi nji ne dom et." 


1 Yohanes 51Ye gato nai sukjimnut do, sangge, Yefun Yesus anato Yekwesu gato Yefun Allah syogat ma mo bur ré kak os ndo wa men yetu tepsu Yefun Allah tom ne yo, ye ne sok mo Yefun Allah bi rus-i it. Sane ye gato bi sukjimnut sye kas subot an bi Ai mo gu bere bi sukjimnut sye kas subot bi Ai ne bi pá-i mwa ne sino dom. 2Men jam men bi sukjimnut sye kas subot Yefun Allah bi pá mwa ne sare, men bi sukjimnut sye kas subot Yefun Allah, ete men benbot An bi sukduno ne sor, 3we sare, men bi sukjimnut sye kas subot Yefun Allah, sane bere men benbot An bi sukduno ne sor. Men benbot Yefun Allah bi sukduno ne yo yé teker eta nde, 4we Yefun Allah bi rus-i sa, nggi wai kadit biris bi rus-i gato ben sukibit mo bur ré. Men onyar kem mo Yefun Yesus, sane anato men nggi wai kadit biris bi rus-i ne o re. 5Je u anato nggi wai kadit biris bi rus-i ne? Ye gato nai sukjimnut do, sangge, Yefun Yesus anato Yefun Allah bi Gan ne. 6Yesus Kristus anato Yefun Allah bi Gan. An ma mo bur ré, Yohanes ras An mo syur. An kwop, An dé sye re. An ma mo bur ré wa An ku syur sor nde, wo An ma wa An kwop An dé sye dom. Yefun Allah Gen anato ki rer wa men jam do, Yefun Yesus anato Yefun Allah bi Gan dom. Sane men jam do, sukdu ne sangge, we Yefun Allah Gen yo kidar men nde. 7Sukdu kwa gri gato kadum rer wa men jam do, Yesus Kristus anato Yefun Allah bi Gan ne anare: 8Kwa dik anato Yefun Allah Gen ki rer nai men jam. Kedowe anato tomgato Yohanes ras Yefun Yesus mo syur ye jam sukdu subot An mone. Si kedogri o Yefun Yesus dé gato sye wa men anato men jam do, sangge, Yefun Yesus ne anato Yefun Allah bi Gan. Kwa gri gane bi sukdu tepsu yu re. 9Yetu dakai ki bi sukdu-i sa, men jammo. Sarewo Yefun bi sukdu-i ne ndo wai wa men onyar kem mó, sane men jammo ete ndo wai. Yefun Allah ki bi sukdu subot An bi Gan ne rer wa men jam re, sane men jammo et. 10Ye gato nai bi sukjimnut do, sangge, Yefun Yesus anato Yefun Allah bi Gan, ye ne onyar kem mo sukdu gato Yefun Allah ki ne re. Sarewo ye gato nai bi sukjimnut do, an bariwa sukdu gato Yefun Allah ki ne, tepsu an ki do, Yefun Allah kidar ko ne, we án nut do sukdu gato Yefun Allah ki subot An bi Gan ne yo sangge nde. 11Yefun Allah bi sukdu-i anare do, An fro os wa men kem ndo to kapyo mato kapyo re. Yefun Allah syogat An bi Gan, Yefun Yesus ma mo bur ré kak os wa men yetu subere men kem gesyos re. 12Sane men kak men mit wa Yefun Allah bi Gan it yo, men kem ndo to kapyo mato kapyo it anane, wo men yo kak men mit wa Yefun Yesus nde yo, men yo kem ndo to kapyo mato kapyo nde. 13Ji krom surat ré wa nin yé gato onyar kem mo Yefun Allah bi Gan subere nin jam do, nin kem ndo to kapyo mato kapyo it. 14Men yo damen wa men ki suk su Yefun Allah nde, we men jam do, men ndek suk gato tepsu Yefun Allah mit it yo, bere An jam men bi sukdu re. 15Yefun Allah jam men bi sukdu subot suk gato men ndek mo An ne yo, sane men jam do, bere Yefun Allah syo suk ne nai men re. 16Men do me ye Kristen ge dik yo ben sukibit, ete sukibit ne yo ben os yewa mit wa an si Yefun Allah nde yo, nin benadi wa, nin ndek mo Yefun Allah subere Yefun Allah ós ye ne kem ndo satu. Sarewo sukibit gato ben os yewa mit wa an si Yefun Allah, we an bariket Yefun Allah it yo, men ndek mo Yefun Allah wa ós ye gato ben sukibit sane nde. 17Suk mwa gato men ben siri kadit Yefun Allah mit anato sukibit, wo sukibit mwa ne sino yo ben os yewa mit wa men si Yefun Allah nde. 18Men jam do, Yefun Allah bi pá-i, án yo ben sukibit gat o nde, we Yefun Allah bi Gan mewa án re. Biris bi yekwesu yo ku os wa ben sukye nai án nde. 19Biris bi yekwesu jowa yetu mwa ne sino gato ben sukibit mo bur ré, sarewo men jam do, men ré anato sok mo Yefun Allah bi rus-i. 20Men jam o do, Yefun Allah bi Gan ma mo bur ré re, An ós men, An kak men bi sukjimnut, subere men jam Yefun Allah gato sangge ne. Men si Yefun Allah gato sangge ne tepsu dik. Men si An bi Gan Yesus Kristus ne tepsu dik it. An sor anato Yefun gato sangge re. An sor anato ós men kem ndo to kapyo mato kapyo re. 21Ji bi pa, nin mewa nin nggwa subere nin som sukdaret win Yefun Yesus nde.
 

 http://www.bible.is/KGRLAI/1John/1/D

Nenhum comentário:

Postar um comentário