sexta-feira, 27 de março de 2015

1 Yohanes: Berik




1 Yohanes 11Surta aaiserem jemna igi ga Yesus Kristus. Jeiba Taterisi Uwa Sanbagirmana, ane Yesus Jeiba waakenfer gwelaiserem jamer abak-abaksus ga jes golmini. Gwanan-gwanansus Jeiba mesam gwel. Ane ai Yohanes, ane angtane nafsiserem jei mese ai Jei amsa sarbanant, ane Jei amsa damtanant nwena alemanaiserem jeme. Ai Jei amsama damdamtaasinint gwetmanawer, ane ai amsama entenent tafame. 2Abakfer gwela jeiserem mes iretyant ogiribe, ane ai Jei amsa damtanant. Ai angtane nafsi agma balbabili, "Seyafter aaiserem je bunar." Taterisi aaiserem ibe isa ajesa nasipmiwenaram, je ga Yesus Kristusem temawer. Waakenfer gwelaiserem jamer abak-abaksus Jei gwirinfeltye. Jei gwanan Uwa Sanbagirfar ge nwin, ane namwer ga mes iretyant onabe, ane ai amsa damtanant. 3Seyafter ai ajesa domolantam ane ajesa sarbilintim, jeiserem aime ibe isa ajesa nasipmini, jega aamei ai ase gam isa onsobaabili, ane nei seyafter daamfennaber ga nesa nwini. Ane nei daamfennaber ga nesa gwena Uwafar ane Tane Jemna, Yesus Kristus mese Jebar. 4Surta aaiserem ai ga aJem temawera tulistaabili, jega aamei afa jam isa eyebilirim ai agma gunurum, ini nemna bunarsus saaser-saasersusfer ga nei sege folbamini. 5Ula ga aare ajesa sarbilintim Tane Uwa Sanbagirmana Jemniwer, ane ula jeiserem ai ibe isa ajama bilipmini enggame: Uwa Sanbagiri Jei waakenam nafa galserem, ane Jemnibe gwini bastantowaifer fasfasus. 6Nei afa jam nesa gunurum enggame nei Uwa Sanbagirfar daamfennaber neya gwena, jengga afa nei gwinibe jeber-jeber nesa gowena, gam jega nei nena nejama afaf-afafsowena. Nei ga nena nejama afaf-afafsowena, nei enggame jewer negama gunurum nei Uwa Sanbagirfar daamfennaber neya gwena, jengga nei etam-etama kapka gwinimanaiserem nejesa eyebuwena. 7Jengga afa nei nafaber nesa gwenaram, ane jeber-jeber waakenater nesa eyebuwena, Uwa Sanbagiri gamserem Jei nafap aa gemer gwenaram, gam jega nei angtane nafsiber daamfennaber ga nesa gwena, ane Tane Uwa Sanbagirmanaiserem, aawisi Jemnaiserem etam-etama kapka nemnaiserem seyafter ga nes jem wirtabaipmini. 8Afa nei enggam jam nesa gunurum nei etam-etama kapkaiserem fas, gam jega nei nena jam nesa afaf-afafsona; ane taterisi bunarsusfer aaiserem Uwa Sanbagirminiwer fas nem inibe. 9Jengga afa nei etam-etama kapka nemnaiserem jam negama balbaibenerem Uwa Sanbagirfe, jepga Uwa Sanbagiri etam-etama kapka nemna ga nes wirtabaipmini, ane Jei etam-etama kapka nemna seyafter gemerserem nei ga nes aftabaabunnu jewer. Uwa Sanbagiri Jei jeiserem gam eyebili, aam temawer Jei aa jes gam bilirim jam eyebife, Jei seyafter jeiserem bunarsusfer gam eyebili. Ane Uwa Sanbagiri aa jes bilirim je bunar-bunarsus. 10Uwa Sanbagiri enggam gunu nei etam-etama nesa eyebuwena. Afa nei enggam nesa gunurum, "Ai etam-etama kapka ajama eyebiyen.", afa nei jes gamserem gam jam negama gunurum, nei enggam negama gunu Uwa Sanbagiri Jei afaf-afafa; ane Taterisi Uwa Sanbagirmana nem inip fas. 


1 Yohanes 21Am tane, ai surta aaiserem ip ai tulisulmini, jega aamei gam isa towaswena enggame aamei etam-etama kapkaiserem ijama eyebiyen. Jengga afa aamei etam-etama jam isa eyebilirim, Yesus Kristus sa damta, Jei nebe bunarsusfer eyeipmini, ane Jei waakenfer Jei se nasbili nem temawer Uwa Sanbagirem tarnap. 2Ane tere Yesusmanaiserem etam-etama kapka nemna ga nes jem wirtabaipmuwena. Ane etam-etama gam ke neman fenna, jengga angtane seyafter gemerserem etam-etama jeman mesna mesam wirtabaipmini. 3Afa nei jam nesa eyebilirim Uwa Sanbagiri aa jes bilirim, nei Jei nemsa gwebana Jei nem afelenf Jam gwefe. 4Angtane enggam aa jei gam gunurum, "Ai Uwa Sanbagirem afelna.", jengga jei jam eyebiyen Uwa Sanbagiri aa jes gam bilirim, angtane jeiserem jei afaf-afafa, ane jei taterisi bunarsusfer aaiserem Uwa Sanbagirminiwer jam taabiyen. 5Jengga angtane taterisi Uwa Sanbagirmana aa jei gam taayibenerem, angtane jeiserem jei Uwa Sanbagiriserem ga jes gam nesiktene waakenfer. Nei Uwa Sanbagiri jewer negama nesiktenerem nei ga jem negama gwerauwulu enggame, neiba Uwa Sanbagirfar ne daamfennaber ma gwena. 6Angtane enggam aa jei gam gunurum, "Ai Uwa Sanbagirfar daamfennaber ge nwini.", angtane jeiserem jei ga enggammer gam gwena gwela Yesusmana gemerserem. 7Am afelen mesna isa ajes nesiktababilirim, taterisi Uwa Sanbagiri aa jes balbabilim aamei ijesa eyebaabife, taterisi jeiserem ai ga ajes tulistaabili, taterisi jeiserem ibirimyen. Taterisi Uwa Sanbagirmana jeiserem jeba fwatermanam ijesa saribesiwenantam, aamei Yesus gwanan igalaba tebanantam. 8Jengga ai ajes bilirim ai ajes tulisulurum aafe, taterisi aaiserem jeba ibirmim. Taterisi aaiserem bunarsusfer aa jei gwerewantam Yesus Kristusminibe, ane ileminip mese. Taterisi jeiserem mes gwerauwulunt imnibe, aam temawer angtane gamjon gwinip jam ge nwinbeyen, jengga jei mes naawena Taterisi Uwa Sanbagirmanaiserem jem nafabe. 9Angtane enggam aa jei gam gunurum, "Ai nafap ai nwini.", jengga angtane jeiserem jei jelem afelnaiserem gemer gam imei-imeitana, angtane jes galserem jei gwinip nwinwena jamere namwer aas jepserem. 10Angtane jelem afelen mesna aa jei gam nesiktenerem, angtane jes galserem jei ga nafap gam gwena, ane angtane jes galserem jem inip kapka fas angtane nafsi jem gwebafe etam-etama kapka jam eyebife. 11Jengga angtane jelem afelna aa jei gam imei-imeitanaram, angtane jes galserem ga gwinip gam nwini. Angtane jes galserem jam wofelabe ga gwinip gamserem, jei taterisi Uwa Sanbagirmana bunarsusfer aaiserem jei jam towaswebiyen. Ane jei jam towaswebiyen jei jes eyebiliserem, aam temawer gwini jeiserem ga jei gam matana, jei waakenfer jam anggasiyen. 12Am tane, ai surta aaiserem ip ai tulisulmini enggalem temawer, Uwa Sanbagiri Jei etam-etama kapka imna is mesam wirtabaipmini Yesus aa jes eyebilintim jeme. 13Uwa mese, ai surta aaiserem ip ai tulisulmini, aam temawer aamei Jebar daamfennaber ima gwena, Jei aa jei gwenaram nalefe ogiri aaiserem jam eyebayan. Ane angtane tanis fenna, ai surta aaiserem ip ai tulisulmini, aam temawer aamei bawasa imsa jubonont dukabe, ane bawasa jei baabeta fas imnibe. 14Am tane, ai surta aaiserem ip ai tulisulmini, aam temawer aamei Uwa Sanbagirfar daamfennaber ima gwena. Uwa mese, ai surta aaiserem ip ai tulisulmini, aam temawer aamei Jebar daamfennaber ima gwena, Jei aa jei gwenaram nalefe ogiri aaiserem jam eyebayan. Ane angtane tanis fenna, ai surta aaiserem ip ai tulisulmini, aam temawer aamei baabetfenna. Taterisi Uwa Sanbagirmana jei im inip nuniton, ane baabeta bawasmana fas imnibe. 15Ane etam-etama kapkaiserem angtane kapka aa jes ne eyebaabuwefaram, seyafter jeiserem ijama nesiktababiyen. Ane jigal-jigala kapka seyafter bawasmanaiserem jes mese ijama nesiktababiyen. Afa aamei seyafter jeiserem jam isa nesiktababilirim, gam jega aamei Uwa Sanbagiri ijama nesikteyen. 16Etam-etama kapka seyafter angtane kapka aa jes ne eyebaabuwefaram -- ga enggam jigal-jigala kapka ilem inip kapkaiserem jes igama balbabuwenaram, ane nwem jes igama domolaram ane jes igama balbabuwenaram, ane angtane jena jam gam gaartena, ane gam gutena, "Amna galgala uskambar." -- seyafter jeiserem jei Uwa Sanbagirminiweryan, jei seyafter bawasminiwer jela. 17Ogiri aaiserem, ane etam-etama kapka seyafter angtane kapka aa jes ne eyebaabuwefaram, seyafter sege barwebisi jamer saar. Jengga angtane aa jei eyebilirim Uwa Sanbagiri aa jes bilirim, angtane jeiserem ga jei se gwena jamer abak-abaksus. 18Am tane, nunu ogiri aaiserem jem barwelaiserem mes gwetmansweyal! Ane aamei imsa sarant enggame: Ginanggwa Kristusmana se fortya; ane namwer aas jepserem ginanggwana Kristusmana unggwanfer ga mes ge towaiwebili jam ge forobiyefe. Jega jem temawer nei nemsa towaswena enggame, nunu ogiri aaiserem jem barwelaiserem mes gwetmansweyal! 19Ginanggwana Kristusmanaiserem jei ga angtane nei nes jei ne mirtebitefalwenaram, aam temawer jei nem safanyan. Afa angtane jeiserem nemnaye, gam jega angtane jeiserem jei nebar negama nwini. Jengga jei nes mes ne mirtebitefala, gam jega nei bunarsusfer nemsama towaswena enggame angtane seyafter jeiserem jei nem safanyan. 20Jengga aamei Mafnana Uwa Sanbagirmana imsa taayibene, Yesus Kristus is jes golminirim ibe, jega jem temawer aamei taterisi seyafter bunarsusfer aaiserem Uwa Sanbagirmana imsa towaswebili. 21Ai surta aaiserem ibe isa ajes tulisulminirim, jeke isa enggalem temawer ai tulisulmini aamei taterisi bunarsusfer aaiserem Uwa Sanbagirmana ijama towaswebiyene jewerserem. Wowo. Jengga enggam aamei taterisi bunarsusfer aaiserem imsama towaswebili. Ane aamei imsama towaswena, taterisi afaf-afafaiserem jam jelyan taterisi Uwa Sanbagirmana bunarsusfer aaiserem jemniwer. 22Angtane afaf-afafaiserem jei ga enggam gam gunu angtanem tarnabe, "Yesus Jei Mesiasyan." Angtane jes gamserem gam aa jewer gam gunurum, angtane jeiserem jei ga Ginanggwana Kristusmana. Ane jei Uwa Sanbagiri jam tebayan, ane Kristus mese jam tebayan. 23Angtane Yesus jam tebayanaiserem, jei Uwa Sanbagiri mese jam tebayan. Ane angtane Yesus aa jei gam tebanaram, jeime Uwa Sanbagiri mes gam tebana. 24Jega jem temawer, taterisi fwater ijesa sarbilintim, aamei gwanan Yesus igalaba tebanantam, taterisi jeiserem aamei waakenfer isa gwetaasini ilem inibe. Afa aamei taterisi jeiserem ilem inibe waakenfer jam isa gwetaasinirim, gam jega gwela imnaiserem Uwa Sanbagiri yo Tane Jelemanaiserem Jebar ise daamfennaber sege folbamini. 25Ane aaiserem ga Kristus Jener nes jes bilipminintim nebe galap aa jei etamwemiliserem nemnibe, jeiserem ga aas waakenfer gwelaiserem jamer abak-abaksus. 26Surta aaiserem ga isa ai tulisulmini, angtane aamei is jei ne afaf-afaftababiliserem jem temawer. 27Jengga ilem temawer, Kristus Jei Mafnana Uwa Sanbagirmana is mes golmini. Ane Mafnana jeiserem Jei bunarsusfer im inip nuniton, jega jem temawer angtane nafsiserem jei safnant aamei is jam ne towas-towastababife. Mafnana jeiserem jei seyafter aamei ga is Jei gam towas-towastababili, ane seyafter Jei ibe is jes towas-towastabaipminirim, jeiserem ba bunaram, ol kabwakyan. Mafnana Uwa Sanbagirmana Jei aamei is mes towas-towastababilint enggame, aamei Kristusfar daamfennaber isa gwena. Ga jem temawer taterisi Mafnana ip ijes towas-towastabaipminirim, ga jeter isa sarbili waakenfer. 28Am tane ga enggam, aamei Kristusfar daamfennaber isa gwena, jega nei nejama ereyen Yesus aa jep forsanyaram, ane nejama sefersweyan nunu Yesus aa jep jelaram. 29Aamei imsama towaswena enggame, Uwa Sanbagiri aa jes gam bilirim, Kristus jeber-jeber ga jes gam eyebuwena. Jega jem temawer aamei jam isa towaswena, angtane jeber-jeber aa jes gam eyebuwenaram Uwa Sanbagiri aa jes gam bilirim, angtane jes galserem ga angtane Kristen. 


1 Yohanes 31Imsa sarsi, Uwa Sanbagiri Jei nei nes unggwanfersus nesiktababili, Jei nei ga nes jem temawer jenbebili nei tane Jelemana! Jeiserem jeba bunaram, nei tane Uwa Sanbagirmana. Jega jem temawer angtane Uwa Sanbagirfar daamfennaber jam gweyanaiserem, angtane jeiserem jei nei nes jam ne damdamtababisiyen, aam temawer jei Uwa Sanbagiri gemerje jam ne damdamtaasiyen. 2Am afelen mesna ai isa ajes nesiktababilirim, nei namwer enggalabe tane Uwa Sanbagirmana, jengga Uwa Sanbagiri Jei gemerje nei nes jam towastababiyen nei fomfom sa etamwena. Jengga nei namwer nemsa towaswena enggame Kristus gamjon aa jep forsanyaram, nei ga nesa etamwesa Kristus gamserem, aam temawer jes jepserem nei numu Jemna bunarsusfer nesa domolbana. 3Angtane seyafter ini unggwan-giri aa jemanem ge folbaminirim Kristusminibe, jei seyafter waakena gane eyebili, jega ini jemna gangge tabalswebaipmif ini Kristusmana tabalsusu gamserem. 4Angtane etam-etama kapka aa jei gam eyebilirim, jei hukumu Uwa Sanbagirmanaiserem ga jei gam ayebili, aam temawer etam-etama kapkaiserem hukumu Uwa Sanbagirmana jei gam targasini. 5Aamei imsama towaswena enggame Kristus Jei enggalf fortyant, jega etam-etama kapka angtanemana gam wirtabaipmif, ane Jemnibe etam-etama kapka fas jam folbayan. 6Angtane seyafter Kristusfar daamfennaber aa jei naawenaram, jei etam-etama kapka jeber-jeber jam ne eyebiyen. Angtane etam-etama kapka nunu jeber-jeber aa jei ne eyebuwenaram, angtane jes galserem jei gemerje Kristus jam ne damdamtaasiyen, ane jei gemerje jam ne tebayan. 7Am tane, aayai, aamei angtane afaf-afafa ijama sarbabiyen! Angtane aa jei gam eyebilirim Uwa Sanbagiri aa jes gam bilirim, angtane jeiserem jei Uwa Sanbagirmana, Kristus gamserem Jei Uwa Sanbagirmana. 8Jengga angtane etam-etama kapka jeber-jeber aa jei gam eyebuwenaram, angtane jeiserem jei bawasmana, aam temawer bawas jei etam-etama kapka gwanan fwatersus mesam eyebil, ane jei etam-etama kapka jeber-jeberam eyebuwena. Ane Tane Uwa Sanbagirmana Jei enggalf fortya awelna bawasmana gam wasferulbof. 9Angtane aa jei gam surnurum Uwa Sanbagirem tanef gwefe, angtane jeiserem jei jeber-jeber etam-etama kapkaiserem jam eyebiyen, aam temawer Uwa Sanbagiri Jei jem inip gam nuniton. Ane Uwa Sanbagiri Jei Uwa jemna, jega jem temawer jei etam-etama kapka jeber-jeber jam eyebiyensus. 10Nei tantantane Uwa Sanbagirmanayo ane tantantane bawasmana ga fomfom negama towaswebabili? Nei ga enggam negama towaswebili. Angtane jam eyebiyeneiserem Uwa Sanbagiri aa jes gam bilirim, ane angtane nafsi jam nesiktababiyeneiserem, angtane jes galserem jei tane Uwa Sanbagirmanyan. 11Taterisi aamei gwanan ijesa sarbilintim Yesus igalaba tebanantam, taterisi jeiserem ga aas: Nei nen nena ga jam nesa nesiksonanna. 12Nei Kain gamserem gam nejama eyebiyen, jei aa gam eyebilim. Jei bawasmana, ane jelem osona ga aa saftaniwil. Kain jei jelem osona bagal temawer saftaniwil? Jei enggalem temawer saftaniwil, Kain jei jeber-jeber kapka gam eyebuwel, ane osona jemna jei jeber-jeber waakenfer eyebuwel Uwa Sanbagiri aa gemer gam gunurum. 13Ga jem temawer am afelen mesna, ipsama bitbitwenaram afa angtane ogirmanaiserem kakalmer is jam sene nasbabilirim. 14Nei nemsama towaswena enggame angtane bawasmanaiserem je seyafter sege terbisi. Jengga namwer aas jepserem nei bawasmanyan, nei Uwa Sanbagirmana, ane nei seyafter nesa gwena. Nei jeiserem nemsama towaswebili, aam temawer nei nelem afelen mesnaiserem nejewera nesiktababilirim. Afa angtane jelem afelen mesna jam nesiktababiyeneye, angtane jes galserem jei bawasem angtanefe gemer gam gwena terem nenennabe. 15Angtane jelem afelna aa jei gam imei-imeitanaram, angtane jeiserem ga enggam gam eyebili angtane nafsi jam munbolo gamserem. Ane aamei imsama towaswena angtane, angtane nafsi aa jei gam munbonorom, angtane jeiserem waakenfer gwelaiserem jamer abak-abaksusu jemnibe fas. 16Kristus mesam tere nem temawer, ane tere Jemna jeiserem jeme, nei ga nejama towaswena enggame nei angtane nafsi ga fomfom negma nesiktababili. Neime jam negma tere nem afelen mesnaiserem jem temawer. 17Afa angtane galgalabaraiserem jei jelem afelna galgalyanmer gwelaiserem jam gam damtanaram, afa jei jelem afelen jeiserem jam batobayanaye, gam jega angtane jes galserem jei ga fomfom gam gunu enggame, "Ai Uwa Sanbagiriserem ajes nesiktene."? 18Am tane! Nei angtane aarememfener afa taterisemfener nejama nesiktababiyen, ane waakenaiserem fas nejama eyeipmiyen jebe. Jengga nei bunarsusfer waakenaiserem ga jam nesa eyeipmini jebe. 19- 20Afa nei seyafter jeiserem jam nesa eyebilirim, jepga nei ga negama towaswena enggame, neiba bunarsusfer Uwa Sanbagirmanam. Ga jem temawer nei Uwa Sanbagirem tarnap jam nejeba finaram, jes jepserem nei safe etam-etama nelemana jam negama sarbabistaabonaram, ane nei nener enggame jam negama gunurum nelem inibe nei kapka, safe gam, ini nemna eralfer nes jam ge folbamiyen, aam temawer Uwa Sanbagiri Jei unggwan-girsusum nemniwer. Ane Jei seyafter gemerserem mesam towaswebabili, ane nei seyafter gemerserem nei teisyena. 21Am afelen mesna ai isa ajes nesiktababilirim, afa nei nelem inibe enggam negama towaswenaram nei etam-etama kapka nejama eyebiyen, gam jega Uwa Sanbagirem tarnap jam fyafe, ini nes kanaufer gangge folbamini, nejama ereyen. 22Ane seyafter nei jes negma bilibenerem Jemniwer, nei negama domola enggalem temawer seyafter Jei aa jes gam bilirim nei nejesa eyebife, nei jeiserem jeter negama eyebili. Ane ini Uwa Sanbagirmana saaser-saaserfer jem folbalaiserem nem temawer, nei ga jetefner negama eyebili. 23Uwa Sanbagiri Jei nei nes enggam balbabili Tane Jemna Yesus Kristus Jes nesa tebana. Ane neime angtane seyafter Yesus aa jei ne tebanaram jes nesa nesiktababili, Kristus Jei gwanan nep nes gemer bilipminirim nei nejesa eyebife. 24Angtane aa jei gam eyebilirim Uwa Sanbagiri seyafter aa jes balbabilirim jam eyebaabife, angtane jeiserem Uwa Sanbagirfar daamfennaber gangge gwena, ane Uwa Sanbagiri Jei jebar daamfennaber gam naawena. Ane nei jepga negama towaswena enggame nei Uwa Sanbagirfar daamfennaber neya gwena, aam temawer Uwa Sanbagiri Mafnana Jelemanaiserem nebe nes mes golmini. 


1 Yohanes 41Am afelen mesna ai isa ajes nesiktababilirim, angtane enggam aa jei ge gubilirim, "Mafnana Uwa Sanbagirmana amnip nuniton.", aamei angtane jeiserem tatarfer ijama sarbabiyen. Jengga angtane jeiserem gwanan ga jam igama unggwasbaabili enggalfe aamei jei igama towaswebabif, mafnan jeiserem jei ke Uwa Sanbagirminiwer jela, afa fas. Aamei jes gamserem ga gemer isa eyebili, aam temawer nabi ol kapkaiserem unggwanfersus ge wofebili ogiri seyafter aa gemer falaram jebe. 2Nele enggalaiserem aamei ga jem igama towaswena Mafnana Uwa Sanbagirmana angtaneminip gam nuniton afa fas: Angtane enggam guluserem Yesus Kristus mes fortya ogiribe tifni nemna gamserem jeme, angtane jeiserem mafnana jemna ga Uwa Sanbagirminiwer gam jela. 3Jengga angtane enggam guyonoserem Yesus mes fortya onabe tifni nemna gamserem, angtane jeiserem jemna Mafnana Uwa Sanbagirmana fas. Angtane galserem mafnan jemna Ginanggwana Kristusmanaiserem jemniwer gam jela. Aamei gam imsa sara enggame mafnan jeiserem se fortya, ane mafnana jeiserem ga mes fortya ogiri aaiserem jebe. 4Jengga aamei tantantane amna, aameiba Uwa Sanbagirmanam, ane nabi ol kapkaiserem baabeta jemna fas imnibe. Mafnana imnip aaiserem, Mafnana jeiserem baabeta Jemna unggwandusa, mafnana angtane ogirip aa jei naawenaram mafnana jemnaiserem jemniwer. 5Nabi-nabi ol kapka jeiserem jei taterisi ogirmanaiserem ga jes ne nasbabili, ane angtane ogirmanaiserem jei ga taterisi jemna gane sarbaipmisini, aam temawer jei ogirmana. 6Jengga nei neiba tantantane Uwa Sanbagirmanam. Ane angtane Uwa Sanbagiri aa Jei ne tebanaram, jei taterisi nemna nesene sarbaipmisini; angtane Uwa Sanbagiri jam ne tebayanaiserem, jei taterisi nemna nes jam ne sarbaipmisiyen. Jeiserem jeme nei ga nejema towaswena enggame, Mafnana Uwa Sanbagirmana aa jei nasounaram bunarsusfer fwersa, ane mafnan afaf-afafa aa jei nasounaram fwersa. 7Am afelen mesna ai isa ajes nesiktababilirim, au, nei nen nena ga jam nesa nesiksonanna, aam temawer nesikteleiserem ba Uwa Sanbagirminiwer gam jela. Angtane, angtane nafsi aa jei gam nesiktenerem, angtane jeiserem jei tane Uwa Sanbagirmana, ane jei Uwa Sanbagiri mes tebana. 8Jengga angtane, angtane nafsi jam nesiktababiyeneiserem, jei Uwa Sanbagiri jam tebayan, aam temawer Uwa Sanbagiri Jei malnni. 9Uwa Sanbagiri Jei nes mes ge saamisini enggame Jei nei nes jam nesiktababili: Jei Tane Jemna daamfennaiserem Jes gera ogiri aaiserem jep Jam foryafe, jega Tane jeiserem Jemniwer nei waakenfer gwelaiserem gam nesa domola. 10Malnni ga aare, gam ke nei Uwa Sanbagiri nejewera nesiktenerem, jengga Uwa Sanbagiri Jei nei nes Jei nesiktababili, ane Tane Jelemanaiserem nep ga nes gaarmini enggalfe Jei gam terf etam-etama kapka nemnaiserem gam wirtabaabif. 11Am afelen mesna ai isa ajes nesiktababilirim, afa Uwa Sanbagiri Jei nes mes nesiktababili, negme gemer angtane safe nenes-nensa ga jam nesa nesiktababili. 12Angtane afa fas Uwa Sanbagiri jam damtayan. Jengga afa nei malinmer negama gwenaram, Uwa Sanbagiri Jei nebar daamfennaber ga negama gwena, ane nei angtane nafsi nesa nesiktababili, Uwa Sanbagiri gemerserem Jei angtane nafsi gemer gam nesiktababilirim. 13Ane Uwa Sanbagiri Mafnana Jemna nebe nes mesam golmini, jega jem temawer nei nemsama towaswena enggame nei Uwa Sanbagirfar daamfennaber neya gwena, ane Uwa Sanbagiri Jei nebar daamfennaber neya gwena. 14Ai Tane Uwa Sanbagirmanaiserem aner amsama damtana, ane ai angtane nafsiserem ga aya towastababinenne enggame, Uwa Sanbagiri Jei Tane Jelemanaiserem Jeyam baftannunt enggalfe angtane seyafter ogirip aaiserem gam waakentababisif. 15Afa angtane enggam aa jei gam gunurum Yesus Jei Tane Uwa Sanbagirmana, Uwa Sanbagiri Jei daamfennaber gangge gwena angtane jeiserem jebar, ane angtane jeiserem jeime Uwa Sanbagirfar daamfennaber gangge gwena. 16Ane nei nener nemsama towaswena enggame Uwa Sanbagiri Jei nems nesiktababili, ane nei jeiserem jam nesa taabili. Uwa Sanbagiri Jei malnni. Ane angtane, angtane nafsi aa jei gam nesiktababilirim, angtane jeiserem Uwa Sanbagirfar daamfennaber gangge gwena, ane Uwa Sanbagiri Jeime angtane jeiserem jebar daamfennaber gangge gwena. 17Ga enggam, nei Uwa Sanbagiri gamjon uskambar nesa nesiktene, jega nei nejama ereyen nunu Uwa Sanbagiri angtane aa jem waksosisirim angtane waakena ane angtane kapka. Ane nei nejama ereyen, aam temawer nei ogiri aaiserem jebe enggammer neya gwena Kristus aa gemer gwenaram. 18Angtane Uwa Sanbagiri aa jei ne nesiktenerem jemnibe erele fas, ane angtane malnni unggwanfer jemanserem erele jemnibe fasfasus. Jengga angtane aa jei gam ernerem, jei jelem inibe enggam gam gunu, "Uwa Sanbagiri Jei ai as kabwaktana." Afa angtane Uwa Sanbagiri jam gam erebenerem, gam jega jemnibe malnni unggwanfer fas. 19Nei Uwa Sanbagiri ane angtane nafsi negama nesiktababili, aam temawer Uwa Sanbagiri Jei nabala nems nesiktababili. 20Angtane afa enggam aa jei gam gunurum, "Ai Uwa Sanbagiri ajam nesiktene.", jengga jei jelem afelen mesna jam nesiktababiyeneye, angtane jes galserem jei angtane afaf-afafa. Ai jes gamserem gam ajewer gunurum, ai ga aam temawer ai gunu, angtane jelem afelen mesna jam nesikteyeneiserem jei aa jes gam damtanaram, gam jega jei Uwa Sanbagiri jam damtayanaiserem fas jam nesikteyen. 21Jeiserem ga jem temawer Kristus Jei taterisi aaiserem nep ga nes golmini: Angtane Uwa Sanbagiri aa jei gam nesiktenerem, jeime jelem afelen jamer gam nesiktene.



1 Yohanes 51Angtane Yesusem temawer enggam aa jei gam balaram, "Yesus Jeiba Kristusam.", angtane jeiserem ga tane Uwa Sanbagirmana. Afa angtane Jetaserem aa jei gam nesiktenerem, jeime Tannaiserem gam nesiktene. 2Afa nei Uwa Sanbagiri jam nesa nesiktenerem, ane Uwa Sanbagiri seyafter aa jes balbabilirim ga nesa eyebaabili, afa ga gam jes gemerserem, gam jega nei ga nesa towaswena enggame nei tantantane Uwa Sanbagirmanaiserem ga nejesa nesiktababili. 3Bunarsusfer ga enggam, Uwa Sanbagiri aa jes balbabilirim nei seyafter jeiserem jam jep negama eyebaabilirim, nei Uwa Sanbagiri ga galap negama nesiktene. Taterisi Jemna nep nejes balbaipminirim, taterisi jeiserem daran-daranyan nemnibe, 4aam temawer neiba tane Uwa Sanbagirmanaiserem ane ogiri je baabeta fas nemnibe. Jeje fomfoma ogiri jemna baabeta fas nemnibe? Aam temawer nei Yesus nemsa tebana. 5Ogiri aaiserem jebe baabetabara ga nansa? Angtane enggamfener aa jei gam gunurum, "Yesus Jeiba Tane Uwa Sanbagirmanam.", angtane jeiserem baabetabara ga jes. 6Nei nemsama towaswena enggame Yesus Kristus Jeiba Tane Uwa Sanbagirmanam. Nei jeiserem ga enggalap nei towaswebili, Yesus fonawer jam aa galap tauwetyaram, Uwa Sanbagiri enggam ga gunu, "Tane Amna ga aare." Uwa Sanbagiri Jeime jeiserem enggalap biltena Yesus aa galap terentem, ane ai taterisi jeiserem ga aya sarbilint. Ane Mafnana Uwa Sanbagirmana, bunarsusfer aa jei nasowenaram, Jeime taterisi jeiserem mese bili bunareme. 7Nawer-ningnaiserem ga je ge gubili enggame jeiserem ba bunaram: 8Nawer-ningna jeiserem daamfennaiserem ga Mafnana Uwa Sanbagirmana Jei nems towas-towastababili nem inibe. Ane nawerbarf aaiserem ga Yesus aa galap baptistenentem fonabe. Ane nawer-ningnabaraiserem ga Yesus aa galap terentem aawisi Jemna aa je tenbentetyantam. Ane nawer-ningna jeiserem jei seyafter daamfennater ne biltena enggame, Yesus Jeiba Tane Uwa Sanbagirmanam. 9Nei taterisi angtanemana ga nejesa taabili, jengga taterisi Uwa Sanbagirmana jei bunarsus ane baabetsusu, ane jeiserem ga jes Uwa Sanbagiri aa jes bilirim Tanem temawer. 10Ga jem temawer angtane Tane Uwa Sanbagirmana aa jei ne tebanaram, jei taterisi bunarsusfer jeiserem mes ne taabili jelem inibe. Jengga angtane Uwa Sanbagiri jam tebayanaiserem, jei enggam gam gunu Uwa Sanbagiri Jei jes afaf-afaftababili, aam temawer jei taterisi bunarsusfer aaiserem Uwa Sanbagiri aa jes bilirim Tanem temawer jei jam taabiyen. 11Taterisi bunarsusfer aaiserem ga aare: Uwa Sanbagiri Jei nebe nes mes golmini waakenfer gwelaiserem jamer abak-abaksus. Jei ga angtane enggalaiserem ga jep golmini, angtane Tane Jelemanaiserem daamfennaber Jebar aa jei ge nwinbenerem. 12Angtane Tane Uwa Sanbagirmana aa Jei tebanaram, angtane jeiserem waakenfer gwelaiserem jamer abak-abaksus ga jei se domola. Angtane Tane Uwa Sanbagirmana jam tebayanaiserem, angtane jeiserem waakenfer gwelaiserem jamer abak-abaksus jam domolyan. 13Ai surta aaiserem ip tulisulmini, aamei Tane Uwa Sanbagirmana iJeya tebanaram, jega enggalf aamei igama towaswef enggame aamei waakenfer gwelaiserem jamer abak-abaksus imsama domola. 14Ane nei Uwa Sanbagirem tarnabe jam nejeba finaram, jes jepserem nei nejama ereyen, aam temawer Uwa Sanbagiri Jei sembayanga nemna nes mesam sarbaipmini, afa nei jam negama bilibenerem Uwa Sanbagiri aa jes gam bilirim. 15Nei enggam neya towaswebana, Jei nes mesam sarbabili afa nei janma bilibenerem. Ane neime negama towaswena nei jes negama bilibenerem Jemniwer, Jei jeiserem nes gam golmini. 16Afa aamei angtane Kristen jam igama damtanaram, jei etam-etama kapka jam gam eyebilirim, ane etam-etama kapka jeiserem jei gwebayan jam tikwefe Uwa Sanbagirfar ge gwefe, aamei sembayanga ga jam igama gwebabana Uwa Sanbagirfe jeiserem jem temawer; ane Uwa Sanbagiri Jei waakenfer gwelaiserem jamer abak-abaksus ga gam gulbana angtane jeiserem jebe. Ai jes gamserem gam ajewer gunurum, ai ga angtane enggalaiserem ga ajem temawer gunu: Angtane etam-etama kapka aa jei gam eyebilirim, jengga angtane jeiserem jei jam tikweyan Uwa Sanbagirfar ge gwefe. Jengga etam-etama kapkaiserem ga daamfenna angtane aa jei gam gwebanaram jam terfe, jeiserem ga aas: angtane Yesus baif aa jei gam gwebanaram jam tebafe. Jeiserem jem temawer ai aamei gam isa ajam balbabiyen aamei sembayanga Uwa Sanbagirfe jeiserem jem temawer ijama gwebabafe. 17Seyafter kapka nei nejesa eyebilirim jeiserem etam-etamsam, jengga etam-etama kapka aasaje angtane jei gam gwebana angtane jam teryenfe. 18Nei nemsama towaswena enggame angtane aa jei gam gwenaram Uwa Sanbagirem tanefe, jei etam-etama kapkaiserem jeber-jeber jam eyebuweyan, aam temawer Tane Uwa Sanbagirmana Jei angtane jeiserem waakenfer gam gerebaasnenne, ane bawasa dwona jam domolyan angtane jeiserem jam tebafe. 19Nei nemsama towaswena nei Uwa Sanbagirmana, bawasa ogiri aaiserem safe mes tebana. 20Nei nemsama towaswena enggame Tane Uwa Sanbagirmana Jei mes fortya ogiri aaiserem jebe, ane Jei nes mes towastababili enggalfe nei Uwa Sanbagiri negama damdamtaasif, Uwa Sanbagiri bunarsusfer aaiserem. Nei Uwa Sanbagirfar daamfennaber nesa gwena, ane nei Tane Jemnaiserem Yesus Kristus Jebar daamfennaber nesa gwena. Jeiba Uwa Sanbagiri bunarsusfer aaiserem, ane Jei waakenfer gwelaiserem jamer abak-abaksus nep golmini. 21Am tane, sa gwisi seyafter gemerserem Uwa Sanbagirmanyan aaiserem jewer. Uwa Sanbagiri tefner sa onsoba! Tabana ga aaf. Amin. 
 http://www.bible.is/BKLLAI/1John/1/D

Nenhum comentário:

Postar um comentário