segunda-feira, 23 de março de 2015

1 YONI: Benabena

 
1 YONI 11Me'i hapi huto huto hinaguti ka ema'alo mino lito buto mino'ehina to legekesatu keheli'ohuta to lubutu bu go'ohuta to lubutu bu goya ito bu goloto layatu li kehelito bu go'ohutamo ya'ma minoba minoba huto minolatanamofihi bagaguti ka'alo nominana bo'mu fayahi ya'ma koyoto nolepube. 2Minoba minoba huse'namofihi legeya'a huto hu lamana hulago lali bu goloto minoba minoba huto mino lito buto minose'namofihi ka'a ya'ma lu huto huto lu lepilata nohune. Minoba minoba huto mino lito buto minolatana ya'ma miyagu afotifitoga mino lito buto minoto aliha'a lalitoga huto hu'ehina. 3Yamofihi ya'ma bu goto lito hu'ohutamo ana huto lenalitoga lu lepilata nohutamo ya'ma lu lepilenogo ai kumu komopati monekotoga bati huto hepito minalune luto hulata nohune. To ana huto lenali hiti lali hiti komopati hepi lamana higo nominoto afotifitoga to pana'a Yesu Kilisito aitoga hepito minalune luto yabe. 4Ya suhi huto huto hilenogo komopatigu sabiyana lolo hu baga ilibe luto fayaha nasana ya'ma koyoto nolepube. 5Ka'a ya'ma Hu'mamofihi pana'amofihi baga'aguti ma luto keheli'ohutamo lu lepilata nohune. Hu'mau ai sinihina'a ya'ma aitoga mone meni'ibe. Fana meha'a besa loto asaga'na mino'ehinamo ni'ibe. 6To lali foipanamofihi metepunagu nominototi to Hu'mamofi hiti komopati monekotoga moloto bati huto hepi'ohune luto liluta ya'ma faga hiti liluta'mu yabe. 7Hu'mau ai ya'ma fana meha'a hiti bo nohibe. To ana huto lali ai'a fana meha'agu mino moloto nohuto ai hiti moneko'na huto komopati hepito bati huto minaluta'mu yabe. To ya hinogo pana'amofihi Yesu, ai'a golaha'auba foipanati asaga'i okala hu letoto minomo buto minalibe. 8Lali foipanati meni'ibe luto liluta ya'ma komopati faga noluta'mu yabe. To ka lamana'amo komopatigu meminolata nohibe. 9Ya hu'ehinaya to foipanati Hu'mamofitoga lu huto nohunogomo ai eto'ehina bo to faga melulata nohina bouba ai ka'a beto huto'a foipanati nokala huto asaga foipanati li he'mi leto su halina'mu yabe. 10To ai foipanatini lilata nehabe luto noligo lali foipanati mehu'ohune luto nolutoti ya'ma Hu'mamofi kumu fagalo bo yabe luto lulata nohuto to ya'ma ai kaga'a komopatigu meminalina'mu yabe. 


1 YONI 21Panana'ni lenali foipana hi lalabe luto ka'ni ya'ma fayahi koyoto nolepube. To moneuba foipana hulenogo afotifu, Hu'mau foipanati'mu ka foya nolinogo lehe'malina bo mone nohina yabe. Ai gi'a Yesu Kilisitou ai fotogo huto nohina bouba ai lali kumu yabe luto miyagu afotifu aitoga buka tilina'mu yabe. 2Kilisitou ai'a ya'ma foipanati'mu Hu'mamofihi le'mo fulu hulata bo nohibe. To ya'ma lali foipanatigo ya hu letalata meni'ibe. Noto noto bona'i silaga kumu yabe luto foipana'ani li he'mi epololata bo nohibe. 3To ya higo lali ai'a bona'a nominototi Hu'mamofihi keheli'ohune luto hiya huto kehelilune? Ai kaga'a lu laga huto lu'ehina'alo mege'i mololata nohuta ya'ma keheliya iluta'mu yabe. 4To bona'i moneuba ai ka lu laga huto hu'ehina ka'alo mege'i memalalinauba nani Hu'mamofihi bona'a nohube luto lu'ehinalo ya'ma fagalo bo yabe. Bona'i ya hana'amagihi komopa'anigu ka legeya'a meni'ibe. 5To bona'i moneuba ai Hu'mamofihi ka'alo mege'i malalina'a ai komopa'a Hu'mamofitoga emi'ehina yamofihi legeya'a ahuto hu su ho'ehibe. Ya hulago ya'ma Hu'mamofitoga i segito bati hulata nasanamofihi legeya'a ya suhi huto huto hilenogo bu goloto akehelilune. 6Lali Hu'mamofitoga i hepito nohuta bona'i nohune luto liluta'amagita Yesu Kilisito minoto lito hu'ehina yamofihi babeyafalo minaluta yabe. 7Komopa'ni lepi'ohuna bona'ise. Nani lu molo lepololata ka kosaba'i mone lu melepube. Ya'ma koyapa hapa'agati kehe lelite bite mine'ahanamo ya'ma ka'a lu lepi'ahanamo yamofihi lu kosaba huto koyoto lu nolepube. 8To ka fayahi nokoyona ya'ma lu molo'ehina ka'a kosaba'i lolo nohibe. To ana kaga Yesutoga to lalitoga lamana'a huto legeya'a lolo hulata nohigo melugu bona'magi bu negana yabe. Ya higo metepuna su halube'mu nohigo fanato lamana huto besa nolana yabe. 9To bona'i luga'amagi fana meha'agu nohune lite lilana to enalalu'anigihi enita bite enemegesa hu epilana'amagi ya'ma enali metepunagu yatai neminanamo ni'ibe. 10To luga'amagi enali enalalu'anigihi komopa'ani epite minalana'amagi enali ya'ma Hu'mamofihi fana meha'agu bati hite neminabe. Ya hite neminana bona'magi foipa nasana'mu enohoka hilina bo enalitoga mone huto mehilina'mu yabe. 11To enali enalalu'anigihi enita bite enemegesa hu epilana'a enali ya'ma metepunagu neminana yabe. To metepunamofihi kapolo melete nebago metepunauba komopa'animofihi bu'a li fili kenogo kapo ya'ma bu ge fe lite bu megalana'mu yabe. 12Lenali pa'ni pana'ni nehanamagita, Yesu Kilisitohi gi'alo yabe luto foipanatini li he'mi lepolo'ehinamo ni'ibe. Ya huto ni'inagi fayahi ya'ma koyo nolepube. 13To lenali olopa bona'magita minomo buto mino'ehina bo ai kumu keheliya ite keheli'ahanamo ni'inaya lenali'i ka'a ya'ma fayahi koyo nolepube. To neheya kola lenali foipanamofihi afo'agita amuya melete luba hite be ligi'ahanamo ni'inagihe. Ya hi'ahana'mu ya'ma fayahi koyo nolepube. 14To lenali pa'i pana'i nehanamagita, Hu'mau afotinifihi hapa'a keheliya ite keheli'ahana'mu yabe luto fayahi ya'ma koyo nolepube. Olopa bona'magita, lenali ema kanaguti hapi fi'ehina minomo tito nohina bomofihi ai kumu keheliya ite keheli'ahanamo ni'ibe luto kaga ya'ma fayahi koyo nolepube. Neheya kola, lenali amuya malana'mu yabe luto to Hu'mamofihi kaga'a komopatinigu ni'igo foipanamofihi afo'afihi be ligi'ahana'mu luto kaga ya'ma fayahi koyo nolepube. 15Lenali asaga'i metoga minoto nohuta suhi to me'mofihi gupisa'alo nasana huto huto ni'inalo komopatini yanaga mebino. Enali komopa'ani ya'ma me'mofihi gupisalonamofito minalina enali komopa'ani ya'ma miyagu afo'anifihi emilana'a meni'ibe. 16Nekehelifihe? Melugu nasana silaga'i ya'ma lugufa'auba topa holata nohina nasana to lubu'uba bu golata nohina nasana to komopati mega lugufa lelito tise'na ya'ma miyagu afotifitogati nasana meni'ibe. Ya'ma me'mofihi gupisalonamofitogati yabe. 17To me'mofihi gupisa'alo ana'ina to enipa hina nasana hiti asaga'na su hoto mone yupahi fenene hilibe. To enali Hu'mamofihi bagaguti ka'a kehelite mege'i nemalana'a enali mineme bite mino hetofa hite minalana'mu yabe. 18Palala'ni pana'nimagitabe, kana'a ya'ma hupamone'i asu halina'mu yabe. Ya'mu lenali Kilisitohi fateha'a huto hilibe lite keheli'ahabe. To yatai fatehe bona'a babu lite huto hilete mine baga i'ahabe. Yana'mu ya'ma kana'a su ho lamana hu'ehibe luto akeheli'ohune. 19Kilisitohi fatehe bona'a enali lalitogati he'mi letelete bi'ahanamagi, lali ligibo lagabo lamana'a bati huto minolata'na ya'ma lolo hite menehabe. Enali lalalutigi bati hite nehatita ya'ma mehe'mi letatita ni'ibe. To he'mi lete'ahana yamofihi hapa'a ya'ma huto huto hu'ehibe. Lali hiti nehana'a enali lalalutigi lolo hite memine'ahana, keheliya i'ohune. 20Ya hi'ahanaya, Kilisitou ai hetofa Sikalafu'a ho lifigo komopatinigu tito nominago lenali asaga'i Hu'mamofihi ka lamana'a keheli baga i'ahana yabe. 21Ya'mu luto fayahi ya'ma koyoto nolepube. Lenali ka lamana'a mekehelibe luto ni'igopa, ka lamana'a kehelilata nehana'mu yabe, luto ya'ma fayahi koyoto nolepube. To ya huto ya'ma keheli'ahabe. Fagalo bona'i asaga'i ya'ma ka lamana'amofihi komopa'aguti mone huto mehu'ehibe. 22Fagalo bona'i ya'ma enali kumu kehelilune. Bo moneubafi moneuba Yesu ai'a gulu ho letalibe luto le'mo ho lifi'ehina bo Kilisito menohibe luto nelinogomo ai kumu ya'ma fagalo bo yabe luto kehelilune. To enali ya'ma miyagu afotifi hiti to ai pana'a Yesu Kilisitohi enemegesa hi etimilana bona kumu enali Kilisitohi fateha'a yabe. 23Enali Hu'mamofihi pana'amu enemegesa hi emilana ya'ma ana suhi huto afo'afi kumu hiti enemegesa hi emilabe. To enali pana'aloga hepito minete ai Hu'mau ho lifi'ehina bo, Kilisito nohibe lite lu huto hilana enali afo'afitoga ana huto neminabe. 24Lenali hapa'agati koyapa'i mono ka'a kehelite mine lite mine'ahana yamoga keheli melete minalo. To ya'ma kehelite nehite miyagu afotifitogago pana'amofitogago hepite mine melete bati hilana'mu yabe. 25To ya'ma Kilisitou lele'mo lamana hilibe luto lu molo leto'ehinamo ya'ma minoba minoba babeyafalo minolata'namo ya'ma ni'ibe. 26To lenimi'i melete komopatini le'mo sibina hilana bona'i enali ka'animu ma luto fayahi nokoyobe. 27To lenalitoga Kilisitou Sikalafu'a molo epololata nohina ya'ma lenalitoga nominago mege'i melelata nehago yana'mu bo moneuba faga hiti lamana ka hiti henabe luto lu moloto lu lepilibe? Yamofihi ya'ma meni'ibe. Sikalafu'a molo lepolo'ehina ai ka'a asaga'i giyaka giyaka lito lu lepilata nohina nohibe. To ai ka'a ya'ma faga hiti meni'ibe. Lamana'ago ni'inago yana'mu Sikalafu'uba lu lepi'ehinamo ya'ma keheliya ilete Kilisitohi komopa'agu minalo 28Palala'ni pana'nimagitabe, lenali komopatini bati hinogo minete Kilisitou ai nehetilina kana'a huto hu lamana nohinogo koli mehise amuya melete nehago olenogo lubuya mehuse minalune lite ai'a komopa'agu minalo. 29Hu'mau bebe salata nohinalo nohibe lite lenali keheli'ehilanamo ya'ma to enali fotogo suhi hite minalata nehana bona'i enali Hu'mamofihi yagapana'a nehana yabe luto anokehelune. 


1 YONI 31Bu galo. Afotifu ya'ma komopa'a sipi huto limiloto pa'nibe, pana'nibe luto lu leto'ehina. Komopa'a limilata'na hofa toto minago lali ai yagapana'a bati huto nominone. Yana'mu melugu bona'magi Hu'mamofitoga meneminana enali laliti hapati menekehelibe. Hena'mube? Hu'mamofihi hapa'a mekeheli'ahanamo ni'ibe. 2Komopa'ni lepi'ohuna bona'ise. Lali ya'ma yata'isi Hu'mamofihi pa'i pana'i nohutagi, to minoto hena hena babeyafalo huto hiluta ni'ibe. Yamofihi hapa'a mele'isi huto hu lamana menohina'mu ma luto keheli'ohune. Kilisitou huto hu lamana hilina yupahi ai'a babeyafa'a bu go bati hulototi ai babeyafaloko minaluta'mu yabe. 3To ya huto ni'igo lali asaga'i yamofihi fifa ito minaluta ya'ma Kilisitou ai komopa'agu bati huse'na'a ni'ina ya suhi huto minalune luto komopati li keheli keheli hiluta'mu yabe. 4Foipa nasana lilata yanauba Hu'mau lu laga hu'ehina ka'a ligofa ho he'milata nasana ni'ina mone'amagi enali foipa nasana nelinogomo enali'i Hu'mau lu laga hu'ehina ka'a ya'ma ho hauta hi'ahabe. 5To lenali Kilisitohi hapa'a ya'ma kehelilata nehabe. Ai foipa nasana ligoli hulata hilube luto huto hu'ehina ni'ibe. Ya nohuto aitoga ya'ma foipana'a meni'ibe. 6Yamofihi lali Kilisitou hiti mino hepito minolata nohuta foipana huba huba huto meminalune. To luga'amagi foipa nasana lolo hilata nehana enali Kilisitohi hapa'a bu go bati hite bu galana'a hiti kehelilana'a hiti menehabe. 7Palala'ni pana'nise, mone'amagi ete laga mehina ka ya hilo lite lu lepinogo ka'ani mekehelilo. Kilisitou ai mino fotogo huto minolata nohinagi to bona'i luga'amagi ana suhi hite bati hina suhi hilata nehinogomo enali kumu ya'ma fotogo hite neminana bona'i yabe luto lilune. 8To luga'amagi foipana lilata minalana enali Sataha bona'a neminabe luto lilune. Satau ai foipa nasana koyapa emagati lelito buto mino'ehina. To liloto nohigo Hu'mamofihi pana'auba ai'a Satahi foya'a ya'ma laga huto li sibi sibi huto he'milube luto oto huto hu'ehinamo ni'ibe. 9Luga'amagi enali Hu'mamofitogati huto hi'ahana bona'magi Hu'mamofihi meha'a lite mine'ahanamo ni'inaya, enali foipana lilete meminalana'mu yabe. Hena'mube? Enali Hu'mamofitogati lusi bona'a ahuto hi'ahanagihe. 10Hu'mamofihi pa'a pana'a to Satahi pa'a pana'a enali hapa hapa'ani ya suhi huto ya'ma huto nohigo bu galune'mu nohune. Luga'a mino fotogo hite meminalana'mu enali kumu Hu'mamofitogati menehabe luto nokehelune. To enali komopa'ani ya'ma enalalu'anigihi meepinogomo enali kumu Hu'mamofihi bona'a menehabe luto ya'ma ana huto lilune. 11Ya'ma ka yata'a kanaguti lenali kehelite biba biba hi'ahana ya'ma huto ni'ibe. Komopati ai eminogo ai eminogo huto ya suhi huto minalune. 12Koyapa'i Atahi pana'a Keniu ai'a kapolo mebilune. Ai foipanamofihi pana'a lolo huloto gona'a ho fili'ehinamo ni'ibe. To henabe luto ho fili'ehibe? Hapa'a ya'ma huto ma ni'ibe. Ai'a minoto lito hu'ehina'a laga mehu'ehina yagi to gona'auba mino'ehina ya bati hu'ehina yabe. Ya higo gona'amofihi siko hu etoto ho fili'ehina yabe. 13Nalalu'nigita, ma melugu Hu'mamofitoga meneminanamagi libe gofa hebe hite ya nehi lepelenogomo kehelilete topa mehalo. 14Lali komopati ya'ma lalalutigihi epilata nohutamo ni'inagihe. Ya'mu lali filise'na kapo'aguti he'mito oto mino kosaba'nagu mino'ohutamo ni'ina keheli'ohune. To luga'amagi enali komopa'ani ai eminogo ai eminogo menehanamagi enali ya'ma filise kapogu nebana yabe. 15To luga'amagi enali enalalu'anigihi enele'mo bati mehinogomo Hu'mau ya'ma enoho fililata bo suhi hite komopa'ani hiti nehabe luto lu epalalibe. To lenali enoho fililata bomu'i akehelilata nehabe. Enali minoba minobanamofihi babeyafa'a lolo hite menehabe. 16Yesu Kilisitou ai lali kumu yabe luto minoto lito hulata'a he'miloto fili'ehibe. Ai ya higo komopati ai eminogo ai eminogo hiluta hapati li yege holago bu go'ohune. Yana'mu lali ana huto lalalutigihi enali kumu luto minoto lito hiluta'a ya'ma he'miluta babeyafalo enalitoga minalutamo ni'ibe. 17Bona'i luga'a enali yaga nose'na to fe'noho nasanauba babu luto ni'igo to enalalu'anigihi enumuhi meni'igo nehinogo bu gelete to komopa'ani hekini lete meenehe'malata nehanaya enali kumu ma luto kehelilune. Komopa'ani Hu'mamofitoga mone memalalata nehabe luto keheliloto ya lilune. 18Palala'ni pana'nimagitabe. Lali komopati Hu'mamofi hiti lalalutigi hiti noepito ya'ma kagatuko to labagagutiko melilune. Komopatiguti layatuko to labagatuko luto moloto hilune. 19Komopati epiba epiba luto ya lusiga nolunaya ya'ma hinogoti ka'a lamana'amofihi yagapana'a nohutamofihi hapa'a huto hulenogo bu goloto kehelilune to komopatiuba loe lae mehinogomo Hu'mamofihi gobisalo komopati le'mo hepilune. 20Foipa nasanamofihi fisu hite nelinogo kaga komopatigu ni'inogomo ma luto lilune. Hu'mau ai'a komopatimofihi babeyafa suhi meni'ibe. Ai fato suhi huto komopatimofihi babeyafa'a be ligise'na minoto ana'ina keheli bati huto kehelilata nohibe. 21Komopa'ni lepi'ohuna bona'ise, foipa nasana'mu ka foya liluta ka'a komopatigu meni'inogomo Hu'mamofihi gobisalo kuyugu keyege mehuse bati huto minaluta'mu yabe. 22To ka'a kehelilototi ai bulo minoto moloto nohunogo bati hulata nohibe. Ya'mu ya'ma aitoga lutogo limilata nohibe. 23Ka'a lu molo'ehina ka ma luto ni'ibe. Pana'a Yesu Kilisitohi ai gi'alo kehelito mino ule'ale huloto ai lu leto'ehinamofihi suhi huto komopati ai eminogo ai eminogo huto minaluta ni'ibe. 24Enali lu molo'ehina ka'a keheliya ite mege'i malalana'a enali Hu'mau hiti hepi lamana hite neminenogo Hu'mau ai'a komopa'anigu mino ho tito minalina'mu yabe. To ai Sikalafu'i molo leto'ehinamo ai'a lu limilago Hu'mau ai'a komopatigu minoto ho tito hulata nohibe luto kehelilata nohune. 


1 YONI 41Komopa'ni nolepuna bona'ise. Sikalafu'uba lele'mo babahi higo lulata nohune lite lilata nehana bona'i asaga'magitoga ka'a ya'ma sibigopa mekehelilo. Kaga'a mone ya'ma Hu'mamofitogati ni'ifi meni'ifi keheli fotogo hilune lite kaba hilo. Ka'a leli'ali bona'i fagamofihi silaga'i huto hilete babu li'ahana ni'ibe. 2Hu'mamofihi Sikalafu'a yauba enele'mo bati higo ka nelana ya hite bu galabe. To enali Hu'mamofihi pana'a Yesu Kilisito ai lusi bo gufa'a hiti bo lolo huto neheti'ehinamo ni'ibe lite li huto hite lilana enali Hu'mamofitoga nehabe luto kehelilabe. 3To luga'amagi enali Yesu kumu ya lite melinogomo ya'ma Hu'mamofitogati menehabe. Enali Kilisitohi fatehe bona'mofihi ka'a nelabe. Ana fatehe bomofi kumu akeheli'ohune. Ai metoga alihi huto hilibe luto lu lepugo keheli'ahanamo ni'ibe. To yatai ya'ma ai'a amuya'a ahuto hu'ehibe. 4Palala'ni pana'nise, lenali Hu'mamofitogati huto hilete faga mono ka leli'ali bona'magihi amuya melete luba hite, ya suhi hite enebe ligi'ahanamo ni'ibe. Hiya hutobe? Lenali komopatinigu minolata nohina ai amuya'auba metoga nohina bo foipana'a ai'i amuya'a ya'ma be ligi'ehinagihe. 5Faga mono ka leli'ali bona'i enali ya'ma me'mofihi gupisalo ni'inana'muko kehelilata nehabe. Lilago meluguti bona'magi enegekesagu li melelata nehabe. 6Lali ya'ma Hu'mamofitogati huto hu'ohutamo ni'inaya enali Hu'mamofihi bona'a nehana'amagi ya'ma lali kaga kehelilata nehabe. Hu'mamofitogati huto mehi'ahana ya'amagi lali kaga menekehelibe. Yamu'i lali ka lamana'amofihi hapa'a to le'mo sibi hulata'na ka legeya'amofihi hapa'a yaguya bu go bati huto hulata nohune. 7Nemehi nolepuna bona'ise. Enemehi epilata'na ya'ma Hu'mamofitogati ni'ibe, ya hu'ehina'mu lali komopati ai eminogo ai eminogo huto minalune. Enali komopa'anitu eniginaga fi epite minalana enali ya'ma Hu'mamofitogati huto hi'ahana yabe. 8Hu'mamofihi hapa'a ya'ma komopa'a limilata'na ni'inagihe. Ya higo luga'amagi enali komopa'anitu keke'i li epalalana meni'inogomo Hu'mamofihi hapa'a bu mege'ahabe luto keheli'ohune. 9Hu'mau aitogati minoba minoba huto minolata'na li huto huto lilube luto gi moneko pana'a metoga ho lifigo limi'ehina. Yamofihi mehi limi'ehinamofihi hapa'a lalitoga huto hu lamana hu'ehibe. 10Komopati epilata'namofihi hapa'a ma huto ni'ibe. Lali kohe toto komopati meemi'ohutogo ai'a ya'ma komopa'a limito pana'a ho lifigo limi'ehina foipanati su halinamofihi kapo bili leto'ehina. 11Komopa'ni nolepuna bona'ise. Hu'mau komopa'a sipi sipi huto limi'ehinagi yana'mu lali ana huto komopati ai eminogo ai eminogo huto minalutagihe. 12Bona'magita Hu'mamofihi bu galuta'a ya'ma mone bu mego'ohune. To komopatitu lemehi emilata nohuta yanaguya huto moloto hiluta ya'ma Hu'mau komopatigu minoto lito nohilinamofihi hapa'a li huto hilibe. To komopati emiluta yanauba huto hu lamana hulata nohibe. 13Hu'mau ai Sikalafu'a molo leto'ehinagihe. Ya limi'ehinamu'i ai'a lali'i lele'mo maha'aluga mololata nohigo yanagu minota, to ai komopatigu minoto ho tito nohina ya'ma keheli fe lu'ohune. 14Afotifu ya'ma pana'a lali noto noto bona'i lubuto bilibe luto ho lifigo limi'ehina. To lali lubu legeya'aloti bu go'ohutamo ni'inaya ka'a ya'ma luto lu huto hulata nohune. 15To bona'magi Yesu ai lamana'a Hu'mamofihi pana'a nohibe lite lu huto hilana'a enali Hu'mamofihi komopa'agu minalune'mu nehabe, to Hu'mau ana huto komopa'anigu minoto lito hilina'mu yabe. 16Hu'mau komopa'a limilata nohina'a ya'ma bu goto keheli'ohune. To keheliya ito keheli'ohune. Hu'mamofihi hapa'a ya'ma mehi limilata'namofihi nohinagihe. Enali komopa'ani emite bite minete lite hilana'a enali Hu'mamofihi komopa'agu minalune'mu nehabe. To Hu'mau ai komopa'anigu minoto lito hilina'mu yabe. 17Ya'mu komopati emilata nohuta ya'ma bati huto huto hu lamana hulata nohibe. Kilisitou ai metoga minoto lito hulata hu'ehina suhi huto lali minolata nohuta ni'inaya yamofihi ka foya lise kana'a sipilo lali koli mehuse amuya moloto ho ti fefe luto minalune. 18To hena'mube? Komopati epilata'namofihi legeya'auba ya'ma lelesa luse'na ya'ma fife lu halina'mu yabe. Ya hu'ehina'mu enali enelesa luse'na lite minalana enalitoga komopa'ni emise'na huto hu lamana mehu'ehibe luto kehelilune. Hena'mube? Lahalifi, lite koli nehana yabe. Enali Hu'mau komopa'a limilata'namofihi hapa'a mone mekeheli'ahana yabe. 19Lali ya'ma Hu'mau kohe toto komopa'a limi'ehinamo ni'igo yamu'i lemehi ai emilata nohune. 20Bona'i luga'amagi enali Hu'mamofihi lemehi emilata nohune lite lilete to enalalu'anigihi enita bise'na hite enele'mo bati mehilana enali kumu ya'ma fagalo bona'i yabe luto kehelilune. A'nekehelifihe? Enali enalalu'anigihi enubutuko bu galana'a enali komopa'ani meepise minalana ya'ma Hu'mamofihi bu megolata'namofihi ai ya'ma komopa'ani meemilune'mu nehabe. 21Kilisitou lu molo'ehina ka'a ma luto kehelilata nohune. Lenali Hu'mamofihi komopatini emite nehanamagita lenalalutinigihi ya'ma komopatini ana hite epilo. 


1 YONI 51Bona'i luga'amagi Yesu kumu Hu'mau le'mo ho ti'ehina bo yabe lite keheliya ilana enali kumu Hu'mamofihi yagapana'a nehabe luto lu epalalune. To ya huto ni'igo ya'ma afo'anifihi komopa'ani emilana enali ana hite yagapana'a hiti komopa'ani epilabe. 2Lali Hu'mamofihi pa'a pana'a komopati epilata nohupihe luto ya nohupi ya menohupi luto ya'ma Hu'mamofihi komopati emito to ai lu molo'ehina ka'alo mege'i melenogoti yanauba lu huto hilina ya'ma akehelilune. 3Hu'mamofihi komopati emilata nohutanamofihi hapa'a ma huto ni'ibe. Ai lu molo'ehina ka'asigo kehelito analo mege'i mololototi ya'ma komopati noemuta ni'ibe. Hu'mau lu molo'ehina ka ya'ma keheli emilatanamofihi keta'a hiti meni'ibe. 4Hu'mamofitogati huto hu'ohuta ya'ma asaga'naloga lali me'i gupisa'alo ni'ina nasana i matele unogo bati nohune. Ya'ma matele unogo limilata nohina amuya'a ya'ma Hu'mamofihi lemehi emilatanati ya'ma ni'ibe. 5To me'mofihi gupisa'alo ni'ina nasana i lapasa inogo limilina bona'i kiyi'agi kiyi'agi nehabe? Enali Yesu kumu ya'ma Hu'mamofihi pana'a nohibe lite lilete keheli ule'ale hite kehelilana enalisigo yamofihi lolo hilune'mu nehabe. 6Yesu Kilisito ai'a ya'ma nagami'a hiti golahi huto hu'ehina yabe. Nagami'asigo meni'ibe. Ai nagami folose nagami'a hiti to fililago limi'ehina golaha'a hiti huto hu'ehina yabe. Sikalafu'uba ai ka'a lamana'amofihi afo'afu nohinagihe, to Sikalafu'uba ya'ma hapa'a lulata nohigo legeya'a henilata nohibe. 7- 8Yamofihi Sikalafu'i ai'a to mono nagami'i folo'ehina yauba to ya'ma fililago limi'ehina golahi ya nasanauba ya'ma enali loebe monebe nehago ka li'ahana ka ya'ma moneko legege hu'ehina ka ni'ibe. Enali ka Yesu Kilisito Hu'mamofihi pana'a nohibe lite nelabe. 9To bona'magita lenayahi tite ma'naka nolune lite nelago lali kehelutogo bati hulata nohibe. Ya hu'ehinaya Hu'mau lu'ehina ka'a yauba be ligito amuya mololata nohibe. Ai lusiga lulata nohibe. To ai Yesu kumu nani pana'ni nohibe luto alu'ehina yabe. 10Ya luto ligo enali Hu'mamofihi pana'amofi kumu enemehi emilana'a enali komopa'anigu keheli lamana hilata nehabe. Luga'amagi enali Hu'mamofihi pana'auba ka'a lu'ehina kamu'i keheligo futu'a lolo hu'ehinamo ni'ibe, ya'ma bona'i ya hana'amagihi Hu'mamofi kumu fagalo bo yabe lite li'ahanamo keheli'ehibe. 11To Hu'mau pana'amofihi hapa'a le'mo hetofa hu etoto ka'a lu'ehina ya'ma ma huto ni'ibe. Hu'mau amuya lemehi huto minolata nasana li huto huto limi'ehina ya'ma mino kosaba huse'namofihi hapa'a ya'ma pana'a nohibe. 12To ya higo enali Hu'mamofihi pana'a li pili kete lite minalana'a enali mino kosaba huse nasana ali'ahanamo ni'ibe. To luga'a enali Hu'mamofihi pana'a li pili mekalana enali mino kosaba huse'na ya'ma meli'ahabe luto lilune. 13Hu'mamofihi pana'amu lenemehi emi'ahana'a lenali ya'ma keheli ule'ale huto minoba minoba nasana ya'ma ali'ahabe. Li'ohune lite keheli fe lite kehelilabe luto ka'a ya'ma koyo nolepube. 14Lali ya'mu luto Hu'mamofihi bulu koli mehuse keheli bati hu'ohune. To Hu'mamofitoga ana'ina mone kumu loka hotogo ya'ma ai'a lilina'a malalina'a komopa'agu bati nohinogomo keheli limilina'mu yabe. 15To ana'ina mone'namufi mone'namufi kehe i etenogo keheli limilibe luto keheli fotogo hu'ohutamo ni'ibe, ana'ina mone kumu kehe iluta ya'ma mele'isi li layanugu mololata nohibe luto keheli'ohune. 16Bona'i moneuba lalu'afu moneuba foipa nasana nolinogomo bu goloto filise kapolo le'mo malalina nasana ya'ma lolo mehuse'namofihi nohinogomo bu goloto ya'ma ai kumu luto Hu'mamofitoga foipana'a li he'mi etobo luto ya lilibe. Lulenogo Hu'mau foipana'a li he'mi etoto mino kosaba huse kapolo le'mo malalibe. To filise kapolo le'mo malalina nasana ya'ma foipana hu'ehina'a mone ni'ibe. Ya hu'ohuta'amu Hu'mamofitoga lilata foya lilabe luto menolube. 17Bona'magi bati mehina hapa'a hilatana'a asaga'i foipana ni'inaya, foipa nasana luga'a ya'ma filise kapolo enele'mo memalalina'mu yabe. 18Lali ma luto kehelilata nohune. Hu'mamofitogati huto hi'ahanamagi ya'ma foipana lite meminalana'mu yabe. Hu'mamofihi pana'auba yagapana'amagihi li pili koto kaba hu epelelenogo foipa nasanamofihi afo'afu enugufalo mone'a li mekehelilina'mu yabe. 19Lali Hu'mamofitogati huto hu'ohuta ya'ma noto noto melugu bona'i mone'amagi asaga'naloga enali foipanamofihi afo'afu ai nosipenuga kete nehabe luto keheli'ohune. 20To ma luto mone'a hiti keheli'ohune. Hu'mamofihi pana'a ai'a melugu limito keheli fe lulata'na li huto hu limi'ehinamo ni'inaya, Hu'mamofihi lamana'amofihi hapa'a keheliya ito kehelilata nohune. To Hu'mamofihi ka lamana'alo i segito ya'ma pana'a Yesu Kilisitohi nosipenuga minoto lito nohune. Ai'a ya'ma Hu'mamofihi lamana'a to minoba minoba huse'namofihi afo'afu nohibe. 21Palala'ni pana'nise, lenali laga mehinana faga lugefa nasanalo lenemegesa hu emite kaba hite minalo.

 http://www.bible.is/BEFWBT/1John/1/D

Nenhum comentário:

Postar um comentário