terça-feira, 7 de abril de 2015

1 John: Bete-Bendi

1 John 11Kushia ahwu lı fee hwaa lè men i, li fee āhwu gba lè ukpi-ikwu undi angwu a ma yi kung lè há linde-linde mà ukpong igye anyin i há kpi. Bel-agyang li gyo he lè atyung, li nde-e lè ashi. Li nde-e li-li-li, li mbee tyua he abwo or. Ufe na ù yi Igie Unim angi i be lè likpan ke li. 2Likpan limen i, Unim a shi āngi li be he igye gboo le bendi be fel nda āngi lè ashi. Bel li nde ngi; li da amen gba lè likpan limen li ndè lè ashi atyan i a. Li bun da amen gba lè likpan ligyang angyell angi lı yi ngyor igye. Leěti likpan limen i li ma yi ipel ha Unim Atyetyan, saa a hà som āngi be tyung li. 3Biwom bimen abi bel li nde lè ashi atyan, li mbee gyo ābi lè atyung atyan na lı de men gbe lè bi le bi fel li ukem, li fel utyang ken. Utyang utyan angwu li ngwee li ngweě he ha Unim Atyetyan lè Unwaa-ma Ujeso Ukristi. 4Bel li fee abin hwaa lè men le hè igor ityan ì kwu yilidididi. 5Kisom ashi Unwaa Unim ugyang a bun de li na bel or lı bun de men i. Kì yi le, Unim ù yi 'ikung-gbo; kì yi lè 'ifufebb ha ahe zangg or ye. 6Gbe bel li de le li ngwee utyang ha Unim, ki shi le lì so he 'ifufebb, hà li bà uman a, hà biwom abi lı shi or bì yi 'igyang a ye. 7Ukpor gbe bel or lı tan he 'ikung-gbo ná ufe ù yi he 'ikung-gbo, hà li ngwee utyang ha bende, anung Unwaa-ma Ujeso a to taa li lè he biban bityan puu shi li li fel betaa-betaa gelalala. 8Gbe li de le lì yi lè 'iban ye, hà li lam 'uhwo-tyan ilam, li ngye 'igyang ashi 'ı be lè ha Unim ye gbangg. 9Ukpor gbe li bun he igye gboo de Unim le li shi 'iban, Unim u tyang biban bityan bimen ana ka li, u to taa li ábi shi li li fel betaa-betaa gelalala, likorye Unim ù yi ununung, u bel igie ye. 10Gbe li de le li wa shi 'iban ngye ye, ashin 'i ze le li da le Unim ù yi undi-uman a, li ngye igie ima ye gbangg. 


1 John 21Bebwaa-gi lityam, mi fee abin hwaa lè men le hè men mà shi 'iban ye a. Ukpor gbe undi a tem lè shi 'iban, lì yi lè undi angwu ù yi gelalala faale 'iban. Ufe na ù yi ipel ha Unim, u yi kong ha ahe ke li. Undi umen ana na ù yi Ujeso Ukristi. 2Gbe he 'uhwo-ma na Unim u tyang biban bityan ke li. Biban bityan bife-bife na Unim u tyang ke gbe he 'uhwo-ma ye, u tyang biban ka bendigye mbee igegem puu he igye i. 3Kì yi lè 'iwom ken ashi 'ı tyung le li ngye Unim 'igyang-igyang. Kiwom ashi há 'ì yi ife angi lı ke iten ima. 4Undi uyang-yang angwu u kong le ufe a ngye Unim, gbe u ndor iten ima ye, hà ù yi undi-uman a, a ngye 'igyang ashi 'ı be lè ha Unim ye gbangg. 5Ukpor undi angwu u shi ashi Unim u kong, ufe na benyin Unim bè yi yilididi ha ahe lityam. Kì yi lè 'iwom 'isuso ashi 'ı tyung li le li ngwee befee kpebaa ha Unim. 6Undi uyang-yang angwu a de le ufe a ngwee befee kpebaa ha Unim, ù shi likpe ná Ujeso Ukristi a ma shi. Kife na 'ı tyung le a ngwee befee ha Unim. 7Bedim-gi lityam, uten Unim angwu mı fee de men gbe lè he i, ù yi angwu ufufe a ye. Ù yi uten umen angwu men ma gyo kung lè há 'unyong ahwu ma kpi 'ikwu fe Ujeso Ukristi a. Uten umen ùtım i ù yi 'isom Unim ashi ma gyo kpam-kpam a. 8Mà na or, kì yi lè 'iwom 'ifufe he uten umen i. Ujeso Ukristi ugyang a tyung li le uten umen i ù yi ufufe 'igyang; men-agyang or titi ma tyung le ù yi ná 'igyang. Bel li ngye le ù yi ufufe 'igyang likorye 'ifufebb 'i ndor àshì 'i ndo mbee, kikung-gbo 'igyang ashell 'i kpi ataale mà. 9Undi uyang-yang angwu u gim há le ufe ù yi he 'ikung-gbo, gbe u tel unde-ma, hà ù so he 'ifufebb kpamm be wu i ná 'ì yi. 10Ukpor undi uyang-yang angwu 'i nyin he lè unde-ma undi Unim, hà ufe ù yi he 'ikung-gbo, kì yi lè 'iwom ashi 'ı shi-e u gbaa mbu ye. 11Undi uyang-yang angwu u tel unde-ma undi Unim, hà ù yi he 'ifufebb, litan lima puu li shi he 'ifufebb. He ashina u tan a be-be-be-be likorye 'ifufebb 'i hwuǎ hē àshì. 12Bebwaa-gi lityam, mi fee abin hwaa lè men le bwo Unim a tyang biban bīmen ke men gbe he ashi Ujeso Ukristi a shi a. 13Bekaandi, mi fee abin hwaa lè men likorye men ma ngye Ujeso umen angwu ù yi kung lè há linde-linde mà ukpong igye i hà kpi. Bebwaa-idem, mi fee abin hwaa lè men le bwo men ma hwò Usetan, usu bibibi. 14Bebwaa-gi lityam, mi fee abin hwaa lè men likorye men ma ngye Atyetyan Unim. Bekaandi, mi fee abin hwaa lè men likorye men ma ngye Ujeso umen angwu ù yi kung lè há linde-linde mà ukpong igye i hà kpi. Bebwaa-idem, mi fee abin hwaa lè men likorye men mà yi kang-kang, ma naa genn, igie Unim i shi ha amen atyam, ma hwò Usetan, usu bibibi. 15Mà kung àshì āmen ndor he benyin igye anyin lè biwom abi bì yi hen a ye. Undi uyang-yang angwu a mā ma kung àshì ama ndor he benyin igye anyin a, hà 'ì yi lè 'ukwo ahwu 'ı mbee nyin he lè Unim Atyetyan ye gbangg. 16Biwom igye bimen ana na bì yi i: biwom abi bendigye bè yi lè 'igyor kangg le be kwa lè bi ka 'uhwo-bell; biwom abi bendigye be ndè, be fel lè 'igyor le be kwa lè bi; biwom puu abi bendigye be pwom ungwu lè bi he igye anyin. Biwom bimen i puu bi ba lè há igye anyin a, bi ba lè ha Unim Atyetyan a ye. 17Má ngye le igye anyin i ndo mbee, biwom abi bì yi hen abi bendi bè yi lè 'igyor ábi ana, bife or bi ndo mbee. Ukpor undi uyang-yang angwu u shì ashi 'i nyin Unim, ufe u nim ye, u kwa ngyor igye kpamm. 18Bebwaa-gi, kunyong ahwu igye anyin ì mbee 'u fel kpee-kpee. Kunyong 'umen i na Undi-linaa Ujeso u be nya a na be bè de men. Kì yi faale ifung, bel puu li ndè le 'anaa-anaa i bendi gbamm abe bè yi bendi-linaa Ujeso Ukristi be fel hen mà. Ashin 'i tyung li le 'unyong ahwu igye anyin ì mbee 'u fel kpee-kpee. 19Mà na bendi-linaa bemen ana be waa gbe lè ha abel liwu a or, kì bè yi lè 'unyong ahwu be ma yi ungwu ken ha abel ye. Kì be kwu le bè yi ungwu ken ha abel, hang be ngyor kwu ipel ha abel. Ukpor be gbe tyang li, agbele ubell tyang li a tyung gboo le be ma yi ungwu ken ha abel ye. 20Men ufe, Ujeso Ukristi a ma ke men Ukatia Kunyong uma le men puu mà ngye 'igyang. 21Mi fee ashin hwaa lè men le bwo ma ngye 'igyang ye a ye. Mi fee le bwo ma ngye 'igyang a. Ma mbee ngye le uman lè 'igyang bi gwaa ha bende ye. 22Bwo 'ì yi 'itaa ana mà, fe ayang ù hà yi undi-uman? Undi-uman ù yi undi angwu a swan le Ujeso ù yi Ukristi, Undi-likpan angwu Unim a som be he igye anyin a ye. Undi angwu u swan Unim Atyetyan lè Unwaa-ma ana na ù yi undi-linaa Ujeso Ukristi. 23Undi uyang-yang angwu a swan Unwaa Unim, hà a swan-swan lè Unim Atyam or titi. Ukpor undi angwu a kpē Unwaa Unim, hà a kpe-kpe lè Unim Atyam or titi. 24He ashin mi da amen le, biwom abi ma gyo kung lè há 'unyong ahwu ma kpi ma fe Ujeso Ukristi, mà tyang ābi bì gye 'ushu ngyor kwu he atyam āmen. Biwom bimen ma gyo kung lè há ukpi-ikwu ana, gbe ma tyang ābi bi gye 'ushu ngyor kwu he atyam āmen, hà men or ma gya 'ushu ngyor kwa ipel ha Unwaa Unim lè Unim Atyetyan ngyor igye kpamm. 25Mà well úkyébb angwu Ujeso Ukristi a kyebb li le li kwa ipel ha Unim ngyor igye kpamm. 26Mi bè kong biwom abin gbe lè bendi bemen abe be kee le be lam amen ana. 27Ukpor men ufe, Ujeso Ukristi a ke men Ukatia Kunyong Unim angwu ù yi ha amen atyam. He ashin undi angwu u hwua amen 'igyang ù tem baā amen ye, likorye Ukatia Kunyong Unim umen ana u hwua amen biwom puu. Biwom puu abi u hwua amen bì yi 'igyang, u lam amen ye gbangg. He ashin mi mbee bwan da amen le, biwom abi a hwua amen, mà ke bi ife, hè men mà gye 'ushu kwu ipel ha Ujeso Ukristi. 28Bebwaa-gi, mi mbee da amen le mà ngyor kwu ipel ha Ujeso Ukristi le hè liti limen angi u tem be ana, lî kwu lè 'ushell ye, ishwia or i tem shi li ye. 29Bwo men ma ngye le Ujeso Ukristi ù yi ununung, ki kung nung amen le undi uyang-yang angwu u shi 'inunung ù yi unwaa Unim a. 


1 John 31Mà ndè 'igegang benyin abe Unim Atyetyan a tyung ha abel. Le bwo 'i nyin he lè bel, a shi li li fel bebwaa-ma. Kì yi faale atyangale le lì yi bebwaa Unim a. Atan-lengi angwu bendi abe bè yi ke igye i be ndè shob le lì yi bebwaa Unim a ye ù yi le be ngye-e ufe-gyang or ye. 2Bedim-gi lityam, kanaa-anaa i, bel li fel bebwaa Unim or mà. Kitaa ìtí lı be fel, ki wa nung li dangg ye. Ukpor li ngye le nyong Ujeso Ukristi u be be, li ba fel 'itaa ken ha ahe likorye li ba nda he gboo. 3Undi uyang-yang angwu a ndor lishi ha ahe le ashina 'i ba kwa ná, u ndè le a ndor 'uhwo-ma gelalala nya a na ufe ù yi gelalala. 4Undi uyang-yang angwu u shi 'iban, hà u ban iten Unim á. Kiban na 'ì yi abanale iten Unim. 5Men má ngye le atan-lengi angwu Ujeso Ukristi a ma be he igye anyin ù yi le he-e ù fem kung li lè he 'iban a. Ma mbee ngye le 'ì yi lè 'iban ha ahe ye gbangg. 6Bwo 'i tyung li gboo le undi uyang-yang angwu u gye 'ushu ngyor kwu ipel ha Ujeso Ukristi, u gya 'ushu sha 'iban ye; he ashina undi uyang-yang angwu a gye 'ushu shi 'iban, hà 'i ze le a wa nde-e or, ngwu ù ngye-e or ye. 7Bebwaa-gi, mà baa teng undi u lam amen. Mà well le undi angwu u shi biwom he 'ukwo ahwu Unim a kee, hà ù yi ununung gelalala nya a na Ujeso Ukristi ù yi ununung gelalala. 8Ukpor undi uyang-yang angwu u gye 'ushu shi 'iban, ù yi unwaa usu bibibi a likorye usu bibibi umen ana a shi 'iban kung lè há ukpi-ikwu igye a. Kife na 'i shi Ujeso, Unwaa Unim, a ma be he igye anyin le he-e ù be mbee lè biwom puu abi usu bibibi ana a shi. 9Undi uyang-yang angwu ù yi unwaa Unim a, u gya 'ushu sha 'iban ye, likorye likpe Unim angi lì yi ha ahe li ngyor kwa ipel ha ahe. Ù tem gya 'ushu sha 'iban mbee ye, likorye ù yi unwaa Unim a. 10Undi uyang-yang angwu u shi biwom he 'ukwo 'ununung ye, ki nyin he lè unde-ma ye, hà ù yi unwaa Unim a ye. Gbe he ashin na bendi be ngye atyetye bebwaa Unim lè bebwaa usu bibibi umen ana. 11Kisom ashi men ma gyo kung lè há 'unyong ahwu ma kpi ma fe Ujeso Ukristi, kì yi le, kì nyin li lè bende kpe-kpe-kpe. 12Bel lì kwu ná Uken a ma yi ana ye. Ma gyo le a ma yi unwaa usu bibibi a, a ma fe ukaa gwu unwanam Ebell. Kibang 'i ma shi-e ngwu a gwu-e? A ma gwu-e likorye biwom abi ufe Uken a shi bi ban, ukpor abi unwanam ufe a shi bi ngbebb. 13Bebuye, nyong ahwu bendi abe bè yi ke igye anyin be tel amen, kì shī kwu amen he 'uhwo ye. 14Li ngye le bel ufe li buu hwaa lè he abwo lihwu, li fel lè likpan mà. Ashin 'ì yi ná likorye 'anaa-anaa nyin 'i fel nyin li lè bende-tyan. Ki nung gboo le undi uyang-yang angwu 'i nyin he lè unde-ma ye, hà 'i ze le undi umen ana ù so he abwo lihwu. 15Gbe undi uyang-yang a tel unde-ma, hà ù yi undi 'ihwu a. Li ngye ashin dangg le undi 'ihwu ù yi lè likpan 'unyong ye. 16Kiwom ashi 'i ma shi leěti na 'i tyung li ashi 'i ze le benyin. Kiwom ashi há 'ì yi le Ujeso Ukristi a ma kung likpan lima ke he 'uhwo 'utyan. Kì yi kpe-kpe le bel or lì kung likpan lityan ke he 'uhwo bende-tyan. 17Undi uyang-yang angwu ù yi lè 'iwom, u ndè unde-ma angwu ù yi lè 'iwom ye, ukpor u bel àshì ama ndor hell, hà 'i ze le benyin Unim bè yi ha ahe lityam ye gbang-gbang-gbang. 18Bebwaa-gi, bwo biwom abin bì yi 'itaa ana mà, gbe li de le 'i nyin li lè bende, lì shi biwom ha bende abi bı tyung le lì yi lè benyin 'igyang-igyang, lì kong he ungwu ufe-ufe a le lì yi lè benyin ye. 19Gbe 'i nyin li lè bende 'igyang a, hà li ngye dangg le lì yi bendi abe bè yi he 'igyang. Kimen ana na 'ı mbee shi àtyám atyan a kwu lè ikwun 'unyong 'uyang-yang lı be he 'ushu Unim. 20Mà igim ityan ì fel ben li le li shi 'iban or, li ngye le Unim a dyam hwò igim ityan, u mbee ngye biwom puu. 21Bedim-gi lityam, he ashina gbe 'ì yi 'igyang a le igim ityan i ben li ye, hà ashin 'i ze le 'unyong 'uyang-yang lı naa he 'ushu Unim li kwa porr faale 'ushell. 22Hà Unim or u ka li 'iwom 'iyang-yang ashi li bii lè ha ahe likorye li ndor iten ima, li mbee shi ashi 'ı nyin he. 23Uten angwu Unim a ke li ù yi le, lì fe lityam ha Unwaa-ma, Ujeso Ukristi, li mbee kwu lè benyin ha bende nya a na a tye li uten. 24Undi uyang-yang angwu u ndor iten Unim hà a gwaa ha Unim kpebaa, Unim or u gwaa ha ahe kpebaa. Kiwom ashi 'i shi li li ngye dangg le ù yi gwaa ha abel kpebaa 'ì yi Ukatia Kunyong uma angwu a ke li. 


1 John 41Bedim-gi lityam, bendi gbamm abe be bè uman le be tya ugie 'isom Unim be paa wu mbee igegem puu hen igye. He ashin mà fe lityam ha bendi puu abe be de le bè yi lè Ukatia Kunyong Unim ana ye. Mà shun li-li-li hè men mà ndè shob dangg le hà bè yi lè Ukatia Kunyong Unim a or, hà ufe a ye or. 2Ashi 'ı shi amen ma ndè shob le hà undi umen ana ù yi lè Ukatia Kunyong Unim a or 'ì yi le, undi uyang-yang angwu a bong gboo le Ujeso Ukristi a ma be he igye i ná undigye, hà ù yi lè Ukatia Kunyong Unim a. 3Ukpor undi uyang-yang angwu a swan le Ujeso Ukristi a ma be he igye i ná undigye ye, hà ù yi lè Ukatia Kunyong Unim a ye. Undi umen ana a be lè ha Undi-linaa Ujeso Ukristi umen ana a. Ufe na ma maa gyo le u ba ba. Kigyang-igyang, a be or mà, a fel hen igye. 4Bebwaa-gi, men ufe mà yi bebwaa Unim a, ma hwò bendi-uman bemen ana mà, likorye angwu ù yi ha amen ù yi lè ikeb hwò angwu ù yi ha bendi abe bè yi ke igye anyin. 5Bendi-uman bemen ana bè yi ke igye anyin a. He ashina be kong gba lè biwom igye anyin bife-bife a, bendi abe bè yi ke igye anyin be gyo ābe. 6Ukpor bel ufe lì yi bebwaa Unim a. Undi angwu a ngye Unim, u dang 'utyung gyo li, ukpor undi angwu a ngye Unim or, ngwu ù kwu unwaa Unim a or ye, u gyo li ye. Kitaa ana na lı ngye le hà undi ù yi lè Ukatia Kunyong Unim angwu u tyung 'igyang a or, hà a be lè ha Undi-linaa Ujeso Ukristi angwu u lam bendi a or. 7Bedim-gi lityam, mà lì gye 'ushu kwu lè benyin ha bende. Benyin be ba lè ha Unim a. He ashin undi uyang-yang angwu ù yi lè benyin, hà 'i tyung le ù yi unwaa Unim a, u mbee ngye Unim. 8Undi uyang-yang angwu ù yi lè benyin ye, hà a ngye Unim ye, likorye Unim na ù yi usu benyin. 9Kitel i na Unim a tyung benyin bema gboo ha abel, a som 'ugbe Unwaa-ma a ken be he igye anyin, le lì fel lè likpan 'unyong gbe he 'ubwo 'uma. 10Ashin na 'ì yi benyin. Kì yi le 'i ma nyin li bel lè Unim a ye; Unim na 'i ma nyin he ufe lè bel, nyong a som Unwaa-ma angwu a be hwō le gbe ha ahe, Unim ù tyang biban bityan ke li. 11Bedim-gi lityam, bwo 'i nyin Unim lè bel 'i go 'itaa ana, kì yi kpe-kpe le 'ì nyin li, bel or, lè bende. 12Kì yi lè undi angwu a wa ndè Unim lè ashi ngye ye. Mà na or, gbe 'i nyin li lè bende, Unim u gwaa ha abel, benyin bema be kwu yilidididi he atyam atyan. 13Ashi 'i shi li li ngye dangg le li gwaa ha Unim, ufe u gwaa ha abel, 'ì yi le, a ke li Ukatia Kunyong uma. 14Bel li ndè le Unim Atyetyan a ma som Unwaa-ma be le ù be kpan bendigye, li bun da bendi gba lè ashin a. 15Undi uyang-yang angwu a bong le Ujeso ù yi Unwaa Unim a, hà Unim ù yi gwaa ha undi umen ana, ufe u shi gwaa ha Unim. 16Bel li ngye le 'i nyin Unim lè bel, li fe lityam ha benyin bema bemen ana. Unim na ù yi usu benyin. Undi uyang-yang angwu u gye 'ushu tyung benyin, hà ù yi gwaa ha Unim, Unim u shi gwaa ha ahe. 17Kukwo ahwuna na benyin be kwu yilididi ha abel, le hè Liti angi Unim u be tang ushe bendi puu, lî kwu lè 'ushell ye. Li ba kwa faale 'ushell likorye likpan lityan he igye i lì yi 'itaa ken ha angi Ujeso Ukristi. 18He 'ipi benyin abe be be lè ha Unim bè yi, kushell 'u kwa nya ye, likorye gbe benyin Unim bè yi yilididi ha abel, be ndō 'ushell lè ha abel gbang-gbang. Undi u kwa lè 'ushell nyong ù fel yi kwu u nyong 'ingie a. Ashina 'i ze le, gbe undi ù yi lè 'ushell, hà benyin Unim bè yi ha ahe lityam yilididi ye. 19Bel lì yi lè benyin, likorye 'i nyin Unim a lè bel 'ushu. 20Undi uyang-yang angwu a de le 'i nyin he lè Unim, ù yii tel unde-ma, ù yi undi-uman a, likorye unde-ma angwu u nde-e lè ashi, gbe 'i nyin he lè he ye, kì hà ndo nyin he lè Unim angwu u nde-e ye ye. 21Uten angwu Unim a tye li ù yi le, undi uyang-yang angwu 'i nyin he lè Unim, kì nyin he lè unde-ma or titi.


1 John 51Undi uyang-yang angwu a bong le Ujeso ù yi Ukristi, Undi-likpan angwu Unim a som be he igye anyin a, hà undi umen ana ù yi unwaa Unim a. Gbe 'i nyin li lè ātyām unwaa, ki nyin li lè unwaa-ma or titi. 2He ashin lí ngye le gbe 'i nyin li lè Unim, li mbee ndor iten ima, hà 'i nyin li lè bebwaa-ma or titi. 3Ife angi lı ke iten Unim na ı tyung le 'i nyin li lè Unim. Iten ima i dyam gbe li ashele ye, 4likorye undi uyang-yang angwu ù yi unwaa Unim a, ù yi lè ikeb le u hwà igye ibibi anyin. Kiwom ashi lı kung hwò igye imen i 'ì yi abongale le Ujeso ù yi Unwaa Unim a. 5Undi angwu a bong le Ujeso ù yi Unwaa Unim a, ufe-ufe na u kwu lè ahwele umen ana. 6Ujeso Ukristi na a ma be he igye i, u tyung 'uhwo-ma gbe he umbwo akibale, u tyung 'uhwo-ma gbe he anung angi a wu nyong a ma hwō. Ki ma yi umbwo ufe-ufe a ye; umbwo lè anung na bı tyung le ù yi Unwaa Unim. Ukatia Kunyong Unim or titi a naa ushada le 'ì yi 'igyang a le Ujeso ù yi Unwaa Unim a. He ashin bel li ngye dangg le 'ì yi 'igyang a likorye Ukatia Kunyong Unim u bà uman ye. 7Biwom bì yi bikie abi Unim a kung tyung li le 'imen i 'ì yi 'igyang a. 8Biwom bimen bikie ana bì yi Ukatia Kunyong Unim, lè umbwo akibale lè anung angi Ujeso a ma wu he 'uhwo 'utyan. Puu abi bì yi 'itaa ken. 9Nyong bendigye be kong gbe lè biwom abi be ndè, li kpa ābi. Unim ufe, ima igie i dyam hwò; ufe-gyang na a de li le Ujeso Ukristi ù yi Unwaa-ma. 10He ashin undi uyang-yang angwu a bong ha Unwaa Unim, u ngya ha ahe lityam le ashi 'imen i 'ì yi 'igyang a. Ukpor undi uyang-yang angwu a bong àshi Unim a kong ye, hà u da le Unim ù yi undi-uman a, likorye a bong àshi Unim a kong gbe lè Unwaa-ma ye. 11Ashin 'i ze le, Unim a shi li li fel lè likpan 'unyong, li kwa ipel ha ahe ngyor igye kpamm; li fel lè likpan limen ana gbe he 'ubwo Unwaa-ma. 12Undi uyang-yang angwu a fel lè Unwaa Unim, hà ù yi lè likpan limen i, ukpor undi uyang-yang angwu a fel lè Unwaa Unim ye, hà ù yi lè likpan limen i ye. 13Mi fee 'ushia ahwun hwaa lè men abe ma bong ha Unwaa Unim, le hè men mà ngye le ma fel lè likpan 'unyong angi lı ngyor igye mà. 14He 'unyong 'uyang-yang lı be he 'ushu Unim, li kwa lè 'ushell ye, likorye li ngye le 'iwom 'iyang-yang ashi li bii lè ha ahe u gyo li, gbe li shi biwom abi bì yi he ugim uma a. 15Bwo li ngye le he 'unyong 'uyang-yang lı bii 'iwom lè ha ahe u gyo li, ashin 'i shi li li mbee ngye le li kpē ashi li bii lè ha ahe ana or mà. 16Undi uyang-yang angwu a tang lè unde-ma, undi Unim, u shi 'iban, gbe 'iban ashi há 'ì yi ashi 'ı be lè lihwu a ye, ù kong ha Unim ke undi umen ana le Unim ù ke-e likpan. Kì yi faale atyangale le Unim u ka he likpan. Ashin 'ì kee-kee yi ke bendi abe be shi 'iban ashi 'ı be lè lihwu ye a. Kiban ashi 'ı be lè lihwu 'ife, undi angwu a shì āshi, mi de le mà kong ha Unim le ù ke-e likpan ye. 17Likpe liketye liyang-yang lì yi 'iban a, ukpor biban bisuso bi ba lè lihwu ye. 18Bel lí ngye le undi uyang-yang angwu ù yi unwaa Unim a, u gya 'ushu sha 'iban ye, likorye Ujeso Ukristi, Unwaa Unim, u kang he le hè Usetan, usu bibibi, ù do he ye. 19Lí ngye le lì yi bebwaa Unim a, mà na igye puu ì yi he 'ubwo Usetan or. 20Lí ngye le Ujeso Ukristi, Unwaa Unim, a be he igye i be buu li àshì le lì fel ngye Unim angwu ufe-ufe na ù yi Unim ugyang. Lì yi gwaa ha Unim angwu ù yi 'igyang, li shi gwaa ha Ujeso Ukristi, Unwaa-ma. Ufe na ù yi Unim ugyang. Likpan angi lı ngyor igye kpamm li be lè ha ufe a. 21Bebwaa-gi, mà baa 'uhwo-men hè men mà ndè le mà gbe lè abwo fe he ikem ye. Ì yi Ùnīm a ye.

 http://www.bible.is/BTTPD1/1John/1

Nenhum comentário:

Postar um comentário