sexta-feira, 3 de abril de 2015

O Le Fa‘aaliga: SAMOA


O Le Fa‘aaliga 1
1 O le fa‘aaliga a Iesu Keriso, na tu‘uina atu e le Atua ‘iā te ia, ‘ina ‘ia fa‘aali atu i ana ‘au‘auna mea o le a vave o‘o mai; ‘ua ‘auina mai fo‘i e ia lana agelu e fa‘ailoa mai i lana ‘au‘auna o Ioane, 2 o lē na molimau i le afioga a le Atua, ma le mau ‘iā Iesu Keriso, e o‘o lava i mea uma na va‘aia e ia. 3 ‘Amu‘ia lē na te faitauina ‘upu o le valo‘aga; ‘amu‘ia fo‘i i latou o ē e fa‘alogo ma usiusita‘i i mea ‘ua tusia ai; auā ‘ua latalata mai aso e tutupu ai ia mea. 4 O le tusi mai ‘iā Ioane i ekalesia e fitu o lo‘o i Asia. ‘Ia ‘iā te ‘outou le alofa tunoa ma le manuia mai lē o lo‘o soifua, na soifua fo‘i, o le a afio mai; ‘atoa fo‘i ma agaga e to‘afitu o lo‘o i luma o lona nofoāli‘i; 5 i le ma Iesu Keriso fo‘i le molimau fa‘amaoni, o le ulumatua o ē ‘ua oti, ma o le pule i tupu o le lalolagi. ‘Ia ‘iā te ia o lē o lo‘o alofa mai ‘iā te i tatou, ma ‘ua na fa‘asa‘olotoina i tatou mai a tatou agasala i lona lava toto, 6 na ‘avea fo‘i i tatou e ia ma mālō, o ositaulaga i lona Atua ma lona Tamā, ia ‘iā te ia le vi‘iga ma le pule e fa‘avavau fa‘avavau lava. Amene. 7 O lenei, o lo‘o afio mai o ia ma ao, e iloa atu fo‘i o ia e mata o tagata uma, ‘atoa ma ē na tu‘ia o ia; e taufaitagi fo‘i tagata uma o le lalolagi ‘ona o ia. E moni lava! Amene. 8 “O a‘u le Alefa ma le Omeka,” ‘ua fetalai mai ai le Ali‘i le Atua, lē o lo‘o soifua, na soifua fo‘i, o le a afio mai, o ia e ona le malosi uma lava. 9 O a‘u o Ioane, lo ‘outou uso, o lē ‘ua fa‘atasi ma ‘outou ‘iā Iesu i le puapuagā, ma le mālō, ‘atoa ma le ‘onosa‘i; na ‘ou i le motu e igoa ia Patamo ‘ona o le afioga a le Atua ma le mau ‘iā Iesu. 10 Na ‘ou i le Agaga i le aso o le Ali‘i; ‘ona ‘ou fa‘alogo ai lea i o‘u tua i le leo tele e pei o se pū, 11 fai mai, “ ‘Ia e tusia i se tusi mea ‘ua e va‘aia, ma avatu i ekalesia e fitu o Efeso, ma Semurana, ma Perekamo, ma Tuatira, ma Sarataisa, ma Filatelefaia, ma Laotikaia.” 12 Na ‘ou liliu atu e va‘ai po o ai o lo‘o tautala mai ‘iā te a‘u; na ‘ou liliu atu, ma ‘ua ‘ou va‘aia ai tu‘ugāmolī auro e fitu. 13 O lo‘o tu i le ogātotonu le tagata e foliga mai o le atali‘i o le tagata, e ‘ofu o ia i le ‘ofu talaloa umi, ma ‘ua fusi fo‘i lona fatafata i le fusi auro. 14 ‘Ua sinasina fo‘i lona ao ma ona lauao e pei o le sinasina o le fulufulu mamoe, e pei o le kiona lava; o ona fofoga fo‘i e pei o le mumū o le afi. 15 O ona vae e pei o le ‘apa ‘i‘ila, e peiseaī ‘ua fa‘amamāina i totonu o se ogāumu; o lona si‘ufofoga fo‘i e pei o le ta‘alili o vai e tele. 16 ‘Ua umia e ia i lona ‘a‘ao taumatau fetū e fitu; ‘ua alu atu fo‘i mai lona fofoga le pelu e taufai ma‘ai ona itū, ma e ma‘ama‘ai lava; o ona fofoga fo‘i e pei o le susulu o le la ‘ina o mū toto‘a. 17 ‘Ua ‘ou iloa atu o ia, ‘ona ‘ou pa‘ū ifo lea i ona vae e peiseaī ‘ua ‘ou oti; a ‘ua fa‘ae‘e mai e ia lona ‘a‘ao taumatau i o‘u luga, ma fetalai mai ‘iā te a‘u, “ ‘Aua ‘e te fefe; o a‘u lē e muamua ma lē e mulimuli; 18 o lē o lo‘o ola nei lava; sa ‘ou oti, a o lenei, ‘ou te ola e fa‘avavau fa‘avavau lava; o lo‘o ‘iā te a‘u ki o le oti ma seoli. 19 ‘Ia e tusia mea na e iloa, ma mea o i ai nei, ‘atoa ma mea e tutupu i aso o i luma. 20 O le uiga lilo lenei o fetū e fitu na e iloa i lo‘u lima taumatau, ma tu‘ugāmolī auro e fitu. O fetū e fitu o agelu ia a ekalesia e fitu; o tu‘ugāmolī fo‘i e fitu na e iloa, o ekalesia ia e fitu.
O Le Fa‘aaliga 2
1 “ ‘Ia e tusi i le agelu o le ekalesia o i Efeso: “O ‘upu nei a lē o lo‘o ona umia fetū e fitu i lona lima taumatau, o ia fo‘i lea o lo‘o savali i totonu o tu‘ugāmolī auro e fitu. 2 ‘Ua ‘ou iloa au galuega, ma lou tigā, ma lou ‘onosa‘i, ‘ina ‘ua e lē lavātia le feagai ai ma tagata leaga; ‘ua e tofotofoina fo‘i ē ‘ua fai mai o i latou o ‘aposetolo, ‘ae leai lava, ma ‘ua e iloa fo‘i o tagata pepelo i latou; 3 ‘ou te iloa ‘ua e lavātia, ma ‘ua e ‘onosa‘i fo‘i ‘ona o lo‘u igoa, ma ‘e te le‘i fa‘avaivai lava. 4 Peita‘i ‘ua ‘ou le fiafia ‘iā te oe, ‘ona ‘ua e tu‘ua lou ulua‘i alofa. 5 ‘Ia e manatua le mea na e pa‘ū ‘ese mai ai, ma ‘ia e salamō ma fai galuega sa e faia muamua. ‘Āfai e leai, o le a ‘ou alu atu loa ‘iā te oe, ma ‘ou ‘ave‘esea lau tu‘ugāmolī mai le mea e tu‘u ai, pe ‘āfai ‘e te lē salamō. 6 A ‘ua ‘iā te oe le mea lenei, ‘ua e ‘ino‘ino i galuega a le ‘au Nikalaitai, ma o a‘u fo‘i ‘ou te ‘ino‘ino i ai. 7 “O lē ‘ua i ai taliga, fa‘alogo lelei mai ia i le mea ‘ua fetalai mai ai le Agaga i ekalesia. “O lē e manumālō, ‘ou te fa‘atagaina o ia e ‘ai i le fua o le la‘au o le ola o lo‘o i totonu o le parataiso o le Atua. 8 “ ‘Ia e tusi fo‘i i le agelu o le ekalesia o i Semurana: “O ‘upu nei a lē e muamua ma lē e mulimuli, o lē na oti, a ‘ua ola mai. 9 ‘Ua ‘ou iloa lou puapuagā, ma lou mativa (a o lo‘o e tamao‘āiga), ma le fai ‘upu taufa‘aleaga o i latou o ē e fai ane o i latou o tagata Iutaia, ‘ae leai lava, a o le sunako o Satani i latou. 10 ‘Aua ‘e te fefe i mea o le a e puapuagātia ai. O le a tu‘uina atu nisi o ‘outou e le tiapolo i le falepuipui, ‘ina ‘ia tofotofoina ai ‘outou; e puapuagātia fo‘i ‘outou i po e sefulu. ‘Ia e fa‘amaoni se‘ia o‘o i le oti, ‘ona ‘ou avatua lea ‘iā te oe le paleāli‘i o le ola. 11 “O lē ‘ua i ai taliga, fa‘alogo lelei mai ia i le mea ‘ua fai mai ai le Agaga i ekalesia. “O lē e manumālō e lē afaina lava o ia i le oti fa‘alua. 12 “ ‘Ia e tusi fo‘i i le agelu o le ekalesia o i Perekamo: “O ‘upu nei a lē o lo‘o i ai le pelu e taufai ma‘ai ona itū e lua, ma e ma‘ama‘ai lava. 13 ‘Ua ‘ou iloa le mea ‘e te nofo ai, o lo‘o i ai le nofoāli‘i o Satani; ‘ua e tāofi mau i lo‘u igoa, ma ‘ua e lē fa‘afitia le fa‘atuatua ‘iā te a‘u i aso o Anetipa la‘u molimau fa‘amaoni, o lē na fasiotia a o i ai ‘iā te ‘outou i le mea o lo‘o nofo ai Satani. 14 A o lo‘o i ai ni nai mea ‘ua ‘ou lē fiafia ai ‘iā te oe; o lo‘o ‘iā te oe nisi o ē ‘ua tāofi i le a‘oa‘oga a Palaamo, o lē na a‘oa‘o ia Palako e tu‘u atu i luma o le fānauga a Isaraelu le mea e ta‘ita‘isesēina ai, ‘ina ‘ia ‘a‘ai i latou i mea ‘ua fasia mo tupua, ma ‘ia fai amioleaga. 15 E fa‘apenā fo‘i ‘ona i ai ‘iā te oe ē ‘ua tāofi i le a‘oa‘oga a le ‘au Nikalaitai. 16 O lea ia e salamō ai. ‘Āfai e leai, o le a ‘ou vave alu atu ‘iā te oe, ma o le a ‘ou tau ma i latou i le pelu i lo‘u gutu. 17 “O lē ‘ua i ai taliga, fa‘alogo lelei mai ia i le mea ‘ua fetalai mai ai le Agaga i ekalesia. “O lē e manumālō, ‘ou te avatua ‘iā te ia le manai lilo; ‘ou te avatua fo‘i ‘iā te ia le ma‘a sinasina, ‘ua tusia fo‘i i le ma‘a le igoa fou, e leai se isi na te iloa vaganā ai lē ‘ua na maua. 18 “ ‘Ia e tusi fo‘i i le agelu o le ekalesia o i Tuatira: “O ‘upu nei ‘ua fai mai ai le Atali‘i o le Atua, o lē e pei o le mumū o le afi ona mata, o ona vae fo‘i e pei o le ‘apamemea ‘i‘ila. 19 ‘Ua ‘ou iloa au galuega ma lou alofa, ma lou fa‘atuatua, ma lou ‘au‘auna mai, ma lou ‘onosa‘i; ‘ua sili fo‘i au galuega mulimuli i lo galuega muamua. 20 A o le mea lenei ‘ua ‘ou lē fiafia ai ‘iā te oe, ‘ona ‘ua e tu‘u fa‘asa‘oloto le fafine o Iesepela, ‘ua ta‘ua o ia e ia o le perofeta fafine, e a‘oa‘o ma fa‘asesē i a‘u ‘au‘auna, ‘ina ‘ia faita‘aga, ma ‘a‘ai i mea ‘ua fasia mo tupua. 21 ‘Ua ‘ou tu‘u atu fo‘i se taimi ‘iā te ia e salamō ai i lana amioleaga, a ‘ua lē salamō lava o ia. 22 O lenei, o le a ‘ou lafoina o ia i le moega o le tigā, ‘ou te fa‘ao‘o atu fo‘i le puapuagā tele ia i latou ‘ua mulilulua fa‘atasi ma ia, pe ‘āfai e lē salamō i latou i ana galuega. 23 ‘Ou te fasia fo‘i lana fānau ia oti; e iloa fo‘i e ekalesia uma, o a‘u lē e su‘esu‘eina manatu ma loto; ‘ou te foa‘iina atu fo‘i ‘iā te ‘outou ta‘ito‘atasi e tusa ma a ‘outou galuega. 24 “A o isi o ‘outou o lo‘o totoe i Tuatira, o ē ‘ua lē i ai lenei a‘oa‘oga, ma ‘ua ‘outou lē iloa mea ‘ua ta‘ua e i latou o mea loloto a Satani, ‘ou te fai atu ‘iā te ‘outou: ‘ou te lē tu‘uina atu se isi avega ‘iā te ‘outou; 25 ‘ae peita‘i, o le mea ‘ua ‘iā te ‘outou, ‘ia ‘outou tāofi mau i ai, se‘ia ‘ou alu atu. 26 O lē e manumālō fo‘i, ma tausi i a‘u galuega se‘ia o‘o i le gata‘aga, ‘ou te tu‘uina atu ‘iā te ia le pule i nu‘u uma; 27 e pule fo‘i o ia ‘iā te i latou i le to‘oto‘o u‘amea, e nutipalaina i latou e pei o ipu a lē e fai ipu ‘omea, e pei o a‘u fo‘i ‘ona ‘ou maua mai i lo‘u Tamā; 28 ‘ou te foa‘iina atu fo‘i ‘iā te ia le fetū ao. 29 “O lē ‘ua i ai taliga, fa‘alogo lelei mai ia i le mea ‘ua fetalai mai ai le Agaga i ekalesia.
O Le Fa‘aaliga 3
1 “ ‘Ia e tusi fo‘i i le agelu o le ekalesia o i Sarataisa: “O ‘upu nei a lē ‘ua i ai agaga e to‘afitu o le Atua, ma fetū e fitu. ‘Ua ‘ou iloa au galuega; ‘ua ‘iā te oe le igoa ‘ua e ola, a ‘ua e oti. 2 ‘Ia e mataala, ma ‘ia e fa‘atūmuina mea ‘ua totoe, o le a mate; auā ‘ou te le‘i iloa au galuega ‘ona ‘ato‘atoa i luma o le Atua. 3 O lea fo‘i ‘ia e manatu ai i mea ‘ua e maua ma ‘ua e fa‘alogo ai; ‘ia e tāofiina, ma ‘ia e salamō. ‘Āfai ‘e te lē mataala, ‘ou te alu atu ‘iā te oe e pei o se gaoi, ‘e te lē iloa fo‘i le itūlā ‘ou te alu atu ai ‘iā te oe. 4 O lo‘o ‘iā te oe ni nai tagata i Sarataisa lava, o ē ‘ua lē fa‘a‘ele‘eleaina o latou ‘ofu; e savavali i latou ma a‘u i ‘ofu papa‘e, auā ‘ua tatau ai mo i latou. 5 O lē e manumālō, e fa‘a‘ofuina o ia i ‘ofu papa‘e; ‘ou te lē soloi‘esea fo‘i lona igoa i le tusi o le ola; a ‘ou te ta‘u atu lona igoa i luma o lo‘u Tamā, ma luma o ana agelu. 6 “O lē ‘ua i ai taliga, fa‘alogo lelei mai ia i le mea ‘ua fetalai mai ai le Agaga i ekalesia. 7 “ ‘Ia e tusi fo‘i i le agelu o le ekalesia o i Filatelefaia: “O ‘upu nei a lē e pa‘ia, o lē e fa‘amaoni, o lē ‘ua i ai le ki a Tavita, o lē na te tatalaina ‘ae leai se na te tapunia, o lē na te tapunia fo‘i ‘ae leai sē na te tatalaina. 8 ‘Ua ‘ou iloa au galuega. O lenei, ‘ua ‘ou tu‘uina atu i ou luma le faitoto‘a ‘ua avanoa, e leai fo‘i se isi na te mafaia ‘ona punitia; ‘ua ‘ou iloa ‘ua itiiti lou malosi, a ‘ua e usiusita‘i i la‘u ‘upu, ma ‘ua e lē fa‘afitia lo‘u igoa. 9 O lenei, ‘ou te tu‘uina atu i latou o i le sunako o Satani, o ē o lo‘o fai mai o i latou o tagata Iutaia, ‘ae leai lava, a ‘ua pepelo i latou, o le a ‘ou ta‘ita‘iina mai i latou i ou luma, ma ifo atu ‘iā te oe; e iloa fo‘i e i latou ‘ua ‘ou alofa ‘iā te oe. 10 ‘Ua e usiusita‘i i la‘u ‘upu ia e ‘onosa‘i, o lea fo‘i ‘ou te tausi ai ‘iā te oe i le itūlā o le tofotofoga o le a o‘o mai i le lalolagi ‘atoa, ‘ina ‘ia tofotofoina i latou o lo‘o nonofo i le lalolagi. 11 O lenei, ‘ou te vave alu atu; ia e tāofi mau i le mea ‘ua ‘iā te oe, ‘ina ne‘i ‘avea e se isi lou pale. 12 O lē e manumālō, ‘ou te faia o ia ma poutū i le malumalu o lo‘u Atua; e lē toe ulufale lava o ia, ‘ou te tusi fo‘i i ai le suafa o lo‘u Atua, ma le igoa o le ‘a‘ai a lo‘u Atua, o Ierusalema fou lea e alu ifo nai le lagi mai lo‘u Atua, ‘atoa fo‘i ma lo‘u igoa fou. 13 “O lē ‘ua i ai taliga, fa‘alogo lelei mai ia i le mea ‘ua fetalai mai ai le Agaga i ekalesia. 14 “ ‘Ia e tusi fo‘i i le agelu o le ekalesia o i Laotikaia: “O ‘upu nei a le Amene, o le molimau moni ma le fa‘amaoni, o le amataga o mea na faia e le Atua. 15 ‘Ua ‘ou iloa au galuega, ‘e te lē ma‘alili, ‘e te lē vevela fo‘i. ‘Ou te loto ‘ina ‘ia e ma‘alili pe vevela! 16 A ‘ona ‘ua e fa‘alēogalua, ‘e te le ma‘alili, ‘e te lē vevela fo‘i, o le mea lea o le a ‘ou luaiina atu ai oe nai lo‘u gutu. 17 Auā ‘ua e fai mai, ‘ ‘Ua ‘ou mau‘oloa, ‘ua ‘ou tamao‘āiga, ‘ou te lē mativa fo‘i i se mea e tasi; a ‘ua e lē iloa o oe o le tagata malaia, ma le puapuagātia, ma le mativa, ma le tauaso, ma le lē lavalavā.’ 18 O le mea lea ‘ou te fai atu ai ‘iā te oe, ia e fa‘atau atu ‘iā te a‘u le auro ‘ua fa‘amamāina i le afi, ‘ina ‘ia e tamao‘āiga ai; ma ‘ofu papa‘e ‘ina ‘ia e ‘ofu ai, ‘ina ne‘i iloa le ma o lou lē lavalavā; ma le vaimata e nini a‘i ou mata, ‘ina ‘ia e pupula ai. 19 ‘Ou te a‘oa‘i atu ma sasa ia i latou uma ‘ou te alofa i ai; o lea ia e loto naunau, ma ‘ia e salamō. 20 O lenei, ‘ou te tu atu i le faitoto‘a ma tu‘itu‘i atu; a i ai se isi e fa‘alogo mai i lo‘u leo, ma tatala mai le faitoto‘a, ‘ou te ulufale atu ‘iā te ia, ma te talisua ma ia, o ia fo‘i ma a‘u. 21 O lē e manumālō, ‘ou te fa‘atagaina o ia e nonofo fa‘atasi ma a‘u i lo‘u nofoāli‘i, e pei o a‘u fo‘i ‘ona ‘ou manumālō, ma ‘ua ma nonofo fa‘atasi ai ma lo‘u Tamā i lona nofoāli‘i. 22 “O lē ‘ua i ai taliga, fa‘alogo lelei mai ia i le mea ‘ua fetalai mai ai le Agaga i ekalesia.”
O Le Fa‘aaliga 4
1 ‘Ua mavae atu ia mea, ‘ona ‘ou iloa atu lea, o le faitoto‘a ‘ua avanoa i le lagi, o le ulua‘i leo fo‘i na ‘ou fa‘alogo ai e pei o se pū o lo‘o tautala mai ‘iā te a‘u, fai mai, “Inā sau ia i luga nei, se‘i ‘ou fa‘aali atu ‘iā te oe mea o le a tutupu i aso o lumana‘i.” 2 O le taimi lava lea na ‘ou i ai loa i le Agaga. ‘Ua tu mai o le nofoāli‘i i le lagi, ma lē o lo‘o ti‘eti‘e ai i le nofoāli‘i, 3 O lē o lo‘o ti‘eti‘e mai e foliga i ma‘a tāua o le iasepi ma le salikea i le tino mai; ‘ua si‘osi‘oina fo‘i le nofoāli‘i e le nuanua e pei o le samaraki lona tino mai. 4 ‘Ua si‘osi‘oina fo‘i le nofoāli‘i e nofoāli‘i e luasefulu ma le fa; na ‘ou iloa fo‘i toeaina e to‘aluasefulu ma le fa e ti‘eti‘e i ia nofoāli‘i, ‘ua ‘o‘ofu i ‘ofu papa‘e; ‘ua i o latou ulu fo‘i pale auro. 5 ‘Ua o‘o mai fo‘i uila, ma faititili, ma leo mai le nofoāli‘i; o lo‘o mumū fo‘i sulu e fitu i luma o le nofoāli‘i e fa‘amalamalama ai, o agaga ia e to‘afitu o le Atua. 6 ‘Ua i luma fo‘i o le nofoāli‘i le sami tioata, e pei o ma‘a tioata. ‘Ua si‘omia fo‘i le nofoāli‘i, i ‘ona itū ta‘itasi, e meaola e fa, ‘ua tūtūmu i mata i luma ‘atoa ma tua. 7 O le meaola muamua e pei o se leona, o lona lua o meaola e pei o se povi ta‘anoa, o lona tolu o meaola e pei o se tagata ona mata, o lona fa o meaola e pei o se aeto ‘ua lele. 8 O meaola e fa e tofu ma ‘apa‘au ta‘iono, ma e tumu i latou i mata i fafo ‘atoa ma totonu; e lē mapu i latou i le ao ma le po i le fai atu, “E pa‘ia, e pa‘ia, e pa‘ia le Ali‘i le Atua e ona le malosi uma lava, o lē na soifua, o lo‘o soifua fo‘i, o le a afio mai!” 9 A vivi‘i fo‘i, ma fa‘ane‘ene‘e, ma fa‘afetai atu meaola i lē o lo‘o ti‘eti‘e i le nofoāli‘i, o lē e soifua e fa‘avavau fa‘avavau lava. 10 ‘Ona fa‘apa‘u‘ū ai lea o toeaina e to‘aluasefulu ma le fa i luma o lē o lo‘o ti‘eti‘e i le nofoāli‘i, ma ifo atu i lē e soifua e fa‘avavau fa‘avavau lava, ma lafo o latou pale i luma o le nofoāli‘i, ma fai atu, 11 “Lo matou Ali‘i e, ma lo matou Atua, e tatau lava ‘ona tu‘uina atu ‘iā te oe le vi‘iga, ma le fa‘ane‘etaga, ma le mana; auā na e faia mea uma lava, ‘ona o lou finagalo fo‘i e i ai i latou ma ‘ua faia.”
O Le Fa‘aaliga 5
1 Na ‘ou iloa fo‘i i le ‘a‘ao taumatau o lē o lo‘o ti‘eti‘e i le nofoāli‘i, o le tusi ta‘ai o i ai tusitusiga i totonu ‘atoa ma le tua, ma ‘ua fa‘amauina i fa‘amaufa‘ailoga e fitu. 2 Na ‘ou iloa fo‘i le agelu malosi na tāla‘i atu ma le leotele, “O ai ‘ea e tatau ‘ona fofolaina le tusi ta‘ai, ma tatala ona fa‘amaufa‘ailoga?” 3 ‘Ae leai se isi i le lagi, po o le lalolagi, po o lalo o le lalolagi, na te mafaia ‘ona fofolaina le tusi ta‘ai, pe va‘ai i ai. 4 ‘Ona ‘ou tagi tele ai lea, ‘ina ‘ua lē maua se isi e tatau ‘ona fofolaina pe va‘ai i totonu o le tusi ta‘ai. 5 ‘Ona fai mai ai lea ‘iā te a‘u o le tasi o toeaina, “ ‘Aua ‘e te tagi; ‘ua manumālō le leona o le itū‘āiga o Iuta, o le aa o Tavita, e mafai e ia ‘ona fofola le tusi ta‘ai, ma tatala ona fa‘amaufa‘ailoga e fitu.” 6 Na ‘ou va‘aia fo‘i le Tama‘i Mamoe e peiseaī na fasia, ‘ua tu mai i le vā o le nofoāli‘i ma meaola e fa ‘atoa ma toeaina, e fitu ona nifo ma ona mata e fitu, o Agaga ia e to‘afitu o le Atua ‘ua ‘auina atu i le lalolagi uma. 7 ‘Ua alu atu o ia, ma to mai le tusi ta‘ai nai le ‘a‘ao taumatau o lē na ti‘eti‘e i le nofoāli‘i. 8 ‘Ua to mai e ia le tusi ta‘ai, ‘ona fa‘apa‘u‘ū ai lea o meaola e fa ma toeaina e to‘aluasefulu ma le fa i luma o le Tama‘i Mamoe, e tofu i latou ma le kitara, ma le ipu auro ‘ua tumu i mea manogi e mū, o talosaga ia a le ‘au pa‘ia; 9 ‘ua pepese fo‘i i latou i le pese fou, ‘ua fai atu, “ ‘Ua tatau lava ‘iā te oe ‘ona e tago i le tusi ta‘ai, ma tatala ona fa‘amaufa‘ailoga. Auā na fasia oe, ‘ua e fa‘atauina fo‘i tagata i lou lava toto mo le Atua, mai i itū‘āiga uma, ma gagana ‘ese‘ese, ma nu‘u, ‘atoa ma atunu‘u. 10 ‘Ua e faia fo‘i i latou ma mālō, o ositaulaga fo‘i i lo matou Atua; e fai fo‘i i latou ma tupu i le lalolagi.” 11 Na ‘ou iloa atu fo‘i, ma ‘ou fa‘alogo i le leo o agelu e to‘atele, o ē o lo‘o si‘omia le nofoāli‘i, ‘atoa ma le leo o meaola e fa ma toeaina. O lo latou faitau aofa‘i e sefulu afe ni sefulu afe, ma afe ni afe, 12 o lo‘o ‘alalaga leotetele atu, “ ‘Ua tatau lava i le Tama‘i Mamoe na fasia, ‘ona tu‘uina atu ‘iā te ia le mana, ma le tamao‘āiga, ma le poto, ma le malosi, ma le fa‘ane‘etaga, ma le vi‘iga, ma le fa‘amanū!” 13 Na ‘ou fa‘alogo fo‘i i meaola uma na faia o i le lagi, ma le lalolagi, ma lalo ifo o le lalolagi, ‘atoa ma le sami ma mea uma o i ai, o lo‘o fai atu, “ ‘Ia i ai i lē o lo‘o ti‘eti‘e i le nofoāli‘i ‘atoa ma le Tama‘i Mamoe, le fa‘amanū, ma le fa‘ane‘etaga, ma le vi‘iga, ma le mana, e fa‘avavau fa‘avavau lava!” 14 ‘Ona fai atu lea o meaola e fa, “Amene!” ‘Ona fa‘apa‘u‘ū lea o toeaina ma ifo atu.
O Le Fa‘aaliga 6
1 Na ‘ou iloa atu fo‘i ‘ua tatalaina e le Tama‘i Mamoe le tasi o fa‘amaufa‘ailoga e fitu, ‘ona ‘ou fa‘alogoina ai lea o le tasi o meaola e fa, o lona leo e pei o se faititili, fai mai, “Sau ia!” 2 ‘Ona ‘ou iloa atu ai lea o le solofanua pa‘epa‘e, o lē o lo‘o ti‘eti‘e ai e i ai lana ‘aufana; ‘ua foa‘iina atu fo‘i ‘iā te ia le paleāli‘i; ‘ona alu atu ai lea o ia, o lo‘o manumālō, ma o le a manumālō pea lava o ia. 3 ‘Ua tatalaina fo‘i e ia lona lua o fa‘amaufa‘ailoga, ‘ona ‘ou fa‘alogo ai lea i lona lua o meaola, o lo‘o fai mai, “Sau ia!” 4 ‘Ona alu atu lea o le isi solofanua, e lanu mūmū; ‘ua tu‘uina atu fo‘i i lē o lo‘o ti‘eti‘e ai le pule na te ‘ave‘eseina ai le filemū i le lalolagi, a ‘ia fefasia‘i tagata; ‘ua foa‘iina atu fo‘i ‘iā te ia le pelu tele. 5 ‘Ua tatalaina fo‘i e ia lona tolu o fa‘amaufa‘ailoga, ‘ona ‘ou fa‘alogoina ai lea o lona tolu o meaola, o lo‘o fai mai, “Sau ia!” ‘Ona ‘ou va‘aia ai lea o le solofanua uliuli; ‘ua i le lima o lē o lo‘o ti‘eti‘e ai le fua fa‘atautau. 6 Na ‘ou fa‘alogo fo‘i i le leo e peiseaī o lo‘o sau mai meaola e fa, fai mai, “O le tau o le kuata o le saito o le tenari lea, o le tau o kuata e tolu o le karite o le tenari fo‘i lea; ‘ae ‘aua ‘e te fa‘aleagaina le suāu‘u ma le uaina!” 7 ‘Ua tatalaina fo‘i e ia lona fa o fa‘amaufa‘ailoga, ‘ona ‘ou fa‘alogoina ai lea o le leo o lona fa o meaola, fai mai, “Sau ia!” 8 ‘Ona ‘ou va‘ai atu ai lea i le solofanua samasama, ma lē o lo‘o ti‘eti‘e ai, o lona igoa o le Oti, ma o lo‘o mulimuli atu ai Seoli ‘iā te ia; ‘ua tu‘uina atu fo‘i ‘iā te i lā‘ua le pule e fasiotia ai le kuata o le lalolagi i le pelu, ma le oge, ma le fa‘ama‘i, ‘atoa ma manu fe‘ai o le vao. 9 ‘Ua tatalaina fo‘i e ia lona lima o fa‘amaufa‘ailoga, ‘ona ‘ou iloa ai lea o lo‘o i lalo ifo o le fatafaitaulaga o agaga o ē na fasiotia ‘ona o le afioga a le Atua, ma le molimau sa tāofi mau e i latou. 10 ‘Ua ‘alalaga leotetele fo‘i i latou ma fai atu, “Le Ali‘i e, o lē e pa‘ia ma fa‘amaoni, o afea ‘ea ‘e te fa‘amasino atu ai ma taui atu lo matou toto i ē o nonofo i le lalolagi?” 11 ‘Ua foa‘iina atu ‘iā te i latou ta‘ito‘atasi ‘ofu papa‘e; ‘ua fai atu fo‘i ‘iā te i latou ia fa‘atalitali lemū se‘ia toeitiiti, se‘i ‘atoa mai o latou uso a ‘au‘auna ma o latou uso, o ē o le a fasiotia fo‘i e pei o i latou lava. 12 Na ‘ou va‘ai atu fo‘i ‘ua tatalaina e ia lona ono o fa‘amaufa‘ailoga, o le mafui‘e tele. O le la fo‘i ‘ua liua ma ‘ua uliuli e pei o le ‘ie talatala, ma le masina ‘ua liua e pei o le toto, 13 o fetū fo‘i o le lagi ‘ua pa‘u‘ū i le lalolagi, e pei ‘ona to‘ulu o fua moto o le mati pe a lūlūina i se matagi tetele. 14 ‘Ua mavae atu fo‘i le lagi e pei o se tusi ‘ua ta‘ai, ‘ua ‘ave‘esea fo‘i mauga ma motu uma mai le mea sa i ai. 15 O tupu fo‘i o le lalolagi, ma ali‘i sili, ma ta‘ita‘i o ‘au, ma ē e mau‘oloa, ma ē e malolosi, ma tagata pologa, ma tagata sa‘oloto uma, o ē o lo‘o lalafi i ana ma papa o mauga. 16 ‘Ua fai atu fo‘i i latou i mauga ma papa, “Mafuli mai ia ‘iā te i matou, ‘ina ‘ia natia ai i matou mai le silafaga a lē o lo‘o ti‘eti‘e i le nofoāli‘i, ma le to‘asā o le Tama‘i Mamoe. 17 Auā ‘ua o‘o mai le aso tele o lo latou to‘asā, o ai fo‘i sē na te mafaia ‘ona tu atu?”
O Le Fa‘aaliga 7
1 ‘Ua mavae atu ia mea, ‘ona ‘ou iloa ai lea o agelu e to‘afa o tutū mai i itū e fa o le lalolagi, o tāofi i matagi e fa o le lalolagi, ‘ina ‘ia lē agi atu le matagi i le lau‘ele‘ele, po o le sami, po o se la‘au e tasi. 2 Na ‘ou iloa fo‘i le isi agelu ‘ua ui a‘e i le mea e alu a‘e ai le la, ‘ua ‘iā te ia le fa‘amaufa‘ailoga a le Atua soifua. ‘Ua ‘alaga leotele o ia i agelu e to‘afa, o ē na tu‘uina atu i ai le pule e fa‘aleagaina ai le lau‘ele‘ele ma le sami, 3 ‘ua fai atu, “ ‘Aua tou te fa‘aleagaina le lau‘ele‘ele, po o le sami, po o la‘au, se‘ia matou fa‘amaufa‘ailogaina ‘au‘auna o lo tatou Atua i o latou muaulu.” 4 Na ‘ou fa‘alogo fo‘i i le faitau aofa‘i o ē na fa‘amaufa‘ailogaina; e selau fasefulu ma le fa afe ē ‘ua fa‘amaufa‘ailogaina, mai itū‘āiga uma o le fānauga a Isaraelu; 5 e sefulu ma le lua afe ē ‘ua fa‘amaufa‘ailogaina mai le itū‘āiga o Iuta; e sefulu ma le lua afe mai le itū‘āiga o Reupena; e sefulu ma le lua afe mai le itū‘āiga o Kato; 6 e sefulu ma le lua afe mai le itū‘āiga o Asera; e sefulu ma le lua afe mai le itū‘āiga o Nafatali; e sefulu ma le lua afe mai le itū‘āiga o Manase; 7 e sefulu ma le lua afe mai le itū‘āiga o Simeona; e sefulu ma le lua afe mai le itū‘āiga o Levi; e sefulu ma le lua afe mai le itū‘āiga o Isakara; 8 e sefulu ma le lua afe mai le itū‘āiga o Sepulona; e sefulu ma le lua afe mai le itū‘āiga o Iosefa; e sefulu ma le lua afe fo‘i i latou ‘ua fa‘amaufa‘ailogaina mai le itū‘āiga o Peniamina. 9 ‘Ua mavae atu ia mea, ‘ona ‘ou iloa atu lea o tagata e matuā to‘atele e lē mafaia e se tagata ‘ona faitau, e ō mai i latou mai atunu‘u uma, ma itū‘āiga, ma gagana ‘ese‘ese, o lo‘o tutū i latou i luma o le nofoāli‘i, ma luma o le Tama‘i Mamoe, ‘ua ‘o‘ofu fo‘i i latou i ‘ofu papa‘e, ‘ua i ai fo‘i laupama i o latou lima. 10 ‘Ua ‘alalaga leotetele fo‘i i latou, “O lo‘o i ai le fa‘aolataga i lo tatou Atua, o lē e ti‘eti‘e i le nofoāli‘i, ‘atoa ma le Tama‘i Mamoe!” 11 ‘Ua tutū mai fo‘i agelu uma ma ‘ua si‘omia e i latou le nofoāli‘i, ma toeaina, ma meaola e fa, ‘ua fa‘apa‘u‘ū faō fo‘i i latou i luma o le nofoāli‘i, ma ifo atu i le Atua, 12 ma fai atu, “Amene! ‘Ia i lo tatou Atua le fa‘amanū, ma le vi‘iga, ma le poto, ma le fa‘afetai, ma le mamalu, ma le mana, ma le malosi e fa‘avavau fa‘avavau lava! Amene.” 13 ‘Ona fai mai ai lea o le tasi o toeaina, ‘ua fai mai ‘iā te a‘u, “O ai ‘ea i latou ia o lo‘o ‘o‘ofu i ‘ofu papa‘e, ma po o fea fo‘i e ō mai ai i latou?” 14 ‘Ona ‘ou fai atu ai lea ‘iā te ia, “Le Ali‘i e, ‘ua e silafia.” ‘Ona fai mai ai lea o ia ‘iā te a‘u, “O i latou ia o ē e ō mai nai le puapuagā tele, ‘ua ta o latou ‘ofu, ma ‘ua fa‘apa‘epa‘eina i le toto o le Tama‘i Mamoe. 15 O le mea lea ‘ua tutū ai i latou i luma o le nofoāli‘i o le Atua, ma ‘ua ‘au‘auna fo‘i i latou ‘iā te ia i lona malumalu i le ao ma le po; e malutia fo‘i i latou e lē e ti‘eti‘e i le nofoāli‘i. 16 E lē toe fia ‘a‘ai, e lē toe fia inu fo‘i i latou, e lē mafatia i latou i le la, po o se isi vevela; 17 auā o le Tama‘i Mamoe o lo‘o i totonugalemū o le nofoāli‘i na te fafagaina i latou, ma ta‘ita‘i i latou i puna o vai ola; e soloi‘eseina fo‘i e le Atua loimata uma nai o latou mata.”
O Le Fa‘aaliga 8
1 ‘Ua tatalaina fo‘i e le Tama‘i Mamoe lona fitu o fa‘amaufa‘ailoga, ‘ona fa‘alologo ai lea o i latou uma i le lagi pe ‘atoa le ‘afa itūlā. 2 Na ‘ou iloa fo‘i agelu e to‘afitu o ē e tutū i luma o le Atua, ‘ua avatu fo‘i ‘iā te i latou pū e fitu. 3 ‘Ua sau fo‘i le isi agelu, ma tu mai i le fatafaitaulaga, o lo‘o ‘iā te ia le ipu auro e fa‘amu ai mea manogi; ‘ua avatu fo‘i ‘iā te ia mea manogi e tele, ‘ina ‘ia avatu ai fa‘atasi ma talosaga a le ‘au pa‘ia uma i luga o le fata auro ‘ua i luma o le nofoāli‘i. 4 O le asu fo‘i o le mea manogi o lo‘o i le lima o le agelu ‘ua alu a‘e, ‘atoa ma talosaga a le ‘au pa‘ia, i luma o le Atua. 5 ‘Ua tago fo‘i le agelu i le ipu e fa‘amu ai mea manogi, ‘ua fa‘atūmuina e ia i le afi mai le fatafaitaulaga, ma ‘ua lafo ifo loa i le lalolagi; ‘ona i ai lea o leo, ma faititili, ma uila, ma le mafui‘e. 6 O agelu e to‘afitu ‘ua i ai pū e fitu, ma ‘ua nofo sauni i latou e ili. 7 ‘Ua ili fo‘i e le agelu muamua le pū, ‘ona i ai lea o le timu ‘aisa ma le afi ‘ua fefiloi ma le toto, ‘ua lafo ifo i le lalolagi; ‘ona susunuina ai lea o lona tolu o vaega o le lalolagi, ma ‘ua susunuina lona tolu o vaega o la‘au, ‘ua susunuina fo‘i vao iti lauolaola uma lava. 8 ‘Ua ili fo‘i e lona to‘alua o agelu le pū, ‘ona i ai lea o le mea e peiseaī se mauga tele ‘ua mū i le afi, ma ‘ua lafoina i le sami; 9 ‘ona liu toto lea o lona tolu o vaega o le sami, ma ‘ua mamate ai lona tolu o vaega o meaola o i le sami, ‘ua fa‘aumatia fo‘i lona tolu o vaega o va‘a. 10 ‘Ua ili fo‘i e lona to‘atolu o agelu le pū, ‘ona pa‘ū ifo ai lea o le fetū tele mai le lagi, ma ‘ua mumū e pei se sulu, ma ‘ua pa‘ū ifo i lona tolu o vaega o vaitafe, ‘atoa ma puna o vai. 11 O le igoa o le fetū o ‘O‘ona; ‘ona fa‘a‘o‘onaina ai lea o lona tolu o vaega o vai, ‘ua oti fo‘i tagata e to‘atele i le vai, ‘ina ‘ua fa‘a‘o‘onaina. 12 ‘Ua ili fo‘i e lona to‘afa o agelu le pū, ‘ona taia ai lea o lona tolu o vaega o le la, ma lona tolu o vaega o le masina, ‘atoa ma lona tolu o vaega o fetū, ‘ina ‘ia fa‘apouliuligia ai lona tolu o vaega o lo latou malamalama, e le‘i malamalama fo‘i lona tolu o vaega o le ao, ma ‘ua fa‘apenā fo‘i lona tolu o vaega o le po. 13 Na ‘ou va‘aia ma ‘ou fa‘alogoina le aeto ‘ua lele i le taulotoa‘iga o le lagi, ma ‘alaga leotele mai, “Oi talofa, oi talofa, oi talofa i ē o lo‘o nonofo i le lalolagi, pe a o‘o ‘ina ilia mai isi pū e isi agelu e to‘atolu!”
O Le Fa‘aaliga 9
1 ‘Ua ili fo‘i le pū e lona to‘alima o agelu, ‘ona ‘ou iloa atu ai lea o le fetū na pa‘ū mai le lagi i le lalolagi; ‘ua tu‘uina atu fo‘i ‘iā te ia le ki o le to e lē gata. 2 ‘Ua tatalaina e ia le to e lē gata; ‘ona alu a‘e ai lea o le asu nai le to e pei o le asu o se umu tele, ‘ua fa‘apouliuligia ai le la ma le lagi ‘ona o le asu mai le to. 3 ‘Ua ō atu fo‘i sē akerise nai le asu i luga o le lau‘ele‘ele; ‘ua tu‘uina atu ‘iā te i latou le malosi e pei o le malosi o akarava o le lalolagi; 4 ‘ua fai atu fo‘i ‘iā te i latou, e ‘aua ne‘i o latou fa‘aleagaina le mutia o le lalolagi, po o vao lauolaola, po o se la‘au; ‘ae tau lava o tagata ‘ua lē i ai i o latou muaulu le fa‘amaufa‘ailoga a le Atua. 5 ‘Ua tu‘uina atu i latou ‘ina ‘ia fasiotia, ‘ae tau lava ‘ina fa‘atigāina i masina e lima; o latou tigā fo‘i e pei o le tigā o le tagata pe a tuia e le akarava. 6 O aso ia e sā‘ilia ai e tagata le oti ‘ae lē maua e i latou; e naunau fo‘i i latou ‘ina ‘ia oti, ‘ae sola ‘ese le oti mai ‘iā te i latou. 7 O sē akerise fo‘i ‘ua tino mai e pei o solofanua ‘ua saunia mo le tau‘a; o latou ulu fo‘i ‘ua i ai mea e pei ni paleāli‘i auro, ma o latou mata e pei o mata o tagata. 8 ‘Ua ‘iā te i latou fo‘i lauulu e pei o lauulu o fafine, ma o latou nifo e pei o nifo o leona. 9 ‘Ua ‘iā te i latou fo‘i ufifatafata e pei o ufifatafata u‘amea; ‘ua pa‘ō fo‘i o latou ‘apa‘au e pei o le ta‘alili o kariota ma solofanua e tele pe a taufetuli i tau‘a. 10 E i ai o latou si‘usi‘u e pei o si‘usi‘u o akarava, e i ai fo‘i tui i o latou si‘usi‘u, ma ‘ua ‘iā te i latou le malosi e fa‘aleagaina ai tagata i masina e lima. 11 E i ai lo latou tupu, o le agelu lea o le to e lē gata; o lona igoa i le gagana Eperu o Avatonu, a o lona igoa i le gagana Eleni o Apoluonu. 12 ‘Ua mavae atu le auē e tasi; a o lo‘o totoe auē e lua o le a o‘o mai. 13 ‘Ua ili fo‘i e lona to‘aono o agelu le pū, ‘ona ‘ou fa‘alogo ai lea i le leo mai nifo e fa o le fata auro o lo‘o i luma o le Atua, 14 ‘ua fai atu i lona to‘aono o agelu o i ai le pū, “Tatala ia agelu e to‘afa o ē ‘ua fusifusia i le vaitafe tele o Eufirate.” 15 ‘Ona tatalaina ai lea o ia agelu e to‘afa o ē ‘ua saunia mo le itūlā, ma le aso, ma le masina, ma le tausaga, ‘ina ‘ia fasiotia e i latou lona tolu o vaega o tagata. 16 O le faitau aofa‘i o le ‘autau o ē e ti‘eti‘e i solofanua, e fa‘aluaina le sefulu afe ni sefulu afe; na ‘ou fa‘alogo fo‘i i lo latou faitau aofa‘i. 17 E fa‘apenei la ‘ona ‘ou iloa atu solofanua i le fa‘aaliga na ‘ou va‘aia; o ē na ti‘eti‘e ai ‘ua i ai ufifatafata afi, ma le lanumoana malosi, ma le lanu o le teiō; o ulu o solofanua e pei o ulu o leona, ‘ua alu atu le afi ma le asu, ma le teiō nai o latou gutu. 18 O mea ia e tolu na fasiotia ai lona tolu o vaega o tagata, o le afi, ma le asu, ma le teiō na alu atu nai o latou gutu. 19 Auā ‘ua i o latou gutu ma o latou si‘usi‘u lo latou malosi; auā o latou si‘usi‘u e pei o gata ia, ‘ua i ai ulu, o mea fo‘i ia e fa‘aleaga ai tagata e i latou. 20 O tagata na totoe, o ē e le‘i fasiotia i nei mala, e le‘i salamō i latou i galuega a o latou lima, o lo latou ifo i temoni, ma tupua auro ma siliva ma ‘apamemea ma ma‘a ma la‘au, o mea ia e lē mafai ‘ona va‘ai, pe fa‘alogo, pe savavali; 21 e le‘i salamō fo‘i i latou ‘iā latou fasioti tagata, ma a latou togafiti fa‘ataulāitu, ma o latou faita‘aga, ma a latou gaoi.
O Le Fa‘aaliga 10
1 Na ‘ou iloa atu fo‘i le isi agelu malosi ‘ua alu ifo mai le lagi, ‘ua ‘ofu i le ao, ma ‘ua i lona ulu le nuanua, o ona fofoga fo‘i e pei o le la, ma ona vae e pei o poutū afi. 2 ‘Ua i lona lima le tusi ta‘ai la‘itiiti ‘ua fofola; ‘ua tu lona vae taumatau i le sami, ma lona vae tauagavale i le lau‘ele‘ele, 3 ‘ua ‘alaga leotele fo‘i o ia, pei o le leona pe a tagi; ‘ua ‘alaga o ia, ‘ona pāpā mai ai lea o faititili e fitu. 4 ‘Ina ‘ua pāpā mai faititili e fitu, ‘ua ‘ou fa‘asaga atu o le a tusi, ‘ae ‘ou fa‘alogoina loa le leo mai le lagi, ‘ua fai mai ‘iā te a‘u, “ ‘Ia fa‘amaufa‘ailogaina mea na fai mai ai faititili e fitu, ‘aua ne‘i e tusia ia mea.” 5 O le agelu fo‘i na ‘ou va‘ai i ai a o tu i le sami ma le lau‘ele‘ele, ‘ua si‘i a‘e e ia lona lima i le lagi, 6 ma ‘ua tautō i lē o lo‘o soifua e fa‘avavau fa‘avavau lava, o lē na faia le lagi ma mea o i ai, ma le lau‘ele‘ele ma mea o i ai, ma le sami ma mea o i ai, e leai se toe fa‘atali. 7 ‘Ae peita‘i, ‘ina ‘ua o‘o i aso e ili ai e lona to‘afitu o agelu lana pū, ‘ona fa‘ataunu‘uina loa lea o le fuafuaga lilo a le Atua, e pei ‘ona folafolaina mai e ia e ala i ana ‘au‘auna perofeta. 8 O le leo fo‘i na ‘ou fa‘alogo ai mai le lagi, ‘ua toe tautala mai ‘iā te a‘u, fai mai, “Alu ia inā tago i le tusi ta‘ai la‘itiiti ‘ua fofola, o lo‘o i le lima o le agelu, lē o lo‘o tu i le sami ma le lau‘ele‘ele.” 9 ‘Ona ‘ou alu atu ai lea i le agelu, ma ‘ou fai atu ‘iā te ia, “Aumai ‘iā te a‘u le tusi ta‘ai la‘ititi.” ‘Ona fai mai lea o ia ‘iā te a‘u, “Inā tago ia i ai, ma ‘ia e ‘aina; e ‘o‘ona i lou manava, ‘ae suamalie i lou gutu e pei o le meli.” 10 ‘Ona ‘ou tago ai lea i le tusi ta‘ai la‘ititi nai le lima o le agelu, ma ‘ou ‘aina; ‘ona suamalie ai lea i lo‘u gutu e pei o le meli; ‘ua uma ‘ona ‘ou ‘ai ai, ‘ona ‘o‘ona lea i lo‘u manava. 11 ‘Ona fai mai ai lea o ia ‘iā te a‘u, “E tatau ‘ona e toe vavalo atu i tagata, ma atunu‘u, ma gagana ‘ese‘ese, ma tupu e to‘atele.”
O Le Fa‘aaliga 11
1 ‘Ona tu‘uina mai lea ‘iā te a‘u o le fasi la‘au pei se to‘oto‘o e fua ai; ‘ua tu mai fo‘i le agelu ma fai mai, “Tula‘i ia, ma tago e fua le malumalu o le Atua, ma le fatafaitaulaga, ma ē o tapua‘i ai. 2 ‘Ae ‘aua ‘e te fuaina le lotoā e pito i tua o le malumalu; ia tu‘u ai pea lea, auā ‘ua tu‘uina atu le vaega lenā i atunu‘u ‘ese, ma e solia fo‘i e i latou le ‘a‘ai pa‘ia i masina e fasefulu ma le lua. 3 ‘Ou te tu‘uina atu fo‘i i a‘u molimau e to‘alua, o lo‘o lavalava i ‘ie talatala, ‘ina ‘ia vavalo ai i lā‘ua i aso e afe lua selau onosefulu.” 4 O la‘au olive ia e lua, ma tu‘ugāmolī e lua o lo‘o tutū i luma o le Ali‘i o le lalolagi. 5 ‘Āfai fo‘i e fia fa‘aleagaina i lā‘ua e se isi, ‘ona alu atu ai lea o le afi nai o la gutu, e fa‘aumatia ai ē ‘ua ‘avea i lā‘ua ma o latou fili; ‘āfai fo‘i e fia fa‘aleaga atu se isi ‘iā te i lā‘ua, o le a fa‘apea lava ‘ona fasiotia lea tagata. 6 O lo‘o ‘iā te i lā‘ua, o le pule e tapunia ai le lagi, ‘ina ‘ia lē toe i ai se timu i aso ia a o vavalo atu i lā‘ua; ‘ua ‘iā te i lā‘ua fo‘i le pule i vai e liua ai ma toto, ma taia fo‘i le lalolagi i mala uma, e tusa ai ma lo la faitalia pe fa‘afia o faia lea mea. 7 A o‘o ‘ina uma atu le la molimau, ‘ona si‘i mai lea o le tau‘a ‘iā te i lā‘ua e le manu fe‘ai, lē ‘ua alu a‘e nai le to e lē gata, e manumālō fo‘i o ia ‘iā te i lā‘ua, ma fasiotia i lā‘ua e ia. 8 O la tino oti fo‘i e i ai i le ala o le ‘a‘ai tele, o lona igoa i le gagana fa‘atusa, o Sotoma po‘o Aikupito, o le mea na fa‘asatauro ai lo latou Ali‘i. 9 E tolu ma le ‘afa aso e va‘ava‘ai ai i o la tino i latou mai nu‘u, ma itū‘āiga, ma gagana ‘ese‘ese, ma atunu‘u, ‘ae lē mafai ‘ona tu‘uina atu e i latou o la tino i se tu‘ugamau. 10 E fiafia fo‘i ē o lo‘o nonofo i le nu‘u ‘ona o i lā‘ua, e ‘oli‘oli fo‘i i latou, ma fe‘avea‘i meaalofa; auā na fa‘atigāina e ia perofeta e to‘alua ē o lo‘o nonofo i le lalolagi. 11 A ‘ua mavae aso e tolu ma le ‘afa, ‘ona uluitinoina ai lea o i lā‘ua e le mānava ola mai le Atua, ‘ona tutū loa lea o i lā‘ua i luga; o tagata fo‘i na va‘ava‘ai atu ‘iā te i lā‘ua ‘ua matata‘u tele i latou. 12 ‘Ona fa‘alogo atu lea o i lā‘ua i le leo tele mai le lagi, ‘ua fai mai ‘iā te i lā‘ua, “Inā ō mai ia i luga nei.” ‘Ona ō a‘e ai lea o i lā‘ua i le lagi i le ao; a o va‘ava‘ai atu ‘iā te i lā‘ua ē na fai i lā‘ua ma o latou fili. 13 O le itūlā lava lea na tupu ai le mafui‘e tele, ma ‘ua pa‘ū ai lona sefulu o vaega o le ‘a‘ai; ‘ua oti fo‘i i le mafui‘e tagata e to‘afituafe, a o ē na totoe ‘ua matata‘u, ma ‘ua vivi‘i atu i latou i le Atua o le lagi. 14 ‘Ua mavae atu lona lua o auē; e vave fo‘i ‘ona o‘o mai lona tolu o auē. 15 ‘Ua ili fo‘i e lona to‘afitu o agelu le pū, ‘ona i ai lea o leotetele i le lagi, ‘ua fai mai, “O le mālō o le lalolagi ‘ua ‘avea mo lo tatou Ali‘i ma lona Keriso, e fai fo‘i o ia ma tupu e fa‘avavau fa‘avavau lava.” 16 O toeaina fo‘i e to‘aluasefulu ma le fa, o ē o lo‘o nonofo i o latou nofoāli‘i i luma o le Atua, ‘ua fa‘apa‘u‘ū faō i latou, ma ifo i le Atua, 17 ma fai atu, “Le Ali‘i e, le Atua e ona le malosi uma lava, lē o lo‘o soifua, lē na soifua. ‘Ua matou fa‘afetai atu ‘iā te oe, ‘ina ‘ua e tago i lou mana tele, ma ‘ua amata loa ‘ona fai oe ma tupu. 18 ‘Ua ita fo‘i atunu‘u ‘ese, a ‘ua o‘o mai lou to‘asā, ‘atoa ma le taimi e fa‘amasinoina ai ē ‘ua oti. Ma taui ai i au ‘au‘auna perofeta, ma le ‘au pa‘ia, ma ē ‘ua matata‘u i lou suafa, o tagatanu‘u ‘atoa ma ali‘i. E fano ai fo‘i i latou o ē na fano ai le lalolagi.” 19 ‘Ua fa‘aavanoaina fo‘i le malumalu o le Atua i le lagi, ‘ona iloa atu ai lea o le ‘atola‘au o lana feagaiga i lona malumalu; ‘ona fe‘emo ai lea o uila, ‘ua lagona fo‘i leo tetele ma faititili, ma le mafui‘e, ‘atoa ma timu ‘aisa tetele.
O Le Fa‘aaliga 12
1 ‘Ua va‘aia fo‘i le fa‘ailoga tele i le lagi, o le fafine ‘ua ‘ofu i le la, o i lalo o ona vae le masina, o i lona ulu fo‘i le paleāli‘i o fetū e sefulu ma le lua; 2 e to fo‘i o ia; ‘ua fa‘atigā ma ‘alaga i le tigā a fānau. 3 ‘Ua va‘aia fo‘i se tasi fa‘ailoga i le lagi, fa‘auta, o se tarako tele mūmū, e fitu ona ulu ma ona nifo e sefulu; o lo‘o i ona ulu o paleāli‘i e fitu. 4 ‘Ua toso ifo e lona si‘usi‘u lona tolu o vaega o fetū i le lagi, ma lafo ifo i latou i le lalolagi. ‘Ua tu fo‘i le tarako i luma o le fafine o le a fānau, ‘ina ‘ia ‘ai e ia lana tama pe a fānau. 5 ‘Ua fānau fo‘i e ia le tama tane, o lē na te pulea nu‘u uma i le to‘oto‘o u‘amea; ‘ona segia a‘e lea o lana tama i le Atua ma lona nofoāli‘i. 6 ‘Ona sola lea o le fafine i le vao, o i ai le mea ‘ua saunia e le Atua e nofo ai o ia, ‘ina ‘ia fafagaina ai o ia i aso e afe lua selau ma le onosefulu. 7 ‘Ua tau fo‘i le tau‘a i le lagi, o Mikaele ma ana agelu ‘ua tau i latou ma le tarako; ‘ua tau fo‘i le tarako ‘atoa ma ana agelu, 8 a ‘ua le manumālō i latou, e le toe maua fo‘i i le lagi se mea e nonofo ai i latou. 9 ‘Ua lafo ifo fo‘i le tarako tele. O le gata tuai lea, ‘ua igoa i le tiapolo, i le ma Satani, o le fa‘asesē i le lalolagi uma; ‘ua lafo ifo i le lalolagi, ‘ua lafo ifo fo‘i ana agelu fa‘atasi ma ia. 10 Na ‘ou fa‘alogo fo‘i i le leo tele i le lagi, ‘ua fa‘apea, “O ona po nei ‘ua o‘o mai ai le fa‘aolataga, ma le mana, ma le mālō o lo tatou Atua, ma le pule a lona Keriso; auā ‘ua lafoina i lalo le na molia o tatou uso, o lē na molia i latou i luma o lo tatou Atua i le ao ma le po. 11 A ‘ua manumālō i latou ‘iā te ia ‘ona o le toto o le Tama‘i Mamoe, ma le ‘upu a la latou mau, ‘ua latou le fa‘apelepeleina fo‘i o latou ola ‘ua o‘o i le oti. 12 O le mea lea ‘ia ‘outou ‘oli‘oli ai, le lagi e, ‘atoa ma e ‘ua nonofo ai! Oi talofa ‘iā te ‘oulua le fanua ma le sami, auā ‘ua alu ifo ‘iā te ‘oulua le tiapolo ‘ua ita tele, auā ‘ua na iloa ‘ua itiiti ona aso.” 13 ‘Ua iloa e le tarako ‘ua lafo ifo o ia i le lalolagi, ‘ona tuliloa lea e ia le fafine na fānaua le tama tane. 14 ‘Ona foa‘iina atu lea i le fafine ‘apa‘au e lua o le aeto tele, ‘ina ‘ia lele ai o ia mai luma o le gata aga‘i i le vao i le mea e nofo ai o ia, e fafagaina ai o ia i le taimi, ma taimi, ma le ‘afa o le taimi. 15 ‘Ona luai atu lea e le gata le vai, e pei o se vaitafe nai lona gutu i tua o le fafine, ‘ina ‘ia tafea o ia i le vai. 16 ‘Ona fesoasoani ai lea o le fanua i le fafine, ‘ua fa‘amaga a‘e fo‘i e le fanua lona gutu uma ‘ua inu i le vaitafe na luai atu e le tarako nai lona gutu. 17 ‘Ua ita fo‘i le tarako i le fafine, ‘ona alu atu ai lea o ia e tau le tau‘a ma i latou ‘ua totoe o lana fānau, o e ‘ua tausi i poloa‘iga a le Atua, ma ‘ua tāofi le mau ‘iā Iesu. 18 Ma ‘ua tu o ia i le oneone i le matāfaga.
O Le Fa‘aaliga 13
1 ‘Ona ‘ou va‘aia lea o se manu fe‘ai ‘ua alu a‘e nai le sami, e fitu ona ulu ma ona nifo e sefulu. ‘Ua i luga o ona nifo paleāli‘i e sefulu, ‘ua i luga fo‘i o ona ulu igoa fāifāi. 2 O le manu fe‘ai fo‘i na ‘ou iloa, e pei o se nameri, o ona vae e pei o vae o se urosa, ma lona gutu e pei o le gutu o se leona. ‘Ua tu‘uina atu fo‘i ‘iā te ia e le tarako lona malosi, ma lona nofoāli‘i, ma le pule tele. 3 O le tasi o ona ulu e peiseaī na fa‘amanu‘aina ia mate; a o lona manu‘a na fai a mate ai ‘ua pe. ‘Ona ofo ai lea o le lalolagi uma ma latou mulimuli atu i le manu fe‘ai. 4 ‘Ua latou ifo atu i le tarako o lē na tu‘uina atu le pule i le manu fe‘ai, ‘ua latou ifo fo‘i i le manu fe‘ai, ‘ua fa‘apea atu, “O ai sē tusa ma le manu fe‘ai? O ai sē na te mafaia ‘ona tau ma ia?” 5 ‘Ua avatu fo‘i ‘iā te ia le gutu e tautala i ‘upu fa‘asausili ma ‘upu fāifāi; ‘ua tu‘uina atu fo‘i ‘iā te ia le pule mo masina e fagafulu ma le lua. 6 ‘Ona tautala lea o ia ‘ua fāifāi i le Atua, ‘ua ia fāifāi i lona suafa, ma lona afio‘aga, o i latou ia o ē ‘ua nonofo i le lagi. 7 ‘Ua tu‘uina atu fo‘i ‘iā te ia ia tau le tau‘a ma le au pa‘ia, ma ‘ia manumālō ‘iā te i latou. ‘Ua tu‘uina atu fo‘i ‘iā te ia e pule i itū‘āiga uma, ma gagana ‘ese‘ese, ma atunu‘u. 8 E ifo fo‘i ‘iā te ia o i latou uma o ē nonofo i le lalolagi, ē ‘ua le tusia o latou igoa talu ‘ona fa‘avaeina le lalolagi i le tusi o le ola a le Tama‘i Mamoe na fasia. 9 “Ai se tasi ‘ua i ai taliga, inā fa‘alogo mai ia o ia; 10 Ai sē ‘ua ‘aveina fa‘atagataotau‘a, e alu lava o ia fa‘atagataotau‘a. Ai sē na te fasiotia i le pelu, e tatau fo‘i ‘ona fasiotia o ia i le pelu. O le mea lenā ‘ua fia maua ai le ‘onosa‘i ma le fa‘atuatua o le au pa‘ia.” 11 Na ‘ou va‘aia fo‘i se tasi manu fe‘ai ‘ua alu a‘e nai le fanua, e i ai ‘ona nifo e lua pei o nifo o se tama‘i mamoe, a ‘ua tautala o ia pei o se tarako. 12 ‘Ua fai fo‘i e ia le pule uma a le ulua‘i manu fe‘ai i ona luma; ma ‘ua faia e ia ‘ina ‘ia ifo le lalolagi ma e uma ‘ua nonofo ai i le ulua‘i manu fe‘ai, o lē ‘ua pe lona manu‘a na fai a mate ai. 13 ‘Ua faia fo‘i e ia fa‘ailoga tetele, o lea ‘ua fai ai e ia ‘ina ‘ia alu ifo le afi mai le lagi i le lalolagi i luma o tagata. 14 ‘Ua ia fa‘asesē fo‘i i ē ‘ua nonofo i le lalolagi, ‘ona o ia fa‘ailoga ‘ua tu‘uina atu ‘iā te ia na te faia i luma o le manu fe‘ai. O lo‘o fai atu ia i ē ‘ua nonofo i le lalolagi, latou te faia se fa‘atagata o le manu fe‘ai e ona le manu‘a i le pelu a ‘ua ola. 15 ‘Ua tu‘uina atu fo‘i ‘iā te ia na te avatua le mānava i le fa‘atagata o le manu fe‘ai, ‘ina ‘ia tautala le fa‘atagata o le manu fe‘ai, ma ‘ia faia ‘ina ‘ia fasiotia i latou uma o ē e lē ifo atu i le fa‘atagata o le manu fe‘ai. 16 ‘Ua faia fo‘i e ia ‘ina ‘ia fa‘ailogaina tagata uma, o tagatanu‘u ‘atoa ma ali‘i, o ē mau‘oa ma ē matitiva, o ē sa‘oloto ma ē pologa, ia fa‘ailogaina i latou i o latou lima taumatau, po o latou muaulu; 17 ‘ina ‘ia lē mafaia ‘ona fa‘atau mai pe fa‘atau atu e se tasi, tau lava o ē ‘ua i ai le fa‘ailoga, po o le igoa o le manu fe‘ai, po o le numera o lona igoa. 18 O le mea lenei e ao ‘ina i ai le poto. O lē ‘ua i ai le mafaufau, inā faitau ia o ia i le numera o le manu fe‘ai; auā o le numera fo‘i lea o se tagata. O lona numera fo‘i, e ono selau onosefulu ma le ono.
O Le Fa‘aaliga 14
1 Na ‘ou va‘aia fo‘i, fa‘auta, ‘ua tu mai le Tama‘i Mamoe i le mauga o Siona, ‘ua fa‘atasi fo‘i ma ia tagata e selau fasefulu ma le fa afe, ‘ua tusia le suafa o lona Tamā i o latou muaulu. 2 ‘Ua ‘ou fa‘alogo fo‘i i le leo mai le lagi e pei o le ta‘alili o vai e tele, e pei o le ta‘alili fo‘i o le faititili tetele; ‘ua ‘ou fa‘alogo fo‘i i le leo o ē e ta kitara o lo‘o ta a latou kitara. 3 ‘Ua latou pepese fo‘i e peiseaī o se pese fou i luma o le nofoāli‘i, ma luma o meaola e fa, ma le au toeaina. E le mafaia fo‘i e se tasi ona a‘oa‘o i lea pese, na o le selau fasefulu ma le fa afe o ē ‘ua fa‘atauina mai le lalolagi. 4 O tagata ia e le‘i leaga i fafine, auā o taupou i latou. O i latou ia o ē ‘ua mulimuli atu i le Tama‘i Mamoe i mea uma e alu i ai o ia. O i latou ia o ē ‘ua fa‘atauina mai tagata, o ē ‘ua ‘avea ma ulua‘i fua mo le Atua ma le Tama‘i Mamoe. 5 E le iloa fo‘i se pepelo i o latou gutu; auā e le ponā i latou. 6 Na ‘ou va‘aia fo‘i le tasi agelu ‘ua lele i le taulotoa‘iga o le lagi, ‘ua ‘iā te ia le tala lelei e fa‘avavau e folafola atu i ē e nonofo i le lalolagi, i atunu‘u uma, ma itū‘āiga, ma gagana ‘ese‘ese, ma nu‘u, 7 ‘ua fa‘apea atu ma le leo tele, “ ‘Ia ‘outou matata‘u i le Atua, ma avatu ‘iā te ia le vi‘iga, auā ‘ua o‘o mai le itū aso o lana fa‘amasinoga. Ma ‘ia ‘outou ifo i lē na faia le lagi, ma le lalolagi, ma le sami, ‘atoa ma puna o vai.” 8 ‘Ona mulimuli atu lea o le tasi agelu, o lona lua, ‘ua fa‘apea atu, “ ‘Ua pa‘ū, ‘ua pa‘ū Papelonia o le ‘a‘ai sili, o lē ‘ua fa‘ainu i nu‘u uma i le uaina o le to‘asā o lana faita‘aga.” 9 ‘Ona mulimuli atu ai lea ‘iā te i lā‘ua o lona to‘atolu o agelu, ‘ua fa‘apea atu ma le leo tele, “Ai se tasi e ifo i le manu fe‘ai ma lona fa‘atagata, ma talia lana fa‘ailoga i lona muaulu po o lona lima. 10 E inu lava ia i le uaina o le to‘asā o le Atua, ‘ua liligiina atu e lē suia i le ipu o lona to‘asā, e puapuagātia fo‘i ia i le afi ma le teiō i luma o le au agelu pa‘ia ma luma o le Tama‘i Mamoe. 11 O le asu fo‘i o lo latou puapuagā e alu a‘e e fa‘avavau fa‘avavau lava; latou te lē maua fo‘i se filemū i le ao ma le po o ē ‘ua ifo i le manu fe‘ai ma lona fa‘atagata, ma sē na te talia le fa‘ailoga o lona igoa.” 12 O le mea lenei ‘ua fia maua ai le ‘onosa‘i o le au pa‘ia, o ē ‘ua tausi i poloa‘iga a le Atua ma le fa‘atuatua ‘iā Iesu. 13 Na ‘ou fa‘alogo fo‘i i le leo mai le lagi ‘ua fa‘apea mai ‘iā te a‘u, “ ‘Ia e tusi: ‘Amu‘ia ē ‘ua oti, o ē ‘ua oti o i le Ali‘i e amata i nei ona po.” “O lea lava,” ‘ua fetalai mai ai le Agaga, “ ‘Ina ‘ia latou mālōlō ‘iā latou galuega tigā; auā fo‘i o a latou galuega e mulimuli ‘iā te i latou.” 14 Na ‘ou va‘aia fo‘i, fa‘auta, o se ao sinasina, ‘ua ti‘eti‘e fo‘i i le ao se tasi pei o le atali‘i o le tagata, ‘ua i lona ao le paleāli‘i auro, ‘ua i lona ‘a‘ao fo‘i le selesaito ma‘ai. 15 ‘Ua alu atu fo‘i se tasi agelu mai le malumalu, ‘ua ‘alaga atu ma le leo tele i lē ‘ua ti‘eti‘e i le ao, “Inā fa‘ao‘o atu ia lau selesaito, inā sele, auā ‘ua o‘o i ona po ‘e te selesele ai, auā ‘ua afu le saito o le lalolagi.” 16 ‘Ona fa‘ao‘o mai lea e lē ‘ua ti‘eti‘e i le ao lana selesaito i le lalolagi, ‘ua seleseleina ai le lalolagi. 17 ‘Ua alu atu fo‘i le isi agelu mai le malumalu o i le lagi, ‘ua ‘iā te ia fo‘i le selesaito ma‘ai. 18 O le isi agelu fo‘i ‘ua alu atu mai le fatafaitaulaga, ‘ua ‘iā te ia le pule i le afi, ‘ua ‘alaga fo‘i o ia ma le leo tele i lē ‘ua i ai le selesaito ma‘ai, ‘ua fa‘apea atu, “Inā fa‘ao‘o atu ia lau selesaito ma‘ai, inā sala ia i fuifui vine o le vine o le lalolagi, auā ‘ua otaotā ona fuifui vine.” 19 ‘Ona fa‘ao‘o mai ai lea e le agelu o lana selesaito i le lalolagi, ‘ua sala fo‘i e ia le vine o le lalolagi, ‘ua ia lafo atu fo‘i i totonu o le soligāvine tele o le to‘asā o le Atua. 20 ‘Ua solia fo‘i le soligāvine i tua o le ‘a‘ai, ‘ua alu ifo fo‘i le toto mai le soligāvine e tusa ma le lima futu le loloto, ‘ae lua selau maila le umi.
O Le Fa‘aaliga 15
1 Na ‘ou va‘aia fo‘i i le lagi le isi fa‘ailoga tele e ofo ai, o agelu e to‘afitu ‘ua i ai mala e fitu e gata ai; auā e fa‘ai‘uina ai le to‘asā o le Atua. 2 Na ‘ou va‘aia fo‘i ‘ua peiseaī o se sami tioata ‘ua fefiloi ma le afi; ma o i latou fo‘i na manumālō i le manu fe‘ai, ma lona fa‘atagata, ma le numera o lona igoa, ‘ua tutū i latou i le sami tioata, ‘ua ‘iā te i latou kitara a le Atua. 3 ‘Ua latou pepese i le pese a Mose le ‘au‘auna a le Atua, ma le pese a le Tama‘i Mamoe, ‘ua fa‘apea atu: “Le Ali‘i e, le Atua e ou le malosi uma lava, ‘ua tetele au galuega e ofo ai! E tonu ma fa‘amaoni ou ala, le Tupu o augātupulaga e! 4 Le Ali‘i e, o ai sē le mata‘u ma vivi‘i atu i lou suafa? Auā ‘ua na o oe e pa‘ia; auā e ō mai nu‘u uma lava ma latou ifo i ou luma; auā ‘ua fa‘aalia au fa‘amasinoga tonu.” 5 ‘Ua mavae ia mea, ‘ona ‘ou va‘ai lea, ‘ua fa‘aavanoaina i le lagi le malumalu o i le fale fetāfa‘i o le molimau. 6 ‘Ona ō atu lea mai le malumalu o agelu e to‘afitu ‘ua i ai mala e fitu, ‘ua ‘o‘ofu i latou i le lino e mamā ma le pupula, ‘ua fusia fo‘i o latou fatafata i fusi auro. 7 O le tasi fo‘i o mea ola e fa ‘ua ia avatu i agelu e to‘afitu o ipu auro e fitu, ‘ua tūtūmu i le to‘asā o le Atua o lē e soifua e fa‘avavau lava. 8 ‘Ua tumu fo‘i le malumalu i le asu mai le pupula o le Atua ‘atoa ma lona mana; e le mafaia fo‘i e se tasi ona ulu atu i le malumalu, se‘ia fa‘ai‘uina mala e fitu a agelu e to‘afitu.
O Le Fa‘aaliga 16
1 Na ‘ou lagona fo‘i le leo tele mai le malumalu, ‘ua fa‘apea atu i agelu e to‘afitu, “ō ia, inā liligi atu ipu e fitu o le to‘asā o le Atua i le lalolagi.” 2 ‘Ona alu atu ai lea o le ulua‘i agelu, ‘ua liligi ifo lana ipu i le fanua; ‘ona o‘o lea o le papala leaga e tigā ai i tagata ‘ua i ai le fa‘ailoga o le manu fe‘ai, ‘atoa ma ē ‘ua ifo i lona fa‘atagata. 3 ‘Ua liligi fo‘i e lona to‘alua o agelu lana ipu i le sami. ‘Ona liua ai lea pei o le toto o se tagata oti; ‘ona mamate ai lea o mea ola uma o i le sami. 4 ‘Ua liligi fo‘i e lona to‘atolu o agelu lana ipu i vaitafe ma puna o vai; ‘ona liu toto ai lea. 5 Na ‘ou lagona fo‘i le agelu e pule i vai ‘ua fa‘apea atu, “ ‘Ua amiotonu oe, lē o lo‘o soifua, lē na soifua lē e pa‘ia; ‘ina ‘ua fa‘apea ‘ona e fa‘asalaina. 6 Auā na latou fa‘amaligiina le toto o tagata pa‘ia ma perofeta; i le ‘ua e avatu ‘iā te i latou le toto e inu ai, auā ‘ua tatau lea mo i latou.” 7 Na ‘ou lagona fo‘i le fatafaitaulaga ‘ua fa‘apea atu, “E moni, le Ali‘i e, le Atua e ou le malosi uma lava; e fa‘amaoni ma tonu au fa‘amasinoga.” 8 ‘Ua liligi fo‘i e lona to‘afa o agelu lana ipu i le la. ‘Ua tu‘uina atu ‘iā te ia e fa‘amu ai tagata i le afi. 9 ‘Ua mū fo‘i tagata i le mū tele, ‘ona latou fāifāi lea i le suafa o le Atua e ana le pule i ia mala. A ‘ua le salamō i latou e avatu ai le vi‘iga ‘iā te ia. 10 ‘Ua liligi fo‘i e lona to‘alima o agelu lana ipu i le nofoāli‘i o le manu fe‘ai, ‘ona fa‘apouliuligia lea o lona mālō. ‘Ona latou fe‘ati ai lea o latou laulaufaiva ‘ona o le tigā. 11 ‘Ua latou fāifāi fo‘i i le Atua o le lagi ‘ona o lo latou tigā ma o latou papala. ‘Ua le salamō fo‘i i latou ‘iā latou amio. 12 ‘Ua liligi fo‘i e lona to‘aono o agelu lana ipu i le vaitafe tele o Eufirate. ‘Ona mate ai lea o lona vai, ‘ina ‘ia saunia ai le ala o tupu mai sasa‘e. 13 ‘Ona ‘ou va‘aia lea o agaga leaga e to‘atolu e pei o ni rane, ‘ua ō mai mai le gutu o le tarako, ma le gutu o le manu fe‘ai, ‘atoa ma le gutu o le perofeta pepelo. 14 Auā o agaga ia o temoni o ē faia fa‘ailoga; ‘ua latou ō atu i tupu o le lalolagi ma le atu laulau uma, e fa‘apotopoto ‘iā te i latou mo le tau‘a i le aso tele o le Atua e ona le malosi uma lava. 15 (Fa‘auta, ‘ou te alu atu pei o se gaoi! ‘Amu‘ia lē mataala, ma tausi i ona ‘ofu, ‘ina nei savali lē lavalavā o ia, ma latou iloa atu lona ma.) 16 Na latou fa‘apotopoto fo‘i ‘iā te i latou i le mea ‘ua igoa i le gagana Eperu o Amaketo. 17 ‘Ua liligi fo‘i e lona to‘afitu o agelu lana ipu i le ‘ea; ‘ona tulei mai ai lea o le si‘ufofoga tele mai le malumalu, mai le nofoāli‘i, ‘ua fa‘apea mai, “ ‘Ua uma ‘ona fai!” 18 ‘Ona tutupu ai lea o uila, ma leo, ma faititili; sa i ai fo‘i se mafui‘e tele, e le‘i fa‘apea ‘ona i ai se mafui‘e ‘ua tele na‘uā talu ‘ona i ai tagata i le lalolagi. 19 ‘Ua vaetoluina fo‘i le ‘a‘ai tele, ‘ua pa‘ū fo‘i ‘a‘ai o nu‘u. ‘Ua manatua Papelonia le ‘a‘ai tele i luma o le Atua, ‘ina ‘ia tu‘uina atu ‘iā te ia le ipu uaina o lona to‘asā mamafa. 20 ‘Ua sosola fo‘i motu uma; o mauga fo‘i ‘ua le iloa. 21 ‘Ua to mai fo‘i mai le lagi i luga o tagata uato‘a tetele, e tusa o le selau pauna le mamafa o le uato‘a e tasi. ‘Ona fāifāi ai lea o tagata i le Atua ‘ona o le mala o le uato‘a, auā ‘ua matuā tele lea mala.
O Le Fa‘aaliga 17
1 ‘Ua sau fo‘i le tasi o ia agelu e to‘afitu sa i ai ipu e fitu, ‘ua tautala mai ‘iā te a‘u, ‘ua fa‘apea mai, “Sau ia, ‘ou te fa‘ailoa ‘iā te oe le fa‘asalaina o le fafine talitane sili, o lē ti‘eti‘e i vai e tele; 2 o lē ‘ua faita‘aga i ai tupu o le lalolagi. ‘Ua ‘onanā fo‘i ē o nonofo i le lalolagi i le uaina o lana faita‘aga.” 3 ‘Ua ia ‘avea fo‘i a‘u i le vao i le agaga; ‘ona ‘ou va‘aia lea o le fafine ‘ua ti‘eti‘e i se manu fe‘ai mūmū, ‘ua lilo i igoa fāifāi, e fitu ona ulu ma ona nifo e sefulu. 4 ‘Ua ‘ofu le fafine i le ‘ie pāuli ma le mūmū, ‘ua teuteuina i auro, ma ma‘a tāua, ma penina. ‘Ua i lona lima fo‘i se ipu auro ‘ua tumu i mea ‘inosia ma le leaga o lona faita‘aga. 5 ‘Ua tusia fo‘i i lona muaulu le igoa, e lilo lona uiga: “Papelonia le ‘a‘ai tele, o le tinā o fafine talitane ma mea ‘inosia i le lalolagi.” 6 Na ‘ou va‘aia fo‘i le fafine ‘ua ‘onā i le toto o le au pa‘ia, ma le toto o ē na molimau ‘iā Iesu. ‘Ua ‘ou va‘ai atu ‘iā te ia, ‘ona ‘ou matuā ofo tele ai lea. 7 ‘Ona fai mai lea o le agelu ‘iā te a‘u, “Se ā le mea ‘ua e ofo ai? ‘Ou te ta‘u atu ‘iā te oe le uiga lilo o le fafine, ma le manu fe‘ai ‘ua ia ti‘eti‘e ai, e fitu ona ulu ma ona nifo e sefulu. 8 O le manu fe‘ai na e va‘aia, sa ola, a ‘ua lē o toe ola nei, o le a alu a‘e fo‘i mai le to e le gata, e alu atu fo‘i o ia i le malaia. O ē nonofo i le lalolagi, e le‘i tusia o latou igoa i le tusi o le ola talu ‘ona fa‘avaeina le lalolagi, latou te taufaiofo pe a va‘aia le manu fe‘ai. Auā sa ola, ‘ua le o toe ola, a o le ā toe aliali mai. 9 “O le mea lenei e tusa ai le mafaufau ‘ua i ai le poto. O ulu e fitu o mauga ia e fitu, ‘ua nofo ai le fafine. O tupu fo‘i ia e to‘afitu. 10 E to‘alima ‘ua pa‘u‘ū, o lo‘o i ai le tasi, e le‘i o‘o mai nei fo‘i le isi. A o‘o mai e pu‘upu‘u le taimi e tumau ai. 11 O le manu fe‘ai fo‘i sa ola, a ‘ua le o toe ola, o lona to‘avalu lea o tupu, e mai le to‘afitu fo‘i o ia, ma e alu atu fo‘i o ia i le malaia. 12 “O nifo fo‘i e sefulu na e va‘aia, o tupu ‘iā e to‘asefulu, e le‘i o‘o ‘ina maua ni o latou mālō, a ‘ua maua e i latou le pule pei o tupu i le itūlā e tasi, fa‘atasi ma le manu fe‘ai. 13 ‘Ua loto gatasi i latou nei, latou te avatu fo‘i o latou malosi ma a latou pule i le manu fe‘ai. 14 Latou te tau le tau‘a ma le Tama‘i Mamoe, ‘ae manumālō le Tama‘i Mamoe ‘iā te i latou, auā o le Ali‘i ia o ali‘i ma le Tupu o tupu; o ē ‘ua ‘iā te ia fo‘i ‘ua vala‘auina i latou, ma filifilia, ma fa‘amaoni.” 15 ‘Ona fai mai lea o ia ‘iā te a‘u! “O vai na e iloa, o lo‘o ti‘eti‘e ai le fafine talitane, o nu‘u ia, ma fa‘apotopotoga o tagata, ma atunu‘u, ma gagana ‘ese‘ese. 16 O nifo fo‘i e sefulu na e iloa, ma le manu fe‘ai, e ‘ino‘ino i le fafine talitane, ma fa‘asaunoa ‘iā te ia, ma tō ‘ese ona ‘ofu; latou te ‘a‘ai fo‘i i lona tino, ma susunu ‘iā te ia i le afi. 17 Auā ‘ua tu‘uina atu e le Atua i o latou loto ‘ia faia lona finagalo, e loto gatasi fo‘i i latou e avatu lo latou mālō mo le manu fe‘ai, se‘i taunu‘u afioga a le Atua. 18 “O le fafine fo‘i na e iloa, o le ‘a‘ai tele lea e i ai le pule i tupu o le lalolagi.”
O Le Fa‘aaliga 18
1 ‘Ua mavae ia mea, ‘ona ‘ou va‘aia lea o le agelu o lo‘o alu ifo mai le lagi, ‘ua ‘iā te ia le pule sili; ‘ua malamalama fo‘i le lalolagi i lona pupula. 2 ‘Ua matuā ‘alaga leo tele fo‘i o ia, ‘ua fa‘apea ane, “ ‘Ua pa‘ū, ‘ua pa‘ū Papelonia le ‘a‘ai tele! ‘Ua ‘avea fo‘i o ia ma mea e nonofo ai temoni, ma mea e puipui ai agaga leaga uma, o le mea fo‘i e puipui ai manu felelei uma e leaga ma le ‘inosia. 3 Auā ‘ua feinu nu‘u uma i le uaina o le to‘asā o lana faita‘aga, ‘ua faita‘aga fo‘i ma ia tupu o le lalolagi, o le faulaiga o ana mea fa‘afiafia ‘ua tamao‘āiga ai ē ‘ua fa‘atau ‘oa o i le lalolagi.” 4 ‘Ua ‘ou fa‘alogo fo‘i i le isi leo mai le lagi ‘ua fa‘apea mai, “Lo‘u nu‘u e, ‘ia ‘outou ō ‘ese ‘iā te ia, ‘ina nei fa‘atasia ‘outou i ana agasala, ‘ina nei tofusia fo‘i ‘outou i ona mala. 5 Auā ‘ua pa‘i atu ana agasala i le lagi, ‘ua manatua fo‘i e le Atua ana amioleaga. 6 ‘Ia ‘outou taui atu ‘iā te ia ia pei ‘ona taui mai e ia ‘iā te ‘outou. ‘Ia ‘outou taui fa‘alua ‘iā te ia e tusa ma ana galuega; o le ipu fo‘i na liligi mai ai e ia, ‘ia ‘outou liligi fa‘aluaina atu ai ‘iā te ia. 7 E pei ‘ona mitamita o ia ‘iā te ia, ma ‘ua fa‘afiafia o ia ‘iā te ia, ia fa‘apea ‘ona ‘outou tu‘uina atu ‘iā te ia o le puapuagā ma le fa‘anoanoa. Auā ‘ua fa‘apea ifo o ia i lona loto, ‘ou te nofo nei o le tupu fafine. ‘ou te lē se fafine ‘ua oti lana tane, ‘ou te lē iloa lava se fa‘anoanoa. 8 O le mea lea e o‘o mai ai i le aso e tasi ona mala, o le fa‘ama‘i, ma le fa‘anoanoa, ma le oge. E susunuina fo‘i o ia i le afi; auā e mamana lava le Ali‘i le Atua o lē e fa‘amasino ‘iā te ia.” 9 O tupu fo‘i o le lalolagi ē na faita‘aga ma fa‘afiafia i latou fa‘atasi ma ia, latou te taufaitagi ‘iā te ia ma taufaitagitu‘i ‘ona o ia, pe a latou iloa atu le asu o lona susunuina. 10 E tutū mamao i latou ‘ona o le fefe i lona puapuagā, e fa‘apea atu, “Auē! auē! Papelonia e, le ‘a‘ai tele ma le malosi! Auā o le itū aso e tasi ‘ua o‘o mai ai lau sala.” 11 O fa‘atau‘oa fo‘i i le lalolagi e taufaitagi i latou ma fa‘anoanoa ‘ona o ia; auā e lē toe fa‘atau e se tasi a latou ‘oloa. 12 O le ‘oloa o auro, ma ario, ma ma‘a tāua, ma penina, ma ‘ie vavae, ma ‘ie pāuli, ma le silika, ma le ‘ie mūmū, ma la‘au manogi uma, ma ipu nifo elefane uma, ma ipu la‘au matuā tāua uma; ma le ‘apamemea, ma le u‘amea, ma le ma‘amora, 13 ma kinamoni, ma mea manogi, ma le suāu‘u manogi, ma le pulu lipano, ma le uaina, ma le u‘u olive, ma le falaoa lelei, ma le saito, ma manu, ma mamoe, ma solofanua, ma nofoa fa‘ata‘avalevale, o pologa fo‘i, ‘atoa ma agaga o tagata. 14 “ ‘Ua te‘a fo‘i ma oe fua na e tu‘inanau i ai, ‘ua te‘a fo‘i ma oe mea lālelei uma ma mea pupula, ‘e te lē toe maua lava ia mea!” 15 O ē e fa‘atau ia mea, o ē e tamao‘āiga ‘ona o ia, latou te tūtū mamao ma le fefe i lona puapuagā, o lo‘o taufaitagi ma fa‘anoanoa, 16 o lo‘o fa‘apea atu, “Auē! auē! le ‘a‘ai tele, ‘ua ‘ofu i le ‘ie vavae ma le pāuli ma le mūmū, na teuteu fo‘i i auro, ma ma‘a tāua ma penina! 17 Auā o le itū aso e tasi ‘ua fa‘aumatia ai le ‘oloa ‘ua sili ‘ona tele.” O tautai uma, ‘atoa ma tagata uma o i va‘a, ma ‘auva‘a, ‘atoa uma ma ē e feoa‘i i le vasa, ‘ua tutū mamao i latou, 18 ma latou ‘alalaga ‘ina o iloa atu le asu o lona susunuina ‘ua fa‘apea, “O fea se ‘a‘ai e tusa ma lenei ‘a‘ai tele?” 19 ‘Ua latou lafo a‘e fo‘i le ‘ele‘ele i o latou ulu, ‘ua ‘alalaga, ma taufaitagi, ma fa‘anoanoa, ‘ua fa‘apea atu, “Auē! auē! le ‘a‘ai tele, na tamao‘āiga ai i latou uma o ē o i ai va‘a i le vasa, ‘ona o ana mea tāua; auā o le itūaso e tasi ‘ua fa‘atafunaina ai o ia. 20 “ ‘Ia e ‘oli‘oli ‘ona o ia, le lagi e, ‘atoa ma ‘outou tagata pa‘ia, ma ‘aposetolo ma perofeta. Auā na fa‘asalaina o ia e le Atua ‘ona o le fa‘asalaina o ‘outou e ia.” 21 ‘Ua si‘itia fo‘i e le isi agelu malosi o le mea e pei o se ma‘aolo tele, ma lafo i le sami, ‘ua fa‘apea atu, “E fa‘apea ‘ona lafotūina o Papelonia le ‘a‘ai tele, e lē toe iloa lava. 22 E lē toe lagona fo‘i ‘iā te oe le leo o ē e ta kitara, ma ē lagi siva, ma ē e ili fagufagu, ‘atoa ma ē e ili pū; e lē toe iloa fo‘i ‘iā te oe se tufuga e to‘atasi o se faiva e tasi, e lē toe lagona fo‘i ‘iā te oe le ta‘alili o le ma‘aolo. 23 E lē toe pupula mai fo‘i ‘iā te oe se malamalama o se molī, e lē toe lagona fo‘i ‘iā te oe le leo o le fa‘ato‘afaiavā ma le fa‘ato‘anofo tane. Auā o ou tagata fa‘atau‘oa o tagata sili ia o i le lalolagi, auā ‘ua fa‘asesēina nu‘u uma i au togafiti fa‘ataulāitu. 24 “ ‘Ua iloa fo‘i ‘iā te oe le toto o perofeta ma le au pa‘ia, ma i latou uma ‘ua fasiotia i le lalolagi.”
O Le Fa‘aaliga 19
1 ‘Ua mavae nei mea, ‘ona ‘ou fa‘alogo lea e peiseaī o le leo tele o se fa‘apotopotoga o tagata e to‘atele o i le lagi, ‘ua fa‘apea atu, “Aleluia! ‘Ua i le Ali‘i lo tatou Atua le fa‘aolataga, ma le vi‘iga ma le fa‘ane‘ene‘ega, ma le mana. 2 Auā e fa‘amaoni, e tonu fo‘i ana fa‘amasinoga; auā ‘ua fa‘asalaina e ia le fafine talitane e sili, o lē na fa‘aleagaina le lalolagi i lana faita‘aga, ‘ua ia taui atu ‘iā te ia lava le toto o ana ‘au‘auna,” 3 ‘Ua toe fai atu i latou, “Aleluia! ‘Ua alu a‘e lona asu e fa‘avavau fa‘avavau lava.” 4 ‘Ua fa‘apa‘u‘ū toeaina e to‘aluafulu ma le to‘afa, ma mea ola e fa, ma ‘ua ifo i le Atua o lē e ti‘eti‘e i le nofoāli‘i, ‘ua fa‘apea atu, “Amene. Aleluia!” 5 ‘Ua o‘o mai fo‘i le leo mai le nofoāli‘i, ‘ua fa‘apea mai, “ ‘Ia vivi‘i atu i lo tatou Atua, o ‘outou ana ‘au‘auna uma, ma ‘outou o ē e matata‘u ‘iā te ia, o tagatanu‘u ‘atoa ma ali‘i.” 6 ‘Ua ‘ou fa‘alogo fo‘i e peiseaī o se leo o se fa‘apotopotoga o tagata, e peiseaī o se ta‘alili o vai e tele, e peiseaī fo‘i o se ta‘alili o faititili tetele, ‘ua fa‘apea atu, “Aleluia! Auā ‘ua fai ma tupu le Ali‘i le Atua e ona le malosi uma lava. 7 ‘Ia tatou fiafia ma ‘oli‘oli, ma tu‘u atu le vi‘iga ‘iā te ia; auā ‘ua o‘o mai le tausama‘aga a le Tama‘i Mamoe. O lona faletua fo‘i ‘ua saunia o ia e ia. 8 ‘Ua tu‘uina atu fo‘i ‘iā te ia ‘ina ‘ia ‘ofu o ia i le ‘ie vavae e mamā ma le pupula.” Auā o le ‘ie vavae o le amiotonu lea a le au pa‘ia. 9 ‘Ua fai mai fo‘i o ia, “ ‘Ia e tusi: ‘Amu‘ia e ‘ua tala‘iina i le tausama‘aga a le Tama‘i Mamoe.” ‘Ua fai mai fo‘i o ia ‘iā te a‘u, “O afioga moni ia a le Atua.” 10 ‘Ona ‘ou fa‘apa‘ū atu lea i luma o ona vae e ifo ‘iā te ia. A ‘ua fai mai o ia ‘iā te a‘u, “ ‘Ia oe, ‘aua lava; o a‘u o lou uso a ‘au‘auna, o so lou au uso fo‘i ‘ua i ai le mau ‘iā Iesu; ia e ifo i le Atua.” Auā o le agaga o le valo‘aga o le mau lea ‘iā Iesu. 11 Na ‘ou va‘aia fo‘i le lagi ‘ua avanoa, fa‘auta fo‘i, o le solofanua sinasina, o lē e ti‘eti‘e ai fo‘i ‘ua igoa o ia o le Fa‘amaoni ma le Moni, o le amiotonu fo‘i na te fa‘amasino ai ma tau ai le tau‘a. 12 ‘Ua pei o le mumū o le afi ona fofoga, ‘ua i lona ao fo‘i paleāli‘i e tele. ‘Ua ‘iā te ia le suafa ‘ua tusia e lē iloa e se isi ‘ua na o ia lava. 13 ‘Ua ‘ofu fo‘i o ia i le ‘ofu ‘ua fufui i le toto. ‘Ua fa‘asuafaina o ia, “O le ‘Upu a le Atua.” 14 O ‘autau fo‘i o i le lagi ‘ua mulimuli atu ‘iā te ia i luga o solofanua sisina, ‘ua ‘o‘ofu i latou i le ‘ie vavae sinasina ma le mamā. 15 ‘Ua alu atu fo‘i le pelu ma‘ai mai lona fofoga ‘ina ‘ia taia a‘i e ia o nu‘u; e pule fo‘i o ia ‘iā te i latou i le to‘oto‘o u‘amea. E soli fo‘i e ia le soligāvine o le to‘asā mamafa o le Atua e ona le malosi uma lava. 16 ‘Ua ‘iā te ia fo‘i le suafa ‘ua tusia i lona ‘ofu ma lona vae, “O le Tupu o tupu, ma le Ali‘i o ali‘i.” 17 Na ‘ou va‘aia fo‘i se isi agelu ‘ua tu i le la. ‘Ua ‘alaga fo‘i o ia ma le leo tele, ‘ua fa‘apea atu i manu uma e felelei i le taulotoa‘iga o le lagi, “ō mai ia, inā ‘outou fa‘apotopoto ane i le faiga‘ai a le Atua silisili. 18 ‘Ina ‘ia ‘outou ‘a‘ai i tino o tupu, ma tino o ta‘ita‘i o ‘au ta‘ito‘aafe, ma tino o tagata malolosi, ma tino o solofanua ma ē ‘ua ti‘eti‘e ai, ma tino o tagata uma, o ē e sa‘oloto ‘atoa ma pologa, o tagatanu‘u ‘atoa ma ali‘i.” 19 ‘Ona ‘ou va‘aia lea o le manu fe‘ai, ma tupu o le lalolagi, ma a latou ‘au ‘ua fa‘apotopotoina e tau ai le tau‘a ma lē ‘ua ti‘eti‘e i le solofanua ma lana itū tau‘a. 20 ‘Ona pu‘ea lea o le manu fe‘ai ‘atoa ma le perofeta pepelo o lē na faia fa‘ailoga i ona luga, o mea ia na fa‘asesēina ai e ia o ē ‘ua i ai le fa‘ailoga o le manu fe‘ai, ma ē ‘ua ifo i lona fa‘atagata. ‘Ua lafoolaina i lā‘ua i le lepa afi ‘ua mū i le teiō. 21 A o ē na totoe, ‘ua fasiotia i latou i le pelu ‘ua alu atu mai le fofoga o lē ‘ua ti‘eti‘e i le solofanua; ‘ona mā‘o‘ona ai lea o manu felelei uma i o latou tino.
O Le Fa‘aaliga 20
1 Na ‘ou va‘aia fo‘i le agelu na alu ifo mai le lagi, ‘ua ‘iā te ia le ki o le to e lē gata, ‘ua i lona lima fo‘i le maea u‘amea tele. 2 ‘Ua pu‘e fo‘i e ia le tarako, o le gata tuai, o le tiapolo lea ma Satani, ‘ua ia fusifusi fo‘i ‘iā te ia mo tausaga e afe. 3 ‘Ua ia lafo fo‘i ‘iā te ia i le to e lē gata, ‘ua pupuni fo‘i ‘iā te ia, ma tu‘uina atu le fa‘amaufa‘ailoga i ona luga, ‘ina ‘ia lē toe fa‘asesēina e ia o nu‘u, se‘ia ‘atoa ia tausaga e afe. A mavae fo‘i lea, e tatau ‘ona tatalaina o ia mo ni nai aso. 4 Na ‘ou va‘aia fo‘i nofoāli‘i, ma i latou ‘ua ti‘eti‘e ai, ‘ua tu‘uina atu fo‘i le fa‘amasinoga ‘iā te i latou. ‘Ua ‘ou va‘aia fo‘i agaga o ē ‘ua vavae‘eseina o latou ulu ‘ona o le mau ‘iā Iesu ma le afioga a le Atua, o ē na le ifo i le manu fe‘ai po o lona fa‘atagata, na lē talia fo‘i le fa‘ailoga i o latou muaulu po o latou lima. ‘Ua ola fo‘i i latou, ma ‘ua fai ma tupu fa‘atasi ma Keriso i tausaga e afe. 5 A o ē ‘ua totoe o ē ‘ua oti, e le‘i toe ola i latou se‘ia ‘atoa ia tausaga e afe. O le ulua‘i toetū lenā. 6 E manuia ma fiafia lē ‘ua i ai se tofi i le ulua‘i toetū; e le o‘o fo‘i le pule a le oti fa‘alua ia i latou, ‘ae ‘avea i latou ma ositaulaga a le Atua ma Keriso, latou te fai ma tupu fo‘i fa‘atasi ma ia i tausaga e afe. 7 Pe a ‘atoa fo‘i tausaga ia e afe, ‘ona tatalaina lea o Satani nai le mea na puipuiina ai o ia. 8 E alu atu fo‘i o ia e fa‘asesē i nu‘u o i itū e fa o le lalolagi, o Koku ma Makoku, e fa‘apotopoto ‘iā te i latou i le tau‘a. ‘Ua pei o le oneone o le sami i latou ‘ona to‘atele. 9 ‘Ua o a‘e fo‘i i latou i le mafolafola o le lalolagi, ‘ua latou si‘omia fo‘i le togālauapi a le au pa‘ia ma le ‘a‘ai ‘ua fa‘apelepeleina. ‘Ona alu ifo lea o le afi mai le Atua i le lagi, ma ‘ua susunuina ai i latou. 10 O le tiapolo fo‘i o lē na fa‘asesēina i latou, ‘ua lafoina o ia i le lepa afi ma le teiō, o i ai le manu fe‘ai ma le perofeta pepelo. E puapuagātia ai i latou i le ao ma le po e fa‘avavau fa‘avavau lava. 11 Na ‘ou va‘aia fo‘i se nofoāli‘i tele e sinasina, ma lē o ti‘eti‘e ai, ‘ua sosola ‘ese le lalolagi ma le lagi mai ona luma, e lē iloa fo‘i se mea e tu ai i lā‘ua. 12 Na ‘ou va‘aia fo‘i o ē ‘ua oti, o tagatanu‘u ‘atoa ma ali‘i, o tutū i luma o le nofoāli‘i, ‘ona fofola lea o tusi. ‘Ua fofola fo‘i ma le tasi tusi, o le tusi lea o le ola. ‘Ona fa‘amasinoina ai lea o ē na oti i mea ‘ua tusia i tusi, e tusa ma a latou galuega. 13 ‘Ua ava‘e fo‘i e le sami ē na oti sa i ai, ‘ua ava‘e fo‘i e le oti ma seoli ē na oti sa i ai, e ta‘itasi fo‘i o i latou ma fa‘amasinoina e tusa ma a latou amio. 14 ‘Ua lafoina fo‘i le oti ma seoli i le lepa afi; o le oti fa‘alua lea, o le lepa afi lea. 15 So‘o se isi ‘ua le tusia i le tusi o le ola, ‘ua lafoina lea i le lepa afi.
O Le Fa‘aaliga 21
1 ‘Ona ‘ou va‘aia lea o le lagi fou ma se lalolagi fou, auā ‘ua mavae atu le ulua‘i lagi, ma le ulua‘i lalolagi, ‘ua leai fo‘i se toe sami. 2 Na ‘ou va‘aia fo‘i le ‘a‘ai pa‘ia, o Ierusalema fou, ‘ua alu ifo mai le Atua i le lagi, ‘ua saunia pei o se fa‘ato‘anofotane ‘ua teuteuina mo lana tane. 3 Na ‘ou fa‘alogo fo‘i i le leo tele mai le lagi, ‘ua fa‘apea mai, “Fa‘auta, ‘ua i ai le afio‘aga o le Atua fa‘atasi ma tagata, e mau fo‘i o ia ma i latou. E fai fo‘i i latou mona nu‘u, e ‘iā te i latou le Atua lava. 4 E soloi‘esea fo‘i e le Atua loimata uma i o latou mata. E leai fo‘i se toe oti, po o se fa‘anoanoa, po o se auē, e leai fo‘i se toe puapuagā. Auā ‘ua mavae atu muamua.” 5 ‘Ua fetalai mai fo‘i lē e ti‘eti‘e i le nofoāli‘i, “Fa‘auta, ‘ou te faia ia fou mea uma lava.” ‘Ua fetalai mai fo‘i o ia ‘iā te a‘u, “ ‘Ia e tusi; auā o ‘upu nei e moni ma le fa‘amaoni ia.” 6 ‘Ua fetalai mai fo‘i o ia ‘iā te a‘u, “ ‘Ua uma ‘ona fai. O a‘u le Alefa ma le Omeka, o le amataga ma le gata‘aga. O lē ‘ua fia inu ‘ou te foa‘ifuaina atu ‘iā te ia mai le puna o le vai ola. 7 O lē e manumālō e maua e ia mea uma; e fai a‘u mona Atua, e fai fo‘i o ia ma ou atali‘i. 8 A o ē e loto vāivāi, ma ē e lē fa‘atuatua, ma ē e fai mea e ‘inosia, ma ē e fasioti tagata, ma ē e faita‘aga, ma ē e fa‘ataulāitu, ma ē e ifo i tupua, ‘atoa ma ē e tala pepelo uma, e fai o latou tofi i le lepa e mū i le afi ma le teiō, o le oti fa‘alua lea.” 9 ‘Ua alu ane fo‘i ‘iā te a‘u le isi o ia agelu e to‘afitu, o ē sa i ai ipu e fitu na tūtūmu i mala e fitu e gata ai, ‘ua tautala mai fo‘i o ia ‘iā te a‘u, ‘ua fa‘apea mai, “Sau ia, ‘ou te fa‘aali atu ‘iā te oe le fa‘ato‘anofotane, o le faletua lea o le Tama‘i Mamoe.” 10 ‘Ua ia ‘avea fo‘i a‘u i le Agaga i le mauga tele, ma le maualuga, ‘ua ia fa‘aali fo‘i ‘iā te a‘u Ierusalema, o le ‘a‘ai tele ma le pa‘ia, o lo‘o alu ifo mai le lagi mai le Atua, 11 na i ai le mamalu o le Atua, o lona pupula fo‘i e pei o se ma‘a tāua lava, e pei o se ma‘a iasepi lona fa‘atioata mai. 12 ‘Ua i ai fo‘i le pa tele ma le maualuga, ‘ua i ai faitoto‘a e sefulu ma le lua, ‘ua i faitoto‘a fo‘i agelu e to‘asefulu ma le to‘alua, ‘ua tusia ai fo‘i igoa, o igoa ia o itū‘āiga e sefulu ma le lua o le fānauga a Isaraelu, 13 ‘ua i sasa‘e o faitoto‘a e tolu, ‘ua i le itū i matū o faitoto‘a e tolu, ‘ua i le itū i saute o faitoto‘a e tolu, ‘ua i sisifo fo‘i o faitoto‘a e tolu. 14 ‘Ua i le pa fo‘i o le ‘a‘ai fa‘avae e sefulu ma le lua, ‘ua i ai fo‘i igoa o le ‘au ‘aposetolo a le Tama‘i Mamoe e to‘asefulu ma le to‘alua. 15 O lē ‘ua tautala ma a‘u sa i ai le ū auro e fua a‘i e ia le ‘a‘ai, ma ona faitoto‘a ‘atoa ma ona pa. 16 ‘Ua fa‘atū fa‘atafafā fo‘i le ‘a‘ai, o lona umi ‘ua tusa ma lona lautele; ‘ua fuatia fo‘i e ia o le ‘a‘ai i le ū, e sefulu ma le lua afe setatio, o lona umi, ma le lautele, ma le maualuga, ‘ua tutusa lava ia. 17 ‘Ua fuatia fo‘i e ia lona pa, e selau fasefulu ma le fa kupita, o le fua a le tagata, o a le agelu lea. 18 ‘Ua ati fo‘i lona pa i ma‘a iasepi; o le ‘a‘ai o le auro lelei lea, ‘ua pei o le tioata manino. 19 ‘Ua teuteu fo‘i fa‘avae i ma‘a tāua uma. O le fa‘avae muamua o le iasepi lea, o lona lua o le safaira lea, o lona tolu o le kakito lea, o lona fa o le samaraki lea. 20 O lona lima o le saritonu lea, o lona ono o le salikea lea, o lona fitu o le tasesa lea, o lona valu o le soama lea, o lona iva o le topasi lea, o lona sefulu o le kuasopera lea, o lona sefulu ma le tasi o le uakini lea, o lona sefulu ma le lua o le asalama lea. 21 O faitoto‘a fo‘i e sefulu ma le lua o penina ia e sefulu ma le lua; e ta‘itasi le faitoto‘a ma le penina e tasi ‘ua fai a‘i. O le ala tele fo‘i o le ‘a‘ai o le auro lelei lea, e pei o le tioata manino. 22 ‘Ou te le‘i va‘aia ai fo‘i se malumalu, auā o lona malumalu o le Ali‘i le Atua lea, e ona le malosi uma lava, ‘atoa ma le Tama‘i Mamoe. 23 E lē aogā fo‘i i le ‘a‘ai ‘ona pupula i ai o le la, po o le masina, auā o le mamalu o le Atua ‘ua fa‘amalamalamaina ai ia, o le Tama‘i Mamoe fo‘i o lona molī lea. 24 O nu‘u fo‘i latou te savavali i lona malamalama, o tupu fo‘i o le lalolagi latou te aumai i ai o latou mamalu. 25 O ona faitoto‘a fo‘i e le punitia lava i le ao; auā e leai se po i lea mea. 26 Latou te aumai i ai le mamalu ma le vi‘iga o nu‘u. 27 E le sao atu lava i ai se mea leaga e tasi, po o sē na te faia se amio ‘inosia po o se pepelo; na o i latou lava o ē ‘ua tusia i le tusi o le ola a le Tama‘i Mamoe.
O Le Fa‘aaliga 22
1 ‘Ona fa‘aali mai lea e ia ‘iā te a‘u le vaitafe manino o le vai o le ola, e manino pei o se ma‘a tioata, ‘ua tafe ifo mai le nofoāli‘i o le Atua ma le Tama‘i Mamoe. 2 O i le moa o lona ala tele ma itū ta‘itasi o le vaitafe le la‘au o le ola, o lo‘o fua mai i fuata e sefulu ma le lua, e ta‘itasi le masina ma fua mai ai lona fuata; o lau fo‘i o le la‘au e fa‘amālōlō ai nu‘u. 3 E leai fo‘i se toe fa‘afano e tasi; e i ai fo‘i le nofoāli‘i o le Atua ma le Tama‘i Mamoe, o ana ‘au‘auna fo‘i latou te ‘au‘auna ‘iā te ia. 4 E va‘ava‘ai atu fo‘i i ona fofoga, e i ai fo‘i i ō latou muaulu lona suafa. 5 E leai lava se po i lea mea; e lē aogā fo‘i ‘iā te i latou se molī, po o le malamalama o le la; auā o le Ali‘i le Atua na te fa‘amalamalamaina i latou. E fai fo‘i i latou ma tupu e fa‘avavau fa‘avavau lava. 6 ‘Ona fai mai lea o le agelu ‘iā te a‘u, “O nei ‘upu e fa‘amaoni ia ma le moni. O le Ali‘i fo‘i le Atua o le ‘au perofeta pa‘ia, ‘ua ‘auina mai e ia lana agelu e fa‘ailoa mai i ana ‘au‘auna mea e ao ‘ona vave o‘o mai.” 7 Ona fa‘apea mai ai lea o Iesu, “Fa‘auta, ‘ou te vave alu atu. ‘Amu‘ia lē e tausi i ‘upu o le valo‘aga o lenei tusi.” 8 O a‘u fo‘i o Ioane, ‘ua ‘ou fa‘alogo ma ‘ou va‘ai i nei mea; ‘ua ‘ou fa‘alogo ma ‘ou va‘ai, ‘ona ‘ou fa‘apa‘ū lea e ifo atu i vae o le agelu na na fa‘aali mai ‘iā te a‘u ia mea. 9 A ‘ua fai mai o ia ‘iā te a‘u, “ ‘Ia oe, ‘aua lava! Auā o a‘u o lou uso a ‘au‘auna, o se tasi o le au perofeta o ou uso, o se tasi fo‘i o ē tausi i ‘upu o lenei tusi. ‘Ia e ifo i le Atua.” 10 ‘Ua fai mai fo‘i o ia ‘iā te a‘u, “ ‘Aua ‘e te fa‘amaufa‘ailogaina ‘upu o le valo‘aga o lenei tusi; auā ‘ua latalata ona aso. 11 O lē e amiolētonu ia amiolētonu pea o ia, o lē e pa‘ia ia pa‘ia pea o ia.” 12 “Fa‘auta, ‘ou te vave alu atu; ‘ua ‘iā te a‘u fo‘i le taui ‘ou te taui ta‘itasi atu e tusa ma lana amio ‘ua fai. 13 O a‘u le Alefa ma le Omeka, o le amataga ma le gata‘aga, o lē e muamua ma lē e mulimuli.” 14 ‘Amu‘ia i latou o ē e ta o latou ‘ofu, ‘ina ‘ia taga ia i latou le la‘au o le ola, ma ‘ia latou ulu atu i le ‘a‘ai i ona faitoto‘a. 15 A ‘ua i tuapā o ulī, ma ē e fa‘ataulāitu, ma ē e faita‘aga, ma ē e fasioti tagata, ma ē e ifo i tupua, ‘atoa uma lava ē ‘ua loto i le tala pepelo ma latou faia. 16 “O a‘u o Iesu na ‘ou ‘auina atu la‘u agelu e molimau ‘iā te ‘outou i ia mea i ekalesia. O a‘u o le a‘a ma le fānau a Tavita, o le fetūao pupula.” 17 ‘Ua fetalai mai le Agaga ma le fa‘ato‘anofotane, “Inā sau ia.” Inā fai atu fo‘i ia i lē e fa‘alogo, “Inā sau ia.” O lē e fia inu, inā sau ia, ‘atoa ma lē e mana‘o i ai, inā ‘ave fua ia lea vai o le ola. 18 Auā ‘ou te ta‘utino atu ia i latou uma o ē e fa‘alogo i ‘upu o le valo‘aga o lenei tusi. A i ai se isi e fa‘aopoopo mai se ‘upu i nei ‘upu, e fa‘aopoopoina atu e le Atua ‘iā te ia o mala ‘ua tusia i lenei tusi. 19 A i ai fo‘i se isi e ‘ave‘ese se ‘upu i ‘upu o le tusi o lenei valo‘aga, e ‘ave‘eseina e le Atua lona tofi i le la‘au o le ola, ma le ‘a‘ai pa‘ia, o mea ia ‘ua fa‘amatalaina i lenei tusi. 20 ‘Ua fai mai le molimau i nei mea, “E moni, ‘ou te vave alu atu.” Amene. O lea lava, le Ali‘i e Iesu, ia e afio mai! 21 ‘Ia ‘iā te ‘outou uma le alofa tunoa o le Ali‘i o Iesu. Amene. 

 http://gospelgo.com/p/samoan_nt.htm#Revelation

Nenhum comentário:

Postar um comentário