quarta-feira, 13 de maio de 2015

1 JOHAN: MYANMAR

 1 Johan 1


Hiinnaw Bya

1Atakawte a umvaepaw hiinnaw Bya kong kha nae kalan ccawte kae ky oh. Ah thae ohpaw te ah mitte ah muih ohpaw; ah mitte ah muih oh apiaze ah kuitte ah hae ohpaw nynh athua. 2Tuh e hiinnaw tuh muih khopawlang oun tangte aenin nynh ah muih oh. Tukeiccuze hiinnawpaw Paw te a um kheihaepaw tuh aenin kya nysah athuanawpaw kong kaenin nynh nanin kha kae hopya oh. 3Paw te a Ccapaw Jesuh Kri ryte vaeccawkunaw kae hoipaw lungkhu kya nah pangbuanawlang oh kae muipaw te kae thaepaw kha nae kalan kae hopya oh. 4Kae lungtuanaw accinnaw elang hynh e ccaw hyn kae ky oh.

Pachia Tuh Awnaw Nynh Athua

5A Ccapaw kyate kae thaepaw nanin kae thaesah ohpaw bya tuh hynte nynh athua: Pachia tuh awnaw thuaza a lungkhu kya mohnaw paping um khy. 6Tukeiccuze aenin nynh amaw te vaeccawkunaw kae hoi ah cih ohza mohnaw lungkhu kya ah umlang ohze ah bya kya thuasa, ah ryalaw kya thuasa, hyngbya ah ho ohpaw nynh athua. 7Thuasalama amaw nynh awnaw lungkhu kya a um hawte aenin nynh awnaw lungkhu kya ah umlang ohze lukheit te lukheit vaeccawkunaw ah hoi cih ohza a Ccapaw Jesuh chiisen te ah seinaw oh balyn marya a thya sa.
8Seinaw ah hoi khyh oh ah cilang ohze ahmaw te ahmaw ah lingkuh ohza baccing ah lungkhu kya um khy. 9Thuasalama Pachia kalan ah seinaw ah phykulang ohze, zyn ccaccinglangpaw te adingpaw athua keiccuze ah seinaw kha oun ngaethya ciza ah cyiseinaw balyn a thyasah ci. 10Thuasalama seinaw ka rae khyh ah cilang ohze Pachia tuh hyngbya hotulang ah rae ohza a bya ah lungkhu kya um khy. 


1 Johan 2

Oun Bawmtu Kri

1Ka ccawhae, nah sei khyh ohccaw cite hynh e ccaw hyn zeinawpaw tuh athua. Thuasalama lukhakheit nynh seinaw nah raelang ohze aenin hanlang Pachia kalan oun ngiapatulangpaw a dingpaw Jesuh Kri ah hoi oh. 2Te Kri amaw liate ah seinaw tuh oun ngaeethyaza aenin seinaw kyalya thualeite ccungccaw miakaw seinaw balyn a ngaethya.
3Pachia kaw ah ngaelang ohze amaw a nytu ccaccing nynh ah thua oh. 4Ccungccaw lukhakheit nynh Pachia ka nyh ciza a kaw a ngae khyh langze hyngbya hotu thuaza a lungkhu kya baccing um khy. 5Thuasalama a kaw a ngaepaw tuh a lungkhu kya Pachia sungsanaw accinpaw nynh athua. Pachia kya nynh ah um oh ci paw oun nysakunawpaw tuh: 6humzema Pachia kya nynh ka um a cipaw nynh tuh Kri hawte a hiin bua ci.

Phungbya Thawpaw

7Ka sungsah ka banhae, nae kalan kae zeipaw phungbya hyn athawpaw thuakhy; atakawte nah lah thae boy ohpaw phungbya rynpaw nynh athua. Tuh e phungbya rynpaw tuh nah lah thaety ohpaw nynh athua. 8Thuasalama atu nae kalan kae zeipaw phungbya hyn athawpaw thuaza, pawccecize ahmepaw athuapaw Kri kyate aenin kya zema muih athuavae. Mohnaw balyn pong zovaeza awnaw ccaccing tuh a langkuvae.
9Humzema awnaw lungkhu nynh ka um ciza a uno a huapaw tuh mohnaw lungkhu nynh a um ung. 10Humzema a uno a sungsapaw tuh awnaw lungkhu kya umza tukeiccuze milae seisanaw a thinlung kya um khy. 11Thuasalama a uno a huapaw tuh mohnaw lungkhu nynh a um ung; mohnaw lungkhu kya khiakuza mohnaw nynh a mit a mohsah keiccuze pawkalanmou ka ccia ngaw ci paw sangma nyh khy.
12Ka ccawhae, Kri min liate nae seinaw tuh ngaethya athuavae keiccuze hynh e ccaw hyn nae kalan kae ky oh. 13Pawhae, atakawte a lah umtypaw kha nah ny oh keiccuze hynh e ccaw hyn kae ky oh. Ccanvaehae, satan nah tae kho oh keiccuze hynh e ccaw hyn kae ky oh.
14Ccawhae, Paw nah ny oh keiccuze hynh e ccaw hyn kae ky oh. Pawhae, atakawte alah umtypaw kha nah ny oh keiccuze hynh e ccaw hyn kae ky oh. Ccanvaehae, nah thawng oh keiccuze hynh e ccaw hyn kae ky oh; Pachia bya tuh nae lungkhu kya umza satan cia nah taevae oh.
15Hynh e laephi te a lungkhu e uccawhae hyn duaa nang oh. Hynh e laephi hyn nah duaalang ohze Pachia sungsanaw nae lungkhu kya um khy. 16Laephi uccaw athuapaw pynsaw rynaw, ccungccawhae nynh muipaw te rypaw, ccungccaw nynh pookunawlang mangpaw uccawhae hyn ccankheit sangma Paw kyate oun thuapaw thuakhy; laephi kyate oun thuahaepaw cci nynh ah thua hae. 17Laephi te a lungkhu e uccaw a ngaehoikupaw ccungccawhae rynaw tuh azo laliavae hae; thuasalama Pachia rynaw a raepaw tuh zungzae a hiin ci.

Kri Rhaw

18Ka ccawhae, nin thanaw ccyh anaevae! Kri rhaw oun thua cih ci paw nah thae oh; atulya Kri rhaw patae ah thuavae hae keiccuze nin thanaw ccyh anaevae ci paw ah ny oh. 19Hynh e hae tuh ahmaw ccungccaw ah thuakhyh hae keiccuze oun ccawetaw hae. Ahmaw ccungccaw ah lah thualang haeze ah kya nynh tyty ah um cih hae. Thuasalama oun ccawetaw hae keiccuze ahmaw ccungccawhae thuakhyh hae ci paw tuh alang.
20Thuasalama nanin tuh Kri nynh Thya Muisaw ae buvae ohpaw nah thua oh keiccuze baccing kha nah ny oh. 21Nae kalan ccaw kae ky ohpaw tuh baccing nah ny khyh oh keiccu thualeite baccing kyate hyngbya tuh pou boy khyh ci paw nynaw elang nynh athua.
22Jesuh tuh Kri thuakhyh cite hummou hyngbya a ho? Tuh e paw tuh Kri rhaw thuaza a Paw te a Ccaw a vuatu nynh athua. 23Pawccecize Ccapaw a vuapaw tuh Paw a vuapaw nynh athua. Ccapaw a pawmpaw tuh Paw a pawmpaw nyh athua. 24Te atakawte nah thae ohpaw bya kha nae lungkhu kya ccykekuh oh. Atakaw e nah thae ohpaw kha nah ccykekulang ohze Paw te Ccaw ryte zungzae a hiin kheihaepaw nah thua cih oh. 25Te Kri amaw ccacci nynh zungzae hiinnaw tuh kae pya cih oh cite oun kinvaepaw nynh athua.
26Nanin linglang a paccyngkuhaepaw konglang hynh e ccaw hyn nae kalan kae ky oh. 27Nanin tuh Kri nynh Muisaw ae buuvae ohpaw nah thuavae ohza tuh e Muisaw nae lungkhu a um lungkhu balyn tuh ccanpatu humsangma nah hovae khyh oh. Pawccecize a Muisaw nynh pawpaw balyn kha ae ccanpah cih ohza hyngpaw thualeite baccing nynh athua. Tukeiccuze Muisaw ccanpyanaw kha zui ohla Kri kyakhe um zungzae oh.
28Tute, ka ccawhae, amaw lungkhu khe um zungzae ohla amaw oun lang Nin vaeze Amaw malang rhawhooyte ah um cih ohza maethyate umvae leilang. 29Kri tuh a dingpaw ci kha nah ny oh; tukeiccuze humzema a dingpaw rya a latu tuh Pachia ccawhae nynh ah thua hae ci paw kha nyh oh.


1 Johan 3

Pachia Ccawhae

1Pachia nynh aenin hyn oun sungsah raria! Oun sungsanaw tuh eih leeza Pachia ccawhae ci ah thua oh; tuhawte ah thua sasaw oh. Hynh keiccuze laephi nynh oun nyleinawpaw tuh athua; Pachia zema nyh khyh hae. 2Ka sungsah ka banhae, atu tuh Pachia ccawhae nynh ah thuavae oh, thuasalama pawmou lolang ci paw tuh ccae loh khy. Thuasalama Kri oun thuavaeze amaw nynh lolang ci paw tuh ah ny oh, pawccecize amaw thathyh hawte nynh ah muih cih oh. 3Humzema Kri kya ngaehoinaw a hoipaw tuh Kri nynh ccipapyalang a um hawte ccipapyalang nynh a um bua.
4Humzema a seipaw tuh Pachia kawbya kha a rovae, pawccecize a seipaw tuh Pachia kawbya rotu nynh athua. 5Kri tuh ccungccaw seinaw thyasah khylang oun thuaza a lungkhu kya seinaw um khyh ci paw nah ny oh. 6Tukeiccuze Kri kya a umpaw tuh seinaw raevae khy. Thuasalama seinaw palei a raepaw tuh Kri a muiboyleipaw te a nyboyleipaw nynh athua.
7Ka ccawhae humsangma lah lingsakuh nang oh! Kri tuh dingnaw a raetu athua thyhawte dingnaw a raepaw miakaw tuh miding nynh athua. 8Humzema seinaw palei a raepaw tuh Satan ccaw nynh athua, pawccecize masatyze seinaw a raetupaw tuh Satan nynh athua. Tuh e Satan ryalawnaw ro khylang Pachia Ccapaw tuh oun langkuvae.
9Humzema Pachia ccaw nynh seinaw rae boyvae khy, pawccecize Pachia hiin zia kha a lungkhu kya a um. Te Pachia tuh a Paw athuavae keiccuze sei thyavae khy. 10Pachia ccaw te Satan ccaw alaeenawpaw tuh: dingnaw rya a laleipaw te a uno a sungsaleipaw tuh Pachia ccaw thuakhyh hae.

Lukheit Te Lukheit Sungsakuh Oh

11Atakaw lyate nah lah thaevae ohpaw phungbya tuh: lukheit te lukheit sungsakuh oh ci athua. 12Aenin tuh Satan ccaw athuapaw a netaw a theihtu Kain ah lolang ohpaw thuakhy. Pawccemou Kain nynh Abel kha a chia? Pawccecize a raepaw uccaw hme khyza a netapaw raepaw tuh ahme keiccu nynh athua. 13Tukeiccu u te no hae, laephi ccungccawhae nynh ae hua ohze nae ngae-an thua nang sa. 14Aenin tuh chinaw kha ah cciatawvae ohza hiinnaw lungkhu lang ah teevae oh, ci ah ny oh; tute ah nynaw ohpaw tuh ah uno ah sungsah oh keiccu nynh athua. A uno a sungsaleipaw tuh chinaw lungkhu kya nynh a um ung. 15A uno a huapaw tuh ccungccatheipaw thuaza ccungccatheitu lungkhu tuh zungzae hiinnaw um khy, ci nah ny oh. 16Sungsakunaw tuh pawcihawpaw mou ci paw nynawpaw tuh: aenin hanlang Kri nynh a hiinnaw oun pya. Aenin zema ah hiinnaw kha ah unohae hanlang pyalangpaw nynh athua. 17Mirumpaw lukhakheit nynh myarya aboupaw a uno a muipite a thinlung thuakaw a khawtaw langze Pachia ka sungsah cite pawtemou a ci kho ci? 18Ka ccawhae, ah sungsakunaw ohpaw tuh bya te thang kyalyate athua leilangpaw nynh athua; sungsakunaw ccaccing tuh ryalawnaw kyate langsakulangpaw nynh athua.

Pachia Malang Rhawhooynaw

19Tukeiccuze baccing lungkhu nynh kae um ci paw nykunawlangpaw te Pachia malang rhileite umnawlangpaw tuh hynte nynh athua. 20Ah thinlung nynh a rhisungvaeze Pachia tuh ka thinlung laeze hanghuaza pawpaw balyn a nytu nynh athua ci paw ah ny oh. 21Athuaze, ka banhae, ah thinlung nynh a rhisung khyze Pachia malang rhawhooynaw ah hoi oh. 22A kyate ah ngia ohpaw balyn ah mawe oh, pawccecize a rypaw kha ah lak ohza a kaw ah ngae oh keiccu nynh athua. 23Kaw oun pyapaw tuh: Kri nynh kaw oun pya thyhawte Ccapaw Jesuh Kri kha ah zyn ohza lukheit te lukheit ah sungsakunawlang ohpaw nynh athua. 24Humzema Pachia kaw a ngaepaw tuh Pachia lungkhu kya umza Pachia ma a lungkhu kyakhe a um. Te Pachia nynh oun pyapaw Muisaw liate Pachia tuh ah lungkhu kya a um ci paw ah ny oh.

1 Johan 4

Muisaw Hme Te Hmelei

1Ka sungsah ka banhae, Muisaw ka hoi a cipaw miakaw lah zyn nang oh. Ah hoihaepaw muisaw tuh Pachia kyate oun thuapaw tou, oun thualeipaw tou, ci paw syngtawty oh. Pawccecize lingthya profethae ram takyh lang pong thuavae hae. 2Pachia Muisaw athua te athuakhyh nynaw tuh hyncite: humzema Kri tuh ccungccaw kyate nynh oun thua cite a phytu tuh Pachia kyate oun thuapaw Muisaw hoitu nynh athua. 3Thuasalama tute a phyleipaw tuh Pachia kyate oun thuapaw Muisaw hoileipaw nynh athua. A hoipaw muisaw tuh Kri Rhaw kyate oun thuapaw nynh athua. Kri rhaw tuh oun thua cih cite nah thae oh hawte atu hyn laephivaw kya a thuavae.
4Thuasalama ka ccawhae, Pachia ccawhae nah thua ohza lingthya profethae khama nah taevae oh. Pawccecize nae lungkhu kya a umpaw Muisaw tuh laephi ccungccawhae lungkhu kya umpaw muisaw laeze a thawnghua. 5Lingthya profethae nynh laephi konglang ho haeza laephi nynh a ngae, pawccecize laephi uccaw nynh ah thua hae. 6Thuasalama aenin tuh Pachia uccaw nynh ah thua oh. Pachia a nypaw miakaw nynh kae bya ah ngae hae, Pachia uccaw a thualeihaepaw nynh tuh kae bya ngae khyh hae. Hynte nynh ahmepaw Muisaw te ahmeleipaw muisaw laesanaw tuh oun nyh thya cih oh.

Pachia Tuh Sungsakunaw Nynh Athua

7Ka sungsah ka banhae, lukheit te lukheit sungsakuh oh si, pawccecize sungsakunaw tuh Pachia kyate oun thuapaw nynh athua. Ccungccaw a sungsatu tuh Pachia ccaw thuaza Pachia nytu ma athua. 8Ccungccaw a sungsaleipaw tuh Pachia nyh khy, paw-ccecize Pachia tuh sungsakunaw nynh athua. 9Pachia nynh oun sungsanaw a langsakunawpaw tuh: Ccapaw hoithypaw laephivaw lang oun shaw liate aenin balyn hiinnaw ah mawe oh. 10Sungsakunaw ci paw tuh: aenin nynh Pachia ah sungsah oh thualeite Amaw nynh oun sungsaza a Ccapaw oun shaw, tuh e tuh ah seinaw ngaeethyanaw elang nynh athua.
11Ka sungsah ka banhae, hyntute Pachia nynh oun sungsah athua langze aenin ma lukheit te lukheit ah sungsaku bualang ohpaw nynh athua. 12Humsangma Pachia tuh ah mitte ah muih boy khyh oh, thuasalama lukheit te lukheit ah sungsakulang ohze Pachia tuh ah lungkhu umza oun sungsanaw tuh ah lungkhu kya hou oun ccing.
13A Muisaw aenin oun pyavae keiccuze Pachia tuh aenin kya umza aenin ma a lungkhu kya nynh ah um oh ci paw ccaerarih ah ny oh. 14Paw nynh Ccapaw tuh laephi khumtulangte oun shaw ci paw a muitu te minghae kya a hopatulangpaw tuh aenin nynh ah thua oh. 15Humzema Jesuh tuh Pachia Ccapaw nynh athua cite a phytu tuh a lungkhu kya Pachia umza Pachia lungkhu zema a umpaw nynh athua. 16Te ahmaw ccacci nynh Pachia sungsanaw tuh ah nyh ohza ah zyn oh.
Pachia tuh sungsakunaw nynh athua, humzema sungsakunaw lungkhu a umpaw tuh Pachia lungkhu a umpaw thuaza a lungkhu kya Pachia a umpaw nynh athua. 17Bapia Nin ccyh vaeze rhawhooynaw ah hoi khonawlang oh sungsakunaw nynh ah lungkhu kya a ccingsavae. Te laephivaw ah hiinnaw tuh Kri hiinnaw hawte athua keiccuze tuh e rhawhooynaw tuh ah hoilang ohpaw nynh athua. 18Sungsakunaw kya tuh rhinaw um khy, accingpaw sungsakunaw nynh rhinaw balyn pong a zo sa. Tukeiccuze rhinaw a hoipaw lungkhu kya tuh sungsakunaw phe ccinlang hoi loh khy, pawccecize rhinaw tuh detanawte a kyngkupaw nynh athua.
19Pachia ah sungsah ohpaw tuh amaw nynh oun sungsaty keiccu nynh athua. 20Humzema Pachia ka sungsah ciza a uno a huapaw tuh a hyngpaw nynh athua. Pawccecize a muih khopaw a uno sang a sungsaleipaw tuh pawtemou muih kholeipaw Pachia tuh a sungsah ci. 21Kri nynh phungbya oun pyapaw tuh: humzema Pachia a sungsatu nynh tuh a uno kha a sungsah hahe ci.

1 Johan 5

Laephi Ah Tae Oh

1Humzema Jesuh tuh Messiah nynh athua cite a zynpaw tuh Pachia ccaw nynh athua. Te humzema paw a sungsatu nynh tuh ccaw zema a sungsa. 2Pachia ccawhae ah sungsakunaw ohpaw tuh: Pachia ah sungsanaw oh liate a phungbya ah zui ohpaw kha nynh athua. 3Pawccecize Pachia ah sungsah oh ci paw tuh a phungbya ah zui oh cinawpaw nynh athua. Oun pyapaw a phungbyahae tuh zuilang arhupaw thuakhy, 4pawccecize Pachia ccaw miakaw nynh laephi ah tae kho hae. Te ah zynnaw thungte laephi ah tae oh. 5Laephi a tae kho hae tuh hum hae mou? Jesuh tuh Pachia Ccapaw nynh athua cite a zynpaw balyn tuh laephi taetu nynh ah thua hae.

Jesuh Kri Ccaekia

6Baptisma a laawnaw tui te a chinaw chiisen kodete oun thuapaw tuh Jesuh Kri nynh athua. Tui kyalyate oun thua khy, tui te chii ryte nynh oun thua. Hynh e tuh ahmepaw nynh athua ci paw Muisaw ccacci nynh ccaekialang thadynza, pawccecize Muisaw tuh baccing nynh athua. 7Ccaekia ccanthum a um: 8Muisaw, tui te chii thua haeza ccanthum te ah hohaepaw tuh marya loku. 9Aenin nynh ccungccaw ccaekia kha ah zyn oh, thuasalama Pachia ccaekia tuh hou leeza a ccaw konglang kya ccaekialang a tangnawpaw balyn oun langsapyakuvae. 10Humzema Pachia Ccapaw a zynpaw nynh a thinlung kya ccaekia nykunaw a hoi; thuasalama Pachia a zynleipaw nynh Pachia nynh a Ccapaw konglang ccaekia bya a hopaw a zyn khyh keiccuze, Pachia kha hyngpawlang a tang sa. 11Tuh e ccaekia tuh: Pachia nynh zungzae hiinnaw oun pyaza tuh e hiinnaw tuh a Ccapaw kya nynh a um. 12Humzema Ccapaw a hoipaw tuh hynh e hiinnaw a hoi, Pachia Ccapaw a hoileipaw tuh hiinnaw hoi khy.

zungzae Hiinnaw

13Pachia Ccapaw a zynpaw nynh zungzae hiinnaw kae hoi ci paw nah nykunawlang oh hynh e ccaw hyn kae ky oh. 14Aenin tuh Pachia malang rhawhooynaw ah hoi oh, pawccecize amaw a rynaw hawte ah ngia ohpaw balyn oun thaepya ci paw ccaerarih ah ny oh. 15Ah ngiavae ohze oun thaepya; te oun thaepya ci paw ah ny oh ccaccing keiccuze ah ngia ohpaw miakaw oun pya ci paw ma ah ny oh.
16Na uno lukhakheit nynh chilang ciate accangleipaw seinaw a rae kha na muize Pachia kalan sawsang pala Pachia nynh hiinnaw a pya ci. Hynh e tuh chilang ciate accangleipaw seinaw raetuhae hanlang nynh athua. Thuasalama chilang ciate accangpaw seinaw a raehaepaw hanlang Pachia kalan sawsang oh cite ka ho khy. 17Cyiseinaw miakaw balyn hyn seinaw nynh athua, thuasalama seinaw miakaw hyn chilang cia seinaw thuakhy.
18Pachia ccaw nynh seinaw raevae khyh ci paw ah ny oh, pawccecize Pachia nynh rinza Satan nynh ro khovae khy.
19Laephi balyn tuh Satan nynh ukza aenin tuh Pachia ccawhae nynh ah thua oh ci paw kha ah ny oh.
20Pachia Ccapaw tuh oun thuavaeza ny thyanaw oun pyapawte Pachia ccaccing nynh athua ci paw ah ny oh. A Ccapaw Jesuh Kri kya ah umnaw oh liate ahmepaw Pachia kyazema ah um oh. Amaw tuh ahmepaw Pachia thuaza zungzae hiinnaw ma athua.
21Ka ccawhae, lingthya pachiahae kha lah sibia oh!

 http://www.myanmarbible.com/bible/Zotung/html/NT/1John/1John001.html 

Nenhum comentário:

Postar um comentário