sexta-feira, 1 de maio de 2015

1 John: Runyankore-Rukiga

1 John 11Twabahandiikira aha bya Kigambo ow'amagara, owaabaire ariho okwiha omu kutandika, ou twahuriire, ou twayereebeire n'agaitu, kandi ou twayetegyereize, tukamukoraho n'engaro zaitu. 2Ago magara gakoorekwa, twagareeba, turi baakareebi baago; kandi naimwe nitubarangirira eby'ago magara agatahwaho, agaabaire gari hamwe na Taata kandi gakatworekwa. 3Eki twareebire tukahurira, nikyo turikubarangirira, ngu mubone kukwatanisa naitwe. Manya okukwatanisa kwaitu kuba hamwe na Taata n'Omwana we Yesu Kristo. 4Ebyo twabibahandiikira ngu mubone kushemerererwa kimwe. 5Obu nibwo butumwa obu twahuriire Omwana we naagamba, naitwe tukabubarangirira: ku Ruhanga aba omushana, kandi omuriwe ku hatabamu mwirima n'akakye. 6Ku tugira ngu nitukwatanisa nawe, haza kunu nitugyendera omu mwirima, biri nitubeiha, n'emitwarize yaitu eba etari y'amazima. 7Kwonka ku tugyendera omu mushana, nkawe oku ari omu mushana, tukwatanisa buri muntu na mugyenzi we, kandi eshagama ya Yesu Omwana we etwozyaho ekibi kyona. 8Ku tugira ngu titwine kibi, biri nitwebeiha kandi tuba tutari b'amazima. 9Ku twatura ebibi byaitu, Ruhanga ahabw'okuba n'omwesigwa kandi ohikiriire, abitusaasira kandi atwozyaho ebitahikire byona. 10Ku tugira ngu titwine kibi, tumuhindura omubeihi kandi n'ekigambo kye kiba kitari muriitwe. 


1 John 21Baana bangye abakundwa, ebi naabibahandiikira ngu murekye kukora ebibi. Kwonka omuntu weena ku araakore ekibi, amanye ku twine orikututonganira ahari Taata, niwe Yesu Kristo ohikiriire. 2Kristo ogwo niwe karabo y'ebibi byaitu, haza ti byaitu byonka, kureka n'eby'ensi yoona. 3Ku tworobera ebiragiro bya Ruhanga, nibwo tuhamya ku turikumumanya. 4Orikwegamba ati: Nimmumanya, haza akagomera ebiragiro bye, aba ari omubeihi, kandi omuriwe haba hatarimu mazima. 5Kwonka weena okuratira ekigambo kye, buzimazima rukundo ei agira ahari Ruhanga eba ehikiire kimwe. Aha niho tuhamiza ku turi omuri Ruhanga; 6orikwegamba ngu atuura omuri Ruhanga, ashemereire kutwaza nka Yesu Kristo oku yaabaire atwaza. 7Baana bangye abakundwa, tindikubahandiikira kiragiro kisya, kureka ekya ira, eki mwahairwe omu kutandika. Ekyo kiragiro ekya ira n'ekigambo eki mwahuriire. 8Kwonka mbwenu ekiragiro eki ndikubahandiikira ni kisya, kandi amazima gaakyo nigareeberwa omuri Kristo n'omuriimwe. Manya omwirima nigugyenda niguhwaho, n'omushana gwajwire. 9Orikwegamba ngu ari omu mushana, haza akanga omunyaruganda, biri akiri omu mwirima. 10Okunda omunyaruganda aguma ari omu mushana, kandi omuriwe tihabamu kirikuteeza ntsibo. 11Kwonka oyanga omunyaruganda aba ari omu mwirima kandi omwirima ogwo nigwo agyenderamu, atarikumanya i arikuza, ahabw'okuba omwirima guba gumushwekire aha maisho. 12Baana bangye abakundwa, nimbahandiikira ahabw'okuba ebibi byanyu bisaasiirwe ahabwa Yesu. 13Imwe baataata, nimbahandiikira ahabw'okuba ogwo obaho okwiha omu kutandika nimumumanya. Naimwe batsigazi 'mwe, nimbahandiikira ahabw'okuba musingwire Omubi. Baana bangye abakundwa, naabahandiikira ahabw'okuba nimumanya Taata. 14Imwe baataata, naabahandiikira ahabw'okuba ogwo obaho okwiha omu kutandika nimumumanya. Naimwe abatsigazi, naabahandiikira ahakw'okuba muri ab'amaani, n'ekigambo kya Ruhanga kituura omuriimwe kandi musingwire Omubi. 15Mutarikunda ensi, nobu byakuba ebintu ebigirimu. Omuntu weena ku akunda ensi, okukunda Taata kuba kutamurimu. 16Ahabw'okuba kyona ekiri omu nsi okururuuha kw'omubiri, n'okwetenga kubi okw'amaisho, n'okwesiimiranira eitungo tibiruga hari Taata, kureka biruga omu nsi. 17Haza ensi ehwaho hamwe n'ebyayo ebi abantu beetenga; kwonka okora ebi Ruhanga akunda, agumaho ebiro byona. 18Baana bangye abakundwa, obunaku bw'aha muheru bwahika! Mukahurira ngu omwangizi wa Kristo naija. Mbwenu hati abangizi baingi ba Kristo baizire; ekyo nikyo kirikutumanyisa ku obunaku obu buri obw'aha muheru. 19Abo bantu bakaturugamu, ahabw'okuba bakaba batari b'omu baitu. Manya kuri baabaire bari ab'omu baitu, bakaagumiizemu naitwe. Mbwenu bakaturugaho, ngu kimanywe ku hatariho n'omwe omuribo buzimazima owaabaire ari ow'ekigombe kyaitu. 20Kwonka imwe, mukasiigwa amajuta Ogwo Orikwera, kandi mwena nimumanya amazima. 21Naabahandikira ti habw'okugira ngu timurikumanya mazima, kureka ngu ahabw'okuba nimugamanya, kandi nimumanya ku hatariho kishuba ekiruga omu mazima. 22Mbwenu omubeihi n'oha? T'ogwo ohakana naagira ati: Yesu ti Kristo? Omwangizi wa Kristo n'oyehakana Taata na Mwana. 23Tihariho oyehakana Mwana, akagira ati: Taata. Weena oyatura ku arikwikiriza Mwana, biri aine Taata. 24Eki mwahuriire okwiha omu kutandika, ka kibe nikyo kyaguma omuriimwe. Eki mwahuriire okwiha omu kutandika, ku kiraagume omuriimwe, nibwo muraagume omuri Mwana n'omuri Taata. 25Kandi eki Kristo yaaturaganiise n'eki: amagara agatahwaho. 26Ebyo naabibahandiikira ahabw'abo abarikwenda kubabeihabeiha. 27Kwonka imwe, okusiigwa amajuta oku Kristo yaabasiigire kutuura omuriimwe. N'ahabw'ekyo timurikwetenga muntu weena kubeegyesa; ahabw'okuba okusiiga oku yaabasiigire nikubeegyesa ebya buri kintu. Okwo kwegyesa n'okw'amazima kandi ti bishuba. Mbwenu mugume omuriwe, nk'oku mwayegyesiibwe. 28Baana bangye abakundwa, mugume omuri Kristo. Reero ku ariboneka, tushangwe twine obwesigye, tutarikwitwa nshoni aha kiro ky'okwija kwe. 29Ku muraabe nimumanya ngu Kristo aba ohikiriire, muhamye ku omuntu weena okora ebihikire aba azairwe Ruhanga.


1 John 31Mureebe okukunda oku Taata yaatukunzire, itwe okwetwa abaana ba Ruhanga, haza nikwo turi. Eki ensi etarikutumanyira, n'ahabw'okuba teramumanyire. 2Baana bangye abakundwa, hati turi abaana ba Ruhanga. Oku turiba tikukeetegyereziibwe, kwonka nitumanya ngu ku Kristo ariboneka, turyashushana nawe, ahabw'okuba turyamureeba nk'oku ari. 3Weena omwineho ago matsiko, ayeyeza nkawe oku ari orikwera. 4Weena okora ekibi aba agomeire eiteeka; ahabw'okuba ekibi kiba okugomera eiteeka. 5Nimumanya Kristo ku yaabonekire kwihaho ebibi, kandi omuriwe tihabamu kibi. 6Weena oguma omuriwe, tagumizamu naakora ekibi. Kwonka weena ogumizamu naakora ekibi, biri takamureebaga, nobu kwakuba okumumanya. 7Baana bangye abakundwa, hatarigira owaabahabisa! Okora ebihikire aba ohikiriire, nka Kristo oku ari ohikiriire. 8Oguma naakora ekibi aba owa Sitaane; manya Sitaane okwiha omu kutandika akora ebibi. Eki Omwana wa Ruhanga yaabonekyeire n'okucwekyereza ebi Sitaane akora. 9Weena ozairwe Ruhanga tagumizamu naakora ekibi, ahabw'okuba embibo ya Ruhanga eba eri omuriwe; kandi tabaasa kugumizamu naakora ekibi, ahabw'okuba akazaarwa Ruhanga. 10Aha, abaana ba Ruhanga n'abaana ba Sitaane niho bareeberwa: weena okora ebitahikire, nari otakunda munyaruganda, biri ti wa Ruhanga. 11Manya obu nibwo butumwa obu mwahuriire okwiha omu kutandika, ngu tukundane. 12Titushemereire kuba nka Kaini, owaabaire ari ow'Omubi, akaita omurumuna. Mbwenu akamwitira ki? N'ahabw'okuba ebi yaabaire akora bikaba biri bibi, haza eby'omurumuna biri ebihikiriire. 13Banyaruganda, kitabatangaaza kureeba ensi neebanga. 14Ekirikutumanyisa ku twarugire omu kufa, tukataaha omu magara, niitwe okukunda abanyaruganda. Otakunda aguma ari ofiire. 15Weena oyanga mwene ishe aba ari omwitsi: kandi nimumanya ku hatariho mwitsi ogira amagara agatahwaho omuriwe. 16Aha niho turikumanyira rukundo oku eri: Kristo akahayo amagara ge ahabwaitu. Naitwe nu, tushemereire kuhayo amagara gaitu ahabwa beene waitu! 17Mbwenu omuntu ku yaakuba atungire eby'ensi, akareeba mwene waabo aine ebi akyenire, haza akamwehuzya, obwo akaabaasa ata kugira ngu naakunda Ruhanga? 18Baana bangye abakundwa, turekye kukundisa ekimama n'orurimi, kureka tugire rukundo y'amazima, erikureeberwa omu bikorwa byaitu. 19Aha niho turikumanyira ku turi ab'amazima, emitima yaitu yaaba etuurize omu maisho ga Ruhanga. 20Manya emitima yaitu ku eba neetushinja, hoona tumanya Ruhanga ku ari mukuru okugikira, kandi ku arikumanya byona. 21Baana bangye abakundwa, emitima yaitu ku eraabe etarikutushinja, biri twine obwesigye ahari Ruhanga. 22Eki tumushaba kyona akituha, ahabw'okuba tworobera ebiragiro bye, kandi tukora ebi asiima. 23Mbwenu eki nikyo kiragiro kye, ngu twikirize eiziina ry'Omwana we Yesu Kristo, kandi tukundane nka Kristo oku yaaturagiire. 24Boona aboorobera ebiragiro bya Ruhanga baguma omuriwe, nawe aguma omuribo. Kandi ekitumanyisa ku ari omuriitwe, ni Mutima ou yaatuhaire. 


1 John 41Baana bangye abakundwa, mutariikiriza ibara mutima, kureka mugume mwetegyereze emitima, kureeba yaaba neeruga ahari Ruhanga. Manya abarangi baingi b'ebishuba baherize kushohora, baija omu nsi. 2Aha niho muraamanyire Mutima wa Ruhanga: weena orikurangirira Yesu ku niwe Kristo owaizire aine omubiri, biri aine Mutima oruga ahari Ruhanga. 3Kwonka weena otarikurangirira Yesu, biri taine Mutima oruga ahari Ruhanga. Ogwo ni mutima w'omwangizi wa Kristo, ou mwahuriire ngu naija, na mbwenu yaahikire omu nsi. 4Baana bangye abakundwa, imwe muri aba Ruhanga, kandi abo barangi b'ebishuba mubasingwire, ahabw'okuba Mutima ori omuriimwe ni mukuru okukira mutima ori omu b'omu nsi. 5Bo n'ab'ensi, n'ahabw'ekyo ebi bagamba n'eby'ensi, n'ensi ebatega okutu. 6Itwe turi aba Ruhanga. Weena omanya Ruhanga atutega okutu; kandi otari wa Ruhanga tatutega okutu. Aho niho turikumanyira Mutima ow'amazima na mutima orikuhabisa. 7Baana bangye abakundwa, ka tukundane, ahabw'okuba rukundo ekomooka ahari Ruhanga. Manya oine rukundo, aba azairwe Ruhanga kandi amanya Ruhanga. 8Otaine rukundo, tamanya Ruhanga, ahabw'okuba Ruhanga aba rukundo. 9Mbwenu eki nikyo kyayorekire rukundo ya Ruhanga omuriitwe: akoohereza omu nsi Omwana we omwe nyamunegyere, ngu abone kutuhaisa amagara. 10Okukunda nikwo oku: tikugira ngu niitwe twakunzire Ruhanga, kureka niwe yaatukunzire, akoohereza Omwana we kuba ekarabo y'ebibi byaitu. 11Baana bangye abakundwa, Ruhanga ku araabe yaatukunzire atyo, naitwe tushemereire kukundana. 12Tihariho muntu orareebire Ruhanga; kwonka ku tukundana, Ruhanga aguma omuriitwe, na rukundo ye ehikiiririzibwa kimwe omuriitwe. 13Aha niho tumanyira ku tuguma omuri Ruhanga, nawe akaguma omuriitwe, ahabw'okuba akatuha Mutima we. 14Manya tukareeba kandi twahamya ku Taata yaayohereize Omwana we kuba Omujuni w'ensi. 15Weena oyatura ku Yesu ari Omwana wa Ruhanga, Ruhanga aguma omuriwe, nawe omuri Ruhanga. 16N'ahabw'ekyo nitumanya ku Ruhanga atwiniire rukundo kandi nitukiikiriza. Ruhanga aba rukundo, kandi weena oguma omuri rukundo, agume omuri Ruhanga, na Ruhanga aguma omuriwe. 17Ekirikworeka ku rukundo ehikiiririziibwe kimwe omuriitwe, n'okuba twine obwesigye aha kiro ky'okucwererwaho orubanja; ahabw'okuba emitwarize yaitu omuri egi nsi ni nk'eya Kristo. 18Omuri rukundo tihabamu kutiina, ahabw'okuba rukundo ehikiire kimwe ebingamu okutiina kwona. Manya okutiina kugira akakwate n'ekiheneso, kandi orikutiina aba atakahikiiririziibwe kimwe omuri rukundo. 19Tukunda, ahw'okuba Ruhanga niwe yaabandize kutukunda. 20Omuntu ku arikugira ati: Ninkunda Ruhanga, kwonka yaayanga mwene ishe, biri n'omubeihi. Manya otakunda mwene ishe ou areeba, tabaasa kukunda Ruhanga ou atakareebaga. 21Kandi eki nikyo kiragiro ki Kristo yaatuhaire, ngu okunda Ruhanga, ashemereire kukunda na mwene ishe. 


1 John 51Weena oikiriza ku Yesu niwe Kristo, biri n'omwana wa Ruhanga; kandi weena okunda omuzaire, akunda n'omwana we. 2Eki nikyo tumanyiraho ku tukunda abaana ba Ruhanga, twaba nitukunda Ruhanga kandi nitworobera ebiragiro bye. 3Manya okukunda Ruhanga nikwo kworobera ebiragiro bye. Kandi ebiragiro bye tibirusya. 4Ahabw'okuba weena ozairwe Ruhanga asingura ensi, kandi ekisingura ensi n'okwikiriza kwaitu. 5Mbwenu osingura ensi n'oha? T'ogwo oikiriza Yesu ku ari Omwana wa Ruhanga? 6Yesu Kristo ogwo niwe yaiziire omu maizi g'okubatizibwa, n'omu shagama y'okufa kwe. Taraiziire mu maizi gonka, kureka omuri byombi: amaizi n'eshagama. 7Kandi Mutima niwe ahamya ku kiri eky'amazima, ahabw'okuba Mutima nigo mazima. 8Hariho ebirikuhamya bishatu: Mutima, amaizi n'eshagama; kandi ebyo byonsatu biikirizana. 9Ku turaabe nitwikiriza ebi abantu bahamya, ebi Ruhanga ahamya nibikiraho obukuru. Manya oku n'okuhamya kwa Ruhanga oku yaahamize aha Mwana we. 10Weena orikwikiriza Omwana wa Ruhanga aine obuhamya omu mutima gwe. Otarikwikiriza Ruhanga aba amuhindwire omubeihi, ahabw'okuba aba ataikiriize ebi Ruhanga yaahamize aha Mwana we. 11Manya obu nibwo buhamya: Ruhanga akatuha amagara agatahwaho, haza ago magara gari omu Mwana we. 12Oine Mwana biri aine amagara, otaine Mwana wa Ruhanga biri taine magara. 13Imwe abaikiriza eiziina ry'Omwana wa Ruhanga, ebi naabibahandiikira ngu mumanye ku mwine amagara agatahwaho. 14Kandi obu nibwo bwesigye obu tugira ahari Ruhanga, ngu ku tushaba ekintu kyona nk'oku asiima, atuhurira. 15Kandi ku turaabe nitumanya ngu kyona eki tumushaba atuhurira, tumanya ngu twatungire ebi twamushaba. 16Ku haakugira owaareeba omunyaruganda naakora ekibi ekitarikwita, amushabire, haza Ruhanga naija kumuha amagara. Kwonka ekyo n'eky'abakozire ekibi ekitarikwita. Hariho ekibi ekirikwita; tindikugira ngu ekyo omuntu ashemereire kushaba Ruhanga ahabwakyo. 17Okukora ekitahikire kyona kuba ekibi, kwonka hariho ekibi ekitarikwita. 18Nitumanya ngu weena ozairwe Ruhanga tagumizamu naakora ekibi, kureka arindwa ogwo ou Ruhanga yaayezaariire, kandi Omubi tabaasa kumukoraho. 19Nitumanya itwe ku turi aba Ruhanga, kandi ku ensi yoona erikutegyekwa Omubi. 20Hoona nitumanya ku Omwana wa Ruhanga yaizire, akatuha okwetegyereza, ngu tubone kumanya Ruhanga ow'amazima. Mbwenu tuguma turi omuri Ruhanga ow'amazima, ahabw'okuba turi omu Mwana we Yesu Kristo. Ogwo niwe Ruhanga ow'amazima, kandi niwe magara agatahwaho. 21Baana bangye abakundwa, mwerinde ebishushani ebirikuramibwa.

 http://www.bible.is/NYNBSU/1John/1/D

Nenhum comentário:

Postar um comentário