terça-feira, 19 de maio de 2015

1 Yoana: Madi

 
1 Yoana 11Asi ofu ’dii le’jo lidri dri, eze vu a i’dojo ri inga sa a’a ri idri; ameri ama bi si, andre ani ama mi gba ri si; ani ama ndrele rii, amelo ama dri si: Le’jo ’dii lidri. 2Lidri na ’i o’baru ndrea ote; andre ra, ama le’jo nze driaru ama lidri olure tadru ri eteka anyi ni si; ani olure Ata tro, ki evu o’ba ondre ani ote. 3Ta ama ndrele vua ama erile ra rii ama ite’dea anyi ni. Ausi ni anyemuru ame tro alu, kendre ama remuka Ata ti tro ana Ngwapi ni Yesu Kristo ti tro alu ri ani. 4Asi ofu ’di anyi ni asi egbwe amadri kolu dru nza si. 5Le’jo ama nzele anyi ni rii ta ama erile driaru ri ’i. Ruba- nga ni ingwe, vumudi laka iyo. 6Jo oce emuru Rubanga tro alu, ki a’di olu vumudi ’a ri, ama le’jo amadri si vua e’bu amadri si enzo. 7Ki jo a’di olu ingwe ’a kendre ani a oluka ingwe ’a ri ani emuru alu, vua ari Yesu Rubanga a Ngwapi dri ka enzi amadri je pelere. 8Ki jo oce ama enzi ako ri, a’di runza amangasi, le’jo anda rii ama asi ga iyo. 9Ki jo a’i enzi amadri ra, Rubanga ni anda vua igenia wa, ka ama enzi ni e’be ra, ka ama je ta cidru amadri unzi ri ’a pelere. 10Jo oce ide enzi ku ri, karuni o’ba Rubanga ni ma’di enzo ri ’i, le’jo driaru ama asi ga iyo.

1 Yoana 21Ma ’boronzi, ma ta ’di sijo anyi ni rii, anye’be dru enzi ideka ra. Ki jo ma’di ka enzi ide, ma’di amadri ama ikonyi’di Ata tro rii Yesu Kristo ni anda rii a’a. 2Ani azi ama enzi ni ’du’di ri ’i, ki te amadri a’dite ku, ki enzi ’ba vu dri ri dri tro cidru. 3Lokudru ama Rubanga ni ote ni cara driaru a ta mbaka si. 4Ma’di cedia “Ani oni ote”, ki cara driaru a ta ni mba’di ku rii, ani enzo, le’jo anda rii ana asi ga iyo. 5Ki ma’di ta ani a ’jole ri a’i’di rii, Rubanga a le ka rite’de ani ni ca. 6Ma’di ’jo’dia ani kemuru Rubanga tro alu rii, kole kolu ovi Kristo a lidri olujo ri dri si. 7Ma adrunzi ma lelendro ri, cara ma sile ite’dele anyi ni ’dii cara u’di rii ku, ki cara oku ehwele anyi ni eze ri ’i, ondo cara eze ’dii ani ofu anyi a erile ri ’i. 8Rusa leti zi si ta ma sile anyi ni ri’ba ai cara u’di ri ’i. Ta ’dii lokudru ndrea wa rii lidri Kristo dri si vua lidri anyidri si. A’dusi vumudi oko dria ra, dria ingwe lokugo ri kongwe. 9Ma’di ce’dia ani ingwe ’a, ki adrupi ni le’di ku rii, ndi dria sa ani vumudi ’a. 10!Ki ma’di adrupi ni le’dira ri kolu ingwe ’a, ori ta ’ba ziti ji’di enzi ’a rii si ku. 11Rari ma’di adrupi ni le’di ku ri kolu vumudi ’a, vua kaci ’a aru si; oni kare ana yare rii sa ku, a’dusi vu ni ini rere, ta ndre kpe. 12Ma ta ’di si anyi ma ’boronzi tema Kristo si dria enzi anyidri a re’bere ra ri ni. 13Ma ata, asi ta ’di anyi ’ba ma’di andrani eze vu a i’do nga sa a’a ri nika ote rii ni. Yai, asi ta ’dii anyi Sitani ni ndekara ri ni. 14’Boronzi, asi ta ’dii anyi ni ri, a’dusi ini Ata ni ote. Ma ata, asi ta ’di anyi ni rii anya ma’di andrani eze vu a i’do nga sa a’a ri nika ote si. Yai, asi ta ’di anyi ni, a’dusi anyi okpo vua le’jo Rubanga dri o’ba ana e’i ni anya asi ga, vua inde Sitani ra. 15Ole vu ta vu dri ri tro ku. Le Ata dri olu ma’di vu le’di ri a asi ga ku. 16A’dusi ta vu dri ’di ’a rii kendre vico ru dri ’i, mi ingwe recuka tro, enga Ata dri ku, ki enga vu dri ’di ’a. 17Vu, vico anidri ’di tro kpodru, kaki evu kaki oko ra. Ki ma’di le’jo Rubanga dri ide’di ri le kolu tadru. 18’Boronzi, ’di o’du ta ti okojo ri ’i. O’jo andrani anyi ni: O’ja’bazi Kristo dri duba kevu ra ni ra. Dria o’ja’bazi Kristo dri ite’deru amgbu. Ta ’di ani ’di si, a’di dria nia ote ’dii o’du ta ti okojo ri ’i. 19O’ja’bazi Kristo dri enga ama i lofo, ki ai ’ba amadri tema rii ku; oli koluki ’ba amadri ’i ri kaki olu ame tro. Ki e’beki ama ra, ite’dejoa dru ai lofo ma’di alusa amadri ’i ni iyo. 20Ki Endri Ole ri otri anyi ni, vua kpodru anyesu ciri ra. 21!Asi ta ’dii anyi ni anya le’jo loku ri nika ku si ku, ki rari anya nika atiti sa ote si, vua ini ote enzo kenga ta anda ri i ’a kpe. 22Ma’di Yesu ni Kristo ’i ni ga’di mgbe ri, enzo; ani o’ja’bazi Kristo dri ’i. Ka Ata ’i sa ga ana Ngwapi ni gaka ri ani, 23a’dusi ma’di Ngwapi ni ga’di rii, oga Ata ’i sa mgbe. Ngwapi ni a’ika ni, oviru Ata ni a’ika tro vi. 24Anyimba ta ati andrani anyi inijori a ta ni, kolu anyi asi ga. Jo ta andrani ati anyi inijo ri kolu anya asi ga a’a, anyevu anyolu Ngwapi ti tro, Ata ti tro sa alu. 25Ta ani a icarale anyi ni anangasi ana cara ni ga rii lidri olure tadru ri ’i. 26’Di i ta cidru ma sile anyi ni ’ba anya dri ni seka unzi ri a le’jo si ri ’i. 27Ki Kristo ohwe anyi ni Endri anidri ra. Ana Endri a oluka anya asi ga si, ma’di zi anyi ini’di alusa iyo. A’dusi Endri ka anyi ni ta cidru anda vua enzo ako rii ini ra. Anyoko ta Endri a inile rii a vu ni vua anyolu Kristo ti tro. 28Ma ’boronzi, anyemuru Yesu ti tro, ausi ni keya ni ri olu dru igeni retu ri tro; ibi dru ogu driaru drinza si o’du ana engwijo ri inga ku. 29Ini Rubanga ni ma’di anda ri ’i ni ote, ’disidru ini ote ma’di alu alu ta anda rii ide’di rii, ecoru ana ’bara ’i. 


1 Yoana 31Anyira dri le Ata a ama lejo ri ni, o’ba ungwe ama ’boronzi Rubanga dri ’i. Lokudru ama ana ’boronzi ’i. ’Ba vu dri rii oga ani nika mgbe, ’disidru oniki ama ku. 2Ma adrunzi ma lele ndro ri, ama dria ’boronzi Rubanga dri ’i, ki too andraga a’di evu a’di olu ingoni ni ite’deru driso kuru. Ta te nile ote rii too kite’deru ni, a’di ruvi ane tro vi, a’dusi a’di evu a’di ani ndre ondo ana oluka ri ani, 3Ma’di igeni ’di ’ba’di asi ’a rii, kole kide ani pelere, kole kengwi pelere kendre Kristo ani. 4Ma’di enzi ide’di rii ka cara nyo, a’dusi enzi ideka ni cara nyoka. 5Kristo a eyajo ri enzi kegwe dru ra ’i, a’dusi ani enzi ako. 6Ma’di remu’di Kristo tro rii ide enzi di ku. Ki ma’di enzi ide’di rii ondre Kristo ni kuru, vua oni sa ani kuru. 7Ma ’boronzi, o’ba ma’di zi kunza anyi ku. Ma’di ta anda rii ide’di rii, anda kendre Kristo a oluka anda ri ani. 8Ma’di enzi ide’di ri a ’dipi ni Sitani ’i, a’dusi vu a i’do nga sa ani ma’di enzi’dipi ri ’i. Rubanga a Ngwapi eya vu dri tema e’bu Sitani dri ivolore. 9Ma’di Rubanga a ’bara ’i rii ide enzi di ku, a’dusi Ruba- nga a ori ni asi ’a aru a’a. Ka enzi ide kpe, a’dusi ani ’bara Rubanga dri ’i. 10’Disi a’di ’boronzi Rubanga drii upe ’boronzi Sitani dri i’a wa. Ma’di ta anda rii ide’di ku, vua adrupi ni le’di ku rii, ani ’bara Rubanga dri ’i ku. 11Le’jo ’dii anyi a erile eze sa ra ri ’i: kole amaleru ama- ngasi ndro. 12Olu Kaino ani ku, ana ’dipi ni Sitani ’i, a’dusi o’di ana adrupi ni gba ri sa ra. Ana ana adrupi ni ’dijo ri le’jo ’di ’i: ani olure lidri unzi ri si, vua adrupi ni olure lidri loso ri si. 13Ma adrunzi, jo ’ba vu dri rii kole anyi ku saa, a’u ausi ku. 14Oni ote oyi dra ’a si pi, oto lidri ’a, a’dusi ale ama adrunzi ni ndro. Ma’di ana adrupi ni le’di ku rii, karuni driso olu dra ’a. 15Jo ile nya adrupi ni ku ri, nyi ma’di ’ba u’di’di ri ’i. Anyi sa ini ote ’ba ’ba u’dika ri ni lidri olure tadru rii iyo. 16Ta ’dii ini ama ni le, a’dusi Kristo azi ana lidri ni ama si. Kole ama sa aziki ama lidri ni ama adrunzi ti si. 17Jo ma’di dri limi vu dri ’di ’a ri a’a, ki adrupi a’i ta driaru oko imba asi anyu ohwe ku ri, koce ana asi ga le Rubanga dri a’a ni ingoni? 18Ma ’boronzi, le amadri kolu te le’jo u’joka ti si ku, ki kole kolu le loku rii vua le lide tro ri ’i. 19Le’jo ’di si a’di nia ama ’boronzi le’jo anda ri dri ’i vua ama asi a olujo okpo Rubanga andra ri ’i; 20Jo ama asi kali ama idri lejo wa ri, Rubanga onde ama asi ni ra, vua oni ta cidru ote. 21Ma adrunzi, ma lelendro ri, jo ama asi ali ama idri le’jo ku, karuni imba asi Rubanga andra ra. 22Ta cidru a’ile driaru rii a’di esua ra, a’dusi ama cara driaru a ta ni mba vua ama ta ani a lele rii ide. 23Cara driaru ’dii: kole a’i ana Ngwapi Yesu Kristo a ru ni, vua oleru ama i lofo ndro, kendre Yesu a icaraka ama ni ri ani. 24Ma’di cara driaru a ta ni mba’di rii, karemu Rubanga tro alu, vua Rubanga ’i sa karemu ane tro alu. A’di nia karemu ama tro alu ni ana ana Endri ni hweka ama ni si. 


1 Yoana 41Ma adrunzi ma lelendro ri, ora endri cidru anda ni ku. Anyi’bi ai ndrele ’di engaki Rubanga dri ya ni kpa, a’dusi dria profetaa enzo ri vu dri ekpadru, 2Anyi endri cidru ni enga Rubanga dri ni leti ’di si: endri cidru ’jo’dia Yesu ni Kristo eya ecoru ’ba rii enga Rubanga dri. 3Ki endri ce’dia Yesu ni Kristo ’i ku ri, enga Rubanga dri ku, ki ani endri o’ja’bazi Kristo dri dri ’i; o’jo ta ’di anyi ni eze sa keya ni ra. Dria ani vu dri ’di ’a a’a. 4Ma ’boronzi, inde dria profetaa enzo rii ra, a’dusi anye- nga Rubanga dri, vua anyi asi ga ma’di zi retugo dru ’ba vu dri ’di ’a ri nde’dira ri a’a. 5Ki ai ni le ai ’ba vu ’dii dri ri ’i, ’disidru kaki ta ’jo ti vu ’dii dri ri si, vua ’ba vu dri ri ka aia le’jo ni eri. 6Ki ama le ama ’boronzi Rubanga dri ’i, ’ba Rubanga nika ote ri ka ama le’jo ni eri. ’Ba engaka Rubanga dri ku rii ogaki ama le’jo ni erika mgbe. ’Dii leti ama endri anda ’di’bati nijo endri enzo ri tro ri ’i. 7Ma adrunzi ma lelendro ri, kole olekiru ndro, a’dusi le enga Rubanga dri. Ma’di ’ba cidru le’di ndro rii ani ’bara Rubanga dri ’i, vua oni Rubanga ote. 8Ma’di ’ba le’di ku rii ka Rubanga ni kpe, a’dusi Rubanga ni le. 9Rubanga ite’de ana le. ni ama ni ra, a’dusi eze ana ’bara alu tende ri vu dri, amesu dru lidri ani si. 10’Dii le ma ’jole ri a ehwi ’i: le ama Rubanga lejo rii ku, ki Rubanga a le ama iru ri si eze ana Ngwapi ni azi dru enzi amadri ’dule. 11Ma adrunzi ma lelendro ri, Rubanga a ’ba leka ndro si, kole ama sa olekiru ndro. 12Ma’di zi alusa Rubanga ndre’di ra ani iyo. Ki jo oleru ra ri, Rubanga keya karemu ame tro alu vua ana le ni ndutu kolu ama asi ga. 13A’di nia amaremu ane tro alu vua ani sa emuru ama tro alu ni ana Endri anidri ehweka si. 14Amangasi sa andre ra, vua amite’dea wa Ata eze ana Ngwapi ni vu dri Ari’dipi dru. 15Jo ma’di a’i Yesu ni Rubanga a Ngwapi ’i ni ra, Rubanga karemu ane tro alu vua ani sa karemu Rubanga tro alu. 16Amangasi sa ani ote, ama’i le Rubanga dri ama iru rii ra. Rubanga ni le, ma’di olu’di le tro rii karemu Rubanga tro alu, vua Rubanga ’i sa karemu ane tro alu. 17Le karinza ama asi ga, a’di evu a’di olu o’du le’jo alijo ri inga ori ako, a’dusi vu dri ’di ’a sa ama olure Kristo a oluka vu dri ri ani. 18Le si ori kolu iyo, a’dusi le anda ri ka ori ’du pi: a’dusi orika ni ehwi na lamgba esuka, vua ma’di ori tro rii rusa le gba ri driaru iyo. 19Ama ani lejo rii, a’dusi i’do ama leka ati. 20Ma’di ’jo’dia: “Ale Rubanga ra”, ki ole adrupi ni ku ri, enzo; a’dusi eze sa ma’di ana adrupi ni ana ndrele ote ri le’di ku rii, ka Rubanga ni ani a ndrele ku ri le kpe. 21’Disidru ’dii cara ana hwele ama ni ri’i, ma’di Rubanga le’dira ri, kole kole ana adrupi ’i sa ndro.

1 Yoana 51Ma’di Yesu ni a’i’di Kristo ’i rii, ani Rubanga a ’bara ’i. Ma’di Ata ni ani ti’di ri le’di rii, ole ngwapi ni ana tile ri isa ra. 2Ama nia ale ’boronzi Rubanga dri ra ni, ama ani leka ndro vua ama ana cara a ta ni mbaka si. 3Rubanga leka a ehwi ni cara anidri a ta mbaka. 4Cara driaru okpo ku, a’dusi ma’di Rubanga a ’bara ’i rii, ka ta vu dri ri a mi za ra. Ande o’ja vu dri rii ama a’i si. 5A’di ka vu za wa rii ni? Rari te ma’di a’i’dia Yesu ni Rubanga a Ngwapi ’i ri ’i. 6Yesu eya eyi si ari tro; eya eyi si a’dite ku, eyi ari tro si. Vua Endri ka le’jo nze driaru, a’dusi tesa Endri ni anda. 7’Disidru sadinia ti ai ina: 8Endri, eyi vua ari, inatrwa a’ikiru ra. 9Ama le’jo ’baa nzele rii a’i, ki le’jo Rubanga a nzele ri onde ni. ’Dii le’jo Rubanga a nzele ana Ngwapi si ri ’i. 10’Ba cidru Rubanga a Ngwapi ni a’ika rii asi ga le’jo nzele ’dii a’a. Ma’di Rubanga a’i’di ku rii, ole Rubanga ’baka enzo, a’dusi a’i le’jo Rubanga a nzele ana Ngwapi si rii ku. 11Le’jo nzele ri ’di ’i: Rubanga ohwe ama ni lidri olu’di tadru ri i ra, lidri ’dii ana Ngwapi ni ru. 12Ma’di Ngwapi a olure asi ’a aru ri dri, lidri ’dii a’a; vua ma’di Ngwapi a olure asi aru iyo ri dri, lidri iyo. 13Ma ta ’di sijo anyi ni rii, ausi anyi ’ba Rubanga a Ngwapi a ru ni a’ika rii koni dru anyi dri lidri olure tadru rii a’a ni ote. 14Ama asi a olujo okpo rii, a’dusi ani cuwidru jo ama’i ta Rubanga dri ra, ki ta ama a’ile rii oviru ra anidri tro, ka ama eri ra. 15Ama nikaa ta cidru ama a’ile rii keria ra si, ani ote ohwe ta ama a’ile ani dri rii ra. 16Jo ma’di ondre ana adrupi ide enzi ra, ki enzi na ’i enzi drajo rii ku, kolea ma’di na kilegi; Rubanga ka enzi’dipi ni lidri hwe ra. Ta ’dii karide wa rii ’ba enzi drajo ku rii ideka rii ni. Enzi ziti drajo rii a’a; a’jo alusa ilegi enzi ’di ani ’di si ni kuru. 17Ta cidru idele ego rii enzi, ki ai cidru drajo rii ku. 18Oni ote ma’di Rubanga a ’bara ’i rii ide enzi di ku, a’dusi Rubanga a ’bara alu tende rii ka ta ani mba ni, Sitani elo ru ani ku. 19Oni ote ama ’dipi ni Rubanga ’i, ki ’ba vu dri rii cidru Sitani ka asea ni. 20Oni ote Rubanga a ’Bara emu ra vua ohwe ama ni ciri Rubanga anda rii nijo ra. Amaremu Rubanga anda ri tro alu kendre ama remuka Ngwapi Yesu Kristo ni alu ri tro ri ani. ’Dii Rubanga anda ri ’i vua ’dii lidri olure tadru ri ’i. 21Ma ’boronzi, anyimba anya ta rubanga enzo rii rure ga.

http://www.bible.is/MHIBSU/1John/1/D




Nenhum comentário:

Postar um comentário