quinta-feira, 21 de maio de 2015

1 Zã: FRAFRA


1 Zã 11To pa'alɛ bɔ'ɔra la yamam yɛhera la se'em te ba yi'ira Yelehom sebo n bo'ore vom la. A daa pon bɔna la pin'ileŋɔ na. To daa wom a yetɔgom la ge nyɛ' en la to nini. Yelemɛŋɛrɛ, te nyɛ' en, ge daa bɔna la en. 2N daa wa'an na la, to daa nyɛ' en. Bala n sɔe, te to tɔgɔra a yele wa ge yɛta ya yɛhera la vom sebo n ka tare ba'ahegɔ Na'ayenɛ zen'en la. A daa boe la to Sɔ' Na'ayenɛ zen'an la, ge daa wa'an tomam zen'en na la. 3Tomam nyɛ' ge wom se'ere la, te to yɛta yamam me wa. Bala, te ya wan lagom bɔna la tomam la Sɔ' la a Dayɔa Yesu Krista lagaŋɔ la poan. 4To golehɛ dena wa bɔ'ɔra ya te to tara la popeelom zo'e zo'e. 5Yetɔgom sebo te to wom a Dayɔa la zen'en la n wana te to yɛta ya wa: Yenɛ dela nɛɛhom te lika la fiin wa ka bɔna a poan. 6Tomam nya han yeti te lagom bɔna me la en, ge kelom bɔna lika poan, te tɔgom ye dela ponpɔrɔŋɔ ge te sɛla woo te to eta la dagɛna yelemɛŋɛrɛ. 7Ge to han bɔna nɛɛhom la poan wo n boe nɛɛhom la poan se'em la, te ye tare lagaŋɔ la taaba, te a dayɔa Yesu ziim la duuhe to be'em woo bahɛ. 8To han yeti to ka tare yelebe'ero, to pan'ahe la to mɛhe ge me ka tɔgɔra yelemɛŋɛrɛ. 9Ge to han porɛ to yelebe'ero bo Na'ayenɛ, a wan eŋɛ sɛla te a biŋe a nɔɔrɛ te a eŋɛ la, ge tom sɛla n de ma'an. A wan bahɛ to be'em bo to ge duuhe to bahɛ yelese'a woo te to eŋɛ te a ka ana soŋa la. 10To han yeti to ka tom be'em, to yeti Yenɛ dela ponpɔrɔma, te a yelehom la me ka bɔna to zen'en.


1 Zã 21N kɔma wa, n golehɛ dena wa bɔ'ɔra ya te ya da tom be'em. Ge to se'em han tom be'em, to tare Yesu Krista n de tontɔɔdaana la. Enŋa n de to nu'poŋmɛ'ɛra. 2La dela Yesu Krista kum la zuo te Yenɛ wan ta'an bahɛ to yelebe'ero bo to, dagɛ la tomam ma'an yelebe'ero la, ge asaala woo yelebe'ero. 3To han nana Yenɛ nɔɔrɛ to seren baŋɛ soŋa soŋa te to nam en. 4Ge se'em n yeti enŋa mi' Yenɛ ge ka nana a nɔɔrɛ la, a daana dela ponpɔrɔma, a ka tare yelemɛŋɛrɛ. 5Ge se'em n nane a nɔɔrɛ la, enŋa daana n tare nɔŋerɛ wo Yenɛ n tare nɔŋerɛ se'em la. Wana wa n wan bahɛ te to baŋɛ soŋa soŋa te to boe mɛ la en. 6Te hon se'em n yeti ho boe mɛ la Yenɛ, dela ho kɔ'ɔn bɔna wo Yesu Krista n daa boe se'em la. 7N zɔ'sonɔ wa, la dagɛ la yelepaalɛ te n goleha bɔ'ɔra ya, de dela yelekɛka te ya pon wom pɔhega poan na. Yelekɛka wa dela yelehom la te ya wom la. 8Ge bala mea zan'an, sɛla te n golehera bɔ'ɔra ya te ya dɔla wa dela yelepaalɛ. Se'ere n sɔe, te n golehɛ dena wa dela nɛɛhom la mea pon te'ele nɛɛra ge te lika la tɔla. 9Te se'em n yeti enŋa boe la nɛɛhom la poan ge yaɛ a tadaana kelom bɔna la lika la poan. 10Ge se'em n nɔŋɛ a tadaana boe la nɛɛhom la poan. Bala, yelese'ere ka boe a zen'en n wan bahɛ te a seren tom be'em. 11Ge se'em n yaɛ a tadaana boe la lika la poan, a daana kene la lika la poan, ge ka mina enŋa n kene yɛ'a zen'an. Te enŋa n boe bɔŋkaŋa taaba la zuo n sɔe te a ka mina Yenɛ yelemɛŋɛrɛ la. 12N kɔma wa, se'ere zuo n sɔe, te n golehera bɔ'ɔra ya wa dela Yesu Krista zuo, te Yenɛ bahɛ ya yelebe'ero bo ya. 13N golehere bɔ'ɔra yamam sɔdoma wa. Se'ere n sɔe la, ya mi' se'em n daa pon bɔna pin'ileŋɔ na la. N golehere bɔ'ɔra yamam bonbilipaalehe wa. Se'ere n sɔe la, ya nyaŋɛ se'em n de be'emdaana la. 14N golehere bɔ'ɔra yamam kɔma wa. Se'ere n sɔe la, ya mi' to Sɔ' la. N golehere bɔ'ɔra yamam sɔdoma wa. Se'ere n sɔe la ya mi' se'em n daa pon bɔna pin'ileŋɔ na la. N golehere bɔ'ɔra yamam bonbilipaalehe wa. Se'ere n sɔe la, ya kpe'em mɛ ge te Yenɛ yelehom me bɔna ya poan, ge te ya pon nyaŋɛ be'emdaana la. 15Da nɔŋɛ ya teŋa wa zuo la ka lɔgɔrɔ. Hon se'em han nɔŋɛ ba, ho ka nɔŋɛ to Sɔ. 16Te sɛla woo n de teŋa wa zuo dene dela: potɔpa sunya n bote sɛla, la sɛla te nɛreba nyɛta ge bɔta, la sɛla woo te nɛreba ŋmɛ'ɛra ba nyɔn'ɔnrɔ la a. Yele ana wa ka ze'ele la to Sɔ zen'en na, ge ba ze'ele la a teŋa wa zuo na. 17Teŋa wa, la sɛla woo n boe ka poan te nɛreba nɔŋɛ la wan tole. Ge se'em n ete sɛla te Yenɛ bɔta kɔ'ɔn bɔna mɛ wuuha. 18N kɔma wa, teŋa wa ba'ahegɔ dabaherɛ la pɔnrɛ. Ya daa wom te Krista diŋdaana la wan wa'ana. Te nananawa, Krista diŋdoma la pon bɔna la tɔ. Bala zuo, to mi' te teŋa wa ba'ahegɔ dabaherɛ la pɔnre me n bala. 19Ge nɛrebana wa ka sakɛ bo Yesu. Bala n sɔe, te ba bahɛ tɔ la. Ge ba han sakɛ ne bo ne en, ba wan bone la tɔ. Ge ban bahɛ to la zuo pa'alɛ soŋa soŋa te bama ayema me ka seren sakɛ bo Yesu. 20Yesu Krista pon dekɛ Yenɛ Sea la bo ya. Bala, ya zan'an mi' yelemɛŋɛrɛ la mɛ. 21Ge la dagɛ la ya ka mi' yelemɛŋɛrɛ la me zuo n sɔe te n golehera bɔ'ɔra ya wa. La ton de'a la yan mi' dɛ la zuo. Ya mɛhe me mi' te ponpɔrɔŋɔ ka bo yelemɛŋɛrɛ wa poan. 22Ane nya n de ponpɔrɔma wa? N wan yele ya. A dela se'emdaana n yeti Yesu dagɛ se'em te Yenɛ loe la. Ena wa daana n de Yesu Krista diŋdaana la. A daana dela se'em n zagahɛ to Sɔ' la a Dayɔa la. 23Te hon se'em n zagahɛ Dayɔa la me zagahɛ Sɔ' la mɛ. Ge hon se'em n to'e Dayɔa la me to'e Sɔ' la mɛ. 24Dene poan, bahɛ ya te yan wom yelehom sebo pin'ileŋɔ poan ha la bɔna ya potɛn'ya poan. Te ya han bahɛ te yan wom sɛla pin'ileŋɔ poan ha la bɔna ya potɛn'ya poan, ya wan lagom bɔna la Dayɔa la la a Sɔ' la. 25Te dena te Yesu Krista biŋe a nɔɔrɛ te a eŋɛ bo to la. A yeti a wan bo to vom sebo n ka tare ba'ahegɔ Na'ayenɛ zen'en la. 26N golehere dena wa bɔ'ɔra ya yɛhera la sɛba n zegere te ba pan'ahera ya la. 27Han de'a yamam wa, Yesu Krista pon sɔ' ya la a Sea la. Sea la han bɔna la ya, ya ka le ɛɛra se'em te a pa'alɛ ya sɛla, sɛla te a pa'ala ya la dela yelemɛŋɛrɛ ge dagɛ ponpɔrɔŋɔ. Nane ya Sea la n pa'alɛ ya se'em la ge bone ya la Yesu Krista. 28Te yelemɛŋɛrɛ, n kɔma, bone ya la en. Bala, te to wan sɛ' ze'ele soŋa soŋa ge kan ta le'eha vi' zuo a han ta nɛɛ kena de daarɛ la na. 29Ya mi' te Krista dela tontɔɔdaana. Bala, ya mina te se'em woo n tone sɛla n de ma'an dela Yenɛ bia.


1 Zã 31Behɛ ya to Sɔ' Na'ayenɛ nɔŋerɛ la n zon se'em te a nɔŋɛ tɔ. A nɔŋerɛ la ba zo'e mɛ, te ba yi'ira tɔ a kɔma. Bala, te to me seren de'a wa. Dena zuo, teŋa wa zuo ka mina tomam la. Se'ere n sɔe la ba ka mi Yenɛ mɛŋa la. 2Bala n zɔ'sonɔ wa, nananawa to dela Yenɛ kɔma. Ge to ka baŋɛ soŋa soŋa to wan ana se'em. Ge to mi' te Yesu Krista han ta wa'ana to wan ana wo enŋa n ane se'em la. Se'ere n sɔe la, to wan nyɛ' en wo n ane se'em la. 3Te hon se'em n sakɛ gura dena wa ho suunre poan bo Yesu Krista kan tara dɛngerɔ wo Yesu n ka tare se'em la. 4Ge se'em woo n tom be'em tue pa'alegɔ la mɛ. Se'ere n sɔe la, be'em dela tuure pa'alegɔ la poan. 5Ya mi' te Yesu Krista wa'ana te a bahɛ la nɛreba yelebe'ero bo ba. Ge a mea ka tare yelebe'ero. 6Bala, se'em woo n boe la Krista ka kelom tona be'em, se'em kelom kɔ'ɔn tona be'em nan ka tabelɛ nyɛ' en bii mina en. 7Dene poan n kɔma wa, da bahɛ ya te se'em pan'ahɛ ya. Te hon se'em n tone sɛla n de ma'an dela tontɔɔdaana wo Yesu Krista n de se'em la. 8Ge, hon se'em n kelom kɔ'ɔn tona be'em dela Sagona la nɛra. Se'ere n sɔe la, Sagona la pon ton be'em la pin'ileŋɔ poan ha. Te Na'ayenɛ Dayɔa la daa wa'ana la dena mea wa zuo te a sagom Sagona la tooma. 9Gee hon se'em n de Yenɛ bia ka kelom kɔ'ɔn tona be'em. Se'ere n sɔe la, Yenɛ naane n boe ba poan. Bala, a kan kelom kɔ'ɔn tona be'em. 10Wana wa n yelehe soŋa soŋa pa'ala sɛba n de Na'ayenɛ kɔma la sɛba n de Sagona la kɔma. Te se'em n ka tone sɛla n de ma'an, bii se'em n ka tare nɔŋerɛ bo ho tadaana, dagɛ Yenɛ bia. 11Ge yelehom la te ya wom pin'ileŋɔ poan ha la n wana: te to nɔŋɛ taaba. 12To da ana wo Kain se'em n lagom la be'emdaana la ge daa ko' a yebega Abel la. Te bene zuo n daa sɔe, te a daa ko' a yebega wa? La dela yelese'a te a daa tom la daa dagɛ ma'an, ge a yebega la n daa tom yelese'a la n de ma'an. 13Dene poan, n sɔɔnrɔ wa, da bahɛ ya te la eŋɛ ya pakerɛ teŋa wa zuo han yaɛ ya. 14Te to mi' te to ze'ele la kum poan lebe vom poan na. Ton nɔŋɛ to sɔɔnrɔ la zuo te to baŋɛ dena wa. Hon se'em n ka tare nɔŋerɛ kelom bɔna la kum poan. 15Hon se'em n yaɛ ho tadaana dela nɛrekoora. Ya mi' te nɛrekoora ka tare vom sebo n ka tare ba'ahegɔ Na'ayenɛ zen'en la. 16Wana wa n bahɛ te to mina nɔŋerɛ n de sɛla: Yesu Krista daa wa'ana tee ki' bo to. Tomam me sontii, to ki' bo to sɔɔnrɔ. 17Te nɛra han de'a bontata ge nyɛ' te a tadaana bɔta soŋorɛ te a zagahɛ ka soŋɛ en, a wan eŋɛ la wane ta'an yeti enŋa tare nɔŋerɛ bo Na'ayenɛ a suunre poan? 18Bala, n kɔma wa, da bahɛ ya te to nɔŋerɛ wa yenzuo kɔ'ɔn de'a la nɔɔrɛ ma'an. Ge la de'a yelemɛŋɛrɛ nɔŋerɛ ge eta dɛ yɛhera to tooma poan. 19Te dena wa n wan bahɛ te to baŋɛ te to boe la yelemɛŋɛrɛ zen'en la. Wana te to wan ta'an ze'ele Yenɛ nɛŋa la sunkanberɛ. 20Ge to han tɛn'ɛha te to tom la sɛla n ka ane soŋa, to mi' te Yenɛ gane to tɛn'ɛhegɔ ge mina sɛla woo. 21Bala, n zɔ'sonɔ wa, ton ka tɛn'ɛhere te to tom la sɛla n ka ane soŋa la, to yi sɛ' ze'ele soŋa soŋa Na'ayenɛ nɛŋa. 22Ge a bo'ore to sɛla woo te to sohɛ a zen'en. Se'ere n sɔe la, to nane a nɔɔrɛ la, ge eta sɛla n ete a suunre nyɛlom. 23N yeti to eta sɛla, la sɛla n wana: te to nam a Dayɔa Yesu Krista ge nɔŋɛ taaba wo a Dayɔa la n bo to a nɔɔrɛ la se'em la. 24Hon se'em n nane Yenɛ nɔɔrɛ bo mɛ la en, ge te enŋa me bɔna la hɔ. Te dena wa n bahɛ tɔ te to mina te Na'ayenɛ bo mɛ la tɔ. Se'ere n sɔe te to mina dena wa dela Sea la te a dekɛ bo to la zuo.


1 Zã 41Dene poan n zɔ'sonɔ wa, da kɔ'ɔn nam ya sɛba woo n yeti bama tare Sea la. Ge magahɛ ya ba behɛ nya sea la te ba tara la ze'ele la Na'ayenɛ zen'en na bii la ka ze'ele a zen'en na. Se'ere n sɔe la, nɔtɔgɔha ponpɔrɔŋdoma yerege mɛ bɔna zen'en woo. 2Sɛla n wan bahɛ te ya baŋɛ te la dela Yenɛ Sea, bii la dagɛ Yenɛ Sea dela dena wa: se'em woo n yeti Yesu Krista daa wa'an me na la asaala inŋ naanɛ, enŋa daana n tare Sea la te ka ze'ele Na'ayenɛ zen'en na la. 3Ge se'em n ka sakɛ te dena wa dela yelemɛŋɛrɛ, enŋa daana sea la ka ze'ele Na'ayenɛ zen'en na. Yesu Krista diŋdaana la n tom sea kana na. Ya pon wom te ka wan wa'ana. Te nananawa, kaŋa n bala n pon te'ele bɔna kalam teŋa wa zuo wa. 4N kɔma wa, yamam dela Yenɛ nɛreba. Ya pon nyaŋɛ nɔtɔgɔha ponpɔrɔŋdoma la. Se'ere n sɔe la, Sea sɛka n boe yamam poan la tare paŋa gana Sea sɛka n boe teŋa la zuo la. 5Nɔtɔgɔha ponpɔrɔŋdoma wa tɔgɔre la teŋa wa zuo yɛla. Te teŋa wa zuo nɛreba mɛ kɛlɛha ba. Se'ere n sɔe la ba dela teŋa wa zuo dene. 6Ge tomam dela Yenɛ nɛreba. Se'em n mi' Yenɛ, kelehere tomam mɛ. Ge se'em n dagɛ Yenɛ nɛra ka kelehere to. Te dena wa n bahɛ te to mina yɛhera nɛresɛba n tare Sea n de yelemɛŋɛrɛ, la nɛresɛba n tare sea sɛka n de ponpɔrɔma. 7Bala, n zɔ'sonɔ wa, bahɛ ya te to nɔŋɛ ya taaba. Se'ere n sɔe la, nɔŋerɛ ze'ele la Yenɛ zen'en na. Hon se'em n tare nɔŋerɛ dela Yenɛ bia, ge mina Yenɛ. 8Ge se'em n ka tare nɔŋerɛ ka mi' Yenɛ. Se'ere n sɔe la Yenɛ dela nɔŋerɛ. 9Yenɛ n daa pa'alɛ a nɔŋerɛ se'em n wana: a daa tom a Dayɔyeŋa teŋa wa zuo na. Te enŋa zuo te to wan tara vom. 10Dena wa n de sɛla n de nɔŋerɛ. La dagɛ la tomam nɔŋɛ Yenɛ. Ge la dela enŋa n nɔŋɛ tɔ ge tom a Dayɔa te enŋa zuo te to wan nyɛ' to yelebe'ero suguru. 11N zɔ'sonɔ wa, la han de'a Yenɛ n nɔŋɛ tɔ se'em n wana, la dela tomam mɛ nɔŋɛ taaba wo Yenɛ n nɔŋɛ to se'em la. 12Te nɛra se'em nan ka tabelɛ nyɛ' Yenɛ. Te to han nɔŋɛ taaba, Yenɛ boe la tɔ mɛ, ge te a nɔŋerɛ la bɔna la tɔ zo'e zo'e. 13Wana wa n bahɛ te to baŋɛ soŋa soŋa te to bo mɛ la Yenɛ ge te enŋa me bɔna la tɔ. Se'ere n sɔe la, a bo to a Sea la. 14Tomam mɛhe me nyɛ' ya ge yele nɛreba te to Sɔ' tom a Dayɔa te a de'a la teŋa wa zuo faanra. 15Hon se'em n yeti Yesu dela Yenɛ Dayɔa, Yenɛ boe la ho mɛ te hom me bɔna la en. 16Tomam mɛhe mi' ge nam nɔŋse'ere te Yenɛ tara bɔ'ɔra tɔ la. Te Yenɛ dela nɔŋerɛ. Hon se'em n boe la nɔŋerɛ, bo mɛ la Yenɛ ge te enŋa me bɔna la en. 17Te lan de se'em te to tara nɔŋerɛ wo Yenɛ n tare se'em la dela to ta'an sɛ' ze'ele soŋa soŋa Gankerɛ Daarɛ la. To me wan tara dɛ. Se'ere n sɔe la to bɔŋa teŋa wa zuo dela boyena la Yesu Krista n daa boe se'em la. 18Dabeem ka boe nɔŋerɛ poan, nɔŋerɛ zo'e zo'e sa'ahe la dabeem woo. Bala zuo la nɔŋerɛ ka zo'e dabeem daana zen'en. Se'ere n sɔe la se'em n tare dabeem nyɛte la namehegɔ. 19Tomam tare nɔŋerɛ, Yenɛ n nɔŋɛ to yia la zuo. 20Ge nɛra se'em han parom te enŋa nɔŋɛ Yenɛ ge yaɛ a tadaana, a dela ponpɔrɔma. Se'ere n sɔe la, a kan ta'an yeti enŋa nɔŋɛ Yenɛ se'em te a ka nyɛ' la a nini wa. Ge ton yaɛ a tadaana se'em te a nyɛ' la nini. 21Te Yesu Krista n bo to a nɔse'ere dela se'em woo n nɔŋɛ Yenɛ, dela a nɔŋɛ a tadaana.


1 Zã 51Hon se'em n nam te Yesu dela se'em te Yenɛ loe la dela Yenɛ bia. Te hon se'em n nɔŋɛ Sɔ' la, nɔŋɛ a bia la me mɛ. 2Sɛla n bahɛ te to mina te to nɔŋɛ Yenɛ kɔma, dela tomam nɔŋɛ Yenɛ ge nana a nɔɔrɛ la. 3To nɔŋɛ Yenɛ vɔnrɛ dela to nana a nɔɔrɛ la. A nɔɔrɛ la me te a dekɛ bo to la ka kpe'em bo to. 4Se'ere n sɔe la, se'em woo n de Yenɛ bia ta'an nyaŋɛ teŋa wa zuo yɛla. Te ton nam Yesu la zuo te to tana nyaŋera teŋa wa zuo yɛla la. 5Ge se'em ma'an n wan ta'an nyaŋɛ teŋa zuo yɛla la, dela se'emdaana n nam Yenɛ te Yesu dela a dayɔa. 6Yesu Krista ma'an n doohe ko'om soa la ziim ka'arɛ poan wa'ana. Dagɛ la ko'om la ma'an, ge ziim la ko'om zan'an. La dela Sea la n yele to dena wa. Se'ere n sɔe la Sea la dela yelemɛŋɛrɛdaana. 7La dela aseradoma batan' n yeti to dena wa, 8ge ba dela Yenɛ Sea la ko'om la ziim la. Batan' la me zan'an dela boyena. 9To sakere bɔ'ɔra saaleba n yeti sɛla mɛ. Ge Yenɛ n yeti sɛla la gane saaleba n yeti sɛla la mɛ. Enŋa Yenɛ n yele to a dayɔa wa yele. 10Bala, se'em woo n sakɛ bo Yenɛ Dayɔa la, tare yelehom bona wa mɛ ba suunre. Ge hon se'em n ka sakɛ bo Yenɛ dekɛ en yi' la ponpɔrɔma. Se'ere n sɔe la, a daana ka sakɛ sɛla te Yenɛ yɛta yɛhera a Dayɔa poan la. 11Yelehom la dela Na'ayenɛ bo to vom sebo n ka tare ba'ahegɔ. Vom wa me boe la a Dayɔa la zen'en. 12Te hon se'em n sakɛ bo Dayɔa wa tare vom wa mɛ. Ge hon se'em n ka sakɛ bo Yenɛ Dayɔa wa ka tare vom la. 13Ge n golehere dena wa bɔ'ɔra ya. Te yamam sɛba n sakɛ bo Yenɛ Dayɔa baŋɛ te ya tare vom sebo n ka tare ba'ahegɔ Na'ayenɛ zen'en la. 14To mi' te to han sohɛ sɛla woo a zen'en, to ka zote dabeem a nɛŋa. Sɛla te to sohɛ la han dɛna a sunboolom, a kelehere to. 15Te daanse'ere daarɛ woo te to sohɛ en sɛla, a kelehere to. Te ton mi' te dena wa dela yelemɛŋɛrɛ la, to mi' te a bo'ore to sɛla te to sohɛ a zen'en. 16Se'em han nyɛ' te a tadaana tom be'em ge te be'em la ka tare en yɛ'a kum poan, a daana sohɛ bo Yenɛ te a bo en vom sebo n ka tare ba'ahegɔ a zen'en la. N yele dena wa bo la sɛba yelebe'ero n ka tare ba yɛ'a kum poan la. Ge be'em bosebo bo mɛ tara kum kena na. Te la dagɛ la be'em bɔna wa taaba te n yeti ho sohɛ bo Na'ayenɛ. 17Te sɛla woo te ho tom te la ka ana soŋa dela be'em. Ge be'em bosebo bo mɛ ka tara kum kena na. 18Ge to mi' te Yenɛ kɔma kɔ'ɔn ka tona be'em daarɛ woo. Se'ere n sɔe la, Yenɛ Dayɔa la n behere ba te sɛla ka paara ba ge gura ba te be'emdaana la kan ta'an eŋɛ ba sɛla. 19To mi' te tomam dela Yenɛ dene, la teŋparɛ wa zan'an n pon bɔna be'emdaana la nu'uhen la. 20To mi' te Yenɛ Dayɔa la wa'ana bo to bɔkerɛ, te la to ta'an mina yelemɛŋɛrɛ Yenɛ la. Tomam boe me la yelemɛŋɛrɛ Yenɛ la a dayɔa Yesu Krista. Yenɛ dena wa n de yelemɛŋɛrɛdaana, te vom bona dɛna vom sebo n ka tare ba'ahegɔ la. 21Dene poan n kɔma wa, tara ya ya mɛhe soŋa soŋa, ge da dekɛ ya ya mɛhe bo baga.

http://www.bible.is/GURIBS/1John/1/D

Nenhum comentário:

Postar um comentário