quarta-feira, 3 de junho de 2015

1 John: Kapingamarangi

 
1 John 11Gimaadou e hihi adu gi goodou i di hai o Nnelekai o di mouli dela ne noho mai taamada loo. Gimaadou gu longono di maa, gu gidee. Uaa, gimaadou gu mmada, gu bili gi di maa. 2Di mouli deenei gu gila aga, ge gu mmada ginai gimaadou, gei gimaadou e haga modongoohia adu, gei e agoago adu gi goodou di mouli dee odi, dela gu i-baahi o Tamana, ge dela gu iloo gidaadou. 3Madau mee ne mmada ge ne hagalongo gi mee, aanei madau mee e hagi adu gi goodou, bolo goodou gi madalia gimaadou e buni ang gi God mo dana Dama go Jesus Christ. 4Gimaadou e hihi nia mee aanei, bolo gi dohu ai tadau tene. 5Gimaadou e agoago adu gi goodou di agoago deenei, dela gu longono ai gimaadou mai baahi o Tama a God, boloo: God la go di maalama, di bouli i dono baahi ai. 6Maa gidaadou ga helekai boloo, “Gidaadou e buni ang gi mee”, gei gidaadou e heehee hua i lodo di bouli, gei tadau helekai mo tadau hangaahai le e tilikai. 7Maa gidaadou ga heehee i lodo di maalama, gadoo be mee dela e noho i lodo di maalama, malaa, gidaadou gu buni ang gi mee, gei nia dodo o dana Dama go Jesus ga haga madammaa tadau huaidu huogodoo. 8Maa gidaadou ga helekai boloo, “Gidaadou tadau huaidu ai”, gidaadou le e bida halahalau hua gidaadou, gei di tonu hogi la hagalee i tadau baahi. 9Maa gidaadou ga hagi ang gi God tadau huaidu, gei mee ga haga gila aga dana hagababa, ga hai di mee dela e donu, ga haga madammaa tadau huaidu. 10Maa gidaadou ga helekai boloo, “Gidaadou tadau huaidu ne hai ai,” malaa, gidaadou e haga tilikai a God, ge ana helekai hogi la hagalee i tadau baahi. 


1 John 21Au e hihi adu gi goodou, agu dama hagaaloho, bolo goodou gi hudee hai di huaidu. Maa tangada ga hai di huaidu, gidaadou tadau Dangada Hagamaamaa i baahi o God, deenei go Jesus Christ, go mee dela e donu. 2Tigidaumaha o Christ la di mee dela e hui ai tadau huaidu, hagalee go tadau huaidu la hua, mo nia huaidu o nia daangada huogodoo. 3Maa gidaadou ga daudali nia haganoho a God, gidaadou e donu bolo gidaadou la gu iloo a mee. 4Maa tangada ga helekai boloo, “Au e iloo a mee”, geia hagalee hagagila aga nnaganoho a God, mee e hai kai tilikai, gei di tonu la hagalee i dono baahi. 5Maa tangada ga daudali ana helekai, deenei go mee dela gu dohu dono aloho i God, malaa, deenei di mee ga iloo gidaadou, bolo gidaadou gu buni ang gi God. 6Maa tangada ga helekai boloo, “Au e buni ang gi God”, geia gi mouli be di mouli o Jesus Christ. 7Ogu ihoo hagaaloho nei, taganoho deenei ne hihi adu gi goodou, hagalee taganoho hoou, gei taganoho namua dela gu lawa di iloo goodou mai taamada. Go taganoho namua dela gu agoago ai, ge gu longono ai goodou. 8Gei deeai, taganoho deenei dela e hihi adu gi goodou le e hoou, idimaa, ono donu la gu kila mai i baahi o Christ mo mai godou baahi. Di bouli le e maa gi daha, gei di maalama donu deelaa gu daamada gu maahina. 9Maa tangada ga helekai bolo ia e noho i lodo di maalama geia e hagadugineia dono duaahina, ia e noho hua i lodo di bouli ga dae mai loo gi dangi nei. 10Tangada dela e aloho i dono duaahina, deelaa tangada e noho i lodo di maalama, malaa di mee huaidu i dono baahi e hai ia gi huaidu ai. 11Tangada dela e hagadugineia dono duaahina, ia e noho hua i lodo di bouli, ge e heehee hua i lodo di bouli. E de iloo ia di gowaa dela belee hana ginai, idimaa, di bouli gu haga dee gida a mee. 12Au e hihi adu gi goodou, agu dama, idimaa, godou huaidu la gu lawa di maahede i di ingoo o Christ. 13Au e hihi adu gi goodou, nia damana, idimaa, goodou e iloo a mee dela nogo noho mai taamada. Au e hihi adu gi goodou, nia dama daane, idimaa, goodou ala gu haga bagege Tangada Huaidu. 14Au e hihi adu gi goodou, agu dama, idimaa, goodou ala gu iloo Tamana. Au e hihi adu gi goodou, nia damana, i di godou iloo a mee dela nogo noho mai taamada. Au e hihi adu gi goodou, nia dama daane, idimaa, goodou ala e maaloo. Nia helekai a God e noho i godou lodo, ge goodou gu haga magedaa Tangada Huaidu. 15Goodou hudee aloho i henuailala, be nia goloo o henuailala. Maa goodou ga aloho i henuailala, goodou hagalee aloho Tamana. 16Idimaa, nia mee huogodoo o henuailala, aanei la go di hiihai huaidu o tuaidina, mo nia mee o nia daangada e mmada ginai ga moinaa ai, mo nia mee huogodoo koia e hagapuu ai nia daangada, nia mee aanei huogodoo hagalee ne loomoi i baahi o Tamana, ne loomoi hua i henuailala. 17Henuailala mo ono mee huogodoo ala e hiihai ginai nia daangada, le e mmaa gi daha huogodoo, gei tangada dela e hai di manawa o God, le e mouli, ga hana hua beelaa. 18Agu dama nei, di madagoaa o di hagaodi la gu hoohoo mai. Goodou gu longono bolo di hagadaumee o Christ la ga hanimoi. Dolomeenei nia hagadaumee o Christ gu logowaahee, gu kila mai, ge gidaadou gu iloo bolo di hagaodi gi muli la gu hoohoo mai. 19Nia hagadilinga daangada ala beenei, la hagalee dau mai gi gidaadou, dela ne hula ai digaula gi daha. Maa nei bolo digaula ne dau mai gi gidaadou, digaula e buni mai gi gidaadou. Gei digaula gu hula gi daha mo gidaadou, e haga gila mai bolo ginaadou hagalee dau mai gi gidaadou. 20Goodou huogodoo gu kae di Hagataalunga Dabu a Christ dela ne gowadu gi goodou, malaa goodou gu iloo di tonu. 21Au hagalee hihi adu gi goodou, idimaa goodou e de iloo nia mee ala e donu. Au e hihi adu idimaa goodou gu iloo hua di tonu, gei goodou gu iloo bolo nia dilikai hagalee ne lloomoi i di tonu. 22Malaa koai dela e tilikai? Deenei go tangada dela e helekai, “Jesus hagalee go Christ.” Malaa tangada deenei la di hagadaumee ni Christ, gei tangada dela e haga de iloo ia Tamana mo Tama. 23Tangada dela ga haga de iloo ia di Tama, geia e haga de iloo ia labelaa Tamana. Gei tangada dela e hagadonu di Tama, geia e hagadonu labelaa Tamana. 24Hagamahi hagamau dangihi ina godou lodo gi nia agoago ala gu longono ai goodou mai taamada. Maa nia agoago aanei ga mau dangihi i godou lodo, gei godou mouli ga buni ang gi di Tama mo Tamana i nia madagoaa huogodoo. 25Di mee a Christ ne hagababa mai gi gidaadou, la go di mouli dee odi. 26Au e hihi adu gi goodou nia mee aanei i di hai o digau ala e hagamada belee halahalau goodou. 27Gei Christ hagauda dana Hagataalunga Dabu adu gi goodou. Di noho hua dana Hagataalunga Dabu i godou lodo, gei goodou hagalee bolo goodou e hai gi kabe godou mee mai tangada, idimaa, di Hagataalunga Dabu e agoago adu gi goodou di hai o nia mee huogodoo, mo di agoago adu gi goodou nia mee koia e donu, hagalee dilikai. Malaa goodou la gi hagalongo gi nia agoago di Hagataalunga, gei gi mau dangihi ang gi Christ. 28Agu dama nei, goodou gi noho hua belaa i di hagadaubuni ang gi mee i dono madagoaa dela ma ga hanimoi ai, gei gidaadou e maaloo dangihi huoloo, hagalee pala hagammuni, be e langaadia i ono mua i di laangi deelaa. 29Goodou gu iloo bolo Christ le e donu. Goodou gi iloo labelaa bolo digau huogodoo ala e hai nia mee donu, gu hai nia dama ni God.

1 John 31Goodou mmada gi tamanaiee o di aloho o Tamana mai gi gidaadou. Dono aloho e damanaiee huoloo, ga hidi ai gidaadou ga mee di haga ingoo bolo nia dama ni God, deenei le e donu! Dela di mee ne hidi ai digau henuailala e de iloo gidaadou, idimaa, digaula e de iloo a God. 2Ogu ihoo hagaaloho nei, dolomeenei gidaadou gu hai nia dama ni God, gei digi modongoohia loo be gidaadou ga hai behee. Malaa, deenei di mee gu iloo gidaadou bolo di madagoaa o Christ dela ma ga hanimoi ai, gei gidaadou ga hai gadoo be mee, idimaa, gidaadou ga mmada donu hua gi mee. 3Tangada ma ga hagadagadagagee gi Christ beenei, geia gi bida haga madammaa ina ia gi hai gadoo be di madammaa o Christ. 4Tangada dela e hai di huaidu, geia e hai baahi gi nia haganoho a God, idimaa, go di huaidu dela e hai baahi gi nia haganoho. 5Goodou gu iloo bolo Christ ne hanimoi belee daa gi daha tadau huaidu, gei mee ono huaidu ai. 6Tangada ma ga buni ang gi Christ, la hagalee noho loo i lodo di huaidu. Tangada dela hua e noho i lodo di huaidu, la digi gidee ia a Christ, ge hagalee e iloo ia a mee. 7Nia dama nei, goodou hudee dumaalia ang gi tangada gi halahalau ina goodou. Maa tangada ga hai nia mee donu, deelaa tangada e donu, gadoo be Christ dela koia e donu. 8Tangada dela e noho i lodo di huaidu, ia tama ni Satan, idimaa, Satan nogo haihai nia huaidu mai loo i taamada. Gei Tama a God ga hanimoi, dono hadinga bolo e hunahuna nia hegau a Satan. 9Nia dama a God la hagalee noho i lodo di huaidu, idimaa, di mouli o God la gu noho i nadau lodo. God go di nadau Damana, gei digaula deemee di haihai di huaidu. 10Di hai geegee nia dama a God mo nia dama a Satan, bolo tangada dela hagalee hai nia mee ala e donu ge hagalee e aloho i nia daangada, ia hagalee di tama ni God. 11Deenei di agoago gu longono ai goodou mai taamada, bolo gidaadou e hai gi hagadau aaloho. 12Gidaadou hudee hai be Cain dela ne dau gi Satan, dela ne daaligi dono duaahina daane go Abel. Cain la ne aha dela ga daaligi dono duaahina? Idimaa, ana hangaahaihai le e hala, gei nia hangaahaihai o dono duaahina le e donu. 13Ogu duaahina nei, goodou hudee homouli maa digau henuailala ga hagadugina e-ginaadou i goodou. 14Gidaadou gu iloo bolo gidaadou gu tanga gi daha mo di made ang gi di mouli, idimaa, gidaadou e aloho i tadau duaahina. Maa tangada dono aloho ai, ia e noho hua i lala nia mogobuna o di made. 15Tangada dela ga dee hiihai gi tangada dela i golo, la tangada daaligi dangada. Goodou gu iloo bolo tangada daaligi dangada le e deemee di hai mee gi di mouli dee odi. 16Deenei di mee ga iloo gidaadou be di aloho la di aha: Christ gu dugu anga dono mouli i gidaadou, gei gidaadou gi dugua anga labelaa tadau mouli i tadau duaahina daumaha! 17Maa tangada maluagina ga gidee ia dono duaahina e haingadaa ang gi deia, gei mee hagalee e aloho i mee, malaa dehee dana hai bolo ia e aloho i God? 18Agu dama nei, tadau aloho hudee heia hua gi nia helekai. Gi heia i di aloho e donu dela e modongoohia mai i lodo tadau hangaahai. 19Deenei di mee ga iloo gidaadou bolo gidaadou digau ni di tonu, ga hai tadau manawa gi donu i di aumaalia i mua o God. 20Maa tadau manawa le e hagahuaidu gidaadou, gei gidaadou e iloo bolo God koia e aamua i tadau manawa, e iloo ia nia mee huogodoo. 21Ogu ihoo hagaaloho, maa tadau manawa la hagalee hagahuaidu gidaadou, gei gidaadou gu tuu maaloo i mua o God. 22Gidaadou e hai mee gi nia mee huogodoo ala e tangi ai gidaadou gi mee, i tadau hagalongo gi ana haganoho mo di hai nia mee ala e haga tentene dono manawa. 23Deenei dana haganoho bolo gidaadou gi hagadonu ina di ingoo o dana Dama daane go Jesus Christ, mo di hagadau aaloho be dana hai dela gu haga noho mai gi gidaadou. 24Tangada dela e daudali nia haganoho a God, le e noho i baahi o God, gei God le e noho labelaa i dono baahi. Gei deenei di hai dela e iloo ai gidaadou bolo God le e noho i tadau baahi, idimaa, mee ne dugu mai dono Hagataalunga gi gidaadou.


1 John 41Ogu ihoo hagaaloho nei, hudee hagadonu ina digau huogodoo ala e helekai bolo di Hagataalunga Dabu le e noho i nadau baahi. Goodou hagadina be di hagataalunga dela i baahi digaula la go di Hagataalunga ne hanimoi i baahi o God, idimaa, e logo nia soukohp dilikai gu hula gi nia madagoaa huogodoo i henuailala. 2Deenei di godou mee ga iloo ai be di maa go di Hagataalunga o God: Go tangada dela e hai bolo Jesus Christ gu hai tangada, deenei go mee e hai mee gi di Hagataalunga dela ne hanimoi i baahi o God. 3Tangada ga haga de iloo nia mee aanei i di hai o Jesus, geia dono hagataalunga mai baahi o God ai. Gei di hagataalunga dela i baahi o mee la ne hanimoi i baahi di hagadaumee o Christ, dela gu longono goodou bolo ga hanimoi, gei deelaa gu hanimoi, gei mee gu i henuailala dolomeenei. 4Agu dama hagaaloho nei ala go nia dama a God, goodou gu haga paagege nia soukohp dilikai, idimaa, di Hagataalunga dela e noho i godou lodo, la koia e mogobuna i di hagataalunga dela i lodo digau ala e dau gi henuailala. 5Nia soukohp dilikai e leelee hua nia mee o henuailala, gei digau henuailala e hagalongo gi digaula, idimaa, digaula digau ni henuailala. 6Gidaadou nia dama ni God. Tangada ma ga iloo ia God, geia e longono ia gidaadou. Tangada dela hagalee tama ni God, geia hagalee longono ia gidaadou. Deenei di mee ga iloo gidaadou di hai geegee mehanga di Hagataalunga o di tonu, mo di hagataalunga tilikai. 7Ogu ihoo hagaaloho nei, gidaadou gi hagadau aaloho, idimaa, di aloho ne daamada mai baahi o God. Tangada dela e aloho, ia di tama ni God, e iloo a God. 8Tangada dela dono aloho ai, la e de iloo ia God, idimaa, God go di aloho. 9Deenei di hai a God ne haga modongoohia mai dono aloho gi gidaadou: Mee ne hagau mai dana Dama hua e-dahi gi henuailala, bolo gi mouli ai gidaadou. 10Deenei di hai o di aloho: hagalee go gidaadou ne daamada ne aloho i God, go mee ne daamada ne aloho i gidaadou, ne hagau mai dana Dama belee hai ai tigidaumaha e hui tadau huaidu. 11Ogu ihoo hagaaloho nei, maa deenei di hai o di aloho God i gidaadou, gidaadou gi hagadaubuni i di aloho. 12Tangada ne gidee a God ai, maa gidaadou ga hagadaubuni i di aloho, gei God e noho i tadau lodo, dono aloho e honu humalia i tadau lodo. 13Gei gidaadou ga iloo bolo gidaadou e noho i baahi o God, gei mee e noho i tadau lodo, idimaa, God gu dugu mai dono Hagataalunga gi gidaadou. 14Gidaadou gu gidee, e hagi ang gi digau ala i golo, bolo Tamana la gu hagau mai dana Dama, belee hai Tangada Hagamouli ni henuailala. 15Tangada dela ma ga haga modongoohia bolo Jesus la go Tama a God, gei God ga noho i ono lodo, gei mee e buni ang gi God. 16Gidaadou gu iloo, gu hagadonu di aloho God i gidaadou. God go di aloho. Tangada ma ga mouli i di aloho, geia e buni ang gi God, gei God e noho i ono lodo. 17Deenei tadinga o di aloho gi honu humalia i tadau lodo, bolo gi dee mmaadagu gidaadou i di Laangi Hagi aga, idimaa, tadau mouli i henuailala e mouli be Christ. 18Di madagu i lodo di aloho ai, di aloho dogomaalia le e hagabagi nia mmaadagu huogodoo. Deenei laa, di aloho la hagalee dogomaalia i baahi digau mmaadagu, idimaa, di madagu di mee ni di hagaduadua. 19Gidaadou e aloho, idimaa, God ne daamada ne aloho i gidaadou. 20Maa tangada ga helekai, “Au e aloho i God”, gei mee e de hiihai gi dono duaahina, malaa, mee tangada hai kai tilikai. Tangada e deemee di aloho i God dela e de gidee ia, maa ia hagalee e aloho i dono duaahina dela e gidee ia. 21Deenei taganoho a Christ dela ne gaamai gi gidaadou: Be goai hua dela e aloho i God, geia gi aloho labelaa i dono duaahina!


1 John 51Be koai hua dela e hagadonu bolo Jesus la go di Mesaia, geia di tama ni God. Ma koai dela e aloho i Tamana, geia e aloho labelaa i Tama. 2Deenei di hai ga iloo bolo gidaadou e aloho i nia dama a God: gidaadou e aloho i God ge e hagalongo gi ana haganoho. 3Di aloho i God la go tadau daudali ana haganoho. Ana haganoho la hagalee haingadaa. 4Idimaa, nia dama a God huogodoo e mee di haga bagege henuailala. Gei gidaadou e haga bagege henuailala gi tadau hagadonu. 5Ma koai dela e mee di haga bagege henuailala? Go tangada hua dela e hagadonu a Jesus, bolo mee Tama a God. 6Jesus Christ go Tama a God ne hanimoi e haga modongoohia go nia wai o dono babdais mo di hali ono dodo . Hagalee go nia wai la hua, nia wai mo ono dodo. Di Hagataalunga Dabu e haga modongoohia di mee deenei, bolo e donu, idimaa, di Hagataalunga le e donu. 7Nia hagadootonu o Jesus la nia mee e dolu: 8di Hagataalunga, nia wai, mo nia dodo. Nia mee e dolu aanei e haga modongoohia di mee e dahi. 9Gidaadou e hagadonu nia haga modongoohia mai baahi nia daangada, gei nia haga modongoohia a God ne gaamai gi gidaadou la koia e llauehe, idimaa, di haga modongoohia a God la i di gili dana Dama. 10Tangada ma ga hagadonu Tama a God, gei di haga modongoohia deenei la i ono lodo. Gei tangada dela hagalee hagadonu a God, geia ne haga tilikai a God, idimaa, ia hagalee hagadonu di haga modongoohia a God ne hai i di gili dana Dama. 11Di haga modongoohia la deenei: God gu gaamai di mouli dee odi, gei di mouli deenei la i baahi dana Dama. 12Maa tangada e hai mee gi Tama, geia e hai mee gi di mouli deenei. Maa tangada hagalee hai mee gi Tama a God, geia hagalee hai mee gi di mouli. 13Au e hihi adu gi goodou ala gu hagadonu di ingoo Tama a God, bolo gi iloo goodou bolo goodou e hai mee gi di mouli dee odi. 14Dela tadau mee ga dee mmaadagu gidaadou i mua o God, idimaa, gidaadou e hagadonu bolo mee e longono tadau dangidangi, maa gidaadou ga tangi anga be dana hiihai. 15Maa gidaadou ga hagadonu bolo mee e longono tadau dangidangi i nia mee huogodoo, gei gidaadou ga iloo labelaa bolo mee e dugu mai gi gidaadou tadau mee ala e tangi ai. 16Maa tangada ga mmada gi dono duaahina e hai di huaidu dela hagalee hidi ai di made, geia gi dalodalo ang gi God, gi dugu ang gi mee di mouli. Di mee deenei ang gi digau nadau huaidu i golo, gei nia huaidu aalaa ga hagalee hidi ai di made. Gei di maa di huaidu i golo dela e hidi ai di made, gei au hagalee hai adu gi goodou bolo goodou gi dalodalo ina ang gi God i di huaidu deelaa. 17Nia haihai hala huogodoo la nia huaidu, gei di maa di huaidu i golo hagalee hidi ai di made. 18Gidaadou gu iloo bolo tangada dela gu hai di tama ni God, la hagalee haihai di huaidu, idimaa, Tama a God e madamada humalia i mee, gei di huaidu e deemee di tale gi mee. 19Gidaadou gu iloo bolo gidaadou nia dama ni God, maeaha maa henuailala hagatau la gu i-lala nia mogobuna o di huaidu. 20Gidaadou gu iloo bolo di Tama a God la ne hanimoi, ne hai gidaadou gi iloo nia mee, bolo gidaadou gi iloo di God e donu. Gidaadou gu hagadaubuni ang gi di God e donu, i tadau mouli hagadaubuni gi dana Dama go Jesus Christ. Deenei di God donu, ge deenei di mouli dee odi. 21Agu dama nei, goodou haga mogowaa ina goodou gi daha mo nia balu god tilikai!

  http://www.bible.is/KPGKTC/1John/1/D

Nenhum comentário:

Postar um comentário