terça-feira, 23 de junho de 2015

1 JUAN: POKOMCHI, WESTERN


 
1 JUAN 11Re' hin ma' Wa̱n re' c'ahchi' nitz'ihminic reh hu̱j wili nanik'oric chiri̱j i Sakomonel Wach riNo'jbal i Dios keh hoj c'acharel eh aj Ye'ol wo' reh Junelic C'acharic. Re' aj Sakomonel re're' xa wilic wo' cho nok cu ja' nch'ihquic ta cho wach ac'al. Naxchalic ayu' wach ac'al, re' hin ch'i̱l take wich nahsil raj tahkanel i Sakomonel Wach riNo'jbal i Dios, xkilow wach eh xkabiraj wo' naxiban take c'uhbalanic. Je' re' ajic chi'nchel nic' pa' nimal xiban ribanaric i Sakomonel Wach riNo'jbal i Dios queh tinamit, re' hoj til xkilow chi coric take eh ma' xa ta re're' xkilow je' la' wo' naxuctic cho chi quixilac take camnak, xkatz'a'j wo' ro̱k rik'ab. 2Chaj wa'ric nok c'ahchi' nitz'ihmbam aweh tak i wili? C'ahchi' la' nitz'ihmbam ru'um chi re' hin ch'i̱l take wich nahsil raj tahkanel nka̱j chi naweht'alij tak chi re' Dios naxitak'a̱' cho ayu' wach ac'al i aj Ye'ol reh Junelic C'acharic, xiban cho chi je' re' reh chi re' hoj c'acharel nakilom wach ru'. Re' hoj til xkilow wach i aj Ye'ol reh Junelic C'acharic re're' eh ru'um re' yu'na nkayew kachi̱' chiri̱j i ricorquil chi re' Dios xtak'anic cho reh. Ru'um aj re' nankak'or aweh tak i k'oric chiri̱j i junelic c'acharic xye'eric chic keh, nkak'or wo' aweh tak chi je' wili hat-tak aj niminel: Coric, re' Ye'ol reh Junelic C'acharic keh hoj c'acharel xa wilic wo' nak cho ru̱c' Ajabe̱s Dios xa re' la' re' hin ch'i̱l take wich nahsil aj tahkanel reh Ye'ol reh Junelic C'acharic re're', til xkilow wach chi c'acharic china̱ ac'al wili naxtak'abjic cho. 3Je' aj re' k'uru' re' kilom cho ch'i̱l kabiram cho ru̱c' aj Ye'ol reh Junelic C'acharic, re' wo' re' c'ahchi' kak'orom ribiral aweh yu'na i hat-tak aj niminel reh chi je' re', re' hat-tak eriban xa jenaj wach ac'ux tak ku̱c' i hoj chi rik'ormojic ribiral i Jesus re' aj Ye'ol reh Junelic C'acharic je' ricab nankak'or i c'uhbal chiri̱j ru', til riban xa jenaj chic wach kac'ux ru̱c' Ajabe̱s Dios ch'i̱l wo' i Jesus re' Lok' laj rAc'u̱n re' Pahbamaj chi K'atal K'oric. 4Je' re' ajic ru̱c' take c'ahchi' nik'orom wili re' ta nak re're' enbanic chi enchalic rinimal risukquil ac'ux tak eh chi je' re' enponic pan awa̱mna tak i riholonquilal take k'oric c'ahchi' nitz'ihmbam je aweh tak. 5Nok re' Jesus xwih'ic ayu' wach ac'al, xkabiraj cho ru̱c' chi̱' jenaj tijbal re' kap'utum chic cho rik'ormojic aweh tak wich'i̱l take wich nahsil aj tahkanel eh yu'na nakak'orom wo' chic aweh tak. Je' aj wili rik'or i tijbal re're': «Re' Dios, xa je' na ricab jeno' sakom nok wilic cho chi kana̱ eh je' ricab nok re' sakom ma' nwih'ic ta so' k'ekom ru̱c' je' wo' re' i Dios ma' nmahcanic ta so' xa re' la' i coric riban ribanaric, nqui rik'or. 6Ru'um chi je' re' rik'or i c'uhbal re're' wilic take c'acharel nquik'or aweh tak chi je' wili: «Re' hoj wilco̱j pan jenaj wach c'uxlis ch'i̱l i Dios. Ru'um aj re' ma' re' ta k'orel to̱b ta pa rik'ekomil i mahc c'acharic nka'n, nqui nquik'or. Re' take c'acharel re're' ma' coric ta laj k'oric c'ahchi' quik'orom, ma' wo' c'ahchi' ta quic'acharic so' je' ricab rik'or i coric laj tijbal c'uhtumaj ru'um Jesus. 7Tz'a̱b ru', wi xa kojc'acharic wo' pan coric je' ricab riwi̱' ric'acharic i Dios chi xa re' wo' i coric riban ribanaric ra̱j rik'orom chi til wilco̱j wo' pan jenaj wach c'uxlis quich'i̱l take kas kacha̱k' je' wo' ru̱c' i Dios eh ru'um re', wi xojmahcanic chi quiwach i kas kacha̱k' on chiwach i Dios, re're' ericuy kamahc wi xkapahkaj reh chi naricuyum kamahc. Ru'um aj wo' re', re' kAja̱w Jesus re' rAc'u̱n i Dios re' Pahbamaj wo' chi K'atal K'oric, xquimic reh chi re' hoj ekojcahnic chi ma'xta chic kamahc chiwach i Dios. 8Yu'na kak'or wi wilic jeno' c'acharel pa rik'ekomil i mahc c'acharic riban eh to̱b ta je' re' riwi̱' ric'acharic cu rik'or chi re're' ma'xta nech' ok rimahc. Til nik'or chi re' c'acharel re're' xa re' wo' re' rijot' ri̱b ru̱c' chucuj k'oric riban. Ma' xa re' ta re' riban c'acharel re're', je' la' wo' ma' c'ahchi' ta ribanam je' ricab rik'or i coric laj tijbal. 9Je' re' k'uru' wi re' hoj xojmahcanic kak'or wo' tak johtok reh i Dios chi re' hoj, hoj aj mahc chiwach maj wi je' re' nka'n re' Dios re' til riban chi nmanlajic wach take rik'orom cho eh re' xa coric wo' nbanic, re're' ericuy take cho kamahc eh chi je' re', riban chi re' hoj kojcahnic chi ma'xta c'ahbilal pan ka̱mna. 10Je' aj re' k'uru' was tak nicha̱k' aj niminel, nok xa hab wach jeno' xmahcanic rik'or chi ma' xiban ta nech' ok mahc, re're' xa c'ahchi' ricojom i Dios chi aj chucul k'oric eh nik'or chi je' re' maj re' wo' Dios nk'oric chi re're' wilic pan mahc. Je' wo' chic, re' c'acharel re're' ru'um chi ma' rik'or ta johtok chi aj mahc chiwach i Dios ric'uhtaj lok chi ma' c'ahchi' ta ric'amam na̱ riC'uhbal i Dios. 


1 JUAN 21Was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, c'ahchi' nitz'ihmbam je aweh tak take k'oric re' cu re' xnik'or lok wili chi ma' eta nacoj tak cho mahc pan ac'acharic tak. Re' cok ru' wi hab wach ok nchel aweh tak xmahcanic, cheht'alij chi chiwach i Ajabe̱s Dios wilic jenaj kaj to'o̱l re' nk'oric chiki̱j chiri̱j i kamahc. Re' kaj to'o̱l re're', re' i Jesus re' Pahbamaj chi K'atal K'oric. Ru'um chi re're' til manlic coric wach ric'ux, til nbirmijic ru'um i Dios. 2Je' wo' chic ru'um chi re' Jesus xik'ahsaj ri̱b pan quimic chiki̱j je' ricab nok jenaj si̱ nk'ahsjic chi tojbal ri̱j kamahc, re' Dios nchol ricuyuric chi'nchel kamahc. Ma' xa re' ta kamahc i hoj je' la' wo' quimahc chi'nchel c'acharel china̱ ac'al wili. 3Re' hoj re' nkak'or chi keht'alim chic rino'jbal i Dios kac'am tak na̱ chi'nchel haj wilic rik'or riC'uhbal chi naka'nam maj re' til nc'uhtunic lok wi̱' chi re' hoj keht'alim chic rino'jbal i Dios, re' chi re' hoj nkac'am na̱ haj wilic i tak'anic riban keh ru̱c' riC'uhbal. 4Je' re' nok wi hab wach rik'or chi re're' reht'alim rino'jbal i Jesus eh ma' ric'am ta na̱ chi'nchel haj wilic rik'or riC'uhbal i Dios chi naribanaric, re' aj k'orol re're' ncahnic chi xa aj chucul k'oric. Ru̱c' re're' ma' c'ahchi' ta wo' ribanam je' ricab rik'or i coric laj c'uhbal. 5Je' wo' chic riban chi enk'ormojic chiri̱j chi re're' ma' ric'ax ta take rich c'acharel. Raj nchel hab wach ric'am na̱ haj wilic rik'or ritijbal i Jesus, til pan coric je' wili nc'uluric ru̱c': Re' ric'axbal i Dios nq'uihic wach pa ra̱mna cu rehtal re' c'acharel re're' ric'ax take rich c'acharel ru̱c' chi'nchel ric'ux. Je' aj re' ru' ru̱c' ric'amaric na̱ ritijbal i Jesus, re' hoj kojchol quic'axaric take kich c'acharel eh chi je' re' nkeht'alij chi wilco̱j pan jenaj chic wach c'uxlis ch'i̱l i kAja̱w Jesus. 6Je' re' nik'or maj wi re' hoj nkak'or chi c'acharic nka'n chi ri'sil ro̱k k'ab i Jesus, ra̱j rik'orom chi nakac'acharic ru̱c' rino'jbal je' ricab xc'acharic wi̱' i Jesus. 7Was tak nicha̱k' aj niminel reh Jesus, re' k'oric chiri̱j c'axoj i̱b ma' re' ta nchel jeno' chic ac' laj tijbal, xa re' la' wo' i tijbal xap'ut tak cho ribirmijic pan p'utbal cho reh animinic tak. Je' re' k'uru' re' c'uhbal c'ahchi' nitz'ihmbam je aweh tak xa re' wo' i najtir chic ap'utum tak cho ribirmijic eh ma' toco̱m ta chic. 8Re' cok ru', ru̱c' i k'oric chiri̱j i c'axoj i̱b c'ahchi' nitz'ihmbam je aweh tak nelic lok wach sakom i jenaj chic ac' c'uhbal re' rik'or chi til nic' pa' wach coric chi re' kAja̱w Jesus xa nsakomonic chic pa̱m i ra̱mna reh holonquilal laj no'jbal je' ricab nok jeno' sakombal xa nch'abch'atic chic risakomil. Til coric wo' chi re' c'ahbilal c'ahchi' chic resmejic lok pan ca̱mna take c'acharel je' ricab c'ahchi' ric'uhtunic lok chipam ac'acharic hat-tak. 9Ru'um aj re', hab wach nk'oric chi wilic pan jenaj wach c'uxlis ch'i̱l i Dios je' wo' quich'i̱l take quiniminic reh eh wi xa cu rixowej wo' wach i rich aj niminel, re' c'acharel re're' xa cu pan k'ekom laj no'jbal wo' c'acharic riban. 10Raj hab wach ric'ax i rich aj niminel, re're' xa c'acharic wo' riban pan jenaj wach c'uxlis ch'i̱l i Dios je' wo' quich'i̱l take quiniminic reh eh chi je' re' ma'xta bih enk'ehbic wi̱' pan mahc. 11Re' aj re' riwi̱' k'uru' chi nik'or je aweh tak chi xa hab wach rixowej wach i rich aj niminel xa cu pan k'ekom laj no'jbal wo' c'acharic riban. Ru'um chi ma' rirak ta chic chiri̱j jaruj enkajic pan mahc chi xa ma'xta pa ric'ux ru'um chi k'ekomsamaj chic wach ricapew-bal, re' c'acharel re're' no̱j riban chi je' ricab jenaj sot' ma' reht'alim ta wo' haj narimolom je ru'um chi ma' nilbic ta. 12Was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, c'ahchi' nitz'ihmbam je aweh tak i wili reh chi na̱tikim tak ju' rich'iquinjic ac'ux tak chiri̱j i Jesus. Re're' wilic rajawric chi narik'oric chiki̱j chiwach Ajabe̱s Dios eh ru'um re're' na nk'oric chawi̱j tak, re' hat-tak cuyu̱j chic amahc tak. 13Je' wo' c'ahchi' nitz'ihmbam je wili queh take c'amol be̱h chaxilac tak re' je' quicab tutbe̱s ajabe̱s chana̱ tak pan niminic. Re' take re' queht'alim chic rino'jbal i Jesus chi manlic re' xa c'achlic wo' cho nok ja' nch'ihquic ta cho wach ac'al. Re' hin c'ahchi' wo' nitz'ihmbam je i wili aweh hat-tak caj to'bonel take c'amol be̱h re' je' acab tak take q'uijolak ch'i̱l k'ahxokak chi cu cow co̱k quik'ab. Je' re' nik'or maj re' hat-tak xayak'abej chic pan awo̱k tak i rajawric aj Yahm re' banol reh c'ahbilal. Je' aj re' ru' chawunchelal hat-tak wich aj niminel, c'ahchi' nitz'ihmbam je aweh tak i wili ru'um nok re' hat-tak aweht'alim tak chic rino'jbal i Ajabe̱s Dios. 14Re' hat-tak aj c'amol be̱h re' je' quicab tutbe̱s ajabe̱s chi quina̱ take aj niminel, c'ahchi' nitz'ihmbam je aweh tak i tijbal wili chiri̱j c'axoj i̱b ru'um nok aweht'alim tak chic rino'jbal i Jesus chi manlic re' xa c'achlic wo' cho nok ja' nch'ihquic ta cho wach ac'al. Was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, re' je' acab tak take q'uijolak ch'i̱l take k'ahxokak chi cu cow co̱k quik'ab, c'ahchi' nitz'ihmbam je aweh tak i c'uhbal wili ru'um nok cu yu'na chi k'i̱j c'ahchi' ac'amam tak na̱ riC'uhbal i Dios eh xayak'abej pan awo̱k tak rajawric aj Yahm re' banol reh c'ahbilal. 15Ch'i̱l take k'oric c'ahchi' nitz'ihmbam je aweh tak, nik'or wo' je aweh tak i wili: Ma̱yew tak chic ac'ux chiri̱j i c'ahbil laj no'jbal nbanaric china̱ ac'al wili, ma' wo' chiri̱j nca'n take i c'ahbil laj c'acharel wilic ayu' wach ac'al ma' holohic ta laj aj k'orol take. Wi hab wach riyew ric'ux chiri̱j ru' ra̱j rik'orom chi re' c'axoj i̱b nchalic ru̱c' Ajabe̱s Dios ma' ja'xta ru̱c'. 16Nik'or chi je' re' maj nic' pa' nimal nca'n take c'ahbil laj c'acharel wilque̱b ayu' wach ac'al, je' ricab i c'ahbilal nquic'ax wach ribanaric nanquilow i ma' holohic ta c'ahchi' ribanaric chi quiwach, on re' ye'o̱j c'uxlis chiri̱j i mahc npok' cho pan ca̱mna ch'i̱l i nimsinic wachi̱s ru̱c' take pa' bih nwih'ic reh pa ric'acharic, chi'nchel re're' ma' re' ta Dios ncojbic pan ca̱mna ribanaric, pan ca̱mna la' take c'ahbil laj c'acharel wilque̱b china̱ ac'al wili npok' cho. 17Chaj wa'ric ma' eta riban chi enkayew kac'ux chiri̱j quino'jbal take c'ahbil laj c'acharel? Ma'eta riban maj je' ricab chi re' ac'al wili tiklic cho wach i k'i̱j chi narisahchic wach, je' wo' re' take nquiyew quic'ux chiri̱j quino'jbal take c'ahbil laj c'acharel narisacharic wo' quiwach. Nik'or chi je' re' maj chi'nchel re're' ch'i̱l i ric'axaric wach take xa pa' bih wilic china̱, xa iq'ue̱l wo' take raj la' take nquiyew quic'ux chi ribanaric i ra̱j i Dios re' take re' ma'xta risahchic quiwach til la' naquic'amaric je chipam i junelic c'acharic. 18Was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, ru'um chi xabiraj tak chic chi nac'olok lok i k'etol wach rik'orbal i Jesus ra̱j rik'orom chi wilco̱j chic chipam take cohlsbal wach k'i̱j, re' wili nanik'orom aweh tak yu'na: Re' hoj wilco̱j chic chipam take cohlsbal wach k'i̱j k'oro̱j cho re're'. Nic' wo' wach nakeht'alij chi wilco̱j chic chipam take cohlsbal wach k'i̱j re're'? Keht'alim ru'um nok yohbal wach take aj k'etol wach rik'orbal i Jesus p'uht chic cuctic cho chaxilac tak. 19Re' take aj k'etol wach rik'orbal i Jesus re're', chi xilac wo' nak acomonil tak wilque̱b xa re' la' ru'um chi ma' coric ta wo' quiwach chi kich raj tahkanel i Jesus take ru'um i re' xi'elic je chaxilac tak. Nic' wach naxkeht'alij chi ma' coric ta queh niminic chaxilac tak? Xkeht'alij ru'um nok yu'na re' take re' ma' wilque̱b ta chic chipam i kacomonil i hoj raj tahkanel i Jesus. Raj la' wili xye'eric k'ab queh ru'um i Dios chi xi'elic je chaxilac tak c'uhtbal reh chi chi'nchel take nic' nimal xi'elic lok re're' ma' re' ta kich aj niminel reh Jesus take chi coric 20ru'um chi xquicoj wach i ma' coric ta laj c'uhtunic. Raj awu̱c' hat-tak ma' je' ta re' maj re' hat-tak ye'o̱j chic aweh tak i Lok' laj rUxlabal i Dios ru'um reh Lok' laj Ajabe̱s Jesus eh chi je' re' naweht'alij tak chic chi ma' re' ta i coric laj tijinic c'ahchi' ric'uhtjic aweh tak cu'um take aj chucuj aj c'uhbalanel. 21Ru'um aj re', re' hin c'ahchi' nitz'ihmbam je aweh tak i hu̱j wili maj re' hat-tak ma' je' ta acab tak take ma' nqueht'alij ta na nc'uhtjic queh i coric laj tijinic. Je' wo' chic c'ahchi' nitz'ihmbam je aweh tak chi je' re' maj re' hat-tak aweht'alim tak chi re' chucuj k'oric ma' re' ta ru̱c' i Dios nchalic ribanaric maj ru̱c' i Dios xa re' wach i coric wilic ru̱c'! 22Nic' wach nakeht'alij nok c'ahchi' kabiram jeno' aj chucul k'oric? Re' hoj nkeht'alij ru' nok jeno' c'acharel rik'or chi ma' coric ta chi re' Jesus re' i Pahbamaj chi K'atal K'oric eh ru̱c' re're' ma' ricoj ta ru̱c' ra̱mna i tijbal rik'or chi re' Dios, re're' rAja̱w i Jesus eh chi re' Jesus xa re' wach re' i rAc'u̱n i Ajabe̱s Dios. Je' aj re', re' c'acharel re're' no̱j riban chi aj k'etol wach rik'orbal i Jesus. 23Re' cok ru' xa hab wach rik'et wach rik'orbal Ac'unbe̱s Dios ra̱j rik'orom chi re' Ajabe̱s Dios ma' re' ta re' wilic chi Ajabe̱s china̱. Tz'a̱b ru' xa hab wach rik'or chi re' Jesus re're' rAc'u̱n i Dios ra̱j rik'orom chi re' wo' Ajabe̱s Dios wilic chi Ajabe̱s china̱. 24Ru'um aj re', re' hin nik'or je aweh tak chi chac'am tak na̱ chi coric i tijbal ap'utum tak cho ribirmijic pan p'utbal cho reh animinic tak. Wi xac'am tak na̱ i tijbal re're' chi coric, re' hat-tak na̱wih'ic tak pan jenaj wach c'uxlis ru̱c' Ac'unbe̱s Dios ch'i̱l wo' ru̱c' Ajabe̱s Dios. 25Ma' xa ta re're', wi la' xatniminic tak chi coric chipam i c'uhbal re're' na̱c'acharic wo' tak chi junelic ar pan taxa̱j maj je' re' rik'orbal riyeb cahnok i Jesus. 26Je' re' k'uru' was tak nicha̱k' aj niminel reh Jesus, c'ahchi' nitz'ihmbam je aweh tak i hu̱j wili chi riye'eric je rehtal aweh tak chiqui̱j take c'acharel xi'uctubic cho chi ajot'oric chipam animinic tak. 27Re' take re' til nca̱j nak ajot'oric chipam animinic tak xa re' la' hin ch'iclic nic'ux chi re' hat-tak ma' eta tijot'oric tak chipam animinic tak maj re' Lok' laj rUxlabal i Dios ye'o̱j aweh tak wilic pan awa̱mna tak chi awaj tijinel tak eh chi je' re' ma' curman ta chic chaweh tak chi hab ta nak wach jeno' chucul aj tijinel entijinic aweh tak. Chi je' aj re' nik'or je aweh tak, chatik tak ju' ric'amaric na̱ haj wilic i tiritijej tak wi̱' i Lok' laj Uxlabal maj re' Lok' laj Uxlabal, re're' nk'oric aweh tak nic' pa' nimal take tijinic naricamanic reh animinic tak eh chi'nchel nic' pa' nimal ric'uhtaj aweh tak, til coric ma' re' ta nchel xa chucuj k'oric. 28Je' re' k'uru' was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, nik'or wo' chic je aweh tak chi tic'acharok tak chi ri'sil ro̱k k'ab i Jesus. Wi xa je' wo' re' c'acharic naka'nam chi'nchel i hoj aj niminel nac'olok lok i Jesus, ma'xta bih nakayo'jic wi̱' eh ma' xa ta re're', je' la' wo' wi ma' xoj-jot'oric chipam kaniminic, re're' ma'xta kojriyeb pan q'uixbilal nakojwih'ok cok chiwach. 29Je' wo' nik'or wo' aweh tak chi je' ricab chi re' rino'jbal i jenaj c'acharel ric'uhtaj lok hab wach i raja̱w, chaweht'alij wo' tak chi xa hab wach aweh hat-tak aj niminel ritahkej ribanaric i coric wach no'jbal ric'uhtaj wo' lok chi re're' manlic rac'u̱n rixk'u̱n i Dios ru'um nok re' Dios til coric wach rino'jbal je' ricab wo' aweht'alim hat-tak.

1 JUAN 31Je' re' k'uru', sahchok aj kac'ux ru̱c' i rik'orom i Dios chi re' take quiniminic reh re' cok take re' til rac'u̱n rixk'u̱n take. Re' riwi̱' chi je' re' rik'orom cho kAja̱w Dios ru'um chi k'e̱' kojric'ax. Je' re' ajic re' hoj yu'na, hoj chic rac'u̱n rixk'u̱n i Dios eh wi coric chi je' re', chaj wa'ric k'uru' chi wilic take tinamit china̱ ac'al wili re' nquik'or chi ma' coric ta chi je' re'? Re' aj wili riwi̱': Re' take tinamit re're' ma' nquicoj ta wach re're' ru'um nok chi queh ma' coric ta wo' chi re' Jesus re're' i rAc'u̱n i Dios. 2Hat-tak was tak nicha̱k' aj niminel re' k'e̱' ti' tiwic'raj tak, til coric yu'na hoj chic rac'u̱n rixk'u̱n i Dios xa re' la' ru'um chi re' kAja̱w Jesus ma' ja' ric'uhtaj ta cho ri̱b chi c'ahchi' ric'uhtam cho rinimal rilok'il, re' Dios ma' ja' ric'uhtaj ta wo' keh hoj kojniminic reh nic' wach til kalok'il nariwih'ic i hoj. Xa re' cok haj wilic keht'alim re' chi nachic'uhtaj cho ri̱b i kAja̱w Jesus ch'i̱l rinimal rilok'il, re' Dios naric'uhtam wo' keh i kalok'il nariwih'ic eh ar aj ru' naric'uhtunic chi til hoj manlic rac'u̱n rixk'u̱n maj nakilow wach til nic' wach rino'jbal eh nic' wo' wach nca'yic, ar ajic naka'nam chi jenaj chic wach kalok'il ch'i̱l i kAja̱w Jesus. 3Je' re' ajic hab wach ch'iclic ric'ux chi narilom wach i kAja̱w Jesus curman chi reh chi ma'xta chic ribanam i c'ahbilal je' ricab nok re' Jesus ma' re' ta pan c'ahbilal wilic. 4Je' wo' chic, re' hat-tak aweht'alim tak chi xa hab pa' wach ritik ju' wih'ic pan mahc, re're' c'ahchi' riyak'abem pa ro̱k take tak'anic riban i Dios maj re' ribanaric xa pa' bih c'ahbil laj no'jbal jenaj mahc nim wach chiwach i Dios eh xa na̱ ru' ru̱c' re're' c'ahchi' riyak'abem pa ro̱k chi'nchel c'uhbal. 5Chi je' aj re' k'uru', nik'or aweh tak chi ma' timahcanic tak chic maj re' hat-tak aweht'alim tak chic chi re' Jesus xc'ulic china̱ ac'al wili chi risacharic wach i ransil i mahc eh ma' xa ta re're' aweht'alim tak, je' la' wo' aweht'alim tak chi re' Jesus ma' re' ta wo' aj mahc. 6Ru'um aj re' hab wach xinimej chic i c'uhbal ribiram cho pan p'utbal reh riniminic, ma' riyew ta chic ric'ux chi mahcanic maj re' xa cu c'ahchi' wo' chi mahcanic, re're' ja' reht'alim ta pa̱m i rino'jbal i Jesus eh ma' ricojom ta wo' wach i Jesus pa ric'acharic. 7Je' re' k'uru' was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, ma' hab wach njot'bic aweh tak, charak la' tak chiri̱j ribanaric i coric maj re' nbanic i coric ric'uhtaj lok chi re're' rac'u̱n rixk'u̱n i Dios eh chi je' re' coric wo' wach ric'ux je' ricab nok re' Jesus coric wach ric'ux. 8Raj i c'acharel re' riban ribanaric i mahc pa ric'acharic, re're' ric'uhtaj lok chi rac'u̱n rixk'u̱n aj Yahm eh je' re' nik'or maj re' aj Yahm xa re' wo' naxip'ut cho mahcanic, ma' rimayam ta cu yu'na chi k'i̱j. Raj cok i Jesus re' til manlic rAc'u̱n i Dios, re're' xc'ulic lok chi risacharic wach chi'nchel ricamaj riban aj Yahm china̱ ac'al wili. 9Je' re' ajic hab wach rac'u̱n rixk'u̱n chic i Dios ma' eta chic ritahkej ribanaric i mahc. Je' re' nik'or ru'um i wili: Re' rija'quil ribanaric i coric xcojoric pa ra̱mna ru'um i Dios, re' chic re' wilic ru̱c' pa ric'acharic eh ru'um chi rac'u̱n rixk'u̱n chic i Dios, ma' riban ta wo' chi cu eritik ju' ribanaric i mahc chiwach i Dios. 10Nic' wach nanc'uhtunic lok chi hoj chic rac'u̱n rixk'u̱n i Dios? Re' wili nc'uhtunic lok wi̱': Wi hab wach jeno' ma' ritahkej ta i coric eh ma' ric'ax ta wo' take ras richa̱k' ra̱j rik'orom chi re're' rac'u̱n rixk'u̱n aj Yahm eh ma' re' ta rac'u̱n rixk'u̱n i Dios. Re' aj re' nc'utunic lok wi̱' chi jeno' c'acharel ma' re' ta rac'u̱n rixk'u̱n i Dios. 11Je' wo' chic nik'or chi ma' re' ta rac'u̱n rixk'u̱n i Dios maj ma' c'ahchi' ta ric'amam na̱ i tijbal kabiram cho pan p'uhtbal reh kaniminic re' je' wili rik'or: «C'ul chac'ax awi̱b chawach tak, nqui rik'or. 12Ru̱c' aj re', re' hin nik'or aweh tak chi c'ul kac'ax tak ki̱b chi kawach ma' ok nkixowej wach jeno' kas kacha̱k' je' ricab xiban i Cayin re' xicansaj i richa̱k' ru'um reh c'ahbilal xcojoric pa ra̱mna ru'um aj Yahm. Chaj bih riwi̱' naxicansaj i richa̱k'? Xa ru'um chi rixowej wach i richa̱k' maj re' take ribano̱j i Cayin ma' holohic ta take eh tz'a̱b ru' i richa̱k', holohic take ribano̱j eh xa coric wo' wach ric'ux chiwach i Dios. 13Was tak nicha̱k' aj niminel reh Jesus, ma' nsahchic ac'ux tak chi wilic take c'ahbil laj c'acharel nquixowej kawach i hoj aj niminel re' wilco̱j chic pa rik'ab i Ye'ol reh Junelic C'acharic. 14Nic' wach na keht'alij re're' eh chi ma' wilco̱j ta chic chi quixilac take xa cu wilic wo' i junelic quimic chi quina̱? Re' hoj nkeht'alij chi je' re' maj c'ahchi' kac'axam ki̱b chi kaju'junal, re' cok hab wach ma' ric'ax ta wo' i ras richa̱k' re' cok re' xa cu wilic wo' i junelic quimic china̱. 15Til coric nik'or aweh tak xa hab wach rixowej wach i ras richa̱k', re're' xa je' na ricab jeno' aj cansanel ras richa̱k' nok wilic chiwach i Dios eh re' hat-tak aweht'alim tak chi ma' jeno' aj cansanel erirak i junelic c'acharic ru̱c' i Dios wi ma' xicana̱' ribanaric i mahc. 16Je' re' k'uru' chac'ax tak take c'acharel eh je' re' nik'or maj re' hat-tak aweht'alim wo' tak haj wilic rinimal ric'axbal i Dios xic'uhtaj i Jesus. Haj wilic rinimal i c'axo̱j re're'? Re' rinimal c'axo̱j re're', re' chi re' Jesus xiyew ri̱b pan quimic chi kajelow-bal i hoj. Ru'um aj re' je' wo' re' naka'nam i hoj cu̱c' take kas kacha̱k'. Ru'um chi je' re', kak'ahsaj wo' tak i kac'acharic pan k'ab i Dios chi quitobjic ru̱c' quic'axquilal pan quic'acharic. 17Je' ricab wi hab wach jeno' wilic chi'nchel reh ayu' wach ac'al eh wi rilow i ras richa̱k' chi pan niba'il wilic chito'bej ru'. Raj la' wi re' wilic chi'nchel reh ayu' wach ac'al xa ta nak nc'uyu'jic so' i ra̱mna chi ritobjic, nic' wach nachik'or chi re' Dios ncamanic pa ra̱mna chi ric'axaric take ras richa̱k'? 18Was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, til nik'or aweh tak chi kac'ax wo' tak ki̱b chi coric eh til wo' c'uhtunok lok wach chi je' re' ma' ok ma' xa re' kachi̱' nk'oric chi nkac'ax ki̱b. 19Chi je' re' nok re' hoj c'ahchi' kac'axam take kas kacha̱k' chi coric re' hoj enkana'bej chi re' hoj c'ahchi' katahkem i coric laj c'uhtunic. Ma' xa re' ta re', je' la' wo' nanka'n kati̱j chiwach kAja̱w Dios, ma' kojyo'jic ta chi wilco̱j chiwach 20to̱b ta nchel re' kacapew-bal ric'raj chi xka'n jeno' mahc. To̱b ta wo' je' re' ric'raj i kacapew-bal, re' Dios xa naribiram wo' cho kati̱j nka'n johtok chiwach. Je' re' nik'or ru'um chi re' kaDios re' neht'alanic cho reh chi'nchel chaj bih nc'uluric, k'e̱' wo' chic rajawric chi reht'aljic pa̱m kacapew-bal je' wo' chi narilom cho pa̱m i ka̱mna chi til coric wach chiwach. 21Je' re' ajic was tak nicha̱k' aj niminel re' k'e̱' ti' tiwic'raj tak, nok re' ka̱mna til coric wach chiwach i Dios ma' riban ta chi enk'ormojic chi hoj aj mahc. Ru'um chi je' re' kawi̱' nok wilco̱j chiwach i Dios re' hoj til nkach'ica̱' kac'ux chi re' Dios naribiram cho kati̱j 22eh chi xa ewo' nkac'ul i pa' bih enkapahkaj johtok reh ma' ru'um ta chi nponic chiwach i kano'jbal je' la' wo' ru'um chi nponic chiwach chi nkac'am wo' na̱ riC'uhbal ritak'a̱b keh chi nakanimem. 23Re' c'uhbal re're' je' wili rik'or: «Chacoj tak wach i k'oro̱j chiri̱j i Jesus chi re're' rAc'u̱n i Dios eh je' wo' chi re're' i Pahbamaj chi K'atal K'oric. Chac'ax wo' awi̱b chawach tak maj re're' i tak'anic xiban cho i Dios, nqui rik'or i c'uhbal re're'. 24Ru'um aj re' hab wach ric'am na̱ take riC'uhbal i Dios, re're' pan k'ab i Dios wilic ric'acharic eh re' wo' re' wilic ru̱c' chi junelic. Nic' aj wach nok re' hoj enkeht'alij chi re' Dios wilic pan kac'acharic? Re' hoj enkeht'alij re're' ru'um reh Lok' laj Uxlabal xiyew keh.


1 JUAN 41Was tak nicha̱k' aj niminel re' k'e̱' ti' tiwic'raj tak, ru'um chi ayu' wach ac'al yohbal wach take chucul aj k'orol riC'uhbal i Dios xi'uctubic cho nwa̱j nik'orom je aweh tak i wili: Wi wilic jeno' rik'or chi re're' nk'oric chi sakomomaj pa̱m ricapew-bal ru'um i Lok' laj rUxlabal i Dios, ma' xa ru'um ta ti re' enanimej tak i c'uhbal rik'or. Ma' je' ta re', re' la' hat-tak til cha'n tak ri̱j chajaric chi uxlabal nquimelenic reh i winak re're', wi til re' i Lok' laj rUxlabal i Dios on ma' re' ta. 2Nic' wach nacharak tak chiri̱j chi re' Lok' laj rUxlabal i Dios nk'oric ru̱c' chi̱' jeno' aj c'uhbalanel? Re' wili na̱rakam tak wi̱' chiri̱j: Wi re' aj c'uhbalanel ricoj wach eh rik'or chi re' Jesus re' Pahbamaj chi K'atal K'oric xc'ulic c'acharok china̱ ac'al wili chi til je' ricab kawi̱' i hoj c'acharel, re're' rehtalil chi re' Lok' laj rUxlabal i Dios nk'oric ru̱c' chi̱' aj c'uhbalanel re're'. 3Raj wi jeno' aj c'uhbalanel ma' ricoj ta wach eh ma' rik'or ta chi re' Jesus xc'ulic c'acharok china̱ ac'al wili chi til je' ricab kawi̱' i hoj c'acharel, re're' rehtalil chi ma' re' ta Lok' laj rUxlabal i Dios nk'oric ru̱c' chi̱' aj c'uhbalanel re're', re' la' take k'oric rik'or i aj c'uhbalanel re're' ar nchalic ru̱c' aj k'etol wach rik'orbal i Dios. Pa ricorquilal, re' hat-tak abiram tak chic ribiral chi nariponic rik'ijil chi naquic'ulic lok take toco̱m chic aj c'uhbalanel je' re' quiwi̱', xa re' la' nwa̱j nik'orom aweh tak chi re' take aj chucul laj aj c'uhbalanel re're' wilque̱b chic china̱ ac'al wili chi jot'o̱j. 4Was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, til coric chi re' aj Yahm nye'bic queh take k'oric k'oro̱j cu'um take aj c'uhbalanel re're', re're' wilic wo' rajawric, xa re' la' nik'or aweh tak chi re' Lok' laj rUxlabal i Dios wilic pan awa̱mna hat-tak, re're' til k'e̱' wo' chic rinimal rajawric wilic chiwach ru'. Ru'um aj re', naxquiniq'uej nak ajot'oric tak cu'um take c'uhbalanel re're' ru̱c' c'uhtunic nca'n, ma' xac'ul ta tak i c'uhtunic re're'. 5Je' re' nik'or maj re' quic'uhtunic ru' ma' re' ta ru̱c' Dios nchalic ar la' nchalic cu̱c' take c'acharel re' ma' nquinimej ta i Dios. Ru'um aj re' nik'or aweh tak chi re' quic'uhtunic ru' xa re' wo' take c'acharel ma' quiniminic ta reh i Dios quic'ulbic reh. 6Raj cok i hoj re' kojk'oric reh ribiral i Jesus, til hoj rac'u̱n rixk'u̱n i Dios eh ru'um chi je' re' kawi̱', til nkarak chiri̱j chi re' Lok' laj Uxlabal nc'uhtunic reh i ricorquilal eh wi re're' c'ahchi' riye'bic rik'orbal jeno' aj c'uhbalanel on wi re' aj Yahm c'ahchi' riye'bic rik'orbal. Je' wo', je' wili nc'uluric cu̱c' take c'acharel quibirinic reh kac'uhtunic: Re' c'acharel ricojom wach i Dios re're' til ric'ul chi coric kac'uhtunic. Raj nchel i c'acharel ma' re' ta rac'u̱n rixk'u̱n i Dios, re're' ma' ric'ul ta kac'uhtunic. 7Was tak nicha̱k' aj niminel re' k'e̱' ti' tiwic'raj tak, re' c'axoj i̱b ar nchalic ru̱c' i Dios. Ru'um aj re' kac'ax tak ki̱b chi kawach rehtalil chi hoj chic rac'u̱n rixk'u̱n i Dios. Je' re' nik'or chi cha'n tak maj xa hab wach ric'ax i ras richa̱k' ra̱j rik'orom chi rac'u̱n rixk'u̱n chic i Dios. Ma' xa re' ta re', je' la' wo' wi je' re' riban re're' til c'ahchi' ric'uhtam chi reht'alim i rino'jbal i Dios chi coric. 8Tz'a̱b ru' wi ma' ric'ax ta ras richa̱k', ra̱j rik'orom chi ma' reht'alim ta rino'jbal i Dios chi coric maj wi ta nak reht'alim rino'jbal i Dios re' wo' nak rino'jbal ru' ric'am tz'eht reh ru'um nok re' Dios manlic aj c'axo̱l. 9Nic' wach nanc'uhtunic chi re' Dios wilic cho ric'axbal chi kana̱? Re' wili nc'utunic wi̱': Chi re're' xitak'a̱' cho ayu' wach ac'al i Lok' laj rAc'u̱n re' xa jenaj wo' ti chiwach eh je' re' xiban reh chi re' hoj nakac'acharic ru̱c' i Dios chi junelic. 10Je' re' ajic re' ric'axbal i Dios re're', re' wili nc'utunic wi̱': Chi re're' xitak'a̱' cho rAc'u̱n chi xquimic chiki̱j chi tojbal wach i kamahc eh je' re' xiban ru'um chi k'e̱' rinimal cho ric'axbal chi kana̱, ma' ru'um ta nchel chi re' hoj c'ahchi' kac'axam i Dios. 11Ru'um aj re' was tak nicha̱k' aj niminel re' k'e̱' ti' tiwic'raj tak, ru'um chi re' Dios k'e̱' xojric'ax naxitak'a̱' cho rAc'u̱n chi quimic chiki̱j, je' wo' re' ric'axaric ki̱b ka'n i hoj chi kawach. 12Je' re' nik'or chi ka'n maj nok re' hoj nkac'ax take kas kacha̱k' ra̱j rik'orom chi re' Dios re' ma' nkilow ta wach til nic' wach je' riwi̱' ru'um nok ma' hab ta wach rilom wach riwi̱' i Dios, re're' til wilic ku̱c' eh re' ric'axbal wilic wo' pan ka̱mna chi manlic. 13Re' hoj aj niminel keht'alim chi re' Dios wilic pan kac'acharic eh chi re' hoj wilco̱j wo' pan k'ab maj re' Dios xiyew cho keh i Lok' laj rUxlabal. 14Ma' xa re' ta riye'eric cho keh i Lok' laj rUxlabal xiban i Dios, til la' wo' xitak'a̱' cho ayu' wach ac'al i Lok' laj rAc'u̱n re' xchalic chi kaco'ljic hoj chi'nchel c'acharel chiwach i ti'c'axic nariye'eric chi quina̱ take aj mahc. Re' Lok' laj Ac'unbe̱s re're', re' wo' re' nkayew kachi̱' chiri̱j ch'i̱l take wich nahsil raj tahkanel nok nkak'or chi til coric chi xkilow i ric'ulic i Lok' laj Ac'unbe̱s re're'. 15Ru'um chi til coric chi re' Dios xitak'a̱' cho ayu' wach ac'al i Lok' laj rAc'u̱n, xa hab aj wach ricoj wach eh rik'or chi re' Jesus til rAc'u̱n i Dios re're', til ric'uhtaj chi pa rik'ab i Dios wilic ric'acharic eh chi re' wo' Dios wilic pa ric'acharic. 16Je' aj re' nc'uhtunic wi̱' i c'acharel c'acharic riban pan c'axoj i̱b eh til wo' je' re' naribanam je' ricab ric'ul chi keh hoj aj niminel reh Jesus chi je' re' c'acharic naka'nam ru'um chi nkeht'alij chi xa re' wo' Dios til manlic aj c'axo̱l. Je' aj re' riwi̱' c'acharic nka'n ru'um chi keht'alim chic eh nkach'ica̱' wo' kac'ux chiri̱j i ricorquilal chi re' Dios aj c'axol cho keh. 17Re' riwi̱' i c'acharic nka'n ayu' wach ac'al xa je' ricab riwi̱' i ric'acharic Jesus. Chi je' re' riwi̱' i kac'acharic, kojcholok aj quic'axaric take kas kacha̱k' chi manlic. Wi je' re' nka'n, til nachirak cho rik'ijil chi re' Dios narich'ukum k'oric chi quina̱ take c'acharel naribanam chi re' hoj nakawih'ic chiwach chi ch'iclic kac'ux chi ma' jeno' ti'c'axic nariye'eric chi kana̱. 18Je' re' wih'ic chiwach naka'nam ru'um nok ru̱c' i ric'axbal i Dios wilic chic pan ka̱mna xkac'ax take kas kacha̱k'. Ru'um aj chi je' re' xka'n chi manlic, re' yo'jic re' nchalic nak chi kana̱ ru'um ti'c'axic nariyeb nak chi kana̱ i Dios ma'xta chic roquic cho ku̱c' pan ka̱mna nok ekojwih'ic chiwach. Je' re' nik'or maj keht'alim chi nabanarok ch'ukuj k'oric chi quina̱ tinamit, xa re' take wilic yo'jic pan ca̱mna riwi̱' chi queh chi naquic'ulum i ti'c'axic ru'um i Dios. Je' re' nik'or maj wi re' take c'acharel nok wilque̱b chiwach i Dios xa cu quiyo'jic wo' chi enchalic i ti'c'axic chi quina̱, re're' ra̱j rik'orom chi ma' xquic'ax ta take cas quicha̱k' chi manlic. 19Ru'um chi re' Dios xojric'ax cho i hoj chi pe̱t, re' hoj nkac'ax wo' ru' eh nkac'ax wo' take kas kacha̱k', maje'? 20Chi je' aj re' wi hab wach rik'or chi ric'ax i Dios xa re' la' cu rixowej wach i ras richa̱k', re' c'acharel re're' xa aj chucul k'oric nok wilic. Je' re' nik'or maj wi ma' ric'ax ta i ras richa̱k' re' c'ahchi' rilom wach nic' wach nachik'or chi ric'ax i Dios re' ma' rilow ta wach? 21Je' re' k'uru' was tak nicha̱k' aj niminel, kac'ax tak ki̱b chi kawach maj re' Dios je' wili tak'anic riban cho: “Xa hab wach c'acharel raj qui̱n ric'axam i hin Dios, chic'ax wo' i ras richa̱k', nqui tak'anic ribanam cho i Dios.


1 JUAN 51Je' wo' chic, ru'um chi re' Dios xye'bic reh i junelic c'acharic queh chi'nchel c'acharel nquich'ica̱' quic'ux chi re' Jesus re' Pahbamaj chi K'atal K'oric, re' take re're' quic'axbic reh i Dios re' Ajabe̱s chi quina̱ take aj niminel riwi̱' chi queh chi naquic'axam wo' take quich aj niminel re' xye'eric wo' queh i junelic c'acharic ru'um i Dios je' ricab ric'axaric riban jeno' ajabe̱s ru̱c' take riha'lac'u̱n. 2Je' re' ajic je' ricab keht'alim chi nankac'ax i kAja̱w Dios ra̱j rik'orom chi nkac'ax wo' take nic' nimal rac'u̱n rixk'u̱n ru', je' wo' re' keht'alim i hoj chi nankac'ax i Dios eh nankac'am wo' na̱ take tak'anic riban cho, c'ahchi' wo' kac'axam take kas kacha̱k'. Je' re' nik'or maj re' rehtalil nc'uhtunic wi̱' chi re' hoj nkac'ax take rac'u̱n rixk'u̱n i Dios, re' chi re' hoj nkac'ax i Dios eh nkac'am wo' na̱ take tak'anic ribanam cho. 3Je' re' k'uru' re' ric'amaric na̱ take tak'anic riban i Dios, re're' i rehtalil nkac'uhtaj wo' lok wi̱' i hoj chi c'ahchi' kac'axam i Dios. Re' take ritak'anic i Dios to̱b ta nak c'axic take chi c'amaric na̱, re' hoj xa ewo' nka'n ribanaric ric'amaric na̱ 4eh re' riwi̱' chi je' re' nka'n ru'um chi hoj chic rac'u̱n rixk'u̱n i Dios. Ru'um chi je' chic re' kawi̱' chiwach, nkayak'abej wo' pan ko̱k take quic'ahbilal laj no'jbal nca'n take c'acharel ayu' wach ac'al. Chaj bih riwi̱' chi nkayak'abej pan ko̱k chi'nchel re're'? Nka'n ru'um chi ch'iclic chic kac'ux chiri̱j i Jesus chi re're' rAc'u̱n i Dios. 5Je' re' nik'or maj til coric, ma' hab ta wach xa chi ribil ri̱b riyak'abej pa ro̱k take c'ahbil laj no'jbal nca'n take c'acharel ayu' wach ac'al, re' la' i c'acharel re' rich'ica̱' ric'ux chiri̱j i Jesus chi re're' rAc'u̱n i Dios xa re' wach re' til wilic rajawric chi ribanaric. 6Naxc'ulic i Jesus ayu' wach ac'al, til re' wo' Dios tak'anic cho reh. Chi rehtalil i rip'uhtic cho i ricamaj, re're' xikahsaj riha̱'. Je' wo', naxiyew ri̱b chi quimic chiki̱j wach curu̱s re' xichihcaj wi̱' riquiq'ue̱l ar wo' xcahnic rehtalil chi ar xicohlaj wach ricamaj. Je' re' ajic re' Jesus re' Pahbamaj chi K'atal K'oric, ma' xa re' ta rikahsjic riha̱' xiban je' la' wo' xiyew ri̱b chi quimic chiki̱j naxichihcaj riquiq'ue̱l eh re' hoj ch'iclic kac'ux chiri̱j i ricorquil k'oric re're' je' ricab rik'or wo' i Lok' laj rUxlabal i Dios maj re' Lok' laj Uxlabal re're' aj c'uhtem reh i coric. 7Je' re' ajic, je' ricab ar pan taxa̱j til re' take xib wili nca'n jenaj wach quic'ux chi riye'jic quik'orbal: Re' Ajabe̱s Dios, re' Ac'unbe̱s Dios eh ch'i̱l i Lok' laj Uxlabal, 8je' wo' re' ayu' china̱ ac'al, re' wo' take xib wili nkeht'alij wi̱' chi re' Jesus rAc'u̱n i Dios: Pe̱t, re' kahsanic ha' xiban. Ricab, re' richihcjic riquiq'ue̱l xiban naxquimic chiki̱j. Ro̱x, ru̱c' i Lok' laj Uxlabal. Re' take xib re're' xa jenaj chi capew-bal nquic'uhtaj lok, chi re' Jesus til rAc'u̱n i Dios. 9Je' re' k'uru' je' ricab nok re' hoj nkacoj wach quik'orbal take kich c'acharel nanquik'or keh i coric, je' wo' re' ka'n tak ru̱c' k'oric rik'orom cho i Dios chiri̱j i rAc'u̱n eh je' re' ka'n maj re' take k'oric xik'or chiri̱j i Lok' laj Ac'unbe̱s til coric take eh ru'um i re' til raj cojoric wach maj til ch'iquenel c'uxlis take. 10Ru'um aj re' nanik'or chi xa hab wach ncojbic wach i Jesus chi re're' rAc'u̱n i Dios, re're' c'ahchi' wo' ricojom wach i Dios chi re're' ch'iquenel c'uxlis eh ru'um re', re' rik'orbal i Dios rik'orom chiri̱j i Ac'unbe̱s til ric'ol pa ra̱mna i c'acharel re're'. Tz'a̱b ru' hab wach ma' ricoj ta wach rik'orbal i Dios re' xik'or chiri̱j i Ac'unbe̱s, re' c'acharel re're' c'ahchi' ribanam chi re' Dios re' aj ch'iquenel c'uxlis, xa aj chucul k'oric nok wilic ru'um nok ma' ricoj ta wo' wach i xik'or chiri̱j i rAc'u̱n. 11Je' re' ajic re' k'oric xik'or i Dios chiri̱j i rAc'u̱n, re' wili: “Re' hin Dios xniban chi re' junelic c'acharic xniyew aweh hat-tak, xa pa rik'ab wo' i wAc'u̱n wilic riye'eric, nqui xik'or. 12Ru'um aj re' nik'or wo' aweh tak chi wi jeno' c'acharel ric'ulum chic rAc'u̱n i Dios pa ric'acharic, re're' ye'o̱j wo' reh i junelic c'acharic. Tz'a̱b ru' re' ma' ja' ric'ulum ta pa ra̱mna, re're' ma'xta wo' riye'eric reh i junelic c'acharic. 13Je' re' k'uru' re' hin c'ahchi' nitz'ihmbam je aweh tak i k'oric xik'or i Dios chiri̱j i rAc'u̱n reh chi re' hat-tak re' ticojbic tak wach i k'oro̱j chiri̱j i Jesus chi re're' rAc'u̱n i Dios na̱weht'alim tak chi re' junelic c'acharic ye'o̱j chic aweh tak eh chi je' re' na̱tikim tak ju' rich'iquinjic ac'ux tak chiri̱j i k'oric k'oro̱j chiri̱j i Jesus chi re're' i rAc'u̱n i Dios. 14Ru'um chi kach'ica̱b chic kac'ux chiri̱j i Jesus yu'na ch'iclic chic kac'ux chi re' Dios xa kojribiraj wo' cho ru̱c' kapahkanic nka'n johtok chiwach, re' cok ru' wi re' pahkanic nka'n johtok reh je' ru̱c' tare̱t chiwach i Dios chi naka'nam. 15Chi je' re' k'uru' ru'um nok keht'alim chi re' Dios ekojric'u'lej cho ru̱c' kati̱j nka'n johtok chiwach, keht'alim wo' chi xa ewo' riyew cho keh pa' jaric i kapahkanic nka'n johtok reh. 16Ru'um aj re' nik'or aweh tak wi wilic jeno' aj niminel xcalajic ru̱c' jeno' mahc je' ru̱c' ma' nk'etbic ta pa̱m ribe̱h chi erik'eb chi junpech i junelic c'acharic eh wilic ok jeno' aweh tak xilow naxmahcanic, cha'n ati̱j tak chiri̱j awich aj niminel tak re're' maj re' Dios ewo' chic riyew reh i junelic c'acharic wi la' re' aj niminel re' xik'eb nak i junelic c'acharic ru'um reh i mahc xiban, ricana̱' wo' ribanaric i mahc re're'. Re' cok ru' re' take aj niminel re' quicalajic ru̱c' jeno' mahc re' nk'etbic pa̱m quibe̱h chi enye'eric queh i junelic c'acharic, re' hin nik'or aweh tak chi ma̱ban tak chic johtok pahkanic chiqui̱j ru', 17ru'um nok re' mahc xca'n ru' toco̱m wo'. Til pan coric, chi'nchel take ma' holohic ta laj bano̱j nbanaric chiwach i Dios, mahc take, xa re' la' wilic take mahc ma' rik'et ta pa̱m kabe̱h chi re' Dios eriyew keh i junelic c'acharic. 18Chi kunchelal i hoj aj niminel nakeht'alim chi nic' pa' nimal ka'nam chi hoj chic rac'u̱n rixk'u̱n i Dios, chopo̱j chic na̱ kac'acharic ru'um i Jesus re' rAc'u̱n i Dios. Ru'um aj re', re' aj Yahm ma' eta chic kojrijot' chi enkatahkej chi ribanaric i mahc. Je' wo' ru'um re're', re' hoj aj niminel ma' re' ta chic i mahc enkayew rajawric chi kawach. 19Je' re' ajic re' hoj keht'alim chic chi hoj chic rac'u̱n rixk'u̱n i Dios eh chi je' re' to̱b ta chi'nchel take c'ahbilal laj no'jbal chopo̱j take na̱ ru'um aj Yahm china̱ ac'al wili, 20ma' hab ta wach keh hoj narijot'om kacapew-bal maj re' hoj keht'alim chi re' Jesus re' Pahbamaj chi K'atal K'oric eh rAc'u̱n wo' i Dios, xc'ulic lok ayu' wach ac'al chi riye'eric keh chi eht'aljic wach i Dios re' ma' hab ta chic jeno' wach coric wach chiwach ru'. Ru'um aj re', re' hoj yu'na nkarak chic chiri̱j chi wilco̱j ri'sil ro̱k k'ab i coric wach Dios maj wilco̱j wo' chic pan k'ab i Jesus re' manlic wo' Dios chi kana̱ eh manlic aj Ye'ol Junelic C'acharic. 21Je' re' ajic was tak nicha̱k' aj niminel re' wilca̱t tak chi je' hat-tak wac'u̱n wixk'u̱n chi niwach, ru'um chi re' hat-tak narak tak chic chiri̱j chi re' Jesus re're' i manlic wo' Dios chi kana̱ i hoj, chayohbalej awi̱b tak reh no'jbal chi lok'onic wach tz'akoj tiyo̱x nca'n take tinamit wach ac'al. Re' wili coric laj k'oric nik'or je aweh tak was tak nicha̱k'.

  http://www.bible.is/POBWYI/1John/1/D

Nenhum comentário:

Postar um comentário