sexta-feira, 12 de junho de 2015

1 ໂຢຮັນ: LAOS



1 ໂຢຮັນ 11ຊຶ່ງມີຢູ່ແຕ່ປະຖົມມະການ ຊຶ່ງເຮົາໄດ້ຍິນ ຊຶ່ງເຮົາໄດ້ເຫັນກັບຕາ ຊຶ່ງເຮົາໄດ້ພິຈາລະນາເບິ່ງ ແລະມືຂອງເຮົາໄດ້ຈັບຕ້ອງນັ້ນກ່ຽວກັບພຣະທຳອັນຊົງຊີວິດ. 2ເມື່ອຊີວິດນັ້ນໄດ້ມາປາກົດ ພວກເຮົາກໍໄດ້ເຫັນ. ດັ່ງນັ້ນ ພວກເຮົາຈຶ່ງເປັນພະຍານເຖິງຊີວິດນັ້ນ ແລະປະກາດແກ່ພວກເຈົ້າເຖິງຊີວິດນິຣັນດອນ ຊຶ່ງໄດ້ມີຢູ່ກັບພຣະບິດາເຈົ້າ ແລະໄດ້ປາກົດແກ່ພວກເຮົາ. 3ສິ່ງທີ່ພວກເຮົາໄດ້ເຫັນແລະໄດ້ຍິນນັ້ນ ພວກເຮົາກໍປະກາດແກ່ພວກເຈົ້າເໝືອນກັນ ເພື່ອວ່າພວກເຈົ້າຈະເຂົ້າຮ່ວມສາມັກຄີທຳກັບພວກເຮົາ ພວກເຮົາກໍຮ່ວມສາມັກຄີທຳກັບພຣະບິດາເຈົ້າ ແລະ ກັບພຣະເຢຊູຄຣິດເຈົ້າພຣະບຸດຂອງພຣະອົງ. 4ພວກເຮົາຂຽນຂໍ້ຄວາມເຫລົ່ານີ້ ເພື່ອຄວາມຊົມຊື່ນຍິນດີຂອງພວກເຮົາ ຈະໄດ້ຄົບເຕັມບໍລິບູນ. 5ນີ້ແຫລະ ເປັນຖ້ອຍຄຳທີ່ພວກເຮົາໄດ້ຍິນຈາກພຣະອົງ ແລະປະກາດແກ່ພວກເຈົ້າວ່າ, ພຣະເຈົ້າຊົງເປັນຄວາມສະຫວ່າງ ໃນພຣະອົງບໍ່ມີຄວາມມືດເລີຍ. 6ຖ້າພວກເຮົາບອກວ່າ ພວກເຮົາຮ່ວມສາມັກຄີທຳກັບພຣະອົງ, ແຕ່ຍັງດຳເນີນຊີວິດຢູ່ໃນຄວາມມືດ ພວກເຮົາກໍຕົວະທັງຄຳເວົ້າແລະການກະທຳພ້ອມໆກັນ. 7ແຕ່ຖ້າພວກເຮົາດຳເນີນຊີວິດຢູ່ໃນຄວາມສະຫວ່າງ ເໝືອນດັ່ງພຣະອົງຊົງຢູ່ໃນຄວາມສະຫວ່າງ ພວກເຮົາກໍຮ່ວມສາມັກຄີທຳຊຶ່ງກັນແລະກັນ ແລະພຣະໂລຫິດຂອງພຣະເຢຊູເຈົ້າ ພຣະບຸດຂອງພຣະອົງ ກໍຊຳລະເຮົາທັງຫລາຍຈາກການຜິດບາບທັງສິ້ນ. 8ຖ້າພວກເຮົາເວົ້າວ່າ ພວກເຮົາບໍ່ມີບາບ ພວກເຮົາກໍຫລອກລວງຕົນເອງ ແລະພວກເຮົາກໍບໍ່ມີຄວາມຈິງໃນຈິດໃຈ. 9ຖ້າເຮົາທັງຫລາຍສາລະພາບຜິດບາບທັງຫຼາຍຂອງພວກເຮົາ ພຣະອົງຊົງສັດຊື່ແລະທ່ຽງທຳ ຈະຊົງໂຜດຍົກບາບຂອງພວກເຮົາ ແລະຈະຊົງໂຜດຊຳລະລ້າງເຮົາທັງຫລາຍຈາກການອະທຳໝົດສິ້ນ. 10ຖ້າພວກເຮົາເວົ້າວ່າ ພວກເຮົາບໍ່ໄດ້ເຮັດບາບກໍເທົ່າກັບວ່າ ພວກເຮົາເຮັດໃຫ້ພຣະເຈົ້າເປັນຜູ້ຕົວະ ແລະພຣະທຳຂອງພຣະອົງກໍບໍ່ຢູ່ໃນພວກເຮົາເລີຍ. 

1 ໂຢຮັນ 21ລູກນ້ອຍທັງຫລາຍຂອງເຮົາເອີຍ, ເຮົາຂຽນຂໍ້ຄວາມເຫລົ່ານີ້ມາເຖິງພວກເຈົ້າ ເພື່ອພວກເຈົ້າຈະບໍ່ໄດ້ເຮັດຜິດ ແຕ່ຖ້າຄົນໃດເຮັດຜິດ ພວກເຮົາກໍມີທະນາຍຄວາມ ຄືພຣະເຢຊູຄຣິດເຈົ້າ ຜູ້ຊົງທ່ຽງທຳທີ່ສະຖິດຢູ່ກັບພຣະບິດາເຈົ້າ. 2ແມ່ນດ້ວຍພຣະອົງນີ້ແຫລະ ທີ່ພຣະເຈົ້າຊົງຍົກການບາບຂອງພວກເຮົາເສຍ ແລະບໍ່ແມ່ນແຕ່ການບາບຂອງພວກເຮົາຜູ້ດຽວ, ແຕ່ທັງການບາບຂອງມະນຸດທັງປວງໃນໂລກເໝືອນກັນ. 3ໃນຂໍ້ນີ້ແຫລະ ເຮົາທັງຫລາຍຄົງສັງເກດໄດ້ວ່າ ພວກເຮົາຮູ້ຈັກກັບພຣະອົງ ຄືວ່າຖ້າພວກເຮົາຖືຮັກສາບັນດາກົດບັນຍັດຂອງພຣະອົງ. 4ຖ້າຄົນໃດເວົ້າວ່າ, “ຕົນຮູ້ຈັກພຣະອົງ” ແຕ່ບໍ່ຖືຮັກສາກົດບັນຍັດຂອງພຣະອົງ ຄົນນັ້ນກໍເວົ້າຕົວະ ແລະຄວາມຈິງກໍບໍ່ມີຢູ່ໃນລາວ. 5ແຕ່ຜູ້ໃດກໍຕາມ ທີ່ຖືຮັກສາພຣະທຳຂອງພຣະອົງ, ຜູ້ນັ້ນແຫລະ ທີ່ຮັກພຣະເຈົ້າຢ່າງຄົບຖ້ວນບໍຣິບູນໂດຍແທ້. ດ້ວຍເຫດນີ້ແຫລະ ເຮົາທັງຫລາຍຈຶ່ງຮູ້ຈັກວ່າພວກເຮົາຢູ່ໃນພຣະອົງ, 6ຜູ້ໃດທີ່ເວົ້າວ່າ, “ຕົນຢູ່ໃນພຣະອົງ” ຜູ້ນັ້ນກໍຄວນດຳເນີນຊີວິດຕາມທາງທີ່ພຣະອົງຊົງດຳເນີນນັ້ນເໝືອນກັນ. 7ພວກທີ່ຮັກເອີຍ, ເຮົາບໍ່ໄດ້ຂຽນກົດບັນຍັດໃໝ່ມາເຖິງເຈົ້າທັງຫລາຍ ແຕ່ເປັນກົດບັນຍັດເກົ່າ ຊຶ່ງເຈົ້າທັງຫລາຍມີຢູ່ຕັ້ງແຕ່ເດີມແລ້ວ, ກົດບັນຍັດເກົ່ານັ້ນ ຄືພຣະທຳທີ່ພວກເຈົ້າໄດ້ຍິນມາແລ້ວ. 8ເຖິງຢ່າງໃດກໍຕາມ ເຮົາຂຽນກົດບັນຍັດໃໝ່ມາເຖິງເຈົ້າທັງຫລາຍ ຄືຄວາມຈິງໄດ້ຊົງສຳແດງໃນພຣະອົງ ແລະໃນເຈົ້າທັງຫລາຍ. ເພາະວ່າຄວາມມືດກຳລັງຜ່ານພົ້ນໄປ ແລະຄວາມສະຫວ່າງອັນແທ້ຈິງນັ້ນ ກໍກຳລັງສ່ອງສະຫວ່າງຢູ່ແລ້ວ. 9ຜູ້ໃດທີ່ເວົ້າວ່າ ຕົນຢູ່ໃນຄວາມສະຫວ່າງ ແຕ່ຍັງກຽດຊັງພີ່ນ້ອງຂອງຕົນ ຜູ້ນັ້ນກໍຢູ່ໃນຄວາມມືດຈົນເຖິງດຽວນີ້. 10ຜູ້ທີ່ຮັກພີ່ນ້ອງຂອງຕົນ ກໍຕັ້ງຢູ່ໃນຄວາມສະຫວ່າງ ແລະເຫດທີ່ຈະໃຫ້ສະດຸດໃຈກໍບໍ່ມີໃນຄົນນັ້ນ. 11ແຕ່ຜູ້ທີ່ກຽດຊັງພີ່ນ້ອງຂອງຕົນ ກໍຍັງຢູ່ໃນຄວາມມືດ ແລະທຽວໄປໃນຄວາມມືດ ແລ້ວບໍ່ຮູ້ວ່າຕົນກຳລັງຈະໄປໃສ ເພາະຄວາມມືດໄດ້ເຮັດໃຫ້ຕາຂອງຕົນບອດເສຍແລ້ວ. 12ລູກທັງຫລາຍຂອງເຮົາເອີຍ, ເຮົາຂຽນຈົດໝາຍມາເຖິງພວກເຈົ້າ ເພາະການບາບຂອງພວກເຈົ້າໄດ້ຮັບການອະໄພແລ້ວ ຍ້ອນເຫັນແກ່ພຣະນາມຂອງພຣະອົງ. 13ພໍ່ທັງຫລາຍເອີຍ, ທີ່ເຮົາຂຽນຈົດໝາຍມາເຖິງພວກເຈົ້າ ເພາະພວກເຈົ້າຮູ້ຈັກພຣະອົງ ຜູ້ດຳລົງຢູ່ຕັ້ງແຕ່ຕົ້ນ. ຄົນໜຸ່ມທັງຫລາຍເອີຍ, ທີ່ເຮົາຂຽນຈົດໝາຍມາເຖິງພວກເຈົ້າ ເພາະພວກເຈົ້າໄດ້ຊະນະມານຊົ່ວຮ້າຍແລ້ວ. 14ລູກທັງຫລາຍຂອງເຮົາເອີຍ, ທີ່ເຮົາຂຽນຈົດໝາຍມາເຖິງພວກເຈົ້າ ເພາະພວກເຈົ້າຮູ້ຈັກພຣະບິດາເຈົ້າ. ພໍ່ທັງຫລາຍເອີຍ, ທີ່ເຮົາຂຽນຈົດໝາຍມາເຖິງພວກເຈົ້າ ເພາະພວກເຈົ້າຮູ້ຈັກພຣະອົງ ຜູ້ດຳລົງຢູ່ຕັ້ງແຕ່ຕົ້ນ. ຄົນໜຸ່ມທັງຫລາຍເອີຍ, ທີ່ເຮົາຂຽນຈົດໝາຍມາຫາພວກເຈົ້າ ເພາະພວກເຈົ້າມີກຳລັງແຂງແຮງ, ພຣະທຳຂອງພຣະເຈົ້າກໍຕັ້ງຢູ່ໃນພວກເຈົ້າ ແລະພວກເຈົ້າໄດ້ຊະນະມານຊົ່ວຮ້າຍແລ້ວ. 15ຢ່າຮັກໂລກ ຫລືສິ່ງຂອງທີ່ຢູ່ໃນໂລກ ຖ້າຜູ້ໃດຮັກໂລກ ຄວາມຮັກຕໍ່ພຣະບິດາເຈົ້າກໍບໍ່ຢູ່ໃນຜູ້ນັ້ນ. 16ເພາະສາລະພັດທີ່ມີຢູ່ໃນໂລກ ຄືຕັນຫາຂອງເນື້ອກາຍ ຕັນຫາຂອງຕາ ແລະຄວາມອວດອ້າງເປົ່າໆໃນຊີວິດນີ້ ບໍ່ໄດ້ເກີດມາຈາກພຣະບິດາເຈົ້າ ແຕ່ເກີດມາຈາກໂລກ. 17ສ່ວນໂລກກັບຕັນຫາຂອງໂລກກຳລັງເສື່ອມສູນໄປ, ແຕ່ຜູ້ທີ່ເຮັດຕາມນໍ້າພຣະໄທຂອງພຣະເຈົ້າ ຈະຕັ້ງຢູ່ຕະຫລອດໄປເປັນນິດ. 18ລູກທັງຫລາຍເອີຍ, ບັດນີ້ເປັນເວລາສຸດທ້າຍແລ້ວ ແລະຕາມທີ່ເຈົ້າທັງຫລາຍໄດ້ຍິນໄດ້ຟັງມາແລ້ວວ່າ ຜູ້ຕໍ່ສູ້ພຣະຄຣິດຈະມີມາ ບັດນີ້ຜູ້ຕໍ່ສູ້ພຣະຄຣິດກໍເກີດມີມາຫລາຍແລ້ວ. ສະນັ້ນ ພວກເຮົາຈຶ່ງຮູ້ວ່າເປັນເວລາສຸດທ້າຍ. 19ພວກເຂົາເຫລົ່ານັ້ນໄດ້ອອກໄປຈາກພວກເຮົາ, ແຕ່ພວກເຂົາບໍ່ແມ່ນຝ່າຍພວກເຮົາ. ເພາະວ່າ ຖ້າພວກເຂົາແມ່ນຝ່າຍພວກເຮົາ ພວກເຂົາກໍຈະໄດ້ຕັ້ງຢູ່ກັບພວກເຮົາຕໍ່ໄປ, (ແຕ່ພວກເຂົາໄດ້ອອກໄປແລ້ວ) ເພື່ອປາກົດແຈ້ງວ່າ ເຂົາເຫລົ່ານັ້ນບໍ່ແມ່ນຝ່າຍພວກເຮົາຈັກຄົນ. 20ແຕ່ຝ່າຍພວກເຈົ້າໄດ້ຮັບການຊົງຫົດສົງຈາກພຣະອົງ ຜູ້ຊົງບໍຣິສຸດແລ້ວ, ພວກເຈົ້າທຸກຄົນກໍມີຄວາມຮູ້. 21ທີ່ເຮົາຂຽນມາເຖິງພວກເຈົ້ານີ້ ບໍ່ແມ່ນເພາະພວກເຈົ້າບໍ່ຮູ້ຄວາມຈິງ, ແຕ່ຍ້ອນພວກເຈົ້າຮູ້ຄວາມຈິງແລ້ວ ແລະພວກເຈົ້າກໍຮູ້ອີກວ່າ ບໍ່ມີຄວາມຕົວະໃດໆທີ່ມາຈາກຄວາມຈິງ. 22ແມ່ນຜູ້ໃດເປັນຜູ້ເວົ້າຕົວະ ກໍແມ່ນຜູ້ທີ່ປະຕິເສດວ່າ ພຣະເຢຊູເຈົ້າບໍ່ແມ່ນພຣະຄຣິດ ຜູ້ທີ່ປະຕິເສດພຣະບິດາເຈົ້າແລະພຣະບຸດ ຜູ້ນັ້ນແຫລະ ເປັນຜູ້ຕໍ່ສູ້ພຣະຄຣິດ. 23ດ້ວຍວ່າ, ຜູ້ທີ່ປະຕິເສດພຣະບຸດ ກໍປະຕິເສດພຣະບິດາເຈົ້າເໝືອນກັນ, ຜູ້ທີ່ຍອມຮັບພຣະບຸດ ຜູ້ນັ້ນກໍມີພຣະບິດາເຈົ້າເໝືອນກັນ. 24ເຫດສະນັ້ນ ຈົ່ງແນ່ໃຈວ່າພວກເຈົ້າຖືຮັກສາຖ້ອຍຄຳ ທີ່ພວກເຈົ້າໄດ້ຍິນມາຕັ້ງແຕ່ຕົ້ນນັ້ນ ໄວ້ໃນຈິດໃຈຂອງພວກເຈົ້າ. ຖ້າພວກເຈົ້າຖືຮັກສາຖ້ອຍຄຳເຫລົ່ານັ້ນ ພວກເຈົ້າກໍມີຊີວິດໃນພຣະບຸດ ແລະໃນພຣະບິດາເຈົ້າເໝືອນກັນ. 25ນີ້ແຫລະ ເປັນພຣະສັນຍາທີ່ພຣະອົງໄດ້ຊົງສັນຍາໄວ້ແກ່ເຮົາທັງຫລາຍ ຄືຊີວິດນິຣັນດອນ. 26ເຮົາຂຽນມາບອກພວກເຈົ້າ ກ່ຽວກັບຜູ້ທີ່ຈະເຮັດໃຫ້ພວກເຈົ້າຫລົງຜິດໄປ. 27ແຕ່ຝ່າຍເຈົ້າທັງຫລາຍ ການຊົງຫົດສົງທີ່ພວກເຈົ້າໄດ້ຮັບຈາກພຣະອົງນັ້ນ ກໍຍັງຕັ້ງຢູ່ກັບພວກເຈົ້າ ແລະພວກເຈົ້າບໍ່ຕ້ອງການໃຫ້ຜູ້ໃດສອນອີກ, ເພາະການຊົງຫົດສົງຂອງພຣະອົງ ກຳລັງສັ່ງສອນພວກເຈົ້າເຖິງທຸກສິ່ງ ແລະເປັນຄວາມຈິງ ບໍ່ແມ່ນຄວາມຕົວະ. ການຊົງຫົດສົງໄດ້ຊົງສອນເຈົ້າທັງຫລາຍຢ່າງໃດ ພວກເຈົ້າຈົ່ງຕັ້ງໝັ້ນຄົງຢູ່ໃນພຣະອົງຢ່າງນັ້ນ. 28ແລະບັດນີ້ ລູກນ້ອຍທັງຫລາຍເອີຍ, ຈົ່ງຕັ້ງໝັ້ນຄົງຢູ່ໃນພຣະອົງເພື່ອວ່າ, ເມື່ອພຣະອົງຊົງສະເດັດມາປາກົດ ເຮົາທັງຫລາຍຈະໄດ້ມີໃຈກ້າ ແລະບໍ່ຫລົບໜ້າຈາກພຣະອົງດ້ວຍຄວາມອັບອາຍ ເມື່ອພຣະອົງສະເດັດມານັ້ນ. 29ຖ້າເຈົ້າທັງຫລາຍຮູ້ວ່າ ພຣະອົງຊົງທ່ຽງທຳ ພວກເຈົ້າກໍຮູ້ໄດ້ວ່າ ທຸກຄົນທີ່ປະຕິບັດຕາມຄວາມທ່ຽງທຳນັ້ນ ກໍບັງເກີດມາຈາກພຣະອົງເໝືອນກັນ.

1 ໂຢຮັນ 31ເບິ່ງແມ! ພຣະບິດາເຈົ້າຊົງໂຜດປະທານຄວາມຮັກແກ່ເຮົາທັງຫລາຍ ເປັນຢ່າງໃດທີ່ພຣະເຈົ້າຊົງເອີ້ນພວກເຮົາວ່າ ບຸດຂອງພຣະອົງ ແລະພວກເຮົາກໍເປັນຢ່າງນັ້ນແລ້ວ. ເຫດທີ່ໂລກບໍ່ຮູ້ຈັກເຮົາທັງຫລາຍ ກໍເພາະເຂົາບໍ່ຮູ້ຈັກພຣະອົງນັ້ນແຫລະ. 2ພວກທີ່ຮັກເອີຍ, ບັດນີ້ເຮົາທັງຫລາຍເປັນບຸດຂອງພຣະເຈົ້າແລ້ວ ແລະຍັງບໍ່ໄດ້ຊົງສຳແດງໃຫ້ຮູ້ຄັກວ່າ ຕໍ່ໄປພວກເຮົາຈະເປັນຢ່າງໃດ ແຕ່ພວກເຮົາຮູ້ວ່າເມື່ອພຣະອົງຈະສະເດັດມາປາກົດນັ້ນ ເຮົາທັງຫລາຍຈະເປັນເໝືອນພຣະອົງ ເພາະວ່າພວກເຮົາຈະເຫັນພຣະອົງ ຢ່າງທີ່ພຣະອົງຊົງເປັນຢູ່ນັ້ນ. 3ແລະທຸກຄົນທີ່ມີຄວາມຫວັງຢ່າງນີ້ໃນພຣະອົງ ກໍຊຳລະຕົນໃຫ້ບໍຣິສຸດ ເໝືອນດັ່ງທີ່ພຣະອົງຊົງບໍຣິສຸດ. 4ທຸກຄົນທີ່ເຮັດບາບ ກໍມີຄວາມຜິດໃນຖານທີ່ຝ່າຝືນກົດບັນຍັດ ເພາະການບາບແມ່ນການຝ່າຝືນກົດບັນຍັດ. 5ພວກເຈົ້າຮູ້ວ່າພຣະອົງໄດ້ມາປາກົດ ເພື່ອຍົກເອົາບາບກຳຂອງມະນຸດ ແລະໃນພຣະອົງນັ້ນບໍ່ມີບາບເລີຍ. 6ດັ່ງນັ້ນ ຜູ້ໃດທີ່ຕັ້ງໝັ້ນຢູ່ໃນພຣະອົງ ຜູ້ນັ້ນກໍບໍ່ເຮັດບາບອີກຕໍ່ໄປ ສ່ວນຜູ້ໃດທີ່ຍັງເຮັດບາບຕາມເຄີຍ ຜູ້ນັ້ນກໍຍັງບໍ່ເຫັນພຣະອົງ ແລະຍັງບໍ່ຮູ້ຈັກພຣະອົງ. 7ລູກນ້ອຍທັງຫລາຍເອີຍ, ຢ່າໃຫ້ຜູ້ໃດຊັກຈູງພວກເຈົ້າໃຫ້ຫລົງ ຜູ້ທີ່ເຮັດຕາມຄວາມທ່ຽງທຳ ກໍເປັນຜູ້ທ່ຽງທຳ ເໝືອນພຣະອົງຜູ້ຊົງທ່ຽງທຳ. 8ຜູ້ທີ່ຍັງເຮັດບາບ ກໍມາຈາກມານຮ້າຍ, ເພາະວ່າມານຮ້າຍໄດ້ເຮັດບາບຕັ້ງແຕ່ຕົ້ນເດີມມາ ພຣະບຸດຂອງພຣະເຈົ້າໄດ້ສະເດັດມາປາກົດ ກໍເພາະເຫດນີ້ແຫລະ ຄືເພື່ອຊົງທຳລາຍກິດຈະການຂອງມານຮ້າຍເສຍ. 9ຜູ້ໃດເກີດຈາກພຣະເຈົ້າ ກໍບໍ່ເຮັດບາບອີກຕໍ່ໄປ ເພາະສະພາບຂອງພຣະອົງຊົງດຳລົງຢູ່ໃນຜູ້ນັ້ນ ແລະຜູ້ນັ້ນກໍບໍ່ອາດເຮັດບາບອີກຕໍ່ໄປ ເພາະຕົນໄດ້ບັງເກີດຈາກພຣະເຈົ້າແລ້ວ. 10ດັ່ງນັ້ນແຫລະ ຈຶ່ງເຫັນໄດ້ວ່າຜູ້ໃດເປັນລູກຂອງພຣະເຈົ້າ ແລະຜູ້ໃດເປັນລູກຂອງມານຮ້າຍ ຄືຜູ້ໃດທີ່ບໍ່ເຮັດຕາມຄວາມທ່ຽງທຳ ຫລືບໍ່ຮັກພີ່ນ້ອງຂອງຕົນ ຜູ້ນັ້ນກໍບໍ່ແມ່ນລູກຂອງພຣະເຈົ້າ. 11ຖ້ອຍຄຳທີ່ພວກເຈົ້າໄດ້ຍິນແລະໄດ້ຟັງມາຕັ້ງແຕ່ຕອນຕົ້ນນັ້ນ ຄືໃຫ້ພວກເຮົາຮັກຊຶ່ງກັນແລະກັນ. 12ຢ່າໃຫ້ເປັນເໝືອນກາອິນ ຜູ້ມາຈາກມານຊົ່ວຮ້າຍ ແລະໄດ້ຂ້ານ້ອງຊາຍຂອງຕົນເສຍ. ດ້ວຍເຫດໃດລາວຈຶ່ງຂ້ານ້ອງ ກໍເພາະການເຮັດຂອງຕົນຊົ່ວ ແລະການເຮັດຂອງນ້ອງນັ້ນຊອບທຳ. 13ພີ່ນ້ອງທັງຫລາຍເອີຍ, ຖ້າໂລກນີ້ກຽດຊັງພວກເຈົ້າຢ່າປະຫລາດໃຈ. 14ຝ່າຍເຮົາຮູ້ແລ້ວວ່າ ພວກເຮົາໄດ້ຍ້າຍອອກຈາກຄວາມຕາຍເຂົ້າສູ່ຊີວິດແລ້ວ ກໍເພາະພວກເຮົາຮັກພີ່ນ້ອງ. ຜູ້ໃດທີ່ບໍ່ຮັກ ຜູ້ນັ້ນກໍຍັງຢູ່ໃນຄວາມຕາຍ. 15ທຸກຄົນທີ່ກຽດຊັງພີ່ນ້ອງຂອງຕົນ ກໍເປັນຜູ້ຂ້າຄົນ ພວກເຈົ້າຮູ້ແລ້ວວ່າ ຜູ້ຂ້າຄົນບໍ່ມີຊີວິດນິຣັນດອນຕັ້ງຢູ່ໃນເຂົາເລີຍ. 16ດັ່ງນີ້ແຫລະ ພວກເຮົາຈຶ່ງຮູ້ຈັກຄວາມຮັກໂດຍທີ່ພຣະຄຣິດໄດ້ສະຫລະຊີວິດຂອງພຣະອົງ ເພື່ອພວກເຮົາ ແລະພວກເຮົາກໍຄວນສະຫລະຊີວິດຂອງເຮົາເພື່ອພີ່ນ້ອງເໝືອນກັນ. 17ແຕ່ຖ້າຜູ້ໃດມີຊັບສົມບັດໃນໂລກນີ້ ແລະເຫັນພີ່ນ້ອງຂອງຕົນຂັດສົນ ແລ້ວຍັງບໍ່ຍອມມີໃຈເມດຕາຊ່ວຍເຫລືອຜູ້ນັ້ນ ຄວາມຮັກຕໍ່ພຣະເຈົ້າຈະດຳລົງຢູ່ໃນຕົນໄດ້ຢ່າງໃດ. 18ລູກນ້ອຍທັງຫລາຍເອີຍ, ຢ່າໃຫ້ພວກເຮົາຮັກດ້ວຍຄວາມເວົ້າແລະດ້ວຍປາກເທົ່ານັ້ນ, ແຕ່ຈົ່ງສະແດງຄວາມຮັກອັນແທ້ຈິງດ້ວຍການກະທຳ. 19ດ້ວຍເຫດນີ້ແຫລະ ພວກເຮົາຈຶ່ງຮູ້ວ່າ ພວກເຮົາຢູ່ຝ່າຍຄວາມຈິງ ຄືພວກເຮົາມີຄວາມໝັ້ນໃຈຕໍ່ໜ້າພຣະເຈົ້າ. 20ຖ້າໃຈຂອງພວກເຮົາກ່າວໂທດໃສ່ພວກເຮົາເອງ ພວກເຮົາກໍຮູ້ວ່າພຣະເຈົ້າໃຫຍ່ກວ່າໃຈຂອງພວກເຮົາ ແລະພຣະອົງກໍຊົງຮູ້ທຸກໆສິ່ງ. 21ເຫດສະນັ້ນ ເພື່ອນທີ່ຮັກທັງຫລາຍຂອງເຮົາເອີຍ, ຖ້າໃຈຂອງພວກເຮົາບໍ່ກ່າວໂທດໃສ່ພວກເຮົາແລ້ວ ພວກເຮົາກໍມີໃຈກ້າມາຢູ່ຊ້ອງໜ້າພຣະເຈົ້າ. 22ແລະເມື່ອພວກເຮົາຂໍສິ່ງໃດຈາກພຣະອົງ ພວກເຮົາກໍໄດ້ຮັບສິ່ງນັ້ນ ເພາະພວກເຮົາເຊື່ອຟັງຂໍ້ຄຳສັ່ງຂອງພຣະອົງ ແລະປະຕິບັດຕາມສິ່ງທີ່ພຣະອົງຊົງພໍພຣະໄທ. 23ກົດບັນຍັດຂອງພຣະເຈົ້າ ຄືໃຫ້ພວກເຮົາເຊື່ອໃນພຣະນາມພຣະເຢຊູຄຣິດເຈົ້າ ພຣະບຸດຂອງພຣະເຈົ້າ ແລະໃຫ້ພວກເຮົາຮັກຊຶ່ງກັນແລະກັນ ເໝືອນດັ່ງທີ່ພຣະອົງຊົງສັ່ງພວກເຮົາ. 24ທຸກຄົນຜູ້ທີ່ຖືຮັກສາບັນດາຂໍ້ບັນຍັດຂອງພຣະເຈົ້າ ກໍຕັ້ງຢູ່ໃນພຣະອົງ ແລະພຣະອົງກໍຊົງສະຖິດຢູ່ໃນພວກເຂົາ ແລະດ້ວຍພຣະວິນຍານທີ່ພຣະອົງໄດ້ປະທານໃຫ້ພວກເຮົານັ້ນ ພວກເຮົາຈຶ່ງຮູ້ວ່າພຣະອົງຊົງສະຖິດຢູ່ໃນພວກເຮົາ.


1 ໂຢຮັນ 41ພວກທີ່ຮັກເອີຍ, ຢ່າເຊື່ອວິນຍານທຸກໆດວງ ແຕ່ຈົ່ງພິສູດວິນຍານທັງຫລາຍນັ້ນວ່າ ມາຈາກພຣະເຈົ້າຫລືບໍ່ ເພາະວ່າມີຜູ້ທຳນວາຍປອມຫລາຍຄົນໄດ້ອອກໄປໃນໂລກ. 2ດັ່ງນີ້ແຫລະ ພວກເຈົ້າຈະສາມາດຮູ້ວ່າເປັນວິນຍານທີ່ມາຈາກພຣະເຈົ້າໄດ້ ຄືທຸກວິນຍານທີ່ຮັບຮູ້ວ່າ ພຣະເຢຊູຄຣິດເຈົ້າໄດ້ສະເດັດມາຮັບຊາດເປັນມະນຸດ ວິນຍານນັ້ນກໍມາຈາກພຣະເຈົ້າ. 3ແຕ່ທຸກວິນຍານທີ່ບໍ່ຍອມຮັບພຣະເຢຊູເຈົ້າ ວິນຍານນັ້ນກໍບໍ່ໄດ້ມາຈາກພຣະເຈົ້າ. ວິນຍານນັ້ນແຫລະ ເປັນວິນຍານຂອງຜູ້ຕໍ່ສູ້ພຣະຄຣິດ ຊຶ່ງພວກເຈົ້າໄດ້ຍິນວ່າຈະມາ ແລະບັດນີ້ກໍຢູ່ໃນໂລກແລ້ວ. 4ລູກນ້ອຍທັງຫລາຍເອີຍ, ສ່ວນເຈົ້າທັງຫລາຍກໍເປັນຝ່າຍພຣະເຈົ້າ ແລະໄດ້ຊະນະເຂົາເຫລົ່ານັ້ນແລ້ວ, ເພາະວ່າພຣະອົງຜູ້ຊົງສະຖິດຢູ່ໃນພວກເຈົ້າ ຊົງເປັນໃຫຍ່ກວ່າຜູ້ນັ້ນທີ່ຢູ່ໃນໂລກ. 5ຜູ້ທຳນວາຍປອມເຫລົ່ານັ້ນເວົ້າກ່ຽວກັບເລື່ອງຂອງໂລກ ແລະເປັນຂອງໂລກ. ສະນັ້ນ ໂລກຈຶ່ງເຊື່ອຟັງພວກເຂົາ. 6ສ່ວນເຮົາທັງຫລາຍເປັນຝ່າຍພຣະເຈົ້າ ຜູ້ໃດທີ່ຮູ້ຈັກພຣະເຈົ້າກໍຟັງພວກເຮົາ, ຜູ້ໃດທີ່ບໍ່ເປັນຝ່າຍພຣະເຈົ້າ ກໍບໍ່ຟັງພວກເຮົາ. ດັ່ງນີ້ແຫລະ ພວກເຮົາຈຶ່ງບອກໄດ້ວ່າວິນຍານຝ່າຍຄວາມຈິງ ແລະວິນຍານຝ່າຍຄວາມຜິດນັ້ນແຕກຕ່າງກັນຢ່າງໃດ. 7ເພື່ອນທີ່ຮັກທັງຫລາຍເອີຍ, ໃຫ້ພວກເຮົາຮັກຊຶ່ງກັນແລະກັນ ເພາະວ່າຄວາມຮັກມາຈາກພຣະເຈົ້າ. ທຸກຄົນທີ່ຮັກກໍບັງເກີດມາຈາກພຣະເຈົ້າ ແລະຮູ້ຈັກພຣະເຈົ້າ. 8ຜູ້ໃດທີ່ບໍ່ຮັກກໍບໍ່ຮູ້ຈັກພຣະເຈົ້າ ເພາະພຣະເຈົ້າຊົງເປັນຄວາມຮັກ. 9ຝ່າຍພຣະເຈົ້າໄດ້ຊົງສຳແດງຄວາມຮັກຂອງພຣະອົງສຳລັບພວກເຮົາ ໂດຍໄດ້ໃຊ້ພຣະບຸດອົງດຽວຂອງພຣະອົງເຂົ້າມາໃນໂລກ, ເພື່ອວ່າພວກເຮົາຈະມີຊີວິດດ້ວຍພຣະບຸດນັ້ນ. 10ຄວາມຮັກທີ່ເຮົາກ່າວເຖິງນີ້ ບໍ່ແມ່ນເຮົາທັງຫລາຍໄດ້ຮັກພຣະເຈົ້າ ແຕ່ພຣະເຈົ້າໄດ້ຊົງຮັກພວກເຮົາ ແລະຊົງໃຊ້ພຣະບຸດຂອງພຣະອົງສະເດັດມາ ເພື່ອເປັນເຄື່ອງບູຊາໄຖ່ບາບກຳຂອງພວກເຮົາ. 11ເພື່ອນທີ່ຮັກທັງຫລາຍເອີຍ, ຖ້າພຣະເຈົ້າຊົງຮັກພວກເຮົາຢ່າງນັ້ນແລ້ວ ພວກເຮົາຄວນຮັກຊຶ່ງກັນແລະກັນ. 12ຝ່າຍພຣະເຈົ້າບໍ່ມີຜູ້ໃດໄດ້ເຫັນພຣະອົງຈັກເທື່ອ. ຖ້າເຮົາທັງຫລາຍຮັກຊຶ່ງກັນແລະກັນ ພຣະເຈົ້າກໍຊົງສະຖິດຢູ່ໃນເຮົາທັງຫລາຍ ແລະຄວາມຮັກຂອງພຣະອົງກໍສົມບູນໃນພວກເຮົາ. 13ດັ່ງນີ້ແຫລະ ເຮົາທັງຫລາຍຈຶ່ງຮູ້ວ່າພວກເຮົາຢູ່ໃນພຣະອົງ ແລະພຣະອົງຊົງສະຖິດຢູ່ໃນພວກເຮົາ ເພາະພຣະອົງໄດ້ຊົງໂຜດປະທານພຣະວິນຍານຂອງພຣະອົງແກ່ພວກເຮົາ. 14ຝ່າຍພວກເຮົາໄດ້ເຫັນ ແລະເປັນພະຍານວ່າ ພຣະບິດາເຈົ້າໄດ້ຊົງໃຊ້ພຣະບຸດມາ ເປັນພຣະຜູ້ໂຜດຊ່ວຍຂອງມະນຸດສະໂລກ. 15ຜູ້ໃດຍອມຮັບວ່າພຣະເຢຊູເຈົ້າ ຊົງເປັນພຣະບຸດຂອງພຣະເຈົ້າ, ພຣະເຈົ້າກໍຊົງສະຖິດຢູ່ໃນຜູ້ນັ້ນ ແລະຜູ້ນັ້ນກໍຕັ້ງຢູ່ໃນພຣະເຈົ້າ. 16ຝ່າຍເຮົາທັງຫລາຍໄດ້ຮູ້ຈັກ ແລະໄດ້ເຊື່ອໃນຄວາມຮັກທີ່ພຣະເຈົ້າໄດ້ຊົງມີຕໍ່ພວກເຮົາ ພຣະເຈົ້າຊົງເປັນຄວາມຮັກ ຜູ້ໃດທີ່ຕັ້ງຢູ່ໃນຄວາມຮັກ ກໍຢູ່ໃນພຣະເຈົ້າ ແລະພຣະເຈົ້າກໍຊົງສະຖິດຢູ່ໃນຜູ້ນັ້ນ. 17ໃນຂໍ້ນີ້ແຫລະ ຄວາມຮັກເປັນທີ່ສຳເລັດໃນເຮົາທັງຫລາຍ, ເພື່ອວ່າພວກເຮົາຈະໄດ້ມີຄວາມແນ່ໃຈໃນວັນພິພາກສາ ເພາະພຣະຄຣິດຊົງເປັນຢ່າງໃດ ເຮົາທັງຫລາຍຢູ່ໃນໂລກນີ້ກໍເປັນຢ່າງນັ້ນ. 18ໃນຄວາມຮັກນັ້ນ ບໍ່ມີຄວາມຢ້ານ. ຄວາມຮັກອັນຄົບບໍຣິບູນກໍຂັບໄລ່ຄວາມຢ້ານທຸກຢ່າງອອກໄປ. ເຫດສະນັ້ນ ຜູ້ທີ່ຢ້ານກໍຍັງບໍ່ສຳເລັດໃນຄວາມຮັກ ເພາະຄວາມຢ້ານມີຄວາມສຳພັນກັບການລົງໂທດ. 19ຝ່າຍເຮົາທັງຫຼາຍໄດ້ຮັກ ເພາະພຣະອົງຊົງຮັກພວກເຮົາກ່ອນ. 20ຖ້າຜູ້ໃດເວົ້າວ່າ, “ຂ້າພະເຈົ້າຮັກພຣະເຈົ້າ” ແຕ່ຍັງກຽດຊັງພີ່ນ້ອງຂອງຕົນຢູ່ ຜູ້ນັ້ນກໍເປັນຄົນຂີ້ຕົວະ. ດ້ວຍວ່າ, ເມື່ອລາວບໍ່ຮັກພີ່ນ້ອງທີ່ຕາເຫັນແລ້ວ ຈະສາມາດຮັກພຣະເຈົ້າທີ່ຕາບໍ່ເຫັນໄດ້ຢ່າງໃດ? 21ຂໍ້ຄຳສັ່ງທີ່ພຣະອົງໄດ້ມອບແກ່ພວກເຮົາມີດັ່ງນີ້: “ຜູ້ໃດທີ່ຮັກພຣະເຈົ້ານັ້ນ ຈົ່ງຮັກພີ່ນ້ອງຂອງຕົນເໝືອນກັນ.”

1 ໂຢຮັນ 51ຜູ້ໃດທີ່ເຊື່ອວ່າພຣະເຢຊູເຈົ້າຊົງເປັນພຣະຄຣິດ ຜູ້ນັ້ນກໍເກີດຈາກພຣະເຈົ້າ ແລະທຸກຄົນທີ່ຮັກພຣະເຈົ້າຜູ້ຊົງໃຫ້ກຳເນີດ ຜູ້ນັ້ນກໍຮັກລູກຂອງພຣະອົງເໝືອນກັນ. 2ໂດຍຂໍ້ນີ້ແຫລະ ເຮົາທັງຫລາຍຈຶ່ງຮູ້ວ່າ ພວກເຮົາຮັກລູກທັງຫລາຍຂອງພຣະເຈົ້າ ຄືເມື່ອພວກເຮົາຮັກພຣະເຈົ້າ ແລະຖືຮັກສາບັນດາກົດບັນຍັດຂອງພຣະອົງ. 3ເພາະນີ້ແຫລະ ເປັນຄວາມຮັກຕໍ່ພຣະເຈົ້າ ຄືໃຫ້ເຮົາທັງຫລາຍຖືຮັກສາບັນດາກົດບັນຍັດຂອງພຣະອົງ ແລະກົດບັນຍັດຂອງພຣະອົງນັ້ນກໍບໍ່ຍາກໜັກເກີນໄປ, 4ເພາະທຸກຄົນທີ່ເກີດຈາກພຣະເຈົ້າ ກໍມີໄຊຕໍ່ໂລກ ແລະຄວາມເຊື່ອຂອງພວກເຮົານີ້ແຫລະ ເປັນໄຊຊະນະທີ່ຊະນະຕໍ່ໂລກ. 5ຜູ້ໃດໜໍ ທີ່ໄຊຊະນະຕໍ່ໂລກ ຖ້າບໍ່ແມ່ນຜູ້ທີ່ເຊື່ອວ່າ ພຣະເຢຊູເຈົ້າຊົງເປັນພຣະບຸດຂອງພຣະເຈົ້າ. 6ນີ້ແຫລະ ຜູ້ທີ່ໄດ້ມາໂດຍນໍ້າແລະພຣະໂລຫິດ ຄືພຣະເຢຊູເຈົ້າ ບໍ່ແມ່ນດ້ວຍນໍ້າສິ່ງດຽວ ແຕ່ດ້ວຍນໍ້າແລະພຣະໂລຫິດ ແລະພຣະວິນຍານຊົງເປັນພະຍານ ເພາະພຣະວິນຍານຊົງເປັນຄວາມຈິງ. 7ມີພະຍານຢູ່ສາມປະການ 8ຄື: ພຣະວິນຍານ ນໍ້າ ແລະພຣະໂລຫິດ ແລະພະຍານທັງສາມນີ້ກໍສອດຄ່ອງກັນ. 9ຖ້າເຮົາທັງຫລາຍຮັບພະຍານຫລັກຖານຂອງມະນຸດ ພະຍານຫລັກຖານຂອງພຣະເຈົ້າກໍໃຫຍ່ກວ່າ, ເພາະວ່ານີ້ແຫລະ ພະຍານຫລັກຖານຂອງພຣະເຈົ້າ ຄືພຣະອົງໄດ້ຊົງເປັນພະຍານອ້າງເຖິງພຣະບຸດຂອງພຣະອົງ. 10ຜູ້ທີ່ເຊື່ອໃນພຣະບຸດຂອງພຣະເຈົ້າ ກໍມີພະຍານຢູ່ໃນຕົວເອງ ຜູ້ທີ່ບໍ່ເຊື່ອພຣະເຈົ້າ ກໍໄດ້ເຮັດໃຫ້ພຣະອົງເປັນຜູ້ຕົວະ ເພາະຕົນບໍ່ໄດ້ເຊື່ອຄຳພະຍານ ທີ່ພຣະເຈົ້າໄດ້ຊົງເປັນພະຍານອ້າງເຖິງພຣະບຸດຂອງພຣະອົງ. 11ນີ້ແຫລະ ເປັນພະຍານຫລັກຖານນັ້ນ ຄືວ່າພຣະເຈົ້າໄດ້ຊົງໂຜດປະທານຊີວິດນິຣັນດອນໃຫ້ເຮົາທັງຫລາຍ ແລະຊີວິດນີ້ມີຢູ່ໃນພຣະບຸດຂອງພຣະອົງ. 12ຜູ້ທີ່ມີພຣະບຸດກໍມີຊີວິດ ຜູ້ທີ່ບໍ່ມີພຣະບຸດຂອງພຣະເຈົ້າ ກໍບໍ່ມີຊີວິດ. 13ຂໍ້ຄວາມເຫລົ່ານີ້ ເຮົາຂຽນມາເຖິງເຈົ້າທັງຫລາຍ ທີ່ເຊື່ອໃນພຣະນາມພຣະບຸດຂອງພຣະເຈົ້າ ເພື່ອເຈົ້າທັງຫລາຍຈະໄດ້ຮູ້ວ່າ ພວກເຈົ້າມີຊີວິດນິຣັນດອນ. 14ນີ້ແຫລະ ເປັນຄວາມແນ່ໃຈທີ່ເຮົາທັງຫລາຍມີຢູ່ຕໍ່ພຣະອົງ ຄືຖ້າພວກເຮົາທູນຂໍສິ່ງໃດທີ່ເປັນຕາມນໍ້າພຣະໄທຂອງພຣະອົງ ພຣະອົງກໍຊົງໂຜດຟັງພວກເຮົາ. 15ແລະຖ້າເຮົາທັງຫລາຍຮູ້ວ່າພຣະອົງຊົງໂຜດຟັງແລ້ວ ເມື່ອພວກເຮົາທູນຂໍສິ່ງໃດ ພວກເຮົາຈຶ່ງຮູ້ວ່າ ພວກເຮົາໄດ້ຮັບສິ່ງທີ່ພວກເຮົາຂໍຈາກພຣະອົງນັ້ນ. 16ຖ້າຜູ້ໃດເຫັນພີ່ນ້ອງຂອງຕົນເຮັດບາບທີ່ບໍ່ນຳໄປສູ່ຄວາມຕາຍ ຜູ້ນັ້ນຈົ່ງພາວັນນາອະທິຖານຕໍ່ພຣະເຈົ້າ ແລ້ວພຣະອົງຈະຊົງໂຜດປະທານຊີວິດໃຫ້ແກ່ຜູ້ທີ່ເຮັດບາບທີ່ບໍ່ນຳໄປສູ່ຄວາມຕາຍນັ້ນ, ແຕ່ຜິດບາບທີ່ນຳໄປສູ່ຄວາມຕາຍກໍມີຢູ່ ເຮົາບໍ່ໄດ້ເວົ້າວ່າໃຫ້ພາວັນນາອະທິຖານໃນເລື່ອງຜິດບາບຢ່າງນັ້ນ. 17ການອະທຳທຸກຢ່າງກໍເປັນຜິດບາບ ແຕ່ການບາບທີ່ບໍ່ນຳໄປສູ່ຄວາມຕາຍກໍມີຢູ່. 18ເຮົາທັງຫລາຍຮູ້ແລ້ວວ່າ ຄົນທີ່ເກີດຈາກພຣະເຈົ້າ ກໍບໍ່ເຮັດບາບຕາມເຄີຍ, ແຕ່ພຣະອົງຜູ້ຊົງບັງເກີດແຕ່ພຣະເຈົ້າ ກໍຊົງຮັກສາຄົນນັ້ນ ແລະມານຊົ່ວຮ້າຍບໍ່ສາມາດຈັບຕ້ອງຄົນນັ້ນ. 19ເຮົາທັງຫລາຍຮູ້ແລ້ວວ່າ ພວກເຮົາເກີດຈາກພຣະເຈົ້າ ມະນຸດສະໂລກທັງໝົດຈົມຢູ່ໃຕ້ອຳນາດຂອງມານຊົ່ວຮ້າຍ. 20ເຮົາທັງຫລາຍຮູ້ວ່າ ພຣະບຸດຂອງພຣະເຈົ້າສະເດັດມາ ແລະໄດ້ຊົງໂຜດປະທານສະຕິປັນຍາໃຫ້ແກ່ພວກເຮົາ ເພື່ອໃຫ້ພວກເຮົາຮູ້ຈັກພຣະຜູ້ຊົງທ່ຽງແທ້ ແລະເຮົາທັງຫລາຍຢູ່ໃນພຣະຜູ້ຊົງທ່ຽງແທ້ນັ້ນ ຄືໃນພຣະເຢຊູຄຣິດເຈົ້າພຣະບຸດຂອງພຣະອົງ, ນີ້ແຫລະ ເປັນພຣະເຈົ້າອົງທ່ຽງແທ້ແລະເປັນຊີວິດນິຣັນດອນ. 21ລູກນ້ອຍທັງຫລາຍຂອງເຮົາເອີຍ ຈົ່ງລະວັງຮັກສາຕົນຈາກບັນດາຮູບເຄົາຣົບ.

 http://www.bible.is/LAOUBS/1John/1/D

Nenhum comentário:

Postar um comentário