sábado, 6 de junho de 2015

ZAAN =LWA MI 1: Mwan



ZAAN =LWA MI 11'Kee- san 'drunyan zisan' bhla 'ɛ ma, -Jan 'Nrale- 'la bole -yrɛ ma -si na mɛɛ ni 'bhɛ 'yaa- ye. 'Bhɛɛ- 'duŋ- 'o 'bhɛ -Jan 'ɛ =maa, 'bhɛ 'pegee- 'wa =ya 'o 'yrɛbhɛ- mu 'le, 'woo 'yrɛkpa -a ta kplankplan, 'bhɛɛ- 'o =kwan -a ma 'o gbɛ mu 'le. 2Mɛɛ 'la zan -yaa bole -yrɛ ma -si na mɛɛ ni 'bhɛ 'pwɛla- -a -yi. 'Yele- -yaa bole -yrɛ ma -si 'la -daŋ' 'laa -o 'bhɛ ma 'bhɛ -le, 'bhɛɛ- 'yele- -yaa 'o Dɛ -din 'waati 'ɛ 'kpɛn ba, 'bhɛɛ- -e -pwɛla -a -yi 'o ni. 'Bhɛla- -zayile 'woo- -a 'srɛya- klɛ 'zi 'ka ni. 3'O mɔɔ pɛ 'la =ya, 'bhɛɛ- 'ke 'wa =maa, 'o mɔɔ 'bhɛ -la 'wo 'zi 'ka ni 'ezin-; 'kooko- 'o 'pegee 'ka mu klɛ 'kpaledomaya 'yi. 'Bhɛɛ- -kɔɔ' 'pegee -kɔɔ' Dɛ, 'bhɛɛ- -a Gbe Zesu Krisi klɛ 'kpaledomaya 'yi. 4'Bhɛ 'yi, 'o 'bhɛ -za mu 'ɛ 'sɛwɛdɛ 'zi 'ka ni, 'kooko- -kɔɔa' zrukpaaleya 'ɛ -lɛpa'. 5'O -jan 'la =maa Zesu Krisi 'lii, 'bhɛɛ- 'ke 'woo- 'bhɛ 'wo zii' 'ka ni, 'bhɛ -le -gɛ: -Waanbhaa' -o 'ke 'tɛbhile 'le, 'bhɛɛ- -gblo do 'kpɔ 'laa -o -a -yi. 6'Ke -kɔɔ' 'a =pia dɔɔ -kɔɔ' 'pegee 'yee- -Waanbhaa' -o 'kpaledomaya 'yi, 'bhɛɛ- 'ke -kɔɔ' -o -gblo 'yi za mu klɛ 'zi, 'bhɛ bhla 'ɛ ba -kɔɔ' -o 'ke bhlanii- mu 'le, 'bhɛɛ- -kɔɔ' 'laa -o 'taawo zii' wlan ta. 7'Duŋ-, 'ke -kɔɔ' -o 'taawo zii' 'tɛbhile ba 'bhii- 'yee- -Waanbhaa' 'gbu -o 'ke 'tɛbhile 'le gɔnɛ- 'la gbɛɛn-, -kɔɔ' 'kpɛn -o 'kpaledomaya 'yi -kɔɔ' 'pegee -kɔɔ' 'yɔɔn mu 'ɛ 'le; 'bhɛɛ- 'bhɛ klɛgbɛya 'ɛ 'yi, -a Gbe Zesu yiɛn 'ɛ 'bhɛ -kɔɔa' -za 'yɔɔ- mu 'ɛ 'kpɛn go, 'bhɛɛ- 'bhɛ -kɔɔ' klɛ 'weŋ. 8'Ke -kɔɔ' 'a =pia dɔɔ -za 'yɔɔ- laa -o -kɔɔ' 'yi, -kɔɔ' -o -kɔɔ' 'gbu 'yini zii' 'bhɛɛ- gbɛɛn- bhe, 'bhɛɛ- wlan 'laa -o -kɔɔ' 'yi. 9'Ke -kɔɔ' -kɔɔa' -za 'yɔɔ- mu 'ɛ -dwa -Waanbhaa' -yrɛ =la, 'bhɛɛ- 'ke -kɔɔ' -o =pia -a ni kpataakpa, -e nu -kɔɔa' -za 'yɔɔ- mu 'ɛ ma -sroma 'yanlɛ-, 'bhɛ 'pegee -e nu -kɔɔ' klɛza 'yɔɔ- mu 'ɛ 'kpɛn golɛ -kɔɔ' 'yi, 'bhɛɛ- -e -kɔɔ' klɛ 'weŋ. -Amasrɔyi, -Waanbhaa' -liijan' -o do, 'bhɛɛ- -a -lɛdɔɔle -o. 10'Duŋ-, 'ke -kɔɔ' 'a =pia dɔɔ -kɔɔ' 'laa -za 'yɔɔ- klɛlɛ, 'bhɛ 'yi, -kɔɔ' -Waanbhaa' klɛ 'ke bhlanii- 'le; 'bhɛɛ- yaa -jan 'ɛ 'kɛla =woa -kɔɔ' 'laa dɔlɛ 'bhɛ =la.


ZAAN =LWA MI 21'Ŋ 'nɛ mu, 'ŋ 'yoo- -jan mu 'lɛɛ- 'sɛwɛdɛ 'zi 'ka ni, 'kooko- 'ka 'laa -za 'yɔɔ- klɛ. 'Duŋ-, 'ke mɛɛ 'la zan -za 'yɔɔ- =kla, -kɔɔa' mɛɛ do -o -kɔɔ' Dɛ -Waanbhaa' -din 'bhɛ -le -kɔɔ' tagwledan mi 'le, 'bhɛ -le 'ke Zesu Krisi 'le, mɛɛ -lɛdɔɔle -le 'kɛle-. 2'Yele- 'a 'gbu =kla -kɔɔ' ma 'sraka 'le -kɔɔa' -za 'yɔɔ- mu 'ɛ -zayi', 'kooko- -Waanbhaa' -kɔɔa' -za 'yɔɔ- mu 'ɛ ma -sroma yan. 'Duŋ- yaa klɛlɛ 'sraka 'le -kɔɔ' mu do -kplɛn 'kpɔ a -za 'yɔɔ- mu -sroma 'yan zayi', -e =kla 'sraka 'le 'drunyan 'yi mu 'ɛ 'kpɛn a -za 'yɔɔ- mu ma -sroma 'yanza- -la -le. 3'Ke -kɔɔ' -Waanbhaa' a -jan mu 'ɛ 'klɔsikun, -kɔɔ' 'a 'yaango- bhɛɛ- ma 'bhii- -kɔɔ 'a dɔ. 4'Ke mɛɛ 'la zan 'a =pia dɔɔ: "'Mi 'a dɔ", 'Bhɛɛ- 'ke 'bhɛ zan laa -yaa' -jan mu 'ɛ 'klɔsikun, 'bhɛ zan -o 'ke bhlanii- 'le, 'bhɛɛ- wlan laa -o 'bhɛ zan 'ɛ 'yi. 5'Duŋ-, 'ke mɛɛ 'la zan -yaa' -jan 'ɛ 'klɔsikun, 'bhɛ zan 'a zrɔn 'bhɛ ma kpataakpa 'bhii- -Waanbhaa' 'sɔniya 'ɛ 'lɛpale -o 'bhɛ zru 'ɛ 'yi. -Kɔɔ' 'a 'yaango- 'kɛla ma 'bhii- -kɔɔ' mu 'pegee -Waanbhaa' -o 'kpaledomaya 'yi, 'bhɛ -le -gɛ: 6'Ke mɛɛ 'la zan 'a =pia dɔɔ -o 'pegee -Waanbhaa' -o 'kpaledomaya 'yi, 'bhɛ zan 'taawogbɛya 'ɛ klɛ 'bhii- Zesu 'taawoa= gɔnɛ- 'la gbɛɛn-. 7'Ŋ 'yiɛnii mu, 'naa -o 'toŋ drɛɛ 'kpa zii' 'ka ni. 'Ŋ 'toŋ gwe 'la =pia 'ka ni 'elwale gban -sɔ 'bhɛɛ- 'ke 'ka -dwa 'bhɛ -la bhe 'yee- -Jan 'Nrale- 'lɛɛ- 'wole- zisan' bhla 'ɛ zi, 'bhɛ -le 'kɛle-. 'Yee- 'toŋ gwe 'ɛ 'yele- 'ke 'ka -jan 'la =maa 'bhɛ 'le. 8'Bhɛɛ- 'duŋ-, 'ŋ sɔ -a pele- dɔɔ 'ŋ 'yoo- 'toŋ drɛɛ -la 'sɛwɛdɛ 'zi 'ka ni 'ezin-; -wa drɛɛya 'ɛ ye Zesu 'yi, 'bhɛɛ- -wa ye 'ka mu 'yi 'ezin-. -Amasrɔyi, -gblo mu 'ɛ -woo 'kan zii', 'bhɛɛ- 'tɛbhile -zeze 'gbu 'ɛ 'bhɛ 'bhile- -saan gban. 9'Ke mɛɛ 'la zan 'a =pia dɔɔ 'bhɛ -o 'taawo zii' 'tɛbhile 'ɛ ba, 'bhɛɛ- 'ke -a nɛɛnɛ- -za 'laa sɔ -a ni, 'bhɛ zan 'ɛ 'bhɛ -o -li -gblo -gbɛnɛ -la -yi. 10'Ke mɛɛ 'la zan nɛɛnɛ- -za sɔ -a ni, 'bhɛ zan 'ɛ 'bhɛ -o 'tɛbhile 'ɛ ba. 'Bhɛ 'yi, -za 'yɔɔ- do 'kpɔ 'laa -o -a -yi 'ke 'bhɛ sɔ klɛle- 'ke mɛɛ -bhɛɛke' baa- pɛ 'le -za 'yɔɔ- 'yi. 11'Duŋ-, 'ke mɛɛ 'la zan nɛɛnɛ- vɛnsi -a yin 'lii, 'bhɛ zan 'ɛ 'bhɛ -o -gblo 'yi. -Yoo 'taawo zii' -gblo 'yi; 'bhɛɛ- yaa -a geyrɛ dɔ, -amasrɔyi -gblo -kpaa -a -yrɛ ta. 12'Ŋ 'nɛ mu, 'ŋ 'yoo- -jan 'lɛɛ- 'bhɛɛ- 'sɛwɛdɛ 'zi 'ka ni, -amasrɔyi -Waanbhaa' 'kaa- -za 'yɔɔ- mu 'ɛ ma -sroma -yaan Krisi 'tɔ 'ɛ -zayi'. 13-Nɛ dɛ mu, 'ŋ 'yoo- -jan 'lɛɛ- 'bhɛɛ- 'sɛwɛdɛ 'zi 'ka ni, -amasrɔyi Krisi 'la -ya -yrɛ ma 'kee- san 'drunyan zisan' bhla 'ɛ ma, 'ka 'bhɛ dɔ. -Zwan mu 'pegee -gbla mu, 'ŋ 'yoo- -jan 'lɛɛ- 'bhɛɛ- 'sɛwɛdɛ 'zi 'ka ni, -amasrɔyi 'ka 'seŋgwa- 'ke -Setran' 'le. 'Ŋ 'nɛ mu, 'ŋ -jan 'lɛɛ- 'bhɛɛ- 'sɛwɛdɛ 'zi 'ka ni, -amasrɔyi 'ka -kɔɔ' Dɛ -Waanbhaa' -dwa. 14-Nɛ dɛ mu, 'ŋ -jan 'lɛɛ- 'bhɛɛ- 'sɛwɛdɛ 'zi 'ka ni, -amasrɔyi mɛɛ 'la zan -o -a -yrɛ ma 'kee- san 'drunyan zisan' bhla 'ɛ ma, 'ka 'bhɛ zan 'ɛ dɔ. -Zwan mu 'pegee -gbla mu, 'ŋ -jan 'lɛɛ- 'bhɛɛ- 'sɛwɛdɛ 'zi 'ka ni, -amasrɔyi 'ka -o 'eglɔɔle 'bhɛɛ- -Waanbhaa' a -jan 'ɛ -yoo 'ka 'kpee, 'bhɛɛ- 'ka 'seŋgwa- 'ke -Setran' 'le. 15'Drunyan -za 'laa 'sɔlɛ- 'ka ni, 'bhɛɛ- -a -yi pɛ 'kedo- 'kpɔ -za 'laa 'sɔlɛ- 'ka ni 'ezin-. 'Ke 'drunyan -za sɔ mɛɛ 'la zan ni, -kɔɔ' Dɛ -Waanbhaa' a 'sɔniya 'ɛ yaa -o 'bhɛ zan zru 'ɛ 'yi. 16-Amasrɔyi, -za 'yɔɔ- klɛ -lrɔ 'la dɔ mɛɛ 'flɛ 'ɛ ma oo, mɛɛ -yrɛ 'bhɔpɛ- mu oo, 'bhɛ 'pegee 'ke mɛɛ 'e 'gbu magbaandɛ -a 'kɔɔpɛ- -zayi', 'bhɛ -za mu 'la bhe, 'mu 'kpɛn -o 'ke 'drunyan 'yi pɛ mu 'le. -O do 'kpɔ 'laa da -kɔɔ' Dɛ -Waanbhaa' ba, 'duŋ- -o da 'drunyan -la -yi. 17'Drunyan -o 'ke 'kanpɛ- 'le, 'bhɛ 'pegee -a -yi mɛɛ -yrɛ 'bhɔpɛ- mu 'ɛ 'kpɛn. 'Duŋ- 'ke mɛɛ 'la zan -Waanbhaa' zru maza klɛ, 'bhɛ zan bo 'bhɛ 'yrɛ ma, 'bhɛɛ- -daŋ' 'laa klɛ -yaa' bole -yrɛ ma -si 'ɛ ma. 18'Ŋ 'nɛ mu, 'drunyan 'yan bhla 'ɛ =bhwa -wa -din! 'Kaa =maa dɔɔ Krisi 'Sɔɔnnii 'ɛ -yoo zan nulɛ; 'bhɛɛ- 'duŋ-, Krisi 'sɔɔnnii -bebe mu -nwa gban -zɔn, 'wa 'yaango- 'bhɛɛ- ma 'bhii- 'drunyan 'yan yi 'ɛ =bhwa -wa -din. 19'Woo- Krisi 'sɔɔnnii mu 'la bhe, -o -daa -kɔɔ' 'pleŋ, 'duŋ- waa -yaa -kɔɔ' a pɛ mɛɛ -zeze mu 'gbu 'le. -Amasrɔyi, 'ke -o 'kpa bi -kɔɔ' a pɛ mɛɛ mu 'le, -o -yaa nu bolɛ -kɔɔ' ba. -O golawoa -kɔɔ' ba, -wa ye 'bhɛɛ- ma kpataakpa 'bhii- -o do 'kpɔ 'laa -yaa -kɔɔ' 'a pɛ mɛɛ mu 'le. 20'Bhɛɛ- 'duŋ-, 'ka mu laa -o 'bhii- 'woo- mu gbɛɛn-. 'Ka mu Lii 'Weŋ 'ɛ 'srɔɔwoa- Krisi 'la -yoo 'weŋ 'bhɛ 'kɔɔ. 'Bhɛɛ- -zayaangoleya -o 'ka 'kpɛn 'kɔɔ. 21'Ŋ 'lɛtrɛ 'lɛɛ- =kpaa 'ka ni, yaa klɛlɛ 'ka ni 'bhii- 'ka 'laa wlan 'ɛ dɔ; 'duŋ- 'ka wlan 'ɛ dɔ, 'bhɛɛ- 'kaa 'yaango- 'bhii- bhla do 'kpɔ 'laa da wlan 'ɛ ba. 22'Bhɛ 'yi, 'ke mɛɛ 'la zan 'a =pia dɔɔ Zesu 'laa -o 'ke Mɛɛ -Bhee mi -kpɔsɔɔ Krisi 'le, bhlanii- -kaan 'bhɛ zan 'ɛ ta ɛɛ? 'Bhɛ zan -le 'ke bhlanii- 'ɛ 'le, 'bhɛɛ- 'bhɛ -le 'ke Krisi -Sɔɔnnii' 'ɛ 'le. -Amasrɔyi, -ya -baŋgwa -Nɛ Dɛ 'ɛ 'pegee -a Gbe 'ɛ 'yi. 23Wlan 'ɛ ni, 'ke mɛɛ 'la zan 'e -baŋgwa -Nɛ 'ɛ 'yi, 'bhɛ zan 'ɛ 'bhɛ 'e -baŋgwa -a Dɛ 'yi 'ezin- 'bhɛɛ- gbɛɛn- bhe. 'Bhɛɛ- 'ke mɛɛ 'la zan -Nɛ 'ɛ dɔ, -a Dɛ -o 'ezin- 'bhɛ zan 'ɛ ba. 24'Bhɛla- -yile, 'ka -jan 'la =maa 'kee- san -Jan 'Nrale- 'ɛ 'wole zisan bhla 'ɛ ma, 'bhɛ -jan 'ɛ bo 'ka 'kpee. 'Ka -jan 'la =maa 'kee- san -Jan 'Nrale- 'ɛ 'wole- zisan' bhla 'ɛ ma, 'ke 'bhɛ =bwa 'ka 'kpee, 'ka mu 'pegee -Nɛ 'bhɛɛ- -a Dɛ 'ka 'kpale- bo do ma. 25'Bhɛɛ- Krisi 'a 'liiwli- -naa -za 'la 'naza- ta -kɔɔ' ni 'bhɛ -le 'ke -Waanbhaa' ba bole -yrɛ ma -si 'la -daŋ' 'laa -o 'bhɛ ma 'bhɛɛ- 'le. 26Mɛɛ 'la zan mu -o 'ka 'niyrɛ- -glin 'zi, 'ŋ 'yoo- 'sɛwɛdɛ 'zi 'ka ni 'wola- ba zayi'; 'kooko- 'ka 'ka 'yrɛkpa 'ka 'gbu ba 'elrele -o ma. 27'Ka mu 'gbu, Krisi Lii 'Weŋ 'ɛ =naa 'ka ni. -A Lii 'Weŋ 'ɛ bole -o 'ka 'yi bhe, 'bhɛla- -yile 'ka maza laa -o mɛɛ -bhɛɛke' do ma 'ke 'bhɛ 'ka daan. Wlan 'gbu 'ɛ ni, Lii 'Weŋ 'ɛ -yoo 'ka daanlawo zii' -za 'kpɛn 'la 'le bhe 'mu 'kpɛn -o 'ke wlan 'le, 'bhɛɛ- bhla laa -o 'mu ba. 'Bhɛla- -yile, -e 'ka daan 'zi -za mu 'la 'le bhe, -kaa -o -klɔsikun, 'bhɛɛ- 'ka 'pegee Krisi 'kpale- bo do ma. 28'Bhɛ 'yi -zɔn, 'ŋ 'nɛ mu, 'ka mu 'pegee Krisi 'kpale- bo do ma; 'kooko- 'kee- -pwɛla -a -yi yi 'la 'le, -e bhɔ -kɔɔ' ta 'ke -kɔɔ' 'kpale- -o -a -yi. 'Bhɛɛ- -yrala' laa dɔ -kɔɔ' ma -a nu 'yi 'ɛ 'le, 'ke -kɔɔ' 'pleŋgole klɛ -a ma. 29'Ke 'kaa 'yaango- 'bhii- Krisi 'lɛdɔɔle -o, -kaa 'yaango- 'ezin- 'bhii- 'ke mɛɛ 'oo mɛɛ 'la zan 'taawogbɛya -lɛdɔɔle -o 'bhɛ zan -o 'ke -Waanbhaa' -nɛ 'le.


ZAAN =LWA MI 31'Ŋ nɛɛnɛ- mu, -kɔɔ' -za =swa -kɔɔ' Dɛ -Waanbhaa' ni gɔnɛ- 'la gbɛɛn-, -ka 'bhɛ -glin doo! -Kɔɔ' -za 'la =swa -a ni bhe, 'bhɛla- -yile -e -kɔɔ' 'siila- -a -nɛ mu. Wlan -le 'bhɛ 'le 'bhɛɛ- -kɔɔ' -o 'bhɛɛ- 'gbu 'le. -Ayile 'drunyan 'yi mu 'ɛ waa -kɔɔ' dɔ; -amasrɔyi waa -kɔɔ' Dɛ -Waanbhaa' dɔlɛ. 2'Ŋ 'yiɛnii mu, -kɔɔ' -o -zɔn -Waanbhaa' a -nɛ mu 'le. -Kɔɔ' ma nu bɔɔlɛ 'bhɛɛ- -kɔɔ' nu klɛlɛ 'kɛla 'bhɛ 'le, waa 'bhɛ zrɔnlɛ -li -kɔɔ' ni. 'O mɔɔ 'gbu 'a 'yaango- 'bhii- 'ke Krisi -nwa yi 'la 'le, -kɔɔ' nu klɛlɛ 'bhii- 'yee- 'gbu -o gɔnɛ- 'la gbɛɛn- 'bhɛɛ- gbɛɛn-. -Kɔɔ' nu 'pwɛlɛ- 'kɛle-, -amasrɔyi -kɔɔ' nu -a yelɛ -a bogbɛya 'ɛ 'yi. 3'Ke mɛɛ 'oo mɛɛ 'la zan yrikpale -o Krisi ta 'bhɛ gbɛɛn- bhe, 'bhɛ zan 'ɛ 'bhɛ 'bhɛ 'gbu 'kpee 'ɛ 'flee- 'bhii- 'yee- Krisi 'gbu 'kpee 'fleele- -o gɔnɛ- 'la gbɛɛn-. 4'Ke mɛɛ 'oo mɛɛ 'la zan -za 'yɔɔ- klɛ, 'bhɛ zan -Waanbhaa' a 'Toŋ 'ɛ 'yisiɛ. 'Bhɛɛ- -za 'yɔɔ- klɛle 'ɛ 'bhɛ -le 'ke -Waanbhaa' a 'Toŋ 'yisiɛle 'ɛ 'le. 5'Bhɛɛ- 'kaa 'yaango- 'bhii- Zesu Krisi -nwa 'trɛ ta, 'kooko- -e mɛɛ mu ma -za 'yɔɔ- mu 'ɛ go. -Za 'yɔɔ- do 'kpɔ 'laa -o 'yee- -yi. 6'Bhɛ 'yi, 'ke mɛɛ 'oo mɛɛ 'la zan 'pegee 'yee- -o 'kpaledomaya 'yi, 'bhɛ zan laa -za 'yɔɔ- klɛ. 'Bhɛɛ- 'ke mɛɛ 'oo mɛɛ 'la zan -za 'yɔɔ- klɛ, 'bhɛ zan laa Zesu yelɛ -lido', 'bhɛɛ- yaa -a dɔlɛ -lido' 'ezin-. 7'Ŋ 'nɛ mu, 'ka 'laa 'tolɛ- 'ke mɛɛ 'kedo- 'kpɔ 'ka 'yini-. 'Ke mɛɛ 'la zan -lɛdɔɔle maza klɛ, 'bhɛ zan 'gbu 'lɛdɔɔle -o 'ezin-, 'bhii- 'yee- Zesu Krisi 'gbu 'lɛdɔɔle -o gɔnɛ 'la gbɛɛn-. 8'Ke mɛɛ 'oo mɛɛ 'la zan -za 'yɔɔ- klɛ, 'bhɛ zan -o 'ke -Setran' a pɛ 'le. -Amasrɔyi -a 'san 'drunyan zisan' bhla 'ɛ ma, -Setran' -le -za 'yɔɔ- klɛ. 'Bhɛɛ- -Waanbhaa' Gbe 'ɛ =nwa 'trɛ ta, 'kooko- -e -Setran' klɛza mu 'ɛ 'siɛ-. 9'Ke mɛɛ 'oo mɛɛ 'la zan -o 'ke -Waanbhaa' -nɛ 'le, 'bhɛ zan laa bo -za 'yɔɔ- klɛle ma, -amasrɔyi -Waanbhaa' zru -o 'bhɛ zan 'ɛ 'yi. 'Bhɛɛ- yaa sɔ -za 'yɔɔ- klɛle-, -amasrɔyi -Waanbhaa' 'a =kla 'bhɛ 'nɛ 'le. 10-Za 'la 'bhɛ 'a klɛ 'bhɛɛ- -Waanbhaa' -nɛ mu 'ɛ gole -o -Setran' a pɛ -nɛ mu 'ɛ ma 'bhɛ -le -gɛ: 'ke mɛɛ 'oo mɛɛ 'la zan laa -lɛdɔɔleya maza klɛ, 'bhɛ zan laa -o 'ke -Waanbhaa' a pɛ 'le. 'Bhɛ klɛgbɛya do 'ɛ 'yi, 'ke mɛɛ 'la zan nɛɛnɛ- -za 'laa sɔ -a ni, 'bhɛ zan laa -o 'ke -Waanbhaa' a pɛ 'le 'ezin-. 11'Ka -jan 'la =maa 'kee san 'ka 'kpaleya 'ɛ zisan' bhla 'ɛ ma 'bhɛ -le -gɛ dɔɔ: -kɔɔ' -za 'sɔ 'eke- ni. 12-Kɔɔ' 'laa klɛlɛ 'bhii- Kaɛn gbɛɛn-. -E -yaa 'ke -Setran' 'nɛ 'le 'bhɛla- -yile -ya 'nwagwlɛn- Abɛli =dia. 'Bhɛɛ- -e 'bhɛ =dia -mɛla ma ɛɛ? -E 'bhɛ =dia, -amasrɔyi -yaa' pɛ klɛza mu 'ɛ 'yaa- 'eyɔɔle, 'bhɛɛ- -a 'nwagwlɛn- a pɛ klɛza mu 'ɛ 'lɛdɔɔle -yaa. 13'Ŋ 'nɛɛnɛ- mu, 'ke 'ka vɛnsi 'drunyan 'yi mɛɛ mu 'ɛ yin 'lii, 'bhɛ 'laa 'ka 'kpeelɛnilɛ 'ka ma. 14-Kɔɔ' 'a 'yaango- 'bhii- -kɔɔ' -gwa ga 'yi, 'bhɛɛ- -kɔɔ' =nwa wlalɛ bole -yrɛ ma -si drɛɛ 'yi, -amasrɔyi -kɔɔ' nɛɛnɛ- mu -za sɔ -kɔɔ' ni. 'Bhɛɛ- 'ke mɛɛ 'la zan nɛɛnɛ- -za 'laa sɔ -a ni, 'bhɛ zan 'ɛ bole -o ga 'yi. 15'Bhɛ ya 'ɛ 'yi, 'ke mɛɛ 'tɔle- mɛɛ 'bhɛ nɛɛnɛ- vɛnsi -a yin -lii, 'bhɛ zan -o 'ke mɛɛ dɛ mi 'le. 'Bhɛɛ- 'kaa 'yaango- 'bhii- bole -yrɛ ma -si 'la 'ke -daŋ' 'laa -o 'bhɛ ma, 'bhɛ 'laa -o mɛɛ dɛ mi 'kedo- 'kpɔ 'yi. 16Pɛ 'la 'bhɛ 'a klɛ 'bhɛɛ- -kɔɔ' 'sɔniya 'ɛ dɔ, 'bhɛ -le 'ke Zesu Krisi 'a 'gbu -si 'ɛ =kla 'ke 'sraka 'le, 'bhɛɛ- -e -gaa -kɔɔ' ni. 'Bhɛ klɛgbɛya do 'ɛ 'yi, -kɔɔ' mu 'ezin-, -kɔɔ' -kɔɔ' 'gbu -si 'ɛ 'na -kɔɔ' nɛɛnɛ- mu 'ɛ -zayi'. 17'Bhɛɛ- -ka 'ka 'trɔnbadɔ doo! 'Ke 'drunyan ta pɛ mu -o mɛɛ 'la zan 'kɔɔ, 'ke -ya nɛɛnɛ- 'ɛ =ya 'ke 'bhɛ mazadwa pɛ 'ke ma -a 'kɔɔ, 'bhɛɛ- 'ke 'bhɛ 'yrɛn 'laa 'klalɛ- a ma; -e sɔ a pele- 'bhɛ bhla 'ɛ ba 'kaa -Waanbhaa' a 'sɔniya -o -a zru 'ɛ 'yi ɛɛ? 18'Ŋ 'nɛ mu, -kɔɔa' 'sɔle- 'ke ni 'ɛ 'bhɛ 'laa bolɛ -kɔɔ' 'liijan- 'te ta. 'Ke -kɔɔ' -za sɔ 'eke- ni, -kɔɔ' 'bhɛ 'yizaklɛ kpataakpa. 19'Bhɛ klɛgbɛya 'ɛ 'yi, -kɔɔ' 'a 'yaango- dɔɔ -kɔɔ' -o 'taawo zii' wlan ma zi ta. 'Bhɛ klɛgbɛya do 'kpɔ 'ɛ 'yi 'ezin- -kɔɔ' zru ba nu klɛlɛ 'edɔɔle -Waanbhaa' -yrɛ =la. 20'Bhɛɛ- 'ke -kɔɔ' -o -la zru 'zi -kɔɔ' 'gbu ta -kɔɔ' zru -yi -za 'yɔɔ- 'ke 'yi, Waanbhaa' gblaan -yiya' -kɔɔ' 'gbu zru 'ɛ ni, 'bhɛɛ- -e -za 'kpɛnsee dɔ. 21'Ŋ 'yiɛnii mu, 'ke -kɔɔ' zru laa -o -la 'zi -kɔɔ' 'gbu ta -za 'yɔɔ- 'ke 'yi, -kɔɔ' zrubazinale -o -Waanbhaa' -yrɛ =la. 22'Bhɛɛ- 'ke -kɔɔ' pɛ 'oo pɛ 'la 'yrɛwoa- -a ma, -kɔɔ' 'bhɛ 'srɔɔwo- -a 'kɔɔ. -Amasrɔyi, -kɔɔ' -yaa' 'toŋ mu 'ɛ 'klɔsikun, 'bhɛɛ- -za 'la sɔ -a zru 'ɛ ni -kɔɔ' 'bhɛɛ- klɛ. 23'Bhɛɛ- -Waanbhaa' 'toŋ 'lɛɛ- 'bhɛɛ- =naa -kɔɔ ni, 'bhɛ -le -gɛ: -ya zi 'bhii- -kɔɔ' -kɔɔ' 'kpa -a Gbe Zesu Krisi 'tɔ 'ɛ 'yi. 'Bhɛɛ- -ya zi 'ezin- 'bhii- Krisi 'a =pia -kɔɔ' ni dɔɔ -kɔɔ' -za 'sɔ 'eke- ni gɔnɛ- 'la gbɛɛn-, -kɔɔ' 'bhɛɛ- klɛ. 24'Ke mɛɛ 'la zan -Waanbhaa' 'toŋ mu 'ɛ 'klɔsikun, 'bhɛ zan bo -Waanbhaa' 'yi, 'bhɛɛ- -Waanbhaa' bo 'bhɛ zan 'ɛ -yi. -Waanbhaa' Lii 'Weŋ 'la =naa -kɔɔ' ni, -kɔɔ' 'a 'yaango- 'bhɛɛ- ma 'bhii- 'yee- -Waanbhaa' bole -o -kɔɔ' 'yi.


ZAAN =LWA MI 41'Ŋ 'yiɛnii mu, mɛɛ 'la zan mu -a pe 'zi 'kaa Lii 'Weŋ -o -yi, 'ka 'laa 'ka 'kpalɛ- -o 'kpɛn 'yi. -Ka -o -yrɛglin 'pe, 'kooko- 'kaa 'yaango- 'ke lii 'la -yoo -o -yi 'bhɛ da -Waanbhaa' ba. -Amasrɔyi, bhla ma -Waanbhaa' -lɛla' janwo mu -bebe =zian gban 'saanigɛ 'drunyan 'ɛ 'yi. 2'Ka sɔ -a 'yaangole pɛ 'la ma 'bhii- -Waanbhaa' Lii 'Weŋ 'ɛ 'bhɛ -le -o -yi, 'bhɛ -le -gɛ: 'ke mɛɛ 'oo mɛɛ 'la zan 'a =pia dɔɔ Zesu Krisi -nwa 'drunyan 'ɛ 'yi 'bhɛɛ- -e =kla 'ke bhaaplɛŋ do 'le kpataakpa, lii 'la -yoo 'bhɛ zan 'ɛ 'yi bhɛ da -Waanbhaa' -la ba. 3'Bhɛɛ- 'ke mɛɛ 'la zan laa Zesu Krisi dɔlɛ 'bhɛ dɔgbɛya 'ɛ gbɛɛn- bhe, lii 'la -yoo 'bhɛ zan 'ɛ -yi, 'bhɛ 'laa da -Waanbhaa' ba. 'Duŋ- 'bhɛ zan 'ɛ 'yi lii 'ɛ da Krisi 'Sɔɔnnii 'ɛ 'bhɛɛ- ba. 'Ka 'yela- nuza =maa, 'bhɛɛ- -e -nwa gban 'drunyan 'ɛ 'yi 'saanigɛ. 4'Ka mu 'ŋ 'nɛ mu, 'ka -o 'ke -Waanbhaa' a mɛɛ mu 'le, 'bhɛɛ- 'ka 'seŋgwa- 'ke bhla ma -Waanbhaa' -lɛla' janwo mu 'ɛ 'le. -Amasrɔyi, Lii 'Weŋ 'la -yoo 'ka 'yi bhe 'bhɛ -glɔɔ 'yiya- lii 'la -yoo 'drunyan 'yi 'bhɛ ni. 5'Woo- bhla ma -Waanbhaa' -lɛla' janwo mu 'ɛ, -woo 'ke 'drunyan 'lɛɛ- 'bhɛ -laa pɛ mɛɛ mu 'le, 'bhɛla- -yile -o -janwo' 'drunyan 'yi mu a -janwo' gbɛya gbɛɛn-, 'bhɛɛ- 'drunyan 'yi mu 'ɛ 'mu 'e 'trɔnkpa -o ni. 6'Bhɛɛ- 'duŋ-, 'o mu -o 'ke -Waanbhaa' a mɛɛ mu -la -le. 'Ke mɛɛ 'la zan -Waanbhaa' dɔ, 'bhɛ zan 'e 'trɔnkpa- 'o 'wojan- 'ɛ =la. 'Bhɛɛ- mɛɛ 'la zan laa -o 'ke -Waanbhaa' a pɛ mɛɛ 'le, 'bhɛ zan laa 'e 'trɔnkpa- 'o 'wojan- 'ɛ =la. -Kɔɔ' 'a 'yaango- 'bhɛɛ- ma 'bhii- wlan ma Lii 'Weŋ 'ɛ gole -o mɛɛ -yini' lii 'ɛ ma. 7'Ŋ 'yiɛnii mu, -kɔɔ' -za 'sɔ 'eke- ni; -amasrɔyi, 'sɔniya da -Waanbhaa' -la ba. 'Bhɛ 'yi, 'ke mɛɛ 'la zan nɛɛnɛ- mu -za sɔ a ni, -Waanbhaa' 'bhɛ zan -kla 'ke -a -nɛ 'le 'bhɛɛ- 'bhɛ zan -Waanbhaa' dɔ. 8'Ke mɛɛ 'la zan nɛɛnɛ- mu -za 'laa sɔ -a ni, 'bhɛ zan laa -Waanbhaa' dɔ; -amasrɔyi, -Waanbhaa' -o 'ke 'sɔniya 'le. 9-Waanbhaa' -yaa' 'sɔniya 'ɛ -zrɔnna -kɔɔ' ni gɔnɛ- 'lɛɛ- 'bhɛɛ- gbɛɛn-: -Ya Gbe -nɛ bhɛ do 'kpɔ 'ɛ 'winbwa- 'drunyan 'yi, 'kooko- -kɔɔ' bo 'kɔɔ- -yrɛ ma 'bhɛ 'srɔyi. 10'Bhɛɛ- -Waanbhaa' a 'sɔniya 'ɛ yaa klɛlɛ 'bhii- 'yee- -Waanbhaa' -za -swa -kɔɔ' mu -la ni 'pe. 'Duŋ- -kɔɔ' mu -la -za -swa 'yee- ni, 'bhɛɛ- -ya Gbe 'ɛ 'winbwa-, 'bhɛɛ- 'bhɛ =kla -kɔɔ' mu ma 'sraka 'le. 'Bhɛla- -zayile -Waanbhaa' -kɔɔa' -za 'yɔɔ- mu 'ɛ ma -sroma -yaan. 11'Ŋ 'yiɛnii mu, 'ke -kɔɔ' mu -za -swa -Waanbhaa' ni 'egbɛnɛle 'bhɛ gbɛɛn- bhe, -kɔɔ' mu -za 'sɔ 'eke- ni 'bhɛ klɛgbɛya 'ɛ do 'kpɔ 'ɛ 'yi 'ezin-. 12Mɛɛ 'kedo- 'kpɔ 'laa -Waanbhaa' yelɛ -lido'; 'duŋ- 'ke -kɔɔ' -za sɔ 'eke- ni, -Waanbhaa' bo -kɔɔ' 'yi, 'bhɛɛ- -yaa' 'sɔniya 'la -yoo -kɔɔ' 'yi, 'bhɛ 'lɛpa-. 13-Kɔɔ' 'a 'yaango- 'kɛla ma 'bhii- -kɔɔ' -o -Waanbhaa' 'yi, 'bhɛɛ- 'yee- -o -kɔɔ' mu 'yi, 'bhɛ -le -gɛ: -Ya Lii 'Weŋ 'ɛ =naa -kɔɔ' ni. 14-Kɔɔ' Dɛ -Waanbhaa' 'ɛ -ya Gbe 'ɛ 'winbwa- 'drunyan 'yi, 'kooko- -e klɛ bhaaplɛŋ mu -Bhee Mi 'le. 'O mɔɔ 'gbu 'bhɛ =ya 'bhɛɛ- 'wa 'srɛya- klɛ 'zi. 15'Ke mɛɛ 'oo mɛɛ 'la zan 'a =pia dɔɔ Zesu -o 'ke -Waanbhaa' Gbe 'le, -Waanbhaa' bo 'bhɛ zan 'ɛ 'yi, 'bhɛɛ- 'bhɛ zan bo -Waanbhaa' -yi. 16'Bhɛɛ- -kɔɔ' 'sɔlawo -Waanbhaa' ni 'o mɔɔ 'gbu 'bhɛ 'yaango-, 'bhɛɛ- 'o 'kpale- -o 'bhɛ 'yi. -Waanbhaa' a pɛ -le 'sɔniya 'le; 'ke 'sɔniya -o mɛɛ 'la zan zru ba, 'bhɛ zan bo -Waanbhaa' 'yi, 'bhɛɛ- -Waanbhaa' bo 'bhɛ zan 'ɛ 'yi. 17-Kɔɔ' 'a 'yaango- 'kɛla ma 'bhii- -Waanbhaa' a 'sɔniya 'ɛ 'lɛpale -o -kɔɔ' zru ba 'bhɛ -le -gɛ: 'kitikan yi 'ɛ 'le, -kɔɔ' zru ba nu klɛlɛ 'edɔɔle, -amasrɔyi -kɔɔ' 'taawogbɛya 'ɛ 'drunyan 'yi -gɛ 'bhɛ 'pwɛle- -o 'ke Zesu Krisi a pɛ 'taawogbɛya 'ɛ 'le. 18'Kee- nɛɛnɛ- mu -za sɔ 'e ni 'yaa -gblaan. 'Ke 'sɔniya -zeze 'gbu -o yrɛ 'la =nɔɔ -gblaan 'laa klɛ 'bhɛ yrɛ 'ɛ =nɔɔ. Mɛɛ gblaan -za 'yɔɔ- 'krowoza 'ɛ 'bhɛɛ- -lɛɛ. -Ayile 'ke -gblaan -o mɛɛ 'la zan zru ba, 'sɔniya -zeze 'gbu 'laa -o 'bhɛ zan 'ɛ zru ba. 19'Ke -yoo 'o mɔɔ a pɛ 'le, 'o mɔɔ 'gbu -za -swa -Waanbhaa' ni 'elwale 'pe, 'bhɛla- -yile 'o nɛɛnɛ- mu 'pegee 'yee- -Waanbhaa' -za sɔ 'o ni. 20'Ke mɛɛ 'la zan 'a =pia dɔɔ: "-Waanbhaa' -za sɔ 'ŋ ni". 'Bhɛɛ- 'ke -a nɛɛnɛ- 'ɛ 'bhɛ vɛnsi -a yin 'lii, 'bhɛ zan -o 'ke bhlanii- 'le. -Amasrɔyi wlan 'gbu 'ɛ ni, 'yee nɛɛnɛ- 'la ye, 'ke 'bhɛ -za 'laa sɔ 'e ni; -Waanbhaa' 'la 'yaa 'bhɛ ye, 'ya zrɔn -mɛla ma 'bhii- 'bhɛ -za sɔ 'e ni ɛɛ? 21'Bhɛɛ- Zesu Krisi 'toŋ 'lɛɛ- 'bhɛɛ- =twa -kɔɔ' ni dɔɔ: 'ke mɛɛ 'la zan 'a =pia dɔɔ -Waanbhaa' -za sɔ -a ni, 'bhɛ zan nɛɛnɛ- -za 'sɔ 'bhɛ 'gbu ni 'ezin-.


ZAAN =LWA MI 51'Ke mɛɛ 'oo mɛɛ 'la zan 'e =kpaa -a -yi 'bhii- Zesu -o 'ke Krisi 'le, -Waanbhaa' 'bhɛ zan klɛ 'ke -a -nɛ 'le. 'Bhɛɛ- 'ke -nɛ mu 'ɛ dɛ 'ɛ -za sɔ mɛɛ 'la zan ni, 'woo- -nɛ mu 'ɛ -za sɔ 'bhɛ zan 'ɛ ni 'ezin-. 2-Kɔɔ' 'a 'yaango- pɛ 'la ma 'bhii- -Waanbhaa' -nɛ mu 'ɛ -za sɔ -kɔɔ' ni, 'bhɛ -le -gɛ: -Waanbhaa' -za sɔ -kɔɔ' ni, 'bhɛɛ- -kɔɔ' -yaa' 'toŋ mu 'ɛ 'yizaklɛ. 3Wlan 'ɛ ni, 'ke -Waanbhaa' -za sɔ mɛɛ 'la zan ni, 'bhɛ zan -yaa' 'toŋ mu 'ɛ 'klɔsikun; 'bhɛɛ- -yaa' 'toŋ mu 'ɛ waa -o -kɔɔ' ta 'bhii- 'kwe kpiŋle do gbɛɛn-. 4-Amasrɔyi, -Waanbhaa' -nɛ 'tɔle- -Waanbhaa' -nɛ sɔ 'seŋgole 'drunyan 'le. -Kɔɔa' 'kpaleya 'ɛ Zesu 'yi 'bhɛla- 'seŋgwa- 'ke 'drunyan 'le. 5'Bhɛ 'yi, -dela 'seŋ sɔ wole- 'drunyan 'le, 'ke yaa 'e go mɛɛ 'la zan 'e =kpaa -a -yi 'bhii- Zesu -o 'ke -Waanbhaa' Gbe 'le 'bhɛ ba. 6'Yee- Zesu Krisi -le -nwa 'drunyan 'ɛ 'yi, 'ke -yi 'pegee yiɛn 'le. Yaa nulɛ -yi do -kplɛn 'le, 'duŋ- -e =nwa 'ezin- 'ke yiɛn 'le. 'Bhɛ ya 'ɛ 'yi, Lii 'Weŋ 'ɛ 'bhɛ -le 'bhɛ -za mu 'ɛ 'srɛya- klɛ, -amasrɔyi 'yee- Lii 'Weŋ 'ɛ -yoo wlan 'le. 7Wlan 'ɛ ni, Zesu -o 'ke -Waanbhaa' Gbe 'la 'le bhe 'bhɛ -za 'ɛ 'srɛ -o yaga. 8'Mu 'srɛ yaga 'ɛ 'mu -le Lii 'Weŋ 'ɛ, 'bhɛ 'pegee -yi, 'bhɛɛ- -a yiɛn. 'Woo- 'srɛ yaga 'la bhe -o 'kpale- -o do. 9'O dɔ bhaaplɛŋ mu a 'srɛya- klɛle -la; 'duŋ- -Waanbhaa' a pɛ 'srɛya- klɛle 'ɛ 'bhɛ mabhaabhɔ bhaaplɛŋ mu a 'srɛya- klɛle 'ɛ ta. 'Yee- -Waanbhaa' 'gbu -le -a Gbe 'ɛ 'srɛya- -kla. 10Wlan 'ɛ ni, 'ke mɛɛ 'la zan 'e =kpaa -Waanbhaa' Gbe 'ɛ 'yi, -Waanbhaa' -jan 'la 'woa- -a Gbe 'ɛ ba zayi' bhe, 'bhɛ -jan 'ɛ -yoo 'bhɛ zan 'ɛ 'gbu 'yi. 'Duŋ- 'ke mɛɛ 'la zan laa 'e 'kpalɛ- -Waanbhaa' 'yi, 'bhɛ zan -Waanbhaa' klɛ 'ke bhlanii- 'le. -Amasrɔyi, -Waanbhaa' -jan 'la =woa -a Gbe 'ɛ ba zayi', yaa 'kpalɛ- 'bhɛ 'yi. 11'Bhɛ 'srɛya- klɛle 'ɛ 'bhɛ -le -gɛ: 'yee -Waanbhaa' bole -yrɛ ma -si 'la -daŋ' 'laa -o 'bhɛ ma 'bhɛ=naa -kɔɔ' ni, 'bhɛɛ- 'bhɛ -o -a Gbe 'ɛ 'yi. 12'Ke mɛɛ 'la zan 'pegee -a Gbe 'ɛ -woo 'kpaledomaya 'yi, bole -yrɛ ma -si 'la -daŋ' 'laa -o 'bhɛ ma -o 'bhɛ zan 'kɔɔ. 'Duŋ- 'ke mɛɛ 'la zan 'pegee -a Gbe 'ɛ waa -o 'kpaledomaya 'yi, 'yee- -si 'ɛ yaa -o 'bhɛ zan 'ɛ 'kɔɔ. 13'Ŋ 'lɛtrɛ 'lɛɛ- =kpaa 'ka ni, 'kooko- 'ka mu 'la 'ka 'kpale- -o -Waanbhaa' Gbe 'ɛ 'tɔ 'yi, 'kaa 'yaango- 'bhii- bole -yrɛ ma -si 'la -daŋ' 'laa -o 'bhɛ ma 'bhɛ -o 'ka 'kɔɔ. 14'Bhɛɛ- 'o 'kpale- -o -a -yi 'o zru 'ɛ 'kpɛn 'le dɔɔ 'ke 'o pɛ 'oo pɛ 'la 'yrɛwoa- -Waanbhaa' ma 'ke 'bhɛ 'lɛbɛŋgole -o -a zru maza 'le, -ya 'trɔnkpa 'o ni, 'bhɛɛ- -e 'waa 'seri 'ɛ 'lɛkun-. 15'Bhɛ 'yi 'tɛ, 'ke 'wa 'yaango- 'bhii- 'ke 'o pɛ 'la 'yrɛwoa- -a ma, -ya 'trɔnkpa 'o ni; 'wa 'yaango- 'ezin- 'bhii- 'o pɛ 'la 'yrɛwoa- -a ma, -e 'bhɛ =naa gban 'o ni. 16-Za 'yɔɔ- 'la 'bhɛ 'laa -o 'ke mɛɛ nipɛ 'le, 'bhɛ 'pegee 'ke 'bhɛ mɛɛ pleŋgo -Waanbhaa' ma yikpɛnsee ta, 'ke 'yee- nɛɛnɛ- do -ya 'ke -yoo 'bhɛ -za 'yɔɔ- 'ɛ klɛ 'zi, 'e 'seriwo -Waanbhaa' ni -yaa' -za ma. 'Bhɛɛ- -Waanbhaa' nu -si 'nalɛ- mɛɛ 'la zan mu laa -za 'yɔɔ- 'la klɛ mɛɛ nipɛ 'le 'mu ni. 'Duŋ- -za 'yɔɔ- -glɔɔn do -o ye, 'bhɛ -le 'ke mɛɛ nipɛ 'le, 'bhɛɛ- 'bhɛ mɛɛ pleŋgo -Waanbhaa' ma. 'Naa -o -a pe 'zi 'ka ni dɔɔ 'ka 'ka 'seriwo 'ka nɛɛnɛ- -yaa' -za ma 'bhɛ -zayi'. 17-Lɛdɔɔkleya maza 'kpɛn -o 'ke -za 'yɔɔ- 'le. 'Duŋ- -za 'yɔɔ- 'ke mu laa -o mɛɛ nipɛ 'le, 'ke 'mu mɛɛ pleŋgo -Waanbhaa' ma yikpɛnsee ta. 18'O mɔɔ 'a 'yaango- 'bhii- 'ke -Waanbhaa' mɛɛ 'oo mɛɛ 'la zan -kla 'ke -a -nɛ 'le, 'bhɛ zan laa -za 'yɔɔ- klɛ. -Waanbhaa' Gbe 'ɛ -ya -yrɛkpa' 'bhɛ zan 'ɛ ba; 'bhɛɛ- -Setran' 'gbu 'laa sɔ -za 'kedo- 'kpɔ klɛle- 'bhɛ zan 'ɛ ni. 19'O mɔɔ 'a 'yaango- 'bhii- 'woo 'ke -Waanbhaa' a pɛ mɛɛ mu 'le, 'bhɛɛ- -Setran' a faŋgan- 'kpaale- -o 'drunyan 'ɛ 'kpɛn 'wiiŋ-. 20'Bhɛɛ- 'wa 'yaango- 'ezin- 'bhii- -Waanbhaa' Gbe 'ɛ =nwa, 'bhɛɛ- -e yikan' =naa -kɔɔ' ni, 'kooko- -kɔɔ' 'yee- wlan ma -Waanbhaa' -zeze 'gbu 'ɛ dɔ. 'Bhɛ 'yi, -kɔɔ' 'pegee 'yee- wlan ma -Waanbhaa' -kɔɔ' -o 'kpaledomaya 'yi -a Gbe Zesu Krisi 'srɔyi. 'Bhɛɛ- -a Gbe 'ɛ 'bhɛ -le 'ke 'yee- wlan ma -Waanbhaa' 'gbu 'ɛ 'le, 'bhɛ 'pegee 'bhɛ -le bole -yrɛ ma -si 'la -daŋ 'laa -o 'bhɛ ma 'bhɛ 'le. 21'Ŋ 'nɛ mu, -ka 'ka 'yrɛkpa 'ka 'gbu ba 'elrele, 'bhɛɛ- 'ka 'ka 'pleŋgo bhaaplɛŋ mu a bhla ma -waanbhaa' mu 'ɛ ma.

http://www.bible.is/MOAWBT/1John/1/D

Nenhum comentário:

Postar um comentário