quarta-feira, 15 de julho de 2015

1 JOHN: Paiute, Northern


1 John 11Nu mu-matoo tubokwu ka Te Pabeꞌe-witu. Ka tubetse mooeꞌugasoo ka teepu pudu namadabuese soo Te Pabeꞌe ka Te Naa-baa. Soo Te Pabeꞌe saaꞌa yaa teepu-kooba petu ka mu numu Te Naa besa unnepu tuukwegese, oꞌno yise mu numu oo nakaꞌoedyukudu ooosapa gwetzoimokwu. Ka Te Pabeꞌe yaa teepu-kooba petuse, numu oo manese, numme oo tookoope poonne, numme tuwazoo oo tookoo tzama. 3Mooasoo numme ka Te Naa noꞌoko Te Pabeꞌe-no nanapuaꞌana umu-nosoo meadape. Numme ooosapa ka besa naꞌunnedu mu tuukwedyakwe ka Te Pabeꞌe-witu, oꞌno mu oo nakaꞌoedyukuna tamme nanapuaꞌase nananosoo ka Te Naa besa podo meakwu. 4Numme ka besa naꞌunnedu mu tuukweꞌe, oꞌno mu numme-no ka Te Naa besa po-wi tzabekakwu. Tamme noꞌyoona yise besa sokwamakwu. 5Ekowsoo naꞌunnepu soo Te Pabeꞌe mooasoo ne tuukwepu numme yise punnoꞌo mumme tuukwekwu. Soo Te Pabeꞌe mee te netamma, “Soo Te Naa kootabedooadu-kwaꞌneꞌyoo tooe hano tooe katuna ka besow po-kooba kootabuapunne.” 6Soo tooe haga tooe mee unnedu, “Nu ka Te Naa puaꞌagana ka oo besa podo meꞌa,” pana ka ooosapa tumaꞌemukwatabena oosoo esayaꞌena ka togabadoo nummenumme. 7Tamme ka kootabua-kwi momona ka Te Naa-waꞌne ooosapa kootabedooapunnena tamme tookwa nanapuaꞌa. Soo Te Naa noꞌoko ka te tumaꞌemukwana soomuꞌwapu soo Te Pabeꞌe ka mooasoo tamme-koobatoo nabatsapuna. 8Soo tooe haga tooe mee unnedu, “Nu gi tumaꞌemukwadu,” puusoo nanemooaga ka gi kaaheno meana. 9Tamme ka te tumaꞌemukwana wahase Te Naa gi totsaba-ga te mayugwekwu. 10Tooe haga tooe mee unnedu, “Nu gi tumaꞌemukwadu,” gi ka Te Naa besa unnepu nakaꞌoedyukute, “Te Naa esayaꞌe,” mee tookwa oosoo tusooyugwedu.

1 John 21E nanumu nu mu-matoo tuboꞌo oꞌno mu gi tumaꞌemukwakwu. Ka tooe haga tooe tamme-nagatu tumaꞌemukwa soo Te Pabeꞌe ka kaahenoꞌyoona te tumaꞌemukwana nematzagakwuni. 2Soo Te Pabeꞌe mooasoo te tumaꞌemukwa-koobatoo nabatsase, noꞌobatusoo numu tumaꞌemukwana kadoo namayugwe. 3Tamme ka Te Naa doodooamuna oo nakaꞌoedyukute, yise oo nakabetseꞌa ka tamme oo tuukwena. 4Soo tooe haga tooe gi ka Te Naa nakabetseadu, tooꞌe oosoo mee unnedu pana, “Nu ka Te Naa dooamu-nagatu,” oosoo tookwa esayaꞌe. 5Tooe haga tooe ka Te Naa unnepu nakabetseana soo Te Naa tookwa oo besaꞌyookute. Soo tooe haga tooe mee unnedu, “Nu Te Naa tooaꞌa,” oosoo sakwa ka Te Naa besa podo meano, ka Te Pabeꞌe-waꞌnesoo. Oꞌno yise oosoo puusoo nasopedakwadoo ka Te Naa Tooaꞌana. 7E nanumu, oe manakwanasoo mu ka mooeꞌugasoo tunakaꞌoedyukuse mu ka Te Pabeꞌe naka tamme sakwa yise unu nanasoobedya. 8Menoꞌo esoo naꞌunnedu unu natzooesoo manemena soo Te Pabeꞌe ka unu nanasoobedya te mayugwena. Mooasoo soo togaba kadoo manemena, ka togaba-wiꞌyoona kaaheno kootabedooa-kwitoo numu kua-kwaꞌneꞌyoo. 9Tooe soo tooe haga tooe nu ka gootabedooadu-kwi mee unnedu pana ka sumuoo Te Pabeꞌe nakaꞌoedyukudu-nagatu gi petzabena oosoo tookwa togesoo ka togaba-wi. 10Soo tooe haga tooe ka tamme-matu Te Pabeꞌe-wi tunakaꞌoedyukudu unu soobedyadu ka kootabedooadu-kwi nummenumme. Oꞌno yise oosoo ka Te Naa besa podo meadabena gi oo maꞌwuka-waꞌneꞌyoo. 11Soo tooe haga tooe ka tamme Te Pabeꞌe nakaꞌoedyukudu-nagatu gi petzabedu, tookwa togesoo togaba-wi numme numme, oosoo gi hownnekoo oo sopedakwadookwu-waꞌneꞌyoo ka Te Naa besa podo tu nameana. 12Mu Te Naa doodooamu nu mu-matoo tuboꞌo soo mu tumaꞌemukwana nasoomuꞌwapu, soo Te Pabeꞌe ka mu-koobatoo nabatsapuna. Ooonneꞌyoona yise mu menoꞌo Te Naa besa doodooamu. Mumme nanamooatupu nu tuwazoo mu tuukwekwu mu ka Te Naa tamme Manumudoopu sopedakwatoona. Mumme yise pudu numu nu tuukwekwu mu ka Te Naa unnepu nakabetseana, mu ka sutakoo matzooekute. 15Gi sakwa tamme mu gi toge manedu-kwaꞌne manepana. Soo tooe haga tooe ka sutakoo podo meadu tookwa gi ka Te Naa petzape. Soo Te Naa ka suda namanedu gi petzape. 16Mu yaa teepu-koobatu numu suda tu manena besa soobedya, umu ka unu moogoomanena puusoo unu nasooyugwena gi ka Te Naa petzabe-kwaꞌne manedu. 17Saaꞌa esoo teepu ka mu sutakoo numu-no kadoo namayugwekwu. Soo tooe haga tooe ka Te Naa nakabetseadu soo oo gwetzoinummekwuna gi mobegwa-gakwu. 18E nanumu, pudusoo esoo teepu namapudutupudookwu. Mooasoo mu oo naka gisoo ka Te Pabeꞌe ka teepu mapudutupudoo sumuꞌyoo ka Te Pabeꞌe tubetse tumooꞌoopunnedu yaa teepu-kooba tamme-baa petukwu. Mooasoo ewaꞌyoo numu ka Te Pabeꞌe nekwohoꞌne tamme yise oo sopedakwatoo pudusoo Te Pabeꞌe ka teepu mapudutupudookwu. 19Umu Te Pabeꞌe nekwohonedu tamme-nagatu uga gi ka Te Pabeꞌe-wi tubetse tunakaꞌoedyukute. Umu uga ka tubetse tunakaꞌoedyukuna togesoo tamme-noꞌyookwu. Menoꞌo tamme oo sopedakwatoo umu tookwa gi tubetse tunakaꞌoedyukupana meeoo sukwe naneyukwe gi tookwa umu tubetse tamme-notu ooonneꞌyoona umu te gaꞌabeyakwe. 20Mu Te Pabeꞌe tubetse nakaꞌoedyukunodu, soo Te Pabeꞌe ka tu Besa Pooha-ma mu sootuhipu, ooonneꞌyoona umu ka togesapa naꞌunnedu sopedakwatoo. 21Mu mooasoo ka Te Pabeꞌe-witu nakasopedakwatoo, soo Te Naa tubetse kaahenotu, ooonneꞌyoona nu mu tuukweꞌe. 22Soo tooe haga tooe Jesus gi Te Pabeꞌe mee unnedu esayaꞌe. Esoo esayidu ka Te Pabeꞌe tumooꞌoo oosoo ka gi Te Naa noko ka Te Pabeꞌe nakaꞌoedyukuna meeoo unakwe. 23Soo tooe haga tooe gi ka Te Pabeꞌe nakaꞌoedyukudu, gi Te Naa Tooaꞌa. Mu sakwa ka Te Naa besa unnepu oe manakwanasoo nakaduguna ooosapa oo nakaꞌoedyukuna, oꞌno mu ooosapa Te Naa noꞌoko Te Pabeꞌe doodooamu manepunnekwu. 25Oosoo mooasoo te tunetammakupu, soo te gwetzoimokwuna gi moobegwa-gakwu. 26Yaa menoꞌo nu mu tuukwekwu gi ka mu mumme nemooagadu-ma saaꞌa nakatzabepana. 27Soo Te Naa ka tu Besa Pooha-matu-ma mu sootuhi. Soo Te Naa Besa Pooha ooosapa ka togesapa naꞌunnedu mu tunedyooenokwu, ka tooe hekwi mu gi kummaꞌakoosoo numu tunedyooedu soogwikwu. Soo Te Naa Besa Pooha mu tunedyooena mu yise ooosapa ka Te Pabeꞌe-wi tunakaꞌoedyukukwu. 28E nanumu, tamme ka ooosapa Te Pabeꞌe-wi tunakaꞌoedyukuna ka yaa teepu-kooba oo kodyu petuse tamme gi oo-ma suina gi oo nasookwikwu. 29Soo Te Pabeꞌe ooosapa kaaheno tumatugudu, mu yise oo sopedakwatoo soo tooe haga tooe kaaheno tumatugudu punnoꞌo Te Naa tooaꞌa.

1 John 31Soo Te Naa tubetse unu te soobedyana, “E doodooamutseꞌe,” mee te natubaꞌnga. Umu gi tunakaꞌoedyukudu gi oo sopedakwatoo ka Te Naa meeoo tamme natubaꞌnga umu ka gi Te Naa sopedakwatoona. 2E nanumu, mooasoo tamme Te Naa doodooamu manepu. Tamme ka Te Naa-tamme sootunagakwuna gisoo sopedakwatoo. Tamme oo sopedakwatoo ka Te Pabeꞌe yaa teepu-koobasoo kodyu petuse, oꞌno tamme oo poonnese oo-waꞌneꞌyookwu. 3Tamme ka Te Naa atasoo numu nemayugwena oo nakaꞌoedyukudu soo Te Pabeꞌe te pudu manumudookwu mee naꞌunnedu, ooonneꞌyoona oosoo ka suda te tumatuguna soomuꞌwase gi totsaba-ga tamme manekwu, soo Te Pabeꞌe puu gi totsaba-gaꞌyoo. 4Soo tooe haga tooe ka Te Naa unnepu gi nakabetseadu tumaꞌemukwa. 5Mu oo sopedakwatoo mooasoo ka Te Pabeꞌe yaa teepu-koobatoo, nanasuda te tumatugupu-koobatoo oo nabatsapu. Soo Te Pabeꞌe puu gi tumaꞌemukwadu. 6Soo Tooe haga tooe ooosapa tumaꞌemukwadubedu gi Te Pabeꞌe-wi tunakaꞌoedyukute. 7E nanumu, tooe haga tooe kaaheno tumatugudu ka Te Pabeꞌe-waꞌneꞌyookwu. 8Soo tooe haga tooe ooosapa tumaꞌemukwadu tookwa ka Numu Sooꞌadu, sutakoo nagedu oosoo Gi Togeꞌyoo puu oe-manakwanasoo, ooosapa suda tumatugukepu. Soo Te Pabeꞌe yaa teepu-koobasoo petuse, ka sutakoo, numu tumaꞌemukwa mayugwedu kadooꞌoo mayugwekwuse. 9Tamme ka Te Naa besa doodooamu manese ka suda namanedu nuuninokwu. 10Tooe haga tooe ooosapa gi toge manedu ka Te Naa doodooamu gi petzabedu tookwa, ka Numu Sooꞌadu nagedu. Tamme oo sopedakwatoo ka ooka gi togekoo, Numu Sooꞌadu tumayohokudu oosoo gi Te Naa doodooamu-matu. 11Ka Te Pabeꞌe mu nakaꞌoedyuku-kwi manakwanasoo, soo Te Naa unnepu, “Mu sakwa nanasoobedya,” meeꞌe naꞌunnedu mu ooosapa nakanoꞌo. 12Mu sakwa gi ka oꞌnosoo tooebetse Cain mee naneadu-kwaꞌne manepana. Soo Cain suda manakwe ka tu wanngaꞌa nuusoogwedukuna, ka tu wanngaꞌa kaaheno tumatugu oo batsase. Soo Cain tookwa ka mu sutakoo nagedu. 13Ooonneꞌyoona, E nanumu, mu sutaꞌyoo numu yaa teepu-koobatu puu gi te petzape. 14Saaꞌa mu suda manedu numu ka tuꞌina ooosapa togano-kwiꞌyookwu. Tamme ka tuꞌise besa-kwitoo, ooosapa namagwetzoidu-kwitoo meꞌa, tamme ka nanasoobedyana. 15Tooe haga tooe gi tu pupuaꞌamu petzabedu tu puaꞌa batsadu-kwaꞌnesoo manepunne. Tamme oo sopedakwatoo soo numu puu ka tu nanumu batsase suda oo tumatuguna oo-matoosoo kodyukwu, yise gi ka Te Naa-baa petugakwu. 16Soo Te Pabeꞌe unu te soobedyana, ooonneꞌyoona tamme-koobatoo nabatsapu. Tamme sakwa punnoꞌo oo-waꞌnesoo nanasoobedya. 17Soo tooe haga tooe gi hemma tuugedu, ka tu puaꞌa tutuha manakwe sakwa oo tummatzi ka Te Naa unu soobedyana oo-matoo nanesootuhiyana. 18E nanumu tamme sakwa unu nanasoobedyana nanatummatzi gi meeoo sukwe unnepana. 19Oꞌno tamme ka Te Naa doodooamuna, tammesoo nanasopedakwadookwu. Tamme yise gi suikwu ka Te Naa-koobena manepetugase. 20Tooe ka Te Naa tamme tunetammakuna gi mapuꞌapana, te nasootuagaꞌne sapa, soo Te Naa ka te sopedakwadoona tutuha te soobedyana te sootuhaꞌe. 21E nanumu, tamme gi ka Te Naa-ma suaꞌekwu ka mooasoo oo sopedakwadoona te tutumaꞌemukwana oo soomuꞌwapu. 22Tamme ka Te Naa nanetzakwiyiyina oosoo te nakana te sootuhaꞌe, tamme ka tamme oo tunetammakuna nakabetseana. 23Soo Te Naa meeoo soo Jesus Mu Tubetse Pabeꞌe, mu sakwa oo nakaꞌoedyukuna unu nanasoobedya. 24Tamme ka Te Naa besa unnepu nakabetseanona soo Te Naa ooosapa tamme-no manenummekwu. Soo Te Naa ooosapa tamme-no manenummekwu, ka tu Besa Pooha-ma te sootuhise.

1 John 41E nanumu, tamme sakwa gi ka noꞌobatusoo poohabe nakaꞌoedyukupana. Ewa yaa teepu-kooba naꞌesagoꞌe, ka sutakoo poohabe-toohakwi. Ka nanesootuhibu numu tunedyooedu mee unnedu tamme-baa petuse, tamme sakwa ka hownnekoo oo pooha-gana sopedakwatoo, haꞌoo Te Naa Besa Pooha-toohakwi numu tunedyooe. 2Nu mu tuukwekwu, haꞌoo tamme oo sopedakwadookwu, hownnekoo poohabe-toohakwi oosoo numu tunedyooe. Tooe haga tooe ka Te Naa Besa Pooha-toohakwi unnekwu, mee soo Jesus o kaaheno Te Pabeꞌe, oosoo togesapa naꞌunnedu ka yaa teepu-kooba tamme-baa numu petuse tamme-waꞌneꞌyookwu. 3Soo tooe haga tooe yise mee unnedu, soo Jesus Te Pabeꞌe gi togeꞌyoo, oosoo tookwa sutakoo pooha-toohakwiꞌyoona ka Te Pabeꞌe nekwohoꞌne. Soo Te Pabeꞌe tumooꞌoodu, numu nemooagadu, tamme ka oꞌnosoo mu nanekemmadu nakadu menoꞌo yise mooasoo tamme-naga. 4Umu esagoedu gi te nemooꞌaga-waꞌneꞌyoo, e nanumu, tamme ka Te Naa Besa Pooha-toohakwiꞌyoona, oosoo noꞌoko poohabe matzooekudu. 5Soo numu esayaekudu ata-tammesoo numu neyugwedu, ka mu numu gi Te Naa Besa Pooha-toohakwi manepunnedu etzaga nemooaꞌaga. Umuoo numu esagoekuna ka mu numu sutakoo tumayohope mu nagetuunguna mu tunedyooꞌe, ooonneꞌyoona mu sutaꞌyoo numu yaa teepu-koobatu mu nakabetseꞌa. 6Tooe haga tooe Te Naa nakaꞌoedyukudu te nakapunnekwu, tamme ka Te Naa doodooamuna. Soo tooe haga tooe gi te soonakadu tookwa gi Te Naa heesoobedya, ooonnekoo tamme oo sopedakwadookwu, haꞌoo sutakoo poohabe oo-nagakoo tooetoo besow. 7E nanumu, tamme sakwa Te Naa unnena nakaꞌoedyukuna nanasoobedya. Noꞌyoona Te Naa doodooamu nanasoobedya soo Te Naa ka oo te mayugwena. 8Soo tooe haga tooe gi numu petzabedu tookwa gi ka Te Naa doodooamu-matu, soo Te Naa puu ooosapa unu numu soobedyadu. 9Tamme oo sopedakwatoo soo Te Naa puu tamme unu soobedyana, ka tu Besaa Tooa ka yaa teepu-kooba nabatsakupu, ka noꞌoko te tumaꞌemukwana kadoo mayugwena. Ka mooeꞌugasoo soo Te Naa ka unu te soobedyana, ooonneꞌyoona tamme punnoꞌo unu nanasoobedya. 11E nanumu tamme sakwa unu nanasoobedyana, ka Te Naa puu tubetse unu tamme soobedya. 12Gi haga ka Te Naa tookoope poonnedu. Tamme ka nanasoobedyana soo Te Naa ooosapa tamme-no manenummekwu. Tamme punnoꞌo nanasoobedya manepetukwu, ka Te Naa tamme sooyugwe-waꞌne. 13Soo Te Naa ka tu Besa Pooha-ma te sootuhipu. Ooonneꞌyoona ooosapa te tummatzina tamme oo-no besa kemmadape. 14Tamme yise oo sopedakwatoo, soo Te Naa ka tu Besaa Tooa yaa teepu-koobatoo taya, ka numu oo magwetzoi tuunguna. 15Tooe haga tooe oo nakaꞌoedyukudu soo Te Pabeꞌe Te Naa Tooa, tookwa Te Naa-no meadape. 16Tamme oo sopedakwatoo soo Te Naa unu te soobedya. Soo tooe haga tooe punnoꞌo unu numu soobedyadu tookwa Te Naa-doodooamu-matu. 17Tamme nananesootuhidu numu nanaꞌunusoo nanasoobedya manemena, ka Te Naa tamme sooyugwe-waꞌne. Oꞌno saaꞌa ka Te Naa numu nemadabooꞌe tamme puu gi ka Te Naa-ma suikwu, tamme ka mooasoo ka Te Naa unu soobedyana. 18Tamme gi ka Te Naa-ma suaꞌe ka unu oo soobedyana. Tamme ka mooasoo unu Te Naa soobedya manepetuse, mooasoo ka te tumaꞌemukwana nasoomuꞌwapu gi hemma-ma suaꞌekwu. Tamme ka suina suda tusooyugwe. Tamme ka mooasoo oo sopedakwatoona soo Te Naa te mabetsea ka unu pumme te soobedya. Tooe haga tooe Te Naa-ma suidu tookwa gisoo ka Te Naa tu soobedya-kwi manakwe. 19Soo Te Naa mooeꞌugasoo unu te soobedya ooonneꞌyoona tamme punnoꞌo Te Naa unu soobedya. 20Soo tooe haga tooe ka Te Naa unu soobedya mee unnepana ka Te Naa besa doodooamu gi petzabena oosoo tookwa esayaꞌe. Soo tooe haga tooe ka Te Naa doodooamu tookoope poonnepana gi mu petzabedu hownnekoo ka Te Naa yise gi tu tookoope poonnena petzabekwu? 21Soo Te Naa mee te netamma, “Soo tooe haga tooe unu e soobedyadu, sakwa umu e doodooamu tuwazoo unu soobedya.”

1 John 51Tooe haga tooe o soo Jesus Te Tubetse Pabeꞌe meeꞌe naꞌunnedu nakaꞌoedyukudu tookwa Te Naa Tooaꞌa. Tooe haga tooe ka Te Naa unu soobedyadu Te Naa dooamu unu soobedyakwu tuwazoo. 2Tamme ka Te Naa unu soobedyana, oo tunetamma-kwaꞌnesoo manena oo nakabetseana tamme tookwa Te Naa doodooamu besa soobedya. 3Soo Te Naa tamme tunetammakuna tamme ka oo nakabetseana oosoo gi namanakwe tamme ka Te Naa unu soobedyana. 4Tamme Te Naa dooamu gi ka sutakoo nakabetsea ka yaa teepu-koobatu numu mayohona. Tamme ka sutakoo mooasoo matzooekute, ka Te Pabeꞌe nakaꞌoedyukuna. 5Soo Te Pabeꞌe Te Naa Besaa Tooa Tubetse oedyukudu suuꞌmu ka sutakoo matzooekute. Soo sutaꞌyoo ka numu suta-tamme ohoyugwedu. 6Soo Te Naa oo waha soo Te Pabeꞌe oo Besaa Tooa baa-wi namatzakase, soo Te Naa oo wahasoo tuwazoo, ka Te Pabeꞌe nabatsase. Yise nakwitoo ka Te Naa Besa Pooha. 9Esoo Te Naa besa yadooapu toge kaahenotu ka Tu Penebe Besa Tuooaꞌa-witu. Mu numu puu ka tu nanumu haꞌyoo unakwe oo nakaꞌoedyukute. Soo Te Naa unnepu ka sukwe numu unnepu, ooonnekoo toge kaahenoꞌyoo. 10Soo tooe haga tooe ka Te Pabeꞌe nakaꞌoedyukudu oo sopedakwatoo oosoo Te Naa Penebe Besaa Tooaꞌa. Tooe haga tooe gi ka Te Naa nakaꞌoedyukudu ka Te Naa neꞌesatooe. 11Soo Te Naa meeoo te tunetammakupu ka Te Pabeꞌe mane-koobatoo gi mobegwa-gakwu ooosapa te gwetzoimokwuna te sootuhikwu. 12Soo tooe haga tooe ka Te Pabeꞌe nakaꞌoedyukudu tu namagwetzoina nasootuhikwu, soo gi tunakaꞌoedyukudu gi. 13Nu mumme Te Pabeꞌe nakaꞌoedyukudu-matoo tuboꞌo oꞌno mu nananesootuhaꞌedu numu ka ooosapa gi mobegwa-gakoo namagwetzoidu, pumme tu sootuhipu sopedakwadookwu. 14Tamme oo sopedakwatoo ka Te Naa-matoo nanesootuhina ka oo tunetammana oedyukuna oosoo te nakana 15te sootuhikwu ka pumme te nanetzakwiyi. 16Unu nanesootuhi numu ka tunakaꞌoedyukudu maꞌemukwa oo poonnena oosoo sakwa oo nanesootuhiku soo Te Naa yise ka tumaꞌemukwadu magwetzoikwu. Tooe noꞌoko numu tumaꞌemukwana gi besow sapa, soo tooꞌe noꞌobatu soo numu tumaꞌemukwapu mesoo nanematzagakwunaꞌe. Sumubatu numu tumaꞌemukwana gi nananesootuhikwuni-waꞌneꞌyoo oosoo ka tumaꞌemukwadu-matoosoo namakodyukuse oo batsakwu. Ookow tumaꞌemukwape gi hownnekoo tamme nanesootuhi-kwaꞌneꞌyoo. 18Tamme oo sopedakwatoo umu nananesootuhidu numu Te Naa doodooamu gi ooosapa tumaꞌemukwano-waꞌneꞌyoo. 19Tamme oo sopedakwatoo tamme Te Naa doodooamu, yise soo sutaꞌyoo Gi Togeꞌyoo ka noꞌoko yaa teepu-koobatu mu gi tunakaꞌoedyukudu numu nemadunagakwu. 20Soo Te Pabeꞌe tamme-baa yaa teepu-kooba petuse te sootuhaꞌe oꞌno tamme oo-toogoo Te Naa besa sopedakwadookwu. Ka Te Tubetse Pabeꞌe Jesus-toohakwi, soo Te Naa togesapa te sootuhi tamme yise gi mobegwa-ga gwetzoimokwu. 21E nanumu, ka Te Naa-matoo suuꞌmu sakwa mu nanesootuhi mea. Yaanotu sapa esoo pooha nanesootuhibu-witu nanemamakwupetu.

http://www.bible.is/PAONAB/1John/1/N

Nenhum comentário:

Postar um comentário