quinta-feira, 16 de julho de 2015

1 Jon: Mangseng


1 Jon 11Them wat nge toko ako ulue ake i velpol rongan na i voth tel lale. Na them nongpol ikei ako i leng leng, na them thepol i nge thekimem, na them the a i nge, na menimem i vugir mun i. Na ini toko ako ile riong i sung mimiong a tokokoere nge, na them panongpol thomu nge ile riong aken. 2Na mimiong tepun aken i velpol ol a pen lalanga, ma them thepol i ma them ritet nge. Na them panongpol thomu nge toko aken ve ini mimiong ako aro ile vusonga avele kene tepun, ako nomenga i voth tomo nge Titemer a God, ma i velpol a them nge lale. 3Na ur ako them thepol i, na them nongpol i, aken them panongpol mun thomu nge, mo ako thomu o pavurvur mun aro o supo tomo nge them nge titeinpeling a menong, na ler titeinpeling a menong aken i voth tomo nge Titemer a God na Itun a Jisas Krais. 4Na them wat riong ake a thomu nge mo lemir i vual rintet nge lemi sivengaing. 5Na riong ako them nongpol i a Jisas Krais nge, na them panongpol i a thomu nge, kene i vene: God ini pen lalanga na mideng e avele i voth a i nge. 6Na aro ve te ria ve, te men titeinpeling tomo nge i, aveto rongan ler vothung i pathengal i ako ve, rongan te es a mideng nge, aken ler riong aken te ri nge, ini riong le apaltetonga, na te panes a God ile riong nunganga avele. 7Na aro ve te es a pen lalanga lemi, ranga ve ako God i voth a pen lalanga nge, aken te men titeinpeling tomo nge a God ile tokokoere, na Jisas ako ini a God Itun ia mla i pariripot ol it nge ler vothung kerenga alavusnga. 8Na God i ri lale ve, toko alavusnga o oma vothung kerenga, na aro ve te ria ve, ler vothung kerenga e avele, aken ler apaltet sivenger, na God ile riong nunganga i voth a it nge avele. 9Aveto aro ve te pamilempot ler vothung kerengare, aken God aro i panes ile riong ako i kin tomo i nge it lale, naro i oma vothung vengvenga a it nge, ako aro ilemi simikal ler vothung kerenga areken, naro i pariri ol it nge ler vothung alavusnga ako i vengveng a itheki avele. 10Na aro ve te ri ve te oma vothung kerenga e avele, aken te apet a God ini toko le apaltetonga, na God ile riong i voth a ler mimiong nge avele.

1 Jon 21Na tutukre, tho wat riong ake a thomu nge, mo aro o oma vothung kerenga avele. Aveto aro ve omu e i oma vothung kerenga, kimer mitnga ake ro i voth ako i ri nge it ako a Titemer a God itheki, ini a Jisas Krais, ako ini toko vengvenga. 2Na i sungpot isivenga ile mimiong ako nge ler vothung kerenga eltetpotnga. Na i oma venen aken nge enger inga avele, aveto i oma mun i nge toko alavusnga ake ru a ulue, ole vothung kerenga eltetpotnga mun. 3Na aro ve te panes a God ile patorongre, aken lemir mire ako ve, lemir mire senu nge ur ako i sis ve aro te oma i. 4Na aro ve toko e i ri ve, “Lemik mire senu nge ur ako God i sis ve aro tho oma i.” Aveto i panes a God ile patorong alavusnga avele, toko aken ini toko le apaltetonga, na God ile riong nunganga i voth a i nge avele. 5Aveto aro ve toko e i panes senu a God ile riong, aken ile asaguong nge a God i alarorol a ile mimiong. Na lemir mire ako te teo a God nge vene: 6Toko e ako i ri ve i teo a God nge, aro ile vothung i ranga ve ini a Krais ile vothung. 7Na titeik sivengare, ine patorong ake ru tho wat i a thomu nge i ponganga avele. Aveto ini patorong neginga ako thomu o nongpol i nomenga vet ako me i patea nge ako o elo a Krais a lomumu. Na patorong neginga aken ini riong ako thomu o nongpol tel i lale, ako aro omu sagu pel. 8Aveto patorong aken ako tho wat i a thomu nge i ponganga mun a thomu nge, na o thepol i a lomu mimiong ranga ve ako ini a Krais ile mimiong. Na o thopol i a lomu mimiong, eneke mideng a esong i penthalu, na pen lalanga a esong i velpol lale ma i to ol. 9Na aro ve toko e i ri ve i voth a pen lalanga, aveto rongan ini silal itein lemioonga e, aken toko aken rongan i voth a mideng nge. 10Na toko ako ia sagu ititein lemioongare, aken i voth a pen lalanga, na ur e avele i voth a i nge ako aro i pamatu i. 11Aveto toko ako ini silal itein lemioonga e, aken i voth a mideng nge, na rongan i es a mideng lemi, na ilemi mire nge wop kathnga ako i es nge, kene avele, eneke mideng rongan i pasopal itheki. 12Na rongan tho wat riong ake a thomu tutukre ako ini a Krais ile, eneke ako nge a Krais inga, God i eltetpot lomu vothung kerenga. 13Na rongan tho wat riong ake a thomu a vovoengae mun re nge, ako lomu lemioong i motu, eneke lomumu mire senu nge a Krais ako i voth evelelnga. Na rongan tho wat riong ake a thomu apoapongare nge, ako lomu lemioong i engeng, eneke lomu mong a Satan, ako i kerenga selele lale. Na i nunganga ako tho wat lale a thomu tutukre ako ini a Krais ile, eneke lomumu mire senu nge Titemer a God. 14Na tho wat lale a thomu a vovoengae mun re nge, ako lomu lemioong i motu, eneke lomumu mire senu nge a Krais ako i voth evelelnga. Na tho wat lale a thomu apoapongare nge, ako lomu lemioong i engeng, eneke thomu o engeng, na God ile riong i mimi a lomumu, na lomu mong a Satan, ako i kerenga selele lale. 15Thomu o mothong tova omu sagu vothung ulue angare, eve ur areko i voth mun nge. Eneke aro ve omu e ia sagu vothung ulue anga, aken God iasagunga i voth a i nge avele. 16Na i venen aken, eneke vothung alavusnga ako ini toko ulue angare ole, i es a Titemer a God nge me avele, ranga ve ini ako o panes inga vothung areko i mita a olemi me, na o theseal, na o magon. Vothung alavusnga areken ini vothung ulue anga vet aken. 17Na ine ulue ake tomo nge areko oa sagu vothung ulue anga aro o vus, aveto tokokoe areko o oma ur areko God i sis ve aro o oma i, aro ole mimiong aro ile vusonga avele. 18Na tutukre, te tothtunal ol nang le vusonga lale. Na ranga ve ako o nongpol ako ve, Krais ile ngarang aro i es me, na ponange ol ake Krais ile ngarangre pulua o velpol lale. Na nge aken, lemir mire ako ve, te tothtunal ol nang le vusonga. 19Na tokokoe areken nomenga o voth tomo tel nge it, lama o lo lelpot ar ma o es. Aveto or ini lernga nunganga avele. Eneke aro ve or ini lernga, aro rongan o voth tomo nge it. Aveto o lo lelpot ar lale, make i nunganga ako ve, or ini lernga avele. 20Aveto thomu o el Oni Riringa lale ako a Toko Riringa nge me, na i panine lomumu mo ako lomumu mire nge riong nunganga ako God i pathengal i a it nge. 21Ava lomumu ve tho wat a thomu nge, eneke lomumu mire nge riong nunganga avele, aveto avele. Tho wat a thomu nge, eneke lomumu mire nge riong nunganga lale, na lomumu mire mun ako riong nunganga i pavelpol riong le apaltetonga e avele. 22Toko le apaltetonga ini anga? Ini toko ako i kelelal ve, Jisas ini toko ako God i ateal i ve aro i el werer ile tokokoere, kene avele. Na toko ako i venen aken, ini a Krais ile ngarang. Ma i lel ikime nge Titemer a God na Itun a Jisas. 23Na toko ako i lel ikime nge a God Itun aken, akennga i lel mun ikime nge Titemer a God. Na toko ako ilemio nge a God Itun, akennga i lemio mun nge Titemer a God. 24Na riong areko thomu o nongpol i nomenga nomenga vet ako me i patea nge ako o elo a Krais a lomumu, kene aro thomu o krim engeng i. Na aro ve thomu o krim engeng inga, aken rongan o teo a Jisas nge na a Titemer a God nge. 25Na ake ini ur ako i kin ile riong a it nge lale ve aro i sungu mimiong ako aro ile vusonga avele a it nge. 26Na tho wat riong areken a thomu nge mo tho pator lomu nge tokokoe areko o tongporum ve aro o paleklek thomu. 27Aveto thomu o el Oni Riringa a God nge me, na rongan i voth a lomumu, make o mothong tova o sis ol pamirealinga e, eneke Oni Riringa ienga inga ako i pamireal thomu nge ur alavusnga. Na Oni Riringa aken ile omaing i nunganga na ile apaltet avele. Maken aro thomu o kis inga lomu teoong a Krais nge ranga ve ako Oni Riringa i pamireal thomu nge. 28Na tutukre, aro thomu o pesrou avele nge lomu teoong a Krais nge, moro aken nge nang ako aro i velpol a pen lalanga, aro te mit engeng, naro ler mara nge mitong a itheki avele, ako nge ile esuong me. 29Na lomumu mire ako ve, Krais ile vothung alavusnga i vengveng rintet, aken aro lomumu mire mun ako ve, toko alavusnga ako o oma vothung vengvenga, or ini a God itutunre ol lale.

1 Jon 31O, ken! O thepol vet Titemer a God ile asaguong aolonga ako i sungu i a it nge, make i apet it ini itutunre ol! Na i nunganga ako it ini a God itutunre ol! Aveto toko ulue angare o ate it ve ini itutunre avele, eneke olemi mire nge a God avele. 2Na titeik sivengare, te voth ol ini a God itutunre, aveto ler mimiong panen anga aken o panine mos i a it nge rongan. Aveto lemir mire ako ve, panen tova Jisas i velpol, aro te velpol ranga ve ini mun i i, eneke aro te thepol i ako ve, i kene ini a God. 3Na toko alavusnga ako o men sial tomo nge ole lemioong nge ur aken, o oma inga vothung riringa mo o riri ranga ve ako Krais i riri. 4Na tokokoe areko o mosal inga nge vothung kerenga omanga, o avsa a God ile patorong. Na i nunganga ako vothung kerenga omanga ini vothung ako i avsa a God ile patorong. 5Aveto lomumu mire ako ve, Krais i velpol mo ako aro i eltetpot ler vothung kerenga areken. Na vothung kerenga e avele i voth a i nge. 6Na aro ve toko e i teo a Krais nge, aro i mos ol nge vothung kerenga omanga ol avele. Aveto aro ve toko e i mosal inga nge vothung kerenga omanga, aken lemir mire ako ve, ilemi mire nge a Krais avele, na i elo i a ilemi rongan. 7Na tutukre, aro thomu o naktet thomu, aro vene mo toko e aro i paleklek thomu. Na toko ako i mosal inga nge vothung vengvenga omanga, ini toko vengvenga ranga ve ini a Krais ako ini toko vengvenga. 8Na toko ako i mostun inga nge vothung kerenga omanga ini a Satan ile, eneke nomenga vet ako me i patea nge ur alavusnga patenga, Satan i mosal inga nge vothung kerenga omanga. Na tepun ako God Itun i velpolu ake, mo aro i pakerenga a Satan ile omaing. 9Na toko ako i velpol ini a God itun lale, aro i mos ol inga nge vothung kerenga omanga avele, eneke God ile mimiong i voth a i nge, na i pavurvur aro i panes ol vothung kerenga avele, eneke i velpol ini a God itun lale. 10Naro lemir mire nge toko kathnga ako ini a God itun, na toko kathnga ako ini a Satan itun kene vava? Toko e ako i oma vothung vengvenga avele eve ia sagu ititeinre avele, aken ini a God itun avele. It omole omole aro ar sagu tokokoere (Vonge 3:11-5) 11Na riong e ako thomu o nongpol i nomenga vet ako me i vene: Aro ar sagu pel. 12Na te mothong tova it ranga ve ini a Kein, ako ini a Satan ile toko, ako ini silal itein, mako i so rin i. Na i vava ako i so rin itein, e? I so rin i, eneke ini silal i, eneke isivenga ile vothung i kerenga, na itein ile vothung i vengveng. 13Na titeikre, aro ve toko ulue angare oni silal thomu, aken aro o mothong tova o kukuk nge. 14Na lemir mire ako ve, te lo lelpot rinong lemi lale, na te es ol a mimiong lemi, eneke ar sagu titeir lemioongare. Na toko e ako ia sagu avele, rongan i voth a rinong lemi. 15Na toko e ako ini silal itein lemioonga e, aken ini toko ako i so rin toko ako a God itheki. Na lomumu mire ako ve, toko ako i so rin toko, mimiong ako aro ile vusonga avele, kene i voth a i nge avele. 16Na lemir mire nge ako asaguong ini vothung le vanga, e? Eneke Jisas Krais i sungpot isivenga ile mimiong, mako i rin mo ako aro i opoal it. Na ile vothung aken i pathengal it nge vothung ako nge asaguong. Na it mun aro te sungpot mun sivenger ler mimiong mo aro i opoal titeir lemioongare. 17Na aro ve toko lemioonga e ako ile ur elonga i voth, na i thepol itein lemioonga e ako i oror nge ur e, na aro ve i opoal i avele, aken lemir mire ako ve, God ile vothung ako nge asaguong i voth a i nge avele. 18Na tutukre, te mothong tova ar sagu titeir lemioongare nge riong inga nge wor, aveto aro te opoal or nge ur pelie ako o oror nge, ako ranga ve God ile riong nunganga i ri nge. 19Na aro ve ar sagu titeir lemioongare venen aken, aken lemir mire ako ve, te voth a God ile riong nunganga lemi. Na nge aken te pavurvur aro te ngeip nge mitong a God itheki avele. 20Na aro ve opor lemi i teltun ar nge ur pelie, ur e avele, eneke God i aolonga nge ur areken i voth a opor lemi, na ilemi mire nge ur alavusnga ako ru i voth a it nge. 21Na thomu areko ok sagu thomu, aro ve opor lemi i teltun ar avele, aken aro te mit engeng a God itheki, 22naro te el ur kathnga ako te nong i a i nge, eneke te panes ile patorong, na te oma vothung ako ilemi sivenga nge. 23Na ile patorong i vene: Aro lemiro nge Itun a Jisas Krais, naro ar sagu pel ranga ve ako i tor ler nge. 24Na aro ve toko e i panes a God ile patorong, aken i teo a God nge, na God i teo mun a i nge. Na lemir mire ako God i teo a it nge vava? Eneke Ioni Riringa ako i sungu i a it nge kene i pathengal it nge ler teoong aken.

1 Jon 41Na titeik sivengare, riong elnga le apaltetonga pulua o esu esa a pen elonga, ma o panongpol. Na o mothong tova lomumuo nge toko alavusnga ako o ri ve, God Ioni i voth a or nge, kene ole panongpolong. Aveto aro thomu o tongporum vet or nge ole panongpolong aken, ako i es a God nge me eve avele. 2Naro thomu o ate nge a God Ioni vava, e? Aro thomu o nongpol senu nge ole panongpolong. Na aro ve o ri ve Jisas Krais i velpol ini toko nunganga ake ru a ulue, aken ini toko ako God Ioni i voth a i nge. 3Aveto tokokoe areko o oma riong ako i venen aken avele nge a Jisas, aken tamata le apaltetonga i voth a or nge, na o es a God nge me avele. O ranga ve ini a Krais ile ngarang ako nomenga o nongpol i ako ve, aro i es me, na ponange i velpol ol a ulue lale. 4Na thomu tutukre, thomu ini a God ile na lomu mong or lale. Eneke God Ioni ako i voth a thomu nge, kene ile engenging i aolonga rintet nge a Satan ako i voth a ulue ake, kene ile engenging. 5Na o ri inga nge ur ulue anga, eneke o panes inga vothung ulue anga, make areko o panes vothung ulue anga o nongal inga ole riong. 6Aveto it ako ini a God ile. Na areko olemi mire nge ur ako God i sis ve aro o oma i, aro o nongal ler riong. Aveto areko or ini a God ile avele, aro o nongal ler riong avele. Na nge vothung inga aken, te pavurvur ako aro te ate nge Oni Riringa ako i pavelpol riong nunganga, na tamata kerenga areko o pavelpol riong le apaltetonga. 7Na titeik sivengare, aro ar sagu pel, eneke vothung ako nge asaguong i es a God nge me. Na toko e ako ia sagu tokokoere, ini a God itun ako God i pavelpol mimiong ponganga a i nge, na ilemi mire senu nge ur ako God i sis ve aro i oma i. 8Na toko e ako ia sagu tokokoere avele, aken ilemi mire nge ur ako God i sis ve aro i oma i, kene avele, eneke God ilemi alavusnga ini asaguong popepenga. 9Na God i pathengal it ako ve, ia sagu rintet it, nge ako i pakeu Itun omolenga aken, a ulue me mo i sung mimiong ako aro ile vusonga avele a it nge, ako nge ile rinong. 10Na vothung ako nge asaguong kene i vava, e? Ini vothung ako ar sagu a God, kene avele. Aveto ini vothung ako God ia sagu it, mako i pakeu Itun aken me, mo i sungpot isivenga ile mimiong, ako nge ler vothung kerenga eltetpotnga. 11Na titeik sivengare, God ia sagu it venen aken, mako i sivenga ako aro it mun aro ar sagu pel. 12Na toko e avele i thepol a God. Aveto aro ve ar sagu pel, aken God i voth a it nge, na ile vothung ako nge asaguong i alarorol a it nge. 13Na lemir mire ako ve, te teo a God nge, na God i teo mun a it nge vene: Eneke i sungu isivenga Ioni a it nge. 14Na te thepol ur ako God i oma i lale, ako ranga ve i pakeu Itun me, mo i velpol ini toko alavusnga ake ru a ulue ole Pamimionga, make te panongpol ol nge aken. 15Na aro ve toko e i nutun ve, Jisas ini a God Itun, aken God i teo a i nge, na i teo mun a God nge. 16Make ranga ve te thepol a God ile asaguong a it nge, na lemiro nge ile asaguong aken. God ilemi alavusnga ini asaguong popepenga. Na toko e ako i mimi a asaguong lemi, aken i teo a God nge, na God i teo mun a i nge. 17Na aro ve te teo a i nge venen aken, vothung ako nge asaguong, kene i alarorol a ler mimiong, eneke it ranga ve ini a Krais ake ru a ulue. Na i venen aken, mako aro te mit engeng nge nang ako aro te mit nge riong a God itheki. 18Na asaguong ako i venen aken, ngeipong i voth a lemi avele, eneke aro ve vothung ako nge asaguong i voth engeng a toko e nge, aken i eltetpot ngeipong a i nge. Maken aro ve toko e i ngeip nge a God, aken ile asaguong nge a God i alarorol avele, eneke rongan i ngeip nge a God ve aro i paomelal i nge ile vothung kerenga. 19Na it kene ar sagu a God tomo nge tokokoere, eneke God ia sagu tel it a mukaling. 20Na aro ve toko e i ri ve ia sagu a God, aveto ini silal itein lemioonga e, aken ini toko le apaltetonga, eneke toko e ako ia sagu itein avele ako i thepol i nge itheki, i pavurvur mun avele ako aro ia sagu a God ako i thepol i nge itheki avele. 21Na patorong ako te el i a i nge, kene i vene: Toko ako ia sagu a God, aro ia sagu mun itein lemioongare.

1 Jon 51Na toko alavusnga ako olemio ve, Jisas ini toko ako God i ateal i ve aro i el werer ile tokokoere, aken or ini a God itutun areko i pavelpol mimiong ponganga a or nge. Na toko alavusnga ako oa sagu Titemer a God, akennga aro oa sagu mun itutunre. 2Naro lemir mire ako ve, ar sagu rintet a God itutunre vava, e? Eneke ar sagu a God na te panes ile patorong alavusnga. 3Na aro ve ar sagu a God, aken aro te panes mun ile patorong alavusnga. Na ile patorong areken i pavurvur aro i sungu matheong a it nge avele. 4Eneke it ini itutun areko i pavelpol mimiong ponganga a it nge, na ler mong vothung ulue anga. Na ler mong vothung ulue anga aken lale, ako nge ler lemioong nge a God. 5Na anga i pavurvur ako aro ile mong vothung ulue anga, e? Ini inga areko olemio ve, Jisas ini a God Itun. 6Na lemir mire ako ve, Jisas Krais ini a God Itun ako nge paatealing or aini. Na omole i velpol nge ako i es me ma i el paninuong nge thei. Na aininga i velpol nge ako ia mla i palalas a won ngoronga nge. Na lemir mire ako ve, Jisas ini a God Itun nge paatealing omole inga ako nge paninuong elnga, kene avele. Aveto lemir mire ako ve, ini a God Itun nge paatealing or aini, ako nge paninuong elnga tomo mun nge ia mla ako i palalas a won ngoronga nge. Na Oni Riringa mun kene i ritet mun it nge venen aken. Na lemiro nge ile riong aken, eneke ile riong alavusnga i nunganga inga. 7Na ur or me aken o ritet ve, Jisas ini a God Itun. 8Na ur or me aken ini Oni Riringa, paninuong, na ia mla, na or alame aken ole ritetong i thun inga. 9Na i nunganga ako it tokokoere lemiro nge riong ako tokokoere o ritet it nge. Aveto riong ako God i ritet it nge, kene i mukal nge ole riong, eneke i es aken a God nge me, na ini a God ako i ritet it nge Itun. 10Mako toko e ako ilemio nge a God Itun, aken i elo a God ile riong aken a ilemi lale. Aveto toko e ako ilemio nge a God ile riong avele, i ranga ve ako i apet a God ini toko le apaltetong, eneke ilemio avele nge a God ile riong ako i ri nge Itun. 11Na riong nunganga ako God i ritet i a it nge lale kene i vene: God i sungu mimiong ako aro ile vusonga avele a it nge lale. Na mimiong aken tepun i voth inga a Itun nge. 12Mako toko e ako i elo a God Itun a ilemi, ako nge ile lemioong nge i, aken i el mun mimiong ako aro ile vusonga avele a i nge. Aveto toko e ako i elo a God Itun a ilemi avele, aken mimiong ako aro ile vusonga avele, kene i voth a i nge avele. 13Na tho wat lek riong vene ake, na tho wat i a thomu areko lomumuo nge a God Itun, mo ako aro lomumu mire ako ve, thomu o el mimiong ako aro ile vusonga avele lale. 14Mako te mit engeng a God itheki, eneke lemir mire ako ve, aro ve ler nongong i panes ilemi, aken aro i nongpol ler nongong aken. 15Na aro ve lemir mire ako ve, i nongpol ler nongong aken, aken lemir mire mun ako ve, ur kathnga ako te nong i a i nge, kene aro i sungu i a it nge. 16Maken aro ve toko e i thepol itein lemioonga e ako i matu nge vothung kerenga, aveto vothung kerenga aken i pavurvur nge esuong a won sesenga nge avele, aken i sivenga ako aro i nong a God nge ve aro i opoal toko aken. Naro God i pavelpol werer ile mimiong ako i panes a Krais nge. Na tho ri inga ake nge tokokoe areko o oma vothung kerenga ako i pavurvur avele nge esuong a won sesenga nge. Ine vothung kerenga e ako i voth ako i pavurvur aro i paeso toko a won sesenga nge. Na tho ri ve aro thomu o nong nge toko ako i oma vothung aken, kene avele. 17Ine vothung alavusnga ako i vengveng avele, ini vothung kerenga. Na vothung kerenga pelie ako i voth ako aro i paeso toko a won sesenga nge avele. 18Na lemir mire ako ve, toko alavusnga areko or ini a God itutunre ako i pavelpol mimiong ponganga a or nge, kene aro o mos ol nge vothung kerenga omanga ol avele. Aveto evelelnga God Itun i paseral ole, na Satan ako i kerenga selele, kene i pavurvur aro i pakerenga or avele. 19Na lemir mire mun ako ve, it ini a God itutunre, aveto ulue alavusnga ake i voth a Satan ile engenging lemi. 20Na lemir mire mun ako ve, God Itun i es me lale, na i sungu lemi rumong ninenga a it nge, mo ako aro lemir mire senu nge ur ako God nunganga i sis ve aro te oma i. Na te teo a God nunganga nge, ako nge ler teoong a Itun a Jisas Krais nge. Na Jisas Krais ini a God nunganga. Na ini mimiong ako aro ile vusonga avele kene tepun. 21Maken tutukre, aro thomu o voth melanga nge god le apaltetongare olotualnga. Na i re aken. I vus.

http://www.bible.is/MBHTBL/1John/1/D

Nenhum comentário:

Postar um comentário