sábado, 4 de julho de 2015

1 YOHANES: REJANG




1 YOHANES 11Isai su'et yo tetang firman de melei idup, adeba firman de sudo ade ayok mulone. Keme bi temi'ukne, kemliakne ngen matai keme su'ang. Keme bi kemliakne, bi megongne ngen tangen keme. 2Ketiko idup o ade, keme kemliakne. Do'oba sebabne keme melei saksai tetang si. Keme melei namen ngen udi tetang hidup sejati ngen kekal, de ade besamo Bapa, de sudo nelei ngen keme. 3Jano de sudo keme kemliak ngen temi'uk, do'oba kulo de keme melei namen ngen udi, supayo udi ngen keme besamo-samo idup jijai do ngen Bapa ngen Anok-Ne Yesus Kristus. 4Keme temulis dio supayo atei ite sungguak-sungguak riang. 5Dioba bito de sudo keme temi'uk kunei Anok-Ne ngen de keme melei namen ngen udi: Allah o te'ang, ngen Si coa ade kegelapan samo sekilai. 6Amen ite madeak bahwo ite idup jijai do ngen Si, padahal ite idup lem kegelapan, mako ite mike baik ngen kecek-kecek atau plep. 7Tapi amen ite idup neak lem teang serai awei Allah ade neak lem te'ang, mako ite idup erat, rukun do ngen de luyenne, ngen daleak Yesus, Anok-Ne, semucai ite kunei kute duso. 8Amen ite madeak bahwo ite coa beduso, ite mike dirai ite su'ang; ngen Allah coa ade neak lem atei ite. 9Tapi amen ite ngakau duso-duso ite ngen Allah, Si bakea melei janjai-Ne ngen menea jano de adea. Si bakea mapun duso-duso ite ngen semucai ite kunei kute saleak ite. 10Tapi amen ite madeak bahwo ite coa beduso, ite manggap bahwo Allah mike ngen firman-Ne coa ade neak lem atei ite.


1 YOHANES 21Anok-anokku! Uku temulis dio ngen udi supayo udi jibeak menea duso. Tapi amen ade de menea duso, mako ite temuan suang pembela, adeba Yesus Kristus de adea o; Si bakea minoi nien utuk ite neak adep Bapa. 2Ngen liwet Yesus Kristus o ba duso-duso ite napun. Iso duso-duso ite bae, tapi duso kute umat manusio kulo. 3Amen ite taat ngen periteak-periteak Allah, do'o tandone bahwo ite kemnal Allah. 4Tun de madeak, "Uku kemnal Allah," tapi coa taat ngen periteak-periteak-Ne, tun o tukang mike, ngen Allah coa ade neak lem ateine. 5Tapi tun de taat ngen kecek Allah, tun o mengasiak Allah seca'o sempurno. Do'oba tandone ite idup jijai do ngen Allah. 6Api de madeak bahwo si idup jijai do ngen Allah, si harus idup serai awei Kristus bi idup. 7Saudaro-saudaro de tecito! De uku temulis yo iso suaktau periteak de belau. Dio periteak an de sudo senapei ngen udi sejak udi muloi pecayo ngen Kristus; adeba bito kunei Allah de sudo udi temi'uk ayokne. 8Kunyau awei o, periteak de uku temulis yo belau kulo; kerno kebeneane dapet kenliak neak dirai Kristus ngen dirai udi. Sebab kelem tambeak nyep ngen te'ang de benea bi muloi bersinar 9Tun de madeak bahwo si ade neak lem te'ang tapi tun o masiak jengik ngen saudarone, tun o masiak ade neak lem kelem sapei uyo. 10Tun de mengasiak saudarone, idup lem te'ang sehinggo coa ade sesuaktau ngen si de bakea menea tun luyen us lem duso. 11Tapi tun de jengik ngen saudarone, ade neak lem kelem. Si paneu neak kelem, ngen coa namen moi ipe si lalau, sebab kelem o menea si coa nam ngeliak. 12Uku temulis ngen udi, Anok-anok, sebab dusonu bi napun kerno Kristus. 13Uku temulis ngen udi, Bapak-bapak, sebab udi kemnal Si de sudo ade sejak mulone. Uku temulis ngen udi, Tun-tun u'ai, sebab udi bi maleak de jahat. 14Uku temulis ngen udi, Anok-anok, sebab udi kemnal Allah Bapa. Uku temulis ngen udi, Bapak-bapak sebab udi kemnal Firman de sudo ade sejak mulone. Uku temulis ngen udi, Tun-tun u'ai, sebab udi kuet. Kecek Allah ade neak lem ateinu, ngen udi bi maleak de jahat. 15Jibeakba cito dunio yo, atau jano bae de ade neak lem dunio yo. Amen udi cito dunio, udi coa cito ngen Bapa. 16Kute de ade neak lem dunio yo -- adeba kelok tabi'at manusio de beduso, de kenliak lajau kenlokne ngen jijai ombong -- kutene adeba hal-hal de asalne iso kunei Bapa, tapi kunei dunio. 17Dunio ngen kute de ade neak lemne ngen kenlok manusio, gidong nyep. Tapi tun de temotoa kelok Allah, tep idup sapei selamo-lamone. 18Anok-anokku, kiamat bi pa'ok! Sudo nelei namen ngen udi ayokne bahwo musuak Kristus bakea teko; ngen uyo bi teko dau tun de musuak ngen Kristus. Do'o tandone bahwo kiamat bi pa'ok. 19Musuak-musuak Kristus o adeba tun-tun de sudo teminggea ite, kerno tobo'o sebeneane iso tun-tun ite. Amen tobo'o tun-tun ite, paset bae tobo'o tep besamo-samo ite. Tapi tobo'o teminggea ite, supayo jelasba bahwo coa su'ang tun kulo kunei tobo'o de benea-benea termasuk kelopok ite. 20Tapi udi sudo temimo Roh Sucai kunei Yesus Kristus, do'o sebabne udi kutene kemnal ajaran de benea. 21Jijai uku temulis dio ngen udi iso kerno udi coa kemnal ajaran de benea, tapi kerno udi sudo kemnalne, udi kulo namen bahwo coa ade dusta lem ajaran de benea o. 22De berdusta adeba tun de madeak bahwo Yesus iso Rajo Penyelamat de jenanjai Allah. Tun o musuak Kristus; si coa makau Bapa atau Anok. 23Tun de coa makau Anok, taine coa temimo Bapa kulo. Tun de makau Anok, taine temimo Bapa kulo. 24Sebab o, bito de sudo udi temi'uk sejak udi muloi pecayo harusba udi jemago bebaik neak lem atei. Amen bito o udi kemliak bebaik, udi bakea bogoa idup jijai do ngen Anok ngen Bapa. 25Dioba de jenanjai Kristus su'ang ngen ite: idup sejati ngen kekal. 26Uku temulis dio ngen udi tetang tun-tun de gidong berusaho mike udi. 27Tapi tetang udi su'ang, Kristus bi melei Roh-Ne ngen Udi. Selamo Roh-Ne Ade ngen udi, coa perlu ade tun luyen majea udi. Sebab Roh-Ne majea udi tetang kute sesuaktau; jano de najea-Ne o benea, iso mike. Sebab o, lokba udi taat ngen jano de najea Roh o, lokba udi tep idu jijai do ngen Kristus. 28Jijai, anok-anokku, tepba idup jijai do ngen Kristus, supayo amen Si teko, ite madep Si seca'o binai, ngen coa selek. 29Udi bi namen bahwo Kristus idup temurut kelok Allah. Sebab o udi harus namen kulo bahwo tiep tun de idup temurut kelok Allah adeba anok Allah.


1 YOHANES 31Kemliakba Allah kembiak mengasiak ite, sehinggo ite senbut anok-anok Allah. Memang ite adeba anok-anok Allah. Do'oba sebabne dunio de kidek yo coa kemnal ite, sebab dunio coa kemnal Allah. 2Saudaro-saudaro de tecito! Ite uyo adeba anok-anok Allah, tapi keadaan ite be ati jelas. Tapi ite namen bahwo amen Kristus teko, ite bakea jijai awei Si, sebab ite bakea kemliak Si lem keadaan-Ne de sebeneane. 3Kute tun de temuan harapan yo teadep Kristus, jemago diraine supayo sungguak-sungguak sucai, bersih kunei duso awei ipe Kristus kulo sucai. 4Tun de menea duso, melanggea ukum Allah; sebab duso adeba pelanggaran teadep ukum Allah. 5Udi namen bahwo Kristus teko utuk mapus duso-duso manusio, ngen neak lem Si coa ade duso. 6Kute tun de idup jijai do ngen Kristus, coa menea duso igai. Tun de tep menea duso, coa perneak kemliak Kristus atau kemnal-Ne 7Anok-anokku, jibeak meluak api bae semset udi. Tun de menea kelok Allah adeba Anok Allah serai awei Kristus adeba Anok Allah. 8Tapi tun de tep menea duso adeba anok Iblis, sebab Iblis beduso sejak mulone. Utuk dioba Anok Allah teko, adeba utuk benaso pekerjaan Iblis. 9Tun de sudo jijai Anok Allah, coa menea duso igai, sebab sifet Allah ade neak diraine. Ngen kerno Allah o Bapane, mako si coa dapet menea duso igai. 10Dioba bedane anok-anok Allah ngen anok-anok Iblis: api de coa menea kelok Allah, atau coa mengasiak saudarone, si iso Anok Allah 11Sejak semulo bi senapei bito yo ngen udi: ite harus mengasiak do ngen deluyenne. 12Jibeakba ite awei Kain, de jijai anok Iblis ngen munuak pasuakne su'ang. Jano sebab Kain munuak pasuakne? Sebab hal-hal de neane adeba saleak, tapi hal-hal de nea pasuakne adeba benea. 13Sebab o, saudaro-saudaroku, jibeakba sele amen tun-tun dunio yo jengik ngen udi. 14Ite namen bahwo ite bi keluea kunei matei, ngen baliak moi idup. Ite namen do'o, sebab ite mengasiak sesamo saudaro ite. Tun de coa mengasiak, taine masiak kenuaso kematian. 15Tun de jengik ngen saudarone adeba pembunuh, ngen udi namen bahwo su'ang pembunuh coa temuan hidup sejati ngen kekal. 16Ngen awei o ite namen ca'o mengasiak sesamo, Kristus bi semreak idup-Ne utuk ite. Sebab o, ite kulo harus semreak idup ite utuk saudaro-saudaro ite. 17Amen ade tun kayo kemliak saudarone peset, tapi coa lok temulung saudarone o, awei ipe tun o dapet madeak bahwo si mengasiak Allah? 18Anok-anokku, jibeakba ite mengasiak cuma neak bibia atau kecek bae. Lokba ite mengasiak ngen kasih de sejati neak lem perbuatan ite. 19Awei'oba ca'one ite namen bahwo ite asalne kunei anok-anok Allah de benea, ngen atei ite tenang neak adep Allah. 20Ite namen, bahwo amen ite senaleak atei ite, Allah adeba lebiak lai kunei atei ite, Si namen kekutene. 21Jijai, saudaro-saudaroku de te cito, amen atei ite coa semaleak ite, ite dapet madep Allah ngen binai. 22Ngen jano de ite minoi ngen Si, ite dapetne, kerno ite taat ngen periteak-periteak-Ne, menea jano de semnang atei-Ne. 23De Si periteak ngen ite adeba: Ite harus pecayo ngen Anok-Ne, adeba Yesus Kristus, ngen ite harus sesamo mengasiak, awei de sudo neriteak Kristus ngen ite. 24Kute tun de taat ngen periteak-periteak Allah, hidup jijai do ngen Allah, ngen Allah jijai do ngen tobo'o. Ngen ite namen bahwo Allah hidup jijai do ngen ite, kerno Si bi melei Roh-Ne ngen ite.


1 YOHANES 41Saudaro-saudaro de tecito! Jibeakba pecayo ngen kute tun de makau temuan Roh Allah, tapi ntesba kileak tobo'o utuk namen jano roh de ade ngen tobo'o asalne kunei Allah atau iso. Sebab dau nebai palsu bi teko moi kute dunio. 2Awei'oba ca'one udi namen jano do'o Roh Allah atau iso: Tun de makau bahwo Yesus Kristus teko moi dunio sebagai manusio, tun o temuan Roh de teko kunei Allah. 3Tapi tun de coa makau hal yo tetang Yesus, coa temuan Roh Allah. Tun o temuan roh kunei musuak Kristus. Saudaro bi temi'uk bahwo roh o bakea teko, ngen uyo si bi ade neak lem dunio yo. 4Tapi anok-anokku, udi de Allah temuan. Udi bi maleak nebai-nebai palsu, sebab de ade ngen udi lebiak bekuaso kunei roh de ade ngen tun-tun de temuan dunio yo. 5Nebai-nebai palsu o miling tetang dunio, ngen dunio temi'uk kecek tobo'o, sebab tobo'o de dunio temuan. 6Tapi ite adeba anok-anok Allah; ngen tun de kemnal Allah, temi'uk kecek ite. Tun de iso de Allah temuan, coa temi'uk kecek ite. Awei'oba ca'one ite namen perbedaan Roh de melei ajaran de benea, ngen roh de menea seset. 7Saudaro-saudaro de tecito! Maroba ite mengasiak do ngen de luyenne, sebab kasih asalne kunei Allah. Tun de mengasiak, adeba Anok Allah ngen si kemnal Allah. 8Tun de coa mengasiak, coa kemnal Allah; sebab Allah adeba kasih. 9Allah madeak bahwo Si mengasiak ite ngen mutus Anok-Ne de tunggea moi lem dunio supayo ite dapet idup liwet Anok-Ne o. 10Dioba kasih o: Iso ite de sudo mengasiak Allah, tapi Allah de mengasiak ite ngen mutus Anok-Ne supayo liwet Si ite dapet pengampunan das duso-duso ite. 11Saudaro-saudaro de tecito, amen Allah kembiak mengasiak ite, ite kulo harus mengasiak do ngen de luyenne. 12Coa ade suang kulo de perneak kemliak Allah, tapi amen ite samo-samo mengasiak, Allah jijai do ngen ite, kasih-Ne jijai sempurno lem dirai ite. 13Kerno Allah bi melei Roh-Ne ngen ite, mako ite namen bahwo ite bi idup jijai do ngen Allah, ngen Allah idup jijai do ngen ite. 14Keme suang bi kemliak Anok Allah, ngen keme melei namen bahwo Si nutus Bapa utuk jijai Rajo Penyelamat dunio yo. 15Api makau bahwo Yesus o Anok Allah, Allah idup jijai do ngen tun o, ngen tun o kulo idup jijai do ngen Allah. 16Ite suang namen ngen pecayo kasih Allah ngen ite. Allah o kasih. Tun de idupne kenuaso kasih, tun o jijai do ngen Allah, ngen Allah jijai do ngen si. 17Kasih neane jijai sempurno lem dirai ite, kunyau supayo ite temuan keberanian neak Bilai Penghakiman. Ite bakea temuan keberanian, sebab idup ite neak dunio yo serai awei idup Kristus. 18Tun de meding kasih Allah, coa namen ngen saben; sebab kasih de sempurno menyep kute asai saben. Jijai nyatoba bahwo tun ati meding kasih Allah ngen sempurno amen tun o saben madep Bilai Penghakiman. 19Ite mengasiak, sebab Allah lebiak dute mengasiak ite. 20Amen suang tun madeak, "Uku mengasiak Allah," tapi si coa mengasiak saudarone, tun o pendusta. Sebab tun de coa mengasiak saudarone de kenliakne, coa mukin dapet mengasiak Allah de coa kenliakne. 21Sebab o, dioba periteak de nelei Kristus ngen ite: Api mengasiak Allah harus mengasiak saudarone kulo.


1 YOHANES 51Tun de pecayo bahwo Yesus adeba Rajo Penyelamat de jenanjai Allah, tun o adeba Anok Allah. Tun de mengasiak su'ang bapok, mengasiak anokne kulo. 2Dioba tandone, bahwo ite mengasiak anok-anok Allah, adeba amen ite mengasiak Allah serto maneu periteak-periteak-Ne 3Sebab, mengasiak Allah taine taat ngen periteak-periteak-Ne. Periteak-periteak-Ne o coa saro. 4Sebab kute Anok Allah sanggup maleak dunio. Ngen ite maleak dunio ngen imen ite 5Api dapet maleak dunio? Cuma tun de pecayo bahwo Yesus adeba Anok Allah. 6Yesus Kristusba de teko moi dunio ngen bio baptisan-Ne ngen daleak kematian-Ne. Si teko iso cuma ngen bioa bae tapi ngen bio ngen daleak. Roh Allah su'ang melei saksai bahwo do'o benea, sebab roh coa perneak berdusta. 7Ade telau saksai, de neak surgo adeba Bapa, Firman ngen Roh Allah, ketelaune adeba do. Saksai-saksai de neak bumai adeba: 8Roh Allah, bioa ngen daleak -- ketelaune melei saksai de serai. 9Ite pecayo ngen saksai manusio, tapi saksai Allah lebiak kuet igai. Ngen do'oba saksai de sudo nelei Allah tetang anok-Ne. 10Sebab o, tun de pecayo ngen Anok Allah, sudo temimo saksai o neak lem ateine; tapi tun de coa pecayo ngen Allah, bi manggap amen Allah pendusta, sebab si coa pecayo jano de nadeak Allah tetang anok-Ne. 11Dioba saksai: Allah bi melei ngen ite idup sejati ngen kekal, ngen anok-Ne adeba sumber idup o. 12Tun de temuan Anok Allah, temuan idup o; ngen tun de coa temuan Si, coa temuan idup o. 13Uku temulis ngen udi de pecayo ngen Anok Allah, supayo udi namen bahwo udi sudo temuan idup sejati ngen kekal. 14Ngen ite binai madep Allah, kerno ite yakin Si kemabul du'o ite, amen ite minoi jano bae de sesuai ngen kelok-Ne. 15Kerno ite namen bahwo Si temi'uk ite amen ite minoi ngen si, mako ite namen kulo bahwo Si melei ite jano de ite minoi kunei Si. 16Amen udi kemliak saleak su'ang saudarone menea duso de coa sembab tun o nyep idup sejati ngen kekal, lokba udi bedu'o ngen Allah; ngen Allah melei idup o ngen si, adeba tobo'o de menea duso de coa jijai maut. Tapi ade duso de menea tun nyep idup o. Tetang hal o uku coa madeak bahwo udi harus bedu'o ngen Allah 17Kute kejahatan adeba duso, tapi ade duso de menea tun nyep idup sejati ngen kekal o. 18Ite namen bahwo kute tun de sudo jijai anok-anok Allah, coa bogoa menea duso, sebab Anok Allah semlamatne, ngen de jahat coa dapet menea jejano teadepne. 19Ite namen bahwo ite de Allah temuan, kunyau kute dunio yo ade neak beak kuaso de jahat. 20Ite namen bahwo Anok Allah bi teko ngen sudo melei pengertian ngen ite, supayo ite kemnal Allah de benea. Ite idup jijai do ngen Allah de benea ngen idup jijai do ngen anok-Ne Yesus Kristus, dioba Allah de benea, ngen dioba idup sejati ngen kekal. 21Anok-anokku, ne'uakba dirainu kunei patung-patung! Penyuntingan: Ning 14 Januari 2911

http://www.bible.is/REJLAI/1John/1/D

Nenhum comentário:

Postar um comentário