quinta-feira, 27 de agosto de 2015

Иоаннын 1: MARI-MEADOW


Иоаннын 1 серышыже 11Мо тӱҥалтыш гычак улмаш, мом ме колынна, мом шке шинча дене ужынна, мом онченна да кидна дене шижынна, тудын нерген, илыш Шомак нерген, увертарена. 2Илыш толын, ме тудым ужынна, тудын нерген таныклена да тыланда курымаш илышым увертарена. Тудо Ача дене улмаш да мемнан деке толын. 3Теат мемнан дене ушнен шогыза манын, мом ме ужынна да колынна, тыланда увертарена. А ме Ача дене да Тудын Эргыже Иисус Христос дене ушнен шогена. 4Тендан куанда тичмаш лийже манын, ме тидым тыланда возена. 5Теве тиде уверым ме Тудын деч колынна да тыланда увертарена: Юмо – волгыдо, Тудын нимогай пычкемышыже уке. 6Тудын дене ушнен шогена манын ойлена да пычкемыште коштына гын, ме шойыштына, чын почеш огына ыште. 7Но Юмо волгыдышто улмо семын меат волгыдышто коштына гын, тыгеже икте-весына дене ушнымо кыл уло да Тудын Эргыжын, Иисус Христосын, Вӱржӧ мемнам кеч-могай язык дечат эрыкта. 8Языкна уке манын ойлена гын, ме шкенам шке ондалена, да мемнан чоныштына чын уке. 9Ме шкенан языкнам почын каласена гын, Юмо, ӱшанле да чын улешат, мемнан языкнам кудалта да мемнам кеч-могай чын огыл деч эрыкта. 10Языкым ыштен огынал манын ойлена гын, Тудым шояче семын ончыктена, да мемнан чоныштына Тудын шомакше уке.

Иоаннын 1 серышыже 21Икшывем-влак, те языкым ида ыште манын, тидым тыланда возем. А иктаж-кӧ языкым ышта гын, Ача ончылно арален ойлышына уло: чын ыштыше Иисус Христос. 2Тудо – сӧрасымашым ышташлан мемнан языкна верч пуымо жертве, да Тудым мемнан языкна верч веле огыл, а уло тӱнян языкше верч жертвылан кондымо. 3А Юмым пален налмынам ме теве кушеч ужына: Тудын кӱштымыжым шуктена гын, Тудым палена. 4Мый Тудым палем манын, кӧ ойла да кӱштымыжым ок шукто, тудо – шояче, тудын чоныштыжо чын уке. 5А кӧ Юмын шомакшым шукта, тудын шӱмыштыжӧ Юмын йӧратымыже чынжымак тичмашлыкыш шуын. Юмо дене ушнен шогымынам ме тышечын палена. 6Кӧ Тудын дене ушнен шогем манын ойла, тудо шкежат Христос илыме семынак илышаш. 7Йӧратымем-влак, тыланда у кӱштымашым огыл, а тошто кӱштымашым возем. Тудым тыланда тӱҥалтыштак пуымо: тиде тошто кӱштымаш – тӱҥалтыштак тендан колмо шомакда. 8Туге гынат мый тыланда у кӱштымашым возем, тидын чынже Христос гоч да тендан гоч коеш, вет пычкемыш йомеш, а ынде чын волгыдо волгалтара. 9Кӧ волгыдышто улам манын ойла, а иза-шольыжым ужмыжо ок шу, тудо але марте пычкемышыште, 10а кӧ иза-шольыжым йӧрата, волгыдышто ила, да шӱртньымашке кондышо тудын нимо уке. 11А кӧ шке иза-шольыжым ужмышудымо, тудо пычкемыште ила, пычкемышыште коштеш да кушко кайымыжым ок пале: пычкемыш тудын шинчажым сокырым ыштен. 12Тыланда возем, икшыве-влак: Тудын лӱмжылан кӧра Юмо тендан языкдам кудалтен. 13Тыланда возем, ача-влак: те тӱҥалтыш гычак Улшым пален налында. Тыланда возем, рвезе-влак: те осалын озажым сеҥенда. Мый тыланда возем, йоча-влак: те Ачам пален налында. 14Тыланда возенам, ача-влак: те Тӱҥалтышдымым пален налында. Тыланда возенам, рвезе-влак: те виян улыда, Юмын шомакше тендан чоныштыда кодеш, да те осалын озажым сеҥенда. 15Тӱням ида йӧрате, мо тӱняште уло, тудымат ида йӧрате. Кӧ тӱням йӧрата гын, тудын чоныштыжо Ачан йӧратымашыже уке. 16Чыла, мо тӱняште уло: кап ден чонын сутланымыже, шинчан сутланымыже да илышысе кугешнымаш – Ача деч огыл, а тиде тӱня деч. 17Тӱнят, тӱнясе сутланымашат йомыт, а Юмын эрыкшым шуктышо курым-курымеш кодеш. 18Икшывем-влак, пытартыш жап лишемеш. Антихрист толеш манын, те колында, да ынде шуко антихрист лектын. Пытартыш жап лишеммым тышеч палена. 19Нуно мемнан кокла гыч лектыныт, но мемнан лийын огытыл. Нуно мемнан лийыт ыле гын, мемнан дене кодыт ыле. Но чылан огыл мемнан улыт. Тиде палыме лийже манын, нуно лектыныт. 20А те Святой деч шӱрымашым налында да чыла паледа. 21Чыным огыда пале манын огыл мый тыланда возенам, а те чыным паледа да нимогай шоят чын деч огыл улмым умыледа, садлан возенам. 22Кӧ шояче? Иисусым «Христос огыл» манше огыл мо? Тудо – антихрист, Ачамат, Эргымат йӧрдымыш луктын ойлышо. 23Кӧ Эргым йӧрдымыш луктын ойла, тудын Ачажат уке, а кӧ Эргылан ӱшанымыжым почын ойла, тудын Ачажат уло. 24Мом те тӱҥалтыш гычак колында, тидак тендан дене ушнен шогыжо. Мом те тӱҥалтыш гычак колында, тидак тендан дене ушнен шога гын, тугеже теат Эрге да Ача дене ушнен шогеда. 25А Тудын мыланна пуымо сӧрымашыже теве тиде: курымашлык илыш. 26Тидым мый тендам йоҥылышыш пурташ шонышо-влак нерген возенам. 27А тендан нерген ойлаш гын, тиде шӱрымашак тендан дене ушнен шога, да тендам иктаж-кӧн туныктымыжын кӱлешыже уке. Тудын шӱрымашыже тендам чыла нерген туныкта, тудыжо чын, шоя огыл. Тудын шӱрымашыже туныктымо семынак ыштыза: тидын дене ушнен шогыза. 28Тугеже, Тудын толмыж годым мыланна лӱдаш огыл да, толмекыже, Тудын ончылно вожылаш огыл манын, икшывем-влак, Христос дене ушнен шогыза. 29Христосын чын улмыжым паледа гын, чын ыштыше кеч-могай айдемынат Тудын деч шочмыжым паледа.

Иоаннын 1 серышыже 31Ача могай йӧратымашым мыланна пуэн, ончалза: мемнам Юмын икшывыже-влак маныт, да ме тыгай улына. Сандене тӱня мемнам ок пале, вет Тудымат пален огыл. 2Йӧратымем-влак, ме ынде Юмын икшывыже улына, но могай лийшашнам але почмо огыл. Ме палена веле: кунам тиде почылтеш, Тудын гай лийына, вет могай улеш, Тудым тугайым ужына. 3Тудлан тыгай ӱшаным пыштыше кеч-кӧат, Тудын семынак ару лияш манын, шкенжым эрыкта. 4Языкым ыштыше кажне еҥ закондымылык корныш шогалеш, да язык – закондымылык. 5Но те паледа: Христос мемнан языкнам Шке ӱмбакыже налаш толын, да Тудын языкше уке. 6Тудын дене ушнен шогышо еҥ языкым ок ыште. Языкым ыштыше еҥ Тудым ужын огыл да Тудым пален налын огыл. 7Икшывем-влак, тек нигӧат тендам ок ондале: кӧ чын ышта, Тудын семынак – чын. 8А языкым ыштыше – диавол деч, вет диавол тӱҥалтыш гычак языкым ышта. Диаволын пашажым шалаташ манынак, Юмын Эргыже тӱняшке толын. 9Юмо деч шочшо иктат языкым ок ыште, вет Юмын илыш нӧшмыжӧ тудын дене кодеш, да тыгай айдеме языкым ыштен ок керт, вет тудо Юмо деч шочын. 10Кӧ Юмын, а кӧ диаволын икшывыже, тыге палаш лиеш. Кӧ чын ок ыште – Юмо деч огыл, тыгак иза-шольыжым йӧратыдыме еҥат Юмо деч огыл. 11Теве тиде уверым те тӱҥалтыш гычак колында: ме икте-весынам йӧратышаш улына. 12Ме Каин гай лийшаш огынал. Тудо осал деч лийын да шке шольыжым пуштын. А молан тудым пуштын? Теве молан: шкенжын пашаже осал улмаш, а шольыжын – чын. 13Иза-шольым-влак, тӱня тендам ужмышудымо гын, ида ӧр. 14Ме колымаш гыч илышыш куснымынам палена, вет ме иза-шольо-влакым йӧратена. Кӧ иза-шольым ок йӧрате, тудо колымаште кодеш. 15Иза-шольыжым ужмышудымо кажне еҥ айдемым пуштшо улеш. А те паледа: айдемым пуштшын иктынат шке кӧргыштыжӧ эрелан кодшо курымаш илышыже уке. 16Мо тугай йӧратымаш, теве кушеч ме пален налынна: Христос мемнан верч шке чонжым пуэн. Меат иза-шольо-влак верч чоннам пуышаш улына. 17Тиде тӱняште улан илыше айдеме шке иза-шольыжын ситыдымашым чытымыштым ужеш да шӱмжым нунын деч тӱкылымаште куча гын, кузе тудын чонышто Юмын йӧратымашыже кодын кертеш? 18Икшывем-влак, ме мут да ойлымо дене огыл йӧратышаш улына, мемнан йӧратымашна чын лийшаш да мом ыштымына гоч койшаш. 19Теве тыге ме чын деч улмынам палена да Юмын ончылно шӱмнам лыпландарен кертына, 20вет шӱмна мемнам титаканыш луктеш гынат, Юмо шӱмна деч кугу да чыла пала. 21Йӧратымем-влак, шӱмна мемнам титаканыш ок лук гын, Юмо деке мияш огына лӱд, 22да мом гына огына йод, Тудын деч чыла налына, вет кӱштымыжым шуктена да, Тудлан мо келша, тудым ыштена. 23А кӱштымашыже тыгай: ме Тудын Эргыжын, Иисус Христосын, лӱмжылан ӱшанышаш да Тудын кӱштымыжӧ семын икте-весынам йӧратышаш улына. 24А кӧ Юмын кӱштымыжым шукта, тудо Юмо дене ушнен шога, а Юмо тудын дене. Тудын мемнан дене ушнен шогымыжым мыланна пуымо Шӱлышыж гыч палена.

Иоаннын 1 серышыже 41Йӧратымем-влак, чыла шӱлышлан ида ӱшане, Юмо деч улыт мо манын, шӱлыш-влакым тергыза, вет тӱняшке шояк пророк шуко лектын. 2Юмын Шӱлышым [да ондалымаш шӱлышым] тыге паледа: Иисус Христос тӱняшке толын да кап дене илен манын почын ойлышо кажне шӱлыш – Юмо деч, 3а Иисус Христосын тӱняшке толмыжым да кап дене илымыжым почын ойлыдымо кеч-могай шӱлышат Юмо деч огыл, тиде антихристын шӱлышыжӧ. Тыгай шӱлыш толеш манын, те колында, да тудо ынде тӱняште. 4Икшывем-влак, те Юмо деч улыда да шояк пророк-влакым сеҥенда, вет тендан дене Улшыжо – тӱня дене улшо деч кугу. 5Нуно тӱня деч улыт, сандене ойлымыштат тиде тӱня деч, да тӱня нуным колыштеш. 6А ме Юмо деч улына. Юмым палыше мемнам колыштеш, а кӧ Юмо деч огыл, тудо мемнам ок кол. Тыге ме чынын шӱлышыжым да шоян шӱлышыжым палена. 7Йӧратымем-влак, икте-весынам йӧратышаш улына, вет йӧратымаш – Юмо деч, йӧратыше кеч-могай еҥ Юмо деч шочын да Юмым пала. 8Кӧ ок йӧрате, Юмым ок пале, вет Юмо – тиде йӧратымаш. 9Юмын мемнам йӧратымыже теве кузе почылтын: Ик Шкет Эргыже гоч мыланна илышым пуаш манын, Юмо Тудым тӱняшке колтен. 10Йӧратымашыже теве кушто: ме огыл Юмым йӧраташ тӱҥалынна, но Тудо мемнам йӧратен да сӧрасымашым пуышо жертвылан мемнан языкна верч шке Эргыжым колтен. 11Йӧратымем-влак, Юмо мемнам тыге йӧратен гын, меат икте-весынам йӧратышаш улына. 12Юмым нигӧ нигунам ужын огыл, но ме икте-весынам йӧратена гын, Юмо мемнан дене ушнен шога, да Тудын йӧратымашыже мемнан дене тичмаш лиеш. 13Ме Тудын дене ушнен илена да Тудо мемнан дене ушнен шога манын, тыге палена: Юмо мыланна шке Шӱлышыж гыч пуэн. 14Ача Эргым тӱням Утарыше лияш колтен манын, ме ужынна да таныклена. 15Иисус – Юмын Эрге манын ӱшанымыжым кӧ почын ойла, тудын дене Юмо ушнен шога, а тудо – Юмо дене. 16Юмо мемнам могай йӧратымаш дене йӧратымым пален налынна да тидлан ӱшанаш тӱҥалынна. Юмо – тиде йӧратымаш, йӧратымаште илыше айдеме Юмо дене ушнен шога, да Юмо тудын дене ушнен шога. 17Йӧратымаш мемнан шӱмыштӧ теве тыгай тичмашлыкыш шуын: суд кечын ме огына лӱд, вет кузе Иисус тиде тӱняште, тугак меат тиде тӱняште улына. 18Йӧратымаште лӱдмаш уке, а тичмаш йӧратымаш лӱдмашым поктен луктеш, вет лӱдмаште орланымаш уло. Лӱдшӧ еҥ йӧратымаште тичмашлыкыш шуын огыл. 19Юмо мемнам ончычак йӧратен, садлан ме Тудым йӧратена. 20Иктаж-кӧ «Юмым йӧратем» манеш да иза-шольыжым ужмыжо ок шу гын, тудо шояче. Вет кӧ шке ужмо иза-шольыжым ок йӧрате, ужаш лийдыме Юмым кузе йӧратен кертеш? 21Юмын пуымо тыгай кӱштымашна уло: Юмым йӧратыше шке иза-шольыжымат йӧратышаш.

Иоаннын 1 серышыже 51Иисусын Христос улмыжлан ӱшаныше кажне еҥ Юмо деч шочын, да Шочыктышым йӧратыше кажне еҥ Тудын деч Шочшымат йӧрата. 2Ме Юмын икшывыж-влакым йӧратымынам теве кушеч палена: ме Юмым йӧратена да Тудын кӱштымыжым шуктена. 3Юмым йӧратымаш Тудын кӱштымыжым шуктымаш лиеш, а кӱштымыжӧ неле огыл, 4вет Юмо деч шочшо кажныже тӱням сеҥа. Тӱням сеҥыше сеҥымаш – тиде мемнан ӱшанымашна. 5Кӧ тӱням сеҥа? Иисус – Юмын Эргыже манын ӱшаныше огыл мо? 6Вӱд, вӱр да Шӱлыш дене толшыжо – тиде Иисус Христос. Тудо вӱд дене гына огыл, а вӱд да вӱр дене толын. А таныклышыже – тиде Шӱлыш, вет Шӱлыш – тиде чын. 7Пылпомышто кум таныклыше уло: Ача, Шомак да Святой Шӱлыш, да нине кумыт икте улыт. 8Мланде ӱмбалне кум таныклыше уло: Шӱлыш, вӱд да вӱр, да нине кумыт иктымак ойлат. 9Ме айдемынат таныклымыжлан ӱшанена, но Юмын таныклымыже утларак кугу, а тиде – Юмын таныклымыже, тыге Тудо шке Эргыж нерген таныклен. 10Юмын Эргылан ӱшанышын тиде таныклымаш шке чоныштыжо уло. А Юмылан ӱшаныдыме Тудым пуйто шояче манын ончыкта, вет Юмын шке Эргыж нерген таныклымыжлан ок ӱшане. 11Таныклымыже теве мо: Юмо мыланна курымашлык илышым пуэн, да тиде илышыже – Тудын Эргыж дене ушнымаште. 12Кӧн Юмын Эргыже уло, тудын илышыжат уло, а кӧн Юмын Эргыже уке, тудын илышыжат уке. 13Юмын Эргыжлан ӱшанымыланда кӧра тендан курымашлык илышда улмым палыза манын, мый тидым тыланда, Юмын Эргын лӱмжылан ӱшаныше-влаклан, возенам. 14Юмын ончылно теве могай ӱшанымашна уло: Тудын эрыкше почеш кунам ме иктаж-мом йодына, Юмо мемнам колеш. 15Ме мом гына огына йод, Тудо мемнам колеш манын палена гын, тугеже ме мом Тудын деч йодына, йодмынам налына манынат палена. 16Кӧ иза-шольыжын язык ыштымыжым ужеш, а языкше колымашке наҥгайыше огыл гын, тек кумалеш, да Юмо тудлан илышым конда. Тидым колымашке наҥгайыдыме языкым ыштыше-влак нерген ойлем. Колымашке наҥгайыше языкат уло, тиде язык верч юмылтыжо манын ом ойло. 17Кеч-могай чын огылат – язык, но колымашке наҥгайыдыме языкат уло. 18Ме палена: Юмо деч шочшо еҥ нигӧат языкым ок ыште, а Юмо деч шочшо шкенжым арала, да осал тудын деке ок тӱкнӧ. 19Ме Юмо деч улмынам да уло тӱня осалын кид йымалныже улмым палена. 20А тыгак палена: Юмын Эрге толын да мыланна чын Юмым пален налашлан [волгыдым да] шонен моштымашым пуэн, да ме Тудын дене да Иисус Христос Эргыж дене ушнен илена. Тудо чын Юмо да курымашлык илыш. 21Икшыве-влак, шкендам шояк юмо деч аралыза. Аминь.

http://www.bible.is/MHRIBT/1John/1/D

Nenhum comentário:

Postar um comentário