segunda-feira, 3 de agosto de 2015

1 YOHANA: LUGBARA

 
1 YOHANA 11E'yo ovᴜpi okokele, e'yo amani erile 'bo, e'yo amani ndrele ama inilesi 'bo, e'yo amani lule vᴜnia, amani ruani elole ama drisi, E'yo idriniri ma e'yosiri— 2idri ece i ra, ama ndre eri 'bo, ama e'yo eti nze, idri 'dani 'daniri ma e'yo olᴜzᴜ emi tia, idri nde ovᴜpi ndra Ata be, i ecepi ama driri'i— 3e'yo amani ndre le ra, amani erile 'bori, ama olᴜ emi tia indi, emi ma eci ti ani ama be; ti ecita amani ovᴜ Ata be azini Mvi erini Yesu Kristo be indi. 4Ama si e'yo 'diyi, ayiko amani ma ga tre ani. 5E'yo oluza amani erile eri vu, amani olule emi tiari eri 'di'i Mungu eri dizani, eri ma alia angu biza aluni yo. 6Ama ka 'yo ra ama ovᴜ ti ecizᴜ eri be, de ama aci angᴜ biza ma alia indi, ama inzo li, ama 'yeni e'yo adarᴜri kᴜ; 7te ama ka aci diza ma alia, erini ovᴜle diza ma aliarile, ama ovᴜ ti ecizᴜ ama eselia, Yesu Mvi erini ma arini ama oji e'yo onzisi dria. 8Ama ka 'yo ra ama ovᴜni e'yo onzi be kᴜ, ama ici ama ngᴜlᴜpi ceni, e'yo adarᴜri ama alia yo. 9Ama ka e'yo onzi amani e'da, eri ovᴜ adarᴜ azini kililirᴜ e'yo onzi amani wuzᴜ, ama ojizᴜ e'yo kililirᴜ kᴜrisi dria. 10Ama ka 'yo ra ama 'yeni e'yo onzi kᴜ, ama 'ba eri 'ba inzo lipirirᴜ, azini e'yo erini ama alia yo. 


1 YOHANA 21Anzi nyiri nyiri mani, ma e'yo 'diyi si emi dri emi kazᴜ e'yo onzi 'yezᴜ kᴜ beni; te 'ba azini ka e'yo onzi 'ye ra, ama ovᴜ 'Ba 'ba aza Kopi e'yo nzezasiri be indi Ata vᴜ, eri Yesu Kristo 'ba kililirᴜri'i; 2eri ovᴜ edeta e'yo onzi amani ma adi cozᴜrirᴜ, e'yo onzi amanisi a'dule kᴜ te e'yo onzi wudrikuru drianisi. 3Ama ka azita erini ma ta mba ra, e'yo 'disi ama ni kini ama ni eri ra. 4'Ba 'yopi kini Ma ni eri ra, te azita erini ma ta mbapi kᴜri, eri 'ba inzo lipiri, e'yo adarᴜri eri ma alia yo; 5te 'ba azini ka e'yo erini ta mba ra, leta Munguni zo eri alia tre 'bo ada. E'yo 'disi ama ni ra ama ovᴜ eri alia : 6'ba 'yopi kini i ovᴜ eri aliari ma aci trotro erini ndra acilerile. 7'Ba mani lele 'diyi la, ma sini azita o'dirᴜ emi dri kᴜ, te azita oku emini ovᴜzᴜ eri be okokeleri'i; azita oku nderi eri e'yo emini erile rari'i. 8Ma si vini azita o'dirᴜ emi dri, e'yo nderi ovᴜ adarᴜ eri ma alia azini emi ma alia indi, a'disikᴜ angᴜ bizani aga aga, diza adarᴜri e'do dizᴜ curu'do 'bo. 9'Ba 'yopi kini i ovᴜ diza ma alia, te i adrini ngupi onziri, eri ovᴜ angᴜ biza ma alia kpere curu'do. 10'Ba i adrini lepiri ovᴜ diza ma alia 'dani, alenia afa kᴜmᴜle fepi 'bani abazᴜni yo. 11Te 'ba i adrini ngupi onziri eri ovᴜ angᴜ biza ma alia, eri we aci angᴜ biza ma alia indi, nini pari ini muzᴜri kᴜ, angᴜ bizani mileni bile cirisi. 12Ma si emi dri, anzi nyiri nyiri, e'yo onzi eminini ovᴜle wuzaru eri ma rusirisi. 13Ma si emi dri, anzi atapi, emini 'ba ovᴜpi okokeleri nilerisi. Ma si emi dri, karile, emini 'ba onzi agale 'borisi. Ma si emi dri ra, anzi, emini Atani nile 'borisi. 14Ma si emi dri ra, anzi atapi, emini 'ba ovᴜpi okokeleri nile 'borisi. Ma si emi dri ra, karile, emini ovᴜle okporᴜ, e'yo Mungunini ovᴜzᴜ emi alia 'dani, azini emini 'ba onziri agale 'borisi. 15Emi ma le nyaku pi afa ovᴜpi nyaku ma alia 'diyi be kᴜ. Te 'ba azini ka nyaku le ra, leta Atani eri alia yo. 16A'disikᴜ afa dria nyaku ma alia 'diyi, li ruani pi, li mileni pie, afᴜ 'bani yi ipizᴜ idri 'dorisiri pie, yi ovᴜni afa Atani kᴜ, te afa nyakuni. 17Te nyakuni aga aga, li erini be; te 'ba e'yo Munguni leleri 'yepiri ovᴜ 'dani 'dani. 18Anzi, 'diri eri etu asizᴜri'i; ekile emini erile kini ari'bo Kristoni emu emurile, curu’do ari'ba Kristoni efᴜ karakaraᴜ 'bo; e'yo 'disi ama ni ra eri ovᴜ etu asizᴜri'i. 19Yi fᴜ ama eseliarisi ra, te yi ndra 'ba amani yo: yi ka te ndra ovᴜ 'ba amani, yi te'do ovᴜ ama be 'dani; te yini fᴜzᴜ 'diniri ece ani kini yi dria 'ba amani yo. 20Te emi ovᴜ odᴜ osᴜza 'Ba Alatararᴜrini feleri be, te emi ni e'yo dria. 21Ma sini emi dri emini e'yo adarᴜri nile kᴜrisi, 'dini kᴜ, te emini eri nile rarisi, azini kini e'yo inzorᴜ alᴜni ovᴜni e'yo adarᴜri ma alia kᴜ. 22'Ba inzo lipiri a'di'i ya, kani 'ba gapi kini Yesu ovᴜni Kristo'i kᴜri'i kᴜ ya? 'Ba 'diri eri ari'bo Kristoni, Ata pi gapi Mvi be siri’i. 23'Ba dria alᴜ alᴜ Mvini gapi siri ovᴜni Ata be kᴜ. 'Ba Mvini e'dapiri ovᴜ Ata be indi. 24Te emi'irᴜni, e'yo emini erile okokeleri ma ovᴜ emi alia 'dani. Te e'yo emini erile okokeleri ka ovᴜ emi alia 'dani, emi indi nga ovᴜ Mvi pi ma alia Ata be 'dani. 25E'yo 'diri eri e'yo aziza erini azile ama tiari, eri idri 'dani 'daniri'i. 26Ma si e'yo 'diyi emi dri ra, 'ba emi icipi 'diyi ma e'yosi; 27te emi'irᴜni, odᴜ osᴜza emini a'ile erI vᴜri eri ovᴜ emi alia 'dani, emi leni 'ba azinini emi imbazᴜ kᴜ; te ekile odᴜ osᴜza erinirini emi imbale e'yo driasirile, erini ovᴜle adarᴜ azini inzo kokorᴜrisi, 'dini ekile erini emi imbalerile, emi ma ovᴜ eri ma alia 'dani. 28Te curu'do, anzi nyiri nyiri, emi ma ovᴜ eri alia 'dani, 'dini eri ka nga i e'da ra, ama ma ovᴜ asi uri kokorᴜri be ani, drinza ma bi ama milenia erini emuria kᴜ beni. 29Emi ka ni ra eri kililirᴜ, emi ni alᴜ indi 'ba dria e'yo kililirᴜ 'yepi 'diyi ovᴜ tizarᴜ erisi.


1 YOHANA 31Emi ndre leta ambo Atani fele ama dri 'doni 'dori, amani ovᴜzᴜ ani omvezarᴜ anzi Mungunirᴜ; te ama ovᴜ 'dini. E'yo 'disi nyaku nini ama kᴜ, erini eri nile kᴜrisi. 2'Ba mani lele 'diyi, curu'do ama ovᴜ anzi Munguni, te e'yo amani ngazᴜ ovᴜzᴜ ngonile yari eceni nga i kᴜ. Ama ni ra eri ka i e'da ra, ama nga ovᴜ erile ra, amani ngale eri ndrele erini ovᴜleri-lerisi. 3'Ba dria ovᴜpi asi teza 'diri be Yesu ma aliari nga i 'ba alatararᴜ erini ovᴜle alatararᴜrile. 4'Ba dria alᴜ alᴜ e'yo onzi 'yepiri eri azita eza aka; azita ezazᴜ akari eri e'yo onzini. 5Emi ni eri ece ndra i e'yo onzi wuzᴜ, te eri ma alia e'yo onzi yo. 6'Ba dria alᴜ alᴜ ovᴜpi eri ma alia 'daniri 'yeni e'yo onzi kᴜ; 'ba e'yo onzi 'yepiri neni eri kᴜ, nini vini eri kᴜ indi. 7Anzi nyiri nyiri, 'ba alᴜni ma ici emi kᴜ. 'Ba e'yo kililirᴜri 'yepiri eri 'ba kililini, erini ovᴜle 'ba kililirᴜrile. 8'Ba e'yo onzi 'yepiri ibi enga 'ba asᴜ sᴜpiri vᴜ; a'disikᴜ 'ba asᴜ sᴜpiri 'ba ndra e'yo onzi 'ye okokeleni. Mvi Munguni e'da ndra i e'yo 'disi, eri ma ja 'yeta 'ba asᴜ sᴜpirini ma dri ra. 9'Ba dria alᴜ alᴜ Munguni tileniri 'yeni e'yo onzi kᴜ; Mungu ma orini ovᴜle eri ma alia 'danirisi, econi erini e'yo onzi 'yezarᴜ kᴜ, Munguni eri tilenirisi. 10Anzi Munguni piyi e'da yi e'yo 'disi anzi 'ba asᴜ sᴜpirini be: 'ba dria alᴜ alᴜ e'yo kililirᴜ 'yepi kᴜri ovᴜni 'ba Munguni kᴜ, 'ba i adrini lepi kᴜri vini 'dinile indi. 11E'yo 'diri eri e'yo olᴜza emini erile okokeleri, kini ama ma le ama ama eselia; 12ama ma ovᴜ Kainile kᴜ, eri 'ba 'ba onzirini, fu i adrini kai. Fu eri a'disi ya? 'Yeta erini 'yele 'diyini ovᴜle onzirisi, te 'yeta adrini 'diyini ovᴜle kililirᴜrisi. 13Emi ma osu kᴜ, adripi, nyaku ka emi ngu onzi. 14Ama ni ra ama efᴜ dra ma aliarisi fizᴜ idri ma alia 'bo, amani ama adripiyi lele avasirisi. 'Ba lepi kᴜri ovᴜ dra ma alia 'dani. 15'Ba dria alᴜ alᴜ i adrini ngupi onziri eri 'ba 'ba fupiri, azini emi ni ra 'ba 'ba fupiri alᴜni ovᴜni idri 'dani 'dani be i ma alia kᴜ. 16Ama ni leta avasiri e'yo 'disi, erini idri ini kᴜle va amasirisi; le ani ama ma kᴜ idri amani va ama adripisi. 17Te 'ba azini ka ovᴜ afa nyakuni be, ka i adri alioni ndeleri ndre ra, te ka yiki i asiari ombe erisi ci, leta Munguni ovᴜ di eri ma alia ngoni ngoni ya? 18Anzi nyiri nyiri, ama ma le ama e'yo 'yozasi kᴜ, kani tisi kᴜ, te 'yetasi azini e'yo adarᴜrisi. 19E'yo 'disi ama nga ni ama 'ba e'yo adarᴜni 'diyi'i, te ama nga ama asi omvi eri milia ani, 20ama asi ka nga e'yo li ama ndezᴜ cenirisi; a'disikᴜ Mungu aga ama asi ra, eri ni e'yo dria. 21'Ba mani lele 'diyi, ama asi ka e'yo li ama ndezᴜ kᴜ, ama ovᴜ asi uri kokorᴜri be Mungu vᴜ; 22te afa ngoni ngori amani zileri ama isu eri vᴜ, amani azita erini 'diyi ma ta mbale azini e'yo ovᴜpi onyirᴜ eri milia 'diyi 'yelerisi. 23Azita eriniri 'di'i, ama ma a'i Mvi erini Yesu Kristo ma ru azini ama ma le ama ama eselia, erini azile ama tiarile. 24'Ba azita erini 'diyi ma ta mbapiri ovᴜ eri ma alia 'dani, azini eri ovᴜ eri ma alia indi. 'Dini ama ni eri ovᴜ ama alia 'daniri, Orindi erini fele ama driri ma e'yosi.


1 YOHANA 41'Ba mani lele 'diyi, emi ma a'i orindi dria kᴜ, te emi ma o'bi orindi nizᴜ kani yi ibi enga Mungu vᴜ yani; nabi inzorᴜ kakaᴜni efᴜle mule nyakua 'borisi. 2Emi ni Orindi Munguniri e'yo 'disi: orindi dria alᴜ alᴜ e'yo e'dapi kini Yesu Kristo emu rua 'bani be rari enga Mungu vᴜni, 3te orindi dria Yesuni e'dapi kᴜri engani Mungu vᴜ kᴜ. Orindi 'diri eri orindi ari'bo Kristonirini, emini erile 'bo kini eri emu rari; te curu'do eri efi nyakua 'bo. 4Anzi nyiri nyiri mani, emi ovᴜ 'ba Munguni, emi aga yi 'bo; a'disikᴜ 'ba ovᴜpi emi aliari eri amborᴜ aga 'ba ovᴜpi nyakuari ra. 5Yi 'ba nyakuni, yi e'yo nyakuni 'yo ani, nyakuni e'yo yini eri ra. 6Ama'i ama 'ba Munguni. 'Ba Mungu nipi rari adri e'yo amani eri ra, 'ba ovᴜpi 'ba Mᴜnguni kᴜri erini e'yo amani kᴜ. Ama orindi e'yo adarᴜni pi ni orindi e'yo mzorᴜni be e'yo 'disi. 7'Ba mani lele 'diyi, ama ma le ama; letani ibile engale Mungu vᴜrisi, azini 'ba dria leta be 'diyi isu Mungu ti yini, yi ni Mungu ra. 8'Ba ovᴜpi leta be kᴜri nini Mungu kᴜ; Munguni ovᴜle letanirisi. 9Leta Munguni ece i ama eselia e'yo 'disi, Mungu pe Mvi ini tile alᴜri ma ti nyakua, ama ma ovᴜ ani idri be erisi. 10Letari 'dini, ovᴜni ama le Munguni ama'i 'dini kᴜ, te Mungu le amani, eri pe Mvi ini ma ti edetarᴜ e'yo onzi amani ma adi cozᴜ. 11'Ba mani lele 'diyi, Mungu ka ama le 'dini, onyirᴜ ama ma le ama 'dinile indi. 12Engazᴜ drio 'ba alᴜmi neni nga Mungu kᴜ; ama ka ama le ra, Mungu ovᴜ ama alia, leta erini zo ama alia tre 'bo indi. 13Ama ni ra ama ovᴜ eri alia, azini eri ovᴜ ama alia e'yo 'disi, erini Orindi ini fele ama dri 'borisi. 14Ama lu vᴜnia 'bo, ama e'yo eti nze kini Atani pe Mvi ini ma ti 'bo ovᴜzᴜ 'Ba 'ba Opapi nyakuarirᴜ. 15'Ba Yesuni e'dapi eri Mungu ma Mvi'iri, Mungu ovᴜ eri alia, eri ovᴜ Mungu ma alia indi. 16Ama ni ra azini ama a'i leta Munguni ovᴜpi ama vᴜri 'bo. Mungu eri letani; 'ba ovᴜpi leta ma aliari eri ovᴜ Mungu ma alia, Mungu ovᴜ eri ma alia indi. 17Leta zo ama alia tre e'yo 'disi, ama ma ovᴜ ani asi uri kokorᴜri be o'du e'yo lizᴜrisi; a'disikᴜ ekile erini ovᴜlerile, ama'i ama ovᴜ alᴜ indi 'dinile nyaku 'diria. 18Leta ma alia uri yo, te leta zopi tre 'bori eri uri 'be amve ra. Te urini bani candi fe; 'ba ovᴜpi urisiri ma alia leta zoni nga tre kᴜ. 19Ama eri le ra erini ama lele okorisirisi. 20'Ba azini ka ‘yora, Ma le Mungu, te eri ngu i adripini onzi, eri 'ba inzo lipiri; 'ba i adripi erini ndrele rari lepi kᴜri econi Mungu erini ndrele kᴜri lezarᴜ kᴜ. 21Ama isu azita 'diri eri vᴜ, kini, 'ba Mungu lepiri ma le i adripi indi.


1 YOHANA 51'Ba dria Yesuni a'ipi eri Kristo'iri, isu Mungu ti erini; 'ba dria ata 'ba tipiri lepi rari le 'ba erini tileri indi. 2Ama ni ama le anzi Munguni e'yo 'disi, amani Mungu lele azini azita erini 'yele rarisi. 3Leta amani Mungu lezᴜri 'di, amani azita erini ma ta mbazᴜri'i. Te azita erini ovᴜni nzizarᴜ kᴜ. 4A'disikᴜ afa dria Munguni tile 'diyi aga nyaku ra; te agaza nyakuni agazᴜ rari eri 'di, a'ita amani. 5'Ba nyakuni agapiri eri a'di'i ya? Eri 'ba Yesuni a'ipi eri Mungu ma Mvi'iri kᴜ ya? 6'Ba emupi yi pisi ari beri eri 'di, Yesu Kristo'i; eri emuni yisi a'dule kᴜ, te yi pisi ari be. 7Orindi eri e'yo eti nzeni, Orindini ovᴜle e'yo adanirisi. 8Afa e'yo eti nzepi 'diyi yi na, Orindi pi, yi pi, ari pie; yi na tro eci yi e'yo alᴜ 'yozᴜ. 9Ama ka e'yo 'bani eti nzeleri a'i ra, e'yo eti Munguni nzeleniri aga ra; te 'diri e'yo eti nzeza Munguni nzeleri, erini nzele i Mvi ma e'yosiri’i. 10'Ba Mvi Munguni aipiri ovᴜ e'yo eti nzeza nderi be i ma alia. Te 'ba Mungu a'ipi kᴜri 'ba Mungu 'ba inzo lipirirᴜ 'bo, erini e'yo eti Munguni nzele i Mvi ma e'yosiniri a'ile kᴜrisi. 11E'yo eti nzeza nderi eri 'di, kini, Mungu fe ama dri idri 'dani 'daniri, azini idri 'diri ovᴜ Mvi ini ma alia. 12'Ba ovᴜpi Mvi beri ovᴜ idri nderi be ra; 'ba ovᴜpi Mvi Munguni be kᴜri ovᴜni idri nderi be kᴜ. 13Ma si e'yo 'diyi emi dri, emi 'ba Mvi Munguni ma ru aipi 'diyi, emi ma ni ani emi ovᴜ idri 'dani 'daniri be. 14Asi teza uri kokorᴜ amani ovᴜzᴜ ani eri be eri ma miliari eri 'di, ama ka afa erini lele feleri zi, eri ama eri ra. 15Ama ka ni ra eri ama eri e'yo dria amani zilerisi ra, ama ni ra ama isu e'yo amani zile eri vᴜ 'diyi ra. 16'Ba azini ka i adripi ndre erini e'yo onzi 'bani drazᴜ ani kᴜri 'yeria, eri nga zi ra, Munguni mga idri fe eri dri 'ba nde e'yo onzi 'bani drazᴜ ani kᴜri 'yepi 'diyi ma e'yosi. E'yo onzi 'bani drazᴜ ani rari indi; ma 'yoni eri ma zi e'yo nde 'dirisi kᴜ. 17Azi onzi dria yi e'yo onzini, te e'yo onzi 'bani drazᴜ ani kᴜri eri indi. 18Ama ni ra 'ba dria Munguni tileniri ovᴜni e'yo onzi 'yeria kᴜ, te 'ba Munguni tileri adri eri ma ta mbani, azini 'ba onziri eloni ani eri ma rᴜa kᴜ. 19Ama ni ra ama 'ba Munguni, azini wudrikuru dria ovᴜ 'ba onziri ma palaa. 20Ama ni ra Mvi Munguni eca 'bo, eri fe ama dri ondᴜa 'bo, amani ani 'ba adarᴜri nizᴜ; ama ovᴜ Mvi erini Yesu Kristo 'ba adarᴜri ma a'ia. 'Ba 'diri eri Mungu adarᴜri'i, eri vini idri 'dani 'daniri'i indi. 21Anzi nyiri nyiri mani, emi te emi agei wura inzile inzi 'diyi ma e'yosi.

  http://www.bible.is/LGGBSU/1John/1/D

Nenhum comentário:

Postar um comentário