quarta-feira, 5 de agosto de 2015

EBBARWA YA YOWAANA YITANGIRA


EBBARWA YA YOWAANA YITANGIRA 11Hubandiikira ebidiira hu Mboosi y'obulamu, eyaliwo ohutulira elalira hu njaako. Yi hwamala ohuwulira, handi yi hwamala ohwehaliirisa handi yi mihono cheefwe chamala ohudiiraho. 2Obulamu buno nibwehola bwaaboneha, hweecha hwabubona; sakira hubulomalomaho handi hwababoolera ebidiira hu bulamu butaakama obwali nibuli ali Seefwe handi hwaabubona. 3Esyo sihwamala ohubona handi hwawulira, nisyo syosi si hubayaalira, hu munyale ohutweyambaaniaho ohuba silala naafwe, mu bulala bu huli nabwo nende Seefwe alala nende Omwaana wae Yesu Kristo. 4Hwandiika sino hu sangaalo lyeefwe linyale ohuba eliichufu. 5Bulaanu, emboosi yi hwamala ohuwulira ohutula hu Mwaana wa Nasae, niyo yino; Nasae niye obulafu, handi abulamo esiirima kata nabudiidi. 6Sakira, nihubaboolera huti huli mu bulala nae, ni haandi esiha syeene esyo huli mu siirima, awo huba hubacha mumboosi cheefwe nende mu biholwa byeefwe. 7Nae nihumenya mu bulafu, - koti lu mweene ali mu bulafu, - awo huba nihuli mu bulala nende abaasyeefwe, handi amabaanga ka Yesu Omwaana wa Nasae katulabya ohutula mu buli sibi. 8Nae nihuboola huti efwe hubulaho esibi syoosi, awo huba hwebacha abeene, handi haba sihulimo obwadyeeri daawe. 9Nae nihweyama ebibi by'efwe eyiri Nasae, achia ohwoseresa siyatusuubisa olwohuba mwesikwa handi mulungifu. Achia ohutuleheramo ebibi byeefwe byoosi mani atulabye ohutula mu bibi byeefwe byoosi. 10Nae nihuboola huti husisiiri ohuholaho esibi syoosi, awo huba huhola Nasae ohuba omubacha, handi emboosi yae haba siyiba yiri mu bulamu bweefwe.

EBBARWA YA YOWAANA YITANGIRA 21Baana bange, mbandiikira sino hu muhaye ohuhola esibi, nae omuundu wundi naahola esibi, huli nende Yesu Kristo omuundu mulungifu otwekonyoyeera eyiri Seefwe. 2Omweene oyo niye esiyaanwa sikera hwaleherwamo ebibi byeefwe, nae ataali ebibi byeefwe byong'ene, nae ebibi bya buli muundu yeesi. 3Esiindu sikera hwomiisa huti humumanyire nisyo ohuwulira amalako kae. 4Omuundu yeesi naboola ati, “Mumanyire” nae haba saawulira amalako kae, omuundu oyo aaba ali omubacha handi abulamo obwadyeeri. 5Nae omuundu owulira emboosi chae, oyo niye oba omuundu yi hudaha hwae eyiri Nasae huba ohwichufu elalira. Sino nisyo esikera hwomiisa huti huli bulala nende Nasae: 6omuundu oboola ati, ali mu bulala nende Nasae ahoyeere ohumenya koti lu Yesu Kristo yamenya. 7Basyaange baheerwa, esilagiro simbandiikira sino, haba sisiyaaha; silagiro sihale nisyo, simwamala ohuba nasyo ohutula mu njaako. Esilagiro sihale sino, niyo emboosi yimwamala ohuwulira. 8Nae esilagiro siindi ohubaandikiira sino siyaaha, handi obwadyeeri bwaasyo bubonehera mu Kristo handi nende mweeng'we mwesi. Olwohuba esiirima syamala ohutulao, handi obulafu bwadyeeri bulaanu nibwo obuli ohwaaduha. 9Omuundu oboola ati ali mu bulafu, nae yasyuula abaasye, aaba asisiiri mu siirima ohwoola buti. 10Omuundu odaha owaasye, niye oba ali mu bulafu handi abulamo esiindu sikera yaahola esibi. 11Nae omuundu ohayihana nende abaasye, oyo aaba ali mu siirima handi asikenderamo handi haba saamanyire yachoomere olwohuba esiirima siba simuwofuuse. 12Baana bange, mbadiikira olwohuba mwamala ohuleherwamo ebibi byeeng'we hu lw'eliita lya Kristo. 13Mbandiikira eng'we ba laata, olwohuba mumanyire oyo owaliwo ohutula mu njaako. Mbandiikira eng'we abaraaga basimbuha, olwohuba mwamala ohuyiingira omuundu Mubi Oyo. 14Mbandiikira eng'we abaana olwohuba mumanyire Seefwe. Mbandiikira ba laata, olwohuba mumanyire owaliwo ohutula mu njaako. Handi mbandiikira eng'we abaraaga basimbuha, olwohuba muli nende amaani, handi emboosi ya Nasae yiri mweeng'we, handi mwamala ohuyiingira omuundu Mubi Oyo. 15Mutadahaanga esyaalo, oba esiindu sy'omusyaalo syoosi. Omuundu yeesi odaha esyaalo, ohudaha hwae eyiri Seefwe huba humubulamo. 16Olwohuba esiindu syoosi esyomusyaalo koti obwekoombi bw'omubiri hubi, nende obwekoombi bw'emoni, nende ohwefumia ohweema hu siindu si muundu ali nasyo oba siyahola, ebyo haba sibya Seefwe; nae by'esyaalo busa. 17Esyaalo nende ebiindu byoosi ebisirimo bi bandu bekoomba byohuwaao; nae abo abahola bi Nasae adaha, bacha ohuyiindira endaalo choosi. 18Baana bange, chino nicho endaalo chimaliirihayo! Mwawulira muti Omusuku wa Kristo achia ohwiicha; nae ohwoola bulaanu, abasuku ba Kristo abaangi bamala ohubonehana, mani esyo esikera hwaamanya huti enjakamo yiri aambi. 19Mubwadyeeri, abandu bano, haba sibali bala hubomumukaanda kwaabwe, sakira batuleha. Bbaba nibali ab'omumukaanda kweefwe, bahadong'ere naafwe. Nae bawaao hubabonehanire elalira bati abulao kata mulala hwaabo mubwadyeri bweene owali ow'omukaanda kweefwe. 20Nae eng'we Kristo yamala ohubachuhaho Mwooyo Mwolerefu, mani eng'we mweesi mumanyire obwadyeeri. 21Sakira mbandiikira ataali mbwe mukoterwe obwadyeeri; nae olwohuba mumanyire obwadyeeri, handi mumanyire muti abulao obubacha butula mubwadyeri. 22Mani muundu siina omubacha? Omubacha niye omuundu oboola ati, Yesu haba siniye Kristo. Handi omuundu oyo musuku wa Kristo olwohuba yekaana Nasae Seefwe nende Omwaana wae. 23Olwohuba omuundu yekaana Omwaana wa Nasae, oyo aaba yekaana Simwaana yesi; handi omuundu ofukiirira Omwaana wa Nasae, oyo aaba afukiirira Simwaana yesi. 24Mani sakira yomiise bulai handi liinde bulai mu myooyo cheeng'we emboosi yimwawulira ohutula hale. Bimwawulira ohutula mu njaako nibidoong'a mu myooyo cheeng'we, awo muba mucha ohumenya endaalo choosi mu bulala nende Omwaana wa Nasae nende Simwaana mu bulamu bweeng'we. 25Handi sino nisyo si Kristo mweene yabasuubisa ohubabeeresa obulamu butaakama. 26Mbandiikira bino ebidiira hwaabo abateemaho ohubabachirisa. 27Nae ebidiira hweeng'we, Kristo yamala ohubachuhaho Mwooyo wae. Nae Mwooyo wae naali mweeng'we, awo handi simuba nimusidaha omuundu yeesi abeekese. Olwohuba Mwooyo mweene oyo, aaba abeekesa ebidiira hu buli siindu syoosi. Handi buli siindu siyeekesa siba esyadyeeri ataali obubacha. Bulaanu mudoong'e mu bulala nende Kristo. 28Eee, baana bange, doong'e busa mu bulala nae, hu bulaanu mube nende obwomiifu bungi naabonehana, hu muhaye ohumweekisa hulw'esoni, hu Ludaalo luyahakobolereho. 29Mumanyire muti, Kristo mulungifu niye; sakira mumanyire muti omuundu yeesi ohola ebilungifu aaba ali omwaana wa Nasae.

EBBARWA YA YOWAANA YITANGIRA 31Bone koti lu Seefwe yatudaha muno, sakira batulaanga abaana ba Nasae; handi mubwadyeri bweene huli hutyo. Esikera esyaalo nisitukotwa nisyo olwohuba haba sisyamanya Nasae. 2Basyaange baheerwa, bulaanu huli abaana ba Nasae, nae sihwahabe sisisiiri ohumanyihana, nae humanyire huti, Kristo niyahabonehe hucha ohuba koti lwaali, olwohuba hwahamubone koti lwaali. 3Omuundu yeesi oli nende esuubi lino mu Kristo ahoyeere ohulabya obulamu bwae koti lu Kristo yalabya. 4Omuundu yeesi ohola esibi, oyo aaba ahalaka ebilagiro bya Nasae; handi oba mu sibi yeekesa ati, yahaya ohuwulira ebilagiro. 5Mumanyire muti Kristo yabonehana hwaanyale ohumalao ebibi byeefwe, handi Kristo abulaho nende esibi. 6Mani sakira buli muundu yeesi oli mu bulala nende Kristo, siyemeeda ohuhola ebibi; nae omuundu wemeeda ohuhola ebibi, oyo aaba asisiiri ohumubona handi asimukoterwe. 7Baana bange, omuundu yeesi alehe ohubabacha! Omuundu yeesi ohola ebilungifu aaba omulungifu koti lu Kristo ali omulungifu. 8Nae omuundu wemeeda ohuhola ebibi aaba omuundu wa Sitaani olwohuba Sitaani yachaaka nende ebibi byae ohutula hale. Omwaana wa Nasae yeecha hulw'esifune sino, ohusihirisa omulimo ku Sitaani yali amalire ohuhola. 9Abaana ba Nasae haba sibemeeda ohuhola ebibi, olwohuba obulamu bwa Nasae bweene bubalimo; handi olwohuba Nasae ali Sibanyala, mani haba sibanyala ohukaluha bemeeda ohuhola ebibi. Abulao kata mulala hw'abo abali abaana ba Nasae owemeeda busa ohuholaanga ebibi. 10Sino nisyo esikera hwaanyala ohukabuhania bulai akati-kaati w'abaana ba Nasae nende aba Sitaani: omuundu yeesi otahola ebilungifu, oba otadaha owaasye, oyo haba saaba ali omwaana wa Nasae. 11Yino niyo enjekesa yimwawulira ohutula hale: mbwe mudahaneenge. 12Haba simuhoyeere ohuba koti Kaini; yali omuundu w'Omuhola Mbi, mani yeeta Abbeli mwaanang'ina mweene. Lwasiina Kaini yeeta mwaanang'ina? Olwohuba ebiholwa byae byali ebibi, nae ebiindu bi mwaanang'ina yahola byali ebilai. 13Sakira basyaange, mutesinduha abandu bomu syaalo nibatabadaha. 14Humanyire huti, hwamala ohuleha ohufwa, mani hwecha mu bulamu; olwohuba hudaha abaasyeefwe. Omuundu otadaha abaasye, oyo asisiiri mu hufwa. 15Omuundu otadaha mwaanang'ina, oyo mwiiti niye, handi mumanyire muti abeeti haba sibalimo obulamu butaakama. 16Sino nisyo esikera hwaamanya koti ohudaha lu huli: Kristo yawaayo obulamu bwae hulweefwe. Mani fwesi huhoyeere ohuwaayo obulamu bweefwe hulw'abaasyeefwe! 17Omuundu mugaga naabona owaasye naali mu ngisa, mani yaahaya ohumudeebaho, anyala ohuboola atye ati, ali nende ohudaha Nasae mu mwooyo kwae? 18Baana bange, ohudaha hweefwe haba sihuhoyeere ohuba ohwohumunwa busa hwong'ene nae huhoyeere ohuba ohwadyeeri, ohubonehera mu biholwa. 19Sino nisyo esikera hwaamanya huti huli abandu b'obwadyeeri; handi koti emyooyo cheefwe chicha ohuba nende emireembe mu moni wa Nasae. 20Buli lu bibaaso byemyooyo cheefwe bitweekesa esibi syoosi, olwohuba humanyire huti Nasae muhoongo muno ahira emyooyo cheefwe, handi amanyire buli siindu. 21Sakira basyaange, ebibaaso byemyooyo cheefwe nibitatweekesa esibi syoosi, awo huba nende obugumu ohweema mu moni wa Nasae. 22Handi hunyoola buli siindu sihudaha syoosi ohutula yaali, olwohuba huwulira ebilagiro byae handi hwaahola ebiindu bi musangaasa. 23Sino nisyo esiindu sibatulagira ohuhola, ati huhoyeere ohufukiirira mu liita ly'Omwaana wae Yesu Kristo handi hudahaneenge, koti lu Kristo yatulagira ohuhola. 24Omuundu yeesi owulira ebilagiro bya Nasae, amenya mu Nasae handi Nasae amumenyamo. Handi sino nisyo esikera hwaamanya huti Nasae yatumenyamo, - Mwooyo yi yatubeeresa.

EBBARWA YA YOWAANA YITANGIRA 41Basyaange baheerwa, mutafukiirisanianga nende buli muundu oboola ati ali nende Mwooyo wa Nasae; mubakeseho hu mumanye nende obwadyeeri muti batula eyiri Nasae. Olwohuba banabbi b'obubacha bangi muno bamala ohusasaanira mu syaalo syoosi. 2Yino niyo engeri yi mucha ohunyaliramo ohumanya omuundu oli nende Mwooyo wa Nasae: omuundu yeesi oboola ati Yesu Kristo yehola omuundu, oyo atula eyiri Nasae. 3Nae omuundu yeesi okaana ati Yesu Kristo haba siyehola omuundu, haba saali nende Mwooyo otula eyiri Nasae. Mwooyo yaali nae aaba atula eyiri Omusuku wa Kristo, yimuwulira muti achia ohwiicha, mani bulaanu yamala ohwiicha ano mu syaalo. 4Baana bange, eng'we muli abaana ba Nasae, handi mwamala ohuyiingira abanabbi b'obubacha olwohuba Mwooyo obalimo w'amaani muno ohuhira mwooyo w'omusyaalo. 5Abanabbi b'obubacha abo balomaloma hu biindu by'ohusyaalo, mani sakira esyaalo sibadaha handi syaabatekeeresa. 6Nae efwe huli aba Nasae. Handi omuundu yeesi omanyire Nasae atutekeeresa. Nae omuundu yeesi otaali owa Nasae haba saatuwulira. Yino niyo engira yihunyala ohukabuhanisiramo Mwooyo w'obwadyeeri nende mwooyo w'obubacha. 7Basyaange, lehe hudahane abeene-na-beene, olwohuba ohudaha hutula eyiri Nasae. Omuundu yeesi oli nende ohudaha aaba ali omwaana wa Nasae handi omanyire Nasae. 8Omuundu otaali nende ohudaha, oyo akoterwe Nasae, olwohuba Nasae hudaha nihwo. 9Yino niyo engeri yi Nasae yatweekeseramo ohudaha hwae: Yatuma Omwaana wae mudeerwa yeng'ene mu syaalo hu hunyale ohunyoola obulamu nihumubitiramo. 10Huno nihwo ohudaha: haba si neefwe abataangira ohudaha Nasae, ohutusaho Nasae niye owatudaha, mani yaatutumira Omwaana wae ohuba esiyaanwa simalao ebibi byeefwe. 11Basyaange baheerwa, nisiri siti Nasae yatudaha atyo, mani fwesi huhoyeere ohudahana. 12Abulawo omuundu yeesi owamala ohubonaho Nasae, nae nihudahana, awo Nasae aaba ali mweefwe, handi ohudaha hwae huli mweefwe hucha ohwolerera elalira. 13Sino nisyo esyomiisa bulai siti huli mu Nasae, handi yeesi ali mweefwe, olwohuba yatubeeresa Mwooyo wae mweene. 14Handi efwe abeene hwabona, mani bulaanu huboolera abandu bandi huti, Seefwe yatuma Omwaana wae ohuba omuwonia w'esyaalo. 15Omuundu oboola ati Yesu Mwaana wa Nasae, Nasae amulimo handi yeesi ali mu Nasae. 16Handi efwe abeene hwamanya handi hwaafukiirira ohudaha hu Nasae atudahiramo. Nasae hudaha nihwo, mani omuundu oli mu hudaha ali mu Nasae, handi Nasae yeesi amulimo. 17Mu ngeri yino, ohudaha hwatwolereramo elalira. Mani hucha ohuba nende obwomiifu hu Ludaalo lw'ohuheengeraho emisango. Olwohuba obulamu bweefwe bw'ohusyaalo huno bufwaana koti obwa Kristo. 18Mu hudaha hubulamo ohutya; nae ohudaha hwiichufu humalao obuti bwoosi. Olwohuba ohutya hudiirana nende ohusaandisibwa, handi omuundu otya haba saaba ali nende ohudaha hw'elalira mu mwooyo kwae. 19Lehe hube nende ohudaha olwohuba Nasae niye owataangira ohutudaha. 20Omuundu naboola ati, “Ndaha Nasae” nae esiha syeene asihayaane nende owaasye, oyo aaba omubacha, olwohuba saanyala ohudaha Nasae yasisiiri ohubonaho, nae ahaya ohudaha owaasye yaabonaho. 21Sakira sino nisyo esilagiro si Kristo yatubeeresa: ati omuundu odaha Nasae, ahoyeere ohudaha owaasye yeesi.

EBBARWA YA YOWAANA YITANGIRA 51Omuundu yeesi ofukiirira ati Yesu niye Kristo, oyo aaba ali omwaana wa Nasae. Handi omuundu odaha simwaana yesi ahoyeere ohudaha omwaana yeesi. 2Sino nisyo esyeekesa siti hudaha abaana ba Nasae: nihudaha Nasae handi hwawulira ebilagiro byae. 3Kano niko amahulundu k'ohudaha Nasae: ohuwulira ebilagiro byae. Handi ebilagiro byae haba sibyomeranu 4olwohuba buli mwaana wa Nasae yeesi ayiingira amaani k'esyaalo. Yino niyo engeri yihuyiingiriramo amaani k'ohusyaalo: huyiingira nende efukiirira yeefwe. 5Abulao omuundu onyala ohuyiingira amaani k'ohusyaalo ohutusaho omuundu ofukiirira ati Yesu Mwaana wa Nasae. 6Yesu Kristo niye omuundu weecha nende amaachi kabatiisa, nende amabaanga kae. Haba siyeecha nende amaachi kong'ene, nae amaachi nende amabaanga. Handi Mwooyo Mwolerefu mweene yomiisa obwadyeeri buno, olwohuba Mwooyo Mwolerefu bwadyeeri nibwo. 7Baliwo abajulisi badatu abomiisa obwadyeeri buno: 8Mwooyo, amaachi, nende amabaanga. Handi badatu bano boosi bafukiirisania. 9Nikali mbwe hufukiirira emboosi ch'abandu, echomiisibwa nende obwadyeeri bwoosi, awo huhoyeere ohufukiirira echa Nasae chihiramo amaani, handi niyo emboosi yi Nasae yomiisa hu Mwaana wae. 10Omuundu yeesi ofukiirira Omwaana wa Nasae oyo aaba yomiisa obwadyeeri buno mu mwooyo kwae; nae omuundu otafukiirira Nasae, oyo aaba amuhola omubacha, olwohuba haba saafukiirira bi Nasae yaboola niyomiisa obwadyeeri budiira hu Mwaana wae. 11Mani yino niyo emboosi yomiisa obwadyeeri: yiti, Nasae yamala ohutubeeresa obulamu butaakama, handi obulamu buno bunyoolehana mu Mwaana wae. 12Omuundu yeesi oli nende Omwaana wa Nasae oyo niye oli nende obulamu buno: nae omuundu yeesi obula Omwaana wa Nasae oyo abula nende obulamu. 13Mbandiikira sino, eng'we abafukiirira mu liita ly'Omwaana wa Nasae munyale ohumanya muti muli nende obulamu butaakama. 14Sino nisyo esikera hwaaba nende obugumu mu moni wa Nasae: hwomiisa huti achia ohutubeeresa esiindu syoosi nihumwekongooya koti lu yeenya. 15Handi nihumanya huti atuwulira nihumusaba esiindu syoosi, awo humanya handi huti, achia ohutubeeresa buli siindu sihumusaba syoosi. 16Omuundu naabona owaasye naahola esibi sitaleeta ohufwa, ahoyeere ohwekongooya mani Nasae achia ohubeeresa omuundu oyo obulamu. Mboola esyo ohudiira hu bandu bahola esibi sitaleeta ohufwa. Nae aliwo esibi sileeta ohufwa. Mani haba simboola endi muhoyeere ohwekongooya Nasae ebidiira hu sibi esyo. 17Ebiholwa byoosi ebitaali ebilungifu bibi nibyo, nae aliwo ebibi biindi bitaleeta ohufwa. 18Humanyire huti, omwaana wa Nasae haba siyemeeda ohuhola ebibi, olwohuba Omwaana wa Nasae amuliinda bulai, handi Omusuku saanyala humuholaho esibi syoosi. 19Humanyire huti huli abandu ba Nasae, handi esyaalo syoosi siri mu bunyala bw'Omusuku. 20Humanyire huti Omwaana wa Nasae yamala ohwiicha, handi yatubeeresa amakesi kakera hwaamanya omuundu w'adyeeri. Humenya mu bulala nende Nasae w'adyeeri mu bulala, nende Omwaana wae Yesu Kristo. Wuno niye Nasae waadyeeri mweene, handi niye obulamu butaakama. 21Baana bange, mutule hu banasaye b'obubacha.

http://www.bible.is/LSMBSU/1John/1/D

Nenhum comentário:

Postar um comentário