sábado, 1 de agosto de 2015

Jongo Hasia Deli Sogo Asęani: Dadibi


Jongo Hasia Deli Sogo Asęani Pas 11Dago te gesi noma bidibo ula elalubo pode, te pode dagebolo e po asęna tolobao. Te Godigo nai me deli me nigisiąbadi te po hasia bidaluai dao. Te po polobadu mu elaluali goli dago te po dena ologo odali dao, tama dena gedugo suai. Awe, dago gedugo suali, tama dago nogogo tuyu yai. [Jo 1:1] 2Te gesi noma bidibo ula aga bulu ulaba hania pedalama, tama dago aga suai. Tama tibaso, dago agade po dagebolo pusuyu, tama te Ayade bidali bidada peyu, bidada pabo ula aga hania pedalama, tama dago sulama, tama dago dagebolo pusubao. [Jo 1:14] 3Awe, agade dago gedugo suali sę dali te dago ologo odali po me, te si dago dagebolo me pusubao. Te dage da dali wadolama, tama da tigidali te dago Aya dali, aga ogwa Jisas Krais aga dali me dago deli homu elama bidimainogo eyu te dago megi e po dagebolo pusubao. 4Tama da dali dage dali te da tigidali dwagi yai homu pemene mu emainogo dago e po dagebolo asęna tolobao. 5Te Kraisgo dabolo ola mani po dago megi dagebolo hania ola mobao. Te po e dao: God aga te ula dao, tama dwasianu hulia sali agade me elalubo menio. 6Tama tibaso, dago “Da God aga abagi bidiyu, tama dago aga dali deli homu ebo dao,” te po weyu, tiali digi da hulide biliduyu da, teda dago tibo po wai, tama dago ebo kolesaga te mu menio. 7Tiali goli da ulade biliyu da, te aga te ulade bidibo gilama, tama tiali da, da dena hasi abagi dede dali deli homu elama bidaibao. Tama bididuyu, tama Godigo ogwa Jisas agai kanemego dago dwai sę tigidali sela sąnama, tama da dwagi yai ma pedalobo dao. 8“Eno dwai sę menio,” dago te po weyu da, teda dago dena homu kolesagabolo ili po ola mayu, tama mu po wabo dago homu kolesagade me menio. 9Tiali goli dago yali dwai sę dabe po dago te Godibolo pusuyu da, teda agai aga polobadu dąų wali po wali peyu, tama agai da dali te doloba pai kolesaga naga eyu yaibao. Agai dago dwai sę yali sela sąwaibao, tama dago yali dwai kolesaga tigidali agai sela sąnama tama da te meda isąwai we bidi ilaibao. 10Dago hogwa sabo po weyu, “Eno dwai sę me ebeo,” dago te po weyu da, teda te po wabogo dago God aga nogi ili po wabo bidi dao wai, tama agai po dago homude menio.

Jongo Hasia Deli Sogo Asęani Pas 21Eno wai dabe, dagego dwai sę isąmainogo eno e po dagebolo asęna tolobao. Tama bidi me deligo dwai sę eyu da, te da tau sabo bidi me deli elalubao, te mu doloba pai bidi Jisas Krais dao. Tama aga Aya dali bidiyu, tama agai te da tau sabo po agabolo wabo dao. 2Tama Krais agai tigi menama, tama aga digi dago dwai sę yali sela sąbo tų dawai bidi dao. Tama agai da naga tau selama, dago dwai sę yali te naga sela sąbo bidi menio. Agai tigidali tǫde bidibo we bidi me tau siyu, tama augwaligo yali dwai sę sela sąbo tų dawai dao. 3Te dago Godigo bomo yai po dabe wali peyu da, teda homu si isąbadi dago e po mu wagameo, “Dago God koneyu bidibao.” 4Godigo bomo yai po wali pisąbo bidigo te po weyu da, “Eno God mu koneai dao,” te po wabo bidi aga te ili po wabo bidi dao, tama mu po te bidigo homude bidibeo. 5- 6Tiali goli niwai bidi me deligo Godigo po wali pabo bidi, teda te bidi agai God dali dwagi yai homu eyu godolo ebo kolesaga te sese mu ebao, te sǫą pabeo. Tama niwai bidi me deligo te po weyu “Ena God dali wadoloyu bidibao,” te po wabo bidi aga te Jisas Kraisgo yali kolesaga tiwai dolo wali pao. Tama dago te tiwai gilama eyu da, teda dago homu si isąbadi dago e mu hania koneagameo, te da God dali wadoloyu bidibao. 7Eno abagi mu dede, eno dagebolo e bomo yai po asębo po te gesi po menio. Te hasia bomo yai po polobadu mu dagego sai po dao, te augwaligo dagebolo Godigo po ola mabo gagalali sogo dagego te bomo yai po odai dao. 8Me ma, megi eno dagebolo te asębo bomo yai po page meba te gesi po dao. Tama te eno asębo bomo yai po te mu po dao, te dago konebao, te Kraisde me, te dagede me, tede dago te bomo yai po te mu po dao dago subo dao. Magi baso meni, te ula mu te pedalama bidiyu, tama te ulago te be hulia si elaluali silibao. 9Niwai bidi me deligo te po weyu, “Ena te ulade bidibo dao” obaso da, tialima te po wabo bidigo aga ama dali sębę elama boi bidi homu eyu da, te bidi aga be hulia sai digi me bidibao. 10Niwai bidigo aga ama dali dwagi yai homu ebo bidi, te bidi aga ulade bidibo dao. Tama aga ulade bidibadi te aga dwai sę ilibo magi dwai nai pedelegobeo. 11Tiali goli niwai bidigo aga ama dali sębę eyu boi bidi homu eyu da, te bidi hulide bidibo dao. Aga hulide biliyu, be hulia saligo agai gedu dąų olama, tama aga pabo tų aga konesiąbaso gegebo dao. 12Dage eno wai dabe, tama Krais aga nogi tobade Godigo dagego dwai sę yali sęgę sela sąwai dao. Tama eno te po dagebolo asęna tolobao. 13Aya dede, dagego te tigidali nai gagalali sogode bidali bidi, aga megi me bidibo, te bidi dagego koneai dao. Tama eno te po dagebolo asęna tolobao. Dage gesi bidi dabe, dagego Satango bomo aiyaba elaluai dao. Tama eno te po dagebolo asęna tolobao. 14Dage eno wai dabe, dagego dago Aya bugagia koneai. Tama tiyu, eno te po dagebolo asęai dao. Dage aya dabe, te tigidali nai gagalali sogode bidali bidi, aga megi me bidibo, te bidi dagego koneai dao. Tama tiyu, eno te po dagebolo asęai dao. Dage gesi bidi dabe, dagego bomo yai, tama Godigo po dage tomode bidibao, tama dagego Satango bomo aiyaba elaluai dao. Tama eno te po dagebolo asęai dao. 15Dagego te tǫde kolesaga dali, tǫde elalubo nai dali pesą eyu teba homu mugio. Niwai bidi me deligo e tǫde kolesaga teba homu mubaso da, te bidi agai Aya God dali dwagi yai homu elama godolo ebo menio. 16Magi baso meni, tǫde bidigo kolesaga tigidali, te kolesaga e tama telalubo da wali, te tigigo bidigo homu hodolama tama mena dwai sę ebo kolesaga, te gedugo haniani nai sulama godolo ebo kolesaga, te bidigo mena naide hagoma homu eyu aga nogi ugwaba sabo kolesaga, te tobage kolesaga Aya Godigo mabeo. Menio. Te kolesaga e tǫde pedalobo kolesaga dao. 17Tama e tǫde kolesaga silaibao, tama te mena nai sainogo gedugo sulama godolo ebo te sę me sia saibao. Tiali goli Godigo pedauwalidu wabo po wali pabo bidi, te bidi aga gamonaibao, aga sesemane sogo mu bidada paibao. 18Dage eno wai dabe, te tigidali nai silabo sogo pąba yagasai dao. Polobadu augwaligo dagebolo te po wai, “Te Krais dali boi bidi homu yabo bidi pedalaibao,” wabo, te po dagego odali. Awe, megi Krais dali boi bidi homu yabo bidi hauwa augwali mu pedalai dao. Tama tibaso, dago koneai, te tigidali nai silabo sogo pąba yagasai dao. 19Te bidi dabe augwali polobadu te da bidi hani deli bideiba homu meni baso, tama augwaligo da tagalai dao. Augwali dago hani tigi sogo da, te da dali me bidigi dao. Augwaligo da taga pobaso, dago hania koneani, te bidi dabe tigidali augwali da deli hani bidi mu meni. 20Dage, te dagebolo te Tedali Bidi Kraisgo te Godigo Mobo Bidi olo mani. Tama tibaso, dage tigidaligo te mu po koneai dao. 21Dagego te mu po page konesiąbaso, tama te pode eno dagebolo e po asębao, te homu dagego egimio, te menio. Dagego te mu po page koneai, tama te mu pogo tibo po munu me wabo menio, te me dagego koneai dao, eno te homu elama te po eno dagebolo asębao. 22Tibo po wabo bidi de dawe? “Jisas aga Godigo sa muani tagala palali bidi Krais menio,” te po wabo te bidi aga te tibo po wabo bidi te dao. Te bidigo te Aya dali aga ogwa dali sigo nogi wabo hogwa siyu, tama tudiba mubo bidi, te bidi agai Krais dali boi bidi homu yabo bidi dao. 23Niwai bidi agai te ogwa nogi wasiąma hogwa siyu tudiba muani bidi, te bidi agai te ogwa aga Aya me nogi wasiąma hogwa siyu tudiba muai dao. Niwai bidi agai te ogwa dali konealubo po dąų wali da, te bidi agai Aya dali me agai konealubo po mu dąų wabo dao. 24Te dagego polobadu te Godigo po odobo gagalali sogode odali po, te po dagego duga homude dąų ola sao. Dagego te gagalali sogode odali po bugagia dąų ola siyu da, teda dage te Ogwa dali Aya dali si dali wadoloyu sesemane sogo bidaibao. 25Tama aga digi agai dabolo aga dąų wali po tama wai, agai da sesemane sogo bidabo ula mawaibao, te po wai. 26Eno te dagebolo te tibo po ola mawainogo ebo bidi dabe augwaligo ebo kolesaga te po dagebolo pusuyu asębao. 27Tialima dagede, dage Kraisgo aga Mobo Bidi olo mayu tama aga dage dali me bidibao. Tama aga Mobo Bidi dage dali bidibadi, te sogo dage te po ola mabo bidi dage dali me sǫą pabeo. Dagego te gasa po ola mabo bidi dabe sabo homu egio. Menio. Mobo Bidi agai dage tigidali kolesaga ola mabo dao. Tama te Mobogo mu po tama naga wabo dao. Agai tibo po me wabeo. Agai tama tibaso, dagego agai po wali peyu tama Krais dali wadoloyu bidiąo. 28Awe, eno wai dabe, dage aga dali bidao. Magi baso meni, nosali aga hania pedalaibao, te sogo da bomo elama dolaluaibao, te aga ma asobo sogode, te tama da hale eyu geme duala sogobeo. 29Dagego te bidi Krais aga dwagi yai doloba pai bidi mu da weyu mu dolo kolesaga ebo bidi da te tiwai konealigo da, teda dagego me tama koneao: dwagi yai doloba pai kolesaga ebo bidi, aga te Godigo wai mu bidibao.

Jongo Hasia Deli Sogo Asęani Pas 31Te goba! Ayago da dali dwagi yai homu eyu godolo mu yali kolesaga te moni genuai mu pedalali. Suao. Godigo aga digi da te agai wai dabe dao wai. Mu tama, da Godigo wai dabe dao. Tama da Godigo wai dabe tama bidiyu, tama tǫde bidi dabe augwaligo God konesiąbaso, tama augwaligo da me konebeo. [Jo 1:12] 2Abagi mu dede, megi da te Godigo wai dabe bidibao. Tama nosali da mena tama bidigowe, te dago megi bugagia hania konebeo. Tialima dago koneani, nosali Krais hania bulu ulaba pedalobo si, te sogo dago aga magi bidi dawe te dago te page mu hania koneaibao. Tama dago aga subaso, te sogo da aga tiwai gagawaibao. 3Tama te augwali Krais tiwai pedalobo sogo bugagia tonaluyu bidibo we bidi tigidali, augwaligo magi sę isąyu dwagi yai naga tedali gagabo dao. Magi baso meni, augwaligo koneani, te Krais me aga magi dwai sę isąyu dwagi yai naga tedali bidibo dao. 4Dwai sę ebo bidi, agai Godigo bomo yai po olo oda tagaluyu sela sąbo bidi dao. Magi baso meni, te dwai sę ebo kolesaga page da, te Godigo bomo yai po bolobo kolesaga dao. 5Dagego koneai, Krais asali agai te tǫde we bidigo dwai kolesaga ebo sela sąwainogo asai, tama dwai sę ebo kolesaga agade me bidibo menio. [Jo 1:29] 6Tama tibaso, aga dali wadolama bidibo bidi, te bidi agai te dwai kolesaga me eyu bidibo menio. Niwai bidi me deligo dwai kolesaga eyu bidibo bidi, te bidi agai Krais susiąma, tama agai Krais konesiąwai bidi bidibo dao. 7Dage eno dwasianu wai dabe, dage dua dao. Dage bidi me deligo tibo po ola maidali weyu bugagia suao. Dwagi yai doloba pai kolesaga ebo bidi, te doloba pai bidi dao, te Krais aga dwagi yai doloba pai bidi tiwai dao. 8Niwai bidigo dwai sę idu bidibo, te bidi Satango hani bidi dao. Magi baso meni, te Godigo tigidali nai nigisiąbadi, polobadu mu Satango dwai sę ebo gagalama, tama eyu, tama megi me aga tama tibo dao. Tama agai te Satango we bidi tomode ebo dwai kolesaga ela silimainogo te Godigo Ogwa aga hania pedalai. 9Niwai bidi me deli aga Godigo wai gagawai bidi, te bidigo dwai kolesaga idu bidibo menio. Magi baso meni. Godigo homu kolesaga page te bidide elalubo. Tama God da aga Aya bidibaso, te bidi agai te dwai kolesaga idu bidibo usu egobeo. 10Edao. Te Godigo wai dabe dali, te Satango wai dabe dali, augwali dagalama hania koneabo tų e dao: dwagi yai doloba pai kolesaga wali pisąbo bidi, aga te Godigo wai menio. Tama aga ama dali dwagi yai homu eyu godolo isąbo bidi, te bidi me aga te Godigo wai menio. 11Te tobage kolesaga isąbo bidi aga Godigo wai menio. Magi baso meni. Augwaligo dagebolo Godigo po ola mabo gagalali sogode, te sogode dagego tama po odai: dago dena hasi abagi dali dwagi yai homu eyu godolo mu iyąo. [Jo 13:34] 12Da te polobadu bidali bidi Kein bidali tiwai bidamuo. Aga te Satango bidi bidai, tama agai aga ama ela muai. Tama magi baso aga ama ela muaniwe? Agai dwai kolesaga naga yali, tama aga amago yali kolesaga tigidali dwagi yai doloba pai kolesaga yai. Tibaso, aga sębę elama, aga ama ela muai. [Gag 4:8] 13Eno ama dede, tǫde elalubo kolesaga wali pabo bidi dabe augwaligo dage dali boi bidi ebaso da, dage te kolesagade dage midigi sigio. 14Dago dena ama dabe augwali dali dwagi yai homu eyu godolo ebaso, tama te dago koneai, dago te genuai sia dabo buluba pabo tų tagalama, tama da te bidada peyu bidada pabo ula sabo tų sabolai dao. Gasa we bidi dali dwagi yai homu eyu godolo ebo kolesaga masiąbo bidi, aga te genuai sia dabo buluba pabo tųdu me bilibo dao. [Jo 5:24] 15Bidigo aga ama dali boi bidi homu ebo bidi, aga te bidi ela mubo bidi dao. Tama dagego koneai, bidi ela mubo bidi, te bidi aga te dwagi yai bidada peyu, bidada pabo ula elalubo menio. 16Tama bidi dali dwagi yai homu eyu godolo mu ebo kolesaga page, te kolesaga page dabolo hania ola mabo sę e dao: Krais aga digi agai da tǫde we bidi tau somainogo aga bidabo ula tagalama, tama da tobade isali. Tama tibaso, dago me dago bidibo ula tagalama, dago ama dede augwali tau sao. Tama tiyu, dago augwali tau sobadi tama gasa bidi dabego da elebaso, dago usu da homu yao. 17Tialima te doado bage hauwa elalubo bidi agai aga ama te nai meni yai bidi bidibo sula tagalama, tama aga tau masiąyu da, teda magi baso te bidigo te po wali, “Eno Godibolo dwagi yai homu eyu godolo ebo bidi dao.” 18Dage eno wai dabe, dago te we bidi dali dwagi yai homu eyu godolo ebo kolesaga, te kolesaga dago pedauwaligo po wabogo naga ilamuo. Menio. Dago homu mu eyu, tama dago augwali dali dwagi yai homu ebo kolesaga te dago augwali tau sabo sęgo augwalibolo hania ola mao. 19Te eno megi tama wali kolesagade, te dago te kolesaga ebaso da, teda dago koneagameo, da te mu po naga wabo Godigo we bidi dao. Dago te gasa we bidi dabe dali dwagi yai homu eyu godolo ebo kolesaga eyu da, teda da God pąba pabo sogo te da agade wi egobeo. 20Magi baso meni. Dago homude te dena homugo da dali po tų ebaso da, teda dago koneani, te God agai dago homu kolesaga aiyaba elalubo dao, tama agai homu kolesaga genuai ugwanu mu ela holai elalubogo, tama agai tigidali nai mu konebo dao. 21Abagi dede, dago homude ebo te kolesagade da po tų esiąyu da, teda Godigo gedude wi isiąma da dolalubo dao. 22Tama tiyu, tama dago magi nai me sainogo gedu haluasa po obaso da, te agai dabolo mabo dao. Magi basowe? Dago agai bomo yai po wali peyu, tama agai godolo ebo kolesaga dago ebo dao. 23Tama agai bomo yai pode tama wai: dago konealubo po agai ogwa Jisas Kraisgo nogide dąų olama, tama dago gasa we bidi dabe augwali dali dwagi yai homu eyu godolo mu yao, te agai dabolo polobadu wali po tiwai. [Jo 13:34; 15:12, 17] 24Niwai bidi me deligo Godigo bomo yai po wali peyu da, te bidi God dali bidalubo dao, tama God aga te bidi dali bidalubo dao. God agai aga Tedali Mobo Bidi dabolo mawai. Tama tibaso, dago koneai, God da dali bidibo dao.

Jongo Hasia Deli Sogo Asęani Pas 41Abagi dedeo, tibo po ola mabo bidi dabe hauwa augwali tigidali tǫde bilalubao. Tama bidi hauwago te po obao, “Godigo Mobo Bidi agai enabolo mu po olama, tama eno te mu po pusubo dao.” Te po obaso, dagego homu te augwaligo ola mabo poba olo subigila dąų wagio. Dagego koneainogo, tigidali te po ola mabo bidi osola suao, te Godigo tagala palali Mobo Bidi augwali dali bidibawe, ma meniwe, te suainogo tama tiao. 2Dagego te bidi me deligo Godigo Mobo Bidi elalubowe naga tede dagego hania konemainogo e tiwai aga osola suao: Bidigo “Te Jisas aga Godigo sa muani bidi Krais dao, tama aga tǫba asama aga e tǫde bidigo tigi tiwai selama tama bidali bidi dao,” te po wabo bidi te Godigo Mobo Bidi aga dali bidibo dao. 3Tiali goli tigidali bidigo Jisas dali te po tiwai wasiąbaso da, te bidi dabe augwali te gasa dwai bidi nomago dagana sagasali, te Godigo Mobo Bidi menio. Te tobage bidi agai Krais dali boi bidi homu ebo dao, polobadu dagego po odali te tobage bidi aga asaibao wai. Tama megi aga aselama, tǫde bidibao. 4Dage eno wai dabe o, dage Godigo we bidi hani, tama dagego te tibo po ola mabo bidi aiyaba elaluai dao. Magi baso meni. Te Mobo dage tomode bidibo Mobo Bidi agai bomogo te tǫde bidi dali tomode bidibo mobogo bomo aiyaba elalubo dao. 5Te tibo po ola mabo bidi dabe augwali tǫde bidiyu, tama tǫde elalubo kolesaga naga augwaligo wali pabo dao. Tama augwaligo po te tǫde elalubo naide po wabo dao. Tama tibaso, tǫde bidigo augwaligo po odobo dao. 6Da Godigo we bidi dao. God koneani bidi, te bidi agai dago po odobo dao. Tialima God konesiąwani bidi, agai dago po odali goli, te po wali pabo menio. Tede dago te mu po wabo Mobo dali, tibo po wabo dwai bidi noma elalubo bidi dabe dali dagalama, tama augwali si koneagameo. 7Abagi mu dede o, dena hasi dago we bidi dali dwagi yai homu eyu godolo mu inao. Magi baso meni. Te we bidi dali dwagi yai homu eyu augwali godolo mu ebo kolesaga page bidi te God dao. Bidigo dwagi yai homu mabo kolesaga wali pabo bidi, aga te Godigo wai dao, tama agai God mu konebo dao. 8Bidigo aga ama dali dwagi yai homu eyu godolo isąbo bidi, agai God konebeo. God agai homu kolesaga page da, te we bidi dali dwagi yai homu eyu augwali godolo mu ebo homu kolesaga dao. 9God agai Ogwa deli digi mu, tama agai te Ogwa e tǫba tagala palai, tama agai da aga yali sęde te bidibo ula somainogo tiwai. Tebogo da ola mani, God agai da dali dwagi yai homu eyu, da godolo ebo dao. 10Dwagi yai homu mabo kolesaga te tama menio: hasia dago bolo God dali dwagi yai homu eyu godolo yai da, te homu egobeo. Te tama menio. Dwagi yai homu mabo kolesaga e tama tiwai: God agai bolo te dwagi yai homu mu da dali elama, tama aga Ogwa e tǫba tagala palama, tama agai aga tigi menama, tama dago dwai sę tigidali sela sąbo bidi bidimainogo tiwai dao. 11Abagi mu dede o, God agai te tiwai da dali dwagi yai homu eyu godolo mu yaligo da, teda dago me dena hasi dwagi yai homu dago abagi dabe dali inao. 12Bidi me deligo God munu me subeo. Dago dena hasi dwagi yai homu dago abagi dali eyu da, God aga da dali bidibo dao, tama aga dwagi yai homu eyu godolo ebo kolesaga te da tomode sese wiegi yai mu pedalai dao. [Jo 1:18] 13God agai aga Mobo Bidi dabolo mawai. Tama tibaso, dago koneai, da God dali bidibo dao, tama aga da dali bidibo dao. 14Tama Aya God aga Ogwa e tǫba tagala palama, tama agai da e tǫde we bidi tigidali ma dobola sabo bidi pedalomainogo yai. Dago te suai dao, tama dago te sę po gasa we bidi dabe augwalibolo pusubo dao. 15Bidi me deligo te gasa we bidi gabidide po weyu, “Awe, te bidi Jisas aga te Godigo Ogwa dao,” obaso da, God aga te bidi dali bidibao, tama te bidi aga God dali bidibo dao. 16Tama dago koneai dao, Godigo da dali dwagi yai homu eyu godolo mu ebo dao. Tama koneyu, tama da te kolesagaba dago homu tiąlubo dao, tede homu si ebo menio. God agai homu kolesaga page da, te we bidi dali dwagi yai homu eyu augwali godolo mu ebo homu kolesaga dao. Tama bidi te kolesaga eyu bidibo bidi, aga God dali bidiyu, tama God aga te bidi dali bidiyu ebo dao. 17Tama bidiyu, tama te dwagi yai homu eyu godolo ebo kolesaga te da tomode sese wiegi yai mu pedalobo dao. Magi baso meni. Tama tiyu da, da e tǫde bidibo sogo te da Krais tiwai bidibo dao. Tama tibaso, te nosali te tǫ dagalu silibo side genuai po tų ebode da wi me egobeo. 18Tama God agai da dali te dwagi yai homu eyu godolo mu ebo kolesaga te sese wiegi yai mu dao, sǫą pabeo. Tama tibaso, da wi menio, te agai da dali ebo kolesagago te wi ebo sela sąbo dao. Wi ebo page e tama: da dwai dene sabo homu ebo we bidi bidiyu da, teda da wi ebo dao. Tama tiyu da, dago koneaibao, te Godigo da dali dwagi yai homu ebo kolesaga page te dago kuna konebeo, da tede sǫą pabo. 19Te dago God dali, dena hasi abagi dali te dwagi yai homu eyu godolo ebo kolesaga page e dao: hasia bolo God agai da dali te godolo ebo kolesaga yali. 20Bidi me deli agai te po weyu “Eno God dali dwagi yai homu eyu aga godolo ebo dao,” te po agai weyu, tiali goli te bidi agai aga ama dali dwai boi bidi homu eyu da, teda te bidi agai tibo po wabo dao. Magi baso meni. Te bidigo aga gedugo aga ama subo dao. Tiali goli agai aga dali dwagi yai homu eyu godolo ebo menio. Tama tibaso, agai te aga gedugo susiąbo God dali mena tama dwagi yai homu ebo kolesaga egowe? Mu menio, aga usu egobeo. 21Tama te bomo yai po dago God agade sai, te po tama wai: niwai bidigo God dali te dwagi yai homu eyu godolo ebo bidi, agai aga ama dali me dwagi yai homu eyu godolo mu yao.

Jongo Hasia Deli Sogo Asęani Pas 51Tigidali bidigo Jisas aga te Godigo sa muani tagala palali bidi Krais dao olama konealubo po dąų wai, te bidi dabe augwali Godigo wai dabe dao. Tama tigidali bidigo aya dali dwagi yai homu ebo bidi, te augwaligo te dwagi yai homu eyu godolo ebo kolesaga agai wai dabe dali me ebo dao. 2Tama dago God dali dwagi yai homu elama tama aga godolo mu eyu, tama agai bomo yai po dago wali peyu da, teda dago te kolesaga ebode koneagameo, dago God agai wai dabe dali dwagi yai homu eyu godolo ebo dao. 3Magi baso meni. Dago God dali dwagi yai homu eyu godolo ebo kolesaga page e dao: dago God agai bomo yai po wali pabo dao. Tama agai bomo yai po dabe augwali te bidigo wali pabo usu isąbo bomo yai po meni, te dago augwali wali pabo usu yaibao. [Jo 14:15] 4Godigo wai dabe tigidali augwali deli deligo te tǫde elalubo dwai kolesaga aiyaba elaluai dao. Te dago e tǫde elalubo dwai kolesaga aiyaba elalubo tų e dao: dago te Jisas aga te Godigo sa muani tǫba tagala palali bidi mu dao, te konealubo po dago Jisasde dąų wabo, te kolesagago dago te tǫde kolesaga aiyaba elaluama tagalobo dao. 5Mena bidigo hwįnama tama tǫde dwai kolesaga ebo aiyaba elalubo bidi dawe? “Te bidi Jisas aga Godigo Ogwa mu dao,” te po konealubo po dąų wabo bidi aga naga dao. 6Te aga da, Jisas Krais aga digi aga hania pedalali. Aga ąįgo baptais mabo te kolesaga dali, tama aga te ni pedaide kaneme gelabo te kolesaga dali asai. Aga asali te ąįgo kolesaga dali naga asai menio. Aga asali te aga ąį dali kaneme dali te kolesaga si dali asai. Tama tiyu, te Godigo Mobo Bidi agai te Krais aga asali kolesagade te mu po dao, te po wai dao. Magi baso meni, te Mobo Bidi da te mu po wabo page mu dao. 7Awe, sela augwaligo te da ola mabo da, te Krais aga Godigo Ogwa dao. 8Me te Mobo Bidi, me ąį, me te kaneme tama dao. Tama te sela augwaligo te Kraisde deli po naga dabolo ola mabo dao. 9Bidi me deligo agai suali sę po dabolo pusubo si, te dago homu si isąyu tama “Te mu po dao” weyu dago agai pusali po sabo dao. Tama bidigo wabo pode dago tama tialigo da, teda dago Godigo aga Ogwade dabolo pusubo po odoyu, dago mu po dao weyu te po sao. Magi baso meni, te Godigo pogo bomo te bidigo pogo bomogo aiyaba elalubo dao. Te Godigo aga digi aga Ogwade pusali po dao. 10Tama te konealubo po Godigo Ogwa dali dąų weyu agaba tiąlubo bidi, te bidi agai te Godigo aga Ogwade pusali po aga homude elalubo dao. Te Godigo aga Ogwade wali po, te pode “Mu po dao” wasiąbo bidi, te bidi agai “God aga nogi ili po wabo bidi dao” wai dao. Magi baso meni. Te po, te Godigo aga Ogwade wali pode te bidigo “Te po mu po menio” homu eyu sela sąwai dao. 11Tama Godigo aga Ogwade wali po e dao: God agai da sesemane sogo bidada peyu, bidada pabo bidibo ula mawai dao, tama te bidabo ula page aga Ogwa Jisasde elalubo dao. [Jo 3:36] 12Bidigo Godigo Ogwa dali kęą pali bidi, aga dali te bidibo ula elalubo dao. Tama bidigo Godigo Ogwa dali kęą pisąwani bidi, aga dali te bidibo ula elalubeo. 13Te dagego Godigo Ogwago nogide konealubo po dąų weyu agaba tiąlubo we bidi, te dagego te dwagi yai bidada peyu bidada pabo ula elalubo konemainogo eyu, eno e po dagebolo asęna tolobao. 14Da Godigo gesabide bidiyu, tama dago aga dali homu si ebo menio. Magi baso meni, magi nai po aga dali gedu haluasa po weyu, tama dago aga homu wali peyu da, teda agai dago te gedu haluasa po wabo odobo dao, te dago mu hania konebo dao. 15Awe, dago aga dali gedu haluasa po weyu da, teda agai te po odobo dao. Tama te dago konebo dao. Tama konealigo da, teda dago e me konebo dao, te dago magi naide po aga dali gedu haluasa po weyu da, agai te nai dabolo mabo dao. 16Bidi me deligo aga amago dwai sę ebo suyu da, tama te dwai sę ebogo te yali bidi aga dwai madigi pisąbo dwai sę elaluyu da, teda aga amago Godibolo gedu haluasa po wao. Tama weyu, tama Godigo te dwai sę yali sela sąnama tama bidibo ula te bidibolo mawaibao. Te dwai sę tedali tedali dao, mebago te sę yali bidi dwai madigi tagala palabo dao, mebago meni. Tama te sę yali bidi dwai madigiba pisąbo dwai sę ebode eno te po wai, Godibolo gedu haluasa po wao. Tiali goli te bidi dwai madigi tagala palabo dwai sę, tede eno dagebolo “Gedu haluasa po wao” wabeo. 17Tigidali dolo isąbo kolesaga, te dwai sę dao. Tiali goli dwai sę mebago te bidi dwai madigi tagala palabo menio. 18Dago koneai, tigidali bidi Godigo wai dabe bidalubo bidi, augwaligo dwai kolesaga wali me pabo menio. Magi baso meni. Godigo Ogwago augwali bugagia palibo dao, tama Satango augwaliba aga nogo mugobeo. 19Dago koneai, te tigidali tǫde bidibo we bidi augwali te Satango dologode bidibo digi, da Godigo wai dabe bidibao. 20Dago koneai, Godigo Ogwa aga asai, tama agai homu kolesaga da mawai, dago te God aga God mu dao, te dago konemainogo te kolesaga da mawai. Da aga Ogwa Jisas Krais dali wadolama bidibaso, tama da God dali bidibo dao. Te Krais da, te aga God mu dao, tama agai te bidibo ula sesemane sogo bidada peyu, bidada pabo ula mabo dao. 21Eno wai dabe, dua dao. Dagego te tibo god dabe wali pidali weyu, dagego duga digi bugagia paliąo. Te tama dao.

http://www.bible.is/MPSWBT/1John/1/D

Nenhum comentário:

Postar um comentário