sábado, 5 de setembro de 2015

1 JƆN: MENDE

1 JƆN 11Mua kɔlɛi ji nyɛima wu gama kɔlooni ndɛvu ve Yiɛi ma, na i na wɔɔ gba i hiye hindei gbi lɔto-gbelei ma. Mu yee-Njiɛi mɛninga, mu tɔnga a yaama, mu kpenga, mu jaanga la a loko. 2Ji yeendɛvui ji i gɛni numu a gu a tɔla, mu tɔilɔ; famia mu seli wuaama fa, ma kunafɔ lɛɛvui na gona wu ma i yɛ Kɛkɛi gama i gɛni a mue. 3Na mu tɔnga tawao mu mɛninga, mua konama wua bɛɛ ma kɔɔ wu gbɛɛ mu ma ngoyilɛi na hu mua Kɛkɛ-ni mu hu kɛɛ ngi Hindoloi Yesu Kristi. 4Mua kɔlɛi ji nyɛima wu gama aako mu goohunɛɛi laa i ve. 5Ngowili a ji lɔ mu mɛninga a ngi Hindoloi, mu konama wu ma, kɛ Ngewɔ i yɛni a foofo lɔ, tawao kpindi gbi ii ngi hu kulo bɛɛ. 6Mu ndengaa hɔɔ muɛɛ mua tieni lɔ ngoyila hu kɛɛ ma jia kpindi hu, kɛ mu ndɛɛ gualanga, tawao kɛ muii jiama a tɔnya welei. 7Kɛɛ mu jiangaa fofoi na hu Ngewɔ i hu, ma yɛlɔ ngoyila hu a mu nyɔunyɔ, tawao ngi Hindoloi Yesu ŋamɛi a jumbui gbi wualɔ mu ma mu yɛ sɛwɛ. 8Mu ndengaa muɛɛ jumbu gbi ii mu hu kɛ mu mua yekpe wɛlɛnga tawao kɛ tɔnyɛi ii mu hu. 9Kɛɛ mu gayengaa Ngewɔ gama muɛɛ mu jumbu hinda wienga, Ngewɔ ɛɛ wotewote tawao ngi wɔnangɔ: a manulɔ muma mu jumbuisia va, i mu nyamuisia kpɛlɛɛ wua mu ma i mu yɛ sɛwɛ. 10Mu ndengaa muɛɛ muii yaa jumbu hinda gbi wieni, kɛ mu Ngewɔ yɛnga a ndɛɛ gualamɔ tawao kɛ ngi laayiɛi ii mu hu.

1 JƆN 21Nya leengeisia, nyaa kɔlɛi ji nyɛima wu gama aako waa jumbu hinda wie; numu gbi i jumbu hinda wiengaa, pɔɔnamɔi Yesu Kristi lɔ mu yeya a Kɛkɛi manɛnɛ mu va. 2Tawao Kristi vulii lɔ i yɛni a sabu Ngewɔ i manuni mu jumbuisia ma, tawao mu jumbuisia lekee ii le, dunyablaa kpɛlɛɛ ti jumbuisia bɛɛ. 3Mu Ngewɔ jaweisia houngaa kɛ mu langa la kɛ mu ngi gɔɔlɔ. 4Numu i ndengaa yɛ, “Ngi ngi gɔɔlɔ,” kɛɛ ɛɛ ngi jaweisia hou, ndɛɛ gualamɔ mia a yeenumui na tawao tɔnyagbi ii ngi hu. 5Kɛɛ numu gbi lekee a Ngewɔ laayiɛi hou, ta lɔ ngi layii a Ngewɔ ndavengɔ. Ji lɔ a pie mu gu mu la la kɛ mua Ngewɔ-ni mu wilingɔe hu: 6numu gbi lekee a nde yɛ taa Ngewɔ ti wilingɔe hu, mahoungɔi i jia kia lɔɔ Yesu i jiani la. 7Nya liima ndiamɔisia, sawa nina ii le ngaa yɛ nyɛima wu gama; sawa wovei na le wu majɔɔni i hiye tɔto-gbelei ma. Sawa wovei lɔ ngowili na le mu humɛnini. 8Na hu gbi, sawei ji ngi nyɛima wu gama ninangɔe, tawao numu a ngi lɔnyala gɔɔ Kristi luvayii lɔ ma kɛɛ wua bɛɛ wu ndɛi. Ajifa kpindi lɔ gbɔyɔma, tawao fofoi yeekpekpei lɔ na vooma. 9Numu gbi lekee a nde yɛ taa fofoi na hu kɛɛ ngi lolongɔ a ngi ndewei, kɛ taa kpindi hu kiahuna bɛɛ. 10Numu gbi lekee ngi longɔ a ngi ndewei kɛ taa fofoi hu, tawao kɛ hinda gbi ii ngi hu a pie numu weka i jumbu hinda wie. 11Kɛɛ numu gbi lekee ngi lolongɔ a ngi ndewei, taa kpindi hu; a jia yeekpindii hu lɔ tawao ii kɔɔ mia i lima na ajifa kpindi i pumui wɛlɛnga ngi yaama. 12Nyaa kɔlɛi ji nyɛima wu gama, nya leengeisia, ajifa Ngewɔ i wu jumbuisia lufenga Kristi sabui hu. 13Nyaa kɔlɛi ji nyɛima wu gama, kɛkɛ-ni, ajifa wu numui na gɔɔngɔ i yɛ na wɔɔ i hiye hindei gbi lɔto-gbelei ma. Nyaa kɔlɛi ji nyɛima wu gama, kɔɔngɛisia, ajifa wu temaya majɔɔnga Seitana maahu. 14Nyaa kɔlɛi ji nyɛima wu gama, nya leengeisia, ajifa wu Kɛkɛi gɔɔngɔ. Nyaa kɔlɛi ji nyɛima wu gama, kɛkɛ-ni, ajifa wu numui na gɔɔngɔ i na wɔɔ gba i hiye hindei gbi lɔto-gbelei ma. Nyaa kɔlɛi ji nyɛima wu gama, kɔɔngɛisia, ajifa wu gbayangɔ; Ngewɔ laayiɛi lɔ wu hu fɔ tawao wu temaya majɔɔnga Seitana maahu. 15Waa wu lii wu dunyei yeehindei hu ɔɔ hanii gbi lekee i yeedunyei ji hu. Wu longaa a dunyei, kɛ ndoma ii wu lii hu Kɛkɛi va. 16Hanii gbi lekee i dunyei ji hu na jumbubleisia ti haamingɔ fa, na nungaa ta tɔ ti lo la kɛɛ hanii kpɛlɛɛ lekee i dunyei ji hu nungaa ta mata gbua la, yeengila bɛɛ ii gbuani Kɛkɛi gama, kpɛlɛɛ a gbɔku dunyei ji hu lɔ. 17Dunyei kɛɛ hanii gbi nungaa ti hamingɔ fa ti gbɔyɔmaa; kɛɛ numui na a Ngewɔ liima hindei wie a yɛlɔ na kunafɔ va. 18Nya leengeisia, hanii gbi ti gɛlɛmɛi i lukpenga kpla. Ti hugɛnga a wue kɛ Yesu juwui a walɔ; tawao kiahuna na Yesu juwu gboto ti wilanga bɛɛ a gbuala nga, faale mu kɔɔlɔ kɛ hanii gbi ti gɛlɛmɛi i lukpenga kpla. 19Nungɛi jisia tii yɛ vulii mu lia a ti lii, na vamia ti vayani mu ma; kiaa mua tieni yɛla ti yɛ lolɔ mu lia. Kɛɛ ti vayɛilɔ mu ma aako i gɛ leiŋ kɛ ti yilayee bɛɛ ii yɛ mu ma. 20Kɛɛ wua, Kristi i Ngewɔ Yafei yeinga wu ma, famia wu gbi wu tɔnyɛi gɔɔngɔ. 21Nyaa kɔlɛi ji nyɛima wu gama ajifa tii yɛma wuii tɔnyɛi gɔɔ, kɛɛ jifa wu kɔɔngɔ, tawao gbɔma wu kɔɔngɔ kɛ ndɛɛ yiɛi ɛɛ gbua tɔnyɛi hu. 22Ye lɔ na hɔɔ ndɛɛ gualamɔi le? Tamia a numui na a nde yɛ Yesu ii le aa yɛ a Ngewɔ Maha Heingɔi. Kristi juwui mia a yeenumui ji ngi gbelengɔe Kɛkɛi tia ngi Hindoloi veenjɔɔ kpɛlɛɛ ma. 23Gbamaile numu gbi lekee a gbele Ngewɔ Hindoloi ma, i gbeeleni Kɛkɛi bɛɛ lɔ ma; numu gbi lekee a loko hei Kɛkɛi Hindoloi bu, i loko heinga Ngewɔ bɛɛ lɔ bu. 24A tɔ vulii ngowili na wu majɔɔni tɔtomɛi i yɛ wu liisia hu. Na wu mɛnini tɔtomɛi ina wu ndama gbatɛilɔ wu liisia hu wa yɛlɔ ngoyila hu wua Ngewɔ Hindoloi-ni kɛɛ Kɛkɛi. 25Tawao ji lɔ Kristi vulii i Lahei wumbuni feva mu wɛ kunafɔ lɛɛvui. 26Nyaa kɔlɛi ji nyɛima wu gama kɔloongɔ nasia ma ti lapima wu yakava. 27Kɛɛ wua, Kristi i ngi Yafei yeinga wu ma. Ina lekee ngi Yafei lɔ wu hu, wuii gbeweni numu gbi va wu gaava. Ajifa ngi Yafei lɔ a wu gaa kɔlooni hinda gbi ma, tawao na a wu gaa la tɔnya le, ndɛɛ ii le. A golo hɔɔ Ngewɔ Yafei gaai bu, wu yɛ Kristi hu. 28Hii i na, nya leengeisia, a yɛ ngi hu, aako ndiilo waa i yɛ mu wɛ ji a gbuanga, maa lɔwu ngi ma a ngufe folei na ma a wa. 29Wu kɔɔlɔ kɛ Kristi wɔnangɔe; mahoungɔe hɔɔ wu kɔɔ kɛ numui na lekee a pɔɔna hindei wie Ngewɔ loi mia a ngie.

1 JƆN 31A ndomɛi na lɔ lɛɛ Ngewɔ piengɔ a mue! Ngi lomɛi wɔlɔngɔ waa le na hii ta mu loli a Ngewɔ leengeisia, tawao a tɔnya hii mu na. Sabui na va dunyei ii mu gɔɔ, tamia a ji ii yaa Ngewɔ gɔɔni. 2Nya liima ndiamɔisia, Ngewɔ leengeisia lɔ naa a mue, kɛɛ ii yaa gɛni lɛ leiŋ mu wama yɛma a gbɔɔ. Kɛɛ ma kɔɔlɔ kɛ watii na Kristi a gbuanga ma gbualɔ a ngie, ajifa ma ngi lɔlɔ kia i na vulii. 3Numu gbi lekee a liilo hii Kristi ma, a ta yekpe yɛlɔ sɛwɛ kia Kristi sɛwɛsɛwɛngɔ. 4Numu gbi lekee i jumbu hinda wiengaa, kɛ ngi lɛɛ le Ngewɔ jawei nyaniva; ajifa sawei nyanila lɔ jumbui le. 5Wu kɔɔlɔ kɛ Kristi i wailɔ dunyei hu aako i nuuvuisia ti jumbuisia gbua ti ma, tawao ta vulii jumbu gbi ii ngi ma. 6Faale numu gbi lekee i Kristi hu ɛɛ nɔɔ jumbu hinda wiela ma; kɛɛ numu gbi lekee a nɔɔ jumbu hinda wiela ma ii yaa Kristi lɔni tawao ii ngi gɔɔ. 7Numu gbi aa wu wɛlɛ, nya leengeisia! Numu gbi lekee a pɔɔna hindei wie, pɔɔnamɔ lɔ a ngie, kia lɔɔ Kristi wɔnangɔ la. 8Numu gbi lekee ngi nɔɔngɔ jumbu hinda wiela ma, Seitana wolɔ a ngie, ajifa Seitana i jumbu hinda wienga wɔɔ kpɔɔ i hiye hanii gbi ti lɔto-gbelei ma. Ngewɔ Hindoloi i wani sabui ji vulii lɔ va, aako i Seitana yenge lokoisia hunyani. 9Numu gbi lekee Ngewɔ loo a ngie ɛɛ nɔɔ jumbu hinda wiela ma, ajifa Ngewɔ yɛyii vulii lɔ ngi hu, tawao gbɔma jifa Ngewɔ lɔ ngi Kɛkɛ le, ɛɛ nɔɔ jumbu wiela ma. 10Nduahugɛ lokeloke gbe Ngewɔ leengeisia luahu kɛɛ Seitana ndɛisia: numu gbi lekee ɛɛ pɔɔna hinda wie ɔɔ ii loni a ngi ndewei, Ngewɔ loo yaa a ngie. 11Ji lɔ ngowili le wu mɛnini i hiye tɔto-gbelei ma kɛ mahoungɔe mu lo a mu nyɔunyɔ, 12maa wie kia Ken i yɛ na wɔɔ, Seitana woo a ngie, i ngi gbɔugbɔu ndewei waa. Tawao gbɛva lɔ i ngi waani? Ajifa ngi wiehindeisia ti nyamungɔ yɛla, kɛɛ ngi ndewei wiehindeisia ti wɔnangɔ. 13Faale aa guala wu ma, nya mbaa Kristimableisia, ina dunyei i loleilɔ a wue. 14Mu kɔɔlɔ kɛ mu gbuanga hee hu mu wilinga ndɛvuihu, ajifa mu longɔ a mu ndeengɛisia. Numu gbi lekee ndoma ii ngi lii hu i haa hu lɔ lɛ. 15Numu gbi lekee ngi lolongɔ a ngi ndewei, numu waamɔ lɔ a ngie; tawao wu kɔɔlɔ kɛ kunafɔ lɛɛvui ii numu waamɔ hu. 16Hii ma kɔɔ gbɔɔ ndomɛi le: ji Kristi i ngi lɛɛvui veni mu va. Mahoungɔe mua bɛɛ mu mu lɛɛvuisia ve mu ndeengɛisia va! 17Numu gbatɛngɔ yɛngaa la, i ngi ndewei lɔ hinda gbɔungɔ ngi laa, i liilo i yeendewei na goma, a yee gu i nde yɛ ndoma lɔ ngi lii hu Ngewɔ va? 18Nya leengeisia, mu lomɛi aa yɛ a lahu layia gbama lekee kɛɛ njɛpɛ, mahoungɔ i yɛ a ndomɛi yeetɔnyangɔi na a ta yekpe gɛ mu wiehindei hu. 19Hii ma kɔɔ kɛ tɔnyɛi gungɔe mu hu, hii mu liisia ti gbangɔ a yɛla Ngewɔ gɔɔbu. 20Mu lii i mu lɛɛngaa, mu kɔɔ kɛ Ngewɔ i leweni mu lii ma, tawao kɛ i hindei gbi hugɔɔlɔ. 21Faale, nya liima ndiamɔisia, mu lii ii mu lɛɛlɔ, ma ndiigba majɔɔlɔ Ngewɔ gɔɔbu. 22Na gbi lekee ma fɛli ngi ma, ma majɔɔlɔ, ajifa ma ngi jaweisia hou, ma na wie a nɛɛ ngi wɛ. 23Ngi jawei lɔ a ji: yɛ mu la a ngi Hindoloi Yesu Kristi biyɛi, tawao mu lo a mu nyɔunyɔ, kia lɔɔ Kristi i feni mu wɛ a sawa. 24Numu gbi lekee a Ngewɔ jaweisia hou, i Ngewɔ hu lɔ, tawao Ngewɔ i ngi hu. Tawao hii ma kɔɔ kɛ Ngewɔ lɔ mu hu: ma kɔɔlɔ ngi Yafei na va i fenga mu wɛ.

1 JƆN 41Nya liima ndiamɔisia, waa la a numui kpɛlɛɛ ta nde tɛɛ Ngewɔ Yafei lɔ ti hu, kɛɛ a ti jɔgbɛ tɔva ina ngafei na i ti hu i gbuani Ngewɔ gama lɔ. Ajifa ndɛɛ Yewɔ lutu gboto ti vayanga hu gbi. 2Hii wa gu a kɔɔla ina Ngewɔ Yafei mia: numu gbi lekee a nde gbalauŋ yɛ Yesu Kristi i wailɔ dunyei hu nuuvuya hu, kɛ ngafei na i ngi hu i gbuani Ngewɔ gama lɔ. 3Kɛɛ numu gbi lekee a ji hou a mawali Yesu va, ngafei na i ngi hu ii gbuani Ngewɔ gama. Ngi nda yafei i gbuani Yesu Juwui gama lɔ; wu mɛniilɔ kɛ a walɔ, tawao taa na bɛɛ mbei dunyei hu. 4Kɛɛ Ngewɔ woo lɔ a wue, nya leengeisia, tawao wu temaya majɔnga ndɛɛ lutuisia maahu; ajifa Ngafei na i wu hu i gbayani i lewe ngafei na ma i nasia hu dunyei woo a tie. 5Ta dunyama hindeisia yeenjɛpɛi lɔ hugɛ tawao dunyamablaa ta wololɔ ti ma ajifa dunyei woo lɔ a tie. 6Kɛɛ mua, Ngewɔ woo lɔ a mue. Numu gbi lekee i Ngewɔ gɔɔngɔ a wololɔ mu ma; numu gbi lekee Ngewɔ woo yaa a ngie ɛɛ wolo mu ma. Hii ma gu a kɔɔla kia tɔnya Yafei i yee yɛni gba ndɛɛ yafei ma. 7Nya liima ndiamɔisia, a mu lo a mu nyɔunyɔ ajifa ndomɛi a gbua Ngewɔ gama lɔ. Numu gbi lekee ndoma i ngi lii hu i yɛni a Ngewɔ loo lɔ tawao kɛ i Ngewɔ gɔɔlɔ. 8Numu gbi lekee ndoma ii ngi lii hu ii Ngewɔ gɔɔ ajifa ndoma lɔ kungɔ Ngewɔ hu. 9Hii Ngewɔ i ndomɛi na gɛni i piengɔ a mue, i ngi Hindolo yakpei yoyeilɔ dunyei hu aako mu ndɛvu majɔɔ ngi sabui hu. 10Ji lɔ ndoma le; ii wieni bɛɛ mua lɔ mu longa a Ngewɔ, ta lɔ i loni a mue, i ngi Hindoloi yoyo yɛva a sabu mu manuma majɔɔ mu jumbuisia va. 11Nya liima ndiamɔisia, ina Ngewɔ i loilɔ a mue hii, kɛ mahoungɔ mu lo a mu nyɔunyɔ. 12Numu gbi ii yaa wɔɔ gba a Ngewɔ lɔni; ina mu loilɔ a mu nyɔunyɔ, Ngewɔ a yɛlɔ mu hu kɛ ngi lomɛi laa i venga mu hu. 13Ji lɔ a pie mu la la kɛ mu Ngewɔ hu lɔ, ta bɛɛ i mu hu ajifa i ngi Yafei venga mu wɛ. 14Tawao mu tɔnga, mu konanga nungaa wekɛisia ma kɛ Kɛkɛi i ngi Hindoloi yoyeilɔ yɛva a dunyabawomɔi. 15Numu gbi lekee a nde leiŋ yɛ Yesu i yɛni a Ngewɔ Hindoloi lɔ, kɛ Ngewɔ lɔ ngi hu, ta bɛɛ i Ngewɔ hu. 16Tawao mua vulii mu kɔɔlɔ tawao mu langɔ a ndomɛi na Ngewɔ piengɔ a mue. Ndoma lɔ kungɔ Ngewɔ hu tawao numu gbi lekee ndoma i ngi lii hu i Ngewɔ hu lɔ, Ngewɔ i ngi hu. 17Ndomɛi ji laavengɔe mu hu aako mu ndiigba majɔɔ Kpɛmbo Volei ma; tawao ma yeendiigbɛi majɔlɔ ajifa mu jiayii dunyei ji hu tia Yesu ndɛi ti yakpe. 18Nduwa gbi ii ndoma hu; ndomɛi yeendavengɔi a nduwɛi gbi gbɛlɔ. Faale naa, numui na a luwa, ndomɛi laavengɔ ii le ngi hu, a luwalɔ ajifa i kɔɔlɔ kɛ kpalɛ a lalɔ ngi ma. 19Ndoma a yɛlɔ mu lii hu ajifa Ngewɔ yese i loni a mue. 20Numu i ndengaa yɛ, “Nya longɔe a Ngewɔ,” kɛɛ ngi lolongɔ a ngi ndewei, ndɛɛ gualamɔ lɔ a ngie. Ajifa ɛɛ gu i lo a Ngewɔ na ii yaa tɔni, ina ii loni a ngi ndewei, na i tɔnga. 21Ji lɔ hɔɔ sawei le Kristi feni mu wɛ, kɛ numui na ngi longɔ a Ngewɔ kpa le ngi ma lova a ngi ndewei bɛɛ.

1 JƆN 51Numu gbi lekee ngi langɔ la kɛ Yesu lɔ Ngewɔ Maha Heingɔi le, i yɛni a Ngewɔ loo lɔ, tawao numu gbi lekee ngi longɔ a ndoo le kɛi a lolɔ a ndoi. 2Ji lɔ a pie mu kɔɔ kɛ mu longɔe a Ngewɔ leengeisia, ji ma lo a Ngewɔ, mu ngi jaweisia hou. 3Ajifa mu lola a Ngewɔ a ji lɔ ma ngi jaweisia hou. Tawao ngi jaweisia tii kpaukpauni waa mu va ti houva. 4Gbamaile Ngewɔ loo gbi a gulɔ i temaya majɔɔ dunyei maahu; tawao pelei na ma temayɛi majɔɔ la dunyei maahu tamia a mu lalei a Ngewɔ. 5Ye lɔ a gu i temaya majɔɔ dunyei maahu? Numui na lekee ngi langɔ la kɛ Ngewɔ Hindoloi mia a Yesu. 6Yesu Kristi lɔ numui na le i wani; ji i wani ti ngi wuailɔ a Ngewɔ yɛi tawao ji i haani ngi ŋamɛi wuilɔ. Ii wani a njɛi lekee, i wailɔ a njɛi kɛɛ ŋamɛi. Tawao Ngewɔ Yafei vulii lɔ selima kɛ tɔnya lɔ a ji, jifa tɔnyɛi lɔ kungɔ Ngewɔ Yafei hu. 7Seli sawangaa mia ti na: 8Ngewɔ Yafei, njɛi kɛɛ ŋamɛi; tawao ti jaangɔɔ kpɛlɛɛ ti woo i yila. 9Wu langɔe a seli na nuuvungaa ta nguaa, kɛɛ seli na Ngewɔ a nguaa i gbayani na ma polouŋ, tawao seli ji lɔ Ngewɔ i nguanga kɔlooni ngi Hindoloi ma. 10Faale numu gbi lekee ngi langɔ a Ngewɔ Hindoloi, seli ji lɔ ngi lii hu; kɛɛ numu gbi lekee ii lani a Ngewɔ, i Ngewɔ wotenga a ndɛɛ gualamɔ, ajifa ii yaa lani a na Ngewɔ i ndenga ji i seli wuaanga kɔlooni ngi Hindoloi ma. 11Seli wuaangɔi a ji lɔ kɛ Ngewɔ i kunafɔ lɛɛvui venga mu wɛ, tawao yeendɛvui ji i ngi Hindoloi lɔ hu. 12Numu gbi lekee taa Ngewɔ Hindoloi ti wilingɔ hu, ndɛvui ji lɔ ngi hu; numu gbi lekee taa Ngewɔ Hindoloi ti wilingɔ ii le hu, ndɛvu ii ngi hu. 13Wua wu langɔ a Ngewɔ Hindoloi biyɛi, wua lɔ ngi kɔlɛi ji nyɛima wu gama aako wu kɔ kɛ wu kunafɔ lɛɛvui majɔnga. 14Ndiigba lɔ mu wɛ Ngewɔ gɔɔbu ajifa mu langɔe la vulii kɛ a mu woo mɛnilɔ ji ma ngi vɛli a hani gbi a nɛɛ ngi wɛ. 15A mu woo mɛnilɔ watii gbi lekee ma ngi vɛli; kia mu kɔɔngɔ kɛ tɔnya lɔ a ji, mu kɔɔlɔ gbɔma kɛ a na velɔ mu wɛ ma ngi vɛli fa. 16Numu gbi i ngi ndewei lɔnga a jumbu hindei na wie ɛɛ wa a hee ngi maahu, mahoungɔ i hɛɛ Ngewɔ ma, a ndɛvui velɔ ngi wɛ. Ngi ji lema nungei nasia lɔ va ti jumbui ɛɛ wa a hee ti maahu. Kɛɛ jumbui lɔ na a wa a hee tawao ngii yɛma wu Ngewɔ vɛli yeejumbui ta ngi va. 17Hinda nyamu gbi wiela jumbu le, kɛɛ jumbui lɔ na ɛɛ wa a hee numu maahu. 18Mu kɔɔlɔ kɛ Ngewɔ loo gbi ii na aa nɔɔ jumbu wiela ma jifa Ngewɔ Hindoloi a ngi mahugbe tawao Seitana ɛɛ gu aa hinda nyamu wie a ngie. 19Mu kɔlɔ kɛ Ngewɔ woo lɔ a mue kia bɛɛ dunyei gbi i Seitana gbayei bu. 20Mu kɔɔlɔ kɛ Ngewɔ Hindoloi i wanga, tawao i mu gɔnga a nɛmahulewe, na hii mu tɔnya Yewɔɛi gɔnga. Mu lɛɛvuisia ti tɔnya Yewɔɛi hu lɔ ngi Hindoloi Yesu Kristi hu. Tɔnya Yewɔɛi lɔ a ji, tawao kunafɔ lɛɛvu lɔ a ji. 21Nya leengeisia, a wua yekpe maguha a ndɛɛ yewɔɛisia.

http://www.bible.is/MENBSL/1John/1/D

Nenhum comentário:

Postar um comentário