sexta-feira, 4 de setembro de 2015

1 JON: MELPA



Jon Ndi, Mon Kuimp Tepa Rurum Ei, Got Nga Ik Ei Ndi, Wamp Kont Mundrum
1Unt kuimp tepa, puⱡ puⱡ mondpa uⱡ pitim ei, tʉn kʉndʉrmʉn. Wote, ki raⱡ ndi ʉmbʉrmʉn, tʉn nga mong raⱡ ndi kʉndʉrmʉn, wote kum raⱡ ndi, Kont Mba Mul Ik ei pitmʉn. 2Kont mul uⱡ ei, etpa mot nduⱡnga, kandpʉn enim kʉn ik nʉtmʉn. Ei uⱡ nga kʉnt nga kont mul uⱡ ei, Tipam kʉn moⱡpa urum. Ei tʉn kʉn etpa mot nduⱡnga kʉndʉrmʉn. 3Tʉn ndi, uⱡ kandpʉn, pilpʉn itmʉn uⱡ nimbʉ, enim kʉn tʉp tenda etpʉn moⱡpʉn, kundpʉn nʉnmʉn ku. I etmin uⱡ ei, tʉn kʉn Got Tipam kʉn, kangʉm Jisas Kraist kʉn, numan pʉtmbʉⱡ ei mel, enim kʉn tʉn kʉn, numan tenda pangga. 4Tʉn mon rop ngonmʉn ei, enim kʉn tʉn kʉn, numan kai pepa kʉndʉk etangga, nimbun mon rop ngunmʉn.
Tʉn Got Nga Rʉⱡang Ila Ʉndʉmʉn
5Tʉn Got Kangʉm nga ik pilpʉn tʉtmʉn mbʉ, enim kundʉp nʉnmʉn. Got Wu Rʉⱡang Pi ei morum. Rumbʉⱡ ti, elim kʉn muⱡi nambrʉm, mon! 6Tʉn Got kʉn tʉp tenda etpʉn moⱡpʉn, ik nʉtmʉn ku nimbun, wote rumbʉⱡ mul uⱡ mbila ʉndmʉn ndam, tʉn nga ik nʉtmʉn ei kʉn, wote nombuⱡa andʉrmʉn uⱡ mbʉ kʉn, mba kol etʉm. 7Wote, elim rʉⱡang ila morum ei mel, tʉn rʉⱡang ila nombuⱡa ʉndmʉn ndam, tʉn nga ʉngʉnʉl mbʉ kʉn, numan tenda pʉtmʉn. Wote, Got nga Kangʉm Jisas nga mema ei ndi, tʉn nga uⱡ kit mbʉ kil ngumba, tʉn etpa eng nondrʉm. 8Wote, tʉn uⱡ kit mat iti natʉtmʉn nimʉn ndam, tʉn ndi, tʉndun tʉp ik kuldamina, wote ik kupa ei, tʉn kʉn pi nʉpʉmba. 9Wote, tʉn nga uⱡ kit mbʉ, Got kʉn nimbun para ndumʉn ndam, elim nga nimba mʉi rurum uⱡ ei, pilpa uⱡ kun kai mbʉ etpa, tʉn nga uⱡ kit etmin mbʉ, pendpa kelpa, tʉn etpa eng nondʉmba. 10Tʉn uⱡ kit iti natʉtmʉn nimʉn ndam, tʉn Got kʉn ik kol ropʉn nʉtmʉn wote, elim nga ik kupa ei, tʉn kʉn pi napʉtʉm mon!

Kraist Ei, Tʉn Nga Tʉpa Rʉpʉndi Wu Ei Morum
1Enim na nga kangambuⱡa kʉⱡ, ya mon rop ngont ei, kandʉk kʉn, uⱡ kit mbʉ iti nʉtʉi! Wote, enim ti ndi, uⱡ kit em ndam, Jisas Kraist ei, Wu Kun Kai ei, Tipam kʉn morum ei ndi, tʉn tʉpa rapʉndʉmba. 2Ei nga, tʉn koⱡmina ei mel, Kraist elim koⱡpa wamp mbʉ nga pora, uⱡ kit mbʉ kil ngumba pendpa kitim. Ei, tʉn nga uⱡ kit mbʉ nga mint mon, wote mʉi kona wamp mbʉ nga uⱡ kit mbʉ nga pora, pendpa kitim ku.
3Tʉn ndi, Got nga mi ik kʉⱡ pilpʉn, teng ndumʉn ndam, tʉn elim kʉn kupa rump ndupʉn mormun. 4Wamp ti ndi, nimba mel, “Na wu Got ei pit,” nimba, wote Got nga mi ik kʉⱡ, pep rui narʉm ndam, wamp ei, ik kol rorum. Ik kupa ei, wamp ei kʉn pi napʉtʉm mon! 5Wote, wamp nam ti ndi, Got elim nga ik ei teng ndum ndam, wamp ei, Got ndi, numan minal ngorum. Wote wamp ei, Got kʉn rʉp ropa morum uⱡ ei mba, kai morum. Tʉn Got kʉn mormun uⱡ ei, pilip poⱡ nduimin. 6Wamp nam ti ndi, nimba mel, elim Got kʉn mor nim ndam, Jisas Kraist uⱡ itim mbʉ mel itangga!
7Na nga wamp angmʉn! Mi ik mon rop ngont ei, ik kont paka ti mon. Ik unt nga ei, puⱡ mondpa pitim ni ku petʉm. 8Wote, mi ik enim kʉn, mon rop ngont ei, ik kont paka ila, ik kupa ei, Kraist kʉn petʉm. Ei mel ku, enim kʉn petʉm. Ei nambuⱡ emel, uⱡ rumbʉⱡ mul mbʉ, omba mana puⱡnga kʉn, uⱡ rʉⱡang kupa pi mbʉ, oⱡa omba petʉm.
9Wamp nam ti ndi, Kraist nga rʉⱡang ila mor nimba, wote ʉngʉn ei kʉn, numan kit pʉtʉm ndam, elim ama rumbʉⱡ ila mint morum. 10Wamp nam ti ndi, nimba ʉngʉn numan ngum ndam, elim rʉⱡang ila morum. Ei kʉn, uⱡ kit mat ila, elim kapⱡa mana pi napʉmba. 11Wote, wamp nam ti ndi, ʉngʉn numan ngui ngangʉm ndam, elim rumbʉⱡ ila moⱡpa andrʉm. Ei kʉn, elim purum kona ei, pili napʉtʉm mon! Nambuⱡ emel, elim nga mong raⱡ rumbʉⱡ morum.
12Na nga kangambuⱡa mbʉ ye! Na ndi, enim mon rop ngont ei, nambuⱡ emel Kraist nga mbi ila, enim nga uⱡ kit etmin mbʉ wak rundrum. 13Wutamʉn enim ndi, Wu Kraist ei, unt puⱡ mondpa murum ei, enim pilik mbi ndurmʉn ei nga, enim mon ei, rop ngont. Wote, enim kang wu mbʉ ndi, Seitan rok mana ndurmʉn ei nga, mon ei, rop ngont. Enim kangambuⱡa mbʉ ndi, enim Got Tipam pʉtmʉn ei nga mon ei, rop ngont. 14Wutamʉn enim ndi, Wu Kraist ei, unt puⱡ mondpa murum ei, enim pilik mbi ndurmʉn ei nga mon ei, rop ngont. Enim kang wu kʉⱡ mon rop ngont ei, nambuⱡ emel, enim ronduⱡ tek mormun, wote Got nga ik ei, enim kʉn rukʉr tetʉm. Ei nga, enim ndi, Seitan rok mana ndurʉng.
Mʉi Kona Ila Mel Mbʉ Kandkʉn Numan Ngui Ngʉngʉi!
15Ya mʉi kona ila uⱡ mbʉ kʉn, mel tetʉm mbʉ kʉn, kandʉk kum pindi nʉpʉndʉi! Mʉi kona ila mel mbʉ kandʉk, kum pending ndam, Got Tipam ei numan ngui nganggʉrmʉn mon!
16Mʉi kona ila tetʉm mel mbʉ, wu amp kandpa kum pindi uⱡ, mong raⱡ ndi kandpa kum pindi uⱡ, wamp nuim raⱡpa mul uⱡ mbʉ pora, Got Tipam ei kʉn, tepa ui nawʉrʉm mon! Wote uⱡ mbʉ, mʉi kona ila ekit orum. 17Mʉi kona mbila mel tetʉm mbʉ kep, wamp ndi kandpa kum pindi uⱡ mbʉ kep, akup pora ninim. Wote, Got nga numan pep ropa moⱡum wamp ei, uⱡ nga kʉnt nga kont moⱡpa mint mba.
Kraist Nga El Rui Wu
18Na nga kangambuⱡa mbʉ ye! Ui ei, pora nimba enim! Unt Kraist nga el rui wu minal, ekit uing nʉtʉng ni, akup kupa enim. Nambuⱡ emel, ui ei, akup nondpa enim. 19El rui wamp kʉⱡ, unt tʉn nga mou ila ekit purung. Tʉn kʉn unt morung, wote tʉn wak rorung wamp kʉⱡ, akup tʉn nga mon.
20Wote Kraist ndi, enim kʉn, Muⱡnga Wingti oi ndupa ngurum ei nga, akup enim ik kupa ei pilik mormin. 21Na enim mon rop ngont ei, ik kupa ei, pili napʉtmʉn wamp mbʉ, nʉmp rop ngui ngangʉnt. Wote, ik kupa ei, pʉtmʉn ila ik kep nomba ti pepa, ekit ui nawʉrʉm mon!
22Ik kep nga puⱡ wu ei nam? Ik kep nga puⱡ wu ei ndi, nimba mel, “Jisas ei Kraist mon,” nʉtʉm. Got Tipam Kangʉm raⱡ, tʉpa pei mundrum wu ei, Kraist nga el rui wu ei morum. 23Wamp nam ti ndi, Kangʉm tepa mbuⱡ ngum ndam, ei Tipam tʉpa mbuⱡ ngurum ku. Wote, wamp nam ti ndi, Kangʉm rukʉr tʉtʉm ndam, Tipam kunda rukʉr tʉtʉm ku.
24Unt, kuimp tek ik pʉtʉng nimbʉ tʉk, en enim nga numan ila pendʉk muⱡʉi! Ik ei pilik tʉk, ambuⱡ gi ndung ndam, Tipam Kangʉm raⱡ, enim kʉn rʉmp nangga muⱡing ku. 25Kraist ndi, tʉn kʉn nimba mʉi rurum ik ei, uⱡ nga kʉnt nga kont mul uⱡ ei nguimp nitim.
26Mon rop ngont ik ei, enim wamp mat ndi, ik kol rok ngui ngʉngeing nimp, mon ei, rop ngont. 27Wote, Kraist nga Muⱡnga ei, enim oi ndupa ngurum. Muⱡnga ei, enim kʉn morum ei nga wamp mat ndi, enim ik mat mbo runding, mel mon! Wote, Muⱡnga ei ndi, enim ik mbo rʉndrʉm. Ei nga, Muⱡnga ei ndi, enim kundpa nim ik ei kupa, ik kol ti mon! Muⱡnga nga keta teng ndum ndam, Kraist ei, enim kʉn rump nilinga mormʉn.
28Na nga kangambuⱡa mbʉ ye! Akup enim Nuim Kraist kʉn rʉmp nangga, ronduⱡ mundʉk muⱡʉi! Wote, elim yant om ei kʉn, pipil kuⱡi nʉⱡmin.
29Wote, enim ndi pilangina, Kraist ei, wu kun kai ti ndam, enim uⱡ kun kai mbʉ etangina kʉn kandpa, enim Kraist nga kangambuⱡa mbʉ nimba.

Tʉn Got Nga Kangambuⱡa Raⱡpʉn Muⱡʉmin
1Got ndi, tʉn numan minal ngorum uⱡ ei, enim pilik kun itʉi! Tʉn kundpa elim nga kangambuⱡa kʉⱡ nʉtʉm uⱡ ei ndi ora ndupa, Got ndi, tʉn numan minal ngorum. Kupa, tʉn elim nga kangambuⱡa mbʉ mormin! Ei kʉn, mʉi kona wamp mbʉ ndi, Got pili napʉtmʉn. Ei mel ku, tʉn pilik poⱡ ndʉi nandʉrmʉn ku. 2Na nga wamp angmʉn! Tʉn wamp kʉⱡ, akup Got nga kangambuⱡa kʉⱡ mormun. Wote pemba uⱡ ei, kʉni nakʉndʉpʉn mormin. Wote, Kraist elim yant om ui ei kʉn, tʉn elim mel mendpʉⱡ muⱡmin. Ei nambuⱡ emel, ui ei kʉn, elim morum ei mel mendpʉⱡ muⱡmin ndam, elim kupa kun kʉnmin. 3Wamp nam ti ndi, Kraist nokundpa moⱡpa, elim kun kai moⱡum ndam, Kraist elim kun kai morum ei mel moⱡmba.
4Nambuⱡ emel, mi go ndui uⱡ ei, uⱡ kit iti uⱡ ei etmin. Wote, wamp nam ti ndi, uⱡ kit em ndam, Got nga mi ik ropa puⱡa romba. 5Akup enim pilik kai itʉi! Kraist ndi, tʉn nga uⱡ kit mbʉ, wak rundimp nimba mana urum. Elim kʉn uⱡ kit ti pi napʉtʉm. 6Ei nga, wamp nam ti, Kraist kʉn rʉmp ndupa morum ti, uⱡ kit iti natʉtʉm. Wote uⱡ kit etʉm wamp ti, Kraist kʉni nakʉndrʉm, wote pili napʉtʉm ku.
7Na nga kangambuⱡa kʉⱡ, enim wamp ti ndi, tʉpa tiki pundi napʉndangga! Kraist elim kun kai morum ei mel, wamp ti, enim uⱡ kun kai mbʉ em ndam, elim kun kai moⱡmba. 8Wamp nam ti ndi, uⱡ kit mbʉ, rʉk rʉk etpa mint moⱡum ndam, Seitan nga wamp raⱡpa morum. Nambuⱡ emel, Seitan ndi, kuimp tepa uⱡ kit etʉm puⱡ wu murum. Wote, Got nga Kangʉm mana urum ei, Seitan nga kongun mbʉ, rop mbuⱡ mbaⱡ itimp nimba urum. 9Wamp nam ti, Got nga kangambuⱡa raⱡpa morum wamp ei, uⱡ kit mbʉ iti natʉtʉm Got kʉn rʉmp ndupa, morum wamp ti ndi, uⱡ kit mbʉ iti natʉmba. Ei nambuⱡ emel, Got tʉpa, Tipam randpa moⱡpa, uⱡ kit mbʉ iti natʉtʉm. 10Ei nga, Got nga kangambuⱡa mbʉ kʉn, Seitan nga kangambuⱡa mbʉ kʉn, kandpʉn mbi ndumin. Wamp ti, uⱡ kun kai mbʉ iti natʉpa, wote ʉngʉn numan ngui ngangʉm ndam, ei Got nga kangambuⱡa ti mon!
Nim Ndi Wamp Ʉngʉn Ti Numan Ngui
11Unt kuimp tep pʉtʉng ik ni, wamp ʉngʉnʉl mat numan ngʉmʉn! 12Tʉn ndi, kang wu Kein itim uⱡ kit ei mel, iti nʉtʉmin. Elim nga ʉngʉn ei, kandpa kelpa ropa kʉndrʉm. Kein ndi, ʉngʉn ei, nambuⱡ emel, ropa kundrum? Elim nga itim uⱡ kit mbʉ, Seitan nga kang wu ti murum. Wote, ʉngʉn kurum ei nga itim uⱡ mbʉ, kapⱡa itim. 13Na nga angmʉn! Mʉi kona ila wamp mbʉ ndi, enim numan ngui ngangʉng ndam, mundmong iti nʉtʉi! 14Tʉn pʉtmin ni, wamp kui nga uⱡ kit ei, wak ropʉn ombun, wamp kont mul uⱡ ei, kandʉp titmin. Ei nambuⱡ emel, tʉn uⱡ ei, wamp ʉngʉn mbʉ kʉn, numan ngurmʉn. Wamp ti ndi, ʉngʉn numan ngui ngangʉm ndam, wamp kui nga uⱡ ei, tepa morum. 15Wamp ti ndi, elim nga ʉngʉn numan ngui ngangʉm ndam, ʉngʉn ropa kondrum mel etʉm. Enim pʉtmin ni, wamp ti ndi, ʉngʉn ropa kondrum ndam, uⱡ nga kʉnt nga kont mul uⱡ ei, wamp ei kʉn pi napʉtʉm. 16Ei nga, tʉn pʉtmʉn ni, wamp numan ngui uⱡ ei etmʉn. Nambuⱡ emel, Kraist ndi, tʉn numan ngumba, elim mana ndupa, tʉn nga nʉndpa kurum. Ei nga, tʉn ndi, i ku etpʉn, tʉn nga ʉngʉnʉl mbʉ numan ngʉmin. 17Wu mel pi ti ndi, moⱡpa kʉn, ʉngʉn kurpa nangga nimba, wal pʉki na mat ngui nganggʉpa, kandpa kui em ndam, Got nga wamp numan ngui uⱡ ei, namba etpa, wu ei kʉn pemba? 18Na nga kangambuⱡa kʉⱡ, tʉn ndi, wamp numan ngui uⱡ ei, keta ila mint ik ni nanʉmʉn mon! Wote, wamp numan ngui uⱡ kupa ei, uⱡ kun kai mbʉ etʉp mot ndʉmin. 19Uⱡ i etpʉn kʉn, tʉn wamp numan ngui uⱡ kupa ei enmin, nʉmp pilʉmin. I etpʉn kʉn, Got nga kuimp keta ila numan wang ndupʉn muⱡʉmin. 20Wote, tʉn nga numan orunga ndi, tʉn uⱡ kit mat itmʉn nim ndam, wote Got nga kuimp keta ila numan wang ndʉmin. Nambuⱡ emel, Got nga numan ronduⱡ ei ndi, tʉn nga numan orunga, kandpa pora ndupa, mel mbʉ pora pʉtʉm.
21Ei kʉn, na nga wamp mʉn kʉⱡ! Tʉn nga numan ila uⱡ kit mat pi napʉm ndam, Got nga kuimp keta ila ronduⱡ mundpʉn muⱡmin. 22Ei kʉn, tʉn ndi, Got waldʉtmʉn ei kʉn, Got ndi, mel mbʉ ngorum. Nambuⱡ emel, tʉn ndi, elim nga mi ik kʉⱡ pilpʉn, teng ndupʉn kʉn, elim nga numan ngorum uⱡ mbʉ etmin. 23Got nga mi ik ei ndi, nimba mel, Kangʉm Jisas Kraist nga mbi ila mondʉk pilik, wamp ʉngʉnʉl mbʉ kʉn, numan nguk mʉn mondʉk itʉi! 24Wamp nam ti ndi, Got nga mi ik kʉⱡ pilpa tʉtʉm ndam, Got ei omba, wamp ei kʉn moⱡnga, wamp ei, Got kʉn morum. Uⱡ ila, Got tʉn kʉn nambuⱡ emel morum? Uⱡ ei, pʉtmʉn ni, Got nga Muⱡnga Wingti tʉn ngurum.

Muⱡnga Kupa Ei Kʉn, Muⱡnga Kol Ei Kʉn
1Na nga wamp mʉn kʉⱡ! Wamp mat ndi, en enim muⱡnga pora tep mormun nʉng ndam, mondʉk pili nʉpilʉi! Wote muⱡnga ei, Got kʉn moⱡpa orum, muna mon nda? Pilik kai itʉi! Nambuⱡ emel, painui wu kol mbʉ nga ou ndupa, ya mʉi kona ila andʉk mormin. 2Ei nga, Got nga Muⱡnga kupa nʉk kʉning ei mel, wamp nam ti ndi, Jisas Kraist ei, wamp mbʉ nga kʉng tʉpa, mʉi kona ila mana urum nim ndam, ei Got nga Muⱡnga kupa ei, nʉk kʉning. 3Wote, wamp ti ndi, Jisas nga mʉi kona ila mana ui nʉwʉrʉm nim ndam, muⱡnga ei Got nga mon! Kraist nga el rui muⱡnga ti, omba nʉk nʉtʉng ei mel, akup kupa enim, ya mʉi kona mbila andpa morum. 4Na nga kangambuⱡa mbʉ ye! Enim Got nga mitim wamp kʉⱡ mormʉn. Ei nga, ik kep nga painui wu mbʉ, rok mana ndurʉng. Ei nambuⱡ emel, enim nga Muⱡnga Wingti mondʉk mormin ronduⱡ ei ndi, mʉi kona ila nga muⱡnga ei nga ronduⱡ ei, tʉpa mana mundrum. 5Muⱡnga kol ropa morum mondʉk mormin wamp mbʉ ndi, mʉi kona ila uⱡ mbʉ nga ik nilingina, muⱡnga kol ropa morum mondʉk mormin wamp mbʉ ndi, kum tek pʉtmʉn. Ei nambuⱡ emel, mʉi kona wamp mbʉ mormin. 6Wote tʉn, Got nga wamp kʉⱡ mormin. Wamp nam ti, Got pʉtʉm ei ndi, tʉn nga ik ei, kum tepa pʉtʉm. Wote, wamp nam ti, Got pili napʉtʉm ei ndi, tʉn nga ik ei, kum tepa pili napʉtʉm. Ei mel etʉk kʉn, Got nga Muⱡnga kupa ei kʉn, muⱡnga kol ei kʉn, kandʉp mbi nduimin.
Got Ei, Wamp Numan Ngui Uⱡ Ei Nga Puⱡ Wu Ei
7Na nga wamp mʉn kʉⱡ! Wamp numan ngui uⱡ ei etamin! Nambuⱡ emel, wamp numan ngui uⱡ ei, Got kʉn tepa orum. Wamp nam ti ndi, numan ngui uⱡ etʉm wamp ei, Got nga kangambuⱡa raⱡpa moⱡmba. Wote, Got pilpa mbi ndurum. 8Wamp nam ti ndi, wamp numan ngui uⱡ ei, iti natʉm ndam, Got pili napʉtʉm. Nambuⱡ emel, Got ei, wamp numan ngui uⱡ ei nga Puⱡ Wu ei morum. 9Ei nga, Got ndi, tʉn numan minal ngumba uⱡ ti, etpa mot ndurum. Uⱡ ei, elim nga Kangʉm tenda waⱡʉm ei, ya mʉi kona ila tʉpa munduⱡnga, tʉn etpa peng kont titim. 10Wamp numan ngui uⱡ ei, ei mel etʉm. Got ndi, tʉn numan ngumba elim nga Kangʉm ei, tʉpa mundrum uⱡ ei ndi, tʉn nga uⱡ kit mbʉ, wak rundrum. Tʉn ndi, Got numan ngurmʉn ni nanʉnt mon! 11Wamp mʉn kʉⱡ! Got ndi, tʉn numan ngurum ndam, tʉn ndi, i ku etpʉn, wamp mbʉ kʉn, numan ngumbun muⱡʉmin. 12Ei kʉn, wamp ti ndi, Got ama kʉni nakʉndrʉm. Tʉn ndi, wamp mat numan ngumʉn ndam, Got tʉn kʉn omba moⱡangga kʉn, elim nga wamp numan ngui uⱡ ei, tʉn kʉn kʉndʉk etpa pemba. 13Ei nambuⱡ emel, elim nga Muⱡnga Wingti ei tʉn ngurum. Ei nga, tʉn pʉtmʉn ei kʉn, Got tʉn kʉn morum. Wote tʉn elim kʉn mormun. 14Wote Tipam ndi, Kangʉm mʉi kona wamp mbʉ, Etpa Ti Wu tangga nimba tʉpa mundrum. Uⱡ ei, tʉn kandpʉn kʉn, wamp pora pileing nimbun kundʉp nʉtmʉn. 15Ni kʉn, wamp ti ndi, Jisas ei, Got Kangʉm nʉtʉm ndam, Got wamp ei kʉn morum, wote wamp ei, Got kʉn morum ku. 16Got ndi, tʉn numan ngurum uⱡ ei, kandpʉn mondpʉn, pilpʉn mbi ndupʉn mormun. Ei kʉn, wamp numan ngui uⱡ ei Got kʉn tetʉm. Wamp nam ti ndi, wamp numan ngui uⱡ ei tepa moⱡum ndam, wamp ei Got kʉn morum. Wote Got wamp ei kʉn morum. 17Wamp numan ngui uⱡ ei, tʉn kʉn kʉndʉk etpa, piyangga muⱡʉmin. Kraist ndi, wamp mbʉ kʉmp tʉmba. Wote, Ui Ou ei, ekit om kʉn, mundmong iti natʉpʉn, wote ronduⱡ mbun muⱡʉmin. Ei nambuⱡ emel, Kraist ya mʉi kona ila pepa murum ei mel ku, tʉn i ku etpʉn pepʉn mormun. 18Wamp numan ngui uⱡ ila, mundmong iti uⱡ ti, pi napʉtʉm. Wote, mundmong iti uⱡ ei, wamp numan ngui uⱡ ei ndi, ropa ekit ndurum. Ei nga, wamp ti, mundmong etʉm ndam, wamp numan ngui uⱡ ei, wamp ei kʉn, pi napʉtʉm. Ei nambuⱡ emel, mundmong iti uⱡ ila, mbun mindil kit mbʉ tʉtmʉn. 19Got ndi, wamp numan ngui uⱡ ei, kuimp tepa tʉn ngurum. Ei nga, tʉn ndi wamp numan ngui uⱡ ei etmʉn. 20Wamp ti ndi, Got numan ngur ku nimba, wote elim nga ʉngʉn ei, numan ngui ngangʉm ndam, wamp ei, ik kol romba. Ei nambuⱡ emel, elim nga ʉngʉn kandpa kʉn, wamp numan ngui uⱡ ei, iti natʉtʉm ndam, wote Got kʉni nakʉndpa kʉn, Got numan ngumba mel nant? Ei kapⱡa mon! 21Got ndi, tʉn man ngumba nimba mel, wamp nam ti ndi, Got numan ngorum ndam, elim nga ʉngʉn ei, numan ngangga ku nitim.

Got Kangʉm Ei, Mʉn Mundi Uⱡ Ei Nga, Puⱡ Wu Ei
1Wamp nam ti ndi, Jisas ei, Got nga ngurum wu ti, Kraist nimba, mondpa pilim ndam, Got nga kangambuⱡa raⱡpa moⱡmba. Wote, wamp nam ti ndi, Tipam numan ngurum ndam, elim nga kangambuⱡa mbʉ, numan ngorum ei mel ku ngumba. 2Tʉn Got numan ngumbun, elim nga mi ik mbʉ pep rʉmʉn ndam, wote elim nga kangambuⱡa mbʉ, numan ngormʉn uⱡ ei, pilpʉn mbi nduimin. 3Wote tʉn ndi, Got numan nguimin uⱡ ei ndi, elim nga mi ik ei pep rʉmʉn. Ei nga, mbun ti mon. 4Ei nambuⱡ emel, Got nga kangambuⱡa ralk mormʉn mbʉ ndi, mʉi kona ila uⱡ kit mbʉ, rok mana nduing. Ei nga, tʉn nga mondpa pili uⱡ ei ndi, mʉi kona ila uⱡ kit mbʉ, rop mana nduimin. 5Wamp nam ti ndi, mʉi kona ila uⱡ kit mbʉ rop mana ndumba. Wote, wamp ti ndi, Jisas ei, Got Kangʉm nimba, mondpa pilim ei ndi, mʉi kona uⱡ kit mbʉ, ropa mana ndumba. 6Jisas Kraist ei, elim nu titim uⱡ ei kʉn, mema oi nilinga, kurum uⱡ raⱡ nga pol ila moⱡpa urum. Ei nu ila mendpʉⱡ mon! Wote nu ei kʉn, mema ei kʉn, raⱡ nga rak ndupa ei nga pol ila moⱡpa urum. Uⱡ ei ndi, uⱡ ei kupa ingk nimba kʉn, para ndupa nʉndʉtʉm. Wote, Muⱡnga Wingti ei, ik kupa ei nga puⱡ wu, ei morum. 7-8Ei nga, uⱡ raldika kat ndi etʉk, mot ndurmʉn. Ei nga, Muⱡnga ei kʉn, nu ei kʉn, mema ei kʉn, wote raldika kʉⱡ, ik tenda mint nʉtmin. 9Wamp nga ik nʉtmin mbʉ, tʉn pilip tʉtmʉn. Wote, Got nga nʉtʉm ik ronduⱡ ei ndi, wamp mbʉ nga ik ei, tʉpa mana ndurum. Nambuⱡ emel, Got nga nʉtʉm ik ei, elim nga Kangʉm nga ik ei ninditim. 10Wamp nam ti ndi, Got Kangʉm mondpa pʉtʉm ei ndi, Got nga nitim ik ei, pilpa tʉtʉm. Wote, wamp nam ti ndi, Got Kangʉm mondpa pili napʉtʉm ei ndi, Got nga nʉtʉm ik ei, ik kol ti nimba pʉtʉm. Nambuⱡ emel, Got elim nga Kangʉm nga para ndupa nʉtʉm ik ei, mondpa pili napʉtʉm. 11Uⱡ ei nga, para ndupa nimba mel, uⱡ nga kʉnt nga kont mul uⱡ ei, Got ndi, tʉn ngurum. Kont mul uⱡ ei, elim nga Kangʉm ei kʉn petʉm. 12Wamp nam ti ndi, Got Kangʉm kʉn, rʉmp ndupa moⱡum ndam, wamp ei uⱡ nga kʉnt nga kont mul uⱡ ei tepa morum. Wote, wamp nam ti, Got Kangʉm kʉn, rʉmp ndupa, muⱡi nambʉⱡʉm ndam, uⱡ nga kʉnt nga kont mul uⱡ ei, tepa muⱡi nambrʉm.
Uⱡ Nga Kunt Nga Kont Mul Uⱡ Ei
13Enim Got Kangʉm nga mbi ila, mondʉk pʉtmʉn uⱡ ei ndi, uⱡ nga kʉnt nga kont mul uⱡ ei, tʉk tek mormin. Ei nga, enim pilik muⱡeing nʉmp mon ei, rop ngunt. 14Ei nga, tʉn pilip mbi ndunmʉn ei, tʉn Got nga kuimp keta ila ronduⱡ mbun moⱡpʉn, elim kʉn mel ti, mawa imʉn ndam, elim nga numan pʉtʉm ei mel pep ropa nimʉn mel, ei ngumba. 15Got ndi, tʉn nga mawa etmin mel ei, pʉtʉm nʉmp pilmin ndam, mel ei, kupa ngumba nʉmp pilʉmin. 16Wamp nam ti ndi, ʉngʉn kʉnangga uⱡ kit mat etpa mba, wamp kul uⱡ ei nga uⱡ kit mat, iti natʉm ndam, Got kʉn atinga rundangga, wamp ei, etpa tʉmba. Wote uⱡ ei, wamp kuⱡi nakʉrmʉn ei nga nʉnt. Uⱡ kit etmin ei ndi, wamp mbʉ kormun mint. Ei nga, Got kʉn atinga rundeing nʉmp ni nanʉnt, mon! 17Ⱡawa iti uⱡ mbʉ pora uⱡ kit mint. Wote uⱡ kit mat nga nit ila wamp kul uⱡ ei, pi napʉtʉm mon. 18Tʉn pʉtmʉn ei, Got nga kangambuⱡa raⱡpa morum wamp ti ndi, uⱡ kit mbʉ iti natʉtʉm. Nambuⱡ emel, Got Kangʉm ei ndi, wamp ei, rʉp etpa moⱡnga, Seitan ndi, kapⱡa etpa kit mundi namʉndrʉm.
19Tʉn pʉtmʉn mel, tʉn Got nga kangambuⱡa raⱡpa mormun. Wote, ya mʉi kona ila wamp nga uⱡ kit etmin mbʉ, wu kit ei ndi, rʉp etʉm. 20Tʉn pʉtmʉn ei, Got Kangʉm ei, ya mʉi kona ila omba kʉn, tʉn nga moⱡpa kundi uⱡ ei, ngurum ei nga, Got kupa ei morum. Tʉn nga mondpa pili ei kupa, Got kʉn tepʉn mormun. Wote elim nga Kangʉm Jisas Kraist kʉn raⱡʉp mormun ku. Tʉn Got elim kupa morum ei ndi, uⱡ nga kʉnt nga kont mul uⱡ ei ngumba. 21Na nga kangambuⱡa mbʉ ye! Enim got kep nui mbʉ nga, rʉp akilma itʉi!
 
 https://www.bible.com/pt/bible/1000/1jn.1.med

Nenhum comentário:

Postar um comentário