sábado, 19 de setembro de 2015

1 JUAN: MIXTECO DE SANTIAGO YOSUNDUA


1 Juan 11Ru'u Juan, jiin taka ga apóstol, ja ka kuu ri ndaja'a Jesús, na chaa ri tutu ja'a nuu ra naa ra. Ti na kachi ri ja iyo ɨɨn Jnu'un kanuu ga, ti Jnu'un un kuu maa Jnu'un chaku, chi undi nuu ja iyo Jnu'un un, ti sa ni keja'a ñuyɨvɨ. Ni ka jiniso'o ri Jnu'un un. Ni ka nde'e ri, ti ni ka jini ri jiin nduchi ri. Ni ka jini ri nuu, ti ni ka kue'e ri jiin nda'a ri. Ti yukan kuu ɨɨn Jnu'un chaku ja sa'a ja ka chaku yo. 2Ti Jnu'un un ni kenda nundijin nuu ñuyɨvɨ nava na kuni yo nau ja kuu. Ti ru'u naa ri ni ka jini ri nuu. Ti ka ja'a ri jandaa sɨkɨ Jnu'un un, chi jandaa kuɨtɨ kuu ja ni kenda Jnu'un un. Ti yukan ka xndaku ri nuu ra naa ra ja Jnu'un un sa'a ja ka kuchaku yo ja kuu saa ni. Jnu'un un kancha jiin Tata yo Yandios, ko ni kenda nuu yo naa yo ja na kuni ndaa yo nau ja kuu. 3Ti ka ja'a ri jandaa nuu ra naa ra chi ni ka jini ri nuu, ti ni ka jiniso'o ri Jnu'un ka'an un. Yukan kuu jnu'un ka xndaku ri nuu ra naa ra nava na nduu ɨɨn nuu ini ra jiin ri naa ra. Nanu ru'u naa ri, nɨnɨ ka iyo ɨɨn nuu ndixia ini ri naa ri jiin Tata yo Yandios jiin Se'e ya Cristo Jesús. 4Sia'an ka chiso ri tutu ja'a nuu ra naa ra nava na kendo kaji, ti na kusɨɨ ini ra jiin taka jnu'un ja'a naa ra. 5Ja'a kuu jnu'un ni xna'an Jito'o Cristo Jesús nuu ri naa ri, ti suni ja'a kuu ja ka xndaku ri nuu ra naa ra ja Yandios kuu ñundijin chi tu iyo ni ɨɨn kuachi nuu ya, iyo ndoo ya, ti tu iyo ni tɨ'lɨ ñuñaa nuu ya, chi ñuñaa un kuu kuachi. 6Yukan kuu ja nu na kachi yo ja yɨ'ɨ yo jiin Yandios, ko siin yo kua'an yo ichi ñuñaa un, ti xnda'u yo jiin jnu'un ka ka'an yo, jiin jniñu ka sa'a yo ja sia'an. 7Ko nu ka jika ndaa yo ichi Yandios, ti kua'an yo ichi ñundijin nuu kancha maa ya, ti ka iyo ndoo yo nanu iyo ndoo maa ya. Ja sia'an na ti ni ka nduu ɨɨn nuu ini yo jiin taka ñani jna'an yo ja suni ka kandixia i. Yukan kuu ja ka iyo ndoo ini yo nuu Yandios, chi ni taji ya Se'e ya Jesús ja ni ji'i ya nda'a cruz, ti ni jatɨ ya nɨñɨ ya ja ni kenchaa ya kuachi yo nuu ya, ti sia'an ni sandoo ya kuachi yo jiin nɨñɨ ya. 8Ti nu ka ka'an yo ja tu iyo kuachi yo ti ka xnda'u yo maa yo, chi tu iyo jnu'un ndaa ini yo. 9Ko nu na kachi ndaa yo nuu Yandios ja ka iyo kuachi yo, ti jandaa kuu ja kuanka'nu ini ya nuu kuachi yo, ti sandoo ya añu yo, chi nɨnɨ siuku ya taka jnu'un ni kachi ya. 10Ti nu ka ka'an yo ja tu ka sa'a yo ni ɨɨn kuachi, ti ka xndoo kui'ya yo jnu'un Yandios ja sia'an, chi ka ka'an yo ja xnda'u ya, ko ja kuu nuu maa ya chi yo'o kuu ja ka xndoña'an. Ti nu ka ka'an yo sia'an, mani jnu'un maa yo ka ka'an yo, chi tu ka jandatu yo jnu'un ya, vasu sia'an iyo jnu'un Yandios.

1 Juan 21Ro'o ja ka kuu ra nanu se'e ri, ja ni ka kandixia ra jnu'un Jesús, na chaa ri jnu'un ja'a nuu ra naa ra nava tu nukoyo ra nuu kuachi. Ko nu na sa'a ra ɨɨn kuachi naa ra, ti iyo ɨɨn ya ii ja ka'an ja'a yo, ti kancha ya ma'ñu sava jiin yo ja kuu nuu Yandios. Ti maa ya kuu Cristo Jesús, ti maa ɨɨn ni ya kuu ja iyo ndoo. 2Undi nuu tu ni kuva'a ini Yandios nuu yo ja sɨkɨ kuachi yo, ko ni ndunda'u ini ya yo'o nu ni ji'i Se'e ya Cristo Jesús nuu nda'a cruz, ja ni nama ya yo'o nuu kuachi yo. Ti ansu nɨnɨ nuu kuachi yo'o naa yo, chi suni nuu kuachi tendɨ'ɨ yɨvɨ kanchuku nuu nɨ tu'u ñuyɨvɨ. 3Ti kuni ndaa yo ja yɨ'ɨ ndixia yo jiin Yandios nu na siuku ndaa yo taka jniñu ni ta'u ya. Sia'an na kuni ndaa yo ja ni ka nakuni yo ya. 4Ko nu ɨɨn yɨvɨ na kachi: “Ru'u ja jini ndaa ri jnu'un Yandios, chi yɨ'ɨ ndixia ri jiin ya”, kachi. Vasu sia'an na ka'an, ko nu tu jandatu jniñu ni ta'u ya, yukan ti kuu i ɨɨn yɨvɨ ni kendo kui'ya chi ni xndoña'an i, ti tu iyo ndaa ini i. 5Ti ndijin ndaa nde'e yo yɨvɨ ka siuku ti ka jandatu i jniñu ni ta'u ya, chi ni yixia ini i jiin jnu'un ya. Yukan kuu ja ka kuu ini i nuu Yandios. Ti nu sia'an na sa'a yo, ti ka iyo ndaa ini yo ja ka yɨ'ɨ yo jiin ya. 6Nu ɨɨn yɨvɨ na kachi ja yɨ'ɨ ndixia i jiin Yandios, ti kuni ja na kaka ndaa i ja iyo ndoo i nanu ni iyo ndoo maa Jesús. 7Ru'u Juan, kunda'u ini ri ro'o naa ra, chi ka kuu ra ñani ri. Nuu tutu ja'a na ta'u ri ɨɨn ɨɨn jniñu jaa nuu ra, vasu ansu vinañu'ni ni kenda jnu'un ja'a, chi ro'o naa ra ja ka jini ra jnu'un ja'a undi na ni ka keja'a ka kandixia ra Jesús. Ti jnu'un un ja ni ka jiniso'o ra. 8Ko nuu tutu ja'a suni na ta'u ri ɨɨn jniñu jaa. Ti jandaa ndixia kuu jnu'un un, chi ni siuku Jesús jnu'un un na ni kii ya nuu ñuyɨvɨ. Ti suni sia'an kuni ja na siuku ra jnu'un un naa ra nanu ni siuku maa Jesús. Tukaa na nde'e yo ja iyo nuu ñuyɨvɨ, chi yɨvɨ ka jika ichi ñuyɨvɨ ja'a, ichi ñuñaa kuankoyo i, ti tu ka jini i na ichi kuankoyo i. Ko yo'o naa yo ja ka jini yo ja kua'an yo ichi ndaa, chi maa Jesús ni kachi ya sia'an, ti ja ka jini yo ja kua'an yo ichi ñundijin. 9Iyo yɨvɨ ka ka'an ja ka jika i nuu ñundijin nava ni kachi Jesús, ko mani ka xndoña'an yɨvɨ un ja ka ka'an i sia'an. Ti jito u'u i ñani jna'an i ja suni kandixia da Jesús. Ti xnda'u i ja jika i ñundijin, chi su'va ñuñaa kua'an i. 10Ko yɨvɨ jika ichi ñundijin, kunda'u ini i nuu ñani jna'an i, ti yɨvɨ un chi jika ndaa i, ti tu iyo ni ɨɨn ja skandava i nuu kuachi i. 11Ko nu jito u'u i ñani i, nanu ja ti kuni ga i jniñu ni ta'u Jesús, ti ñuñaa kancha yɨvɨ un, chi tu jini i nanu kua'an i. Ti kuu i nanu chaa kuaa, chi ni kukuaa nduchi i ni sa'a ñuñaa un. 12Ro'o ja ka kuu ra se'e ri, chaa ri tutu ja'a nuu ra naa ra nava na kuni ra ja iyo jnu'un ka'nu ini Yandios nuu ra naa ra, chi ja ni kenchaa ya kuachi ra jiin jniñu ni sa'a Cristo Jesús. 13Ro'o chaa ña'nu naa ra, chaa ri tutu ja'a nuu ra, chi ja ni ka kandixia ndaa ra Jesús, ja maa ya ja iyo jiin maa Yandios sa ni xnukoo ya ñuyɨvɨ. Suni chaa ri tutu ja'a nuu taka ro'o chaa kuachi, chi kuan kundee ra jiin jniñu kue'e ja kuni chayɨka ja'u'u un ro'o naa ra. Se'e ri naa ra, sia'an ni chaa ri tutu ja'a nuu ra, chi ja ni ka kandixia ndaa ra Tata yo Yandios. 14Suni sia'an ni chaa ri tutu ja'a nuu ro'o, chaa ña'nu naa ra, chi ni ka kandixia ndaa ra Jesús, ja maa ya ni iyo jiin maa Yandios sa ni xnukoo ya ñuyɨvɨ. Suni sia'an chaa ri tutu ja'a nuu ro'o, ña'an kuachi naa ra, chi ka iyo ni'in ini ra jiin jnu'un Yandios, ti ka ñukuu ini ra jnu'un ya taka ni kɨvɨ, ti jiin yukan ja ni ka kundee ra jiin ja'u'u un. 15Ko kanuu ɨɨn jnu'un na kachi ri nuu ra naa ra, ja koto kuñukuu ini ra ñuyɨvɨ ja'a, ni tu kundio ini ra ja ni'in ra taka ja iyo nuu. Chi nu na kin yɨɨ ra ñuyɨvɨ ja'a, ti naa ini ra Tata yo Yandios, ti tukaa ga kuñukuu ini ra maa ya. 16Chi taka ndajniñu ja iyo nuu ñuyɨvɨ ja'a, tu jajna'an ini Yandios ja na kundio ini yo. Ti tu kuva'a ini ya ja kuñukuu ini yo ja ni'in ga yo. Ni tu jajna'an ini ya ja ni'in ga yo sava'ni ga ja jajna'an ini yɨkɨ kuñu yo, chi mani maa ñuyɨvɨ ja'a xiin un. Ni tu jajna'an ini ya ja kava vixi ini yo jiin ja ñava'a yo, ni tu kin yɨɨ yo un, chi taka un ja'a ñuyɨvɨ ja'a, ko tu va'a, chi ansu sia'an kuni Tata yo Yandios. 17Ti sia'an kuan ndɨ'ɨ ñuyɨvɨ jiin taka ndajniñu un, ko ja iyo nuu ñuyɨvɨ ja'a tu kuñɨɨ. Ti yɨvɨ kuandatu taka jniñu ta'u Yandios, yɨvɨ yukan kuu ja kuchaku ja kuu saa ni jiin Yandios. 18Se'e ri naa ra, na xndaku ri nuu ra ja ja ni jaa kɨvɨ kuan ndɨ'ɨ ñuyɨvɨ yo. Ti sɨkɨ kɨvɨ vijna ja ni ka jiniso'o ra ja kii chaa koto u'u Cristo, vasu undi vijna ja ni ka kenda tɨjnɨ yɨvɨ ka jito u'u Cristo. Ti jiin yukan jini yo ja ja ni kuyajni ndaa kɨvɨ ja naa ñuyɨvɨ. 19Ti yɨvɨ ka jito u'u Cristo un, xnaka ni ka yɨ'ɨ i jiin yo, ko ni ka kuxio i ɨnga ichi, chi tu ni ka kejna'an ndaa ini i jiin yo. Ni ka yɨ'ɨ ndaa ndixia i jiin yo, ti ja ni ka kuñɨɨ i jiin yo niku, ko tu ni kuu sia'an. Chi su'va, ni ka kee i kua'an i, ko nu kuankoyo i, yukan na ti ni ka jini ndaa yo ja tu ni ka kejna'an ini i jiin yo. 20Ko ja kuu ro'o naa ra, ni ja'a Cristo Espíritu Santo nuu ra. Ti jiin yukan ja ka jini ndaa ra ja sia'an kuu. 21Sia'an chaa ri tutu ja'a nuu ra naa ra vanuxia ja ka jini ndaa ra jniñu ni ta'u Yandios ansu ja tu ka jini ra, chi ka jini va'a jniñu ni ta'u Yandios ansu ja tu ka jini ra, chi ka jini va'a ra ja tu kuu kenda ɨɨn jnu'un xndoña'an nuu ɨɨn jnu'un iyo ndaa. 22¿Ti nau ka kuu yɨvɨ ka xndoña'an un nusa? Kuu yɨvɨ ka'an ja Jesús tu kuu ya Cristo, ya ni taji Yandios ja ndiso ya jniñu ña'nu. Ti yɨvɨ yukan kuu ja jito u'u Cristo, chi chisa'yɨ i Tata yo Yandios jiin Se'e ya Cristo Jesús. 23Yɨvɨ chisa'yɨ ja ansu Se'e Yandios kuu Cristo, ti yɨvɨ un tu yɨ'ɨ i jiin Yandios. Ko taka yɨvɨ na kua'a jandaa ja Cristo, kuu ya Se'e Yandios ya ndiso ya jniñu ña'nu, ti jandaa ndixia kuu ja yɨvɨ un yɨ'ɨ i suni jiin maa Tata yo Yandios. 24Ja yukan kuu ja ka'an ri ja na chu'un ini chu'un añu ra jnu'un ni ka jini ra naa ra, ti ni ka kandixia ra undi nuu na ni ka keja'a ra. Ti nu na kendo taka jnu'un ni ka kandixia ra undi nuu yukan ini añu ra, yukan na ti ni kuu ndaa ndixia ja ka yɨ'ɨ ra jiin Tata yo Yandios jiin Se'e ya Cristo Jesús. 25Ti ja'a kuu jnu'un ña'nu ni chisojnu'un Cristo Jesús nuu yo, ja kuchaku yo sia'an ni ga jiin ya. 26Ni chaa ri jnu'un ja'a nuu ra naa ra ja na kaxnu'un ri sɨkɨ yɨvɨ ka nduku xnda'u ro'o naa ra. 27Ko ro'o naa ra, chi maa Yandios ni ja'a ya Espíritu Santo kancha ya jiin ra. Ti tukaa ka nandɨ'ɨ ra ja xndaku ɨnga yɨvɨ nuu ra, chi maa Espíritu Santo yɨnda'a ro'o naa ra. Ti jnu'un Espíritu Santo un iyo ndaa ti jankɨvɨ xndoña'an. Yukan kuu ja ka'an ri, chi ka yɨ'ɨ ra jiin ya. Ti siin nava kanchuku ra ja ka yɨ'ɨ ra jiin Jito'o Cristo Jesús, nava xndaku maa Espíritu Santo nuu ra naa ra. 28Ko vijna na kachi tuku ri, ro'o se'e ri naa ra. Siin nɨ ini jiin jnu'un Cristo Jesús, ti nava sia'an taka yo na natu'va yo nuu ya naa yo, nava nu ni ndenda ndijin ya, ti tu yu'u yo, ni tu kukanuu yo kujiin yo nuu ya kɨvɨ nchaa ya. 29Ja ka jini ndaa ra ja iyo ndoo Cristo Jesús. Ti suni sia'an nu ni ka jini ra taka yɨvɨ ka jika ndaa, ti yɨvɨ yukan ndixia kuu ja ka kuu se'e Yandios, chi ka siuku ndaa i taka jniñu va'a ni ta'u maa ya.

1 Juan 31Nde'e naa ra, na xaan ga ni kunda'u ini Yandios yo'o ja na konani yo se'e ya, ti suu ndixia ka kuu yo. Ja yukan kuu ja yɨvɨ ka jika ichi ñuyɨvɨ ja'a, tu ka nakuni i yo'o, chi ni nuu maa Jito'o Jesús, tu ni ka nakuni i. 2Ñani naa ra, vijna ti ja ka kuu yo se'e Yandios, ko changa ga kuni yo nasa koo yo kɨvɨ na nchaa Jesús tuku. Ko ja ka jini yo ja kɨvɨ na nchaa Cristo Jesús, ti nduu yo nanu kaa maa ya, chi kuni yo nuu ya nasa kaa maa ya. 3Ti nu ka ñukuu ini yo ja na kuni yo nuu Jesús, ko na sandoo yo maa yo nanu iyo ndoo maa ya. 4Ko yɨvɨ ja tu ka chu'un ini, ti ka stɨvɨ i ley Yandios ja sia'an ka sa'a i kuachi. Chi kuachi un kuu ja sa'a ja tu ka chiñu'un i ley un. 5Chi ka jini ra ja ni kii indjin Cristo Jesús nuu ñuyɨvɨ ja ni kii kenchaa ya kuachi yo, vasu tu ni ɨɨn kuachi ni iyo nuu ya. 6Yukan kuu ja taka yɨvɨ ja ka yɨ'ɨ jiin Cristo, tukaa ga siin yɨ ja sa'a i kuachi. Ko yɨvɨ ni ka jajna'an ini ti ka siin i ka sa'a i kuachi, ti va jankɨvɨ ni ka jini yɨvɨ un nuu Jesús, ni tu ka yɨ'ɨ i jiin ya. 7Ro'o, se'e ri naa ra, na kachi ri ja tu kuandatu ra nuu ni ɨɨn yɨvɨ ja ka kuni xnda'u ro'o naa ra. Chi taka yɨvɨ ka jika ichi Yandios, ka jandatu i jnu'un ya, chi ka iyo ndaa ini i. 8Ti taka yɨvɨ ka sa'a kuachi un, mani se'e kui'na ka kuu i, chi kui'na un sia'an ni vaji jiin kuachi undi na ni keja'a ñuyɨvɨ. Ti sɨkɨ yukan kuu ja ni kii Se'e Yandios ja ni kii xnaa ya taka jniñu sa'a kui'na un. 9Ti yɨvɨ ka yɨ'ɨ jiin Yandios ja ka kuu i se'e maa ya, ti tukaa ka siin i sa'a i kuachi, chi kancha jnu'un maa ya jiin yɨ. Tukaa ga ka siin i jiin kuachi, chi ja ni ka kuu i se'e Yandios. 10Yukan jini yo nau ja kuu se'e Yandios ti nau ja kuu se'e kui'na, chi taka yɨvɨ ka siin jiin kuachi xi ja tu ka kunda'u ini ñani jna'an i ja ka yɨ'ɨ jiin Cristo Jesús, ansu se'e Yandios ka kuu yɨvɨ un. 11Ja'a kuu jnu'un ja ni ka jiniso'o ra undi na ni ka keja'a ka kandixia ra Cristo Jesús naa ra, ja na kunda'u ini yo ñani jna'an yo ka kandixia. 12Tu sa'a yo nanu ni sa'a Cain, ja ni kue'e kui'na kuu un maa da, ti ni ja'ni da ñani da. ¿Ti na siɨkɨ kuu ja ni ja'ni da ñani da nusa? Kuachi kuu ja tu ni iyo va'a jniñu sa'a da. Ti ñani da, ni sa'a tu chaa un mani jniñu ndaa, ɨɨn jniñu ja iyo va'a. 13Ñani ri naa ra, koto sa'a kui'ya ini ra, nu ka jito u'u yɨvɨ ñuyɨvɨ ja'a ro'o naa ra, ti koto xndi'i ini ra naa ra. 14Yo'o naa yo tu kanchuku yo nanu kunchuku yɨvɨ un, chi yɨvɨ un kanchuku i nanu ndɨyɨ ja tu ka nakuni jnu'un Yandios. Ko yo'o naa yo, ja ni ya'a kɨvɨ ja ni kunchuku yo nanu ndɨyɨ un, ti vijna ni ka nachaku ini yo ja na kuchaku yo nanu ndɨyɨ ja tu ka nakuni jnu'un ya, chi vijna ja ni ka nakuni yo jnu'un un. Yukan kuu ja ka kunda'u ini nuu jna'an yo, chi ja kandixia yo Cristo Jesús. Ko yɨvɨ ja tu ka kunda'u ini nuu ñani jna'an un, ka siin i kanchuku i nanu ndɨyɨ. Sia'an kuu chi tu ka nakuni i jnu'un Yandios. 15Ñani naa ra ja ka kandixia yo Cristo Jesús, na kachi ri ja nu nau ɨɨn yɨvɨ na koto u'u i ñani jna'an i, yɨvɨ un kuu i nanu ɨɨn chaa ja'ni ndɨyɨ, chi ɨɨn ni kuu ja ka'ni yo ndɨyɨ jiin ja koto u'u yo ñani jna'an yo. Ti ka jini ra naa ra ja ɨɨn chaa ja'ni ndɨyɨ tu ni'in ta'u da nuu Yandios ja na kuchaku da nuu ya, chi tu ni kɨvɨ ɨɨn jnu'un va'a un ini da. Yukan kuu ja jito u'u da ñani da. 16Yukan na ti sa kuni yo nasa sa'a jnu'un nda'u ini, chi Cristo Jesús ni ji'i ya ja kuu yo'o naa yo. Ti suni sia'an yo'o naa yo vasu na kuū yo ja kuu ñani jna'an yo, chi vanua ka kunda'u ini jna'an yo. 17Nu yo'o ñava'a yo ja nandɨ'ɨ yo ja kuchaku yo, ti nde'e yo nundo'o jna'an ñani jna'an yo, ja nandɨ'ɨ da ja kuchaku da, ti yo'o saxii yo ja ñava'a yo, ti tu kunda'u ini yo ñani yo, ¿nasa kuu ja ka'an yo ja jandatu yo jnu'un Yandios, ti nu sia'an na sa'a yo nusa? 18Se'e ri naa ra, nu kuni yo ja na kunda'u ini yo ñani jna'an yo, ko ansu jiin jnu'un ka'an yo ti kuni yɨvɨ ja kunda'u ini yo, chi na kua'a yo ja ñava'a yo nava na kuni ndaa yɨvɨ ja ñunda'u ndixia ini yo jiin ñani jna'an yo, ja sia'an ka chindee jna'an yo. 19Nu sia'an na kunchuku yo, ti jandaa ndixia kuu ka kuu yo se'e Yandios, chi jini ndaa yo ja jnu'un un kuu ja yɨnda'a yo'o, ti kukuee jika yo nuu ya, 20vasu ñu'un kuachi un ini yo sɨkɨ taka jniñu kue'e ni ka sa'a yo. Ko tu kuña'nu ini yo, chi kuña'nu ga maa Yandios, ti jini ndɨ'ɨ ya taka jniñu kue'e ni ka sa'a yo. 21Ko nu tu na kuachi ñu'un ini añu yo, yukan ti ja iyo jnu'un ndee ini nuu Yandios. 22Ti taka nau ja na kakan yo nuu ya, ti kua'a ya nuu yo, chi vanua ka jandatu yo jniñu ta'u ya nuu yo, ti ka sa'a yo taka jniñu va'a ja na kusɨɨ ini ya. 23Ti ja'a kuu jniñu ta'u ya nuu yo, ja na kandixia yo Se'e ya Cristo Jesús, ti suni ja na kunda'u ini nuu jna'an yo, chi sia'an ni ta'u maa ya jniñu nuu yo. 24Ti taka yɨvɨ ka siuku jniñu ni ta'u ya, ti ka yɨ'ɨ ndixia i jiin ya, ti maa ya kancha jiin yɨ. Sia'an ka jini ndaa yo ja kancha ya jiin yo, chi ni ja'a ya Espíritu ya ja na kuncha ya jiin yo.

1 Juan 41Ñani naa ra, tu kandixia ra jnu'un ka xna'an yɨvɨ ka ka'an ja ka xna'an jnu'un Yandios. Xnaka xndichi yɨvɨ un, ti nava na kuni ndaa ra nu ka ka'an ndaa i jnu'un Yandios xi tuu, chi kua'a yɨvɨ ka xndoña'an kuan kenda nuu ñuyɨvɨ. 2Sia'an sa'a ra ti sa kuni ra naa ra nu nau ja ka'an ndaa nava ta'u maa Espíritu Yandios jniñu. Chi taka yɨvɨ ka'an ja Jesús kuu Cristo ni taji Yandios, ja ndiso jniñu ña'nu ya, ti ka ka'an ja ni kii Cristo Jesús jiin yɨkɨ kuñu ya nanu ɨɨn yɨvɨ, ti yɨvɨ un kuu ja ka'an ndaa nava ni ta'u Espíritu Yandios jniñu. 3Ti taka yɨvɨ ja ka'an ja Jesús tu ni kii ya jiin yɨkɨ kuñu ya, ti tu ni ta'u Espíritu Yandios jniñu nuu yɨvɨ un. Ti yɨvɨ un kuu ja jito u'u Cristo. Ti ja ni ka jiniso'o ra ja kii yɨvɨ un, ti vijna ja ni ka kenda ndixia nuu ñuyɨvɨ. 4Se'e ri naa ra, ro'o ka kuu se'e Yandios ti ni ka kundee ra jiin yɨvɨ ka xndoña'an un. Ti tu ni ka xnda'u i ro'o naa ra, chi vanua kuña'nu ga Espíritu Yandios, ya kancha jiin ra, ti Espíritu Yandios kuu ja kuña'nu ga nuu espíritu kancha nuu ñuyɨvɨ ja'a. 5Ti yɨvɨ ka xndoña'an un, ɨɨn nuu kanda i jiin yɨvɨ ñuyɨvɨ ja'a. Ja yukan kuu ja ka ka'an i mani jnu'un iyo nuu ñuyɨvɨ ja'a, ti yɨvɨ ñuyɨvɨ ja'a chi ka chunso'o jnu'un ka ka'an i. 6Ko ru'u naa ri, ja ni tatu Yandios ɨɨn jniñu nuu ri ja na ka'an ri jnu'un ya. Ti taka se'e ya ja ka yɨ'ɨ jiin ya, ka chunso'o i jnu'un ka ka'an ri. Ti yɨvɨ ja tu ka yɨ'ɨ jiin ya, tu ka kuu se'e ya, ni tu ka chunso'o jnu'un ka ka'an ri. Ti sia'an nakuni yo nau kuu ja ka ka'an nava ka'an Espíritu Yandios, ti nau kuu ja ka ka'an nava ka'an espíritu xndoña'an. 7Ñani naa ra, na kunda'u ini nuu jna'an yo, chi jnu'un un vaji nuu maa Yandios. Ti taka ja ka kunda'u ini nuu jna'an un, ka kuu se'e Yandios. Ti ka chaku ini nau kuu Yandios, jiin nava ka'an maa jnu'un ya. 8Ti yɨvɨ ja tu ñunda'u ini tu jini jnu'un Yandios, ja Yandios kuu maa jnu'un nda'u ini. 9Vijna ti ni ka chaku ini yo ja ni kenda ndijin nasa ni kunda'u ini Yandios yo'o, chi ja ni taji ya Se'e ya vasu vajnu'un ni se'e ya iyo, ja ni kii ya un nuu ñuyɨvɨ, ti ya yukan sa'a ja na kuchaku yo sia'an ni ga. 10Ti sia'an chaku ini yo nava kuu maa jnu'un nda'u ini. Chi vasu tu ni ka kunda'u ini yo Yandios, ko maa ya, chi ni kunda'u ini ya yo'o ja ni taji ya Se'e ya ni kii ya, ja na kuu ya nava na kenchaa ya kuachi yo. Ti yukan ni ndumani ya jiin yo nava tukaa kuɨtɨ ini ya nuu yo sɨkɨ kuachi yo. 11Ñani naa ra, nu siukan ni kunda'u ini Yandios yo'o, ti suni siukan na kunda'u ini nuu ñani jna'an yo naa yo. 12Ni ɨɨn yɨvɨ tu ni jini kuɨtɨ i nuu Yandios, ko nu ka kunda'u ini jna'an yo, yukan stuu yo maa yo ja kancha Yandios jiin yo. Ti jiin jnu'un kunda'u ini un ni ka kuñɨɨ ini yo jiin jnu'un ya. 13Sia'an na ti sa ni jini ndaa yo ja kancha Yandios jiin yo, ti ka yɨ'ɨ yo jiin ya, chi maa ya ja ni ja'a ya Espíritu ya nuu yo. 14Ti maa ri, ja ni ka jini ndixia ri, ti ka ja'a ri jandaa ja maa Tata yo Yandios ni taji ya Se'e ya ni kii ya, ja ni kii nama ya yɨvɨ nuu ñuyɨvɨ naa i. 15Nu nau ɨɨn yɨvɨ na kee yu'u i ja Jesús kuu maa Se'e Yandios, ti yɨvɨ un yɨ'ɨ ndixia i jiin Yandios, ti suni kancha maa ya jiin i. 16Nu ndɨ'ɨ yukan ni ka kandixia yo, ti ni ka jini ndaa yo ja kunda'u ini Yandios yo'o, chi maa ya kuu jnu'un nda'u ini. Taka yɨvɨ ka kunda'u ini jna'an, ka yɨ'ɨ i nda'a maa Yandios, ti suni maa ya kancha ya jiin yɨ. 17Nu sia'an ja ni kukutu jnunda'u ini un jiin yo, ti ja iyo jnu'un ndee ini yo nuu Yandios, ti tukaa yu'u yo ja kuu kɨvɨ na chaa juicio ñuyɨvɨ. Ti vasu kancha yo nuu ñuyɨvɨ ja'a, ko tu yu'u yo ja kii juicio un, chi ka jika yo nava ni xna'an maa Jesús yo'o. 18Nu sia'an ja iyo jnundee ini ja kunda'u ini Yandios yo'o, ti tukaa yu'u yo, chi maa jnunda'u ini un chajiyo jnuyu'u un kua'an. Chi nu yu'u ini yo, ti yukan sa'a ja vaji nundo'o nuu yo. Ja yukan kuu ja nu nau yɨvɨ ka yu'u ini i, yɨvɨ un ti kukutu ga ini i jiin jnunda'u, ja na kunda'u ini nuu jna'an i. 19Ti yo'o ka kuu ini yo nuu Yandios, chi xnaka maa ya ni kunda'u ini ya yo'o. 20Ko nu ɨɨn yɨvɨ kandixia Jesús na kachi i: “Ru'u, chi kuu ini ri nuu Yandios”, kachi i. Ko jito u'u i ñani jna'an i, ti so xndoña'an i ja sia'an. Chi vasu nde'e i nuu ñani jna'an, ko tu kunda'u ini i, ¿Ti nasa kuu kachi i ja kuu ini i nuu Yandios ja sia'an nu tuja'i kuni i nuu ya nusa? 21Ti maa Yandios ni ta'u ɨɨn jniñu ja'a nuu yo: Nu ɨɨn yɨvɨ na kuu ini nuu Yandios, ti suni sia'an na kunda'u ini i nuu ñani jna'an i.

1 Juan 51Taka yɨvɨ ka kandixia ja Jesús kuu Cristo, ja ni taji Yandios ja ndiso ya jniñu ña'nu, ni nduu i se'e Yandios. Chi nu kuu ini yo nuu ɨɨn chaa kuu tata, ti suni na kuu ini yo nuu se'e da. 2Chi nu kuu ini yo nuu maa Yandios, ti jandatu yo jniñu ta'u ya. Ti suni sia'an na kunda'u ini yo nuu yɨvɨ ka kuu se'e ya, chi ja ka yɨ'ɨ i jiin ya. 3Chi ja kuandatu yo jniñu ni ta'u ya, yukan kuu ja kuu ini yo nuu maa ya, ti jniñu ni ta'u ya ansu kundiso yo ja kachi yo ja vee. 4Ti taka yɨvɨ ja ka kuu se'e Yandios ja ni ka kundee i jiin taka jniñu kue'e iyo nuu ñuyɨvɨ, ti jnu'un ni ka kandixia yo un kuu jnu'un ja ni ka kundee yo sɨkɨ ñuyɨvɨ. 5¿Ti nau kuu ja kundee jiin taka jniñu kue'e ka iyo nuu ñuyɨvɨ nusa? Suu yɨvɨ kandixia ja Cristo Jesús kuu maa Se'e Yandios. 6Ti Jesús kuu Cristo ja ni taji Yandios ja na kundiso ya ɨɨn jniñu ña'nu, ti ni kundaa ja kundiso ya jniñu ña'nu un nuu ni janducha ya jiin nducha jiin kɨvɨ ni jatɨ ya nɨñɨ ya nuu nda'a cruz. Ansu jiin nɨnɨ nducha, chi ni kuu nducha jiin nɨñɨ ja ni ka ja'a jandaa. Ti suni maa Espíritu kuu ja kua'a jandaa sɨkɨ jniñu ya, chi Espíritu yukan kuu ja ja'a jandaa ndixia. 7Ti sɨkɨ jniñu ña'nu un iyo uni testigo ja ka ja'a jandaa undi nuu andɨvɨ. Ti yukan kuu maa Tata yo Yandios, Se'e ya ja kuu jnu'un un, jiin Espíritu Santo. Ti ndɨ uni jnu'un ja'a kuu ɨɨn ni ga. 8Ti suni iyo uni sɨkɨ jniñu ja'a nuu ñuyɨvɨ. Yukan ka kuu maa Espíritu, jiin nducha na ni janducha Jesús, jiin nɨñɨ na ni ji'i ya. Ti ndɨ uni un, ɨɨn ni ka ka'an. 9Nu ka janta'u yo nuu yɨvɨ ka ja'a jandaa, ti ndoo tu kuanta'u yo suni nuu jnu'un maa Yandios ja kuña'nu ga, ti yukan kuu ja kanuu ga. Yukan kuu ɨɨn maa jnu'un ndaa ja ka'an maa Yandios ja kuu Se'e ya. 10Yɨvɨ kandixia ndaa se'e Yandios, iyo jnu'un ndaa ja'a ini añu i. Ti nau ja tu kandixia jnu'un ndaa ka'an Yandios, ti chaa xnda'u ña'an skonani i ya, chi tu kandixia i jnu'un ni ka'an ya ja sɨkɨ Se'e ya. 11Ti ja'a kuu jnu'un ndaa ni ja'a ya nuu yo ja na kuchaku yo sia'an ni ga jiin ya. Chi ja ni siuku Se'e ya jniñu un na ni ji'i ya ja kuu yo ja na kuchaku yo jiin ya. 12Ti yɨvɨ kandixia ndaa Se'e Yandios, ja ni nita'u i ja na kuchaku i jiin ya, ko yɨvɨ tu kandixia ndaa Se'e ya, tu ni nita'u i ja na kuchaku i jiin ya. 13Chaa ri tutu ja'a nuu ro'o ja kandixia ndaa ra Se'e Yandios, nava na kuni ndaa ra ja iyo ta'u ra ja na kuchaku ra sia'an ni ga jiin ya. 14Ni ka iyo jnundee ini yo nuu Yandios, chi ka jini yo ja nu na kakanta'u yo nuu maa ya ja na kua'a ya nau ja kuni yo, ti nu jini maa ya ja nandɨ'ɨ yo, ti chunso'o jnu'un jikanta'u yo. 15Ti nu ni jini yo ja chunso'o ya jnu'un ka jikanta'u yo nuu ya, ti kuni ndaa yo ja ni'in yo taka ja ni ka jikan yo nuu ya. 16Nu nau ro'o ni ka jini ɨɨn ñani jna'an ra, ja ka sa'a da ɨɨn kuachi, ko nu ansu ɨɨn kuachi ni'in ja na kuū da kuu, ti kuni ja na kakanta'u ra nuu Yandios ja kuu maa da, ti maa ya na nakua'a ya ja na kuchaku da, nu ansu ɨɨn kuachi ni'in ja kuū da kuu. Yukan kuu ja nu iyo ɨɨn kuachi ni'in ja na kuū yɨvɨ un, chi iyo ɨɨn kuachi ja na xnaa yɨvɨ un ɨɨn jinu ni, ko yukan na ti tukaa ka'an ri ja na kakanta'u ja kuu kuachi un. 17Taka jniñu ja tu ɨɨn nuu jiin jniñu ni ta'u maa Yandios kuu kuachi, ko iyo kuachi ja ti xnaa yo'o ɨɨn jinu ni. 18Ka jini yo ja yɨvɨ ka yɨ'ɨ nda'a Yandios ja kuu ya Tata i, yɨvɨ un tu ka sa'a i kuachi, chi maa Se'e Yandios jito yɨvɨ un nava tu kuu kue'e ndeva'a kui'na un maa i. 19Ja ka jini yo ja Yandios yɨnda'a yo'o ja ka kuu yo se'e ya, ti kui'na un kuu ja yɨnda'a nɨ ñuyɨvɨ. 20Suni ka jini yo ja ni kii Se'e Yandios, ti ni ja'a ya inijnuni yo ja na kuni ndaa yo nau kuu maa Se'e Yandios. Ti ka yɨ'ɨ yo jiin maa ya, ka'an ndaa yukan, ti yaa yukan kuu Cristo Jesús, maa Se'e Yandios. Chi yaa yukan kuu maa Yandios chaku, ti maa ya kuu ja sa'a ja na kuchaku yo sa ni. 21Ro'o, se'e ri naa ra, xnaa jnu'un ka kandixia taka santu ja ni ka sa'a yɨvɨ jiin nda'a i un. Ti sia'an na koo.

http://www.bible.is/MPMTBL/1John/1/D

Nenhum comentário:

Postar um comentário