segunda-feira, 14 de setembro de 2015

1 JUAN: MIXTECO, DIUXI-TILANTONGO



1 Juan 11Ka kakune'e‑da Ia xá daa tuu nde ki'na nuu. N‑ka teku‑da tnu'u n‑ja'an‑ia. Xi'in nuu‑da n‑ka xini‑da‑ia. N‑ka xo nde'a‑da‑ia, te xi'in nda'a‑da n‑ka tnɨɨ‑da‑ia. Ia nani Tnu'u Ianyuux kuu‑ia. Kida‑ia xa xtuu va'a ñayiu xi'in Ianyuux. 2N‑kixi‑ia nde ñuñayiu ya'a. N‑ka xini‑da‑ia, te ka ja'an ndaa‑da xaxe'e‑ia. Ka ja'an‑da nuu mee‑n, xa antecas xa kua'a ntdaa xa io te xá daa tuu mee‑ia, te ka ja'an‑da nuu‑n xa dani kutuu‑ia kuia ma jɨn ndɨ'ɨ. N‑xo tuu‑ia xi'in Taa‑ia Ianyuux, te n‑kixi‑ia nuu xtuu mee‑ro. 3Xa n‑ka xini‑da, ka ja'an‑da nuu mee‑n. Xa n‑ka teku‑da, ka ja'an‑da nuu mee‑n. Ka ja'an ña'a‑da xa kunduu koio mee‑n xi'in mee‑da. Chi kunduu koio mee‑da xi'in Ianyuux te xi'in Da'ya Yɨɨ‑ia, Jesucristu. 4Ka kidava'a‑da carta ya'a nuu mee‑n, xa kuvete‑ro xa kuvete ka‑ro ntdaa‑ro. 5N‑ka teku‑da tnu'u n‑ja'an Jesucristu, te tnu'u ijan kachitnu'u‑da. N‑ja'an‑ia xa kida Ianyuux xa jini‑ro‑ia. N‑ja'an‑ia xa luz va'a ka koko kuu Ianyuux, te nuu tuu mee‑ia, nuncas ñatu kuu nuu nee. 6Nux ja'an‑ro xa kunduu‑ro xi'in Ianyuux, ko dani kida‑ro kuechi, kuu ná kuu xa xika‑ro nuu nee. Nux du'a kuu, kuu xa ja'an‑ro tnu'u vete, te ña kida‑ro xa kuu xandaa. 7Nuu tuu Ianyuux, kuu nuu kanda. Nux kida‑ro xava'a, tuu‑ro xi'in Ianyuux, te kunduu va'a‑ro, ɨɨn‑ro xi'in ɨnka‑ro. Te xaxe'e xa n‑xi'í Da'ya Yɨɨ‑ia, Jesucristu, xaxe'e‑ro, ndada ndoo ña'a Ianyuux ntdaa kuechi‑ro. 8Nux ja'an‑ro xa ñatu kida‑ro kuechi, danda'u‑ro mee‑ro, te ñatu kutnuni ini‑ro xa kuu xandaa. 9Nux na'ma‑ro kuechi‑ro, na'a‑ro xa ndadandaa Ianyuux kuechi‑ro. Na'a‑ro xa taxkanu ini‑ia kuechi‑ro. Na'a‑ro xa ndada ndoo ña'a‑ia kuechi‑ro. 10Nux ja'an‑ro xa ñatu kida‑ro kuechi, du'a ja'an‑ro xa ja'an Ianyuux tnu'u vete, chi ja'an Ianyuux xa ntdaa‑ro kuu ñayiu ka kida kuechi. Nux ja'an‑ro xa ñatu kida‑ro kuechi, ñatu jandixa‑ro tnu'u n‑taxi‑ia.

1 Juan 21Da'ya kuechi‑da, kidava'a‑da carta ya'a nuu‑n, xa maxku kada koio ka‑n kuechi. Ko ɨɨn ñayiu, nux na kada‑i kuechi, te nujuiin Jesucristu nuu Taa‑ia Ianyuux xaxe'e‑ro. Xaxe'e xa nuncas ña n‑kida Jesucristu ni ɨɨn kuechi, kua'a‑ia xa ja'an‑ia nuu Ianyuux xaxe'e mee‑ro. 2Xaxe'e Jesucristu, taxkanu ini ña'a Ianyuux kuechi‑ro. Chi na n‑xi'í Jesucristu nuu curuxi, n‑chiya'u‑ia kuechi mee‑ro, te dɨuni n‑chiya'u‑ia kuechi ntdaa ñayiu ñuñayiu. 3Nux kida‑ro xa ta'u tniu Ianyuux, na'a‑ro xa kunduu‑ro xi'in mee‑ia. 4Ɨɨn ñayiu, nux ja'an‑i: “Joon, kunduu‑r xi'in Ianyuux”, ko ña kida mee‑i xa ta'u tniu‑ia, ja'an‑i tnu'u vete, te ñatu kidatniu tnu'u Ianyuux anu‑i. 5Ko ɨɨn ñayiu, nux jandixa‑i tnu'u Ianyuux xi'in ntdaa anu‑i te du'a kida‑i, xandaa kuu xa xemani ñayiu jan Ianyuux. Du'a xini‑ro xa kunduu‑ro xi'in Ianyuux. 6Ɨɨn ñayiu, nux ja'an‑i xa kunduu‑i xi'in Ianyuux, io xa kada mee‑i xava'a, ná n‑kida Jesucristu xava'a. 7Ñani‑da ku'a‑da, ñatu kidava'a‑da ɨɨn tnu'u ta'u tniu xee. Tnu'u kidava'a‑da vitna, ɨɨn nuu kuu xi'in tnu'u n‑ka tnɨɨ‑n nde ki'na nuu. Xá n‑ka teku‑n tnu'u ta'u tniu ya'a. 8Ko dɨuni, ná kuu ɨɨn tnu'u ta'u tniu xee, da kuu tnu'u kidava'a‑da vitna. Na n‑xo tuu Jesucristu ñuñayiu, n‑kida‑ia ná ja'an tnu'u ya'a, te vitna ka kida mee‑n ná ja'an tnu'u ya'a. Du'a kuu, chi xaxe'e xa vax ndɨ'ɨ xanee, chi xá n‑kixi Jesucristu te dakutnuni mee‑ia ñuñayiu. 9Nux ja'an ɨɨn ñayiu xa tuu‑i nuu kanda, ko xini u'u‑i ñani‑i ku'a‑i, dani tuu‑i nuu nee. 10Nux xemani ɨɨn ñayiu ñani‑i ku'a‑i, tuu‑i nuu kanda Ianyuux, te ña xe kɨ'ɨ‑i kuechi. 11Nux ña xemani ɨɨn ñayiu ñani‑i ku'a‑i, tuu‑i nuu nee, te xika‑i nuu nee. Te ña xini‑i ndexu jɨ'ɨn‑i, chi xaxe'e xanee ña kanda nuu‑i. 12Da'ya kuechi‑da, kidava'a‑da nuu mee‑n, chi xaxe'e Jesucristu, xá n‑taxkanu ini Ianyuux kuechi‑n. 13Sexa'nu, kidava'a‑da nuu mee‑n, xaxe'e xa ka xini‑n Jesucristu, Ia xá daa tuu antecas xa kua'a ntdaa xa io. Sekuechi, kidava'a‑r nuu‑n, chi ña n‑ka xejoon‑n xa kadatniu kui'na anu‑n. Da'ya kuechi‑da, n‑kidava'a‑da nuu mee‑n, xaxe'e xa ka xini‑n Taa‑ro Ianyuux. 14Sexa'nu, n‑kidava'a‑da nuu mee‑n, xaxe'e xa ka xini‑n Ia xá daa tuu antecas xa kua'a ntdaa xa io. Sekuechi, n‑kidava'a‑r nuu‑n, xaxe'e xa ka kundee ini‑n xa jandixa na'i ka‑n Jesucristu. N‑ka xejoon‑n xa kadatniu tnu'u Ianyuux anu‑n, te xijan kuu xa ñatuka taxnuni kui'na anu‑n. 15Maxku juemani koio‑n ñuñayiu, maxku juemani koio‑n xa io ñuñayiu. Nux xemani ɨɨn ñayiu ñuñayiu, te kuu xa ñatu xemani‑i Taa‑i Ianyuux. 16Nux xemani ɨɨn ñayiu ñuñayiu, kukajan ini‑i xa ni'i‑i ntdaa xa juini yɨkɨ kuñu‑i, kukajan ini‑i xa ni'i‑i ntdaa xa nde'a‑i. Najuen tnu'u‑i mee‑i, xaxe'e ntdaa xa neva'a‑i xi'in ntdaa xa kuu‑i. Xa'a kuu xa ña juini Ianyuux xa kada‑ro. Xa'a kuu xa kida ñayiu ña ka juini xa kunduu‑i xi'in Ianyuux. 17Chi vax ndɨ'ɨ ñuñayiu ya'a, vax ndɨ'ɨ ntdaa xa kukajan ini ñayiu. Ko ñayiu ka kida xa juini Ianyuux, kutuu va'a‑i xi'in Ianyuux kuia ma jɨn ndɨ'ɨ. 18Da'ya kuechi‑da, xá vax ndɨ'ɨ ntdaa xa io. Xá n‑ka teku‑n xa kixi ɨɨn se danda'u ñayiu. Ja'an‑s xa kida‑s ná n‑kida Cristu, ko nɨni du'a ja'an‑s, kidatniu‑s xa danaa‑s ntdaa xa n‑kida Cristu. Kuu‑s anticristu. Te vitna du'a kuu. Xá n‑ka kixee kue'e anticristu. Xijan kuu xa xini‑ro xa n‑xee xa vax ndɨ'ɨ ntdaa xa io. 19Se ka kuu anticristu, n‑ka dandoo ña'a‑s mee‑ro. Ko ña ndaa xa n‑ka kunduu‑s xi'in‑ro, chi nux da n‑kuu, dani ku kunduu‑s xi'in‑ro nde vitna n‑kuu. N‑ka dandoo ña'a‑s, te du'a n‑ka dande'a ña'a‑s xa ni ɨɨn‑s ña n‑ka kunduu‑s xi'in‑ro. 20Xá n‑taxi Jesucristu Espíritu Ianyuux nuu mee‑n, xa kutnuni ini koio‑n xa kuu xandaa. 21Ñadu kidava'a‑da xaxe'e xa ña kutnuni ini‑n xa kuu xandaa, chi kidava'a‑da xaxe'e xa ka kutnuni ini‑n xa kuu xandaa. Te ka kutnuni ini‑n xa tnu'u vete ñatu kuu tnu'u ndaa. 22¿Te jundu kuu se ja'an tnu'u vete? Kuu‑s se ja'an xa ña ndaa xa Jesús kuu Cristu, Ia n‑tunda'a Ianyuux. Se du'a ja'an, anticristu kuu‑s. Ñatu jandixa‑s Ianyuux ni Da'ya Yɨɨ Ianyuux. 23Ɨɨn ñayiu, nux ja'an‑i xa ña jandixa‑i Da'ya Yɨɨ Ianyuux, xini‑ro xa dɨuni ña jandixa‑i Ianyuux. Ko ɨnka ñayiu, nux ja'an‑i xa jandixa‑i Da'ya Yɨɨ Ianyuux, xini‑ro xa dɨuni jandixa‑i Ianyuux. 24Nde ki'na nuu xa n‑ka teku‑n tnu'u Jesucristu. Jandixa na'i koio ka‑n tnu'u jan. Nux jandixa na'i koio ka‑n tnu'u n‑ka teku‑n ki'na nuu, du'a kunduu na'i koio‑n xi'in Da'ya Yɨɨ Ianyuux, te kunduu na'i koio‑n xi'in Taa‑ia Ianyuux. 25Xá n‑taxi Jesucristu tnu'u‑ia xa du'a kutuu va'a‑ro xi'in Ianyuux kuia ma jɨn ndɨ'ɨ. 26Kidava'a‑da nuu‑n, xa kakune'e‑da se ka juini xa danda'u ña'a koio‑s mee‑n. 27Xá n‑taxi Jesucristu Espíritu Ianyuux nuu‑n, te kidatniu‑ia anu‑n. Xijan kuu xa ña ndoñu'u‑n xa dakua'a ña'a ni ɨɨn ñayiu. Dakua'a ña'a Espíritu Ianyuux ntdaa xa ndoñu'u‑n. Meni xandaa kuu xa dakua'a ña'a‑ia, ñatu kuu tnu'u vete. Xijan kuu xa, nani dakua'a ña'a‑ia dani kunduu na'i koio‑n xi'in‑ia. 28Da'ya kuechi‑da, kunduu na'i koio ka‑n xi'in Jesucristu. Nux du'a kada koio‑n, te du'a ma yu'u‑ro nuu‑ia, te ma kujanuu‑ro nuu‑ia hora na ndixi‑ia. 29Ka xini‑n xa kida Jesucristu meni xava'a. Dɨuni jini koio‑n xa ntdaa ñayiu ka kida xava'a ka kuu‑i da'ya Ianyuux.

1 Juan 31Jira, ¡naka va'a xemani ña'a Ianyuux mee‑ro! N‑danani ña'a‑ia da'ya‑ia, te ndaa xa vitna kuu‑ro da'ya‑ia. Xijan kuu xa, nani ña n‑ka xini ñayiu ñuñayiu mee‑ia, dani ñatu ka xini ña'a‑i mee‑ro tuku. 2Ñani mani‑da, ku'a mani‑da, vitna kuu‑ro da'ya Ianyuux, te ta dande'a ka‑ia ñayiu ñuñayiu ntdaa xa ku kuu‑ro. Hora na ndixi Jesucristu, te ku kuu mee‑ro ná kuu mee‑ia. Hora ijan, jini va'a‑ro‑ia. 3Xndetu‑ro xa ndixi Jesucristu, te xejoon‑ro xa taxnuni‑ia anu‑ro. Meni xava'a kida mee‑ia, te ɨɨn ɨɨn ñayiu xndetu mee‑ia, juini‑i xa kada mee‑i ná kida mee‑ia. 4Ɨɨn ñayiu, nux kida na'i‑i kuechi, ñayiu xee ini kuu‑i. Ñatu jandixa‑i tnu'u Ianyuux, te xi'in tnu'u‑ia tekuechi‑ia‑i. 5Va'a xna'a‑n xa n‑kixi Jesucristu ñuñayiu xa dita‑ia kuechi ñayiu. Nuncas ña n‑kida mee‑ia ni ɨɨn kuechi. 6Ɨɨn ñayiu, nux kunduu na'i‑i xi'in Jesucristu, du'a ña kida na'i‑i kuechi. Ɨɨn ñayiu, nux kida na'i‑i kuechi, ta jini ka‑i Jesucristu, te ta kutnuni ini ka‑i nax n‑kida‑ia xaxe'e‑i. 7Da'ya kuechi‑da, maxku juejoon koio‑n xa danda'u ña'a ni ɨɨn ñayiu. Nux kida ɨɨn ñayiu xava'a, kida‑i ná kida Jesucristu. Te ná kuu mee‑ia, da kuu ñayiu jan. 8Nux dani kida ɨɨn ñayiu kuechi, kuu‑i da'ya kui'na. Nde ki'na nuu n‑kida kui'na kuechi, te dani kida na'i‑i nde vitna. Xijan kuu xa n‑kixi Da'ya Yɨɨ Ianyuux ñuñayiu, xa danaa‑ia ntdaa xa n‑kida kui'na. 9Ɨɨn ñayiu, nux kuu‑i da'ya Ianyuux, ma kada na'i‑i kuechi, chi kuu‑i da'ya Ianyuux. Ña kua'a‑i xa kada ka‑i kuechi, ña juini‑i xa kada‑i kuechi, chi da'ya Ianyuux kuu‑i. 10Du'a xini‑ro jundu kuu da'ya Ianyuux te jundu kuu da'ya kui'na. Nux ña kida ɨɨn ñayiu xava'a, ñatu kuu‑i da'ya Ianyuux. Nux ña xemani‑i ñani‑i ku'a‑i, ñatu kuu‑i da'ya Ianyuux. 11Xa'a kuu tnu'u xá n‑ka teku‑n nde ki'na nuu. Xá n‑ka teku‑n xa io xa juemani tna'a‑ro. 12Maxku ku kuu mee‑ro ná n‑kuu taxa'nu tnetnu‑ro, se n‑xo nani Caín. Da'ya kui'na n‑kuu Caín, te n‑xa'ni‑s ñani‑s. Te, ¿nakuenda n‑xa'ni‑s ñani‑s? Chi xaxe'e xa n‑xo kida ñani‑s xava'a, te n‑xo kida mee‑s xa u'u. 13Ñani‑da ku'a‑da, ñayiu ñuñayiu ma juemani ña'a koio‑i mee‑n. 14Antecas xa jandixa‑ro Jesucristu, n‑kuu‑ro ná kuu ndɨyɨ. Vitna, ndaa xa ndito‑ro. Xini‑ro xa du'a kuu, chi xemani‑ro ñani‑ro ku'a‑ro. Ɨɨn ñayiu, nux ñatu xemani‑i ñani‑i ku'a‑i, dani kuu‑i ndɨyɨ. 15Ɨɨn ñayiu, nux ña xemani‑i ñani‑i ku'a‑i, kuu‑i ná kuu ɨɨn ñayiu xa'ni ndɨyɨ. Te xna'a‑n xa ɨɨn ñayiu xa'ni ndɨyɨ, ñatu tuu va'a‑i xi'in Ianyuux. 16N‑dande'a ña'a Ianyuux xa xemani ña'a‑ia mee‑ro, hora n‑xi'í Jesucristu xaxe'e‑ro. Te io xa kuú mee‑ro tuku xaxe'e ñani‑ro ku'a‑ro, nux ndoñu'u xa du'a koo. 17Ɨɨn ñayiu, nux tuu va'a‑i ñuñayiu, te xini‑i xa ndoñu'u ñani‑i ku'a‑i, ko ña kundau ini‑i‑yɨ te ña xia'an‑i xa ndoñu'u‑i, te, ¿nanda kuu xa ja'an‑i xa xemani‑i ñani‑i ku'a‑i? Nux du'a kida‑i, te ña ndaa xa xemani‑i Ianyuux. 18Da'ya kuechi‑da, na dande'a‑ro ñani‑ro ku'a‑ro xa ndaa xa xemani‑ro‑i. Va'a na ja'an‑ro nuu‑i, ko dɨuni na chindee‑ro‑i. Du'a dande'a‑ro‑i xa ndaa xa xemani‑ro‑i. 19Nux du'a kida‑ro, xini‑ro xa ndaa xa kunduu‑ro xi'in Jesucristu, te ña ndoñu'u xa yu'u‑ro nuu Ianyuux. 20Na'a Ianyuux ntdaa. Nux tekuechi ña'a anu‑ro, ko ma yu'u‑ro, chi xá n‑ja'an Ianyuux xa nux xemani‑ro ñani‑ro ku'a‑ro, du'a kunduu‑ro xi'in mee‑ia. 21Ñani mani‑da, ku'a mani‑da, nux ña tekuechi ña'a anu‑ro, ña ndoñu'u xa yu'u‑ro nuu Ianyuux. 22Ntdaa xa xijan‑ro, te taxi‑ia, chi jandixa‑ro tnu'u ta'u tniu‑ia, te kida‑ro xa tna ini‑ia. 23Te xa'a kuu xa n‑ta'u tniu ña'a‑ia. Io xa jandixa‑ro Da'ya Yɨɨ‑ia, Jesucristu, te io xa juemani tna'a‑ro, ɨɨn‑ro xi'in ɨnka‑ro. Du'a n‑ta'u tniu ña'a‑ia. 24Ɨɨn ñayiu, nux kida‑i xa ta'u tniu Ianyuux, kunduu‑i xi'in Ianyuux te kunduu Ianyuux xi'in mee‑i. Xá n‑taxi Ianyuux Espíritu Ii, te kida Espíritu Ii xa na'a‑ro xa kunduu Ianyuux xi'in‑ro.

1 Juan 41Ñani mani‑da, ku'a mani‑da, maxku jandixa koio‑n dava'a nga ñayiu ja'an xa kachitnu'u‑i tnu'u Ianyuux. Kototnuni‑n‑yɨ, nux ndaa xa ja'an‑i tnu'u Ianyuux, a nux ja'an‑i tnu'u kui'na. Chi ñuñayiu, io kue'e ñayiu ka ja'an xa xian tnu'u‑i tnu'u Ianyuux nuu ñayiu, ko ña ndaa. 2Ɨɨn ñayiu, nux jandixa‑i xa Jesús kuu Cristu, Ia kuu Da'ya Yɨɨ Ianyuux, te dɨuni jandixa‑i xa kuu‑ia Se kuu ñani tna'a xi'in ñayiu, te xandaa kuu xa ka kachitnu'u‑i tnu'u Ianyuux. Du'a kutnuni ini‑n xa n‑tunda'a Espíritu Ianyuux mee‑i. 3Ɨɨn ñayiu, nux ñatu jandixa‑i xa Jesús kuu Da'ya Yɨɨ Ianyuux te dɨuni kuu‑ia Se kuu ñani tna'a xi'in ñayiu, kutnuni ini‑n xa ñatu kachitnu'u‑i tnu'u Ianyuux, kutnuni ini‑n xa ja'an‑i tnu'u se kuu anticristu. Xá n‑ka teku‑n xa kixi se kuu anticristu, te vitna tuu‑s ñuñayiu. 4Da'ya kuechi‑da, mee‑n ka kuu da'ya Ianyuux, te xijan kuu xa ndaku ka mee‑n dada se ijan. Taxnuni Ianyuux anu mee‑n, te taxnuni kui'na anu mee‑s. Ko kue'e kunxa'nu ka Ianyuux dada kui'na. Xijan kuu xa unu ndaku ka mee‑n dada mee‑s. 5Se ijan, ka kuu‑s se ñuñayiu. Xijan kuu xa, tnu'u ka ja'an‑s kuu tnu'u ka jandixa ñayiu ñuñayiu, te ka xeka va'a ñayiu ñuñayiu tnu'u‑s. 6Ko mee‑ro, ka kuu‑ro da'ya Ianyuux. Ñayiu xini Ianyuux, ka xeka va'a‑i tnu'u‑ro. Ñayiu ña ka kuu da'ya Ianyuux, ña chinuu‑i tnu'u‑ro. Nux xeka va'a ɨɨn ñayiu tnu'u‑ro, te xini‑ro xa taxnuni Espíritu Ianyuux anu‑i. Nux ñatu chinuu ɨɨn ñayiu tnu'u‑ro, te xini‑ro xa taxnuni se kuu anticristu anu‑i. Ɨɨn kuu xandaa, ko ɨnka kuu xa ña ndaa. 7Ñani mani‑da, ku'a mani‑da, na juemani tna'a‑ro, chi nux xemani tna'a‑ro, kutnuni ini‑ro xa taxnuni Ianyuux anu‑ro. Nux xemani ɨɨn ñayiu ñani‑ro ku'a‑ro, kuu‑i da'ya Ianyuux te xini‑i Ianyuux. 8Nux ñatu xemani ɨɨn ñayiu ɨnka ñayiu, ta jini ka‑i Ianyuux, chi Ianyuux kuu Ia xemani ntdaa ñayiu. 9Hora n‑tunda'a Ianyuux Da'ya Yɨɨ‑ia ñuñayiu, n‑dande'a ña'a‑ia mee‑ro xa xemani ña'a‑ia. Idini Da'ya Yɨɨ Ianyuux io. 10Xaxe'e xa jandixa‑ro mee‑ia, xtuu va'a‑ro xi'in Ianyuux. Xaxe'e Da'ya Yɨɨ‑ia, xemani Ianyuux ñayiu. Juini ña n‑ka xemani mee‑ro mee‑ia, ko n‑xemani ña'a mee‑ia mee‑ro. N‑tunda'a‑ia Da'ya Yɨɨ‑ia ñuñayiu, xa chiya'u‑ia kuechi‑ro, na n‑xi'í‑ia nuu curuxi. 11Ñani mani‑da, ku'a mani‑da, nux du'a n‑xemani ña'a Ianyuux mee‑ro, dɨuni io xa juemani tna'a mee‑ro. 12Nuncas ña n‑xini ni ɨɨn ñayiu xi'in nuu‑i Ianyuux. Ko nux xemani tna'a‑ro, du'a xini‑ro xa tuu Ianyuux xi'in‑ro te kida‑ia xa xemani‑ro mee‑ia xi'in ñayiu. 13Du'a kutnuni ini‑ro xa kunduu mee‑ro xi'in mee‑ia te kunduu mee‑ia xi'in mee‑ro, chi xá n‑taxi‑ia Espíritu mee‑ia. 14Xi'in nuu mee‑da, n‑ka xini‑da Da'ya Yɨɨ Ianyuux. Ka ja'an ndaa‑da xa n‑tunda'a Ianyuux Da'ya Yɨɨ‑ia ñuñayiu, xa dakaku‑ia ñayiu ñuñayiu, xa ma kuú koio‑i xi'in kuechi‑i. 15Ɨɨn ñayiu, nux jandixa‑i xa Jesús kuu Da'ya Yɨɨ Ianyuux, du'a kunduu Ianyuux xi'in mee‑i, te kunduu mee‑i xi'in Ianyuux. 16Du'a kutnuni ini‑ro xa xemani ña'a Ianyuux mee‑ro. Te du'a jandixa‑ro xa xemani ña'a‑ia mee‑ro. Ianyuux kuu Ia xemani ñayiu. Nux xemani ɨɨn ñayiu Ianyuux xi'in ñayiu, kunduu mee‑i xi'in Ianyuux, te kunduu Ianyuux xi'in mee‑i. 17Du'a kida Ianyuux xa xemani‑ro mee‑ia. Te ma yu'u‑ro nuu Jesucristu, na ndixi‑ia xa ndadandaa‑ia ntdaa xa io. Chi juini dani tuu‑ro ñuñayiu, ko ná kuu mee‑ia da ka kuu mee‑ro tuku. 18Ñatu yu'u‑ro nuu Ianyuux, chi kutnuni ini‑ro xa xemani ña'a‑ia mee‑ro. Nux yu'u ɨɨn ñayiu nuu Ianyuux, kuu xa ndetu‑i xa kada u'u ña'a Ianyuux mee‑i. Nux yu'u‑i nuu Ianyuux, kuu xaxe'e xa ta kutnuni ini ka‑i xa xemani Ianyuux mee‑i, te ta xee ka‑i xa juemani mee‑i Ianyuux. 19Xemani‑ro Ianyuux, xaxe'e xa n‑xemani ña'a Ianyuux mee‑ro ki'na nuu. 20Ɨɨn ñayiu, nux ja'an‑i xa xemani‑i Ianyuux, ko xini u'u‑i ñani‑i ku'a‑i, kuu‑i ɨɨn ñayiu ja'an tnu'u vete. Nux nde'a‑i ñani‑i ku'a‑i, te ñatu xemani‑i‑yɨ, ¿janda kua'a‑i xa juemani‑i Ianyuux, Ia ña nde'a‑i? 21Te xa'a kuu tnu'u n‑ta'u tniu Ianyuux. Nux xemani ɨɨn ñayiu Ianyuux, io xa juemani‑i ñani‑i ku'a‑i tuku.

1 Juan 51Ɨɨn ñayiu, nux jandixa‑i xa Jesús kuu Cristu, kuu‑i da'ya Ianyuux te xemani‑i Taa‑i Ianyuux. Te nux xemani‑i Ianyuux, dɨuni xemani‑i da'ya Ianyuux. 2Nux xemani‑ro Ianyuux te jandixa‑ro tnu'u ta'u tniu‑ia, na'a‑ro xa xemani‑ro da'ya‑ia tuku. 3Nux xemani‑ro Ianyuux, io xa jandixa‑ro tnu'u ta'u tniu‑ia. Te ñatu vee xa kada‑ro xa juini mee‑ia, chi taxnuni mee‑ia anu‑ro. 4Ɨɨn ñayiu, nux kuu‑i da'ya Ianyuux, du'a ndaku ka mee‑i dada xa io ñuñayiu. Jandixa‑ro xa Jesús kuu Cristu. Xaxe'e xa'a, ndaku ka mee‑ro dada xa io ñuñayiu. 5Ñayiu jandixa xa Jesús kuu Da'ya Yɨɨ Ianyuux, mee‑i ndaku ka dada dava'a nga xa io ñuñayiu. 6Na n‑kixi Jesucristu ñuñayiu, n‑ya'a‑ia nuu ndute te n‑ya'a‑ia nuu nɨñɨ. Kuu ná kuu xa n‑kixi‑ia xi'in ndute xi'in nɨñɨ. N‑ya'a‑ia nuu ndute hora n‑dajuendute ña'a Sua, te n‑xatu nɨñɨ hora n‑xi'í‑ia xaxe'e‑ro. Ja'an ndaa Espíritu Ianyuux xa du'a n‑kuu, chi xandaa kuu Espíritu Ianyuux. 7Andɨu io uni xa ja'an ndaa xaxe'e Jesucristu: Taa‑ro Ianyuux, xi'in Ia nani Tnu'u Ianyuux, xi'in Espíritu Ianyuux. Te idini Ianyuux kuu‑ia, ndruni‑ia. 8Te ñuñayiu ya'a io uni xa ja'an ndaa xaxe'e Jesucristu: Espíritu Ianyuux, xi'in ndute nuu n‑ya'a Jesucristu, xi'in nɨñɨ Jesucristu n‑xatu. Te ɨɨn nuu ka ja'an ndaa ndruni xa'a. 9Nux ɨɨn nuu ka ja'an ndaa uu seyɨɨ, te io xa jandixa‑ro xa ka ja'an‑s. Ko yo ya'u ka xa ja'an ndaa Ianyuux, chi ja'an ndaa Ianyuux xaxe'e Da'ya Yɨɨ‑ia. 10Ɨɨn ñayiu, nux jandixa‑i Da'ya Yɨɨ Ianyuux, te ja'an ndaa Espíritu Ianyuux anu‑i xaxe'e xa'a. Te ɨɨn ñayiu, nux ñatu jandixa‑i xa ja'an Ianyuux, du'a ja'an‑i xa ja'an Ianyuux tnu'u vete, chi ña jandixa‑i xa n‑ja'an ndaa Ianyuux xaxe'e Da'ya Yɨɨ‑ia. 11N‑ja'an ndaa Ianyuux xa n‑kida Jesucristu xa kutuu va'a mee‑ro xi'in mee‑ia kuia ma jɨn ndɨ'ɨ. N‑ja'an ndaa‑ia xa du'a koo xaxe'e xa n‑xi'í Da'ya Yɨɨ‑ia xaxe'e‑ro. 12Nux jandixa ɨɨn ñayiu Da'ya Yɨɨ Ianyuux, tuu va'a‑i xi'in Ianyuux, vitna xi'in nde kuia ma jɨn ndɨ'ɨ. Ko nux ña jandixa ɨɨn ñayiu Da'ya Yɨɨ Ianyuux, ma kutuu va'a‑i xi'in Ianyuux. 13Kidava'a‑da carta ya'a nuu mee‑n ka kuu ñayiu ka jandixa Da'ya Yɨɨ Ianyuux. Kidava'a‑da nuu‑n, xa kutnuni ini koio‑n xa kutuu va'a koio‑n xi'in Ianyuux kuia ma jɨn ndɨ'ɨ. 14Kua'a‑ro xa koo‑ro confianza nuu Ianyuux. Nux kajan‑ro ɨɨn xa ndoñu'u‑ro xa kada‑ro xa juini mee‑ia, na'a‑ro xa nini ña'a‑ia. 15Te nux na'a‑ro xa nini ña'a‑ia, dava'a nga xa xijan‑ro nuu‑ia, dɨuni na'a‑ro xa xá n‑taxi‑ia xa n‑xijan‑ro. 16Nux xini ɨɨn ñayiu xa kida ñani‑i ku'a‑i kuechi, io xa kajan ta'u‑i xaxe'e ñani‑i ku'a‑i. Io ɨɨn kuechi, xa nux na kada‑ro kuechi jan, te io xa kuú‑ro xi'in kuechi‑ro. Ñatu ja'an‑da xa io xa kajan ta'u‑n xaxe'e ñani‑n ku'a‑n kida kuechi ya'a. Ko io nga kuechi, xa nux na kada‑ro kuechi jan, te ma kuú‑ro xi'in kuechi‑ro. Nux du'a kida ñani‑n ku'a‑n, te io xa kajan ta'u koio‑n xaxe'e‑i, te kada Ianyuux xa kutuu va'a‑i xi'in‑ia. 17Ntdaa xa ña kuu xava'a kuu kuechi. Ko io kuechi ma kada xa kuú‑ro nux kida‑ro kuechi jan. 18Na'a‑ro xa ɨɨn ñayiu, nux kuu‑i da'ya Ianyuux, ma koo xa dani kada ka‑i kuechi. Chi neva'a Da'ya Yɨɨ Ianyuux mee‑i, te du'a ma kua'a kui'na xa kadajuexa ña'a‑i xa kada ñayiu jan kuechi. 19Na'a‑ro xa n‑ka nduu‑ro da'ya Ianyuux. Te na'a‑ro xa xejoon ñayiu ñuñayiu xa taxnuni kui'na anu‑i. 20Na'a‑ro xa n‑kixi Da'ya Yɨɨ Ianyuux ñuñayiu. Na'a‑ro xa n‑kida‑ia xa kutnuni ini‑ro jundu kuu‑ia, n‑kida‑ia xa jini‑ro Ianyuux Ndaa. Kunduu‑ro xi'in Ianyuux Ndaa, chi kunduu‑ro xi'in Da'ya Yɨɨ‑ia, Jesucristu. Ianyuux Ndaa kuu‑ia, te kida‑ia xa kutuu va'a mee‑ro, xi'in mee‑ia kuia ma jɨn ndɨ'ɨ. 21Da'ya kuechi‑da, koo koio‑n cuedado. Maxku jandixa‑n santu kidava'a nda'a se ñuñayiu. Kunduu na'i koio ka‑n xi'in Jesucristu, Da'ya Yɨɨ Ianyuux Ndito. Du'a na koo.

http://www.bible.is/XTDTBL/1John/1/N

Nenhum comentário:

Postar um comentário