quinta-feira, 24 de setembro de 2015

1 SAN: MOBA


1 San 11T da kadaaɔg ne k tin maad’i miɛl maam nba bo be hal cilg youg nyan po i. K t gbad l maam, g la’ɔg yen t ninbina, g ŋanm g diid’o g biɛ sii’ug yen t nui. 2L miɛl n bo tan dɔgd, k t la’ɔg. L po n te k t kun mɔni g biɛ muand’i miɛl nba kan ban g gbenn po. L miɛl bo be t Baa Yendu buol i, g tan dɔgd g ŋɔn’ti u kua. 3Tin la yal, g biɛ gbad yal nyan, t muand i mɔ lann n nyan, g naataann ń ŋanm gii be tinm yen yinm n ninŋ. Yen mɔni, naataann nba be t ninŋ taand’ti yen t Baa Yendu yen u Bija Yiesu Kristo i. 4T da kadaaɔg ne g tien’i k t kul pala ń ŋanm g manŋ g tond i. 5Tin gbad maam nba Yiesu Kristo buol g muand’i n ne: Yendu tie yinyiem i, siɛl yaa bunbɔnn g be u ninŋ. 6T gii maad g naataann nba be t ninŋ taand’ti yen’o g yen sonm bunbɔnn n ninŋ, t fa faaɔg u, t g suun yal nba tuag yen mamɔni sɔnu. 7Ama l gii tie k t sonm yinyiem n ninŋ nyan Yendu mɔno n be yinyiem n ninŋ nand nyan, lann naataann nba be t ninŋ taand’ti yen t lieb n nyan. U Bija Yiesu sɔm bu ŋuul g nyan t biid kul i canyiin. 8L gii tie k t maad k t g mɔg biid, t bɔnd t kua i, mamɔni g be t ninŋ. 9Ama l gii tie k t tuo g maad Yendu nunŋ n k t biil, wan yaan g kand u mɔb po g biɛ tie mɔnkundaan nyan, u bu di sugl t biid kul po g biɛ ŋuul g nyan bonbiil kul t ninŋ. 10T gii maad k t g tien biid t yi Yendu faaɔgdaan n nyan, u maam g be t ninŋ.

1 San 21N bid, n da kadaaɔg ne g tien’i k yin daa tie biid i. Ama l gii tie g sua tien biid, t mɔg todkua t Baa Yendu buol, wano n tie Yiesu Kristo, mɔnkundaan. 2Wano Yiesu Kristo n tug u kua g yid salg k t biid ń piin. L g tie tinm kukua yaa biid po kaa, ama l tie ŋanduna niib kul mɔ yaa biid po i. 3L gii tie k t cɔln Yendu mɔmaam, lann n bu te tin bann k t ban Yendu. 4Nil gii tua k u ban Yendu g yen g cɔln u mɔmaam, u tie faaɔgdaan i, mamɔni g be l daan n ninŋ. 5Ama yua nba kub Yendu maam g suun yen tuonn, u tie daan nba g Yendu buam sun tuonn u pal n ninŋ i canyiin. Nnyan i k t bu fid g bann k t be yen Yendu. 6Yua nba yed k u be yen Yendu, l daan binbem baa tie nyan Yiesu binbem n bo tie nand nyan i. 7N bibuadi, l g tie mɔmapaanm kaa k n da g tien’i, l tie mɔmakpelm nba k i bo gaal hal cilg youg nyan i. L mɔmakpelm n tie maam nba k i bo l kpiɛ g gbad nyan. 8Yen l yaa kul, l biɛ daa l tie mɔmapaanm i k n da g tien’i. Kristo n ŋanm g ŋɔn u binbem n ninŋ k l mɔmaam tie mɔmapaanm, k i mɔ biɛ ŋɔn i binbem n ninŋ k l tie nnyan. K l maa bunbɔnn nuan ji buol i, g mamɔni yinyiem ji yien. 9Yua gii maad k u be yinyiem n ninŋ, g yen g bua u ninja nublu, l daan biɛ daa l be bunbɔnn n i. 10Yua nba bua u ninja, wano n be yinyiem n. Siɛl g be u ninŋ g bu te k wan baa biid n. 11Yua g bua u ninja nublu nuan l be bunbɔnn n i. U sonm bunbɔnn n ninŋ i. U g ban wan saa naan, k l maa bunbɔnn te k u juan o. 12N bid, n da’i kadaaɔg ne k l maa Yendu piin i biid Yiesu sann po o. 13Yinm bibaa‑nba, n da’i k l maa i ban yua nba bo be hal cilg youg. Yinm naasenm, n da’i k l maa i paad Bonbiildaan o. 14Yinm bid, yin ban t Baa Yendu po n te k n diɛn’i kadaaɔg ne. Bibaa‑nba, yin ban yua nba bo be hal cilg youg po n te k n diɛn’i l kadaaɔg. Yinm naasenm, yin sie k l paa, g Yendu maam be i pala n ninŋ, k i biɛ paad Bonbiildaan po n te k n diɛn’i l kadaaɔg. 15Lann, daa bua man ŋanduna, g bual yal nba kul l be ŋanduna n ninŋ. Nil gii buad ŋanduna, t Baa Yendu buam g be u ninŋ palb. 16K l maa yal be ŋanduna n ninŋ g nya t Baa Yendu buol kaa. Nifosaal n niɛn yal nba k l g ŋan, yen u ninbina n nyuan yal k u bua, yen jigbelm u ŋalman po, l kul ne nya ŋanduna n ninŋ i. 17Ŋanduna ne yen niib n niɛn yal nba k l g ŋan nyan ji pend i, ama yua nba suun Yendu n bua yal nba nuan baa l be i youg kul. 18N bid, jijuog youg nag n nyan. I bo gbad k b maad’i g Kristo ninnand bu baal. To, mɔlane Kristo ninnanda bonciɛnn ji be i. L po n te k t bann g jijuog youg nag. 19Kristo ninnanda ŋann nyiɛ t siign i, ama b yen bo g tie t yab. B bo gii tie t yab yen mɔni, tinm yen banm n bo baa tund g be. Ama b nyiɛ g ŋaa’ti k lan ŋɔn yen mɔni k b kul bo g tie t yab i. 20Yinm nuan yen gaal Foŋanm o. Yua nba g mɔg siɛl yaa biid n tie’i l Foŋanm. L po n te k i kul ban mamɔni. 21N gii da’i kadaaɔg ne, l g tie k i g ban mamɔni kaa. Yin ban mamɔni po n te k n da’i. I biɛ ban g baa siɛl yaa faaɔg kan fid g nya mamɔni n ninŋ. 22Ŋmaa n tie faaɔgdaan i ? Faaɔgdaan tie yua nba yie g Yiesu g tie Kristo i. Wano n tie Kristo ninnand. U yie k u g ban t Baa Yendu, k u biɛ g ban u Bija mɔ. 23Yua nba l yie Yendu Bija, u kan fid g yiin Yendu k u Baa. Ama yua nba tuo g gaal Yendu Bija, t Baa Yendu be yen’o. 24Yinm nuan n bo gbad maam nba hal cilg youg nyan, ŋanm man gii diɛ l maam i pala n. L gii tie k yin bo gbad maam nba hal cilg youg be i pala n ninŋ, i taan g be yen Yendu Bija, g biɛ be yen t Baa Yendu mɔ n nyan. 25Wan bo puon k u bu te’ti yal nba n ne: miɛl nba kan ban g gbenn. 26Min da kadaaɔg nba g tien’i ne nyuan yab nba kpaan k ban bɔnd’i nii. 27Ama yinm nuan, Kristo tie’i Foŋanm o. Nyan u Foŋanm n be i ninŋ nyan, l ji g bual g sua ń tund’i, Foŋanm n ŋɔnŋ’i l kul. Wan tund’i yal tie mɔni i, l g tie faaɔg kaa. Lann, i suun man Foŋanm n tund’i yal, gii be yen Kristo. 28To, n bid, i be man yen Kristo k tin fid gii mɔg papaal youg nba k u tan bu dɔgd, k u guanu daal fai ń tan daa di’ti. 29I ban g Kristo tie mɔnkundaan. Lann, biɛ bann man g yua nba kul l tuag mɔnkund sɔnu, Yendu n mal’o.

1 San 31Diid man buam nba k t Baa Yendu ŋɔn k u buad’ti. U buaciɛnm po n te k u tug’ti k t tie u bid. Yen mɔni, t kon l tie u bid i. Lann n te g ŋanduna niib g ban’ti k l maa b g ban Yendu. 2N bibuadi, mɔla po t ji tie Yendu bid i. Ama tin tan bu te yab daa duag i. T ban g Kristo n tan bu legd youg nba, t bu lebd g ji gii tie nyan wano nyan i, k l maa t tan bu l la’ɔg u ninprurr, wan naan nand. 3Yua nba kul l mɔg l dindann Kristo n ninŋ, u ji kan gii mɔg jɔgnd nyan Yiesu Kristo mɔno n g mɔg jɔgnd nyan. 4Yua nba kul l tie biid, u g cɔln Yendu mɔmaam. K l maa biid tienu tie Yendu mɔmaam yienu i. 5I ban g Kristo bo baal k wan piin t biid i, g biɛ ban g siɛl yaa biid g be u ninŋ. 6Lann, yua nba kul l taan g be yen’o ji g tie biid. Ama yua nba tie biid, u g ban g la’ɔg, u taan g ban’o mɔno. 7N bid, guul man i kua g daa ŋaa g sua ń bɔnd’i. Yua nba suun yal n dagd mɔ tie mɔnkundaan i, nyan Yiesu Kristo n tie mɔnkundaan nand nyan. 8Yua nba tie biid tie Sitaan yua i, k l maa hal cilg youg Sitaan bo l tie biiddaan i. Yendu Bija baal k wan biil Sitaan tuona i. 9Yua nba g Yendu mal’o kul tie Yendu big i, u ji g tie biid, k l maa Yendu bul u yanfuom u ninŋ. U ji kan fid gii tie biid k l maa Yendu tie u Baa i. 10Tin bu bann Yendu bid yen Sitaan bid nand nba n ne: yua nba kul l g suun yal nba ŋan Yendu buol, u g tie Yendu big. Yua nba g bua u ninja u g tie Yendu big. 11Yen mɔni yin bo gbad maam nba hal cilg youg tie, k tin gii bua man t lieb i. 12L g ŋan k tin gii tie nyan Kayɛn nyan. U bo tie Bonbiildaan yua i, g kpii u ninja. Bɛ po n te k u bo kpii’ug u ? U bo kpii’ug k l maa u waag tuona bo ŋan, k u yaa yal yen g ŋan. 13N ninjanm, l gii tie g ŋanduna yab g bua i nublu, yin daa ŋaa lan yaa g lid’i. 14Tinm nuan ban k t nyiɛ kuum n ninŋ g kua miɛl n ninŋ o, k l maa t bua t ninjanm. Yua nba g bua u ninja, u biɛ daa l be kuum n ninŋ i. 15Yua nba kul l g bua u ninja nublu tie nikpiil i. I yen ban g miɛl nba kan ban g gbenn mɔ kan fid gii be nikpiil n ninŋ. 16Yal nba te k t bann yal nba tie buam n ne: Yiesu n yaan lu u miɛl t po n te k t bann buam. Lann, l tie k tin mɔ ń lu t miɛl t ninjanm po i. 17L gii tie g nil mɔg ŋanduna ne ŋalman, g yen nyuan k u ninja be payiɛnu n, k u g jie’og ninbaaɔg, l daan bu tien nle i gii mali k u mɔg Yendu buam u ninŋ i ? 18N bid, l g tie k tin gii ŋɔnŋ buam t maam n ninŋ yen t lanbonmana n ninŋ kaa, ama l tie k tin gii ŋɔnŋ t tuona n ninŋ i, k t mɔg buam yen mɔni. 19T gii tien nnyan, lann i k t bu bann k t tie yab tuag mamɔni sɔnu, k t pala biɛ paa g Yendu be yen’ti. 20L gii tie k tin tien yal nba mabnd’ti t pala n ninŋ, t ban g Yendu yab g cie t pala, k u biɛ ban bonn kul. 21Lann n bibuadi, l gii tie g siɛl g mabnd’ti t pala n ninŋ, t mɔg papaal Yendu buol, 22k t gii miɛl yal nba kul, k t bu la k l maa t kub u mɔmaam t pala n ninŋ g biɛ tie wan bua yal. 23Wan cab’ti k tin tien yal n ne: l tie k tin gii dug u Bija Yiesu Kristo sann po i, g biɛ gii bua t lieb nyan wano Kristo n ŋɔn’ti u mɔmaam n ninŋ nand nyan. 24Yua nba cɔln Yendu mɔmaam, u be yen Yendu, g Yendu mɔ be yen’o. U Foŋanm nba k u tie’ti nyan po n te k t ban k u be yen’ti.

1 San 41N bibuadi, l g tie yab nba kul tua k b mɔg Foŋanm kaa, k i tu bu gaal k b maam tie mɔni. Ama yin tu bign’m g liɛ ban mɔg yal nba nyan kon l tie Yendu Foŋanm yaa aa ? K l maa niib bonciɛnn ji yad g gbie ŋanduna n ninŋ, g fa k b tie Yendu sogni‑nba. 2Diid man, yin bu tien nand g bann k l tie Yendu Foŋanm n ne: yua nba kul maad g Yiesu n tie Kristo, k b mal’o k u tie nifosaal, l daan n mɔg Yendu Foŋanm u ninŋ. 3Ama yua nba g tuo g Yiesu te nifosaal, u g mɔg Yendu Foŋanm u ninŋ. U mɔg Yiesu Kristo ninnand maalm i u ninŋ. I tuod g gbad g Kristo ninnand bu baal, bann man g mɔlane mɔno u ji be ŋanduna n i. 4N bid, yinm tie Yendu yab i, g paad l faaɔgdanm, k l maa yua nba be i ninŋ mɔg paalu g cie yua nba be ŋanduna n ninŋ. 5Banm tie ŋanduna yab i, l po n te k b maad nyan ŋanduna yab n maad nand nyan, g ŋanduna yab cenŋ’b. 6Ama tinm nuan tie Yendu yab i. Yua nba ban Yendu n cenŋ’ti, yua g tie Yendu yua g cenŋ’ti. Nnyan i k t bu bann yua tie mamɔnmaad yua, yen yua tie faaɔgdaan yua. 7N bibuadi, tin gii bua t lieb man, k l maa buam nyiɛ Yendu buol i. Yua nba kul bua u lua, Yendu n mal’o, u ban Yendu. 8Yua nba g bua u lua nuan g ban Yendu, k l maa Yendu tie buamdaan i. 9Diid man Yendu n ŋɔn k u bua’ti nand nba: u sun u Bijayenml ŋanduna n ninŋ, k u yaa po tin gii mɔg miɛl. 10L buam tie ne i: l g tie k tinm kaa buad Yendu, ama wano n buad’ti g sun u Bija k u tug u kua g yid salg k t biid ń piin. 11N bibuadi, l gii tie g Yendu buad’ti nnyan, l bual k tin mɔ ń gii bua t lieb i. 12Sua g ban g la Yendu, ama l gii tie k t bua t lieb, Yendu be yen’ti, k u buam mɔ biɛ l suun tuonn t ninŋ yen mɔni. 13Diid man, lan tien nand k t ban k t be yen Yendu, g Yendu mɔ be yen’ti n ne: u tie’ti u Foŋanm. 14Yendu sun u Bija k wan fiel ŋanduna niib. Tinm la’ɔg, t biɛ muand lann n nyan. 15Yua nba tuo g yed g Yiesu tie Yendu Bija, Yendu be yen wano i, k u mɔ biɛ be yen Yendu. 16Tinm ban Yendu n bua’ti nand, g biɛ tuo k l tie mɔni. Yendu tie buamdaan i, yua nba sonm buam sɔnu n ninŋ, u be yen Yendu, g Yendu mɔ be yen’o. 17L gii tie g Yendu buam suun tuonn t ninŋ yen mɔni, t baa mɔg papaal buud daal, k l maa t binbem ŋanduna ne ninŋ naan yen Yiesu Kristo binbem i. 18Buam n be naan, jijei ji g mɔg yiɛl l buol. Yua mɔg buam yen mɔni jijei g be u ninŋ. K l maa yua n guu tubdadu n mɔg jijei. Yua n mɔg jijei g mɔg buam u ninŋ yen mɔni. 19Ama tinm nuan yen mɔg buam k l maa Yendu n kpiɛ g buad’ti. 20Nil gii maad k u bua Yendu g yen g bua u ninja nublu, u tie faaɔgdaan i. Yen mɔni, yua nba g bua u ninja nba k u nyuan’o kan fid gii bua Yendu nba k u g nyuan’o. 21T gaal mɔmaam ne i Yendu buol: yua nba bua Yendu ń gii bua u ninja mɔ.

1 San 51Yua nba kul tuo g gaal g Yiesu tie Kristo, Yendu mal wano i. Yua nba kul bua bibaa, u baa bua bibaa n mal yua nba mɔ i. 2Tin bu tien nand g bann k t bua Yendu bid tie k tin gii bua Yendu g biɛ cɔln u mɔmaam i. 3Yen mɔni, tin bu ŋɔn nand k t bua Yendu tie k tin cɔln u mɔmaam i. L mɔmaam cɔlmu yen g paa t po, 4k l maa Yendu n mal yua nba kul bu fid g paad ŋanduna. Tin mɔg dindann nba nyan po n te k t paad ŋanduna. 5Ŋmaa n bu fid g paad ŋanduna i ? Yua nba tuo g gaal g Yiesu tie Yendu Bija kukua n bu fid g paad ŋanduna. 6Wano Yiesu Kristo n tie yua nba bo baal k b wul’o nyum, g sɔm biɛ tan nyiɛ u po dapunpɔnn po. U bo g baal k b wul’o kukua kaa, ama sɔm mɔ bo nyiɛ u po. G Foŋanm tie sieda k l tie mɔni, k l maa Foŋanm tie mɔni i. 7Sieda‑nba bantaa n be: 8lan tie Foŋanm yen nyum yen sɔm. Banm bantaa ne kul tuo k l tie nnyan. 9T gii gaan niib n tie kasied nba, tin bann g Yendu kasied n cie l kul, k l maa u kun mɔni u Bija po. 10Yua nba dug Yendu Bija po mɔg l kasied u pal n ninŋ. Ama yua nba g dug Yendu po, u yi Yendu faaɔgdaan n nyan. K l maa u g tuo g gaal Yendu n kun mɔni nba u Bija po. 11L kasied n tie g Yendu tie’ti miɛl nba kan ban g gbenn. L miɛl n be u Bija n ninŋ. 12Yua nba tuo g gaal Yendu Bija, wano n mɔg l miɛl. Yua nba g tuo g gaal Yendu Bija mɔ, u g mɔg l miɛl. 13N diɛn’i l bona kul ne k yin fid g bann k i mɔg miɛl nba kan ban g gbenn i, yinm nba dug Yendu Bija sann po. 14Yal po te k t pala paa Yendu po n ne: t ban k t gii miɛl’o bonn nba dagd yen u buam, k u cenŋ’ti. 15Nyan tin ban k u cenŋ’ti youg nba k t miɛd’o nyan, tin biɛ gii ban k t gaal tin miɛl’o yal nba o. 16L gii tie g sua la k u ninja be biid n ninŋ, k l kan baal yen kuum, l tie k wan jaand u po i, Yendu bu te’og miɛl. Lann nyuan yab nba k b biid g baad yen kuum i. Ama biid be g baad yen kuum. N g maad k yin jaand l yaa biid po kaa. 17Bontitied nba kul g ŋan tie biid i. Ama bisiɛd be g g baad yen kuum. 18T ban g Yendu n mal yua nba kul ji g tie biid, k l maa Yendu Bija guu’ug, g Bonbiildaan kan fid g tien’o baa siɛl. 19T ban k t tie Yendu yab, g biɛ ban g ŋanduna munn kul be Bonbiildaan nui n i. 20T biɛ ban g Yendu Bija baal g tie’ti yanfuom k tin bann mamɔni Yendu i. Tin gaal Yiesu Kristo po n te k t be yen mamɔni Yendu. Wano n tie mamɔni Yendu, g biɛ tie miɛl nba kan ban g gbenn. 21N bid, suol man i kua yen niib n mali g yal tie Yendu k l yen g tie.

http://www.bible.is/MF1WBT/1John/1/D

Nenhum comentário:

Postar um comentário