quinta-feira, 8 de outubro de 2015

1 JOHN: NAGA, INPUI


1 JOHN 11Thoutan bina am ngaaknu, anina ngaisu damnu, ani mikna mu damnu, ani mikna phaang damnu khatle ani kutna banaan su damnu ringnu Chongkaang lang bi 2khatle ringnu ga indao thang rwe khatle anina muluga sake pi rwe khatle Bapa le diga am bacham ngaaknu ani khou indao thang damnu khwa sei ringnu ga anina nani khou rin indao thangnuwe. 3Anina mu damnu khatle ngaisu damnu ga nani ani le badam lou bacham langna anina nani khou rin indao thangnuwe. Batak takka ani badam lou bachamnu heiya Pa le Basa Kapaisa Jisu Christa le badam lou bachamnuwe. 4Nani om karonu ga khopsanu to langna anina hei bing nga nani khou hiaknu rwe. 5Bakhouna ngaisu damnu cham nani khou rin indao thangnuwe, dinuba Rikrwang nga baannuwe khatle Bakhou zingnu khatchale maake. 6Anina Maan le diga badam lou bachamme diluga zingnu bi se ong nge dabe, ani chong karwaknuwe khatle bazenu ga to make. 7Atiyeda Maan baannu bi ongnu ga danga anina le baannu bi ga se ong nge dabe, ani khat le khat badam lou bacham rwe. Basa Kapaisa Jisu Christa om thi gana ani noh bing ding to bathiang thang rwe. 8Anina ani khou noh maake diga rinne dabe, ani raanto ani ding minamnuwe khatle ani khou bazenu ga maake. 9Anina ani noh rin swake dabe, Maan ani noh kok thang lang khatle ani om ririak se maknu bing bina ani ding to bathiang thang lang Maan balumsa lang khopnu khatle bazenuwe. 10Anina ani noh to make diga rinne dabe, Pukraangba ding chong karwaknu pi to rwe khatle Bachong ga ani khou maake.

1 JOHN 21Kasinnu asa rwan ga, nani nun noh to mak lang heiya eina nani khou hiaknuwe. Tudannu pakhatna noh towe dabe, Pa khou ani lang Hanthangnupa ririak senu Jisu Christa amme. 2Atiga Maanna ani noh bing lang pi pemnu rikhaang pote, haga ani noh langza make. Atiyeda talei ram mi bing om noh lang leye. 3Anina zathang bing ga zeiye dabe, hagana ani Bating theinuwe dinu anina theiye. 4Tudannu pakhatna “Ei Bating theiye” diluga zathang bing ga zei make dabe maan chong karwaknuwe khatle bakhou bazenu ga maake. 5Atiyeda tudannu Bachong zeinu, batak takka Rikrwang ding kriangnu bakhou ga khopsanu amme. Heiyana ani Bakhou ongme dinu theiye. 6Tudannu pakhatna maan Bakhou chat makka ongme diga rinnu gana, Maanna se ong ngaaknu danga maanna le se ding gaye. 7Aunao rwan ga, eina nani lang zathang kathan hiaknu make atiyeda nanina kama bina lousu damnu zathang lui gaye. Heiba zathang luiya nanina kama bina ngaisu damnu cham gaye. 8Atiyeda eina nani khou zathang kathan hiak late, balangbe haga Bakhou le nani khou le bazenuwe. Balangbe zingnu ga thou drwe khatle bataknu babaan ga baan ong rwe. 9Mi khatna maan baannu bi ongme diluga, bau banao ding batanne dabe atun tangga maan zingnu bi ong maang nge. 10Bau banao ding kriangnu maan ga baannu bi ongnuwe. Atibriakpina ket basui dingnu lang khatchale bakhou maake. 11Atiyeda bau banao ding batannu maan ga zingnu bi ong maang nge khatle zingnu bi se ongnuwe. Atiga maan inlam mang se ongnubo dinu thei make. Balangbe zingnu gana bamik pi cho rwe. 12Kasinnu naosen rwan ga, eina nani khou hiaknuwe, Balangbe Bameng lang chungna nani noh bing ga kok thang rwe. 13Pa rwan ga, eina nani khou hiaknuwe, Balangbe thoutan bina am ngaaknu Bating nanina thei rwe. Babwa rwan, nani khou eina hiaknuwe, Balangbe nanina sa maknu bating ngam rwe. Kasinnu naosen rwan ga, eina nani khou hiaknuwe, Balangbe nanina nani Pa ding thei rwe. 14Pa rwan ga, eina nani khou hiak trwe, Balangbe thoutan bina nanina Bating thei rwe. Babwa rwan ga, eina nani khou hiak trwe, Balangbe naniba nate, Rikrwang chong ga nani khou amme, Khatle sa maknu bating nanina ngam rwe. 15Talei ram ding khatle habei ga amnu pot bing ding kriang mako. Tudannuna talei ram ding kriang nge dabe bakhou Pa om kriang ga maake. 16Balangbe talei ram bi amnu pot bing pumna bathainu, mikna bathainu khatle ringnu kum om phun liannu ha bing ga Pa khouna make atiyeda ha bing ga talei ram omme. 17Talei ram khatle ha ding bathainu bing ga braan damlune atiyeda tudannu Rikrwang na baningnu to ongnu maan ga khwa sei ringlune. 18Kasinnu naosen rwan ga, heiya kakhamnu chakrin rwe. Christa ding munanu maan ga hungna rwe dinu nanina thei rwe. Atun le Christa ding munanu taswang khak hung ong rwe, hagana kakhamnu chakrin rwe dinu nanina theiye. 19Bani ga ani khouna se swak trwe atiyeda bani ga ani om mak ngaake. Balangbe bani ga ani om ngaake dabe bani ani le diga karung ngaak tingnuwe. Atiyeda bani pakhatchale ani om make dinu indao langna bani ani khouna se swak trwe. 20Atiyeda nani dingba Bathiangnu Maanna thao kanun thang rwe khatle nanina pot bing ding theiye. 21Nanina bazenu ding ga thei make diga eina heiya nani khou hiaknu make atiyeda nanina thei rwe khatle bazenu bi ga chong karwaknu maake diga hiaknuwe. 22Jisu ding Christa ye diga za maknu maan ga makka chong karwaknu tu ambo? Pa khatle Sa Kapaisa ding za maknu maan ga Christa ding munanuwe. 23Tudannu ngaakle Sa Kapaisa ding za maknu maan ga Pa ding le lou thang make. Atiyeda Sa Kapaisa ding zanu maan gana Pa ding le lousunuwe. 24Atibriakpina nanina kama bina lousu damnu ga nani khou chat makka am ong ding ngo. Atiga kama bina nanina ngaisu damnu ga nani khou amme dabe, nani le Sa Kapaisa khatle Pa khou chat makka onglune. 25Heiya Maanna ani khou karen thang ngaaknu khwa sei ringnu ga rwe. 26Nani ding minam lang karam ongnu nun lang bi eina hei bing nga nani khou hiaknuwe. 27Atiyeda nanina Bakhouna lousu damnu thao kanun thangnu ga nani khou chat makka amme. Atiga mi khatna nani ding bachu thang lat lang bathaang maak rwe. Atiyeda thao kanun thangnu lousu damnu bahak kana nani ding balang bing bi bachu thang rwe khatle heiya bazenuwe, chong karwak maknuwe khatle haga nani ding bachu thangnu danga nanina Bakhou ong lang nge. 28Atun kasinnu naosen rwan ga, Bating indao thangnu kaan bi anina balumsanu am lang khatle Maan hungnu kaan bi Bameithaan bi kazak mak lang Bakhou chat makka ong ngo. 29Maan ga ririak senuwe dinu nanina theiye dabe, bazenu chwan to ongnu maan ga Bakhouna ponnuwe dinu nani theiye.

1 JOHN 31Phaang ngo, ani ding Rikrwang sa rwan diga kou thangnu heiya Pa na ani ding intia lang kriang thangnubo. Atibriakpina talei ramna ani ding thei make, balangbe banina Bating thei mak ngaake. 2Kriangnu rwan ga, atun ani Rikrwang sa rwan to rwe. Atun ani pa-aam to dingbo dinu indao swak mak aang nge. Atiyeda anina theiye dinuba Bating indao thangnu kaan bi ani Maan danlune. Balangbe Bating Bahak anina phaangmulune. 3Bakhou heiba bachun amnu bingna Maanna bathiangnu danga baraantoza to bathiang nge. 4Tudannu ngaakle noh tonu maan ga chongtan thouto maknuwe. Noh dinuwa chongtan thou to maknu ding nge. 5Ani noh lou sat thang langna Bating indao thang damnuwe dinu nanina theiye. Bakhou noh dinu maake. 6Tudannu Bakhou ongnu maan ga noh to make. Tudannu noh tonu maan gabe Bating mu mak aang nge, thei le thei mak aang nge. 7Kasinnu naosen rwan ga, pakhatchanale nani ding minam mak ting ngo. Maan bazenu danga, ririak senu chwan tonu maan ga bazenuwe. 8Noh tonu maan ga Diabol khou naye, balangbe Diabol ga thoutan bina noh to rwe. Ha langna Diabol chwan bing ding Maanna to braan lang Rikrwang Sa Kapaisa ding indao thang rwe. 9Tudannu Rikrwang khouna ponnu maan ga noh to make. Balangbe bakhou Baom bamuga amme. Atiga maan Rikrwang khouna pon briakpina noh tonu ngam make. 10Heiyana bani Rikrwang sa rwan khatle Diabol sa rwanne dinu indaowe. Dinuba tudannu ririak senu chwan to maknu, baunao rwan ding kriang maknu maan ga Rikrwang khouna make. 11Balangbe thoutan bina nanina ngaisu damnu sacham ga heiye, hagazo nani khat le khat kriang kale ding gaye dinu heiya rwe. 12Sa maknu pa om toga banao ding athat tamnu Cain danla ding gaye. Pa-aam langna banao ding athat tamnubo? Balangbe bachwan bing ga sa mak ngaake khatle banao om chwan bingbe ririak senu chwan ngaake. 13Aunao rwan ga, talei ramna nani ding batanne dabe nani loh lo mako. 14Aniba thinu bina ringnu bi takan swak rwe dinu anina theiye. Balangbe anina ani unao rwan ding kriang nge. Tudannu baunao ding kriang maknu maan ga thinu bi ong maang nge. 15Tudannu baunao ding kriang maknu maan ga mi athatnuwe khatle tudannu mi athatnu bakhou ga khwa sei ringnu maake dinu nanina theiye. 16Heiyana kriangnu dinuwa anina bapu theiye dinuba Maanna ani lang Bakum pi swak thang rwe, atiga anina le ani unao rwan langna ani kum pi swak tingnu rwe. 17Atiyeda tudannuna talei ram om tonu pot amluga, baunao lang bathaang amnu ding muluga bakhou kriangnu lungning maake dabe, bakhou Rikrwang om kriang ga tatoga am dingbo? 18Kasinnu asa rwan ga, ani chongkaang mak tabe baleina kriangnu to makcho atiyeda chwan le bazenu gana kriangzo. 19Heiba paanbina ani nun bazenu khou naye khatle hagana Bameithaan bi ani sung pi tip thanglune dinuwa anina theiye. 20Balangbe ani sungna ani ding pi koi ngaake dabe, Rikrwang ba ani ma lian inkunuwe khatle Maanna pum brumza theiloiye. 21Kriangnu nun ga, ani sungna ani ding pi koi mak tabe, Rikrwang meithaan bi ani balumsanu amme. 22Anina ninu bing ga Bakhouna lousu rwe, balangbe anina Baom zathang bing ga zeiye khatle anina Bamikphaang bi pi pemnu chwan bing ga towe. 23Heiya Baom zathang gaye dinuba anina Basa Kapaisa Jisu Christa meng bi balumsa ding gaye khatle Maanna ani khou zathang pi thangnu danga ani khat le khat kriang kale ding gaye. 24Tudannu zathang zeinu maan ga Bakhou ongnuwe khatle Maanna le bakhou ongnuwe. Heiyana Maan ani khou ong ongme dinu anina theiye. Haga Maanna ani lang pi thangnu Katha paan bi naye.

1 JOHN 41Kriangnu nun ga, katha bing ding balumsa mako. Atiyeda katha bing ga Rikrwang khounamo dinu tamphaang ngo. Balangbe kakoinu thiamting tamga talei ram bi se swak trwe. 2Heiyana nanina Rikrwang om Katha ding theiye dinuba, Jisu Christa misa pum toga hung rwe dinu ding rin indaonu katha bing ga Rikrwang khou naye. 3Christa ga misa pum toga hung rwe dinu ding rin indao maknu katha bing ga Rikrwang khouna make. Haga Christa ding munanu gaye. Haga hunglune diga nanina ngaisu damnu ga atun talei ram bi hung rwe. 4Kasinnu naosen rwan ga, naniba Rikrwang khou naye khatle nanina bani ding ngam rwe. Balangbe nani khou am ongnu Maan gana talei ram bi am ongnu bama lian inkuwe. 5Bani ga talei ram omme atibriakpina banina talei ram om chong kabiaye khatle talei ramna bani chong ngaiye. 6Aniba Rikrwang om zung nge, Rikrwang ding theinu maan gana ani chong ding ngaiye. Rikrwang om maknu gana ani chong ngai thang make. Heiyana anina bazenu katha khatle kakoinu katha ding bapu theiye. 7Kriangnu nun ga, ani khat le khat kriang kalezo, balangbe kriangnuwa Rikrwang khou naye. Kriang theinu maan ga Rikrwang khouna ponnuwe khatle maanna Rikrwang ding theiye. 8Tudannu kriang thei maknu maan gana Rikrwang ding thei make, balangbe Rikrwang Maan ga kriangnuwe. 9Heiyana Rikrwang om kriang ga ani khou indao thang rwe dinuba, Bapaan bina ani ring dam lang Rikrwang na Khat tak Khatchanu Basa Kapaisa ding talei ram bi lang hung thang rwe. 10Kriangnu dinuwa abeiya amme, anina Rikrwang ding kriang rwe dinu make. Atiyeda Maanna ani ding kriang briakpina, Basa Kapaisa ding ani noh bing langna pi pemnu rikhaang pot to lang lang hung thang rwe dinuwe. 11Kriangnu nun ga, Rikrwang na ani ding atiga kriang thang nge dabe, ani le khatna khat ting kriang kale dingnu rwe. 12Pakhatchanale Rikrwang ding impha ni beida mu mak aang nge. Atiyeda anina khat le khat kriang kaleye dabe, Rikrwang na ani khou ong thang nge khatle Bakriang ga ani khou khopsanu to rwe. 13Heiyana ani Bakhou ong ongme, Maanna le ani khou ong ongme dinu anina theiye. Balangbe Maanna ani khou Bakatha pi thang rwe. 14Pa na Sa Kapaisa ding talei ram ding Kanthangnupa toga lang hungnu ding anina mu rwe khatle sake pi rwe. 15Tudannuna Jisu wa Rikrwang Sa Kapaisa ye diga rin swaknu bakhou ga Rikrwang na ong thang nge khatle maan le Rikrwang khou ongnuwe. 16Rikrwang na ani ding kriang thangnu ga anina thei rwe khatle balumsa rwe. Rikrwang nga kriangnu gaye, kriangnu bi ongnu maan ga Rikrwang khou ongnuwe khatle Rikrwang na le bakhou ong ongme. 17Atiga chongsem ni ga ani nun dai bazaangnu am lang Bakriang ga ani khou khopsaga pi thang rwe. Balangbe Maan bahak am ongnu danga ani nun le talei ram bi am ongme. 18Kriangnu bi kachinu maake. Atiyeda khopsanu kriang gana kachinu ding bathou sate. Balangbe kachinu bi ga rainu amme. Atiga kachinu maan ga kriangnu bi khopsa make. 19Anina Bating kriang nge balangbe Maanna ani ding kriang kama ngaak rwe. 20Mi khatna, “Ei Rikrwang ding kriang nge” diga rinluga, bau banao ding batannu maan ga chong karwaknu miye. Balangbe maanna mikna munu bau banao ding kriang make dabe, tatoga mu maknu Rikrwang ding kriangnu ngam dingbo? 21Bakhouna lousunu zathang ga heiye, hagazo tu ngaakle Rikrwang ding kriangnu maan gana bau banao ding le kriang ding gaye. 


1 JOHN 51Tudannu Jisu wa Christa ye diga balumsanu maan ga Rikrwang khouna ponnuwe. Tudannu Bapa ding kriangnu maan gana Maanna pon thangnu Bating le kriang nge. 2Anina Rikrwang ding kriang ga Baom zathang bing zeiga ongnu heiyana anina Rikrwang sa rwan ding kriang nge dinu theiye. 3Balangbe anina Baom zathang bing zeinuwa Rikrwang ding kriangnuwe. Baom zathang bing ga potrit make. 4Balangbe Rikrwang khouna ponnu bing gana talei ram ding kraan ngam rwe. Talei ram ding kraan ngamnu kraan ngam ga heiye, hagazo ani om balumsat heiye. 5Jisu ding Rikrwang Sa Kapaisa ye diga balumsanu maan ga makka talei ram ding kraan ngamnu maan ga tubo? 6Tui le thi paan bina hung ngaaknu Maan ga Jisu Christa ye. Maan tui paan zana makka, tui le thi paan bina hung rwe. Haga Katha na sake to rwe. Balangbe Katha ga bazenuwe. 7Balangbe tambaan la sake tonu pat thum amme hagazo Pa, Chongkaang khatle Katha Bathiangnu gaye. Hei inthumma khatcha zwe. 8Talei ram bi le sake pinu pat thum amme, hagazo Katha, tui khatle thiye, bani pat thum khatcha toga zakaleye. 9Anina mi nun om sake lousuwe dabe Rikrwang om sake gana lian inkuwe. Balangbe Rikrwang om sake ga heiye dinuba, Maanna Basa Kapaisa om lang bi sake pi rwe. 10Tudannu Rikrwang Sa Kapaisa ding balumsanu bakhou ga sake amme. Tudannu Bating balumsa maknu maan gana Bating chong karwaknu pi to rwe. Balangbe Basa Kapaisa lang bi Rikrwang na sake pinu ding ga maanna balumsa make. 11Atiga sake ga heiye, Rikrwang na ani lang ringzoknu kum pi thang rwe khatle ringnu ga Basa Kapaisa khou amme. 12Basa Kapaisa ding lousunu maan ga ringnu lousu rwe. Atiga tudannu Rikrwang Sa Kapaisa ding lousu maknu bakhou ga ringnu ga maake. 13Nani khou khwa sei ringnu ga am rwe dinu thei lang khatle Rikrwang Sa Kapaisa meng bi balumsanu bi nani ong dam lang Rikrwang Sa Kapaisa meng bi balumsanu nani khou eina hei bing nga hiaknuwe. 14Bakhou anina balumsanu gazo heiya rwe, dinuba Maanna baningnu nung suiga anina pa-aam ngaakle niye dabe Maanna ani lang katak thang nge. 15Anina ninu bing ga Maanna katak thang nge diga anina theiye dabe, anina Bakhou ninu bing ga lousu rwe dinu anina theiye. 16Tudannuna banao khatna thi lang khop maknu noh tonu muwe dabe, maanna hweini thang ding gaye. Atiga thi lang khop maknu noh tonu mi nun lang Maanna ringnu ga pi thanglune. Pi thinu noh amme, hei lang bi maan hweini thang ding gaye diga eina rinnnu make. 17Ririak se maknu chwan bing ga nohwe khatle thi lang khop maknu noh amme. 18Tudannu Rikrwang khouna ponnu bing gana noh to make dinu anina theiye. Atiyeda Rikrwang khouna ponnu maan gana bazan ding raak theiye. Atiga kasianu gana bating banaan make. 19Aniba Rikrwang khou naye khatle talei ram bing nga sa maknupa thwei bi ong rwe dinu anina theiye. 20Rikrwang Sa Kapaisa ga hung rwe dinu anina theiye atiga Bazenu Bating anina thei lang ani khou bakaba theinu pi thang rwe. Basa Kapaisa Jisu Christa Bazenu Bakhou ani ong rwe. Heiya bazenu Rikrwang khatle khwa sei ringnu kum ga rwe. 21Kasinnu naosen rwan ga, nani ri katha khouna impaan ga ong ngo. Amen.

http://www.bible.is/NKFBIV/1John/1/D

Nenhum comentário:

Postar um comentário