sexta-feira, 9 de outubro de 2015

1 JUAN: NAHUATL HUASTECA, EASTERN


1 JUAN 11Timechtlajcuilhuil'iaj tlen Jesucristo, yajaya tlen ipa itztoya ipejya nochi tlen onca. Timechilhuise tlen tijcactoque quema yajaya techcamahui huan tlen tiquitztoque ica toixtiyol. Quena, tijtlachilijtoque Jesucristo huan ticajsique ica toma. Yajaya quitocaxt'iaj nopa "Tlajtoli" tlen temaca yolistli. 2Quema yajaya hualajqui, technextili nopa yolistli, huan tiquitaque. Huajca ama timechpohuilise tlen Jesucristo tlen quipiya yolistli para nochipa ipan ya para temacas. Achtohui yajaya itztoya nepa ihuaya Totata huan teipa hualajqui nica campa tojuanti. 3Huajca timechilhuise tlen tiquitztoque huan tlen tijcactoque para imojuanti huan tojuanti huelis tijpiyase paquilistli se ica seyoc ipan Toteco. Huan para nochi san sejco hueli timohuampochihuase ica Toteco Totata huan Icone Jesucristo. 4Ama nimechtlajcuilhuil'ia ni tlamantli nica para san sejco ma tijpiyaca se hueyi paquilistli. 5Huan ya ni nopa tlajtoli tlen Jesucristo techmachti huan ya nopa timechilhu'iaj ama. Toteco Dios yajaya tlahuili, yajaya senquistoc cuali. Ax onca tzintlayohuilotl o tlen ax cuali ipan ya. 6Intla tiquijtohuaj timohuampochijtoque ica Toteco Dios huan noja tinejnemij ipan tzintlayohuilotl, tiistlacatij huan ax tijchihuaj tlen melahuac. 7Pero intla tinemij ipan tlahuili huan tijchihuaj tlen cuali pampa Toteco tlen itztoc tlahuili nemi tohuaya, huajca tijpiyase paquilistli se ica seyoc, huan ieso Jesucristo, Icone Toteco, techyolpajpactinemis tlen nochi tlajtlacoli. 8Intla tiquijtohuaj ax tijpiyaj tlajtlacoli, huajca timocajcayahuaj ica toseltitzi huan ax tijnequij tiquijtose tlen melahuac. 9Pero intla tiquilhuise Toteco totlajtlacolhua tlen tijchijtoque, huajca yajaya temachtli huan quichihua san tlen xitlahuac, huan techtlapojpolhuis totlajtlacolhua huan techyolpajpacas ica nochi tlen ax cuali tijchijtoque. 10Pero intla tiquijtohuaj ax titlajtlacolchijtoque, huajca tijtocaxt'iaj Toteco se istlacatiquetl huan ax tijpiyaj itlajtol ipan toyolo pampa Toteco ya quiijtojtoc tijpiyaj tlajtlacoli.

1 JUAN 21Noconehua tlen nimechicnel'ia, nimechtlajcuilhuil'ia nochi ni tlamantli para amo xitlajtlacolchihuaca. Pero intla se acajya tlajtlacolchihuas, tijpiyaj se totlatempalehuijca tlen itztoc iixtla Toteco Totata. Totlatempalehuijca yajaya Jesucristo tlen quichihua san tlen senquistoc cuali. 2Quema Jesucristo mijqui ipan cuamapeli, yajaya elqui nopa tlacajcahualistli tlen tlaxtlajqui ipampa totlajtlacolhua. Huan ax mijqui san topampa tojuanti totlajtlacolhua. Nojquiya mijqui ipampa inintlajtlacolhua nochi tlacame ipan tlaltepactli. 3Huan tijmatij temachtli tiquixmatij Jesucristo, intla tijchihuaj tlen Toteco technahuat'ia. 4Pero intla se quiijtohua quiixmati Toteco huan ax quichihua tlen Toteco technahuat'ia, yajaya se istlacatiquetl huan ax quinequi quiijtos tlen melahuac. 5Pero ajqueya quichihua tlen itlajtol quiijtohua, quiicnel'ia Toteco ica se teicnelijcayotl tlen senquistoc cuali. Huan intla queja nopa titeicnel'iaj huan tijchihuaj tlen technahuat'ia, huajca tijmatij tiitztoque ipan Toteco. 6Huan intla tiquijtohuaj tiitztoque san se ihuaya Jesucristo, monequi tinejnemise cuali queja yaja nejnenqui. 7Noicnihua, ni tlen nimechtlajcuilhuil'ia ax eli se tlanahuatili tlen yancuic. Ni tlanahuatili para ximoicnelica eltoc tlen Toteco ipa inmechnahuati hasta ipejya quema achtohui inquineltocaque Cristo. Huajca ya inquicactoque. 8Pero eltoc queja nimechtlajcuilhu'ia ica se yancuic tlanahuatili. Huan nel'ia monexti ipan iyolis Cristo para quitoquili ni tlanahuatili queja nojquiya nesi para imojuanti inquitoquilijque. Huan yeca eltoc queja ama panotij tzintlayohuilotl campa hueli huan ya tlahu'ia se tlahuili tlen quinext'ia tlen melahuac. 9Intla se tlacatl quiijtohua nemi ipan tlahuili huan quichihua tlen cuali, pero noja quicocol'ia iicni ipan Cristo, huajca ax melahuac tlen quiijtohua. Pampa nopa tlacatl noja nejnemi ipan tzintlayohuilotl huan quichihua tlen ax cuali. 10Pero se tlen quinicnel'ia sequinoc iicnihua ipan Cristo, nejnemi ipan tlahuili huan ax huetzis ipan tlajtlacoli. 11Pero se tlen quicocol'ia seyoc iicni ipan Cristo, itztoc queja se tlen nentinemi ipan tzintlayohuilotl, niyon ax quimati campa yohui pampa tlen ax cuali quitzacuilijtoc itlalnamiquilis. 12Noconehua tlen nimechicnel'ia, nimechtlajcuilhuil'ia ni amatlajcuiloli pampa Toteco ya inmechtlapojpolhuijtoc imotlajtlacolhua ipampa tlen Jesucristo quichijqui. 13Imojuanti intetatme, nimechtlajcuilhuil'ia ni amatlajcuiloli pampa ya inquiixmatij Jesucristo tlen ipa itztoc tlen ipejya nochi tlen onca. Telpocame, nimechtlajcuilhu'ia ni amatlajcuiloli pampa ya inquitlantoque Axcualtlacatl. Noconehua, nimechtlajcuilhuijtoc pampa inquiixmatij Toteco Totata. 14Tetatme, nimechtlajcuilhuijtoc pampa ya inquiixmajtoque yajaya tlen ipa itztoc hasta quema ipejya nochi tlen onca. Telpocame, nimechtlajcuilhuijtoc pampa intetique. Itlajtol Toteco mocahua ipan imoyolo huan ya inquitlantoque Axcualtlacatl. 15Ayoc xiquicnelica tlen tlacame ipan ni tlaltepactli quiicnel'iaj, niyon amo xiquicnelica nopa tlamantli tlen eltoc ipan ni tlaltepactli. Intla se tlacatl quiicnel'ia tlamantli tlen ni tlaltepactli, huajca ax neli quiicnel'ia Toteco Totata. 16Pampa nochi tlamantli tlen onca ipan ni tlaltepactli technotza ma tijchihuaca san tlen totlajtlacolchijca nacayo quinequi quichihuas. Techyoltilana ma tijnequica timoaxcatise nochi tlen tiquitaj, huan techchihuil'ia ma timohueyimatica ica tlen tijpiyaj ipan tonemilis nica. Pero ni tlamantli ax huala tlen Toteco Dios, ya ni huala tlen tlacame ipan ni tlaltepactli tlen ax quiicnel'iaj Toteco. 17Pero panoti ni tlaltepactli huan nochi tlen itztoque ipani, huan nochi nopa tlamantli tlen yajuanti quinequij. Pero ajqueya quichihua tlen Toteco quinequi, itztos para nochipa. 18Noconehua tlen nimechicnel'ia, ya tiitztoque ipan itlamiya tonali. Huan ya inquicactoque para hualas yajaya tlen quitocaxt'iaj Icualancaitaca Cristo, huan ama nel'ia ya monextijtoque miyac icualancaitacahua. Huan ya nopa techmachilt'ia para ya monechcahu'ia nopa itlamiya tonali ipan ni tlaltepactli. 19Ni tlacame tlen quicocol'iaj Jesucristo quisque tlen tojuanti tlen tijneltocaj, pero nel'ia ax quema quineltocaque queja tojuanti. Intla itztosqu'iaj tohuaya ipan Cristo, huajca mocajtosqu'iaj tohuaya, pero quisque para ma nesi nochi tlen mosentil'iaj tohuaya ax san se ica tojuanti. 20Pero imojuanti, ax initztoque queja yajuanti, pampa Toteco inmechmacatoc Itonal huan inquimatij nochi tlen melahuac. 21Huajca ax nimechtlajcuilhu'ia ya ni pampa ax inquimatij tlen melahuac. Nimechtlajcuilhuil'ia pampa inquimatij, huan ax onca niyon se istlacaticayotl ipan tlen melahuac. 22Nochi tojuanti tijmatij ajqueya istlacati. Istlacatij tlen quiijtohuaj Jes'us ax ya nopa Cristo tlen Toteco techilhui techtitlanilisqu'ia. Tlen queja nopa quiijtohuaj nel'ia icualancaitacahua Cristo huan ax quiixmatij Toteco Dios, niyon ax quiixmatij Icone. 23Intla se tlacatl quiijtohua ax quiixmati Icone Toteco, huajca nojquiya ax quiixmati iTata. Pero intla se acajya tlayolmelahua para quineltoca para Jesucristo nel'ia itztoc Icone Toteco, huajca nopa tlacatl nojquiya quiixmati Toteco Dios. 24Huajca xijcahuilica ma mocahua ipan imoyolo nopa tlajtoli tlen inquicactoque hasta quema achtohuiya inquineltocaque Cristo. Huan intla nopa tlajtoli mocahua ipan imoyolo, inmocahuase ihuaya Icone Toteco huan nojquiya ihuaya Toteco Totata. 25Huan ya ni tlen Jesucristo techtencahuilijtoc; techilhuijtoc techmacas yolistli yancuic tlen ax quema tlamis. 26Nimechtlajcuilhuijtoc pampa nijnequi xijmatica para nemij tlacame tlen quinequij inmechcajcayahuase. 27Pero Toteco inmechmacatoc imojuanti Itonal, huan Itonal mocahua ipan imoyolo huan ax monequi seyoc inmechmachtis pampa Itonal Toteco iselti inmechmacht'ia nochi tlamantli. Huan tlen yajaya inmechmacht'ia ya nopa nel'ia melahuac. Ax se istlacaticayotl. Huan monequi xijchihuaca queja yajaya inmechmachtijtoc, huan ximocahuaca inmotlatzquilijtoque ipan Jesucristo. 28Huajca ama noconehua, ximocahuaca inmotlatzquilijtoque ipan Cristo para huelis inquipiyase temachili huan ax inpinahuase quema yajaya hualas. 29Inquimatij Jesucristo yajaya senquistoc cuali, huan nochi tlen quichijtinemij tlen cuali itztoque iconehua.

1 JUAN 31Ximomacaca cuenta quesqui techicnel'ia Toteco Totata pampa technotztoc tiiconehua. Huan yeca miyac ax cuajcualme ax techixmatij pampa ax quiixmatque ya. 2Huajca noicnihua tlen nimechicnel'ia, ama ya tiitztoque tiiconehua Toteco, huan aya technextilijtoc quejatza tiitztose teipa. Pero tijmatij quema Jesucristo sampa hualas, tielise queja yajaya pampa tiquitase quejatza yajaya itztoc. 3Huan nochi tojuanti tlen timochiyaj para tielise queja Jesucristo timoiyocacahuaj tlen nopa tlen ax cuali ama, para ma tiitztoca senquistoc cuali queja Cristo itztoc senquistoc cuali. 4Quema se tlacatl tlajtlacolchihua, quiixpano se itlanahuatil Toteco, pampa tlajtlacoli eli quema se quiixpano se tlanahuatili. 5Huan inquimatij Cristo hualajqui ipan tlaltepactli para techquixtilis totlajtlacolhua, huan yajaya ax quipixqui niyon se tlajtlacoli. 6Huajca axaca tlen mocahua tlatzquijtoc ipan Jesucristo noja tlajtlacolchijtinemi. Tlacame tlen tlajtlacolchijtinemij ax quimachil'iaj ajqueya Jesucristo huan ax quiixmatij. 7Noconehua tlen nimechicnel'ia, axaca ma inmechcajcayahua ica ya ni. Se tlacatl tlen quichijtinemi tlen xitlahuac, yajaya itztoc xitlahuac queja Cristo itztoc xitlahuac. 8Pero se tlacatl tlen tlajtlacolchijtinemi, yajaya iaxca Axcualtlacatl, pampa Axcualtlacatl tlajtlacolchijtinentoc hasta quema pejqui tlaltepactli. Huajca yeca hualajqui Icone Toteco ipan ni tlaltepactli para quixolehuas itequi Axcualtlacatl. 9Ajqueya tlacajtoc ipan Toteco huan Toteco quichijtoc icone ax tlajtlacolchijtinemi, pampa iixcopinca iTata, yajaya Toteco Dios, mocahua ipan ya. Huan ax hueli noja tlajtlacolchijtinemis pampa yajaya icone Toteco. 10Huajca huelis tiquinitase ajqueya yajuanti iconehua Toteco huan ajqueya yajuanti iconehua Axcualtlacatl. Yajaya tlen ax quichihua tlen cuali huan ax quinicnel'ia iicnihua ipan Cristo, yajaya ax iaxca Toteco. 11Huan ya ni nopa tlajtoli tlen inquicactoque hasta quema achtohui inquineltocaque Cristo: monequi timoicnelise se ica seyoc. 12Ma ax tijchihuaca queja Ca'in tlen eltoya iaxca Axcualtlacatl huan quimicti iicni, Abel. Huan ¿para tlen quimicti iicni? Ca'in quimicti pampa quichihuayaya tlen fiero huan iicni quichihuayaya tlen xitlahuac. 13Huajca noicnihua, ax tleno ximoilhuica intla ax cuajcualme ipan ni tlaltepactli inmechcocol'iaj. 14Tojuanti tiquinicnel'iaj toicnihua, huan yeca tijmatij ya tipanquisque ipan toojhui tlen achtohui campa nochi mictoque. Ama tinemij ipan seyoc ojtli campa tijpiyaj yolistli tlen yancuic. Yajaya tlen ax quiicnel'ia iicni ipan Cristo noja mictoc iixtla Toteco. 15Ajqueya quicocol'ia iicni ipan Cristo itztoc queja se temictijquetl. Huan inquimatij se temictijquetl ax quipiya yolistli tlen yancuic para nochipa ipan ya. 16Tijmatij tlen quichihua se tlen nel'ia quiicnel'ia seyoc, pampa Cristo motemactili huan mijqui topampa tojuanti. Huan huajca tojuanti nojquiya, monequi timotemactilise ipampa toicnihua. 17Pero intla titlapijpiya miyac ipan ni tlaltepactli, huan tiquitas se moicni tlen quipolohua tlen ica panos, huan san timoyoltetilis huan ax tijpalehuis, huajca ax hueli tiquijtos tiquicnel'ia moicni. 18Noconehua tlen nimechicnel'ia, ma ax san tiquijtose tiquinicnel'iaj toicnihua, pero monequi ma tijnextica para melahuac tiquinicnel'iaj ica tlen cuali tiquinchihuil'iaj. 19Intla tiquinicnel'iaj sequinoc huan tiquinpalehu'iaj, tijnext'iaj para melahuac tiiaxcahua Toteco. Huan queja nopa hueli tijpiyase temachili ipan toyolo quema timoquetzaj iixtla Toteco, 20yonque toyolo quemantzi techteilhu'ia para ax tijchijtoque senquistoc nochi tlen tihueltosqu'iaj. Pero nopa tlen Toteco quiijtohua tlen tojuanti ipati m'as tlen nopa tlen toyolo techilhu'ia, pampa yajaya quimati nochi tlen onca. Huan quimati titeicnel'iaj huan titepalehuijtoque. 21Huan noicnihua tlen nimechicnel'ia, intla toyolo ax techteilhu'ia, huajca quena, noja m'as hueli tijpiyase temachili quema tijnechcahu'ia Toteco. 22Huan Toteco techmacas nochi tlen tijtlajtlanise pampa tiquinneltocaj itlanahuatilhua huan tijchihuaj nopa tlamantli tlen quipact'ia. 23Huan ya ni itlanahuatil: Monequi ma tijneltocaca itoca Icone, Jesucristo, huan para yajaya eltoc tlen quipiya tequihuejcayotl. Huan monequi ma timoicnelica se ica seyoc queja technahuatijtoc. 24Tlacame tlen quichihuaj tlen Toteco technahuat'ia mocahuaj tlatzquijtoque ipan Toteco huan Toteco itztoc ipan yajuanti. Huan tijmatij Toteco mocahua ipan tojuanti pampa tijpiyaj Itonal tlen yajaya techmacatoc.

1 JUAN 41Noicnihua tlen nimechicnel'ia. Amo xiquinneltocaca nochi tlacame san pampa quiijtohuaj quipiyaj Itonal Toteco huan yajaya quinmacatoc inintlamachtil. Monequi xiquinyejyecoca tlen quiijtohuaj ica Itlajtol Toteco para inquiitase intla melahuac nopa tonaltzi tlen quipiyaj huala tlen Toteco, o axtle. Pampa miyac tlacajcayahuani nemij campa hueli, huan quiijtohuaj para itiocamanalojcahua Toteco, pero san istlacatij. 2Nimechilhuis quejatza inquimatise catl'ia quipiya Itonal Toteco huan catl'ia axtle. Nochi tlacame tlen quiijtohuaj para Jes'us yajaya nopa Cristo tlen Toteco techilhui techtitlanilisqu'ia ica itlacayo tlen tlacatl, huajca yajuanti quipiyaj Itonal Toteco. 3Huan nochi tlacame tlen quiijtohuaj Jes'us ax yajaya Cristo tlen mocuepqui tlacatl, ax neli quipiyaj Itonal Toteco. Nopa tlacame ax hualahuij tlen Toteco. Yajuanti quipiyaj se iajacayo Icualancaitaca Cristo tlen ya inquicactoque ajsis ipan tlaltepactli huan nel'ia ya ajsico. 4Noconehua tlen nimechicnel'ia, imojuanti iniaxcahua Toteco huan ya inquitlantoque nopa tlatehuilistli ica nopa istlacatica tiocamanalohuani pampa Itonal Toteco tlen mocahua ipan imojuanti quipiya m'as chicahualistli que Axcualtlacatl tlen itztoc ipan tlacame tlen iaxcahua ni tlaltepactli. 5Nopa istlacatica tiocamanalohuani itztoque iaxcahua ni tlaltepactli. Huajca yajuanti camatij queja ax cuajcualme tlen ni tlaltepactli, huan ax cuajcualme tlen ni tlaltepactli quintlacaquil'iaj. 6Pero tojuanti tiiaxcahua Toteco, huan nochi tlen quiixmatij Toteco Dios quitlacaquil'iaj tlen tiquijtohuaj. Pero yajuanti tlen ax iaxcahua Toteco, ax quinequij techtlacaquilise. Huajca queja nopa huelis tijmatise ajqueya quipiya Itonal Toteco tlen melahuac, huan ajqueya quinpiya ajacame tlen istlacatij. 7Nohuampoyohua tlen nimechicnel'ia, ma timoicnelijtinemica se ica seyoc pampa teicnelijcayotl huala tlen Toteco. Huan nochi tlen nel'ia teicnel'iaj, yajuanti iconehua Toteco huan quiixmatij Toteco. 8Aqui ax teicnel'ia ax quiixmati Toteco, pampa Toteco, yajaya teicnelijcayotl. 9Toteco technextili hasta canque techicnel'ia pampa techtitlanili Icone iyojtzi para ma huala ipan ni tlaltepactli para ma tijpiyaca yolistli yancuic ipampa ya. 10Ya ni technextilijtoc se teicnelijcayotl tlen melahuac. Ax tojuanti tiquicnelijque Toteco huan yeca Cristo hualajqui. Elqui Toteco Dios techicneli huan yeca techtitlanili Icone para yajaya elis nopa tlacajcahualistli tlen tlaxtlahuas ipampa totlajtlacolhua. 11Nohuampoyohua tlen nimechicnel'ia, intla Toteco techicnelijtoc queja nopa, huajca monequi ma timoicnelica. 12Niyon se tlacatl ax quema quiitztoc Toteco Dios, pero intla timoicnel'iaj, huajca Toteco mocahuas ipan tojuanti huan mojmostla iteicnelijcayo monextis ipan tojuanti ica tlen cuali tijchihuaj. 13Tijmatij para melahuac timocahuaj ipan Toteco huan yajaya mocahua ipan tojuanti pampa yajaya techmacatoc Itonal. 14Huan tiquitztoque Icone Toteco huan timechyolmelahuaj para melahuac Toteco Dios quititlanqui Icone para ma elis inintemaquixtijca nochi tlen itztoque ipan ni tlaltepactli. 15Huan yajaya tlen quineltoca huan quinyolmelahua tlacame para Jes'us nel'ia Icone Toteco, Toteco mocahua ipan ya huan ya mocahua ipan Toteco. 16Tojuanti ya tiquitztoque queja Toteco techicnel'ia huan ipan iteicnelijcayo tojuanti timotemachijtoque. Toteco yajaya teicnelijcayotl. Huan ajqueya mojmostla teicnel'ia mocahua motlatzquilijtoc ipan Toteco huan Toteco mocahua ipan ya. 17Huan quema timocahuaj timotlatzquilijtoque ipan Toteco, nopa teicnelijcayotl quipiya itlajca para tojuanti pampa techmacas temachili iixtla ipan nopa tonal quema Toteco techtequitlachilis. Tijpiyase nopa temachili nopa tonal pampa ipan tlaltepactli tiitztoyaj queja Jes'us. 18Ax monequi tiquimacasise yajaya tlen tlahuel techicnel'ia, pampa iteicnelilis quitlamilt'ia nochi majmajtli. Intla tojuanti timajmahuij, tiquimacasij se tlatzacuiltili huan ya nopa quinext'ia para aya senquistoc cuali moscaltijtoc iteicnelilis Toteco ipan tojuanti. 19Tojuanti tiquicnel'iaj Toteco, pampa yajaya achtohui techicneli. 20Intla se tlacatl quiijtohua: "Niquicnel'ia Toteco", pero yajaya quicocol'ia se iicni, huajca yajaya se istlacatiquetl. Pampa aqui ax quiicnel'ia se iicni tlen quiitztoc, ax huelis quiicnelis Toteco tlen ax quiitztoc. 21Huan Toteco techmacatoc ni tlanahuatili: Yajaya tlen nel'ia quiicnel'ia Toteco, monequi nojquiya ma quinicneli iicnihua.

1 JUAN 51Nochi tlen quineltocaj para Jes'us itztoc nopa Cristo tlen Toteco techilhui techtitlanilisqu'ia, yajuanti itztoque iconehua Toteco. Huan nochi tlen quiicnel'iaj Toteco Dios, nojquiya quinicnel'iaj nopa sequinoc tlen Toteco quinchijtoc iconehua. 2Huan tijmatij tiquinicnel'iaj iconehua Toteco quema tiquicnel'iaj Toteco huan tijtoquil'iaj tlen yajaya technahuatijtoc. 3Huajca para tiquicnel'iaj Toteco quinequi quiijtos tiquintoquil'iaj itlanahuatilhua, huan itlanahuatilhua ax ohui. 4Huan nochi iconehua Toteco quitlanij tlen ax cuali ipan ni tlaltepactli quema motemach'iaj ipan Toteco para quinpalehuis ma tlatlanica. 5¿Ajqueya yajuanti nopa tlacame tlen quitlanij tlen ax cuali ipan ni tlaltepactli? Quitlanij yajuanti tlen quineltocaj para Jes'us itztoc Icone Toteco. 6Huan nesqui para Jesucristo eltoc nel'ia Icone Toteco quema mocuaalti huan quema quitoyajqui ieso huan mijqui. Jesucristo ax san mocuaalti, pero mocuaalti, huan quitoyajqui ieso huan mijqui. Huan Itonal Toteco nojquiya teyolmelahua para ya ni tlen melahuac. 7Pampa itztoque eyi tlen teyolmelahuaj tlen melahuac nepa elhuicac. Itztoc Toteco Totata, itztoc Icone tlen itoca nopa "Tlajtoli" pampa tenextil'ia Totata, huan itztoc Itonal Toteco. Huan ni eyi elij san setzi. 8Huan onca eyi tlamantli ipan ni tlaltepactli tlen techilhu'ia para melahuac Jesucristo yajaya icone Toteco. Achtohui Itonal Toteco techilhu'ia ipan toyolo para melahuac. Ica ompa tijcajque quema Toteco Dios tlayolmelajqui para yajaya Icone quema Jes'us mocuaalti, huan ica expa nojquiya nempa nesqui para itztoya Icone quema quitoyajqui ieso huan mijqui. Huan nochi ni eyi tlamantli san se technextil'ia para Jesucristo yajaya Icone Toteco. 9Intla se tlacatl teyolmelahua tlen nel'ia quiitztoc, tijneltocaj itlajtol. Huajca monequi achi m'as tijneltocase intla yajaya Toteco Dios iselti tlen teyolmelahua para nel'ia se tlamantli. Huan Toteco techyolmelajtoc ajqueya Icone. 10Huan ajqueya quineltoca Icone Toteco quimati ipan iyolo para melahuac tlen quineltoca pampa nopano Toteco quiyolmelajtoc ajqueya icone. Huan nopa tlacame tlen ax quineltocaj tlen Toteco quiijto tlen Icone, quitocaxt'iaj Toteco se istlacatiquetl, pampa ax quineltocaj tlen quiijto para ajqueya Icone. 11Huan ya ni tlen Toteco techyolmelahua: Toteco techmacatoc yolistli tlen yancuic huan ni yolistli tlen yancuic eltoc ipan Icone Jesucristo. 12Yajaya tlen quipiya Icone Toteco ipan iyolo quipiya yolistli tlen yancuic, pero tlen ax quipiya Icone, ax quipiya nopa yolistli. 13Nimechtlajcuilhuil'ia imojuanti tlen inquineltocaj ipan itequihuejcayo Icone Toteco. Nijnequi xijmatica temachtli ya inquipiyaj yolistli yancuic tlen ax quema tlamis, huan para m'as xijneltocaca ipan ya. 14Huan tijmatij temachtli intla tijtlajtlan'iaj Toteco tlen quinamiqui ica tlen yajaya quinequi, yajaya techtlacaquil'ia. 15Huan intla tijmatij para temachtli techtlacaquil'ia nochi tlen tijtlajtlan'iaj, tijmatij temachtli yajaya techmacas nopa tlen tijtlajtlanijtoque. 16Intla se acajya quiita iicni ipan Cristo tlajtlacolchihua, pero ax se tlajtlacoli tlen nimantzi quihualicas nopa tlatzacuiltilistli para ma miqui, huajca ma momaijtoca para ya huan Toteco quimacas yolistli, intla ax quichijtoc tlajtlacoli tlen quihualica miquilistli. Se tlacatl huelis quichihuas tlajtlacoli tlen quihualicas miquilistli, huan ax nimechilhu'ia para xijtlajtlanica Toteco ipampa se tlen queja nopa quichihua. 17Nochi tlen ax cuali, eltoc tlajtlacoli, pero onca tlajtlacoli ica tlen se ax miquis pampa quichijtoc. 18Tijmatij iconehua Toteco ax tlajtlacolchijtinemij pampa Icone Toteco quinmocuitahu'ia para nopa Axcualtlacatl ma ax hueli quinitzqui ica ima. 19Tojuanti tijmatij temachtli tiiconehua Toteco huan nochi sequinoc tlacame campa hueli ipan tlaltepactli mocahuaj ipan ichicahualis Axcualtlacatl. 20Huan tijmatij temachtli hualajtoc Icone Toteco huan techmacatoc tlamachiltili para huelis tiquixmatise Toteco, yajaya tlen melahuac Dios. Huan tiitztoque san se ica ya tlen melahuac, pampa tiitztoque ipan Icone, Jesucristo. Yajaya temachtli Toteco huan yajaya tlen temaca nemilistli tlen yancuic. 21Noconehua tlen nimechicnel'ia, ximotlachilica para amo xiquintlepanitaca tlaixcopincayome o tlamantli tlen tlacame quinchijtoque ica ininma huan quinitaj queja elisqu'ia Dios. Queja nopa ma eli.

http://www.bible.is/NHETBL/1John/1/D

Nenhum comentário:

Postar um comentário