segunda-feira, 19 de outubro de 2015

Fest Jon: Nigerian Pidgin


Fest Jon 11Di tin wey dey from di biginin, wey wi don hear and si wit awa eye; wey awa hand don tosh (tins wey konsan di wod wey dey giv life 2and dis life kom out and wi don si-am. Na dis tins wi dey tok abaut. Wi dey tel una abaut di life wey nor dey end, wey dey wit di Papa for hevun and E don show-am to us. 3Na wetin wi don si and hear, wi dey tel una, so dat una go fit bi awa frend, jos as wi bi frend wit di Papa and en Pikin.) 4Na dis mak us dey rite dis leta, so dat awa joy go ful wel-wel. 5Na di mesage wey wi hear from am, naim wi dey tel una so: Na God bi lite and daknes nor dey insaid am at-all. 6If wi sey wi bi en frend and wi stil dey insaid daknes, wi dey lai and trut nor dey awa mout. 7Bot if wi dey insaid di lite as en ensef dey insaid lite, all of us go bi en frend and Jisos wey bi en pikin, go yuz en blood tak wosh all awa sins komot. 8If wi sey wi nor get sin, wi dey disiv awasef and di trut nor dey insaid us. 9Bot if wi konfes awa sin to am, e go forgiv us kon wosh evritin wey nor gud for God eye komot from awa life, bikos Kraist dey always du wetin e sey e go du, since e dey raitious. 10If wi sey wi nor dey sin, dat min sey, God dey lai and di trut nor dey insaid us.

Fest Jon 21(My shildren, I dey rite abaut dis mata, so dat una nor go dey sin.) Bot if enibodi sin, wi get pesin wey dey beg di Papa for us, dat pesin, na Jisos Kraist wey dey raitious 2and na en ensef bi di sakrifais wey God nid to forgiv us awa sins. Nor bi onli awa sin, bot di sin wey di hol wold dey komit. 3Wen wi du wetin God sey mak wi du, den wi go dey sure sey wi no am. 4Di pesin wey sey, "I no God and e nor dey du wetin God tok, dat pesin dey lai and di trut nor dey insaid am. 5Bot enibodi wey du wetin dem rite for God wod, tru-tru, God wod rili dey insaid am. Na dis go mak us no sey wi dey insaid God. 6Di pesin wey sey en wit God dey togeda foreva, dat pesin sopoz liv en life as Kraist liv en own. 7Una wey bi my frends, I nor dey rite new komandment giv una, na di old won wey una get from di biginin, I stil dey rite and una don hear dem bifor. 8Bot dis new komandment wey I dey rite giv una so, naim bi di trut wey dey show insaid Kraist and insaid una, bikos daknes don pas and di ril lite don dey shine. 9Pesin wey sey e dey insaid di lite, bot e stil hate en broda or sista for Kraist, dat pesin stil dey insaid daknes. 10Pesin wey luv en broda or sista for Kraist, dey liv insaid di lite and nor-tin go mak am fal. 11Bot di won wey hate en broda or sista for Kraist, dey for daknes and e nor no wer e dey go, bikos daknes don blind en eye. 12My shildren, I dey rite giv una sey God don forgiv una sins, bikos of Jisos name. 13I dey rite giv una wey bi papa, bikos una no di pesin wey dey alaif since God kreate di wold. I dey rite giv una wey bi young pipol, bikos una don win Satan. 14I don rite giv una, my shildren, bikos una don no God. I don rite giv una wey bi papa, bikos una don no di pesin wey dey alaif since God kreate di wold. I don rite giv una young pipol, bikos una dey strong and God wod dey insaid una, as una don win Satan. 15Mak una nor luv dis wold or di tins wey dey insaid am. If enibodi luv dis wold, di Papa luv nor dey insaid am, 16bikos evritin wey dey insaid di wold (tins wey humanbin bodi wont, tins wey dey hungri pesin to get and to dey kari bodi up), nor kom from di Papa, bot na dis wold dem from kom. 17And dis wold don dey fade wit di tins wey pipol wont, bot di pesin wey dey du wetin God wont, go dey foreva. 18My shildren, di wold don dey end and jos as una hear sey, anti-kraist dey kom, mak una no sey meni anti-kraist don alredi kom. And dis show us sey di wold go soon end. 19Na from us dis pipol from komot, bot dem nor rili dey God famili bifor, bikos if to sey dem dey, dem for stay wit us. Bot dem liv us, so dat evribodi go no sey dem nor bi awa own. 20Bot di pesin wey dey holi, don anoint una and all of una no sey na tru. 21I nor rite giv una, bikos una nor no di trut, bot na bikos una no Kraist and di trut dey stay insaid am. 22Na hu dey lai? Na di pesin wey sey Jisos nor bi di Mezaya! Di pesin wey rejet di Papa and en Pikin, na Kraist enimi. 23Enibodi wey rejet di Pikin, nor get di Papa. Bot if pesin asept di Pikin, e don asept di Papa tu. 24As for una, wetin una don hear from di biginin, mak una let am stay insaid una. If wetin una hear from di biginin stay insaid una, una go stay insaid di Pikin and en Papa. 25Dis na di promis wey Kraist ensef promis us sey, di life wey e go giv, nor go eva end. 26Na dis tins I dey rite giv una abaut pipol wey dey trai to disiv una. 27As for una, di Holi Spirit wey Kraist giv una, dey stay insaid una, so una nor nid enibodi to tish una again. Evritin wey di Holi Spirit dey tish, na tru and lai nor dey insaid. Jos as e don tish una, mak una stay insaid am. 28Naw my shildren, mak una stay insaid am, so dat wen E kom, awa heart go dey strong wel-wel and shame nor go mak us run from wer E dey. 29If una no sey E dey raitious, den una go no sey, doz wey dey du wetin God wont, na en shildren dem bi.

Fest Jon 31Mak una si di kaind luv wey awa God get for us. And naw, pipol dey kol us God shildren and tru-tru, na God shildren wi bi. Di wold nor no us, bikos dem nor no am. 2My frends, wi bi God shildren naw and wi neva no as wi go bi wen Kraist go kom bak. Bot wi no sey wi go bi laik am, bikos wi go si-am jos as E bi. 3And evribodi wey get dis hope for Kraist, dey mak ensef pure, jos as Jisos dey pure. 4Evribodi wey dey laik to sin, nor dey obey God law and to sin, na to disobey God law. 5And una no sey God send Jisos kom, mak e for kari sin komot and no sin dey insaid Kraist. 6Enibodi wey dey stay insaid am nor dey laik to sin, bot pesin wey dey komit sin, neva si or no am. 7So my shildren, mak una nor let enibodi disiv una: If pesin dey du wetin gud for God eye, dat show sey dat pesin dey gud, jos as Kraist dey gud for God eye. 8Bot pesin wey dey laik to sin, na devol pikin, bikos devol dey sin from di biginin. Na dis won mak God Pikin kom dis wold, so dat e go skata all di wok wey devol dey du. 9Pesin wey bi God pikin, nor dey laik to sin, bikos God sid dey insaid am. 10Na laik dis una go tak no God and devol shildren. Pesin wey nor dey du wetin gud for God eye and wey nor luv en broda or sista for Kraist, nor bi God pikin. 11Dis na di Gud News wey una don hear from di biginin sey, mak wi luv ish oda as awasef. 12Nor bi laik Kain wey bi devol pikin, wey kil en broda. And wetin mak am kil-am? Na bikos God nor asept en ofrin as E asept Abel own. 13So my broda and sista, mak una nor sopraiz sey dis wold pipol hate una. 14Wi no sey wi don kros from deat enta life, bikos wi dey luv and kare for awa brodas and sistas for Kraist. 15Pesin wey hate en broda or sista for Kraist, fit kil pesin and di life wey nor go end, nor dey insaid am. 16Dis na wetin mak us no wetin luv bi: Jisos Kraist die for us, so wi sopoz sakrifais awa life for awa felow Kristen brodas and sistas. 17Bot pesin wey get enof tins and e nor sori for en broda or sista for Kraist wey nor get at-all, na haw God luv go tak dey insaid am? 18My shildren, mak wi nor dey luv wit onli wod for mout, bot mak wetin wi dey du, show sey wi rili luv ish oda. 19Wetin wi dey du go show sey wi dey liv for di trut, so wi go dey bold wen wi stand for God front. 20So, ivun if awa maind kondem us, wi no sey God big pas awa maind and E no evritin. 21My frends, if awa maind nor kondem us, awa heart go strong for God present 22and enitin wey wi ask from am, E go giv us, bikos wi dey du wetin E wont and na dis tins dey mak bele swit am. 23Na wetin E komand bi dis, "Mak wi biliv en pikin Jisos Kraist name and mak wi luv ish oda, ivun as E don komand us." 24So enibodi wey du all wetin God tok, dey insaid am and God dey insaid dat pesin tu. Wi no sey E dey insaid us, bikos di Spirit wey E giv us, dey stay insaid us.

Fest Jon 41My frends, mak una nor biliv evribodi wey sey na God Spirit dey tok tru am. Una must test am to no weda na God Spirit e rili get. Bikos meni fake profets dey for dis wold. 2Dis na haw una go tak no God Spirit: If pesin biliv sey na Jisos bi di Mezaya, wey kom as humanbin, dat pesin get God Spirit. 3Bot evribodi wey nor gri sey Jisos na Oga, dat pesin spirit nor kom from God. Dat na di anti-kraist spirit wey una hear sey dey kom and e don alredi dey dis wold. 4My shildren, una kom from God and una don get victori ova doz pipol, bikos di pesin wey dey insaid una, big pas di pesin wey dey di wold. 5Dem kom from dis wold: so dem dey tink laik pipol for di wold and di pipol wey dey di wold, dey listin to dem. 6Wi kom from God and di pesin wey no God dey listin to us, bot pesin wey nor no God, nor dey agri wit us. Dis na haw wi tak dey no di tru Spirit and di spirit wey dey disiv pipol. 7My frends, mak wi luv won anoda, bikos luv kom from God and enibodi wey luv odas, na God pikin and e no God, 8bot pesin wey nor luv en broda nor no God, bikos God na luv. 9Dis na haw God luv dey show for awa life: God send en onli Pikin wey e born, mak e kom dis wold, so dat tru am, wi go get life wey nor dey end. 10Na dis bi luv: nor bi sey wi first luv God, bot na-im first luv us wen E send en Pikin kom die for us as sakrifais wey mak am forgiv us awa sins. 11My frends, if God luv us laik dis, den wi must luv ish oda. 12Nobodi don eva si God bifor. If wi luv ish oda, God dey insaid us and en luv dey pafet insaid us. 13God don giv us en Spirit to show sey wi dey insaid am and e dey insaid us. 14Wi don si wit awa eye sey, di Papa send en Pikin to bi Savior for di wold. 15If enibodi sey Jisos na God Pikin, dat show sey, God dey insaid am and e dey insaid God tu. 16Wi no and biliv sey, God luv us and en luv dey insaid us. 17And as wi dey stay insaid God, awa luv dey grow more-more. So wi nor go fear for jojment day, bot wi go face God wit konfident, bikos wi liv laik Jisos Kraist wen wi dey di wold. 18Dis kaind luv nor get fear, bikos beta luv dey driv fear komot from pesin heart. If wi dey fear bikos wi nor wont mak God ponish us, dat show sey wi neva rili no haw en luv bi. 19Bikos God first luv us, naim mak us dey fit luv ish oda. 20If sombodi sey, "I luv God" and e hate en Kristen broda, e dey lai, bikos pesin wey nor luv en Kristen broda wey e dey si, haw e wont tak luv God wey e nor dey si? 21God don komand us sey: "If enibodi luv mi, mak e luv en broda and sista for Kraist tu."

Fest Jon 51Enibodi wey biliv sey na Jisos bi Kraist, don bi God pikin and enibodi wey luv di Papa, luv di pikin wey E born. 2Wi go no sey wi luv God shildren, wen wi luv God and obey en komandment. 3To luv God, na to kip en komandment and en komandment nor dey hard. 4Enibodi wey bi God pikin, don win di wold and na awa fate bi di pawa wey win di wold. 5Pesin wey biliv sey Jisos Kraist na God Pikin, don win di wold. 6Na Jisos Kraist kom dis wold wit wota and blood. Nor bi onli wit wota, bot na wit di wota and di blood. And God Spirit bear witnes sey dis na tru, bikos na God Spirit bi di trut. 7Wi get tiri witnes to show sey wetin wi dey tok, na tru and dem bi: 8God Spirit, di wota and di blood and dis tiri witnes dey tok di same tin. 9If wi gri sey wetin humanbin tok na tru, den wetin God tok abaut en pikin, naim big pas. 10(Di pesin wey biliv God Pikin, go no insaid ensef sey, dis tin na tru, bot pesin wey nor biliv God, dey sey God dey lai, bikos e nor biliv wetin God tok abaut en Pikin). 11Dis na wetin God tok: God don giv us life wey nor dey end and dis life dey insaid en Pikin. 12Enibodi wey get di Pikin, get di life wey nor go end, bot doz wey nor no God Pikin, go die. 13I don rite all dis tins giv una wey biliv God Pikin, so dat una go no sey una get life wey nor go end. 14Na dis tins dey mak awa maind strong enitaim wey wi kom mit God: bikos if wi ask am for enitin wey dey gud for en eye, E go giv us. 15And if wi no sey E dey hear us, den wi biliv sey wi go get di tins wey wi ask from am. 16If enibodi si en broda or sista for Kraist dey komit sin wey nor go kil-am, mak e ask God and God go giv life to dat pesin. E get di kaind sin wey dey kause deat and I nor sey mak una pray mak God forgiv di pesin wey dey komit dat sin. 17Evritin wey nor gud for God eye, na sin, bot e get di sins wey nor dey kause deat. 18Wi no sey enibodi wey bi God pikin, nor dey laik to sin, bot God dey kip en pikin, so dat devol nor go fit tosh am. 19Wi no sey wi bi God shildren and dis wold wey wi dey so, na wiked pipol dey rule am. 20Wi no sey God Pikin don kom and e don giv us sense to no di trut abaut God. And wi dey insaid en Pikin, Jisos Kraist. Na-im bi di ril God and na-im bi di life wey nor go end. 21So my shildren, mak una mak sure sey una nor get enitin to du wit oda gods.

http://www.bible.is/PCMTSC/1John/1/D

Nenhum comentário:

Postar um comentário