terça-feira, 13 de outubro de 2015

Yohanɛɛsa I: Nawdm


Yohanɛɛsa I 11Ĥii ɦà da manna weem kɔtɔdn wii, t` reɦa ɦomr ɦà gwɛɛt wii, tn nyan n t` niini wii, tn nyilg n tarm n t` niɦi wii, wii nnii ɦá ba na neerm wii, l´ kɔtɔd na gwɛɛt t´ saɦ neerm tii. 2Neermii da ree myen n werii, t´ yum-m n ka bɔɦɔɔ m´ gwɛɛt. Tii kaa nnii tn faa-n m´ ret. Mii bee kakeɦnan. M` da ba Sa man, n dan n ree myen n werii-t. 3T` reɦa nyan n ɦom bà bɔɦɔɔ ɦá gwɛɛt wii, wii ret nnii tn ta faa ta nen, ka bo na nii ta bewlg t` ɦɛn t` ɦe yena. Lee, n` hewl n̈yen t´ n Sawu n ɦà Budaaga Yeesu Krist t` ɦɛn, t` ta ɦe yena. 4Tii nnii tn ɦoor-n tintina mɛntii na t` nyaag̈b soɦ. 5Kpay-n gwɛɛt tn ɦomr ɦà noon n ka faa-n tii! Tii nnii na: Saŋgband nnii wiinga, nyeet tiit kpaɦ d` ni felaɦ'. 6Ka t` bɔɦɔɔ noon yem na t´ n dn t` laglg yena n ka ŋmɛta ka neer nyeet nii, gokaat nnii tn bɔɦɔɔ ka kpaa ɦɛna gobiint ŋmɛɛgt. 7Ka t` neer wiingan wo dii mɔmr nn ba wiingan lee, welee weraa na t` laglg n ɦɛm yena, l` saa d` Budaaga Yeesua jiim hig t` ni fubɛɦii mɛnii. 8Ka t` bɔɦɔɔ na lag ten nnii fubɛɦtiiba, t` bɔraa tyen, gobiint kpaɦ t` ni. 9Biilm, ka t` bɔɦɔɔ Saŋgband t` fubɛɦii, d` mada d` gwɛɛt ka ta ba sɔbb, d` nan waalaa-t t` fubɛɦii d` hig t` ni bɛɦgu mɛngu. 10Ka t` bɔɦɔɔ na t` ba ɦe fubɛɦga kiiga, t` lɔgl-d wo gokaat tia, d´ gwɛɛt kpaɦ t` ni.

Yohanɛɛsa I 21Mà bii-n, mà ɦoora-n gwɛɛtntina na n` daa ɦɛm fubɛɦii. Ka l` ba na ɦii ɦera fubɛɦga laa ben, ɦii ba Sa man ka taaw t` kaa, wii nnii hɔma, Yeesu Krista. 2Wii lɔgra ɦayen n vidm na l´ kwiiŋl Saŋgband kwɛɛwweerga l` waaliim t` fubɛɦii, lag t` rei n jaɦ, nidba mɛmɛmba fubɛɦii ban ɦɛna hii. 3¿Lan nnii tn mi na t` miil-wu? Ka t` vala ɦá baɦlbii, t´ ka mi na t` miil-wu. 4Ka ɦii t diɦ n ɦà ni n bɔɦɔɔ na: «Mà miil-wu» ka kpaa vala ɦá baɦlb laa ben, gokaat tiin ɦan mi, gobiint tiit kpaɦ ɦà ni felaɦ'. 5Lee, ɦii ɦá mad ɦà gwɛɛt wii sɔkla Saŋgband kpaalaa. ¿Ben weraa na t´ n wun t` ɦera yena? 6L` ba na ɦii ɦá bɔɦɔɔ na wú n wun bà ɦera yen wii ta neer wo wii mɔma nn da neer lee. 7Mà teelhɔmba-n, lag baɦlkwɛɛlb nnii man ɦoor-n, baɦlkpeembn. Baɦlb nn da foog n soɦd weem bii nnii. Welee baɦlbii ba na Saŋgband gwɛɛt nn fɛtg ɦumb tii nnii. 8Gwɛntaɦaa, l` ta ba na baɦlkwɛɛlbn man ɦoor-n. Yeesua neerm werii na baɦlkwɛɛlbn gobiint. N` neerm ta weraa welee. Biilm, nyeet nyaban, gobiint wiinga t fɛtg wiidgm. 9Ĥii ɦà bɔɦɔɔ ka ɦigaa na ɦà neera wiingan ɦà ni nyaɦ n ɦà teel wii nyi ba nyeetn. 10Ĥii ɦà sɔkla ɦà teel wii neera wiingan, lee wen, bii t ka kpaɦ ɦà ni ka ba na b` ba b` bee b` lɔɔlg ɦiiwu fubɛɦgan. 11Gwɛntaɦaa, ɦii ɦà ni nyaɦ n ɦà teel wii ba nyeetn ka gbuɦ. Nyeetii jɔmlg-wu, ɦá ka kpaa mi ɦá kan ked. 12Mà ɦoora bii nen, na l` waal n` fubɛɦii Yeesu Krista kaa. 13Mà ɦoora samba nen, na n` miil ɦii ɦà manna weem kɔtɔdn wii. Mà ɦoora kaaba nen, na nn diir Kunida jugun l´ kaa. 14Mà ɦoora bii nen, na n` miil Sa. Mà ɦoora samba nen, na n` miil ɦii ɦà manna weem kɔtɔdn wii. Mà ɦoora kaaba nen, na n` haɦran, ka mad Saŋgband gwɛɛt n` ni, ka ta di Kunida jugun. 15Daa sɔklm-n tantntina ɦɛn neerm, laa mina want t´ ba t´ ɦɛn tii! Ka ɦii sɔkla tantntina ɦɛn neermii, Sa Saŋgband sɔklb kpaa ba ɦá ni. 16¿Tantntina ɦɛn neerm nnii tem? Mii nnii nida neerm ɦan sɔkla na ɦà neer mii n want ɦá niini nn yu tii mɛntii sɔklb, n bii b` ɦɛna na ɦá fuuriim ɦayen bii. Welee wantii mɛntii ba rɛn Saŋgband man, t` rɛn tantntina ɦɛn. 17L` ba na tantntina ɦɛn wantii mɛntii gɛtan, n ta bii nida nn sɔkla t` ɦɛn bii mɛmbii. Lee, ɦii ɦà ɦɛna Saŋgband nn sɔkla bii wii ba ɦà neer kakeɦnan. 18Mà bii-n, t` ba gokaawran. N` da ɦomra bà bɔɦɔɔ na gokaawran Krista rafeeda ba ɦà daan. Gwɛɦmaa, ɦá rafeedba ba kɔd. Welee t ka weraa-t na t` ba gokaawran. 19Welee nidbee da ba t` man, gwɛntaɦ ka kpaɦ na t` reban biilm, bá dan n nyab. Biilm, ka l` da ba na t` reba laa ben, bà da ba bà kpat bà bɛm t` man. Lee, bá nyab, l´ ka weraa biilm na bá ni ɦii da kpaɦ na t` reɦan. 20Nen lee, ɦá ba buud wii sira-n Voɦoom Buudm. Welee nnii nn mi gobiint n` mɛmbee. 21Lee, ka mà ɦoor-n, lag na n` kpaa mi gobiint. Ĥaai! N` miil-t. N` ta miil hɔm na gobiint gwɛɛt tiit kpaɦ t` bee t` kitg gokaat felaɦ'. 22¿Wen nnii gokaat tii lena? Gokaat tia mɔm nnii ɦá kia na lag Yeesu nnii Krista, l´ kɔtɔd na Saŋgband nn bantg wii. Welee nidwii ba na Krista rafeedn. Ĥà kir Sawu n ɦà Budaaga Yeesua. 23Biilm, ɦii ɦà kir Budaaga wii ta kpaɦ n Sawu n ɦà man. Ĥii ɦà tia Budaaga ɦɛn wii ta ba n Sawu n ɦà man. 24Tii kaa nnii ln ba na nii mad gwɛɛt nn da foog n soɦd weem tii hɔm n` kwɛɛwan. Ka l` ba na bii nn da kewii nooga bii kpat n ka ba n` kwɛɛwa nii, ta welee nnii nn ba n Budaaga n Sawu n n` man. 25Lee, ¿wo ká mɔmga da beda na kà nan tɔɔ-t bee? Kà da beda na kà nan tɔɔ-t neerm m` bee kakeɦnan mii. 26Mà ɦoora-n gwɛɛtntina l` hɛl biiba bà bag na bà hoglm-n bee. 27Nen lee, Yeesua hoɦlgn ɦà Voɦoom n` jugun. Wo ɦá Voɦoom nn ba n` ni lee, l` ta kpaɦ na ɦii ta weriim-n rarm. Biilm, Voɦoom weraa-n l` mɛnguu, bii mn weraa-n bii ta ba gobiint, b` kpaɦ gokaat. Tii kaa nnii ln ba na n` nawr n Yeesu wo mn werii-n lee. 28Lee, mà bii-n, nawr-n n wun, ka bo na t` kwɛɛwa daa ɦe ɦà toom ɦá ŋmɛtgnm goor, na jiwɦi daa kpal-t ɦá nɔngan. 29N` miil na wii nnii hɔma, l´ ka ba na n` miim na nid baaben tii ɦá ɦɛna hɔmgu wii ba na Saŋgband bugan.

Yohanɛɛsa I 31Nyaan-n lan nnii Sa Saŋgband nn sɔkl-t lea! Ĥà sɔkl-t biii, n fɛl n ta hoɦ-t na ɦá bii. Ten nnii ɦá bii biilm. Lee, ¿ben kaa nnii tantntina ɦɛn nidba nn kpaa mii-t? Bà kpaa mii-t na bà ba miig Saŋgband. 2Mà teelhɔmba-n, ten nnii Saŋgband bii, gwɛntaɦ, tn nan ba t` bɛm bii ban riir wiingan. Lee, t` miil na goor Yeesua nn nan rea ɦayen ɦà werii dii, t` nyaan-wu wo ɦan ba lee, lee, t` tɔn-wu. 3Ĥii ɦà daag ɦà ɦɛn welee wii higl ɦayen na ɦà riir kelkel wo wii mɔma nn ba lee. 4Ĥii ɦà ɦɛna fubɛɦga wii ta gwidaa Saŋgband baɦlb kaawr, l` ba na fubɛɦga nnii baɦlbii kaawr gwidm. 5Yeesu Krist lee, n` miil na wii daan na ɦà nawdg tant ɦɛn fubɛɦii, l` ba na fubɛɦga kpaɦ ɦà ni. 6Ĥii ɦà nawr n wun wii kpaa ɦɛna fubɛɦga. Ĥii ɦà ɦɛna fubɛɦga wii ba nyaan-wu, ɦà ta ba miig-wu. 7Mà bii-n, ɦii daa hogl-n! Ĥá ɦɛna b´ ba hɔm bii wii ba sɔbb wo wii mɔma nn ta ba sɔbb lee. 8Ĥá ɦɛna fubɛɦga wii ba na Kunida heɦl-wu. Biilm, Kunida manna ka ba fubɛɦtia. Saŋgband Budaaga de, ¿kee daan na la? Kà daan na kà kpii Kunida ŋmɛɛgt kpaalaa. 9Ĥá ba na Saŋgband buga wii kpaa ɦɛna fubɛɦga. Neerm Saŋgband nn lo ɦá ni mii ba ɦà kwɛɛwrn, welee lee, ɦà kpaa ɦɛna fubɛɦga, l´ kɔtɔd na Saŋgband nnii ɦá Sa. 10¿Ben weraa na wunaɦ nnii Saŋgband buga laa Kunida reka? Ka ɦii ɦɛna bii b` kpaɦ hɔm bii ka ta kpaa sɔkla ɦà teelaa, lag Saŋgband heɦl-wu. 11¿Gwɛɛt nn da foog n ɦom tii nnii tet? Tii nnii na: Sɔklm-n taa vol wo vola! 12L` kpaɦ na t` ɦɛm wo Kayiina. Wii da ba na Kunida heɦl-wu, ɦá git ɦá nyakwɛɛla mɔma lakwɛɛn juuga. ¿Ben da ɦer ɦà ɦɛna welee? Ĥà ɦera welee na ɦan da ɦɛna bii mɛmbii da ba bɛɦgu, l´ saa ɦà teela reb ba hɔm. 13Mà teelba-n, ka tantntina ɦɛn nidba nyaɦaa-n, l´ daa ɦɛm-n yɔlaa. 14T´ n nn, tii miil na t` reda kuumn n jib neerm mɔmmn. T` miil welee na tn sɔkla t` teelba l` kaa. Ĥii ɦà kpaa sɔkla ɦà teel wii la ba kuumn. 15Nid baaben tii ɦà nyaɦaa ɦá teel wii ba na nidkuudn. L´ saa n` miil na nidkuudɦii kpaɦ n neerm m` bee kakeɦnan mii. 16Kpay-n bii b` saa t´ miig sɔklb bii! Yeesu Krista vidra ɦayen t` kaa. Tii lee, l` ba na tii ta vid tyen t` teelba kaa. 17Lee, ka kwɛgdm tiiɦii t nyaan ɦà teela halwa bii l´ ka ba biir-wu lii, ¿Saŋgband sɔklb ba ɦà ni nnii? 18Mà bii-n, l` kpaɦ na t` sɔklm noon n jaɦ, laa t` bɔɦɔɔm sɔklb gwɛɛt, l` ba na t` ŋmɛɛgt weriim na gobiint t` sɔklan. 19Ka t` ɦɛna welee t` miim na ten nnii gobiint tiiba. Lee, nigiigu bɛm t` man Saŋgband nɔngan. 20Biilm, ka t` kwɛɛwa yaa-t n yaagu, Saŋgband ba bermr ka yata-ɦa ¿laa laa? Lee, dii miil l´ mɛnguu. 21Tii lee, mà teelhɔmba-n, ka t` kwɛɛwa kpaa yaa-t n yaagu, t` jeɦntm d´ nɔngan ka kpaɦ n fobɛɦgu, 22ka soɦda d´ man tn gbaama-d bii mɛmbii na t` vala d´ baɦlb ka ɦɛna b´ bee-d loogu bii. 23¿Baɦlb dn to-t bii nnii teb? Bii nnii na t` tiim d´ Budaaga Yeesu Krista ɦɛn ka ta sɔkla taa vol wo vola wo kan da baɦl-t lee. 24Ĥii ɦà vala d´ baɦlb wii ba d` man, d` ta ba ɦà man. ¿Ben ɦɛna t` miigaa na d` ba t` man? Voɦoom Buudm dn sir-t mii ɦɛna t` miigaa welee.

Yohanɛɛsa I 41Mà teelhɔmba-n, daa luum-n n biiba bà bɔɦɔɔ na bà ba n Voɦoom Buudm bee mɛmbee weenn! Lee, tarm-n bá bɔɦɔɔ welee bee n` nyaan na ¿mig voɦoom ban ba n mii rɛn Saŋgband man laa? Biilm, gokaat gwɛɛt bɔɦɔɔtba kɔd fut kɔrgun. 2Kpay-n bii b` ba b` werii-n na ɦii ba n Saŋgband Voɦoom bii! Ĥii ɦà tia ka bɔɦɔɔ na Saŋgband nn bantg wii kitg nidwu biilm n daan tant ɦɛn, na wii nnii Yeesua, miim-n na voɦoom ɦalaɦ nn ba n mii rɛn Saŋgband man! 3Ĥii ɦà kpaa miigaa Yeesu welee wii, voɦoom ɦan ba n mii ba rɛn Saŋgband man. Mii ba na Krista rafeeda remn. N` da ɦomra na ɦà ba ɦà daan, gwɛɦŋa, ɦà fɛtg daanm n ka bee tant ɦɛn. 4Nen lee, mà bii-n, Saŋgband heɦl n nn, nii diira gokaat gwɛɛt bɔɦɔɔtba jugun, blaɦb kaa, Voɦoom m´ ba n` ni mii ba n gemmnt ka yata tant nn heɦ bee rem. 5Bee ba na tant heɦl n ban, tii kaa nnii ban gwɛɛla wo tant ɦɛn nidba, tant ɦɛn nidba ta kewla n ban. 6Ten lee, Saŋgband heɦl n tn. Ĥii ɦà mii-d wii kewla n tn. Ĥii ɦà kpaa mii-d wii kpaa kewla n tn. Welee nnii tn ba t` bee t` miig bii b` rada gobiint Voɦoom n gokaat rem bii. Wo ln ba na Saŋgband nnii sɔklb lee, tn ta sɔklm-n taa! 7Mà teelhɔmba-n, tn sɔklm-n taa vol wo vola, na sɔklb rɛn Saŋgband man. Ĥii ɦá sɔkla wii ba na Saŋgband bugan, ɦà miil-d. 8Ĥii ɦá kpaa sɔkla wii, ɦà ba miig Saŋgband, l´ kɔtɔd na Saŋgband nnii sɔklb. 9¿Ben weraa na Saŋgband sɔkla tii? Bii nnii na d` tamn d` Budaaga kayenga ligaɦ tant ɦɛn, ka bo na t` tag n kee ɦɛn t` bɛm n neerm. 10¿Sɔklbii kɔtɔd nnii na laa? ¿Wo b´ kɔtɔd nnii na ten lar n sɔkl Saŋgbandn? Ĥaai! Dii sɔkl-t n tamn d´ Budaaga na ká jiim kwiiŋl d` kwɛɛwweerga l` waaliim t` fubɛɦii. 11Mà teelhɔmba-n, wo Saŋgband nn sɔkl-t welee lee, l` ba na tii ta sɔklm taa vol wo vola! 12Saŋgband lee, ɦii ban nyaan-d felaɦ'. Ka t` sɔkla taa vol wo vola, l` weraa na Saŋgband ba t` man, d´ sɔklb ta ba t` ni kpaalaa. 13¿Ben ɦɛna t` miigaa na d` ba t` man, t` ta ba d` man? D´ Voɦoom dn sir-t mii ɦɛna t` miigaa welee. 14L´ saa ten, tii t yum n t` niini na Sa tamn ɦà Budaaga tant ɦɛn na ká daɦ nidba juuni, lee, n ka faa welee. 15Ĥii ɦà tia ka bɔɦɔɔ na Yeesu nnii Saŋgband Budaaga wii, Saŋgband ba ɦà man, ɦà ta ba d` man. 16Ten lee, t` miil na Saŋgband sɔkla-t n ta tii welee. Dii nnii sɔklb. Ĥii ɦá sɔkla wii ba n Saŋgband n ɦà man, d` ta ba ɦà man. 17¿Ben weraa na sɔklb ba t` ni kpaalaa? Ka t` neer tantntina ɦɛn wo Yeesua, lee wen l` weraa na sɔklb ba t` ni kpaalaa, l´ saa na t` kwɛɛwa daa ɦe ɦà toom yaagu yaam goor. 18Biilm, fobɛɦgu kpaɦ sɔklbn. Gobiint sɔklb vɔɦda fobɛɦgu. Tii lee, ɦii ɦà ba n fobɛɦgu wii, sɔklb kpaɦ ɦà ni kpaalaa. Fobɛɦgu weraa tobr darm. 19Ten lee, tii sɔkla na Saŋgband sɔkl-t nooga. 20Ka ɦii bɔɦɔɔ na ɦà sɔkla Saŋgband ka nyaɦaa ɦá teela, gokaat tiigun. Ĥii ɦà kpaa sɔkla ɦà teel ɦan yu wii, ¿lan nnii ɦan ba ɦà sɔklm Saŋgband ka kpaa yuu-d? 21Baɦlb Yeesua nn to-t bii nnii na ɦá sɔkla Saŋgband wii, l` ba na ɦá ta sɔklm ɦá teela.

Yohanɛɛsa I 51Ĥá tia na Yeesu nnii Saŋgband nn bantg wii ba na Saŋgband bugan. L´ saa, ɦá sɔkla ɦà sa Saŋgband wii ta sɔkla ɦà sa buvolhii. 2¿Ben weraa na t` sɔkla Saŋgband bii? B´ weraa welee bii nnii na t` sɔkla-d ka ta vala d` baɦlb. 3Ĥee waa! ¿Wo Saŋgband sɔklb nnii bee? Bii nnii na t` mad d´ baɦlb. Baɦlbii ta kpaa ba gemm mɛɦ'. 4Biilm, ɦá ba na Saŋgband buga wii jul bii b´ ba tant ɦɛn bii jugun. ¿Ben saa t` ju bii b´ ba tant ɦɛn bii jugu nii? T` gwɛɛt ɦɛn tiim saa t` ju b´ jugun. 5¿Wen ba ɦà bee ɦà di bii b` ba tant ɦɛn bii jugu nii? Ĥá tia na Yeesu nnii Saŋgband Budaaga wii n jaɦ jul b´ jugun. 6Yeesu Krist nnii ɦii ɦà daan tant jugun. Ĥà daan n tag n nyaalm n jiim. Ĥà ba tag n nyaalm n jaɦaa, ɦà tag n nyaalm n ta jiim mɛɦ'. L´ saa Voɦoom Buudm mɔmm t ka bɔɦɔɔ na welee ba gobiint, l´ kɔtɔd na mii kpaa hogla. 7Biilm, want ttaɦt beel ka weraa-t welee. 8Tii nnii Voɦoom Buudm nn bɔɦɔɔ tii n nyaalm n jiim. Wantii taɦrbee bɔɦɔɔ goyent. 9T` soɦda nidba noon gwɛɛt, l` ba na Saŋgband retii beel daɦt l` yata. Dii mɔmr beda d` Budaaga gwɛɛt. 10Lee, ɦii ɦà tia Saŋgband Budaaga ɦɛn wii miil gwɛɛtii. Ĥá kpaa tia Saŋgband ɦɛn wii lɔgl-d wo gokaat tia, blaɦb kaa na ɦà ba tii dn bed l` baɦr n d` Budaaga ɦɛn tii. 11¿Tii nnii tet? Tii nnii na Saŋgband sira-t neerm m` bee kakeɦnan mii ka tagaa n d` Budaaga jugun. 12Ĥii ɦà soɦdg Saŋgband Budaaga wii ba n neermii, ɦá ba soɦdg-ka wii kpaɦ n mn. 13Mà ɦoora-n gwɛɛtntina na n` miig na n` ba n neerm m` bee kakeɦnan mii, nen, nen tia Saŋgband Budaaga ɦɛn nen. 14¿Ben ɦɛna t` kwɛɛwa kpaa to Saŋgband nɔnga nii? B´ ɦɛna ɦà kpaa to bii nnii na t` wen gbaama-d baaben b` magr n d` sɔklb, d´ ɦom n tn. 15Wo tn mi na d` ɦuma n tn t` wen gbaama-d bii lee, t´ ka ta mi na t` soɦdg bii tn gbaam-d bii. 16Ka ɦii t nyaan ɦà teela ɦɛna fubɛɦga kiiga kà kpaa ked-wu n kuumn, l` ba na ɦá joblm Saŋgband, lee, teelwii yuuŋ neerm. Tintii hɛla ɦii ɦà fubɛɦga kpaa ked-wu n kuumn wii. Fubɛɦga kiiga bee ka ked nidwu n kuumn, lag kee tiiba ɦɛn nnii man bɔɦɔɔ na bá joblm. 17Ĥɛbbɛɦb mɛmb ba na fubɛɦgan, gwɛntaɦ, lag fubɛɦii mɛnhii keda nidba n kuumn. 18T` miil na ɦá ba na Saŋgband buga wii kpaa ɦɛna fubɛɦga, d´ Budaaga kiiga ɦà ɦɛn, Kunida t ka kpaɦ ɦà bee ɦà tarm ɦà ɦɛn. 19T` miil na Saŋgband heɦl n tn, l´ saa tantii mɛntii ba Kunida nuɦun. 20Lee, t` ta miil na Saŋgband Budaaga daan n saɦm-t rarm na t` miig ɦà ba na gobiint wii. T` nawra n wun ka tagaa n ɦà Budaaga Yeesu Krista. Wii nnii Saŋgband, wii nnii gobiint, ta wii nnii neerm m` bee kakeɦnan mii. 21Mà bii-n, mad-n n̈yen n bii nidba nn lɔg wo Saŋgband bii!

http://www.bible.is/NMZWSB/1John/1/D

Nenhum comentário:

Postar um comentário