sexta-feira, 13 de novembro de 2015

1 HUAN: PAPIAMENTU


1 HUAN 1
Palabra di Bida
1Nos ta skibi boso tokante Esun ku ta e Palabra di Bida., Loke tabata eksistí for di prinsipio, nos a tende i nos a mira ku nos mes wowo; nos a kontempl'É i ku nos mes man nos a mishi kunÉ. 2E Bida akí a bira visibel. E Bida eterno ku tabata huntu ku Tata i a keda revelá na nos, nos a mira, nos ta testiguá di djE i ta proklam'É na boso. 3Ta loke nos a mira i tende nos ta proklamá na boso, pa boso por tin komunion ku nos, meskos ku nos tin komunion ku Tata i ku su Yu Hesu-Kristu. 4Nos ta skibi boso esaki, pa nos alegria por ta kompleto.
Dios ta lus
5Esaki ta e mensahe ku nos a tende di Dios su Yu i ku nos ta anunsiá na boso: Dios ta lus i den djE no tin niun tiki skuridat. 6Si nos ta bisa ku nos tin komunion kunÉ, ma ta biba den skuridat, nos ta gaña i no ta praktiká bèrdat. 7Ma si nos ta biba den lus, manera Dios ta den lus, nos lo tin komunion ku otro, i sanger di Hesus, su Yu, ta purifiká nos di tur piká.
8Si nos ta bisa ku nos no tin piká, ta nos mes nos ta gaña i nos no tin bèrdat den nos. 9Pero si nos atmití nos pikánan abiertamente, Dios ku ta fiel i hustu ta pordoná nos e pikánan ei i purifiká nos di tur tur maldat. 10Si nos ta bisa ku nos no a peka, nos ta hasi manera ta Dios ta gañadó i su palabra no ta den nos.

 1 HUAN 2

Kristu ta boga pa nos
1Mi yunan stimá, mi ta skibi e kosnan akí pa boso no hasi piká. Ma si un di boso hasi piká, nos tin Hesu-Kristu, Esun sin piká, pa boga pa nos serka Dios Tata. 2Hesus mes a bira e sakrifisio pa pordon di nos pikánan, no solamente pa esnan di nos, ma pa piká di henter mundu.
3T'asin'akí nos por ta sigur ku nos konosé Dios, esta si nos obedesé su mandamentunan. 4Esun ku bisa: ‘Mi konosé Dios’, ma no ta obedesé su mandamentunan, ta un gañadó i un hende asina no tin bèrdat den dje. 5Ma esun ku obedesé palabra di Dios, ta un hende ku ta mustra ku di bèrdat e tin un amor perfekto pa Dios. Di e manera akí nos ta mira ku nos ta uní kunÉ. 6Esun ku bisa ku e ta uní ku Dios, mester biba meskos ku Hesu-Kristu a biba.
E mandamentu nobo
7Mi keridonan, mi no ta skibi e karta akí pa duna boso un mandamentu nobo, pero e bieu ayá ku boso a haña for di prinsipio. E mandamentu bieu ei ta e mensahe ku boso a tende kaba. 8Pero tòg e mensahe ku mi ta skibi boso awor akí ta nobo. Por mira su bèrdat den Kristu i tambe den boso mes, pasobra e lus berdadero ta bria kaba i skuridat ta disipando.
9Es ku bisa: ‘Mi ta biba den lus’, ma ta odia su ruman, ta ketu bai den skuridat! 10Es ku stima su ruman ta biba den lus i no ta kousa kaida di su ruman. 11Ma esun ku ta odia su ruman ta den skuridat i ta manera hende ku ta kana den sukú; e no sa unda e ta bai, pasobra skuridat a hasié siegu.
12Mi yunan stimá, mi ta skibi boso,
pasobra boso pikánan ta pordoná pa medio di Hesus.
13Tatanan, mi ta skibi boso,
pasobra boso konosé Esun ku tabat'ei for di kuminsamentu.
Hóbennan, mi ta skibi boso,
pasobra boso a vense e malbado.
14Mi yunan, mi a skibi boso,
pasobra boso konosé Dios Tata.
Tatanan, mi a skibi boso,
pasobra boso konosé Esun ku tabat'ei for di kuminsamentu.
Hóbennan, mi a skibi boso, pasobra boso ta fuerte;
palabra di Dios ta biba den boso i boso a vense e malbado.
15No stima mundu ni nada ku ta pertenesé n'e. Esun ku ta stima mundu no ta stima Dios Tata. 16Pasobra nada di loke mundu ta ofresé no ta bini di Tata, esta deseo pekaminoso, gana di kos ku ta atraé bista di hende i kana prònk ku loke bo tin, ma tur ta bini di mundu. 17Ademas mundu i su deseonan ta pasahero, ma esun ku hasi boluntat di Dios ta biba pa semper.
Antikristu
18Mi yunan, e ora final a yega! Boso a tende ku antikristu ta bini, awèl, awor hopi enemigu di Kristu a sali bini dilanti i p'esei mes nos sa ku e ora final a yega. 19E hendenan akí a sali bai for di nos mes grupo; pero en realidat nan no tabata di nos. Pasobra si nan tabata di nos, nan lo a keda serka nos. Ma nan a bai, ya ta sali na kla ku niun di nan no tabata di nos. 20Boso tur sí a keda konsagrá dor di Esun santu i boso tur tin konosementu. 21Mi ta skibi boso, no pasobra boso no konosé e bèrdat, ma pasobra boso konos'é i boso sa ku niun mentira no ta sali for di Esun ku ta bèrdat. 22Ta ken antó ta e gañadó? Ta esun ku nenga ku Hesus ta e Mesias ku mester a bini. E persona ei ta e antikristu. E ta nenga e Tata i e Yu. 23Pasobra esun ku nenga e Yu no tin e Tata tampoko; esun ku deklará su mes na fabor di e Yu, tin e Tata tambe.
24Sòru pa boso warda e mensahe ku boso a tende for di kuminsamentu den boso kurason. Si boso warda e mensahe ei den boso kurason, boso ta keda den e Yu i den e Tata. 25Anto ata loke Kristu mes a primintí di duna nos: bida eterno.
26E kosnan ku mi ta skibi boso akí tin di aber ku e hendenan ku ta purba desviá boso. 27Pero boso sí, El a konsagrá i esaki ta e unshon ku ta keda den boso kurason i boso no tin mester di niun otro maestro pa siña boso. Pasobra e unshon akí ta siña boso tur kos i no ta un engaño, e ta berdadero. Keda den Kristu manera su unshon a siña boso.
28Sí, mi yunan stimá, keda den Kristu, pa ora E aparesé, nos lo por ta yen di konfiansa i lo no pasa bèrgwensa riba dia di su regreso. 29Ya ku boso sa ku Kristu ta hustu, boso sa tambe ku tur hende ku hasi loke ta hustu, a bira yu di Dios.

 1 HUAN 3

Yunan di Dios
1Mira kuantu Dios Tata ta stima nos: E ta pèrmití nos karga e nòmber ‘yu di Dios’! Anto enberdat esei nos ta tambe! Ta p'esei mes esnan ku ta sigui mundu no sa ken nos ta, pasobra nan no a siña konosé Dios. 2Keridonan, awor akí nos ta yu di Dios i ounke te ainda no ta revelá loke nos lo bira, nos sa ku ora Kristu bini nos lo ta manera E, pasobra nos lo mir'É manera E ta en realidat. 3Anto esun ku ta karga e speransa akí den Kristu, ta mantené su mes puru, meskos ku Kristu mes tambe ta puru!
4Ken ku sigui den piká ta promové anarkia, pasobra piká ta rebeldia kontra Dios. 5I boso sa ku ta pa kita piká Kristu a bini i ku den djE no tin piká. 6P'esei es ku keda den djE, no ta sigui den piká. Ma ken ku sigui hasi piká no a konos'É ni sa ken E ta.
7Mi yunan stimá, no laga niun hende pone boso desviá. Ta e hende ku hasi loke ta agradabel den Dios su bista ta hustu, meskos ku Kristu ta hustu. 8Esun ku sigui den piká ta pertenesé na diabel, pasobra ta for di kuminsamentu di mundu kaba diabel a bini ta peka. Anto ta pa destruí diabel su obranan mes Hesus a bini.
9Es ku a bira yu di Dios no ta sigui den piká, pasobra e poder dibino ku ta duna bida ta biba den dje, i komo Dios ta su Tata, e no por sigui den piká. 10Na esaki nos ta rekonosé ken ta yu di Dios i ken ta yu di diabel: esun ku no ta hasi loke ta hustu den bista di Dios, no ta pertenesé na Dios, i spesialmente esun ku no ta stima su ruman.
Stima otro
11Ta e mensahe akí mes boso a tende for di kuminsamentu: ku nos mester stima otro. 12Nos no mester hasi manera Kain, ku tabata pertenesé na e malbado i a asesiná su mes ruman Abel! Anto pakiko el a asesin'é? Pasobra Kain mes tabata hasi maldat, ma su ruman sí tabata hasi loke ta hustu. 13Ke men anto, rumannan, no keda sorprendí ku mundu ta odia boso. 14Pasobra nos ta stima nos rumannan, nos sa ku nos sí a pasa di morto pa bida. Esun ku no ta stima, ta sigui den gara di morto. 15Ken ku odia su ruman ta igual na un asesino i nos sa ku un asesino no por keda ku bida eterno den dje. 16Ata kon Hesus a siña nos kiko ta amor: El a entregá su bida pa nos. Asina nos tambe ta obligá di entregá nos bida pa nos rumannan. 17Un hende ku ta poseé hopi kos di mundu i ta sera su kurason pa su ruman ku e ta mira den nesesidat, kon un hende asina por tin amor di Dios den dje? 18Mi yunan stimá, no laga nos stima ku boka i palabra so, ma laga nos stima di bèrdè mes, ku echo!
Konfiansa dilanti di Dios
19Ta asin'ei nos lo haña sa si nos ta pertenesé na e Dios berdadero i tambe si nos por keda ku un kurason trankil dilanti di Dios, 20ki ora ku nos kurason ta kondená nos. Pasobra nos sa ku Dios ta mas grandi ku nos mes kurason, i E sa tur kos. 21Keridonan, si nos kurason no kondená nos, esei ta nifiká ku nos por bai serka Dios ku konfiansa, 22i nos ta haña tur kos ku nos pidiÉ, pasobra nos ta obedesé su mandamentunan i ta hasi loke ta agrad'É. 23Anto Dios su mandamentu ta: kere den e persona di su Yu Hesu-Kristu i stima otro manera El a manda nos. 24Esun ku obedesé Dios su mandamentunan ta keda den Dios i Dios ta keda den dje. Anto ku E ta keda den Dios, nos sa pasobra nos tin e Spiritu ku El a duna nos.

 1 HUAN 4

Spiritu di Dios i spiritu di e antikristu
1Keridonan, no kere tur hende ku pretendé ku nan tin Spiritu di Dios, sino mira si e spiritu ku nan tin ta pertenesé na Dios. Pasobra ta hopi profeta falsu a sali bai den mundu. 2Ta na lo siguiente boso por mira si hende tin Spiritu di Dios òf nò: si e rekonosé ku Hesus ta e Kristu ku a bini na mundu komo ser humano. E hende akí tin e Spiritu ku ta pertenesé na Dios. 3Ma esun ku no rekonosé i proklamá ken Hesus ta, no ta pertenesé na Dios. Ta e spiritu di e antikristu ta manifestá su mes den e persona ei. Boso a tende kaba ku e spiritu di e antikristu mester bini; wèl, e ta na mundu kaba!
4Mi yunan, boso ta pertenesé na Dios i boso a vense e profetanan falsu, pasobra Esun ku ta den boso ta mas poderoso ku esun ku ta den mundu. 5E profetanan falsu ta pertenesé na mundu, p'esei nan ta papia fo'i punto di bista di mundu, i hende mundano ta tende di nan. 6Ma nos ta pertenesé na Dios; esnan ku konosé Dios ta tende di nos, ma esnan ku no konos'É no ta tende di nos. T'asin'akí anto nos por diserní ken tin e Spiritu di bèrdat i ken tin e spiritu di engaño.
Dios ta amor
7Keridonan, laga nos stima otro, pasobra amor ta bini di Dios. Tur ku ta stima a nase di Dios i konosé Dios. 8Esun ku no ta stima, no konosé Dios, pasobra Dios ta amor. 9Na esaki nos ta mira Dios su amor pa nos: El a manda su úniko Yu na mundu, pa asina nos biba pa medio di djE. 10T'esaki ta amor: no ta nos a stima Dios promé, sino t'É a stima nos i a manda su Yu pa E bira e sakrifisio pa pordon di nos pikánan.
11Keridonan, si t'asina Dios a stima nos, nos tambe mester stima otro! 12Nunka niun hende no a yega di mira Dios, ma si nos stima otro, Dios ta biba den nos i su amor ta keda realmente perfekshoná den nos.
13E prueba ku nos ta keda den Dios i ku E ta keda den nos, ta ku El a duna nos su mes Spiritu. 14I nos a mira i ta testiguá ku Dios Tata a manda su Yu komo Salbador di mundu. 15Esun ku rekonosé i proklamá ku Hesus ta Yu di Dios, Dios ta keda den dje i e ta keda den Dios. 16Asina nos a haña sa i kere ku Dios ta stima nos. Dios ta amor i esun ku ta biba ku amor ta keda den Dios i Dios ta keda den dje. 17Asin'akí amor ta keda realmente perfekshoná den nos, esta ora nos tin konfiansa riba dia di huisio, pasobra aki na mundu kaba nos ta biba ku amor meskos ku Hesus. 18Kaminda tin amor, no tin miedu, al kontrario, amor realmente perfekshoná ta kore ku miedu. Miedu tin di aber ku kastigu, p'esei amor di un hende ku ainda tin miedu no a yega na perfekshon.
19Nos ta stima, pasobra Dios a stima nos promé! 20Si un hende bisa: ‘Mi ta stima Dios’, pero e no ta stima su ruman, e ta un gañadó! Pues si un hende no por stima su ruman, ku e ta mira, e no por stima Dios, ku e no ta mira, tampoko. 21Esun ku ta stima Dios mester stima su ruman tambe; esei ta e mandamentu ku nos a haña di djE.

1 HUAN 5

Fe ta duna viktoria riba mundu malbado
1Ken ku kere ku Hesus ta e Mesias, a nase di Dios. I esun ku ta stima un tata, ta stima e tata ei su yunan tambe. 2E prueba ku nos ta stima Dios su yunan ta: nos ta stima Dios i ta hasi loke E manda! 3Pasobra stima Dios ke men kumpli ku su mandamentunan. Anto su mandamentunan no ta un peso pa nos, 4pasobra e echo ku un hende a nase di Dios ta loke ta vense mundu i ta nos fe den Kristu a duna nos e viktoria ku a vense mundu. 5Ken por vense mundu si no ta esun ku ta kere ku Hesus ta Yu di Dios?
Testimonio na fabor di Kristu
6E mesun persona ku a pasa den awa di boutismo a drama su sanger tambe, esta Hesu-Kristu. No ta awa so, sino awa i sanger. Spiritu di Dios mes ta testiguá ku esei ta bèrdat, pasobra e Spiritu ta e bèrdat. 7Sí, tin tres testigu: 8Spiritu, awa i sanger; nan tur tres ta duna e mesun testimonio. 9Ku testimonio di hende mes nos ta aseptá, kuantu mas nos lo no aseptá testimonio di Dios, ku tin muchu mas balor? Pasobra e testimonio ku Dios a duna nos ta tokante su Yu. 10Esun ku kere den Yu di Dios, tin testimonio di Dios den su kurason; ma esun ku no kere Dios, ta hasi Dios un gañadó, pasobra e no a kere e testimonio ku Dios a duna tokante su Yu. 11I esaki ta e testimonio: Dios a duna nos bida eterno, i e bida ei ta bini pa medio di su Yu. 12Esun ku tin e Yu, tin bida; esun ku no tin e Yu di Dios, no tin bida!
Siguransa di bida eterno
13Mi ta skibi boso e kosnan akí, pa boso sa sigur ku boso tin bida eterno, boso ku a pone boso konfiansa den e Yu di Dios. 14Anto e konfiansa ku nos tin den Dios ta, ku ora nos pidiÉ algu ku ta di akuerdo ku su boluntat, E ta skucha nos. 15I si nos sa ku E ta skucha tur nos petishonnan, nos sa tambe ku nos ta haña loke nos a pidiÉ.
16Si un hende mira su ruman hasi un piká ku no ta hiba na morto, e mester resa p'e na Dios i Dios lo dun'é bida. Esaki ta konta solamente pa esnan ku no a hasi piká ku ta hiba na morto. Tin piká ku ta hiba na morto; mi no ta bisa ku mester resa pa esnan ku a hasi un piká asina! 17Tur maldat ta piká, pero tin piká ku no ta hiba na morto.
18Nos sa ku esun ku a nase di Dios no ta sigui den piká, pasobra Yu di Dios ta kuid'é i e malbado no por mishi kuné. 19Nos sa ku nos ta pertenesé na Dios i ku tur otro hende na mundu ta den gara di e malbado. 20Pero nos sa ku Yu di Dios a bini i ku El a duna nos komprondementu pa nos konosé Esun berdadero. Nos ta biba den komunion ku Esun berdadero, pasobra nos ta den komunion ku su Yu, Hesu-Kristu. E ta e Dios berdadero i E ta bida eterno. 21Mi yunan, keda leu fo'i tur kos ku ke tuma e Dios akí su lugá!
 
 https://www.bible.com/pt/bible/818/1jn.1.bpk13

Nenhum comentário:

Postar um comentário