sexta-feira, 27 de novembro de 2015

1 JUÁNUERI: PUREPECHA


1
Tsípekueri uandakua
1Karachentaxakaksïni enga xáni ambe uénani jámantki jápka, ka imantu ísï engachi xáni ambe kurhaka, ka engachi xáni ambe juchari jimbo exekorheka, ka engachi xáni tsípekueri Uandakua ambe p'árheka, 2jimboka Tsípekua xarharaska, ka juchachi exeska ka xarhataxakachi ka méntkisï anapu tsípekueri ambechi uandantaxaka, enga Diósï Táte jinguni jápka ka engajtsïni xarhacheka. 3Indeni ambeksïni aianguxamka engachi xáni ambe exeka ka kurhani, eskajtsï ísï jámani chájtu jucha jinguni májkuentatini jauaka. Eskani jucha Táte jinguni ka Uájpa Jesukristu jinguni na májkuentatini jaka. 4Íni ambechi karantaxaka eskachi ísï jámani sánderu kánekua tsípeaka.
T'ímarhandu irekani jarhani
5Ka indeni aiangperakuachisï Jesusini kurhajchaka, engaksïni iásï chánksïni aianguntani jaka: eska Diósï t'ímarhandekueska, ka eska ima nósani p'ájpakandekua jukaraska. 6Ekachi uandaparini jámka eskachi ima jinguni májkuentatixaka, ka jinichi p'ájpakandu irekani jarhani, chkuándirasïngachi ka nóchi ísï irekaxaka eska néka. 7Ka engachi t'ímarhandu irekani jarhajka, ísï eska Diósï na t'ímarhandu jaka, ísïchi k'óru májkuentatixaka, ka Uájpa Jesusiri iurhirijtsïni iámendu járhati k'amanharhintskuechani p'ikurhentasïndi.
8Engachi uandajka eskachi k'amanharhintskua nóma jukaraska, jandiojkuchi tandosï úkorhesïnga ka ima enga ísïka no jucha jinguni jarhasti, 9k'óru engachi p'amongorhentaska, úakachi mintsikani jarhani eskajtsïni Diósï púachentaaka. Ima enga nómeni jurajpejka ka kaxumbitini. Ka eskajtsïni iámu pímbinhajkuntajka. 10Engachi uandajka eskachi nómeni k'amanharhintaska, Diósïnichi chkuándira úntaxaka ka imeri uandakua nótki jucha jinguni jámaxati.

2
1Jucheti uátsïticha, íni ambeksïni karachexaka, eskajtsï ísï jámani no k'amanharhintaaka. Ka eka nema k'amanharhintaska, kángorhesïngachi ma, ne engajtsïni Diósïni japarini kuájpentaaka: Jesukristuni, enga kaxumbitika. 2Jesukristu, juchari k'amanharhintskuechani jimbo aiakorhesti uarhini, ka no juchari jimbojku, iámu parhakpeni anapuechani jimbo uarhisti.
Xénhchperakueri juramukua
3Ekachi Diósïri juramukuechani kurhandirakuajka, indeni jimbochi xarhatasïnga eskachi Diósïni míteska. 4Ne enga uandajka: “Ji Diósïni míteska” ka jini no kurhandirakuni imeri juramukuechani, chkuándiresti ka ima ambe enga ísïka no ima jinguni jámaxati. 5Diósïri xénhchperakua iámu xarharasïndi enga nema uandakuani kurhandirakujka. Ka indeni ambe jimbochi mítesïnga eskachi imani jinguni jarhasïngia. 6Ne enga uandajka eska Diósï jinguniskia, uétarhesïndi eska ísï irekaakia eska Jesukristu na irekapka.
7Jucheti xénhchakatecha, nóksïni jimbanhe ma juramukua karachexaka, imesti enga cha uénani jámantki jatsirini jápkia; íni ióntki anapu juramukuantsï kurhariskia. 8Ka k'óruksïni ísï íntskuxaka eska ambe jimbanheni, enga chári jimbo ka Jesukristueri jimbo ísïka; jimboka pájpakandekua nitamaxakaia ka jimboka t'ímarhandekua, enga ísïka, t'íntskaraxakaia. 9Eka nema uandajka eska t'ímarhandu jarhaskia ka jini erachi jémbani kurhunhekuni jarhani, útasteru pájpakandu jámaxati. 10Ne enga erachi jémbani xénhchajka, t'ímarhandu jarhasti, ka nómbema ójkutasïndi; 11ka jimini ménderueni, ne enga erachi jémbani kurhunhejka pájpakandu jámaxati, ka no mítesti nani niraxamki, jimboka pájpakandekua pátenharhitaskia.
12Jucheti uátsïticha, íni ambeksïni karachexaka jimbokaksïni Diósï, Jesukristuni jimbo k'amanharhintskuechani puáchentaskia. 13Íni ambeksïni karachexaka chánksïni engajtsï míakua jukarikia, jimbokajtsï cha míteska imani enga uénani jámantkikia. Ka chánksïni tumbicha, karachexakaksïni jimbokajtsï nóambakitini úska andani.
14Jucheti uátsïticha, karacheskaksïni jimbokajtsï Táteni míteskia. Chánksïni engajtsï sapichani káajka, karacheskaksïni jimbokajtsï míteskia imani enga uénani jámantkikia. Tumbicha, karachexakaksïni jimbokajtsï uinhapiti jarhaska, Diósïri uandakua cha jinguni pakarasïndi ka nóambakitintsï andaskia.
15Ásï parhakpeni anapu ambe xénhcha je ka imani ambejtu ásï xénhcha je enga parhakpeni jaka. Eka nema parhakpeni anapu ambe xénhchajka, Táteri xénhchperakua no imani jinguni jarhasti. 16Jimboka no Táteriska iámendu ambe enga xáni parhakpeni jaka: ísku jánhchani; iámu ambe atamarheni, ka jatsikorhekua jimbo sési xékorheni. 17Íni parhakpeni anapu atamarhekua ísku nitamamasïndi; ka ima enga Diósïni kurhandirakujka méntkisï jauati.
18Jucheti uátsïticha, parhakpeni k'amarhuxamtia ka chájtsï míteska eska Krístu eratakorheti juuaka, ima enga Krístuni ikiakujka; enga úka, uánekuaksï Krístueri ikiatspiricha xarharastia. Jimbochisï míteka eska parhakpeni k'amarhuxamkia. 19Imaksï jucha jingunispti, enga úka, nóksï jucharispti. Ekaksï sési jimbo jucharipiringa, jucha jinguniksï pakarapirindi, ka imaksï nirasti ka ísï jámanksï xarhatasïndi eska nóma ima jucharispka. 20Ka chánksïni k'óru, Krístu enga Sántueka, imaksïnisï Espiritu Sántuni íntskuti, jimbojtsïsï iámenduecha míteka ambe enga ísïka.
21Nóksïni karachexaka jimbokajtsï no míteska imani enga ísïka, sánderu sánksïni karachexaka jimbokajtsï míteskia; ka jimbokajtsï míteska eska nóma chkuándirakua imeriska enga ísïka. 22Ka nóchka imasï chkuadire andi enga uandajka eska Jesusi no Krístueska. Indechkaksïsï Krístu eratakorhejti engaksï Krístuni ikiakujka jimbokaksï Táteni no jiókorhesïnga ka engaksï Uájpantu no jiókorhejka. 23Ne enga Uájpani no jiókorhejka, Táteni no kángorhesïndi; ka ne enga uandakorhejka eska Uájpa jinguniska, ima Tátentu kángorhesïndia.
24Ísï jimbo patsanhekorhe je imani ambe engajtsï uénani jámantki kurharikia; eka chári mintsitarhu ima ambe jaka engajtsï uénani jámantki kurhaka, chájtujtsï Uájpa ka Táte jinguniuaka. 25Indenimendujtsïnisï Jesukristu aiacheti: eska chári tsípekua nómeni k'amakurhiaka. 26Íni ambeksïni karachexaka imechani míaparini engaksïni uéjka támu jánhastani. 27Enga úka, chájtsï kámaxaka Espiritu Sántuni, engaksïni jimbo Jesukristu míngorhentaka, ka nójtsï uétarhenchasïnga eskaksïni máteru nema juuaka jurhendani, jimboka ima Espiritu engaksïni ima íntskuka, imaksïni iámu ambe jurhendasïndi ka ima ambe nómbema chkuándirakuesïndi, iámendu ambe ísïsïndi. Cha Krístu jinguni jámani ja je, eskaksïni Espiritu na jurhendaka.
28Ka iásïa, jucheti uátsïticha, Krístuni jinguni ja je, ísï jamantsï nómbema chérheaka enga ima xarhantaaka ka nómbemachi k'uratsenharhini enga junguakia.
K'amanharhintskua jurajkuni
29Ekajtsï mítetini jaka eska Jesukristu kaxumbeska, mítetini jakajtujtsï eska Diósï uájpeska ne engaksï kaxumbeka.

3
1Exe je na engajtsïni Táte xáni xénhchaka; jamberi úeksïndi eskachi Diósï uájpa arhinhaaka, ka jindeskachi. Jimbojtsïnisï parhakpeni anapuecha no míteti, jimbokaksï ima Diósïni no míteska. 2Xénchakatecha, náuejkichi Diósï uájpekia, nótki xarharasïndi tátsekuachi ambeuaia, mítetixakachi k'óru eskachi jucha Jesukristueni járhantaaka, jiájkani enga ima xarhantaaka, jimbokachi jiákani k'óru sési exeaka ima néna enga jáxeka. 3Ka ne enga Jesukristuni mintsikani jaka, jángorhentasïndi pímbinhaxekorhentani májkueni eska ima na pímbinhaxeka.
4Ne enga k'amanharhintajka, Diósïri juramukuanisï no kurhandirakujti, jimboka k'amanharhintskueska Diósïri juramukuani no kurhandirakuni. 5Chájtsï míteska eska Jesukristu parhakpeni k'amanharhintskuechani jurhaska euajpeantaani, ka eska ima nómbema k'amanharhintstiska. 6Ne enga ima jinguni jámani jaka, nóteru k'amanharhintasïndia; ka ne enga útasï k'amanharhintani jaka, nómeni exeristi Jesusini ka nójtu mítesti. 7Jucheti uátsïticha, ásïksïni nema támu jánhaste: ne enga sési ambe újka imasï kaxumbititi, ísï eska Krístu na kaxumbeka; 8Ne enga k'amanharhintani jaka ima nóambakitiristi, jimboka nóambakiti uénani jámantkisï k'amanharhintani jaka. Ka Diósï Uájpa indenimendusï úni juti: Nóambakitiri úkuani xerentani.
9Nónema enga Diósï uájpeka k'amanharhintasïndi, jimboka Diósï jimbanhe irekua íntskuskia; ka jimboka Diósï uájpeskia, nóteru úatia k'amanharhintani. 10Sóntku jánhaskorhesïndi ne engaksï Diósï uájpejka ka ne engaksï nóambakiti uájpejka; ne enga nósesi ambe újka o enga erachi jémbani no xénhchajka, ima no Diósï uájpesïndi.
Xénhchperakueri juramukua
11Ka kurhaskajtsïa uénani jámanitki arini aiangperakuani: eskachi xénhchperaaka. 12Ju je no Kainini jámani, ísï nóambakiti uájpeni, erachi jémbani atasti uándikuni. Ka ¿andisï uandikupkia? jimboka ima nósesi ambe niátasïrempka ka jimboka erachi jémba sési ambe úsïrempka. 13Erachicha, ásï nósesi xe je engaksïni parhakpeni anapuecha íkimchaska, 14juchachi mítetixaka eskachi uarhikuani jurajkuskia ka eskachi iásï tsípekuarhu jarhaskia, jimbokachi juchari erachichani xénhchaasïnga. Ne enga no xénhchpejka, uarhirixati. 15Ne enga erachi jémbani ikimchajka atajpitisti, ka mítetixakajtsï eska nóma atajpiti sési jásï tsípekua intsïnhaaka. 16Míteskachi néna xénhchpeni, jimboka Jesukristu juchantsïni jimbo tsípekua íntspeska. Jimbochisï juchajtu máteruechani jimbo tsípekua íntspeaka. 17Eka nema jatsikorherika ka exeni jarhani eska erachi jémba uétarhenchaxaka ka ima nómbema p'ikuarhenheni, ¿nénasï úaia Diósï imeri mintsitarhu jarhani? 18Jucheti uátsïticha, xénhchpeni no uandakua jimbojkuesïndi, enga sési jimbo xénhchperanhajka; sési jánhasïndi ka sési ambe únhasïndi. 19Ísïchi jámani jánhaskaaka eskachi ima jinguniska enga ísïka, ka Diósïni jingunichi sési p'ikuarhenheni jauaka; 20jimboka ekajtsïni juchari mintsita nósesi ambe p'ikuarhenhetani jarhajka, Diósï sánderu k'éristi eska juchari mintsita, ka ima iámendu ambe mítetixati. 21Xénhchakatecha, engachi sési p'ikuarhenheni jarhajka, úsïngachi Diósïni no chérheparini andarherani; 22ka imajtsïni iámendu ambe íntskuati eskachi xáni ambe kurhakuska, jimbokachi imeri juramukuani kurhandirakuni jauaka, ka jimbokachi imani ambe úni jarhasïnga enga ima uéjka. 23Ka imeri juramukua arhisïndi eskachi Uájpa Jesukristuni jakajkukuaka, ka eskajtuchi xénhperaaka eskajtsïni ima na juramucheka. 24Ne engaksï Diósïri juramukuechani kurhandirajkia, ima jingunistiksïa, ka imajtu imechani jinguni irekaxatiia. Ka Espirituni jimbochi jánhaskasïnga engajtsïni íntskuka, eska ima jucha jinguni irekaxakaia.
 
4
Jakajkukua ambakiti
1Xénhchakatecha, ásï jáma je ne uéjkini jakajkukuni, urheta ts'éjkua je eska imecheri espiritu Diósïriska, jimbokaksï parhakpeni jámaxaka uánekua Diósïri uandari eratakorhecha. 2Enga arhijtsïkpiri ma uandajka ka jakajkuni eska ísïska eska Jesukristu k'uiripueni jurhaska parhakpeni, ima Diósïni jimbo uandaxati. 3Ka ne engaksï Jesusini no jiókorhejka, imaksï no Diósïristi ka imaksïsï Krístu eratakorhejti. Chájtsï mítetixapkia eska ísï jánhaskorhepiringa, ka ísï janhaskorhexatiia. 4Jucheti uátsïticha, chájtsï Diósïriska ka imechantsï andaarixakaia. Jimboka ima enga cha jinguni jaka sánderu k'ériska eska ima enga parhakpeni jámani jaka. 5Imaksï parhakpeni anapuesti, jimboksïsï parhakpeni anapu ambe uandaxejti, ka parhakpeni anapuechaksï jarhasïndi kurhajchaani. 6Juchachi Diósïriska. Ka imajtsïni kurhajchasïndi ne enga Diósïni míteka, ka ne enga no Diósïrika, imajtsïni no kurhajchasïndi. Ísïchi jánhaskasïnga eska espiritu sési jimboesïnga o eska nósesi jimboesïnga. 7Jucheti xénhchakatecha, ju je xénhchperani, jimboka xénhchperata Diósïriska, ka ne enga xénhchpejka, Diósïri kueraakatesti ka Diósïni mítesti. 8Ne enga no xénhchpejka, Diósïni nótki mítesïndi, jimboka Diósï, xénhchperakueska. 9Ima jimbo xarharasti eskajtsïni Diósï xénhchasïnga, enga parhakpeni axaka májku Uájpani enga kángorheka, eskachi imani jimbo tsípekua jatsiaka. 10Imeri xénhchperakua arisïsti: nóchi juchasï Diósïni xénhchaka, imajtsïnisï xénhchati ka Uájpantsïni axachesti eska juchari k'amanharhintskuechani jimbo ima uándikunhapiringa. 11Jucheti xénhchakatecha, engajtsïni Diósï xáni xénhchaka, juchajtuchi jatsiska májkueni xénhchperani. 12Diósïni nómeni, nónema exeristi. Engachi xénhchperajka, Diósï jucha jinguni jarhasïndi ka imeri xénhchperakuajtsïni k'amak'amasï janochestia. 13Jimbokajtsïni imeri Espirituni íntskusïngia, ísï jimbochi jánhaskasïnga eskachi ima jinguni jarhasïngia ka eska imajtu jucha jinguni jarhasïngia: 14Ka juchachi exekorheriskia ka uandantasïngachi eska Táte, Uájpani axaska eska iámu parhakpeni anapuechani ima p'íjpantaapiringa. 15Ne enga uandajka eska Jesusi Diósï uájpeska, Diósï jinguni irekaxati ka Diósïjtu ima jinguni irekaxati.
16Ísï jámanichi mítesïnga eskajtsïni Diósï xénhchasïnga ka mintsikasïngachi imani xénhchperakuani. Diósï xénhchperakuesti ka ne enga xénhchpejka, Diósï jinguni jarhasïndi ka Diósïjtu ima jinguni jarhasïndi. 17Ísï jámani úsïndi xénhchperata k'amak'amasï juchantsïni jinguni jarhani ka ísï jámanchi mintsikani jauaka imani jurhia enga arhinharhikperanhaaka, jimbokachi jucha ixu parhakpeni májkueni írekaxakaia eska Jesukristu. 18Ne enga xénhchpejka, chéta no jatasti. Sánderu sáni k'amak'amasï xénhchperata jatasti, xénhchperata chétani kénditatspesïndi, jimboka chéta ikimekua jinguniska. Ísï jimbo ne enga chéjka, arhikuekasïndi eska nótki k'amak'amasï xénhchpesïnga. 19Juchachi xénhchpesïnga jimbokajtsïni Diósï urheta xénhchaska. 20Eka nema uandajka: “Ji Diósïni xénhchasïnga”, ka erachi jémbani kurhunheni, ima chkuándiresti; jimboka ne enga erachi jémbani no xénhchkajka, enga exeni jaka, no úati Diósïni xénhchani enga nómeni exerika. 21Ka Jesusijtsïni arisï juramuchesti: ne enga Diósïni xénhchajka, erachi jémbantu xénhche.

5
Jakajkukuarhu uénasïndi xénhchperata
1Ne engaksï jakajkuka eska Jesusi Krístueska, imaksï Diósï uájpesti; ka ne enga tátjembani xénhchkajka, tátjemberi uájpechantu xénhchaasïndi. 2Engachi Diósïni xénhchajka ka kurhandirakunchi imani ambe enga ima juramujka, ísïchi mítesïnga eskachi Diósï uájpechantu xénhchaasïnga. 3Ka xarhatasïngachi eskachi Diósïni xénhchasïnga engachi kurhandirakuaka, ka no úkua jukasti imeri juramukuechani kurhandirakuani. 4Jimboka ne enga Diósï uájpeka, parhakpeni anapuechani andaasïndi, ka juchari jakajkukua andaastia parhakpeni anapuechani. 5Ka ne enga jakajkujka eska Jesusi Diósï uájpeska, parhakpeni anapuechani andaastia. 6Jesukristusï juchantsïni jinguni itsï ka iurhiri jimbo juti: ka no itsï jimbojku, sánderu sáni itsï ka iurhiri jimbosï juti; ka Espiritu uandantaxati jimboka Espíritu imeska enga ísïka. 7Tanimuksï uandantasïndi: 8Espiritu ka itsï ka iurhiri, ka taniperanksï terukutasïndi. 9Ekachi jakajkujka enga nema uandantajka, Diósïri uandakua sánderu jakajkukuesti, ka arinisï Diósï uandajti, enga Uájperi ambe uandantajka: 10Ne enga Diósï Uájpani mintsikajka, uandantskuani mítesti ka ima jinguni jámaxati. Ka ne enga Diósïni no jakajkukujka, Diósïni chkuándira úntani jarhasïndi, jimboka Diósïnisï no jakajkukuni jaka, enga Uájperi ambe uandantajka. 11Ka aristi uandantskua: Diósïjtsïni méntkisï anapu irekua íntskusti ka indeni jásï irekua Uájpa jinguni jarhasti. 12Ne enga Diósï Uájpani kámani jaka, indeni jásï irekuajtu kámaxatia; k'óru ne enga Diósï Uájpani no kángorheni jaka, no jatsikorhetixati indeni jásï irekua.
K'amarhukutarakua
13Íni ambeksïni karachexaka chánksïni engajtsï jakajkujka Diósï Uájpani, eskajtsï míteaka, eskajtsï méntkisï anapu irekuani jatsikorhetixaka. 14Diósïnchi k'amak'amasï mintsikasïnga, jimboka engachi kurhakuska ísï eska ima na uéjka, imajtsïni kurhasïndi. 15Ka engachi míteka eskajtsïni kurhasïnga ambe engachi kurhakujka, t'uínchi intsïnhatini janhasïngia ambe engachi kurhakujka. 16Eka nema exejka erachi jémbani eska no uarhikua ambe k'amanharhintaxaka, uétarhesïndi arhijpekuni ka Diósï imani tsípekua íntskuati, eka no uarhikueka. Ma k'amanharhintskua jarhasti enga uarhikueka, ka indeni jimbo no uandaxaka eskajtsï kómarhijpekuaka. 17Iámendu nósesi úkua k'amanharhintskuesti; k'óru jarhasti k'amanharhintskua enga no uarhikueka. 18Míteskachi eska ne enga Diósïri kueraakatekia, nóteru k'amanharhintaxakaia, jimboka Diósïri Kueraakata eranguni jarhasïnga, ka Nóambakiti nóteru p'árhesïndia. 19Míteskachi eskachi Diósïriska ka eskaksï iámendu parhakpeni anapuechani Nóambakiti juramukuaxaka. 20Míteskajtuchi eska Diósï Uájpa jurhaska ka eskajtsïni kurhangutarakua íntskuska engachi jimbo Diósïni míteaka, imani enga ísïka. Juchachi imani jinguni jarhaska enga ísïka, Uájpa Jesukristuni; imasï Diósïti enga ísïka ka enga méntkisï tsípekueka. 21Uátsïticha, diósï eratakatechani ásï andarheraa je.

https://www.bible.com/pt/bible/549/1jn.1.pnt

Nenhum comentário:

Postar um comentário