terça-feira, 17 de novembro de 2015

Da Numba One Letta From John: Hawai'i Pidgin



Wat God Say Make Us Come Alive Inside
11From da time everyting had start, had one Guy, “God's Talk,” dass who him. He da One dat can make da peopo come alive inside fo real. You know, me an da odda guys dat was wit Jesus, we wen hear him, see him wit our own eyes, look at him real good, an touch him wit our hands. 2Da One dat can make everybody come alive inside fo real kine, he wen show up by me an da odda peopo. We wen see him, an now we tell you guys fo shua bout da real kine life he give dat stay to da max foeva. Dat life come from him. He wen stay wit da Fadda, an den show up by us. 3Us guys wen see an hear all dat, an we telling you guys too, so you guys can stay tight wit us. We all stay tight wit da Fadda an his Boy Jesus Christ, da Spesho Guy God Wen Send. 4We write dis stuff to you guys so dat we can stay good inside to da max.

God, He Good
5Dis da stuff Jesus wen tell us, an we tell you guys: God, he good, an wit him fo shua no mo notting bad. He jalike da light, an he no mo dark kine stuff. 6If we say we stay tight wit God, but still yet do bad kine stuff, dass jalike we stay inside one dark place. We stay bulai, an we no do notting da true way. 7But if we do good kine stuff, dass jalike we stay inside da light, jalike God stay inside da light. Den we stay tight wit each odda. You know, Jesus, God's Boy, he wen bleed an mahke, an dass jalike his blood clean us up inside from all da bad kine stuff we wen do.
8If we say we no do bad kine stuff, we stay bulai to ourself, an we donno wass true. 9But if we tell God we sorry fo all da bad kine stuff we wen do wrong, we can trus God fo do wat he wen say he goin do, an do da right ting. God goin hemo our shame, an wash us clean inside from all da stuff we do dass not right. 10If we say we neva do bad kine stuff eva, dass jalike we saying God one bulaia. Den wat he say no stay inside us.

Christ Help Us
21Eh, my good friends! I stay write dis stuff to you guys, so you no do bad kine stuff. But wen get somebody dat do bad kine stuff, we get one Guy dat stay talk to da Fadda fo us. Dass Jesus Christ, da Spesho Guy God Wen Send. He everytime stay do da right ting. 2Jesus, he da one dat wen mahke fo be da sacrifice dat let us guys go an hemo da shame fo all da bad kine stuff we wen do. Jesus wen mahke, not ony fo us, but fo da bad kine stuff dat all da peopo inside da whole world wen do. 3Dis how we stay shua we know God fo real kine: cuz we do da tings he tell us fo do. 4Whoeva say “I know God,” but dey no do wat God tell us fo do, dey one bulaia. Dey donno da true way. 5But whoeva do wat God say, dat show dey get plenny love fo God, an da love an aloha stay coming good to da max inside dem. Dass how we know we God's guys. 6Whoeva say dey stay tight wit God, dey gotta do everyting jalike Jesus wen do.

Da New Ting You Guys Gotta Do
7My good friends, I no write you guys one new ting God say you guys gotta do, but one old ting you guys wen hear from da start. Dis old ting, dass da same stuff you guys wen hear befo. 8Still yet, I writing you guys one new ting God say you guys gotta do. Da new ting stay true bout Jesus an bout you guys. Cuz wen you guys do wat God say, jalike da dark stay going away, an da real light stay shining awready.
9Dis wat God say: whoeva say dey stay inside da light, but hate dea brudda o sista, jalike dey stay inside da dark still yet. 10Whoeva get love an aloha fo dea brudda an sista, jalike dey stay inside da light, an no mo notting inside dem dat goin make anybody do bad kine stuff. 11But whoeva hate dea brudda o sista, jalike dey stay inside da dark. Dey walk aroun inside da dark, an dey donno wea dey going, cuz da dark make um blind.
12I writing to you kids,
Cuz God wen let you guys go
An hemo all da shame
Fo all da bad kine stuff you guys wen do.
He do dat cuz you wen come his guys.
13I writing to you faddas,
Cuz you guys know God fo real kine, who stay from befo time.
I writing to you younga guys,
Cuz you guys wen fight da Bad Guy, da Devil, an win.
14I writing to you kids
Cuz you guys wen know da Fadda fo real kine.
I writing to you faddas,
Cuz you guys wen know da One who stay from befo time.
I writing to you younga guys,
Cuz you guys strong, an wat God say stay inside you guys,
An you guys wen fight da Bad Guy, da Devil, an win.
15No get love fo da bad kine stuff dat stay inside dis world. If anybody get love fo dis world, den dey no mo love fo da Fadda. 16You know, all da bad kine stuff dat stay inside dis world, da kine da peopo like get real bad ony fo make demself feel good, da kine stuff dey like look at an get ony fo demself, an da kine stuff dey get dat let um make big show, all dat no come from da Fadda, but from dis world. 17Dis world an all da stuff da peopo like get, dat goin all pau. But da guy dat do wat God like him fo do, he goin live fo real kine foeva.

Da Peopo Dat Go Agains Christ
18My good friends, da last time stay now. You wen hear dat one guy goin come dat go agains Christ, da Spesho Guy God Wen Send. You know, get plenny guys awready dat go agains Christ. Dass how we know da last time stay now. 19Dem guys wen go way from us, but dey neva come from us. If dey wen come from us, den dey wen stay wit us. But dey wen go way, an dat show dat all dem guys neva come from us.
20But you guys, you wen get power from God's Good An Spesho Spirit, an you guys all know wass true. 21I writing you guys cuz you awready know wass true. You guys know dat if anybody bulai, dass cuz dey no like you fo know wass true, yeah?
22Kay den. Who da bulaia guys I talking bout? Anybody dat say dat Jesus not da Spesho Guy God Wen Send, dey da bulaia guys. Dey da guys dat go agains God's Spesho Guy. Dey no lissen to da Fadda o his Boy. 23Da peopo dat no lissen to God's Boy, God not dea Fadda. But da peopo dat say dat Jesus da Spesho Guy God Wen Send, God dea Fadda.
24Make shua you guys stick wit wat you guys wen hear from da first time. If you guys stick wit dat, den you goin stick wit God da Fadda an his Boy too. 25Dis wat he wen say he goin give us -- da real kine life dat stay to da max foeva.
26I writing you guys dis stuff bout da peopo dat bulai you guys. 27But you guys wen get power from God's Spesho Spirit. He awready stay inside you guys, so you guys no need nobody fo teach you guys. God's Spirit stay teach you guys bout everyting, an wat he teach stay true. He no bulai. So, jalike he wen teach you guys, stick wit him.
28So now, my good friends, stick wit Jesus, so dat wen he come back, we no need be scared o shame in front him. 29You guys know dat God's Spesho Guy everytime do da right ting. So you guys know dat everybody dat do da right ting, dey God's kids.

God's Kids
31Tink bout da kine love an aloha da Fadda wen show us! He even wen call us his kids! An we his kids fo real kine, you know. Az why da peopo inside da world donno wat kine peopo us, cuz dey donno wat kine God. 2My good friends, we God's kids awready. God neva show us yet wat kine we goin be bumbye. But we know dat wen Christ come back, we goin be jalike him, cuz we goin see him jalike he stay. 3Everybody dat know dat, an stay trus Christ, an wait fo him, dat guy make his own heart clean inside, jalike Christ stay clean inside.
4Whoeva do bad kine stuff wen broke God's Rules, cuz wen you do bad kine stuff, dat mean you no lissen to God's Rules. 5You guys know dat Christ wen come fo throw out da bad kine stuff we wen do. Christ, he no do bad kine stuff, eva. 6Whoeva stay tight wit Christ no stay do bad kine stuff. Whoeva stay do bad kine stuff, jalike dey neva see Christ o know him fo real kine.
7My good friends, no let nobody bulai you guys. Whoeva stay do da right kine tings, dey stay right, jalike Christ stay right. 8Whoeva stay do bad kine stuff, dey da Devil's kid, cuz from da first time da Devil stay do bad kine stuff. Dass why God's Boy wen come, fo bus up da bad kine stuff da Devil stay doing.
9Whoeva God's kids no stay do bad kine stuff, cuz jalike God stay live inside dem now. Dey no stay do bad kine stuff, cuz dey come from God. 10Dis how we can know who God's kids an who da Devil's kids. Whoeva no do da right kine tings, not God's kids. Whoeva no mo love an aloha fo dea brudda an sista, dey not God's kids too.

Get Love An Aloha Fo Each Odda
11Da ting you wen hear from da first time say dis: We gotta get love an aloha fo each odda. 12Tink bout da story inside da Bible from befo time. No make like Cain. He wen stick wit da Bad Guy, da Devil, an kill his own brudda. How come he wen kill him? Cuz Cain wen do bad kine tings, an his brudda wen do da right kine tings.
13My bruddas an sistas, wen da peopo inside dis world hate you guys, no let dat blow yoa mind. 14Us guys not mahke inside no moa, but we wen come alive inside fo real kine. An how come we know dat? Cuz we get love an aloha fo our bruddas an sistas, az why. Whoeva no mo love an aloha, stay cut off from God, jalike dey stay mahke inside. 15Whoeva hate dea brudda an sista, jalike dey one guy dat kill peopo. An you know dat one guy dat kill peopo no mo da real kine life dat stay to da max foeva. 16Dis how we know wat real love stay like: cuz Christ wen give himself fo mahke fo us. So den, we gotta be ready fo do da same kine ting fo our bruddas an sistas. 17If get somebody dat get plenny stuffs, an dey see dat dea brudda o sista no mo notting, but dey no mo pity fo dem, how dey can say dat dey get love an aloha fo God? No can. 18My good friends, no can show love wit talk ony, but gotta show da kine love dass fo real, an do good kine tings fo everybody.

We No Need Come Scared In Front God
19So, wen us guys get dat kine love an aloha, den we know dat we stick wit wass true. We tell our own heart dat everyting stay okay now, da way God see us. 20But no matta inside our heart we tinking plenny bout da bad kine stuff we wen do, same time, we know dat God mo big den our heart, an he know everyting bout us guys. 21My good friends, if our heart no tell us we wen do bad kine stuff, we know same time we no need be shame in front God. 22An we get from God wateva we aks him fo do, cuz we do wat he tell us, an do wat he like. 23Dis wat God wen tell us fo do: Trus his Boy Jesus Christ, da Spesho Guy God Wen Send, an get love an aloha fo each odda, jalike he wen tell us. 24Everybody dat do wat God tell us, dey stay tight wit God, an God stay tight wit dem. Dis how we know dat God stay tight wit us, cuz God wen give us his Spirit.

Da True Spirit an da Spirit Dat Bulai
41My good friends, no go trus jus anybody dat say dey get God's Spirit, but check um out fo see if dey come from God. Cuz get plenny fake guys wen go all ova da world. Dey say dey talkas fo God, but dey not. 2Dis how you know da Spirit dat come from God: wen get somebody dat say Jesus Christ wen come one real guy jalike us, dass da guy wit da Spirit dat come from God. 3But wen somebody say dat Jesus neva come one real guy, dass da guy wit da spirit dat no come from God. Dass da same spirit dat stay go agains Christ. You guys wen hear dat one guy dat go agains Christ goin come, an now dat guy stay awready inside da world.
4My good friends, you guys come from God. Da One dat stay inside you guys mo strong den da Bad Guy dat stay inside da world. Dass why you guys wen stand up agains dem guys dat bulai an you guys wen win 5Dem guys dat bulai, dey come from dis world. Dass why da tings dey say come from dis world, an da peopo inside da world lissen to dem. 6But us, we come from God. Da guy dat know God lissen to us. Da guy dat no come from God no lissen to us. Dass how we know da Spirit dat tell da trut an da spirit dat bulai.

God Get Love an Aloha fo Everybody
7My good friends, we gotta get love an aloha fo each odda, cuz love an aloha come from God. Everybody dat get love an aloha, dey God's kids, an know God. 8Da guy dat no mo love an aloha donno God, cuz God everytime get love an aloha fo everybody -- dass how he stay. 9Dis how God wen show us dat he get love an aloha fo us: he wen send his one an ony Boy fo come inside da world, so dat we can come alive inside fo real kine, cuz a him. 10Dis how da real kine love stay: God wen get love an aloha fo us guys, no matta us guys neva get love an aloha fo him. An he wen send his Boy fo mahke so he can be da sacrifice dat hemo da shame fo all da bad kine stuff we wen do.
11My good friends, cuz God wen show dat kine love an aloha fo us guys, den us guys gotta show love an aloha fo each odda too. 12No matta no mo nobody eva wen see God fo real kine -- if we get love an aloha fo each odda, den God stay wit us an his love stay to da max inside all us guys.
13Dis how we know dat we stay tight wit God an he stay tight wit us, cuz he wen give us his Spirit fo take charge a us. 14Me an da odda peopo wen see God's Boy, an we tell everybody dat da Fadda wen send him fo take da peopo inside dis world outa da bad kine stuff dey doing. 15Whoeva say dat Jesus, he God's Boy, God stay tight wit dem, an dey stay tight wit God too. 16We know an trus dat God get love an aloha fo us guys.
Da way God stay, he everytime get love an aloha fo everybody. Whoeva get love an aloha, dey stay tight wit God, an God stay tight wit dem too. 17I mean dis: wen da same kine love an aloha dat God get, stay to da max inside all us guys, den we no need be scared wen we stand in front God da Judge, cuz inside dis world we jalike Christ awready. 18No need be scared if get love an aloha. Cuz if da same kine love an aloha dat God get stay plenny, den no goin stay scared. Whoeva stay scared, dey suffa plenny, jalike somebody stay punish dem. Jalike dey not grown up inside, dey still yet jalike one small kid, cuz dey no mo plenny love an aloha.
19Us guys get love an aloha fo God cuz he wen get love an aloha fo us first. 20Whoeva say, “I get love an aloha fo God,” but dey hate dea brudda o sista, dey bulai. Cuz if dey no mo love an aloha fo dea brudda o sista dat dey can see, how dey can get love an aloha fo da God dat dey neva see? 21Dis wat Christ wen tell us guys fo do: Whoeva get love an aloha fo God gotta get love an aloha fo dea brudda an sista too.

We Can Stand Up Agains Da Bad Kine Stuff An Win
51Whoeva stay shua dat Jesus da Spesho Guy God Wen Send, dey God's kids. Everybody dat get love an aloha fo one fadda get love an aloha fo his kids too. 2Dis how we know dat we get love an aloha fo God's kids, cuz we get love an aloha fo God an do wat he tell us fo do. 3If we get love an aloha fo God, dat mean we do wat he tell us fo do. An da stuff he tell us fo do, not too hard. 4Cuz all God's kids can stand up agains da bad kine stuff inside da world, an win. Dis how we can do dat: we trus God. 5Da guy dat stay shua dat Jesus God's Boy, az da ony guy dat can stand up agains da bad kine stuff inside da world, an win.

Three Tings Dat Tell Bout Jesus
6Jesus, he da Guy dat wen come wit water, dat time John wen baptize him. He come wit blood, dat time dey wen kill him. He come, not wit water ony, but wit water an blood. God's Spirit tell us dat dis stay true, cuz his Spirit tell da trut. 7So, get three tings dat tell da trut bout Jesus, 8da Spirit, da water, an da blood. An dey all say da same ting. 9We lissen wat da peopo tell us. But wat God say get mo power still yet, cuz come from God. An dass wat God awready tell bout his Boy. 10Whoeva trus God's Boy get wat God say bout him inside his heart. But whoeva no trus God, jalike dey stay say, “God, he one bulaia!” cuz dey no trus wat God wen say bout his Boy. 11Dis wat God say: he wen give us da real kine life dat goin stay to da max foeva, an dat kine life come from his Boy. 12Whoeva stick wit God's Boy get dat kine life inside him. Whoeva no stick wit God's Boy no mo dat kine life inside him.

Da Kine Life Dat Goin Stay To Da Max Foeva
13I write dis to you guys dat stay trus God's Boy so you guys can know dat you guys get da real kine life dat stay to da max foeva. 14Everytime we aks God fo do da tings he like make happen, we know fo shua dat he hear us. 15An if we know dat he stay lissen fo wateva we aks him, den we know dat we goin get da tings we wen aks him fo do.
16If you see yoa brudda doing bad kine stuff dat no make da brudda mahke, you gotta aks God fo help um, an God goin give da brudda life. I talking bout da bad kine tings dat peopo do, but dat no make um mahke. Get bad stuff dat make um mahke -- I no say dat you gotta pray bout dat kine. 17Everyting dat stay wrong, dass bad kine stuff. An get bad kine stuff dat no make da guy mahke dat do um.
18We know dat everybody dat stay God's kid no stay doing bad kine stuff, cuz God's Boy take care him, an da Bad Guy, da Devil, no can hurt him.
19Us guys know dat we come from God, but da Bad Guy stay in charge a all da odda peopo inside da whole world.
20We know dat God's Boy wen come an help us fo undastan, so dat we can know da One dass God fo real kine. Us guys stay tight wit da One dass God fo real kine -- wit God's Boy Jesus, da Spesho Guy God Wen Send. Dass da real God, an dass da real kine life dat stay to da max foeva.
21Eh you guys! You jalike my own kids! So, stay away from da idol kine gods.


Copyright © 2000, 2009 Wycliffe Bible Translators

 http://www.pidginbible.org/Concindex.html

Nenhum comentário:

Postar um comentário