sábado, 16 de janeiro de 2016

1 JƆƆŊ: Sisaala, Tumulung


1 JƆƆŊ 11Mi-na Jↄↄŋ ŋmuŋsɛ teniŋ deeŋ pipima a tigɛ wii kubala lɛ nɛ. Wii-la fa hɛ dimɛ buŋbuŋ kala nɛ a kɛŋ miisiŋ. La nii u yiikoro a kɛŋ la siaa ma nau a chaasa benu, a kɛŋ la nisaa ma digu. 2Wii-la si ku ŋaa nuhuobiine, la nau nɛ a ŋaa u daŋsia, a bul u wiaa pipima. Wii-la nɛ ŋla: Miisi-la si bi dɛrɛ. U fa hɛ la Nyimma teeŋ nɛ a ku lii la teeŋ la nau. Yesu Kirisito nɛ ŋii. 3U fa si hɛ la teeŋ ŋii, la na wialiŋ u si ŋaa a nii wialiŋ maa u si bula. Wialiŋ la si na aŋ nii maa, ba nɛ la bulaa pima, di ma wuo juu la tuↄŋ di la kala kɛŋ nii-bala. La di la Nyimma Wia ari u Bie Yesu Kirisito kɛŋ nii-bala nɛ. Laa chɛ di ma ma kɛŋ nii-bala ŋii nɛ. 4Laa chɛ di ma tuↄŋ faasa tↄrɛ nɛ woruŋ, ŋii nɛ tii la ŋmuŋsɛ wiiŋ deeŋ pipima. 5Wialiŋ Wia Bie si dagɛla a tigɛ Wia lɛ, ba nɛ ŋla: Wia nɛ kɛŋ pulumuŋ. Birimiŋ tuo Wia lɛ. 6Di la nɛ si la duu kɛŋ nii-bala aŋ ka laa ŋaa birimiŋ tuↄŋ wiaa, laa nyia nɛ. La wu-ŋaalaa ari la wu-bulaa kala bi wutitii kɛnɛ. 7Ama di la nɛ ŋaa pulumuŋ tuↄŋ wiaa a hɛ pulumuŋ tuↄŋ, ari Wia si hɛ pulumuŋ tuↄŋ ŋii, ŋii-na la di la dↄŋsuŋ tiŋŋaa kala kɛŋ nii-bala nɛ. Di la nɛ ŋaa ŋii, Wia Bie Yesu chaliŋ ma jaŋ chɛsɛ la wu-bↄŋŋↄↄ kala ta. 8Di la nɛ si la bi wu-bↄŋŋↄↄ ŋaa, laa nyisɛ la titia nɛ. La bi wutitii kɛnɛ. 9Ama di la nɛ sɛyɛ ari laa ŋaa wu-bↄŋŋↄↄ a dagɛ la wu-bↄmↄ-la a pi Wia, u jaŋ wuo joŋ la haachɛba a chɛla a chɛsɛ la wu-bↄŋŋↄↄ kala ta. Wia kɛŋ wutitii. Ŋii nɛ tii u jaŋ wuo ŋaa ŋii. 10Ama di la nɛ si la bi wu-bↄŋŋↄↄ ŋaa, la kɛŋ Wia yirɛ wu-nyiaru nɛ. La bi u niiŋ wiaa laa hɛ la tuↄŋ.

1 JƆƆŊ 21Mi biiriŋ, mi ŋmuŋsɛ wiiŋ deeŋ pipima di ma bira sí wu-bↄŋŋↄↄ ŋaa, ama di la kuŋ-kala haa ŋaa wu-bↄŋŋↄↄ, la kɛŋ nuu si chiŋ la hariŋ. U jaŋ sula laala u Nyimma teeŋ. Tuↄ-pul Tiina Yesu Kirisito nɛ ŋii. 2U nɛ joŋ u miisiŋ a yↄↄ suuŋ la wu-bↄŋŋↄↄ wiaa, di Wia joŋ u baaniŋ ta u fa si kɛnɛ a tiŋ la wu-bↄŋŋↄↄ wiaa, aŋ joŋ la wu-bↄŋŋↄↄ a chɛla. La duŋduŋa wu-bↄŋŋↄↄ wiaa dee, dunia kala wu-bↄŋŋↄↄ wiaa nɛ. 3Ŋla nɛ la jaŋ wuo to jiŋ woruŋ ari la jiŋ Wia: Di la nɛ to wialiŋ kala Wia si dagɛ niaa di baa to, ŋii daga ari la sɛnɛ jiŋ Wia nɛ. 4Di nuu nɛ si u jimu, ka u via wialiŋ u si dagɛ niaa di baa to, tiina ŋaa wu-nyiaru nɛ, u bi wutitii kɛnɛ. 5Ama nii-la kala síi to u niiŋ wiaa, u nɛ nii-la si sɛnɛ cho Wia kiŋkɛŋ. Di la nɛ to u niiŋ wiaa ŋii, la jaŋ wuo to jiŋ ari la di Wia sɛnɛ ŋaa kubala nɛ. 6Nii-la kala si si ba di Wia ŋaa kubala, u maga di u tiina wu-ŋaalaa nagɛ Yesu Kirisito wu-ŋaalaa nɛ. 7Mi bii-chooloo, wii-la mi síi chɛ mi ŋmuŋsa pima lɛɛlɛ, u bi wu-falii kala ŋaa Wia si dagɛma di maa to, u ŋaa wu-binii-la ma fa si nii buŋbuŋ kala nɛ. Wu-binii-la nɛ Wia niiŋ wialiŋ ba si dagɛma. 8Ama u saa naga ari wu-falii nɛ mi si ŋmuŋsa pipima, bɛɛ wiaa wiiŋ deeŋ ku ŋaa wutitii Kirisito miisiŋ lɛ ari ma ma miisiŋ lɛ. Bua deeŋ lɛ birimiŋ ka lɛl nɛ, aŋ ka pulumuŋ ha faasa chaanɛ pir. 9Nii-la kala si si uu vɛŋ pulumuŋ tuↄŋ aŋ bɛrɛ u dↄŋↄ tiina, u ha hɛ birimiŋ tuↄŋ nɛ. 10Ama nii-la kala si cho u dↄŋↄ tiina, uu vɛŋ pulumuŋ tuↄŋ nɛ. Wii-kala bira tuo si jaŋ ŋaa u siɛra tel. 11Ka nii-la kala si bɛrɛ u dↄŋↄ tiina, u tiina vɛŋ birimiŋ tuↄŋ nɛ. U bi jiŋ lee-la kala u síi mu. Birimiŋ ŋaa u siaa bi na. 12Mi biiriŋ, a tiŋ Yesu wiaa nɛ Wia joŋ ma wu-bↄŋŋↄↄ a chɛma. Ŋii nɛ tii mi ŋmuŋsa pipima. 13Mi nyimmaba maa, ma jiŋ Nii-la fa si hɛ dimɛ buŋbuŋ kala nɛ. Ŋii nɛ tii mi ŋmuŋsa pipima maa. Ma bapuↄsaa maa, ma lɛɛlɛ yuo dii Sitaani nɛ, ŋii nɛ tii mi ŋmuŋsa pipima maa. Mi biiriŋ, ma ma jiŋ la Nyimma Wia nɛ, ŋii nɛ tii mi ŋmuŋsa pipima maa. 14Mi kuhiasiŋ maa, ma jiŋ Nii-la fa si hɛ dimɛ buŋbuŋ kala nɛ, ŋii nɛ tii mi ŋmuŋsa pipima. Ma bapuↄsaa maa, ma ma kɛŋ doluŋ, Wia niiŋ wiaa ma hɛ ma tuↄŋ lɛ. Ma lɛɛlɛ yuo dii Sitaani nɛ, ŋii nɛ tii mi ŋmuŋsa pipima. 15Ma sí dunia kiaa cho. Nii-la kala si cho dunia kiaa, u bi la Nyimma Wia cho. 16Ŋ tuↄtↄrɛ wu-ŋaalaa ari ŋ siiŋ wu-chooloo ari kialiŋ si ŋaa niaa bibigisi ba titia lɛ, ba kala bi la Nyimma Wia teeŋ lia. Ba ŋaa dunia kiaa nɛ. 17Dunia ari kialiŋ kala si hɛ dimɛ nuhuobiine cho, ba kala jaŋ dɛrɛ. Ama nii-la si ŋaa wialiŋ Wia si cho, u jaŋ kɛŋ miisi-la si bi dɛrɛ. 18Mi biiriŋ, dunia didɛriŋ kpaga nɛ. Ma nia ari Kirisito diŋdↄŋ-baliŋ jaŋ kↄ. Bua deeŋ lɛ Kirisito diŋdↄŋŋↄↄ paala yugɛ nɛ a kↄ. Ŋii wiaa, la jima ari dunia didɛriŋ kpaga nɛ. 19Ba lii la tuↄŋ nɛ, ama la di ba fa bi kubala ŋaa. Di la di ba nɛ fa ŋaa kubala, ba ma fa ha jaŋ hɛ la tuↄŋ. Ama ba lii la tuↄŋ nɛ di la jiŋ ari la di ba bi kubala ŋaa. 20Ama ma-na jiŋ wutitii, bɛɛ wiaa Kirisito joŋ u Diŋ-zↄŋ-la hɛma lɛ nɛ. 21U bi naga di mi ŋmuŋsa pipima a tiŋ ma si bi wutitii-la jiŋ. Ama mi ŋmuŋsa pipima a tiŋ ma si jiŋ wutitii-la nɛ. Ma ma jima ari wu-nyiari tiina bi wutitii kɛnɛ. 22Kubɛɛ nɛ saa ŋaa wu-nyiari tiina? Nii-la si si Yesu dee bi Kirisito ŋaa, nii-la Wia si liisa, u dee bi wu-nyiari tiina ŋaa? Nii-la kala saa si via la Tiina Wia ari u Bie, u tiina nɛ ŋaa Kirisito diŋdↄŋ-baliŋ. 23Nii-la kala si via Wia Bie, u bi u Nyimma ma jiŋ. Nii-la ma kala si sɛi Wia Bie, u ma jiŋ u Nyimma nɛ. 24Má leŋ di wialiŋ kala ma si nia buŋbuŋ hɛ ma tuↄŋ a kaa mu. Di wiaa deeŋba nɛ hɛ ma tuↄŋ a kaa mu, ma di Wia Bie jaŋ ŋaa kubala a kaa mu. Ma di u Nyimma ma jaŋ ŋaa kubala a kaa mu. 25Wii-la Kirisito titia si bula duu jaŋ ŋaa pila nɛ ŋla: U si u jaŋ joŋ miisi-la si bi dɛrɛ a pila. 26Mi ŋmuŋsɛ wiiŋ deeŋ pipima a mu tigɛ nialiŋ síi chɛ di ba nyisɛma lɛ nɛ. 27Ama Kirisito joŋ u Diŋ-zↄŋ-la hɛma lɛ nɛ. Diŋ-zↄŋ-la si hɛma lɛ ŋii a kaa mu, ma bira bi nialiŋ dↄŋsuŋ naga, nialiŋ síi chɛ di niaa didagɛba. U Diŋ-zↄŋ-la hɛma lɛ a dagɛma wii-kala nɛ. Wialiŋ kala u síi dagɛma ŋaa wutitiiba nɛ, wu-nyiari dee. Má saa leŋ di ma di Kirisito ŋaa kubala a kaa mu, ari u Diŋ-zↄŋ-la si dagɛma ŋii. 28Mi biiriŋ, di ma ŋaa ŋii a kaa mu, la jaŋ kɛŋ nyu-duoŋ chɛɛ-la Kirisito si jaŋ miira kↄ. Hiisiŋ bi jaŋ kɛŋla di la faa. 29Ma si jima ari Kirisito nɛ kɛŋ wutitii, ma saa jaŋ jiŋ ari nuu-kala si kɛŋ wutitii, u tiina ŋaa Kirisito bii nɛ.

1 JƆƆŊ 31Ma na ŋii la Nyimma Wia si chola. U chola kieli, ŋii nɛ tii u kɛŋla yiyirɛ u biiriŋ. Wutitii, la sɛnɛ ŋaa u biiriŋ nɛ. Dunia niaa bi Wia jiŋ, ŋii nɛ tii ba bila ma jiŋ ŋii. 2Mi bii-chooloo, lɛɛlɛ la ŋaa Wia biiriŋ nɛ. Ama Wia ha bi chaasa daga pullɛ ŋii la si jaŋ nagɛ. Ama wii-la la si jima nɛ ŋla: Bua-la lɛ Kirisito si jaŋ kↄ, la ma jaŋ nagɛ u si nagɛ ŋii, bɛɛ wiaa la jaŋ nau u si nagɛ ŋii kala. 3Nii-la kala síi yiɛlɛ wiiŋ deeŋ lɛ, u jaŋ liisɛ u titia wu-bↄŋ wu-ŋaalaa lɛ, aŋ kɛŋ u titia pullɛ duu kɛŋ tuↄ-pula, ari Kirisito si kɛŋ tuↄ-pula ŋii. 4Nii-la kala si ŋaa wu-bↄmuŋ, u chei wialiŋ Wia si leŋe ba ŋmuŋsa bil nɛ di niaa tuto. Di nuu nɛ ŋaa wu-bↄŋ, u chei wialiŋ nɛ. 5Ma kala jima ari Kirisito kↄ duu laa la wu-bↄŋŋↄↄ ta nɛ. U-na bi wu-bↄŋ kala ŋaa. 6Di nuu ari Kirisito nɛ ŋaa kubala, u tiina bi wu-bↄŋŋↄↄ ŋaa. Ama nii-la kala ha síi ŋaa wu-bↄŋŋↄↄ, u tiina bi Kirisito jiŋ. U siaa ma ha bi u nyuŋ pollo. 7Mi biiriŋ, ma sí leŋe di nuu-kala nyisɛma wiaa deeŋba lɛ. Nii-la kala si ŋaa wutitiiba, u tiina ŋaa tuↄ-pul tiina nɛ, ari Kirisito si ŋaa Tuↄ-pul Tiina ŋii. 8Ama nii-la kala ha síi ŋaa wu-bↄŋŋↄↄ, u ŋaa Sitaani tiina nɛ. Sitaani ŋaa wu-bↄŋŋↄↄ buŋbuŋ kala nɛ a kaa kↄ ari jiniŋ kala. Wii-la si tii Wia Bie kↄ dunia nɛ ŋla: U kↄ duu chei Sitaani tiŋtiŋŋaa nɛ. 9Nii-la kala si ŋaa Wia bii-lulii, u tiina bi wu-bↄŋŋↄↄ ŋaa, bɛɛ wiaa u laa u wu-ŋaalaa kala nɛ a kaa mu. Wia si ŋaa u Nyimma ŋii, u bi wu-bↄŋ wuo ŋiŋaa. 10Ŋla lɛ nɛ ma jaŋ wuo a to jiŋ Wia biiriŋ ari Sitaani biiriŋ. Nii-la kala si bi wutitiiba ŋaa, koo nii-la kala si bi u dↄŋↄ tiina cho, u tiina bi Wia bii ŋaa. 11Wii-la ma si nia buŋbuŋ kala nɛ ŋla: U maga di ma cho dↄŋↄ. 12U bi maga di la nagɛ Keeŋ. U fa ŋaa Sitaani tiina nɛ a kpu u ŋaana. Bɛɛ nɛ tii u kpuu? Keeŋ faa ŋaa wu-bↄŋŋↄↄ nɛ, aŋ ka u ŋaana fa ŋiŋaa wu-zↄŋŋↄↄ. Ŋii nɛ tii u kpuu. 13Mi naaŋbiiriŋ, ma sí leŋe duu ŋaa wu-kpuŋkpere ma lɛ di dunia niaa nɛ bɛrɛma. 14La-na cho la dↄŋsuŋ tiŋŋaa nɛ. Ŋii nɛ tii la jiŋ ari la lii suuŋ bua lɛ nɛ a kɛŋ miisi-la si bi dɛrɛ. Nii-la kala si bi niaa cho ha hɛ suuŋ bua lɛ nɛ. 15Nii-la kala si bɛrɛ u dↄŋↄ tiina, u ŋaa ni-kpuuru nɛ. Miisi-la si bi didɛriŋ kɛnɛ, ma jima ari ni-kpuura buu kɛnɛ. 16Kirisito joŋ u miisiŋ yↄↄ suuŋ la wiaa, a dagɛla ŋii u si chola kiŋkɛŋ. La ma saa maga di la ma cho la dↄŋsuŋ tiŋŋaa ŋii nɛ a joŋ la miisiŋ a yↄↄ suuŋ ba wiaa. 17Di nuu nɛ kɛŋ kiaa woruŋ aŋ na u dↄŋↄ tiina u juu wii a chichɛ kiaa, ka u kɛŋ tuↄ-hɛɛŋ a bi u nennige fá, ɛɛ nɛ u jaŋ wuo bul duu cho Wia nɛ? 18Mi biiriŋ, ma sí leŋe di la kɛŋ niiŋ duŋduŋa cho dↄŋↄ. Má leŋ di la to wutitii woŋbiiŋ a ŋiŋaa wu-zↄŋŋↄↄ, di la wu-ŋaala-la dagɛ ari la sɛnɛ cho dↄŋↄ nɛ. 19Di la níi ŋaa ŋii, la jaŋ wuo to ŋii lɛ jiŋ ari laa to wutitii woŋbiiŋ nɛ a wuo na wiese Wia teeŋ. 20Di la tuↄbiinaa nɛ ha wuo dagɛ ari la cheye nɛ, la jima ari Wia nɛ yuga kii la tuↄbiinaa a jiŋ wii-kala. 21Mi naaŋbiiriŋ, di la tuↄbiinaa nɛ bi daga ari la cheye nɛ, la jaŋ kɛŋ nyu-duoŋ Wia sipaaŋ a wuo na wiese. 22Ŋii wiaa, di la nɛ sul kuŋ-na kala u teeŋ, u jaŋ joŋo pila, bɛɛ wiaa laa to wialiŋ u si leŋe ba ŋmuŋsa bil di niaa tuto nɛ aa ŋaa wialiŋ síi tↄrɛ u tuↄŋ. 23U bira dagɛla di la ŋiŋaa ŋla nɛ: Di la laa u Bie Yesu Kirisito wiaa dii a cho dↄŋↄ, ari u si dagɛla ŋii. 24Nuu-na kala síi to wialiŋ Wia si dagɛla di laa to, u tiina hɛ Wia teeŋ nɛ a kaa mu. Wia ma hɛ u teeŋ a kaa mu. Ŋla lɛ nɛ la jaŋ to jiŋ ari Wia hɛ la teeŋ nɛ: U joŋ u Diŋ-zↄŋ-la hɛla lɛ nɛ.

1 JƆƆŊ 41Mi bii-chooloo, di niaa nɛ si di ba kɛŋ doluŋ a wuo bul wiaa, Wia Diŋ-zↄŋ-la doluŋ lɛ, ma sí guu laa dii ari baa bul wutitii nɛ. Má laa sipaaŋ magisɛba na ari ba sɛnɛ kɛŋ Wia Diŋ-zↄŋ-la doluŋ nɛ aa bul wiaa. Bɛɛ wiaa nialiŋ si nyia wiaa a bul di baa bul wiaa, Wia Diŋ-zↄŋ-la doluŋ lɛ, ba yuga nɛ a hɛ dunia lɛ. 2Ŋla lɛ nɛ ma jaŋ to a wuo jiŋ di nuu nɛ kɛŋ Wia Diŋ-zↄŋ-la doluŋ: Nii-la kala si laa Yesu wiaa dii a sɛi duu nɛ ŋaa Kirisito, nii-la Wia si liisa, a bira sɛi duu ku ŋaa nuhuobiiŋ nɛ a ku tuu dunia, u tiina nɛ sɛnɛ kɛŋ Wia Diŋ-zↄŋ-la doluŋ. 3Nii-la kala si bi ŋii bula a tigɛ Yesu lɛ, u bi Wia Diŋ-zↄŋ-la doluŋ kɛnɛ. Dol-la u tiina si kɛnɛ ŋaa Kirisito diŋdↄŋ-baliŋ doluŋ nɛ. Ma nia ari Kirisito diŋdↄŋ-baliŋ deeŋ jaŋ kↄ dunia. U doluŋ nɛ saa paala hɛ dunia lɛ lɛɛlɛ. 4Mi biiriŋ, ma nɛ ŋaa nialiŋ Wia si tii. Ma nɛ lɛɛlɛ kɛŋ doluŋ a kii nialiŋ si nyia wiaa a bul di baa bul wiaa, Wia Diŋ-zↄŋ-la doluŋ lɛ nɛ, bɛɛ wiaa Wia Diŋ-zↄŋ-la si hɛma lɛ nɛ kɛŋ doluŋ a kii dol-la dunia niaa si kɛnɛ. 5Nialiŋ si nyia wiaa a bul di baa bul wiaa, Wia Diŋ-zↄŋ-la doluŋ lɛ, ba hɛ dunia nisiŋ lɛ nɛ a bubul dunia wiaa. Ŋii nɛ tii dunia niaa jegilee nii ba teeŋ. 6Ama la-na ŋaa nialiŋ Wia si tii nɛ. Nii-la kala si jiŋ Wia, u tiina ma jegilee nii la teeŋ nɛ. Nialiŋ ma si bi Wia jiŋ, ba bi la teeŋ jegili. Ŋla lɛ nɛ la jaŋ wuo to jiŋ wutitii tiŋŋaa ari wu-nyiaraa. 7Mi bii-chooloo, má leŋ di la cho dↄŋↄ. Di la nɛ cho dↄŋↄ, u lii Wia teeŋ nɛ. Nii-la kala si cho niaa ŋaa Wia bii-lulii nɛ a jiŋ Wia. 8Nii-la ma kala si bi niaa cho, u bi Wia jiŋ, bɛɛ wiaa chonuŋ ŋaa Wia kuŋ nɛ. 9Ŋla nɛ Wia dagɛla ari u si chola: U joŋ u Bii-bala duu ku tuu dunia, di la tou lɛ a kɛŋ miisi-la si bi dɛrɛ. 10Ŋla nɛ chonuŋ nagɛ: U bi naga la nɛ laa sipaaŋ cho Wia, ama Wia nɛ laa sipaaŋ chola. U tiŋ u Bie u ku tuu suu la wiaa, di Wia joŋ u baaniŋ ta u fa si kɛnɛ a tiŋ la haachɛba wiaa, a joŋ la haachɛba chɛla. 11Mi bii-chooloo, Wia si chola ŋii, u maga di la ma cho dↄŋↄ. 12Nuu-kala ha bi Wia naa. Di la nɛ cho dↄŋↄ, Wia hɛ la teeŋ nɛ a kaa mu. Di u nɛ hɛ la teeŋ ŋii, la jaŋ cho Wia ari la dↄŋsuŋ tiŋŋaa kiŋkɛŋ. 13U joŋ u Diŋ-zↄŋ-la hɛla lɛ duu didagɛla. Ŋii lɛ nɛ la to jiŋ ari la hɛ Wia teeŋ nɛ, Wia ma hɛ la teeŋ nɛ a kaa mu. 14La titia na a ŋaa siada di Wia ta u Bie duu ku tuu ŋaa dunia niaa Laataara. 15Nuu-kala si wuo bul ari Yesu nɛ ŋaa Wia Bie, Wia hɛ tiina teeŋ nɛ a kaa mu. U tiina ma hɛ Wia teeŋ nɛ a kaa mu. 16Ŋii nɛ la titia jiŋ a laa dii ari Wia si chola ŋii. Chonuŋ ŋaa Wia kuŋ nɛ. Nii-la kala si cho Wia ari niaa a kaa mu, u tiina hɛ Wia teeŋ nɛ a kaa mu. Wia ma hɛ u tiina teeŋ a kaa mu. 17Di la nɛ cho Wia ari niaa kiŋkɛŋ, la jaŋ nagɛ ŋii u fa si naga dunia lɛ. Di la nɛ ŋaa ŋii, la jaŋ kɛŋ nyu-duoŋ tapulii-la Kirisito si jaŋ dii dunia niaa sariya. 18Nii-la si cho Wia ari niaa, u tiina bi fawulluŋ ka fá. Di la nɛ cho Wia ari niaa kiŋkɛŋ, chonu-la kiri fawulluŋ ta nɛ. Di la nɛ haa fá fawulluŋ ari Wia jaŋ dↄgisɛla, la ha bi Wia ari niaa cho kiŋkɛŋ. 19Wia nɛ laa sipaaŋ chola. Ŋii nɛ tii la ma wuo cho Wia ari niaa. 20Di nuu nɛ si u cho Wia nɛ aŋ bɛrɛ u dↄŋↄ tiina, u ŋaa wu-nyiaru nɛ. U si wuo na u dↄŋↄ tiina aŋ buu cho, ŋii-na u bi Wia u si bi wuo na ma cho. 21Wia bula pila ari nii-la kala si chou, u maga duu cho u dↄŋↄ tiina ma nɛ.

1 JƆƆŊ 51Nii-la kala si laa dii ari Yesu nɛ ŋaa Kirisito, nii-la Wia si liisa, u ŋaa Wia bii nɛ. Nii-la kala ma si cho nuu, u cho nii-la bie ma nɛ. 2Di la nɛ cho Wia a tuto wialiŋ u si dagɛla di la ŋiŋaa, la jaŋ wuo jiŋ ari la ma cho Wia biiriŋ nɛ. 3Di la níi to wialiŋ u si dagɛla di la ŋiŋaa, ŋii jaŋ dagɛ ari la cho Wia nɛ. U bi hɛi a pila di la to wiaa deeŋba, 4bɛɛ wiaa Wia bii-lulii kala jaŋ kɛŋ doluŋ a wuo dunia ari u kiaa kala. La si ŋaa Wia yarida-la nɛ pila doluŋ deeŋ. 5Kubɛɛ nɛ saa kɛŋ doluŋ duu wuo dunia ari u kiaa? See nii-la kala si laa dii ari Yesu nɛ ŋaa Wia Bie. 6U-na Yesu Kirisito nɛ kↄ dunia. U si hɛ dunia lɛ, u to liiŋ ari chaliŋ kala lɛ nɛ a lii. Liiŋ duŋduŋa lɛ dee u to. U to chaliŋ ma lɛ nɛ, bɛɛ wiaa ba kɛŋ liiŋ a fou Wii-chuↄlɛ liiŋ. U bira suu, u chaliŋ ma jaasɛ. 7Wia Diŋ-zↄŋ-la ŋaa wiaa deeŋba daŋsia. U-na kɛŋ wutitii. 8Kiaa batori nɛ saa ŋaa u daŋsia tiŋŋaa. Wia Diŋ-zↄŋ-la ari lii-la ari u chal-la. Ba kala kɛŋ nii-bala nɛ. 9Di nuu nɛ ŋaa wii siada tiina, la yie sɛi wii-la nɛ. Ama di Wia nɛ ŋaa wii siada tiina, u nɛ ŋaa siifiaŋ wiiŋ a kii nuhuobiine si si wii-la ŋaa wutitii nɛ. Wia saa ŋaa u Bie siada tiina nɛ. Wialiŋ kala u si bula a tigɛ u lɛ ŋaa wutitii nɛ. 10Nii-la kala si laa Wia Bie wiaa dii, u tiina jima u tuↄŋ lɛ ari wialiŋ Wia si bula a tigɛ u lɛ ŋaa wutitii nɛ, a ŋaa wiaa deeŋba daŋsia. Ama nii-la kala si bi Wia laa dii, u kɛŋ Wia yiyirɛ wu-nyiaru nɛ, bɛɛ wiaa u bi wii-la u si bula a tigɛ u Bie lɛ laa dii. 11Wii-la Wia si bula nɛ ŋla: duu pila miisi-la si bi dɛrɛ nɛ. Miisi-la hɛ u Bie teeŋ nɛ. 12Nii-la kala si hɛ Wia Bie teeŋ kɛŋ miisi-la nɛ. Nii-la kala ma si bi Wia bile teeŋ hɛ, u ma bi miisi-la kɛnɛ. 13Mi ŋmuŋsɛ wiiŋ deeŋ pipima di ma nialiŋ si laa Wia Bie wiaa dii ma wuo jiŋ ari ma kɛŋ miisi-la si bi dɛrɛ nɛ. 14La ma jima ari la nɛ sul kuŋ-kala Wia teeŋ, la jaŋ wuo kɛŋ nyu-duoŋ a sul, bɛɛ wiaa la jima ari ku-la u si cho duu joŋo pila, u jaŋ jegile nii la teeŋ. 15Di la nɛ saa jima ari la nɛ sul kuŋ-kala u teeŋ, u nɛ yie jegile nii la teeŋ, ŋii-na la ma jima ari u yie joŋ ku-la la síi chɛ pila nɛ. 16Di nuu-kala nɛ na u dↄŋↄ tiina duu ŋaa wu-bↄŋŋↄↄ, u maga di tiina sul Wia puu nɛ di Wia joŋ u miisiŋ chɛu. Mi bul ŋla a tigɛ nialiŋ si ŋaa wu-bↄmↄ-la lɛ si bi maga di ba suu lɛ nɛ a tiŋ ba wu-bↄmↄ-la wiaa. Wu-bↄŋŋↄↄ dↄŋsuŋ hɛ dimɛ. Di nuu nɛ ŋaaba, u tiina jaŋ suu. Di nuu nɛ saa ŋaa wu-bↄŋŋↄↄ deeŋba, mi bi si di ma sul Wia duu joŋ u miisiŋ chɛu. 17Wu-bↄŋ kala ŋ si ŋaa, ŋaa haachɛ nɛ. Ama wu-bↄŋŋↄↄ ŋaa dabaŋ dabaŋ nɛ. Di ŋ nɛ ŋaa ba dↄŋsuŋ, ŋ bi jaŋ suu a tiŋ ba wiaa. 18La jima ari Wia bii-lulii kala bi wu-bↄŋŋↄↄ ŋaa. Wia Bie nɛ yie bibenu. Sitaani buu wii-kala wuo ŋaa. 19La ma jima ari la ŋaa Wia bii-lulia nɛ. Ni-kaana-la-na kala si hɛ dunia lɛ hɛ Sitaani nisiŋ lɛ nɛ. 20La bira jima ari Wia Bie nɛ kↄ a suri la siaa di la wuo jiŋ Wii-titii-la. La di Wii-titii-la ŋaa kubala nɛ. La di u Bie ma ŋaa kubala, bɛɛ wiaa Wia Bie ari Wia ma ŋaa kubala nɛ. U nɛ ŋaa Wia titia. U nɛ joŋ miisi-la si bi dɛrɛ pila. 21Mi biiriŋ, má liisɛ ma titia vuiaa lɛ.

http://www.bible.is/SILGIL/1John/1/D

Nenhum comentário:

Postar um comentário