terça-feira, 19 de janeiro de 2016

१ यूहन्‍ना (1 John in Sunwar)


१ यूहन्‍ना 11नेल्‍ल क्‍येङा ङोंइती रे बाक्‍शो, सु बाक्‍त देंशा हना, ब्रोंइचा गेब लोव़ माइश्‍शो बाक्‍त। गोपुकीमी मेको आ लोव़ नेंतक। आंइ मिक्‍चीमी ताइतक। आंइ मिक्‍चीमी कोव़तक। आंइ गुइमी थीतक। 2मेको ब्रोंइचा गेब लोव़ माइश्‍शो रागीमी तपांइसीचा पुंइसाक्‍व। मिनु गो मेको कली ताइतक। मोपतीके गोपुकीमी मेको आ लोव़ शेंनीकी। मिनु इन कली यो गेना हना यो, इं आफ नु बाक्‍चा आ पर्बम शेंनीकी। मेको गेना हना यो ब्रोंइशा बाक्‍तीक माइश्‍शो ङोंइती आ आफ परमप्रभु यावे नु बाक्‍त। मिनु परमप्रभुमी मेको आंइ कली कोंइताक्‍व। 3मिनु आंइ तशो नु नेंशो इन कली शेंनीकी। मारदे हना गो नेल्‍ल थुं का ङा दुम्‍यल। मिनु गो नेल्‍ल इं आफ परमप्रभु यावे नु आ तौ येसु ख्रीस्‍त नु थुं का ङा बाक्‍नय। 4गो नेल्‍ल इं थुं ग्‍येरसीशा बाक्‍य, दे एको चिठी ब्रेक्‍शा, इन कली सोइक्‍ताक्‍क। 5मेकोमी आंइ कली नेंपाइश्‍शो लोव़ इन कली शेंनीकी। मार लोव़ शेंनीकी देंशा हना, परमप्रभु यावे छेङछेङ बाक्‍ब। मिनु मेको नु छिङछिङ काइ मबाक्‍ब। 6गोपुकीमी छिङछिङम गाक्‍शा यो “परमप्रभु यावे नु थुं का ङा बाक्‍नय” देंतय हना, जोल्‍फे दुम्‍नय। थमा गेय मपाइनय। 7मेको छेङछेङमी बाक्‍शो खोदेंशो पा, गो छेङछेङमी गाक्‍तय हना, अर्को थमा सुइक्‍बपुकी नु थुं का ङा दुम्‍नय। मिनु आ तौ येसु आ हुशेमी इं मरिम्‍शो पशो नेल्‍ल क्‍याम्‍ब। 8गोपुकीमी “मरिम्‍शो काइ मपक” देंतय हना, इं आंमा मिक्‍च सिल्‍शो बाक्‍नय। इं थुं आगामी थमा मबाक्‍ब। 9गोपुकीमी “मरिम्‍शो पाइतक” देंतय हना, इं मरिम्‍शो पतीके क्‍याम्‍शा, इं कली शेक्‍ब। मारदे हना मेको आ देंशो पाइब नु ठीक पाइब बाक्‍ब। 10गोपुकीमी “मरिम्‍शो काइ मपक” देंतय हना, मेको कली जोल्‍फे सेल्‍नय। मिनु आ देंशो लोव़ इं थुंमी मलीब।

१ यूहन्‍ना 21मिनु आं आलपुकी, इन कली मारदे ब्रेक्‍ताक्‍ङ देंशा हना, गो इन कली “मरिम्‍शो मपने” दें‍चा कली ब्रेक्‍ताक्‍ङ। मिनु थमा सुइक्‍ब कामी पाप पाप्‍तु हना, मेको आ पर्बम आ आफ कली पुंइब का बाक्‍ब। मेको पुंइब सु बाक्‍ब देंशा हना, मेको नेल्‍ल ठीक पाइब येसु ख्रीस्‍त बाक्‍ब। 2दोपा नेल्‍ल ठीक पाप्‍तु देंशा हना, मरिम्‍शो पाइब आन बेक्‍तीकेमी साइक्‍चा पुंइसाक्‍व। इं पाप कली ला ममाइ, तन्‍न रागी नेल्‍ल ङा मुर आन पाप क्‍याम्‍चा कली यो साइक्‍चा पुंइसाक्‍व। 3मिनु गोपुकी येसु ख्रीस्‍त आ मुर दुम्‍शो, दोपा तुइक्‍नय देंशा हना, परमप्रभु यावे आ अरेशो लोव़ पना पन बाक्‍तीके येसु ख्रीस्‍त कली थमा पा तुइक्‍नय। 4मिनु सुमी “गो येसु ख्रीस्‍त आ मुर दुम्‍शा, मेको तुइक्‍नुङ” देंबा, तन्‍न आ अरेशो लोव़ मटीबा, मेको जोल्‍फे बाक्‍ब। मोदेंशो मुर आगामी परमप्रभु आ थमा पतीके मबाक्‍ब। 5सु चहिं आ देंशो लोव़ पना पन बाक्‍बा, मेको मुरुमी परमप्रभु यावे कली थमा पा दाक्‍ब। मोदेंशो दुम्‍शो मुरुमी “गो येसु ख्रीस्‍त आ मुर दुम्‍ती” दे तुइक्‍ब। 6मिनु सुमी “गो येसु ख्रीस्‍त नु बाक्‍नुङ” देंबा, मेको येसु ख्रीस्‍त खोदेंशो दुम्‍चा माल्‍ब। 7आं दाक्‍शो थमा सुइक्‍ब लोक्‍बपुकी, गो इन कली नक अरेशो लोव़ मब्रेक्‍तु। एको अरेशो लोव़ माइत बाक्‍ब। गेपुकी मेको ङोंइती रे पाइ‍नीनी। मिनु गे मेको माइत अरेशो लोव़ नेंशो बाक्‍तीनी। 8मिनु मेको ब्रेक्‍शा यो गो इन कली नक अरेशो लोव़ ब्रेक्‍नुङ। मारदे हना मेको नक अरेशो लोव़ येसु ख्रीस्‍तमी खाप्‍तु। मिनु गेपुकी यो पाइनीनी। गो मेको मारदे ब्रेक्‍ताक्‍ङ देंशा हना, मुल छिङछिङ जाम्‍ना जाम्‍न लाइब। मिनु थमा छेङछेङ बारना बारन बाक्‍ब। 9मिनु सुमी “गो परमप्रभु यावे आ छेङछेङमी बाक्‍नुङ” देंबा, तन्‍न आ लोक्‍ब आन कली मदाक्‍बा, मेको छेङछेङमी ममाइ, छिङछिङमी बाक्‍ब। 10सु चहिं आ थमा सुइक्‍ब लोक्‍ब आन कली दाक्‍बा, मेको छेङछेङमी गाक्‍ना गाक्‍न बाक्‍ब। मोदेंशो दुम्‍शो मुरुमी मरिम्‍शो गेय मपाइब। 11सु चहिं आ लोक्‍ब आन कली मदाक्‍बा, मेको मुर छिङछिङमी गाक्‍ब। मिनु ते लाइबा मतुइक्‍ब। छिङछिङमी मेको कली मिक्‍च मताइब सेल्‍ब। 12आं दाक्‍शो तमी तौपुकी, गो इन कली मारदे ब्रेक्‍ना ब्रेक्‍न बाक्‍ती देंशा हना, इन पशो मरिम्‍शो नेल्‍ल येसु ख्रीस्‍त आ नेंमी क्‍याम्‍सीशो बाक्‍त। मोपतीके गो इन कली ब्रेक्‍ना ब्रेक्‍न बाक्‍ती। 13आम आफपुकी, गो इन कली मारदे ब्रेक्‍ना ब्रेक्‍न बाक्‍ती देंशा हना, गे मेको ङोंइती रे बाक्‍ब कली तुइक्‍नीनी। मोपतीके गो इन कली ब्रेक्‍ना ब्रेक्‍न बाक्‍ती। ठेयब वोंइश आलपुकी, गो इन कली मारदे ब्रेक्‍ना ब्रेक्‍न बाक्‍ती देंशा हना, गे सैतान कली ग्रातीनी। मोपतीके गो इन कली ब्रेक्‍ना ब्रेक्‍न बाक्‍ती। मिनु आं तमी तौपुकी, गो इन कली मारदे ब्रेक्‍ताक्‍ङ देंशा हना, गे इं आफ परमप्रभु यावे कली तुइक्‍नीनी। मोपतीके गो इन कली ब्रेक्‍ताक्‍ङ। 14मिनु आं आलपुकी, गो इन कली मारदे ब्रेक्‍ताक्‍ङ देंशा हना, गे इं आफ कली तुइक्‍नीनी। गो आम आफ इन कली मारदे ब्रेक्‍ताक्‍ङ देंशा हना, गे ङोंइती रे बाक्‍ब कली तुइक्‍ब बाक्‍नीनी। गो ठेयब वोंइश आल इन कली मारदे ब्रेक्‍ताक्‍ङ देंशा हना, गेपुकी बोल्‍यो दुम्‍तीनी। गे परमप्रभु यावे आ लोव़ इन थुंमी वोइश्‍‍शा, सैतान कली ग्रातीनी। मोपतीके गो इन कली ब्रेक्‍ताक्‍ङ। 15गेपुकी रागी नु रागी ङा थोव़क कली मदाक्‍तीन। सु चहिं रागी कली दाक्‍बा, मेको आ थुंमी इं आफ, परमप्रभु यावे आ दाक्‍शो मबाक्‍ब। 16मिनु रागीमी मार बाक्‍ब देंशा हना, मेको मुर आन रांमी मार मार पचा दाक्‍नीमी, मेकोन पाइनीमी। मेको आन मिक्‍चीमी मार मार कोव़चा दाक्‍नीमी, मेकोन कोव़थ लाइनीम। आन शुश शोंप आ पर्बम ठेयब लेत्‍तीके इं आफ परमप्रभु यावे रे ममाइ, रागी ङा मुर आन पतीके बाक्‍ब। 17मिनु रागी नु रागी ङा मुर आन दाक्‍शो नेल्‍ल जाम्‍ब। सु चहिं परमप्रभु यावे आ देंशो पाइबा, मेको मुर गेना हना यो ब्रोंइशा बाक्‍ब। 18आं तमी तौपुकी, रागी जाम्‍चशो बाक्‍ब। दोपा तुइक्‍ताक्‍य देंशा हना, ख्रीस्‍त आ पर्बम दूली शेंब का जाक्‍ब, दे ङोंइती रे तुइश्‍शो ननी। ख्रीस्‍त आ पर्बम दूली शेंब शुश जाक्‍तेक्‍म। मोपतीके रागी जाम्‍चशो बाक्‍त, दे तुइक्‍ताक्‍य। 19मेको दूली शेंबपुकी इं दाते रे ग्रूतेक्‍म। मेकोपुकी चहिं इं खोदेंशो पा येसु ख्रीस्‍त कली थमा सुइक्‍ब मनम। इं खोदेंशो पा येसु ख्रीस्‍त कली थमा सुइक्‍ब नम हना, गोपुकी नु काथा बाक्‍म वा। तन्‍न इं दाते रे ग्रूशा लाम्‍तेक्‍म। मिनु इं खोदेंशो पा येसु ख्रीस्‍त कली थमा सुइक्‍ब मनम, दे तुंइ‍सीब। 20येसु ख्रीस्‍तमी इन कली परमप्रभु यावे आ सोक्‍त गेप्‍तु। मोपतीके नेल्‍ल तुइक्‍नीनी। 21इन कली एको लोव़ मारदे ब्रेक्‍ताक्‍ङ देंशा हना “गे मतुइक्‍ब ननी” दे ममिम्‍नुङ। थमा लोव़ तुइक्‍नीनी। मिनु मेको इन तुइश्‍शो थमा लोव़ क्‍येङा जोक्‍ब सेल्‍चा, दे ब्रेक्‍ताक्‍ङ। थमा शेंतीकेमी येसु ख्रीस्‍त आ पर्बम जोल मबाक्‍ब। 22दूली शेंबमी मार शेंब देंशा हना “येसु ख्रीस्‍त परमप्रभु यावे आ सोइश्‍शो ममाइ। परमप्रभु यावे नु आ तौ पोबु मनसी” दे शेंब। मेको ख्रीस्‍त आ पर्बम दूली लोव़ शेंब बाक्‍ब। 23सु सुमी “येसु ख्रीस्‍त परमप्रभु यावे आ तौ ममाइ” दे शेंनीमी, मेको इं आफ परमप्रभु यावे नु थुं का ङा मबाक्‍नीम। सु सुमी चहिं “येसु ख्रीस्‍त परमप्रभु यावे आ तौ बाक्‍ब” दे शेंनीमी, मेको इं आफ, परमप्रभु यावे नु थुं का ङा बाक्‍नीम। 24मिनु इन ङोंइती रे नेंशो शेंतीके मिम्‍शा बाक्‍कीन। इन ङोंइती रे नेंशो शेंतीके मिम्‍शा बाक्‍तीनी हना, गेपुकी इं आफ, परमप्रभु यावे नु आ तौ नु थुं का ङा दुम्‍शा बाक्‍नीनी। 25परमप्रभु यावेमी “गो इन कली गेना हना यो ब्रोंइशा बाक्‍चा गेनुङ” देंशो बाक्‍ब। 26मुर का निक्‍शीमी इन कली दूली शेंनीमी। मोपतीके गो इन कली एको लोव़ ब्रेक्‍ताक्‍ङ। 27येसु ख्रीस्‍तमी इन कली परमप्रभु यावे आ सोक्‍त गेप्‍तु। मिनु मेको गेपुकी नु बाक्‍ब। मेको परमप्रभु यावे आ सोक्‍त गेपुकी नु बाक्‍मेनु, अर्को शेंब ममाल्‍नीनी। परमप्रभु यावे आ सोक्‍तीमी इन कली नेल्‍ल शेंना शेंन बाक्‍ब। मेको आ शेंशो थमा बाक्‍तीके जोल मदुम्‍ब। मेकोमी ङोंइती इन कली शेंशो टिशा, मेको नु थुं का ङा दुम्‍शा, बाक्‍कीन। 28आं तमी तौपुकी, येसु ख्रीस्‍त नु थुं का ङा दुम्‍शा बाक्‍कीन। मेको यिमेनु, गोपुकी महिंब दुम्‍ने चाप्‍यल। मेको आ ङोंइती मुने मदोक्‍यल। 29“येसु ख्रीस्‍त नेल्‍ल ठीक पाइब बाक्‍ब” दे तुइक्‍ताक्‍नी हना, सु सुम ठीक पाइनीमी, मेको नेल्‍ल परमप्रभु आ आलपुकी नमी, दे तुइक्‍नीनी।

१ यूहन्‍ना 31इं आफोमी इं कली शुश दाक्‍शा “परमप्रभु यावे आ तमी तौ” दे नें वोइश्‍शो बाक्‍त। मिनु गोपुकी आ तमी तौ दुम्‍तय। मोपतीके रागी ङा मुरपुकीमी इं कली मतुइक्‍नीम। मारदे मतुइक्‍नीम देंशा हना, मेकोपुकीमी येसु ख्रीस्‍त कली यो मतुइक्‍नीम। 2आं दाक्‍शो लोक्‍बपुकी, मुल गोपुकी परमप्रभु यावे आ आल दुम्‍तय। नोले गो दोदेंशो दुम्‍नया, मारेइ मतुइक्‍नय। मिनु येसु ख्रीस्‍त ग्रूमेनु, गोपुकी मेको खोदेंशो दुम्‍नय। दोपा मेको खोदेंशो दुम्‍नय देंशा हना, गोपुकी मेको कली दोदेंशो बाक्‍मे, दे तशा, मेको खोदेंशो दुम्‍नय। 3मिनु सु मेको आ मग्रूम सम्‍म रिम्‍शा बाक्‍बा, मेको येसु ख्रीस्‍त पाप रे ङोन बाक्‍शो खोदेंशो पा, मेको यो पाप रे ङोन बाक्‍ब। 4मिनु सुम मरिम्‍शो पाइबा, मेकोमी परमप्रभु यावे आ अरेशो लोव़ मटीब। मरिम्‍शो मार बाक्‍ब देंशा हना, परमप्रभु यावे आ अरेशो लोव़ मटिचा मरिम्‍शो बाक्‍ब। 5मरिम्‍शो क्‍याम्‍चा कली येसु ख्रीस्‍त जाक्‍त, दे तुइक्‍नीनी। मिनु मेकोमी काइ मरिम्‍शो मपवा। 6सु चहिं मेको नु थुं का ङा दुम्‍शा बाक्‍बा, मेकोमी मरिम्‍शो मपाइब। सुम चहिं मरिम्‍शो पना पन बाक्‍बा, मेको येसु ख्रीस्‍त नु थुं का ङा मदुम्‍थु, मेको कली मतुइक्‍ब। 7आं आइक्‍च आलपुकी, दूली लोव़ शेंब आन लोव़ मनेनीन। सुम ठीक गेय पाइबा, मेको मुर यो येसु ख्रीस्‍त खोदेंशो पा ठीक पाइब बाक्‍ब। 8सु चहिं मरिम्‍शो पना पन बाक्‍बा, मेको मुर सैतान रे जाक्‍शो बाक्‍ब। मारदे हना सैतान ङोंइती रे मरिम्‍शो पना पन बाक्‍शो बाक्‍ब। मोपतीके परमप्रभु यावे आ तौ सैतान आ गेय थुम्‍चा कली रागीमी जाक्‍त। 9परमप्रभु यावे आ आलपुकीमी पाप मपाइनीम। मारदे पाप मपाइनीम देंशा हना, परमप्रभु आ थुं मेको आन थुंमी बाक्‍ब। मोपतीके परमप्रभु आ आलपुकीम पाप मपाइनीम। 10मिनु तेको मुर परमप्रभु यावे आ आल बाक्‍नीमी नु तेको मुर सैतान आ आल बाक्‍नीमी, दे तुंइ‍सीब। दोपा तुंइ‍सीब देंशा हना, सु सु ठीक गेय मपाइनीमी नु आ लोक्‍ब आन कली मदाक्‍नीमी, मेको परमप्रभु यावे आ आल मनमी। मेको सैतान आ आल बाक्‍नीम। 11मिनु इन ङोंइती रे नेंशो लोव़ मार बाक्‍त देंशा हना, गोपुकी दाक्‍मुचा माल्‍नय। 12काइन खोदेंशो दुम्‍चा मदुम्‍ब। काइनमी सैतान आ मुर दुम्‍शा, आ लोक्‍ब कली सदा बाक्‍त। काइनमी आ लोक्‍ब कली मारदे सदा बाक्‍त देंशा हना, आ थुं ङा गेय मरिम्‍शो बाक्‍माक्‍त। आ लोक्‍ब आ गेय चहिं परमप्रभु यावे आ ङोंइती ठीक बाक्‍माक्‍त। 13आं लोक्‍बपुकी, रागी ङा मुरपुकीमी इन कली मदाक्‍थु श्‍येत गेमेनु, छक मलाक्‍कीन। 14गोपुकी बेक्‍तीक राज्‍य रे पा, ब्रोंइतीक राज्‍यमी बाक्‍नय। दोपा तुइक्‍नय देंशा हना, थमा सुइक्‍ब लोक्‍ब आन कली दाक्‍नय। सुम चहिं मदाक्‍बा, मेको बेक्‍तीक राज्‍यमी बाक्‍ब। 15सुम थमा सुइक्‍ब लोक्‍ब आन कली मदाक्‍बा, मेको मुर साइक्‍ब बाक्‍ब। मिनु सुम थमा सुइक्‍ब लोक्‍ब आन कली साइक्‍बा, मेको गेना हना यो ब्रोंइशा बाक्‍चा मताइब, दे तुइक्‍नीनी। 16मिनु लोक्‍ब आन कली दाक्‍चा, दोपा तुंइ‍सीब देंशा हना, येसु ख्रीस्‍त इं कली दाक्‍शा, साइक्‍चा पुंइसाक्‍व। मिनु गोपुकीमी यो लोक्‍ब आन कली दाक्‍चा माल्‍नय। थमा सुइक्‍ब लोक्‍ब आन कली मबेक्या सम्‍म वारच पचा माल्‍नय। 17सुमी शुश शोंप थिशा यो, लोक्‍ब आन कली श्‍येत जशो तशा “गो मारेइ मगेनुङ” दे मिम्‍बा, मेको मुर आ थुं रे परमप्रभु यावे आ गेशो दाक्‍तीक सक्ति यो जाम्‍शा लाइब। 18आं आइक्‍च आलपुकी, गोपुकी दाक्‍मुय। मिनु “इ कली दाक्‍नुङ” दे लोव़ पशा ममाइ, तन्‍न पतीकेमी दाक्‍मुचा माल्‍नय। 19गोपुकी थमा पा दाक्‍शा, गेय पाइतय हना, इं थुंमी “थमा लां खोइक्‍ब नय” दे थमा पा तुइक्‍नय। 20मिनु इं थुंमी इं कली दोस गेप्‍तु हना, इं थुं क्‍येङा परमप्रभु यावे ठेयब बाक्‍ब। मिनु मेकोमी नेल्‍ल तुइक्‍ब। 21आं दाक्‍शो लोक्‍बपुकी, इं थुंमी इं कली दोस मगेप्‍तु हना, गोपुकी महिंथु, परमप्रभु यावे आ ङोंइती जाक्‍दीत्‍नय। 22मिनु गो महिंथु पुंइतय हना, इं पुंइशो गेब। मारदे हना गोपुकी आ अरेशो लोव़ पशा, आ दाक्‍शो पाइनय। 23मिनु आ अरेशो लोव़ मार बाक्‍ब देंशा हना, परमप्रभु यावे आ सोइश्‍शो येसु ख्रीस्‍त कली थमा सुइक्‍चा नु इं दातेमी दाक्‍मुचा इं कली अरेशो लोव़ बाक्‍ब। 24सुमी आ अरेशो लोव़ पाइबा, येसु नु थुं का ङा बाक्‍ब। मिनु येसु यो मेको मुर नु थुं का ङा बाक्‍ब। परमप्रभु यावे नु गोपुकी थुं का ङा दुम्‍तय, दे दोपा तुइक्‍नय देंशा हना, मेकोमी गेशो सोक्‍तीमी शेंशो रे तुइक्‍नय।

१ यूहन्‍ना 41आं दाक्‍शो लोक्‍बपुकी, शेंबपुकीमी शेंदमेनु, गेपुकीमी परमप्रभु यावे रे पा शेंनीमी देय मशेंनीमी मेको रुपीन। मारदे हना रागीमी शुश दूली पा, परमप्रभु यावे आ लोव़ पाइब बाक्‍नीम। 2परमप्रभु यावे आ सोक्‍त आ शेंतीके दोपा तुंइ‍सीब देंशा हना, सुमी “येसु ख्रीस्‍त परमप्रभु यावे आ सोइक्‍तीके रागीम जाक्‍त” देंबा, मेको मुर परमप्रभु यावे नु थुं का ङा बाक्‍ब। 3सुम चहिं “येसु परमप्रभु यावे आ सोइश्‍शो ममाइ” दे शेंबा, मेको परमप्रभु यावे नु थुं का ङा मबाक्‍ब। मेको येसु आ पर्बम दूली शेंब बाक्‍ब। येसु आ पर्बम दूली शेंथ जाक्‍ब, दे नेंतीनी। मिनु मेको मुल रागीमी बाक्‍ब। 4आं आइक्‍च आलपुकी, गेपुकी परमप्रभु यावे नु थुं का ङा दुम्‍शा, मेको रागीमी बाक्‍ब दूली शेंब आन कली ग्रातीनी। मारदे हना रागी ङा मुर आन थुंमी बाक्‍शो दूली शेंब सोक्‍त क्‍येङा इन थुंमी बाक्‍ब परमप्रभु यावे आ सोक्‍त ठेयब बाक्‍ब। 5मेको येसु ख्रीस्‍त आ पर्बम दूली शेंबपुकी रागी ङा मुर बाक्‍नीम। मोपतीके आन शेंतीके परमप्रभु यावे के ममाइ, रागी ङा बाक्‍ब। मिनु रागी ङा मुरपुकी मेको आन शेंशो दाक्‍नीमी। 6गोपुकी चहिं परमप्रभु यावे नु थुं का ङा बाक्‍नय। सुमी परमप्रभु यावे कली तुइक्‍बा, मेकोमी आंइ शेंशो टीब। सु चहिं परमप्रभु यावे नु थुं का ङा मबाक्‍बा, मेकोम आंइ शेंशो मटीब। मोपा थमा बाक्‍बा देय दूली शेंतीक बाक्‍बा, दे तुइक्‍ने चाप्‍नय। 7आं दाक्‍शो लोक्‍बपुकी, दाक्‍मुय। मारदे हना परमप्रभु यावेमी थमा सुइक्‍ब आन कली दाक्‍मुपाइक्‍ब। सुमी दाक्‍बा, मेको परमप्रभु यावे आ आल दुम्‍शा, परमप्रभु यावे कली तुइक्‍ब। 8सुम चहिं मदाक्‍बा, मेकोमी परमप्रभु यावे कली मतुइक्‍ब। मारदे हना परमप्रभु यावे दाक्‍ब बाक्‍ब। 9परमप्रभु यावेमी दोपा आ दाक्‍चा कोंइताक्‍व देंशा हना, आ का ला तौ रागीमी सोइक्‍ताक्‍व। मिनु आ तौ साइक्‍चा पुंइसीतीके इं कली गेना हना यो ब्रोंइशा बाक्‍चा गेप्‍तु। 10मिनु परमप्रभु यावे आ दाक्‍चा मार बाक्‍ब देंशा हना, गोपुकी ङोंइती परमप्रभु यावे कली काइ मदाक्‍ताक्‍य हना यो, परमप्रभु यावेमी इं कली दाक्‍ताक्‍व। गिश दाक्‍ताक्‍व देंशा हना, आंम तौ कली साइक्‍चा पुंइसीब पपाइक्‍चा कली रागीमी सोइक्‍ताक्‍व। इं कली मरिम्‍शो गेय नु सैतान आ राज्‍य रे प्रोंइचा, दे साइक्‍चा पुंइसीचा कली रागीमी सोइक्‍ताक्‍व। 11आं दाक्‍शो लोक्‍बपुकी, परमप्रभु यावेमी इं कली दोपा दाक्‍ता, मोपा गोपुकी यो दाक्‍मुचा माल्‍नय। 12मुरपुकीम परमप्रभु यावे कली गेनायो मतामे। तन्‍न गोपुकी दाक्‍मुयानु, परमप्रभु यावे इं नु थुं का दुम्‍त। मिनु परमप्रभु यावे आ दाक्‍तीक इं थुंमी लीब। 13परमप्रभु यावेमी इं कली आ सोक्‍त गेप्‍तु। मोपतीके गो परमप्रभु यावे नु थुं का ङा दुम्‍नय नु मेको गो नु थुं का ङा दुम्‍शो तुइक्‍नय। 14मिनु गोपुकी परमप्रभु यावेमी आ तौ रागीमी सोइश्‍शो ताइतक। गोपुकीमी “इं आफ, परमप्रभुमी आ तौ कली मुर आन कली पाप रे प्रोंइचा, दे रागीमी सोइक्‍ताक्‍व” दे शेंना शेंन बाक्‍नीकी। 15सुमी “येसु परमप्रभु यावे आ तौ बाक्‍ब” देंबा, मेको परमप्रभु यावे नु थुं का ङा बाक्‍ब। मिनु परमप्रभु यावे यो मेको नु थुं का ङा बाक्‍ब। 16मोपतीके गोपुकी “परमप्रभु यावेमी इं कली दाक्‍ब” दे तुइश्‍शा थमा सुइक्‍नय। परमप्रभु यावेमी मुर आन कली दाक्‍ब। सुमी दाक्‍ना दाक्‍न बाक्‍बा, मेको परमप्रभु यावे नु थुं का ङा बाक्‍ब। परमप्रभु यावे यो मेको नु थुं का ङा बाक्‍ब। 17दोपा मुर आन कली दाक्‍चा रिम्‍शो दुम्‍त देंशा हना, गोपुकी परमप्रभु यावे आ निसाफ पची नाक्‍त महिंनय। मारदे हना गोपुकी परमप्रभु यावे नु थुं का ङा दुम्‍शा, रागीमी बाक्‍नय। 18मिनु दाक्‍ना दाक्‍न बाक्‍तय हना, महिंनय। मारदे हना मुरपुकी सजाइ तशा हिंनीम। मिनु सु हिंबा, मेको आ दाक्‍शो शुश बाक्‍ब। 19गोपुकी चहिं परमप्रभु यावे कली मारदे दाक्‍नय देंशा हना, मेकोमी ङोंइती इं कली शुश दाक्‍ताक्‍व। 20सुमी चहिं “गो परमप्रभु यावे कली दाक्‍नुङ” देंबा, मिनु थमा सुइक्‍ब लोक्‍ब आन कली काइ मदाक्‍बा, मेको मुर आ देंशो लोव़ यो जोल बाक्‍ब। मारदे हना सुमी आ नु बाक्‍शो लोक्‍ब आन कली मदाक्‍बा, मेकोमी मुर आन मतशो परमप्रभु यावे कली दोपा दाक्‍ने चाप्‍बा ङा? मचाप्‍ब। 21मिनु परमप्रभु यावेमी इं कली अरेशो लोव़ मार बाक्‍त देंशा हना “सुमी परमप्रभु यावे कली दाक्‍बा, मेकोमी थमा सुइक्‍ब आन कली यो दाक्‍चा माल्‍ब” दे शेंशो बाक्‍त। 

१ यूहन्‍ना 51मिनु सुमी “येसु परमप्रभु यावे आ सोइश्‍शो ख्रीस्‍त बाक्‍ब” दे थमा सुइक्‍बा, मेको मुर परमप्रभु यावे आ आल बाक्‍ब। मिनु सुमी आफ कली दाक्‍बा, मेकोमी आ आल कली यो दाक्‍ब। 2गोपुकी थमा पा परमप्रभु यावे आ आल आन कली दाक्‍नय, दे दोपा तुइक्‍नय देंशा हना, परमप्रभु यावे कली दाक्‍नय। मिनु आ अरेशो लोव़ टीनय। 3गोपुकीमी “परमप्रभु यावे कली दाक्‍नय” देंतय हना, आ अरेशो लोव़ टिशा पाइनय। आ देंशो लोव़ टिशा पचा श्‍येत ममाइ। 4मिनु परमप्रभु यावे आ आलपुकीमी रागी ङा मुर आन दाक्‍शो गेय कली ग्रानीम। दोपा ग्रानीम देंशा हना, येसु ख्रीस्‍त कली थमा सुइक्‍चा मप्रोंइथु ग्रानीम। 5सु सुमी ग्रानीम देंशा हना “येसु परमप्रभु यावे आ तौ बाक्‍ब” दे थमा सुइक्‍बमी ग्रानीम। 6मिनु येसु ख्रीस्‍त ब्‍वाक्‍कु नु हुश रे जाक्‍त। ब्‍वाक्‍कु रे ला ममाइ, तन्‍न ब्‍वाक्‍कु नु हुश रे जाक्‍त। 7परमप्रभु यावे आ सोक्‍त मेको आ सांकछी बाक्‍ब। मारदे हना परमप्रभु यावे आ सोक्‍तीम थमा लोव़ ला पाइब। 8मोपा सांकछी सां बाक्‍नीम। का परमप्रभु यावे आ सोक्‍त बाक्‍ब, का ब्‍वाक्‍कु रे जरमेतीके बाक्‍ब नु का मुर आन मरिम्‍शो पतीके आ पर्बम येसु साइक्‍चा पुंइसीशो ङा हुश बाक्‍ब। मिनु मेको सांफा गारनीमी। 9गोपुकी मुर आन सांकछी नेंशा थमा सुइक्‍नय। परमप्रभु यावे आ सांकछी मुर आन सांकछी क्‍येङा ठेयब बाक्‍ब। मिनु परमप्रभु यावेमी आ तौ येसु ख्रीस्‍त आ पर्बम मेको सांकछी गेप्‍तु। 10सु परमप्रभु यावे आ तौ कली थमा सुइक्‍बा, मेको मुर आ थुंमी सांकछी लीब। सु चहिं परमप्रभु यावे कली थमा मसुइक्‍बा, मेकोमी “परमप्रभु यावे जोल्‍फे बाक्‍ब” देंब। मारदे हना “आं तौ बाक्‍ब” दे परमप्रभु यावेमी देंशो थमा मसुइक्‍ब। 11मिनु मेको आ सांकछी मार बाक्‍ब देंशा हना, परमप्रभु यावेमी इं कली गेना हना यो ब्रोंइशा बाक्‍तीक गेप्‍तु। मोदेंशो ब्रोंइशा बाक्‍तीक आ तौमी पतीके बाक्‍ब। 12सु मेको आ तौ नु बाक्‍बा, मेको गेना हना यो ब्रोंइशा बाक्‍चा ताइब। सु चहिं परमप्रभु यावे आ तौ नु मबाक्‍बा, मेको गेना हना यो ब्रोंइशा बाक्‍चा मताइब। 13मिनु गेपुकी परमप्रभु यावे आ तौ आ नें कली थमा सुइक्‍नीनी। मोपतीके गेना हना यो ब्रोंइशा बाक्‍चा ताइब बाक्‍नीनी, दे गो इन कली तुइक्‍पाइक्‍चा कली ब्रेक्‍ताक्‍ङ। 14मिनु मेको कली थमा सुइश्‍शोमी इं पुंइशो आ दाक्‍शो बाक्‍त हना, मार पुंइतय हना यो, इं कली नेंशा गेब। 15गोपुकीमी इं मार मार पुंइशो नेंब, दे तुइक्‍ताक्‍य हना, इं पुंइशो यो गेब, दे तुइक्‍नय। 16मिनु सुमी आ लोक्‍ब मबेक्‍चा ङा सजाइ तचा ङा पा मरिम्‍शो पशो ताइबा, मिनु आ लोक्‍ब आ पर्बम पुंइबा, मेको मुर आ पुंइशो परमप्रभु यावेमी गेब। मेको थमा सुइक्‍ब लोक्‍ब गेना हना यो ब्रोंइशा बाक्‍चा ताइब। तन्‍न बेक्‍चा ङा मरिम्‍शो पतीक यो बाक्‍बा, मोदेंशो मरिम्‍शो पाइब कली पुंइचा ममाल्‍ब, दे इन कली देंनुङ। 17परमप्रभु यावे कली मगारचा ङा गेय नेल्‍ल मरिम्‍शो बाक्‍नीम। तन्‍न कोइ मरिम्‍शो पतीके क्‍याम्‍चा ङा बाक्‍नीम। 18मिनु “सु परमप्रभु यावे रे जरमेशो बाक्‍मे, मेको मुरुम मरिम्‍शो मपाइब। मारदे हना परमप्रभु यावे रे जरमेशो आन कली येसु ख्रीस्‍तमी कोव़ब। मिनु सैतानमी मेको आन कली मथीब” दे तुइक्‍नय। 19मिनु गोपुकीमी “गोपुकी परमप्रभु यावे आ मुर नय” तन्‍न सैतानमी नेल्‍ल रागी ङा मुर आन कली हुकुम पाइब, दे तुइक्‍नय। 20मिनु परमप्रभु यावे आ तौमी इं कली रुप्‍तीक थुं गेप्‍तु, दे तुइक्‍नय। मेको रुप्‍तीक थुंमी थमा पतीके कली तुइक्‍नय। गोपुकी मेको थमा पाइब नु थुं का ङा बाक्‍नय। मोपा आ तौ येसु ख्रीस्‍त नु यो थुं का ङा बाक्‍नय। मेको थमा परमप्रभु यावे नु गेना हना यो ब्रोंइशा बाक्‍तीक बाक्‍ब। 21मोपतीके “आं आइक्‍च आलपुकी, मूर्ति रे ङोन बाक्‍कीन” दे इन कली ब्रेक्‍शा अरेतन्‍नी।

http://www.bible.is/SUZWBT/1John/1/N

Nenhum comentário:

Postar um comentário