segunda-feira, 11 de janeiro de 2016

1 Yahya: Sasak



1 YAHYA 11Isi surat niki mengenai Manik saq ngicanin idup, nike Manik saq sampun araq lẽman penembẽq. Tiang pade sampun dengah ie dait serioq mẽsaq. Tiang pade sampun perhatiang dait negel ie siq ime tiang pade. 2Idup nike sampun tenyatayang, dait tiang pade sampun serioq ie. Keranaq nike tiang pade ngebẽng kesaksian mengenai hal nike. Tiang pade beriteang lẽq side pade mengenai idup sejati dait kekel, saq araq bareng Bapa, dait saq sampun tenyatayang tipaq tiang pade. 3Napi saq sampun tiang pade serioq dait dengah, nike ẽndah saq tiang pade beriteang tipaq side pade, adẽq side pade bareng kance tiang pade ẽndah, idup akrab kance Bapa dait kance Bije-Ne, nike Deside Isa Almasih. 4Tiang pade nulis niki adẽq angente pacu-pacu gembire. 5Niki berite saq sampun tiang pade dengah lẽman Almasih, dait saq tiang pade dait saq tiang pade sampẽang tipaq side pade: Allah nike cahaye, dait lẽq Ie tetu-tetu ndẽq araq saq peteng. 6Lamun ite bebase bahwe ite idup akrab kance Allah, padahal ite idup lẽq dalem saq peteng, make ite beduste siq ucapan-ucapan dait siq perbuatan. 7Laguq lamun ite idup lẽq dalem cahaye, maraq Allah araq lẽq dalem cahaye, make ite idup akrab, rukun sopoq kance saq lainne, dait daraq Deside Isa Almasih, Bije-Ne nike, nyuciang ite lẽman selapuq dose. 8Lamun ite bebase bahwe ite ndẽq bedose, ite nipu diriqte mẽsaq; dait kebenaran ndẽq araq lẽq dalem ite. 9Laguq lamun ite ngaku dose-dosente lẽq Allah, make Ie setie dait adil, sehingge Ie gen ngampunin dose-dosente dait nyuciang ite lẽman selapuq kejahatan. 10Laguq lamun ite bebase bahwe ite ndẽq bedose, make setetune ite anggep Allah jari penduste, dait hal nike nyatayang bahwe Manik-Ne ndẽq araq lẽq dalem atẽnte.


1 YAHYA 21Bije-bije tiang! Tiang tulis surat niki tipaq side pade adẽqde ndẽq piaq dose. Laguq lamun araq saq piaq dose, make ite bedowẽ sopoq perantare lẽq arepan Bapa, nike Deside Isa Almasih saq adil. 2Dait langan Ie, ite bau tedamẽang lẽman selapuq dose-dosente, dait ndẽqne umaq dose-dosente doang, laguq ẽndah umaq dose-dose seantẽro dunie. 3Niki tandene bahwe ite kenal kance Allah, nike lamun ite taat lẽq prẽntah-prẽntah-Ne. 4Dengan saq bebase, "Tiang kenal Allah," laguq ndẽq taat lẽq prẽntah-prẽntah-Ne, dengan nike penduste, dait kebenaran ndẽq araq lẽq dalem atẽne. 5Laguq dengan saq taat lẽq Manik Allah, make kasih tipaq Allah sempurne gati lẽq dengan nike. Siq care nike ite nenaoq bahwe ite idup lẽq dalem Allah. 6Sai-sai saq bebase bahwe ie idup lẽq dalem Allah, ie harus idup pade maraq care Almasih idup. 7Semeton senamian saq tiang kasihin! Saq tiang tulis niki ndẽqne prẽntah saq baru. Niki prẽntah saq laẽq saq sampun tesampẽang ojok side sewaktu side baruq percaye lẽq Almasih. Nike Manik lẽman Allah saq sendẽqmanne sampun side pade dengah. 8Timaqne maraq nike, prẽntah saq tiang tulis niki baru ẽndah. Sẽngaq kebenaranne nyate lẽq dalem Almasih dait lẽq diriq side pade. Sẽngaq peteng kenyeke telang dait cahaye saq kenaq mulai besinar. 9Dengan saq bebase bahwe ie araq lẽq dalem cahaye laguq dengan nike masih meriq lẽq semetonne, make dengan nike masih araq lẽq dalem peteng jangke mangkin. 10Dengan saq ngasihin semetonne, ie idup lẽq dalem cahaye, sehingge lẽq ie ndẽq araq hal-hal saq miaq dengan lain jari sesat. 11Laguq dengan saq meriq lẽq semetonne, ie araq lẽq dalem peteng. Ie idup lẽq dalem peteng, dait ndẽq nenaoq ojok mbẽ aningne, sẽngaq peteng nike miaq penentengne jari bute. 12Tiang nulis tipaq side, hai kanak-kanak, sẽngaq dosende sampun teampunin lantaran pesẽngan Almasih. 13Tiang nulis tipaq side, hai bapaq-bapaq, sẽngaq side sampun kenal kance Ie saq sampun araq lẽman penembẽqne. Tiang nulis tipaq side, dengan-dengan bajang, sẽngaq side pade sampun ngalahang Si Jahat. 14Tiang nulis tipaq side, hai kanak-kanak, sẽngaq side pade kenal kance Bapa. Tiang nulis tipaq side, hai bapaq-bapaq, sẽngaq side pade sampun kenal kance Ie, saq sampun araq lẽman penembẽqne. Tiang nulis tipaq side, hai dengan-dengan bajang, sẽngaq side pade kuat dait Manik Allah araq lẽq dalem atẽnde, dait side pade sampun ngalahang Si Jahat. 15Ndaq side ngasihin dunie niki, atao napi juaq saq araq lẽq dalem dunie niki. Lamun side pade ngasihin dunie, make kasih tipaq Bapa ndẽq araq lẽq side pade. 16Sẽngaq selapuq saq araq lẽq dalem dunie niki -- kemẽlẽq tabiat manusie dait saq temelẽtang siq penenteng dait kesombongan idup -- selapuqne nike hal-hal saq asalne ndẽqne lẽman Bapa, laguq lẽman dunie. 17Dunie dait selapuq kemẽlẽqne kenyeke telang. Laguq dengan saq turut pekayunan Allah, tetep idup jangke selaẽq-laẽqne. 18Bije-bije tiang, niki jaman ahir! Sendẽqmanne sampun tebadaq tipaq side bahwe penentang Almasih gen dateng; dait mangkin sampun araq luwẽq dengan saq nentang Almasih. Nike tandene bahwe ahir jaman sampun rapet. 19Mule ie pade dengan-dengan saq asalne lẽman ite, laguq ie pade ndẽqne bagian lẽman ite, sẽngaq lamun ie pade lẽman ite, pasti ie pade tetep bareng-bareng kance ite. Laguq ie pade bilin ite, adẽqne nyate bahwe ie pade selapuq mule ndẽqne bagian lẽman ite. 20Laguq side pade sampun nerimaq paice lẽman saq Mahesuci, dait side pade selapuq sampun nenaoq. 21Jari, tiang nulis niki tipaq side pade ndẽqne lantaran side pade ndẽq kenal kebenaran, laguq malahan lantaran side pade sampun kenal hal nike, dait side pade ẽndah nenaoq bahwe ndẽq araq duste saq asalne lẽman kebenaran. 22Sai saq beduste nike? Saq beduste nike dengan saq nilas bahwe Deside Isa nike Almasih. Dengan nike penentang Almasih, ie ndẽq ngakuq Bapa dait Bije saq asalne lẽman Allah. 23Dengan saq ndẽq ngakuq Bije saq asalne lẽman Allah, artine ndẽq nerimaq Bapa ẽndah. Dait dengan saq ngakuq Bije saq asalne lẽman Allah, artine nerimaq Bapa ẽndah. 24Keranaq nike, berite saq sampun side pade dengah lẽman penembẽq, harus side pade jagaq pacu-pacu lẽq dalem atẽnde. Lamun berite nike side pade perhatiang pacu-pacu, side pade gen tetep idup lẽq dalem Bije saq asalne lẽman Allah dait Bapa. 25Dait hal niki saq tejanjiqang siq Almasih tipaq ite; idup sejati dait kekel. 26Tiang tulis niki tipaq side mengenai dengan-dengan saq kenyeke berusahe nyesatang side pade. 27Laguq mengenai side pade, Almasih sampun curahang Roh-Ne tipaq side pade. Dait sengonẽq Roh-Ne araq lẽq side pade, ndẽq perlu araq dengan lain ngajah side pade. Sẽngaq Roh-Ne ngajah side pade mengenai selapuq hal; dait napi saq Ie ajahang nike kenaq, ndẽqne duste. Keranaq nike, side pade harus taat lẽq napi saq teajahang siq Roh nike, dait side pade harus tetep idup lẽq dalem Almasih. 28Jari, bije-bije tiang, pade tetep idup lẽq dalem Almasih, adẽq ẽraq sewaktu Ie rauh, ite parek tipaq Almasih siq keyakinan saq pasti dait ndẽq nyeboq lantaran ilaq. 29Side pade sampun nenaoq bahwe Almasih nike kenaq. Keranaq nike side pade harus nenaoq ẽndah bahwe sebilang dengan saq idup menurut kebenaran, ie asalne lẽman Allah.


1 YAHYA 31Serioq berembẽ belẽq kasih Allah lẽq ite, sehingge ite teakuq jari bije-bije dowẽ-Ne. Dait mule ite niki bije-bije dowẽn Allah. Keranaq nike dunie saq jahat niki ndẽq kenal kance ite, sẽngaq dunie ndẽq kenal kance Allah. 2Semeton senamian saq tiang kasihin! Mangkin ite niki bije-bije dowẽn Allah, laguq keadaante ẽraq ndẽqman jelas. Laguq ite nenaoq bahwe lamun Almasih rauh, ite gen jari maraq Ie, sẽngaq ite gen serioq Ie lẽq dalem keadaan-Ne saq setetune. 3Selapuq dengan saq bedowẽ harepan maraq niki lẽq Almasih, jagaq diriqne adẽqne tetu-tetu suci, bersi lẽman dose maraq Almasih nike suci. 4Dengan saq piaq dose, ngelanggar hukum Allah; sẽngaq dose nike pelanggaran hukum Allah. 5Side pade nenaoq bahwe Almasih sampun rauh jari ngapus dose-dose manusie, dait bahwe ndẽq araq dose lẽq dalem diriq-Ne. 6Selapuq dengan saq idup lẽq dalem Almasih, ndẽq terus-terusan piaq dose. Dengan saq tetep piaq dose, ndẽq uwah serioq dait kenal kance Almasih. 7Bije-bije tiang, ndaq alurang sai juaq nyesatang side pade. Sai-sai saq ngelaksaneang napi saq kenaq, nike kenaq, pade maraq Almasih nike kenaq. 8Laguq dengan saq tetep piaq dose, nike anak Belis, sẽngaq Belis gawẽq dose lẽman penembẽqne. Nike lantaranne Bije saq asalne lẽman Allah rauh, jari ngancurang pegawẽan Belis. 9Dengan saq asalne lẽman Allah, ndẽq terus-terusan piaq dose, sẽngaq sipat Allah mẽsaq araq lẽq ie. Dait lantaran Allah nike jari Bapane, make ie ndẽq bau terus-terusan piaq dose. 10Niki bẽdene antare bije-bije dowẽn Allah kance anak-anak dowẽn Belis: Sai-sai saq ndẽq ngelaksaneang prẽntah Allah, atao ndẽq ngasihin semetonne, ie ndẽqne bije dowẽn Allah. 11Lẽman penembẽqne sampun tesampẽang berite niki tipaq side: Ite harus saling kasihin sopoq kance saq lain. 12Ndaq ite maraq Kain, saq jari anak Belis dait nyematẽq semetonne mẽsaq. Napi penyebapne Kain nyematẽq semetonne? Sẽngaq ie ngelaksaneang hal-hal saq jahat, laguq hal-hal saq telaksaneang siq semetonne nike kenaq. 13Keranaq nike, semeton-semeton, ndaq bengaq lamun dengan-dengan dunie niki meriq lẽq side pade. 14Ite nenaoq bahwe ite sampun sugul lẽman kematẽan, dait ngalih tipaq idup. Ite nenaoq nike, sẽngaq ite ngasihin sepade semetonte. Dengan saq ndẽq ngasihin sepadene manusie, artine masih tekuasein siq kematẽan. 15Dengan saq meriq lẽq semetonne, pade maraq tukang nyematẽq, dait side pade nenaoq bahwe tukang nyematẽq ndẽq bedowẽ idup sejati dait kekel. 16Langan hal niki ite nenaoq kasih Almasih. Bahwe Ie sampun nyerahang idup-Ne umaq ite. Keranaq nike, ite ẽndah harus nyerahang idupte umaq semeton-semetonte! 17Lamun sopoq dengan bedowẽ lebih, serioq semetonne saq ndẽq bedowẽ, laguq ndẽq mẽlẽ nulung semetonne nike, berembẽ dengan nike bau bebase bahwe ie ngasihin Allah? 18Bije-bije tiang! Ndaq ite ngasihin cume lẽq biwih atao cume siq ucapan doang. Ite harus ngasihin siq kasih saq sejati, saq tebuktiang siq perbuatante dait lẽq dalem kebenaran. 19Maraq nike entane ite nenaoq bahwe ite niki asalne lẽman kebenaran. Maraq nike ẽndah atẽnte iniq tentrem lẽq arepan Allah. 20Sẽngaq ite nenaoq, bahwe lamun ite tesalaqang siq atẽnte, Allah belẽqan lẽman atẽnte, dait Ie wikan selapuqne. 21Jari, semeton senamian saq tiang kasihin, lamun atẽnte ndẽq nyalahang ite, ite parek tipaq Allah siq keyakinan saq pasti. 22Dait napi saq ite tunas lẽman Ie, ite gen nerimaq, sẽngaq ite taat lẽq prẽntah-prẽntah-Ne dait ite ngelaksaneang napi saq nyenengang Ie. 23Niki prẽntah-Ne tipaq ite: Ite harus percaye lẽq Bije-Ne, nike Deside Isa Almasih, dait ite harus saling kasihin, maraq saq sampun teprẽntahang siq Almasih tipaq ite. 24Selapuq dengan saq taat lẽq prẽntah-prẽntah-Ne, idup lẽq dalem Allah, dait Allah araq lẽq dalem ie pade. Dait ite nenaoq bahwe Allah araq lẽq dalem ite, sẽngaq Ie sampun ngicanin Roh-Ne tipaq ite.


1 YAHYA 41Semeton-semeton saq tiang kasihin! Ndaq percaye lẽq sebilang roh, laguq uji juluq roh-roh nike, napi roh nike asalne lẽman Allah atao ndẽq. Sẽngaq luwẽq nabi palsu sampun begerame ojok mbẽ-mbẽ. 2Maraq niki entane adẽq side pade nenaoq napi nike Roh Allah atao ndẽq: Sebilang roh saq ngaku bahwe Deside Isa rauh ojok dunie jari manusie, roh nike dateng lẽman Allah. 3Laguq roh saq ndẽq ngakuq Deside Isa, roh nike ndẽqne dateng lẽman Allah. Roh nike roh penentang Almasih. Side pade sampun dengah bahwe roh nike gen dateng, dait mangkin ie sampun araq lẽq dalem dunie niki. 4Laguq bije-bije tiang, side pade asalne lẽman Allah. Side pade sampun ngalahang nabi-nabi palsu, sẽngaq Roh saq araq lẽq side belẽqan kuasene kance roh saq araq lẽq dalem dunie. 5Nabi-nabi palsu nike bebaos mengenai hal-hal dunie, dait dunie dengah napi saq ie pade sampẽang, sẽngaq ie pade asalne lẽman dunie. 6Laguq ite niki asalne lẽman Allah; dait dengan saq kenal kance Allah, dengah ucapante. Dengan saq asalne ndẽq lẽman Allah, ndẽqne dengah ucapante. Siq care nike ite nenaoq bẽdene antare Roh kebenaran dait roh saq nyesatang. 7Semeton senamian saq tiang kasihin! Silaq ite saling kasihin sopoq kance saq lain, sẽngaq kasih nike asalne lẽman Allah. Sebilang dengan saq bedowẽ rase kasih, asalne lẽman Allah dait kenal kance Allah. 8Dengan saq ndẽq bedowẽ rase kasih, ie ndẽq kenal kance Allah; sẽngaq Allah nike kasih. 9Siq care niki kasih Allah nike tenyatayang lẽq ite, siq care ngutus Bije-Ne saq nunggal ojok dalem dunie adẽq ite mauq idup langan Bije-Ne nike. 10Niki kasih nike: Ndẽqne ite saq sampun ngasihin Allah, laguq Allah saq ngasihin ite dait saq sampun ngutus Bije-Ne adẽq langan Ie, ite tedamẽang lẽman dose-dosente. 11Semeton senamian saq tiang kasihin, lamun maraq nike belẽqne kasih Allah lẽq ite, ite ẽndah harus saling kasihin sopoq kance saq lain. 12Ndẽq araq sopoq dengan juaq saq sampun serioq Allah. Laguq lamun ite saling kasihin, Allah tetep araq lẽq dalem ite dait kasih-Ne jari sempurne lẽq dalem ite. 13Sẽngaq Allah sampun ngicanin Roh-Ne tipaq ite, make ite nenaoq bahwe ite sampun araq lẽq dalem Allah, dait Allah lẽq dalem ite. 14Tiang pade sampun serioq Bije-Ne, dait tiang pade beriteang bahwe Ie teutus siq Bapa jari Juruselamet dunie niki. 15Sai-sai saq ngaku bahwe Deside Isa nike Bije saq asalne lẽman Allah, Allah araq lẽq dalem dengan nike, dait dengan nike ẽndah araq lẽq dalem Allah. 16Ite sampun nenaoq dait percaye mengenai kasih Allah tipaq ite. Allah nike kasih. Dengan saq idupne tekuasein siq kasih, dengan nike araq lẽq dalem Allah, dait Allah lẽq dalem ie. 17Siq care niki kasih Allah tejariang sempurne lẽq dalem ite, adẽq ite parek tipaq Allah siq keyakinan saq pasti lẽq Jelo Pengadilan, sẽngaq idupte lẽq dunie niki pade maraq idup Almasih. 18Lẽq dalem kasih, ndẽq araq rase takut, sẽngaq kasih saq sempurne nelangang selapuq rase takut. Sẽngaq lẽq dalem rase takut araq siksaq hukuman dait dengan saq takut ndẽqman sempurne lẽq dalem kasih. 19Ite ngasihin, sẽngaq Allah sampun juluan ngasihin ite. 20Lamun sopoq dengan bebase, "Tiang ngasihin Allah," laguq ie ndẽq ngasihin semetonne, dengan nike penduste. Sẽngaq dengan saq ndẽq ngasihin semetonne saq ie serioq, ndẽq mungkin bau ngasihin Allah saq ndẽq ie serioq. 21Niki prẽntah saq teicanin siq Almasih tipaq ite: Sai juaq saq ngasihin Allah harus ẽndah ngasihin semetonne.


1 YAHYA 51Sebilang dengan saq percaye bahwe Deside Isa nike Almasih, dengan nike asalne lẽman Allah. Sai-sai saq ngasihin Allah, make ie ẽndah ngasihin dengan saq asalne lẽman Allah. 2Siq care niki ite nenaoq bahwe ite ngasihin bije-bije saq asalne lẽman Allah: Ite ngasihin Allah dait taat lẽq prẽntah-prẽntah-Ne. 3Sẽngaq, kasih tipaq Allah artine: Bahwe ite taat lẽq prẽntah-prẽntah-Ne. Dait prẽntah-prẽntah-Ne nike ndẽqne berat umaq ite, 4sẽngaq sai saq asalne lẽman Allah, ie ngalahang dunie. Niki kemenangan saq ngalahang dunie, nike imante. 5Sai saq bau ngalahang dunie, selain dengan saq percaye bahwe Deside Isa nike Bije saq asalne lẽman Allah? 6Niki Ie saq rauh ojok dunie siq aiq dait daraq, nike Deside Isa Almasih; ndẽqne siq aiq doang, laguq ẽndah siq daraq. Dait Roh Allah mẽsaq saq ngicanin kesaksian bahwe nike kenaq, sẽngaq Roh nike kebenaran. 7Sẽngaq araq telu saksi lẽq dalem sorge: Bapa, Manik dait Roh Suci; dait ketelune nike sopoq. 8Dait araq telu saq jari saksi lẽq gumi: Roh, aiq dait daraq, ketelune nike sopoq. 9Ite percaye lẽq kesaksian manusie, laguq kesaksian Allah kuatan malik. Dait nike kesaksian saq sampun teicanin siq Allah mengenai Bije-Ne. 10Keranaq nike, dengan saq percaye lẽq Bije saq asalne lẽman Allah, sampun nerimaq kesaksian nike lẽq dalem atẽne; laguq dengan saq ndẽq percaye tipaq Allah, sampun anggep bahwe Allah beduste, sẽngaq ie ndẽq percaye napi saq temanikang siq Allah mengenai Bije-Ne. 11Niki kesaksian nike: Allah sampun ngicanin ite idup sejati dait kekel, dait idup nike araq lẽq dalem Bije-Ne. 12Dengan saq bedowẽ Bije saq asalne lẽman Allah, bedowẽ idup nike; dait dengan saq ndẽq bedowẽ Bije saq asalne lẽman Allah nike, ndẽq bedowẽ idup nike. 13Tiang nulis tipaq side pade, adẽq side pade saq percaye tipaq Bije saq asalne lẽman Allah, nenaoq bahwe side pade sampun bedowẽ idup sejati dait kekel. 14Dait ite parek tipaq Allah siq keyakinan saq pasti, sẽngaq ite yakin Ie ngabulang do'ente, lamun ite tunas sopoq hal saq sesuai kance pekayunan-Ne. 15Lamun ite nenaoq bahwe Ie mirengang ite dait napi saq ite tunas, make ite ẽndah nenaoq bahwe ite sampun nerimaq selapuq hal saq sampun ite tunas lẽman Ie. 16Lamun side pade serioq salaq sopoq semeton seiman piaq dose saq ndẽq datengang kematẽan, side pade harus bedo'e tipaq Allah; dait Allah gen ngicanin ie idup nike. Hal niki berlaku tipaq ie pade saq dosene ndẽq datengang kematẽan. Laguq araq dose saq datengang kematẽan. Mengenai hal nike tiang ndẽq badaq bahwe side pade harus bedo'e tipaq Allah. 17Selapuq kejahatan nike dose, laguq araq dose saq ndẽq datengang kematẽan. 18Ite nenaoq bahwe selapuq dengan saq asalne lẽman Allah, ndẽq terus-terusan piaq dose, sẽngaq Bije saq asalne lẽman Allah ngelindungin ie, dait Si Jahat ndẽq bau piaq napi-napi lẽq ie. 19Ite nenaoq bahwe ite dowẽn Allah, dait seantẽro dunie niki araq lẽq bawaq kekuasean Si Jahat. 20Ite nenaoq bahwe Bije saq asalne lẽman Allah sampun rauh dait sampun ngicanin ite pengertian, adẽq ite kenal kance Allah saq kenaq. Ite idup lẽq dalem Allah saq kenaq dait lẽq dalem Bije-Ne, Deside Isa Almasih. Ie Allah saq kenaq, dait idup sejati dait kekel. 21Bije-bije tiang, jaoqang diriqde lẽman berhale-berhale!

http://www.bible.is/SASLAI/1John/1/D

Nenhum comentário:

Postar um comentário