sexta-feira, 15 de janeiro de 2016

1 YOHANE: SHAN


1 YOHANE 11Kilya kyeifo uka mapookyony, kilya lulekiita na ikilollya na miso eru, na maako eru akakiwarawara, kya mbony ta irero lya Iruva lya muu; 2(mmuu ulemmaa ilollywa paa, neese lukalollya lukavevikya-u ukureekyi, na imoongoya yeni mbony ta muu wa llung'anu ukee kwa Iruva Nde, ukalollywa paa kweru). 3Ekyo lulekilollya lukavekiita mmbo lwamoongoya na yeni, naambo na yeni mukooye yaakana neese, na yaakaniswa lyeru ni ando amwi na Nde na Mwana wakwe Yesu Kristo. 4Neese mmbo lwareiya efi, naambo ifura lyeru lyikooye iinutywa. 5Na yei nnyo mbony luleiita kwa Nndumi weeru, lukamwoongoya, sheelyi Iruva mmbwe sa, nta ireema llyishidimaa ikaa kwakwe-fo. 6Kwakooya lwaamba luke yaakana nawe, lyo lukaengera ikaa ireemeny, mmbo lwaamba wongo, nta llwatana ekyo kikee kya dede-fo; 7lyo kwakooya lweenda seny, shaasa we Nde akee seny, mmbo lushiitanaa luveni na veni, na samu ya Yesu Mwana wa Iruva mmbo yalusangya ulyamari loose. 8Kwakooya lwaamba llutiri ulyamari mmbo lwakulemba luveni, nta dede nnyikee nnang'ani yeeru-fo. 9Lyo kwakooya lwakurya ngyulyamari teru. We mmbo akee nsaari na wa usumanu natani alusarya ngyulyamari teru na ilusangya uravi loose. 10Kwakooya lwaamba llutiri ulyamari, mmbo lwamwaallwa we mwoongo na nta irero lyakwe lyikee nnang'ani yeeru-fo.

1 YOHANE 21Vana vakwa vadu, mmbo shikeemureiya efi naambo mulashetana ulyamari. Kwakooya nndu atana ulyamari lutiri Mwiluterevya kwa Nde, we Yesu Kristo muni usumanu. 2Nawe mmbwe nsandi kimaruma kya ngyulyamari teru; nta nshi kya ngyulyamari teru yese-da-fo, kyaindi na ta ulana loose. 3Kya ekyo yese mmbo lwammumanya, elyi lwaringa mavavaso akwe. 4Yeto ashambaa, shammumanya, lyo kara nalaringa mavavaso akwe, mmbo akee mwoongo, nta dede nnyikee nnang'ani yakwe-fo. 5Kyaindi yeto mwiringa irero lyakwe, nnang'ani ya yeto ukundi lwa Iruva mmbo luvangyi dede deny. Na yese lwiishi mmbo lukee nnang'ani yakwe. 6Yeto ashambaa akee nnang'ani yakwe, mmbo kinkooye we muni nave shaasa we Kristo ekai. 7Vakunde vakwa, nshi ivavaso iiya nkeemuniinga-fo, ni ivavaso lya kasha mwekee nalyo uka mbee. Ivavaso elyo lya kasha ni irero llya mulelyiita. 8Na lyingyi mmbo shamureiya ivavaso iiya, irero lyikee lya dede nnang'ani yakwe na nnang'ani yaany; mashika ireema mmbo lyikeeiira na sa yammaa imika. 9Yeto aamba mmbo akee seny, indi kaswa mwanamaye, yeto mmbo akee ireeminy fika ulaalu. 10Yeto akunda mwanamaye, mmbo akee seny, nta nnang'ani yakwe nkwiifo kiteve-fo. 11Lyo yeto aswa mwanamaye, ni ireminy akai, kaverua-rua ireeminy nta nalamanyaa kundo akeenda, mashika ireema lyammuwaa miso. 12Yeni vana vadu, shamureiya yeni, mashika elyi mwansaryo ngyulyamari tany, kimaruma kya irina lyakwe. 13Na yeni vamiku, shamureiya, mashika elyi mwamumanya yeto eefo uka elyo mbee. Na yeni vakoo shamureiya, mashika elyi mwammbinga nravi ulya. Na yeni vana shamureiya, mashika elyi mwammanya Nde. 14Na yeni vamiku mmbo shamureiya mashika elyi mwammanya yeto eefo uka elyo mbee. Mmbo shamureiya yeni vakoo mashika elyi mutiri finya, na irero kya Iruva lyikee nnang'ani yaany, na yeni mukavinga nravi ulya. 15Mulashekunda ulana nta findo fiifo-fo. Kwakooya nndu akunda ulana, yekyo kya ikunda Nde nkyikee nnang'ani yakwe-fo. 16Mashika wo kindo kikee ulaniny, nto lango ta mwiili na lango ta miso, na ikurosa kya muu yeu, mfyuukye kwa Nde-fo, mfya ulana elu. 17Na ulana elu mmbo lukee iira ando amwi na lango ta vayo, kyaindi yeto mwitana filya Iruva akundye mmbo ashekaa-u fika llung'anu. 18Vana vakwa-ro, yefi mfyeeri fya ifurumya; na shaasa llya muleita kya mwiilema Kristo akeesha, na fika ulaalu velema Kristo valenkaa-fo nkuka. Kimmba ni indo lumanyi efi ni fyeeri fya ifurumya. 19Nkweru valeuka lyo mmbekee veru-fo. Mashika kukooye vekee veru, mmbo vekaa ando amwi neese. Lyo mmbo valeuka-fo naambo kimanyike paa sheelyi nshi woose vakee veru-fo. 20Kristo mmbo alemupusuya mumuyo we yeto akee mweele na yeni moose mwiishi ekyo. 21Nshilemureiya yeni-fo, mashika elyi mulaishi dede, kyaindi elyi muyiishi, neelyi kulaore kwiifo nta wongo lumwi luukye efo dedeny yeyo. 22Ni vi yeto akee mwoongo kuuta yeto akanaa sheelyi Yesu ni Kristo? Yeto mmbwe mwilema Kristo, yeto mwikana Nde na Mwana. 23Yeto moose akana Mwana, nnyatiri Nde-fo, na yeto erikya Mwana mmbo avetiri Nde. 24Na yeni, kilya mulekiita uka elyo mbee kikee efo nnang'ani yaany. Na kwakooya ekyo mulekiita uka elyo mbee kikee efo nnang'ani yaany, na yeni mmbo mukaa-fo nnang'ani ya Mwana na nnang'ani ya Nde. 25Na ekyi nkyo kyaasa aleluvikya, nto muu wa llung'anu. 26Efi fyoose mmbo shamureiya kimaruma kya vandu yewo vakundye imureta. " 27Na yeni mmbo muleletywa Mumuyo eto akee na yeni fika ulaalu, nta nkwiifo kimaruma nndu namuloshe kindo kingyi-fo, mashika Mumuyo mmbwe akee imulosha mbony toose, ta dede nta nshi ta wongo-fo, kaeny nnang'ani yakwe. 28Ulaalu-le vana vadu, kaeny nnang'ani yakwe, naambo kyeeri ashelollywa paa, luve vakaari, lulashesukaa mbee yakwe elyi asheshaa. 29Kimmba mwiishi we ni wa usumanu, manyiny sheelyi wo nndu atana fya usumanu mmbo aleirwa mmbwe. "

1 YOHANE 31Loleny-te, shaasa Nde aleloora ikunda lying'ani, yese lukooye ivaangwa vana va Iruva; neese ni indo lukai. Lyo nta ulana llulelumanya-fo, shaasa lulera lulammanya We. 2Vakunde vakwa, ulaalu mmbo lukee vana va Iruva, na nta nkyalemanyika shaasa lushevaa-fo; lyo lwiishi, elyi ashelollywa paa, mmbo lushevaa sha we, mashika mmbo lushellollyaa shaasa akai. 3Na wo nndu avikye nsia indo mmbo akwiilyisaa, shaasa we avekee mweele. 4Nndu mwitana ulyamari mmbo ava llyang'a, mashika ulyamari ni ulyang'a. 5Na yeni mwiishi mmbo alelollywa paa naambo naute ulyamari, mashika nnang'ani yakwe nkwiifo ulyamari-fo. 6Yeto moose akaa nnang'ani yakwe nnyatanaa ulyamari-fo, yeto mwitana ulyamari nnyalellolya-fo, nta nnyalemwirikya-fo. 7Vana vadu, loleny kulave nndu amulemba, mwitana usumanu mmbo atiri usumanu, shaasa we akee wa usumanu. 8Mwitana ulyamari ni wa Satana; mashika Satana ni mwitana ulyamari uka elyo mapookyony. Nkyo kileende Mwana wa Iruva kasheorwa paa naambo nasherumata mashora a Satana. 9Wo nndu akee mwiire ni Iruva nnyatanaa ulyamari-fo, mashika yewo wakwe mmbo vakaa nnang'ani yakwe; nta nnyashidimaa itana ulyamari-fo mashika mmbo awonikye kyuuka na Iruva. 10Kimaruma kya ekyo vana va Iruva mmbo vamanyikye paa, na vana va Satana kiwo. Nndu moose nalatanaa fya usumanu nnyaukye kwa Iruva-fo, nta yeto nalakundye mwanamaye. 11Mashika ekyi nkyo kindo muleita uka mapookyony, kya yaamba lukundani luveni na veni. 12Nshi sha Kaini alekaywa ni nravi ulya, kawaa mwanawo-fo. A mmbo alemmbwaa kimaruma kyeeki? Mmashika elyi mashora akwe ekee maravi, na alya a mwanawo akava a usumanu. 13Vanavama, mulasheifulukywa kwakooya ulana lwamuswa. 14Yese mmbo lwiishi mmbo lwambuka ufuny lukaanga muuny, mashika elyi lukundye vanavama veru. Yeto nalakundaa mmbo akaa ufuny. 15Wo nndu mwiswa mwanamaye mmbo akee mwiiwaa, na yeni mmbo mwiishi ninsha sheelyi mwiiwaa nnyatiri muu wa llung'anu nnang'ani yakwe-fo. 16Yaa nng'u lwamannya ikunda, mashika we mmbo aleniingya-u muu wakwe kimaruma kyeru, neese mmbo kilukooye luniingye muu weru kimaruma kya vanavamaye veru. 17Naasany, kwakooya nndu atiri kindo kya ilya, kawuya ilollya mwanamaye ekee nting'i nishoonga nawe kara nalallyillya, a ndesa ikunda lya Iruva lyiiyo kwa nndu yeto? 18Vana vakwa vadu, lulakunde na marero-fo nta na ulumi-fo, lukunde kya dede na itana indo. 19Findony fya ngata yeyo llyo lumanyika lukee va dede, na mirima yeeru ikooye iviirywa muu yoo kwakwe. 20Kwakooya mirima yeeru ikee ilusakira; mashika lyo Iruva mmbo ang'annyi mirima yei yeeru nawe mmbo eeshi fyoose. 21Vakunde vakwa, kwakooya mirima yeeru ilakee ilusakira, mmbo lutiri ukaari efo kwa Iruva. 22Na ekyo kyoose lukiterevaa, mmbo luwaryaa kwakwe, kimmba lwalatya mavavaso akwe. 23Elyi llyo ivavaso lyakwe, luvekusirye na irina lya Mwana wakwe we Yesu Kristo, na ikundana luveni na veni, shaasa aleluvavasya. 24Na yeto mwiringa mavavaso akwe mmbo akaa nnang'ani yakwe, nawe Nndumi kakaa nnang'ani yakwe. Kimaruma kya efyo mmbo lwiishi mmbo akee nnang'ani yeeru kwi Mumuyo yeto aleluniinga.

1 YOHANE 41Nyira vakunde vakwa, mulairikye wo nndu-fo, lyo eseny wo ngata ya nndu kwakooya yauka kwa Iruva ao oode. Mashika vakisuku va wongo veengyi mmbo valenkwipoo ulaniny. 2Kikeeny indo lyo mwiishi efyo fya Mumuyo wa Iruva; wo mumuyo yeto ashambaa paa sheelyi Yesu Kristo mmbo alesha akee na mwiili nkwa Iruva wauka. 3Na wo mumuyo ulashiirikya Kristo mmbuukye kwa Iruva-fo. Na yeto nto mumuyo wa mwiilema Kristo yeto muleita mbony ta vayo sheelyi usheshaa, na ulaalu wiifo ulaniny. 4Yeni fivana fidu, mmbo muukye kwa Iruva; na yeni mukavavinga, mashika yeto akee nnang'ani yaany mmbo ailanyi yeto akee ulaniny yelu. 5Yewo ni va ulana, nkyo mmbo varera fya ulana, na ulana lukavaaranya. 6Yese mmbo luukye kwa Iruva. Yeto eeshi Iruva mmbo alwaaranya yese, na yeto nalaukye kwa Iruva nnyalwaranyaa-fo. Kimaruma kya efyo mmbo lwamanya Mumuyo wa dede, lukavemanya na mumuyo wa ureti shaasa akai. 7Vakunde vakwa, lukundani; mashika ikunda nkwa Iruva lyuukye, na yeto mwiikunda moose mmbo awonikye efo kwa Iruva kavemanya na Iruva. 8Yeto nalakundaa vengyi nnyeeshi Iruva-fo, mashika Iruva ni Ukundi. 9Kimaruma kya efyo Ikunda lya Iruva mmbo lyilelollyo kweru, kyeyaamba Iruva mmbo aleruma Mwana wakwe wa ngitany ulaniny, naambo luwoni muu kyuuka nawe, 10Na ukundi weni llo elu, nshi yese lulekunda Iruva-fo, mmbwe alelukunda yese, katana aruma Mwana wakwe naambo ashelusanda nawe elutaa ulyamariny. 11Vakunde vakwa, kwakooya Iruva alelukunda indo, mmbo kilukooye neese lukundani. 12Nkwiifo nndu alellollya Iruva nta lyimwi-fo, kwakooya lwakundana, Iruva mmbo akaa nnang'ani yeeru, na ikunda lyeru lyikasongovika nnang'ani yeeru. 13Kimmba ni indo mmbo lumanyaa mmbo lukee nnang'ani yakwe, nawe kakaa nnang'ani yeeru, kimmba alwaakanisa Mumuyo wakwe. 14Neese mmbo lwallollya na ikureekya sheelyi we Nde mmbo aleruma Mwana wakwe nave Mwikira wa ulana. 15Wo nndu airikya sheelyi Yesu ni Mwana wa Iruva, Iruva mmbo akee nnang'ani ya nndu yeto, nawe kakaa nnang'ani ya Iruva. 16Neese mmbo lwammanya ikunda lya Iruva kweru yese na ilyirikya. Iruva ni Ukundi; na yeto akaa na ukundi mmbo akaa nnang'ani ya Iruva na Iruva kakaa nnang'ani yakwe. 17Kimmba ni indo ukundi mmbo lwansongova kweru, naambo luwoni ukaari nkonu yeto wa mwaandu. Mashika, shaasa we akai, ni indo neese luwekai yaa ulaniny elu. 18Nnang'ani ya ukundi nkwiifo weerei-fo, mashika ukundi lusongovye mmbo lweeraa weerei poo. Mashika weerei mmbo luriani na usakiro, na yeto akee mwerei nnyalesongovika kya ukundi-fo. 19Yese mmbo lukundaa vengyi mashika elyi we alelava ilukunda yese. 20Kwakooya nndu aamba, shikundye Iruva, lyo kakaa esuuye mwanamaye, mmbo akee mwoongo; mashika nndu nalakundaa mwanamaye allollye, nnyashiidimaa ikunda Iruva nalallollye-fo. 21Ivavaso lukee vaniinge mmbwe llyo elyi, lya yaamba sheelyi yeto akundye Iruva, navekunda na mwanamaye.

1 YOHANE 51Wo nndu airikye sheelyi Yesu ni Kristo mmbo awonikye kyuuka na Iruva. Na wo nndu akundye Nde, mmbo akundaa na yeto aleirwa mmbwe. 2Kimmba ni indo mmbo lukundye vana va Iruva, elyi lukundye Iruva, na ilatya mavavaso akwe. 3Mashika elyi llyo ikunda Iruva, ni ilatya mavavaso akwe, na mavavaso akwe nta nshi maroo-fo. 4Mashika wo kindo kyikee kyiire ni Iruva mmbo kivingaa ulana yelu, na elu llo uvingi lwa ivinga ulana, ni kikusiryo ekyo kyeru. 5A mwiivinga ulana mmbwe ungau, kulaore ni yeto akusirye sheelyi Yesu ni Mwana wa Iruva? 6Yeu mmbwe alesha na mura na samu, Yesu Kristo, nshi alesha na mura da-fo, mmbo alesha na mura na samu da. 7Na Mumuyo mmbwe avikau ukureekyi, mashika Mumuyo yeto ni dede, 8Shamashika vaiyo vararu vakee ikureeka-u [iruveeu, ni Nde, na Irero na Mumuyo Mweele, na yeva vararu mmbo vakee vamwi. 9Kukavekaa-fo vararu-se vakakureeka yaa ulaniny], ni Mumuyo, na mura na samu; na eva vararu mmbo vairikyani kya mbony imwi. Kwakooya lwawarya ukureekyi lwa vandu, ukureekyi lwa Iruva ni uniini mmwasi; mashika ukureekyi lwa Iruva llo elu, llya alekureekya Mwana wakwe. 10Yeto akusirye na Mwana wa Iruva mmbo atiri ukureekyi elo nnang'ani yakwe. Yeto nalairikye Iruva mmbo amwaallwa mwoongo, mashika elyi ara nalairikya ukureekyi elo Iruva alekureekya Mwana wakwe. " 11Na ukureekyi weni le, llo elu, ni Iruva aluniinga muu wa llung'ani, na muu yeu mmbo ukee efo nnang'ani ya Mwana yeto wakwe. 12Yeto atiri Mwana wa Iruva mmbo atiri muu, yeto nalatiri Mwana wa Iruva nnyatiri muu-fo. 13Mmbo shamureiya findo efi naambo mumanyi na yeni mmbo mutiri muu wa llung'anu, yeni mukusirye na Irina lya Mwana wa Iruva. 14Na elu llo ukaari lutiri efo kwakwe, kya yaamba, kwakooya lwatereva kindo kiinani na shaasa akundye we, mmbo ashelwaaranyaa. " 15Na lukammanya alwaaranyaa, ekyo kyoose lwatereva mmbo lwiishi sheelyi lutiri findo filutinnyi lukantereva. 16Kwakooya nndu alollya mwanamaye etanaa ulyamari lulakee yeende ufu, natereve, na Iruva asheningaa muu yewo vatana ulyamari lulakee yeende ufu. Kwiifo ulyamari lusheende ufu. Nshaleamba natereve kimaruma kya elo-fo. 17Wo kindo kilakee kya usumanu ni ulyamari, na ulyamari lwiifo lulashendee ufu. 18Lwiishi sheelyi wo nndu yeto akee mwiire ni Iruva nnyatanaa ulyamari-fo; mashika awonikye kyuuka na Iruva mmbo akwiisaa, nta yeto nravi nnyampaanaa-fo. 19Mmbo lwiishi sheelyi yese mmbo lukee va Iruva, na ulana loose lo lukakaa kwa nravi yeto. 20Lukavemanya sheelyi Mwana wa Iruva alemmaa isha, kaveluniinga na wiidimi lwemanya yeto akee wa dede, neeseny mmbo lukee nnang'ani ya yeto akee wa dede, mmbwe Mwana yeto wakwe we Yesu Kristo. Yeu mmbwe Iruva wa dede, na muu wa llung'anu. 21Vana vakwa vadu, kwiiseny na maruva a wongo.

http://www.bible.is/JMCBST/1John/1

Nenhum comentário:

Postar um comentário