sábado, 9 de janeiro de 2016

1 Yoowaana: Sabaot


1 Yoowaana 11Ng'ālyoontooni kyoomwook :acheek ku nyēē kimii ku /mānāākēētoow kōōrēēt. Kikeekasaanu Ng'ālyoontooni ām yiitiikyoo, ankeekasee mbo koonyekyoo, ānkiirōōtootē, ānku kiikēētiinyēē āwunnyēkyoo. Ng'ālyoontooni ku ng'ālyoontēētaab soboonto. 2Kichō :Soboonto. Kiboonto keey :Soboonoo āk Baaba Yēyiin. Kōōkōōyookwēēch :Baaba Soboonooto. Kikeekas Soboonooto ānkēēng'āloolēē. Sobooniitēnyi bo kibchuulyo nyēē kyoomwook. 3Kyoomwook nkakweek kiyēē kookeekas sukung'eet ōyēku nkakweek akeenke āk acheek kuu yoo kēēyēku :acheek akeenke āk Baaba ākoo Lekwenyii, Yēēsu Kiriistō. 4Kēēsirwook sukung'eet yoo koorub ng'aleechu, kuyitita :ng'erekweekyoo. 5Lōkōōywēk chēē kookeekas kukwaanee wōlēē mii :Yēēsu chu kēēmiitē kēēmwoowook ku kule lēbkēēyyēēt :Yēyiin. Māmii :mēēnān wōlēē mii :Yēyiin. 6Yoo kēēyēyē keey kule kēēyēku kiito akeenke āk Yēyiin ānku tākēēbēēsyētootēē mēēnān, ku kēēmiitē kiibērbēēriisyē āmēēbērē kēērubē ng'aleekaab manta. 7Nteenee, yoo kēēbēēsyētootēē lēbkēēyyēēt, kuu yoo mii :Yēyiin lēbkēēyyēēt, kēēyēku kiito akeenke, ānkōōwuuntoowēēch :korotiikaab Yēēsu ng'ōōki ake tukul. 8Yoo yibē keey :chii kule māyēyē ng'ōōki ake tukul, kumiitē :nyoo kōōbērbēērē keey, anku manaanam ng'ālyoontēētaab manta. 9Nto yoo kāchāmchiin :chii kule kiikuyey ng'ōōki, kunyōōchinē :Yēyiin kaat ānkōōtiliilē ām tukuuk tukul choo māchurtootiin, kuuyu churtaat :Yēyiin /ānkiikoosēē keey. 10Nto yoo yibē keey :chii kule manaayey ng'ōōki ake tukul, kumiitē kumwooyē kule ng'wiin :Yēyiin, amanaanam ng'ālyoontēēnyii.

1 Yoowaana 21Biikyuu choo āchāmē, āsirwook ng'aleechu simōōchoolwookēnē. Nto yoo kāchoolwookēn :chii ake tukul, kung'ālooltoowēēch :chiito ake nyēē ming'tooy keey Baaba. Nyooto ku Yēēsu Kiriistō nyoo churtaat. 2Kiikooyto :Yēēsu soboonnyii sukoomuuch :Yēyiin kunyōōwēēch kaat ām choolwookātēēnyoo. Mēēbērē choolwookātēēnyoo acheek baateey, nteenee choolwookātēētaab chii ake tukul. 3Yoo sikiinkēt man kule kēēbooyē Yēyiin, ku yoo kēērubē kiyēē mwooyē. 4Chii nyoo mwooyē kule, "Ābooyē :anii Yēyiin," āmēēbērē yēyē kiyēē mākyinē :Yēyiin ku ng'wiin :chiichoo, āmāboonto manta. 5Nteenee, chii nyoo karub ng'ālyoontēētaab Yēyiin ku kaakucham :chiichoo Yēyiin kuchurta. Kēēliitēnyi nyēē iboorwēēch kule kēēyēku akeenke āk Yēyiin. 6Chii ake tukul nyoo mwooyē kule kiikunoomcho āk Yēyiin ku māchāktōōs kōōbuurē kuu wōloo kiibuurtooy :Yēēsu. 7Chōōrōōnuutēkyuu choo āchāmē, mākuutyēēt nyēē āmiitē āsirwook ku mēēbērē nyēē lēēl, nteenee bo :mākuutyooni kēny nyoo kyookasaanu. 8Nteenee, mii :kiy nyēē lēēl ām mākuutyooni nyēē āmiitē wāāsirwook. Imuuchē kēēriib mākuutyooni kuu wōloo kiyēytooy :Yēēsu, kuuyu mii kubotē :mēēnānēēt ānkumii kutooku :lēbkēēyyēēt nyēbo man. 9Chii ake tukul nyoo yibē keey kule minyēē lēbkēēyyēēt, ānkuwēchē ng'eetaab kaamet, tākuminyēē :nyoo mēēnān. 10Nto nyoo chāmē ng'eetaab kaamet, kuminyēē :nyoo lēbkēēyyēēt, āmāyēyē biiko kootabaanee keey Yēyiin. 11Nteenee, nyoo wēchē ng'eetaab kaamet, kumii :nyoo wōlēē mii :mēēnān, ānkuwēēsyētootē kibtuuy ma. -Mēēnkētē wōlēē wēētii, kuuyu kaker :mēēnānēēt koonyekyii. 12Āsirwook akweek, lēēkōōk, kuuyu kōōkunyōōwook :Yēyiin kaat ām ng'ōōkiswookikwook kubununēē kaayneetaab Yēēsu. 13Āsirwook akweek, booyik, kuuyu ōnkētē Yēēsu nyoo kimii ku /mānāākēētoow kōōrēēt. Āsirwook akweek, āybēēriik, kuuyu, kyōōsyēēntē Kibrōkōsyoontēēt. Kāāsirwook akweek, lēēkōōk, kuuyu ōnkētē Baaba. 14Kāāsirwook akweek, booyik, kuuyu ōnkētē Yēēsu nyoo kimii ku /mānāākēētoow kōōrēēt. Kāāsirwook akweek, āybēēriik, kuuyu ōkichootiin, ankyoonam ng'ālyoontēētaab Yēyiin kuchō āwut, ānkyōōsyēēntē Kibrōkōsyoontēēt. 15Biikyuu, -moocham tukuuk chēbo kōōrooni. Chii ake tukul nyoo yēētyinē keey tukuuchu, māchāmē :nyoo Baaba, 16kuuyu mākwoonēē :tukuuchoo wōlēē mii :Baaba, nteenee kwoonēē :choo kōōrooni. Tukuuchoo ku chu: muchastaab bōōrto, kiyēē chōrōkyinē :koonyekuuk, ākoo kaseetaab keey ām tukuuk chēē boonto :chii. 17Bēku :kōōrooni āk chōrōkyinooyēēt, nteenee, chii nyoo yēyē kuu wōloo māktooy :Yēyiin, kuboonto :nyoo soboontaab kibchuulyo ākookoy. 18Biikyuu, asiista :nyi nyēbo lētuut. Ābērē kyookas kule mākuchō :Kwiiliintēētaab Kiriistō nyēē wōō. Mbo raat kuu nyiitēnyi, mii :biiko wōlēē wōō kukwiilē Kiriistō. Ng'ālyoontooniitēnyi nyēē kiinkētēē kule asiista :nyiitēnyi nyēbo lētuut. 19Kiibetyeenyee keey :bichoo wōlēē kēēmiitē ānkubēēchi keey, nteenee, mēēbērē ākoo ki chēēchoo man :bichoo. Kuuyu, nto ki chēēchoo, nto mēēbērē kibākooktēēch ānkubēēchi keey. Nteenee, kiiboorwēēch :wōlēē kibeeta kule mēēbērē kimii mbo :akeenke ām bichooto nyēē ki nyēēnyoo. 20Nto akweek, ku kiikung'aabeenaak :Yēēsu Tāmirmiryēēt, ānkōōboontē :akweek tukul kiirnātēēt. 21Mēēbērē āmiitē āsirwook kuuyu -mōōnkētē manta, nteenee, āsirwook kuuyu ōnkētē, nto subak kuuyu māmii :ng'ālyoo nyēbo ng'wiiynan nyēē chōōnēē manta. 22Ng'wiintēēt ku ng'oo? Ng'wiintēēt ku nyoo mwooyē kule mā Kāārārookiintēēt :Yēēsu nyoo kiiyooku :Yēyiin. Kwiiliintēētaab Kiriistō :nyoo nyēē tāyē Baaba āk Lekwenyii. 23Chiito nyēē tāyē Leekweet ku kaakutay nkinee Kwaan. Nyoo chāmtooy Leekweet ku kaakuchamta nkinee Kwaan. 24Māchāktōōs okas kule koonamte mēt kiyēē kyookasaanu kuchakee kēny. Yoo koonamte mēt kuu nyooto, +mōōtēbunēē komostaab Leekweet āk Baaba. 25Soboontaab kibchuulyo :nyiitēnyi nyoo /kikēēkuurtoowēēch. 26Āmiitē āsirwook ng'aleechu kurubta keey komostaab biiko choo mii kusyēēmē kule kukentaak. 27Nto kurubta keey komosng'woong' akweek, kutēbunēē :Tāmirmiryoonoo king'oobēēnook :Yēēsu, sukung'eet -matookaasee keey biiko baateey kule kooneetaak. Inēētook :Tāmirmiryoonoo kurubta keey āk kiy ake tukul nyēē yēmāktōōs. Bo manta :nyoo, āmēēbērē bo ng'wiiynan. Kunyoo, orub kāānēētēywēēkaab Tāmirmiryēēt ānkōōbuurtē Yēēsu. 28Kunyoo, ii, biikyuu, ōkiilchi Yēēsu, sukung'eet kēētinyē man nyēē mēēbērē kēēmuuytōōsii ām taayeenyii ām bēsyēēt nyoo chōōnēē. 29Kuuyu ōnkētē kule churtaat :Yēēsu, ōnkēt naas kule chii ake tukul nyoo yēyē kiyēē churtaat ku bo :nyoo Yēyiin.

1 Yoowaana 31Chāmēēch, sōō, :Yēyiin nyēē tyaa! Chāmēēch miisin kut /kēēkuurēēch kule lōkōkaab Yēyiin, ānkubooyiit man, kēēyēku cheechii. Kiito nyēē yēyē biiko alak simachameech ku kule māchāmē :icheek Yēēsu. 2Chōōrōōnuutēkyuu choo āchāmē, kāākēēyēku lōkōkaab Yēyiin. Tākutoombo mbo kut kutook kule +mākēēyēku nee ām lētuunoo. Nteenee, kiinkētē kule yoo kēēyēēw :Yēēsu, +makeekerkeyiitu āk inee, kuuyu +makeekas inee kuu wōlēē wuu. 3Chii ake tukul nyoo boontēē ng'ālyoontooni mooyēēt, kōōbuurē ām soboonto nyēē tiliil kuu wōloo wuunto :Yēēsu. 4Chii ake tukul nyoo yēyē ng'ōōki, ku kāākwiiri :nyoo kiruutēkaab Yēyiin. Kubooyiit man, ng'ōōki ku yoo kā-iri :chiito kiruutēkaab Yēyiin. 5Nteenee, ōnkētē kule kichō :Yēēsu sichākōōbuuktoowēēch ng'ōōkiswookikyoo, ānkōōnkētē mbo kule mātinyē :Yēēsu ng'ōōki ake tukul. 6Chii ake tukul nyoo kiilchinē Yēēsu, māyēyē ng'ōōki. Chii ake tukul nyoo yēyē ng'ōōki, mākāsē āmēēnkētē :chiichoo wōlēē wuu :Yēēsu. 7Biikyuu, -mookany /kiiberbeeraak. Chii nyoo yēyē kiyēē māchē :Yēyiin, ku churtaat :chiichoo kuu yoo churtaat :Yēēsu. 8Nto chii nyoo yēyē ng'ōōki, ku bo :nyoo Kibrōkōsyoontēēt, kuuyu kiikuyeyaan :Kibrōkōsyoontoonoo ng'ōōki kuchakee kēny. Kiito nyēē kichōōnchinē :Lekwetaab Yēyiin ku chakooburyeet yiisyēētaab Kibrōkōsyoontēēt. 9Māmii :chii nyēbo Yēyiin nyēē tāsē taay kuyēyē ng'ōōki, yēē ibuurtooy Tāmirmiryēētaab Yēyiin. -Mēēmuuchē kuyēyē ng'ōōki :chii nyēē bo Yēyiin. 10Mii :ng'ālyoo yu nyēē /kiinkētēē kule lōkōkaab Yēyiin :chu, nto chuut kubo Kibrōkōsyoontēēt. Ng'ālyoontoonooto ku nyi: Chii ake tukul nyoo māyēyē kiyēē churtaat, ku mā bo :nyoo Yēyiin. Wuu mbo nyooto ām chii nyoo māchāmē ng'eetaab kaamet. 11Lōkōōywēk :chu chēē kyookasaanu kuchakee kēny: Māchē kēēchoomtōōsii. 12Māmāchāktōōs keekerkeyiitu ākoo Kaayin nyoo kibo Kibrōkōsyoontēēt nyoo kibārē ng'eetaab kaamet. Kibārchi nee ng'eetaab kaamet? Kibar, kuuyu kimiyootēch inee :ātēbuutēk cheechii, nteenee kichurtootiin chēbo nyiin. 13Kunyi, ii, mbo ng'eetaabiya, -mōōlātē yoo kāwēchook :biiko ām kōōrooni. 14Kiinkētē kule kookeekwaanee wōlēē mii :meet ankookeeyitu wōlēē mii :soboonto. Kiito nyēē kiinkētēē ku kule kēēchāmē mbo ng'eetaabiya. Chii ake tukul nyoo wēchē ng'eetaab kaam, tākumii :nyoo wōloo mii :meet. 15Chii ake tukul nyoo wēchē ng'eetaab kaamet, ku miyaat :nyoo kuu rumiin. Ābērē ōnkētē kubooyiit man kule mātinyē :rumiin soboontaab kibchuulyo. 16Kiyēē kōōnēēch kiinkēt wōlēē wuu :chamateet ku nyi: Kiikooyto :Yēēsu soboonnyii kubo acheek. Kunyoo, mākwēēch nkacheek kiikooytooy soboonwēkyoo kubo mbo ng'eetaabiya. 17Yoo boonto :chii tukuukyii ānkukāsē kunyālilē :ng'eetaab kaamet āmāriirēē nyiin, ii, kōōmuuchē kule nee kuboonto :chiichoo chamateetaab Yēyiin? 18Biikyuu, -mookany kiiyiilē kuutuweek buch kule kēēchoomtōōsii, nteenee māchāktōōs kiiboorunēē chamataanaa yēyuutēkaab manta. 19- 20Yoo kēēyēyē kuu nyooto, kiinkētēē yooto kule kēēbooyē manta. Yoo kāmwooy :kāāsōōtēywēēkyoo kule -mākēēboontē man, okany kēēyisu kāāsōōtēywēēchoo ām taayeetaab Yēyiin kēēmwooyē kule wōō :Yēyiin kusiir kāāsōōtēywēēkyoo ānkōōnkētē :inee kiy ake tukul nyēē kēēyēyē. 21Chōōrōōnuutēkyuu, yoo kāmwooy :kāāsōōtēywēēkyoo kule kēēboontē man, +mākiiyyoong'iisyē taayeetaab Yēyiin nyēē māmii :muyātēēt, 22ānkēēnyōōru kiy ake tukul nyoo kēēsoomē, kuuyu kēēchāmtooy mākuutēkyii ānkēēyēyē kiyēē ing'ērēēchē inee. 23Mākuutyēētaab Yēyiin ku nyi: Māchāktōōs kēēchāmtooy kule Lekwetaab Yēyiin :Yēēsu ānku Kāārārookiintēēt, ānkumāchāktōōs kēēchoomtōōsii kuu yoo /kēēmwooytoowēēch. 24Biiko choo chāmtooy mākuutēkaab Yēyiin chēē kiikunoomcho āk Yēyiin. Ng'ālyoontēēt nyēē kiinkētēē kule kēēyēku akeenke āk Yēyiin ku Tāmirmiryēēt nyoo kiikurōōbwēēch.

1 Yoowaana 41Chōōrōōnuutēkyuu, -mōōchāmtooy ng'aleekaab chii ake tukul nyoo kāmwoowook kule boonto Tāmirmiryēētaab Yēyiin. Nteenee, māchāktōōs ōrōōtootē bichoo sookas kule boonto :icheek man Tāmirmiryēētaab Yēyiin, kuuyu kookwaanaat :biiko chēē chaang' chēē yibē keey kule ng'ālooltooyikaab Yēyiin, ankookubeetaat kōōrōōtunwo. 2Okany āboorwook wōlēē sōōnkētitooy biiko chēē boonto Tāmirmiryēētaab Yēyiin. Chii ake tukul nyoo chāmtooy kule kichō :Yēēsu Kiriistō kōōrēēt kuu chii, kuboonto :chiichoo Tāmirmiryēētaab Yēyiin. 3Nto chii ake tukul nyoo māchāmtooy ng'aleechaa kurubta keey āk Yēēsu, mā bo :chiichoo Yēyiin. Bo :chiito nyēē wuu nyiitēnyi nyoo kwiilē Kiriistō. Ābērē kyookas kule mākuchō :Kwiiliintēētaab Kiriistō, nteenee kōōkuchō mbo raat. 4Biikyuu, ōbooyē :akweek Yēyiin. Kyoobiirte choo kwiilē Kāārārookiintēēt, kuuyu Tāmirmiryēētaab Yēyiin nyoo ōboontē :akweek ku wōō kusiir kāāyyoong'iintēētaab tāmirmirook choo miyootēch choo iwārē biiko ām kōōrooni. 5Bo :kwiilōōtichoo kōōrooni. Kunyoo, ng'āloolootē ng'al chēē rubtooy keey āk soboontaab kōōrooni, ānkukāsyinē :biikaab kōōrooni. 6Nto acheek, kēēbooyē Yēyiin, nto nyoo chāmē Yēyiin ku kāswēēch. Nteenee, nyoo mā bo Yēyiin, ku mākāswēēch. Kēēlooto nyēē kiinkētēē tāmirmiryēēt nyēbo manta ākoo nyēbo ng'wiiynaneet. 7Chōōrōōnuutēkyuu, ōkānyē kēēchoomtōōsii, kuuyu toowunēē :chamateet wōlēē mii :Yēyiin. Chii ake tukul nyoo chāmē ake, ku bo :nyoo Yēyiin ānkōōnkētē Yēyiin. 8Nto chii nyoo māchāmē ake, ku -mēēnkētē :nyoo wōlēē wuu :Yēyiin, kuuyu Yēyiin ku chamateet. 9Kiiboorwēēch :Yēyiin chamateenyii ām kēēli: Kiimuuch kukōōn Lekwenyii akeenke baateey kuchō kōōrēēt sukung'eet kēēsobchē ām Lakwanaa. 10Nto chamataanaa ku mēēbērē acheek chēē kikeecham Yēyiin, nteenee kule kichameech :Yēyiin kut kukōōn Lekwenyii kuu kōrōsyoontēēt, nto anyuun /kiimuuch /kēēnyōōwēēch kaat ām choolwookātēēnyoo. 11Chōōrōōnuutēkyuu, kuuyu chāmēēch :Yēyiin miisin kuu nyooto, ku mākwēēch kēēchoomtōōsii :nkacheek. 12Ānkoo māmii :chii nyēē kiikukas Yēyiin, nteenee yoo kēēchoomtōōsii kēēboontē keey Yēyiin anku makuchurta :chamateenyii ām wōlēē kēēmiitē. 13Nyēē kiinkētēē kule kēēyēku akeenke āk Yēyiin ku Tāmirmiryēēnyii nyoo kiikukōōnēēch. 14Kookeekasee koonyekyoo ānkiinkētē kubooyiit man kule kōōkukōōn :Baaba Lekwenyii chakooraraach kōōrēēt. 15Yoo kachamta :chii kule Lekwetaab Yēyiin :Yēēsu, ku akeenke :chiichoo āk Yēyiin. 16Kiinkētē :acheek chamateet nyēē boontēēnēēch :Yēyiin ānkiikoosēē keey chamataanaa. Chamateet :Yēyiin. Chii ake tukul nyoo kiilchinē chamateet, kiikunoomcho :nyoo āk Yēyiin. 17Yoo kēēboontē chamateet ānkiibuurē kuu wōloo kiibuurtooy :Yēēsu ām kōōrēēt, ku kēēmiitē kiibooru chamateet nyēē churtaat. Yooto, +mākēēkāng'u ām bēsyoonoo /kiitiilchinē biiko ng'aleek. 18Māmii :muyātēēt yēē mii :chamateet. Nteenee, kwētē :chamateet nyēē churtaat muyātēēt, kuuyu yoo kāmuyēē :chii /kiing'woonchi, kōōbooru :yooto kule manaachamta chamateetaab Yēyiin kuchurta. 19Kēēboontē chamateet, kuuyu kisimkuchameech acheek :Yēyiin. 20Yoo kāmwooy :chii kule chāmē Yēyiin, āmāchāmē ng'eetaab kaamet, ku ng'wiin :chiichoo. Chii nyoo māchāmē ng'eetaab kaamet nyoo kāsē, makucham kule nee Yēyiin nyoo manaakas? 21Mākuutyēēt nyēē kikēēnyōōrunēē Yēyiin ku nyi: Māchāktōōs :chii nyoo chāmē Yēyiin kuchāmē nkinee ng'eetaab kaamet.

1 Yoowaana 51Chii ake tukul nyoo chāmtooy kule Kāārārookiintēēt :Yēēsu, ku bo :chiichoo Yēyiin. Nto nyoo chāmē kwaaniitaab leekweet, kuchāmē mbo nkinee leekweet. 2Kiinkētē kule kēēchāmē lōkōkaab Yēyiin yoo kēēchāmē Yēyiin ānkēērubē mākuutēkyii. 3Kiyēē ibooru kule kēēchāmē Yēyiin ku kēēriib mākuutēkyii, āmānyikisyēēch :mākuutēkyii. 4Wuu nyooto, kuuyu chii ake tukul nyoo bo Yēyiin ku biirtooy miyootyēēt nyēē mii kōōrooni. Yoo kakiikaasee keey Yēyiin, +mākiibēl kōōrēēt. 5Ng'oo nyēē isyēēntooy kōōrēēt, ēē? Nyēē isyēēntooy kōōrēēt ku chiito nyoo chāmtooy kule Lekwetaab Yēyiin :Yēēsu. 6Yu kichōōnii :Yēēsu Kiriistō kōōrēēt, kibununēē bēēko āk korotiik. Mēēbērē kibununēē bēēko baateey, nteenee kibununēē bēēko ākoo korotiik. Mwooyē :Tāmirmiryēēt ng'aleechu, anku manta :Tāmirmiryēēt. 7Kubooyiit man, miitē :tukuuk sōmōku chēē iboorwēēch wōlēē wuu :Yēēsu. 8Tukuuchooto sōmōk ku: Tāmirmiryēētaab Yēyiin, bēēchoo āk korotiichoo. Ibooru :tukuuchoo sōmōku kiito akeenke. 9Yoo kēēchāmē kiyēē mwoowēēch :biiko, ii, ku +makeecham, sōō, nyēē tyaa kiyēē mwooyē :Yēyiin kurubta keey ākoo Lekwenyii. 10Chii ake tukul nyoo chāmtooy Lekwetaab Yēyiin kōōnkētē man kule wuu nyooto. Nto chii nyoo māchāmtooy ng'aleechu, kumwooyē :chiichoo kule ng'wiin :Yēyiin, kuuyu mēēbērē kachamta kiyēē mwooyē :Yēyiin kurubta keey ākoo Lekwenyii. 11Kunyoo, ng'ālyoontēēt :nyi nyēē kiikiiyēnchi kule man: Kiikukōōnēēch :Yēyiin soboontaab kibchuulyo. Kēēnyōōru soboonooto kubununēē Lekwenyii. 12Chii nyoo boonto Lekwetaab Yēyiin ku tinyē soboontaab kibchuulyo. Nto nyoo māboonto ku mātinyē :nyoo soboonooto. 13Āsirwook ng'aleechu akweek choo ōkoosēē keey Lekwetaab Yēyiin, sōōnkēt kule ōboontē soboontaab kibchuulyo. 14Kēēboontēē mooyēēt kule yoo kēētēēbē kiyēē mākwēēch :Yēyiin, mākukāswēēch. 15Yēē ākoo kiinkētē kule kāswēēch ām kiy ake tukul nyoo kakeesaay, kiinkētē ām yooto kule kēēnyōōru kiyēē kēētēēbēē. 16Yoo ikāsē kuyēyē :ng'eetaab koomēt ng'ōōkisto nyēē mēēbērē makuyey kōōboot soboontaab kibchuulyo, isaay Yēyiin kunyōōchi nyiin kaat. Ām yooto, makuyey :Yēyiin kōōyēēchi chiichoo :soboonnyii. Mii :ng'ōōkisto nyēē yēyē chiito kōōboot soboontaab kibchuulyo. Mēēbērē kāāmwoowu kule isaay ām ng'ōōkisto nyēē wuu nyoo. 17Miyaat :ng'ōōki ake tukul. Nteenee, mii :alake chēē māyēyē chii kōōboot soboontaab kibchuulyo. 18Kiinkētē kule mēēbērē tāsē taay :chii nyēbo Yēyiin kuyēyē ng'ōōki. Riibē :Lekwetaab Yēyiin chiichoo nyēē mēēbērē makunam :Kibrōkōsyoontēēt. 19Kiinkētē kule kēēbooyē :acheek Yēyiin. Nto Kibrōkōsyoontēēt, kiikunam :nyoo kōōrēēt kuchō āwut. 20Kiinkētē mbo subak kule kiikuchō :Lekwetaab Yēyiin ankiikuyeyeech kiinkēt Yēyiintēēt nyoo bo manta. Kēēbooyē inee nyoo bo manta ānkēēbooyē Lekwenyii, Yēēsu Kiriistō. Yēēsu ku Yēyiin nyēbo manta anku inee nyēē kōōnu soboontaab kibchuulyo. 21Biikyuu, kāāmwoowook, osaanee keey kiy ake tukul nyēē imuuchē kootaayeenaak wōlēē mii :Yēyiin.

http://www.bible.is/SPYWBT/1John/1/D

Nenhum comentário:

Postar um comentário