segunda-feira, 1 de fevereiro de 2016

1 Gyↄn: Ntrubo


1 Gyↄn 11Walaŋ ŋon ↄ be kyaa leenaŋ kewalaŋ keŋ nɛ wose man nombia yaa mɛɛ ŋmarase mɛɛ fa ŋon. Ŋon yɛna walaŋ ŋon dↄↄ nyii ↄ nↄↄwoya te dↄↄ naa e. Daa gbagba naa e na de sia fonɛɛ te da moo de nyiŋmaase tina e. Ŋon yɛna Yesu Kristo, nombii keŋ kɛɛ fa nyeedoŋ kekpaa nɛ. 2Wurubuarɛ lesena mena walaŋ kei wola daa te de naa e. Ŋon ne faa na nyeedoŋ keŋ ba lee Wurubuarɛ gbagba gyaŋ nɛ. Debaŋ kei man nɛ ↄ wose man nombii yaa dee di adansɛɛ yako ŋon nyiaa, ŋon yɛna walaŋ ŋon ↄ ne fa nyeedoŋ kekpaa keŋ. Nafↄ na ↄ kyae kya ŋon gyaŋ, mↄna nɛnɛɛ dↄↄ ↄ ta lese e wola daa. 3Walaŋ ŋon daa gbagba be naa e na de sia, te dↄↄ nyii ↄ nↄↄwoya nɛ wose man nombia yaa dɛɛ yako ŋon nɛ. Dɛɛ yako ŋon baa na ɛmɛɛ mↄ kenyiŋ kaa kpu na daa baŋ daa na de kya Wurubuarɛ na ↄ bu Yesu Kristo ŋon nↄↄ yɛɛ dokoloŋ nɛ, na de popou nↄↄ ke yɛɛ dokoloŋ. 4Dɛɛ gyae nyi mena gyoŋ kei ke doo de man nideli, mena dↄↄ te dɛɛ ŋmarase ŋon mena nombia kɛŋa nɛ. 5Nↄↄwoya ŋan Wurubuarɛ bu ŋon ba mo fa daa te daa mↄ ne yako ŋon nɛ yɛna nyiaa, Wurubuarɛ yɛɛ ŋgba keŋmaŋee nɛ te ditiŋtɛɛ be doo ↄ man korakora ya. 6Lee mena dↄↄ nyi akpaa de yako nyi nↄↄdokoloŋ doo daa na e man te de sɛɛ dɛɛ yɛɛ ditiŋtɛɛ man abↄↄ na, dee dii akɛrɛɛ bo te anokoare keŋ Wurubuarɛ ba lese wola nɛ be doo de man ya. 7Mↄna nyi akpaa de kyaa Wurubuarɛ keŋmaŋee keŋ man ŋgba mena keŋ ŋon gbagba kyaa ke man nɛ, na nↄↄdokoloŋ doo daa na de tebia man. Kenaŋ na ↄ bu Yesu Kristo fatabo keŋ ne gberaa da ayimɛɛ kamasɛ lee da wose man. 8Akpaa de yako nyi dukum be doo de man ya na dɛɛ beo da wose bo, te anokoare keŋ Wurubuarɛ ba lese wola nɛ be doo de man ya. 9Nyi akpaa de lɛɛ di de konↄↄse man nyi da te yɛɛ dukum te de tↄlɛɛ ŋa fa Wurubuarɛ na, waa mo ŋa pou kyɛɛ daa na waa gberaa daa lee ayimɛɛ kamasɛ man. Nawolo nyi ↄ ne di ↄ nombia dↄↄ te ↄ gbɛɛneŋ mↄ tenɛɛ. 10Akpaa de yako nyi da te yɛɛ ta dukum korakora ya na, de ta besena Wurubuarɛ yɛɛ dekarate. Kei nawolo baa nyi de bɛɛ lɛɛ ↄ nombia ŋan ↄ be yako daa nɛ di ya.

1 Gyↄn 21Me bia, mɛɛ ŋmarase nombia kɛŋa mɛɛ fa ŋon na ɛ be nyiŋ yɛɛ dukum ya. Te akpaa ŋolo de yɛɛ dukum na, de dana tereete ŋon ↄ seŋɛɛ Wurubuarɛ siaman ↄ ne doo teree fa daa. Ŋon yɛna Yesu Kristo ŋon ↄ gbɛɛneŋ tenɛɛ Wurubuarɛ siaman nɛ. 2Ŋon gbagba moona ↄ wose deesi tↄ de nombiakumɛɛ kom, lee mena dↄↄ te Wurubuarɛ moo de nombiakumɛɛ kyɛɛ daa. Na daa daageŋ nombiakumɛɛ te ↄ moowↄ kyɛɛ daa ya, mↄna tɛɛle kei dↄↄ balaŋ pou nombiakumɛɛ mↄ kpuɛ. 3Akpaa nyi de nyii Wurubuarɛ dei na, kenaŋ na dɛɛ tale gyↄ de konↄↄ nyi da gyeŋ e. 4Lee mena dↄↄ nyaŋ walaŋ ŋon n yako nyi "N gyeŋ e" mↄna n bee nyii ↄ dei ya na, n yɛɛ dekarate e te anokoare keŋ Wurubuarɛ ba lese wola nɛ be doo n man ya. 5Te nyaŋ ŋon n ne nyii Wurubuarɛ dei na, Wurubuarɛ kegyae gbagba keŋ doo n man nideli. Kpene keŋ gyae ke yela dɛɛ gyeŋ nyi daa na e dana nↄↄdokoloŋ yɛna nyi, 6nyaŋ ŋon n yako nyi ɛmɛɛ na Wurubuarɛ dana nↄↄdokoloŋ na, kaboena nyi nya kyaa ŋgba mena keŋ Yesu be kyaa nɛ. 7Me gyoona kpaakpaa, na mmaraa wↄle yaa mɛɛ ŋmarase maa fa ŋon ya, mↄna mmaraa bene keŋ ɛ be nyii lee debaŋ keŋ ɛ be lɛɛ Yesu di nɛ. Mmaraa kei yɛna nombia ŋan ɛ betaŋ nyii nɛ. 8Mↄna kei ta bese mmaraa wↄle keŋ mɛɛ ŋmarase mɛɛ fa ŋon. Yesu Kristo kekyaa man na, ↄ dinↄↄ wolawↄ nyi ke yɛɛ mmaraa wↄle ke. Ɛmɛɛ gbagba mↄ ɛ dinↄↄ na wolo nyi ke yɛɛ mmaraa wↄle ke. Nawolo nyi keŋmaŋee keŋ taŋ bɛɛ lee, te ka te yeli ditiŋtɛɛ keŋ mↄ ne ŋaalaa. 9Nyaŋ ŋon n kpa n doo keŋmaŋee keŋ man te n sɛɛ n ne kↄla n dↄↄ na, n sɛɛ n doo ditiŋtɛɛ keŋ man baa. 10Mↄna nyaŋ ŋon n ne gyae n dↄↄ na n doo keŋmaŋee keŋ man, te kolo mↄ be doo n man keŋ gyae ke yela n kegyↄ n nae ya. 11Mena dↄↄ nyaŋ ŋon n ne kↄla n dↄↄ na, n doo ditiŋtɛɛ keŋ man te n dↄŋɛɛ ke man. N ba gyeŋ botↄↄ keŋ n ne gyu ya nawolo nyi ditiŋtɛɛ keŋ te tↄ n sia. 12Me bia kpaakpaa, mɛɛ ŋmarase nombia kɛŋa mee yelee ŋon, nawolo nyi lee Kristo yele man dↄↄ Wurubuarɛ ta mo ɛ nombiakumɛɛ kyɛɛ ŋon. 13Kyaↄ, mɛɛ ŋmarase nombia kɛŋa mee yelee ŋon, nawolo nyi ɛ gyeŋ walaŋ ŋon ↄ kyaa lee kewalaŋ keŋ nɛ. Tewulɛɛ, mɛɛ ŋmarase nombia kɛŋa mee yelee ŋon, nawolo nyi ɛ te di walaŋkum ŋon dↄↄ. Me bia kpaakpaa, mɛɛ ŋmarase nombia kɛŋa mee yelee ŋon, nawolo nyi ɛ te kↄŋ kaa gyeŋ de kya Wurubuarɛ ŋon. 14Kyaↄ, mɛɛ ŋmarase nombia kɛŋa mee yelee ŋon, nawolo nyi ɛ gyeŋ ŋon ↄ kyaa lee kewalaŋ keŋ nɛ. Tewulɛɛ, mɛɛ ŋmarase nombia kɛŋa mee yelee ŋon, nawolo nyi Wurubuarɛ nombia doo ɛ man te ɛ seŋɛɛ ŋe man nideli te ɛ te di walaŋkum ŋon dↄↄ. 15Ɛ na mo ɛ sia gyakaa tɛɛle kei dↄↄ nombia na ka abↄↄ kumɛɛ dↄↄ ya. Akpaa walaŋ da mo ↄ sia gyakaa tɛɛle kei abↄↄ dↄↄ na, nawolo baa nyi ↄ bɛɛ gyae de kya Wurubuarɛ ŋon ya. 16Mena abↄↄ ŋenaŋ ŋaale yɛna ŋgba abↄↄ kumɛɛ ŋan deniwalaŋ ne gyae nyi waa yɛɛ nɛ, na ŋan deniwalaŋ sia ne naa te ŋɛɛ gyↄ e loo, na ŋan de dana te dɛɛ gyↄ de konↄↄ nɛ. Mena dinↄↄ kɛŋa pou ta lee de kya Wurubuarɛ gyaŋ ya. Ŋa lee lookum keŋ dɛɛ mo gyakaa tɛɛle kei dↄↄ abↄↄ dↄↄ nɛ man. 17Tɛɛle kei na ŋa abↄↄ ŋan pou balaŋ na mo be loo gyakaa ŋe dↄↄ nɛ ne lem baa. Mↄna walaŋ kamasɛ ŋon ↄ nyii Wurubuarɛ dei te ↄ yɛɛ kpene keŋ Wurubuarɛ ne gyae na waa nyiŋ nyeedoŋ kekpaa keŋ. 18Me bia kpaakpaa, debaŋ keŋ tɛɛle kei gyae kekↄŋ kↄ ↄto nɛ ta benaa. De taŋ taŋgbɛɛ yako ŋon nyi tɛɛle kei da benaa kↄ ↄto na, Kristo kↄlare ŋon waa kↄŋ. Te debokeiman nɛ dɛɛ naa nyi Kristo kↄlala burum kyaa tɛɛle kei dↄↄ. Kei nawola la nyi debaŋ keŋ tɛɛle kei gyae kekↄŋ kↄ ↄto nɛ ta benaa. 19Nafↄ mena balaŋ kɛwↄ kpuɛ na daa, te keŋ daa na wↄ nↄↄ te yɛɛ dokoloŋ dↄↄ ya te ba leewↄ de man. Daa na wↄ nↄↄ deŋ yɛɛ dokoloŋ na, nafↄ beŋ ta lee de man ya. Be ka lee de man nawolo nyi daa na be man walaŋ kamasɛ te yɛɛ nↄↄdokoloŋ ya. 20Mↄna ɛmɛɛ dↄↄ ɛ gyeŋ anokoare keŋ Wurubuarɛ ba lese wola nɛ, nawolo nyi Kristo ta mo ↄ feliŋ ŋon do ɛ man. 21Na keŋ ɛ ba gyeŋ anokoare keŋ dↄↄ te mɛɛ ŋmarase ŋon tↄne kei ya, mↄna keŋ ɛ gyeŋ anokoare keŋ dↄↄ. Te ɛ gyeŋ nyi dekara kamasɛ be doo anokoare keŋ Wurubuarɛ ba lese wola nɛ man ya. 22Amↄte yɛna dekarate baa? Dekarate yɛna ŋon ↄ bɛɛ nyi na Yesu yɛna Kristo, walaŋ ŋon Wurubuarɛ be yako see nyi waa kaa lɛɛ da nyee ya nɛ. Ↄtenate yɛna Kristo kↄlare ŋon, nawolo nyi ↄ te bɛɛ de kya Wurubuarɛ ŋon na ↄ bu Yesu Kristo ŋon pou. 23Nyaŋ ŋon n bɛɛ Wurubuarɛ bu ŋon na n te bɛɛ de kya Wurubuarɛ ŋon mↄ baa, te nyaŋ ŋon n lɛɛ Wurubuarɛ bu ŋon di na n lɛɛ de kya Wurubuarɛ ŋon mↄ baa di. 24Ɛ kɛɛ nideli nyi Kristo nombia ŋan ɛ be nyii lee kewalaŋ nɛ, dɛɛ dↄↄ ɛ man debaŋ kamasɛ. Akpaa ɛ yeli Kristo nombia ŋan ɛ be nyii lee kewalaŋ keŋ de dↄↄ ɛ man na, gyae ke yela ɛmɛɛ mↄ na Kristo na ↄ kya Wurubuarɛ keyɛɛ nↄↄdokoloŋ. 25Lee mena dↄↄ dee nyiŋ nyeedoŋ kekpaa keŋ ↄ be yako see nyi waa fa daa nɛ. 26Balaŋ baŋ bɛɛ beo ŋon nɛ dↄↄ te mɛɛ ŋmarase nombia kɛŋa mee yelee ŋon, na ɛ ke nyiŋ doo ɛ wose dↄↄ. 27Mↄna ɛmɛɛ dↄↄ Wurubuarɛ feliŋ ŋon Kristo ba moo do ɛ man nɛ te dↄↄ ɛ man. Lee mena dↄↄ tekaboena nyi ŋolo waa wola ŋon kolo bela ya. Nawolo nyi Wurubuarɛ feliŋ ŋon ne gyae la waa wola ŋon kpene kamasɛ. Abↄↄ ŋan pou ↄ na wolo nɛ yɛɛ anokoare keŋ dekara be doo ŋe man ya. Mena dↄↄ ɛ yɛɛ nↄↄdokoloŋ na Kristo ŋgba mena keŋ Wurubuarɛ feliŋ nawola ŋon nɛ. 28Me bia kpaakpaa ɛ gyakaa yɛɛ nↄↄdokoloŋ na e, na wee keŋ ↄ bese kↄŋ na dɛɛ tale gyↄ de konↄↄ ↄ siaman keŋ desɛŋ yaa gyakoloŋ be kyaŋ daa ya. 29Ɛ gyeŋ nyi Kristo nombia tenɛɛ, lee mena dↄↄ walaŋ kamasɛ ŋon ↄ ne yɛɛ kpene keŋ dei Wurubuarɛ siaman na ↄtenate yɛɛ Wurubuarɛ bu e.

1 Gyↄn 31Ɛ kɛɛ kegyae kpaakpaa keŋ de kya Wurubuarɛ ne gyae daa, te ↄ ne baake daa nyi ↄ bia gbagba te ampaŋ de yɛɛ ↄ biawↄ. Kpene keŋ dↄↄ tɛɛle kei dↄↄ balaŋ ba gyeŋ nyi de yɛɛ Wurubuarɛ biawↄ yɛna nyi, bↄↄ gyeŋ Wurubuarɛ gbagba ya. 2Me gyoona kpaakpaa, nɛnɛɛ de yɛɛ Wurubuarɛ biawↄ, te dinↄↄ keŋ waa yela dee nyiŋ wee daale nɛ, ↄ ta lese ta ke wola daa ya. Mↄna da gyeŋ nyi wee keŋ waa kↄŋ nɛ dɛɛ yɛɛ ŋgba ŋon nɛ, nawolo nyi dɛɛ naa e na dɛɛ gyeŋ mena keŋ ↄ doo. 3Walaŋ kamasɛ ŋon ↄ loo gyakaa ↄ dↄↄ mena nɛ, ↄtenate waa wↄŋ ↄ wose lee dukum keyɛɛ man ŋgba Kristo nɛ. 4Walaŋ kamasɛ ŋon ↄ yɛɛ dukum na ↄ ta fom Wurubuarɛ mmaraa keŋ, nawolo nyi dukum keyɛɛ yɛna Wurubuarɛ mmaraa kafom. 5Mↄna ɛ gyeŋ nyi Yesu Kristo kↄŋae na ↄ kaa lese daa lee dukum man, te ɛ gyeŋ mↄ nyi dukum kamasɛ be doo ↄ man ya. 6Mena dↄↄ walaŋ kamasɛ ŋon ŋon na Kristo dana nↄↄdokoloŋ na, ↄ bee doo dukum keyɛɛ man bela ya. Kei nawolo nyi ŋon ↄ gyakaa ↄ ne yɛɛ dukum na, ↄ te naa ta Yesu Kristo ya te ↄ ba gyeŋ ↄ dinↄↄ mↄ ya. 7Me bia kpaakpaa, ɛ na yela ŋolo ka beo ŋon do dukum keyɛɛ man ya. Nyaŋ ŋon n yɛɛ nombia kpaakpaa na, n gbɛɛneŋ tenɛɛ Wurubuarɛ siaman ŋgba mena keŋ Kristo gbɛɛneŋ tenɛɛ nɛ. 8Walaŋ ŋon ↄ gyakaa ↄ ne yɛɛ dukum na ↄ yɛɛ ↄbↄnsam walaŋ e, nawolo nyi ↄbↄnsam yɛɛ dukumyɛɛre e leenaŋ kewalaŋ keŋ pou. Kpene keŋ dↄↄ Wurubuarɛ bu ŋon be kↄŋ yɛna nyi, ↄ kↄŋae ↄ kaa wↄlɛɛ ↄbↄnsam tom. 9Walaŋ ŋon ↄ yɛɛ Wurubuarɛ bu e na, ↄ be doo dukum keyɛɛ man ya nawolo nyi Wurubuarɛ dinↄↄ doo ↄ man. Te ↄ be gyae waa tale gyakaa dukum keyɛɛ dↄↄ ya, nawolo nyi ↄ yɛɛ Wurubuarɛ bu e. 10Nnɛ te dɛɛ mo gyeŋ baŋ be yɛɛ Wurubuarɛ bia na baŋ be yɛɛ ↄbↄnsam wui. Nyaŋ ŋon n bɛɛ yɛɛ kpene keŋ dei ya yaa nyaŋ ŋon n bɛɛ gyae n dↄↄ ya na n te yɛɛ Wurubuarɛ bu e ya. 11Nombii keŋ ɛ be nyii leenaŋ debaŋ keŋ ɛ be lɛɛ Yesu Kristo di nɛ yɛna nyi "Dɛɛ gyae dↄŋa." 12Ɛ na yɛɛ ŋgba balee ŋon bɛɛ baake e nyi Kani nɛ ya. Na Kani yɛɛ ↄbↄnsam walaŋ e te ↄ koo ↄ naabu. Woŋ dↄↄ te Kani koo ↄ naabu? Nawolo nyi ŋon Kani gbɛɛneŋ ba tenɛɛ Wurubuarɛ siaman ya, te ↄ naabu gbɛɛneŋ tenɛɛ. 13Mena dↄↄ me naabia, nyi tɛɛle kei dↄↄ balaŋ ne kↄla ŋon na ɛ na yeli ke yɛɛ ŋon gyakoloŋ ya. 14Da gyeŋ nyi daa dↄↄ de ta lee yeŋ man kↄŋ nyeedoŋ kekpaa man, nawolo nyi dɛɛ gyae dↄŋa dↄↄ. Walaŋ ŋon ↄ bɛɛ gyae ↄ dↄↄ ya na, ↄ sɛɛ ↄ doo yeŋ nyiŋmaa man. 15Nyaŋ ŋon n ne kↄla n dↄↄ na n yɛɛ awudiini e Wurubuarɛ siaman, te ɛ gyeŋ mↄ nyi awudiini kamasɛ be dana nyeedoŋ kekpaa keŋ ya. 16Yesu Kristo ka mo ↄ nyee lɛɛ daa dↄↄ, te da gyeŋ mena keŋ kaboena nyi daa mↄ dɛɛ gyae de tebia. Mena dↄↄ kaboena nyi daa mↄ dɛɛ mo da nyeeya lɛɛ de tebia. 17Nyi akpaa ŋolo dana abↄↄ tɛɛle kei dↄↄ te ↄ naa nyi te hia ↄ dↄↄ, te ↄ bɛɛ lese ↄ sia yela e na sena te ↄtenate waa tale yako nyi Wurubuarɛ kegyae doo ↄ man? 18Me bia kpaakpaa, ɛ na fa dɛɛ mo nↄↄ yakaa gyae dↄŋa ya, mↄna ɛ yela dɛɛ yɛɛ deeli fa dↄŋa anokoare man. 19Kei ne gyae la ke yela dɛɛ gyeŋ nyi de yɛɛ Wurubuarɛ ŋon ↄ dana anokoare keŋ nɛ wui. Mena dↄↄ akpaa de konↄↄse de bu daa fↄↄ koraŋ na, dɛɛ tale seŋ Wurubuarɛ siaman keŋ dↄↄ yee gyakoloŋ ya. 20Nawolo nyi Wurubuarɛ kela de konↄↄse te ↄ gyeŋ kpene kamasɛ man. 21Me gyoona kpaakpaa, akpaa de konↄↄse bee bu daa fↄↄ ya na, dɛɛ tale seŋ Wurubuarɛ siaman keŋ dↄↄ yee kolo ya. 22Te da sola e kpene kamasɛ na dee nyiŋ ke, nawolo nyi dee nyii ↄ dei te dɛɛ yɛɛ kpene keŋ ↄ ne gyae. 23Kei yɛna kpene keŋ ↄ ne gyae nyi dɛɛ yɛɛ. Dɛɛ lɛɛ ↄ bu Yesu Kristo di, na dɛɛ gyae dↄŋa ŋgba mena keŋ ↄ be yako daa nɛ. 24Walaŋ kamasɛ ŋon ↄ ne nyii Wurubuarɛ dei na, ŋon na Wurubuarɛ nↄↄ yɛɛ dokoloŋ. Wurubuarɛ feliŋ ŋon ↄ ba mo do de man nɛ, yele la da gyeŋawↄ nyi daa na Wurubuarɛ nↄↄ yɛɛ dokoloŋ.

1 Gyↄn 41Me gyoona kpaakpaa, ɛ na lɛɛ walaŋ kamasɛ ŋon ↄ kpa Wurubuarɛ feliŋ ŋon doo ↄ man nɛ di yakaa yakaa ya. Mↄna ɛ kɛɛse ↄ nombia ŋan ↄ na wolo nɛ kɛɛ nyi ŋa lee Wurubuarɛ gyaŋ? Nawolo nyi balaŋ burum dↄŋ bee dii akɛrɛɛ nyi be nombia ŋan bee kolosi nɛ lee Wurubuarɛ gyaŋ. 2Nnɛ te ɛ ka mo gyeŋ nyi Wurubuarɛ feliŋ ŋon doo ↄtenate man. Walaŋ kamasɛ ŋon waa lɛɛ do yako nyi Yesu Kristo bese deniwalaŋ kↄŋ tɛɛle kei dↄↄ nɛ, na Wurubuarɛ nombia ŋan walaŋ ŋonaŋ ne kolosi nɛ yɛɛ anokoare. 3Te walaŋ ŋon ↄ bɛɛ lɛɛ nombii kei do na waa yako ke mena ya na, kenaŋ na Wurubuarɛ nombia ŋan ↄtenate kpa ↄ ne kolosi nɛ yɛɛ dekara ke, nawolo nyi ke ta lee Wurubuarɛ gyaŋ ya. Ↄtenate yɛɛ Kristo kↄlare ŋon walaŋ e. Be wulaa yako ŋon Kristo kↄlala kɛwↄ kekↄŋ nombia, te debokeiman man gba be wulaa be kyaa tɛɛle kei dↄↄ. 4Me bia kpaakpaa, ɛmɛɛ dↄↄ ɛ yɛɛ Wurubuarɛ biawↄ te ɛ te di akɛrɛɛtena kɛwↄ dↄↄ. Ba te tale beo ŋon ya, nawolo nyi Wurubuarɛ feliŋ ŋon ↄ doo ɛ man nɛ, ↄ kela Kristo kↄlare ŋon feliŋ keŋ doo tɛɛle kei dↄↄ balaŋ man nɛ. 5Mena akɛrɛɛtena kɛwↄ dↄↄ be yɛɛ tɛɛle kei dↄↄ balaŋwↄ te tɛɛle kei dↄↄ agyueŋ te be dana, mena dↄↄ te tɛɛle kei dↄↄ balaŋ ne nyii wↄ. 6Te daa dↄↄ de yɛɛ Wurubuarɛ biawↄ. Walaŋ ŋon ↄ gyeŋ Wurubuarɛ nɛ ne nyii daa, te ŋon ↄ te yɛɛ Wurubuarɛ wui ya na ↄ bee nyii daa ya. Lee kei man te dɛɛ mo gyeŋ baŋ be nombia ŋan bɛɛ wolo nɛ ba lee Wurubuarɛ anokoarete ŋon gyaŋ, na baŋ be wui ba lee Wurubuarɛ kↄlare dekarate ŋon gyaŋ. 7Me gyoona kpaakpaa, ɛ fa dɛɛ gyae dↄŋa nawolo nyi dↄŋa kegyae kei lee Wurubuarɛ gyaŋ. Ɛ man walaŋ kamasɛ ŋon ↄ ne gyae ↄ tebia na, ↄtenate yɛɛ Wurubuarɛ bu e te ↄ gyeŋ Wurubuarɛ mↄ. 8Walaŋ kamasɛ ŋon ↄ bɛɛ gyae ↄ tebia ya na ↄtenate ba gyeŋ Wurubuarɛ ya. Nawolo nyi kegyae pou nyee yɛna Wurubuarɛ. 9Nnɛ te Wurubuarɛ lesewↄ wola nyi ↄ ne gyae daa. Wurubuarɛ kpila ↄ bu dokoloŋ kooŋ ŋon ↄ dana nɛ kↄŋ tɛɛle kei dↄↄ, na dɛɛ ta ↄ dↄↄ nyiŋ nyeedoŋ kekpaa. 10Nnɛ yɛna kegyae gbagba. Te yɛɛ nyi daa taŋgbɛɛ la gyae Wurubuarɛ nombia ya, mↄna ŋon gyae na daa te ↄ kpila ↄ bu te ↄ kaa moo ↄ wose deesi fa de nombiakumɛɛ. Te Wurubuarɛ tɛɛwↄ ke dↄↄ mo de nombiakumɛɛ ŋenaŋ kyɛɛ daa. 11Me gyoona kpaakpaa, nyi nnɛ te Wurubuarɛ gyae daa na kaboena nyi daa mↄ dɛɛ gyae dↄŋa mena. 12Ŋolo na ŋolo te naa ta Wurubuarɛ na ↄ sia ya, mↄna akpaa de gyae dↄŋa na daa na Wurubuarɛ nↄↄ te yɛɛ dokoloŋ, nawolo nyi ↄ te yeli dɛɛ gyae dↄŋa ŋgba mena keŋ ↄ ne gyae nɛ. 13Lee ↄ feliŋ ŋon ↄ ba mo do de man dↄↄ, da gyeŋ nyi daa na e dana nↄↄdokoloŋ. 14Da te naa mↄ te dee di adansɛɛ nyi de kya Wurubuarɛ ŋon kpila na ↄ bu Kristo ŋon nyi ↄ kaa lɛɛ tɛɛle kei dↄↄ balaŋ pou nyee. 15Walaŋ kamasɛ ŋon ↄ lɛɛ do te ↄ gyuusu ↄ nↄↄ yako nyi Yesu yɛna Wurubuarɛ bu ŋon na, ↄtenate na Wurubuarɛ dana nↄↄdokoloŋ. 16Da gyeŋ kegyae keŋ Wurubuarɛ ne gyae daa, mena dↄↄ de ta mo da wose lↄ kegyae kei dↄↄ. Kegyae pou nyee yɛna Wurubuarɛ mena dↄↄ nyaŋ ŋon n ne gyae Wurubuarɛ na n tebia na, ɛmɛɛ na Wurubuarɛ dana nↄↄdokoloŋ. 17Akpaa kegyae kei doo de man nideli ŋgba mena keŋ Wurubuarɛ ne gyae nɛ, na gyae ke yela wee keŋ Wurubuarɛ waa di tɛɛle kei dↄↄ balaŋ pou nombia nɛ, dɛɛ tale seŋ ↄ siaman keŋ nyi dↄↄ yee kolo ya. Nawolo nyi da ke kyaa tɛɛle kei dↄↄ na, daa na e dana nↄↄdokoloŋ. 18Nyi kegyae doo balaŋ man na gyakoloŋ bee doo be man ya. Nawolo nyi kegyae kpaakpaa ne gegi gyakoloŋ. Walaŋ ŋon ↄ gyeŋ nyi baa wↄŋ ↄ deŋele na ŋon ne yee la. Mena dↄↄ walaŋ ŋon ↄ ne yee nyi Wurubuarɛ waa wↄŋ ↄ deŋele nɛ, na Wurubuarɛ kegyae keŋ be doo ↄtenate man ŋgba mena keŋ Wurubuarɛ ne gyae nɛ ya. 19Dɛɛ gyae Wurubuarɛ na de tebia nawolo nyi ŋon taŋgbɛɛ la gyae daa. 20Akpaa n yako nyi "N ne gyae Wurubuarɛ" te n ne kↄla n dↄↄ na n yɛɛ dekarate e. Nawolo nyi nyaŋ ŋon n bɛɛ gyae n dↄↄ deniwalaŋ ŋon n ne naa e na n sia ya na, sena te n ke tale gyae Wurubuarɛ ŋon n bɛɛ naa e ya nɛ? 21Mmaraa keŋ Kristo ba mo fa daa yɛna nyi, nyaŋ ŋon n ne gyae Wurubuarɛ na kaboena nyi nya gyae n dↄↄ mↄ.

1 Gyↄn 51Walaŋ kamasɛ ŋon waa lɛɛdi nyi Yesu yɛna Kristo ŋon nɛ yɛɛ Wurubuarɛ bu e, te ŋolo ne gyae bu ↄ kya nɛ na ↄ ne gyae bu ŋon mↄ baa. 2Akpaa dɛɛ gyae Wurubuarɛ te dee nyii ↄ dei na, kei nawola la nyi dɛɛ gyae Wurubuarɛ bia. 3Akpaa de nyii Wurubuarɛ dei na, keŋ nawola la nyi dɛɛ gyae Wurubuarɛ te ↄ mmaraase ŋan mↄ be taŋ doŋ nyi dↄↄ tale di ŋe dↄↄ ya. 4Nawolo nyi Wurubuarɛ bu kamasɛ te di doŋ tɛɛle kei dↄↄ, te da ke lɛɛ Yesu Kristo di yele la te de dii doŋ tɛɛle kei dↄↄ. 5Amↄte ne gyae la waa tale di doŋ tɛɛle kei dↄↄ? Ŋolo be kyaa ya, gyisɛ walaŋ ŋon ↄ be lɛɛ di nyi Yesu yɛna Wurubuarɛ bu ŋon nɛ, ŋon ne gyae la waa tale di doŋ tɛɛle kei dↄↄ. 6Yesu Kristo yɛna walaŋ ŋon ↄ be kↄŋ tɛɛle kei dↄↄ te bↄↄ sↄ e Wurubuarɛ loŋ. Kenaŋ wↄle na be gyↄↄ e mataa ↄpaŋdaŋ keŋ dↄↄ te ↄ fatabo leewↄ leki. Mↄna na Wurubuarɛ loŋ kaageŋ te be sↄↄ e ya, ↄ yeŋawↄ te ↄ fatabo mↄ leewↄ leki. Wurubuarɛ feliŋ ŋon ↄ yɛɛ anokoare feliŋ e nɛ, ne diina nombii kei adansɛɛ nyi ke yɛɛ anokoare. 7Mena dↄↄ abↄↄ atooro kɛŋa ne diina nombii kei adansɛɛ. 8Wurubuarɛ feliŋ ŋon na loŋ keŋ na fatabo keŋ, te abↄↄ atooro kɛŋa pou ne sɛɛ dↄŋa. 9Deniwalaŋ de di nombii wose man adansɛɛ na dɛɛ lɛɛ ke do, mↄna Wurubuarɛ de di nombii wose man adansɛɛ na ka kela deniwalaŋ wui keŋ. Mena dↄↄ ŋan pou Wurubuarɛ be yako lee ↄ bu ŋon wose man nɛ kaboena nyi dɛɛ lɛɛ ŋa do. 10Walaŋ ŋon ↄ lɛɛ Wurubuarɛ bu ŋon di nɛ, na ↄ gyeŋ ↄ konↄↄ man nyi adansɛɛ nombii keŋ yɛɛ anokoare. Te nyaŋ ŋon n bɛɛ lɛɛ Wurubuarɛ di ya na n ta besena e dekarate. Nawolo nyi n bɛɛ lɛɛ adansɛɛ keŋ Wurubuarɛ be dii lee ↄ bu ŋon wose man nɛ di ya. 11Nombii keŋ Wurubuarɛ be yako yɛna nyi ↄ te fa daa nyeedoŋ kekpaa, te ↄ bu ŋon dↄↄ te dɛɛ ta na dee nyiŋ mena nyeedoŋ kei. 12Lee mena dↄↄ walaŋ kamasɛ ŋon ŋon na Wurubuarɛ bu ŋon dana nↄↄdokoloŋ nɛ, ↄ dana mena nyeedoŋ kei. Te walaŋ kamasɛ ŋon ŋon na Wurubuarɛ bu ŋon be dana nↄↄdokoloŋ ya na, ↄ be dana mena nyeedoŋ kei ya. 13Mɛɛ ŋmarase kɛŋa maa fa ɛmɛɛ baŋ ɛ be lɛɛ Wurubuarɛ bu ŋon di nɛ, na ɛ ke nyiŋ gyeŋ nyi ɛ dana nyeedoŋ kekpaa keŋ. 14Lee mena dↄↄ kpene kamasɛ keŋ dɛɛ sola e na de bɛɛ lↄ wↄe ya, nawolo nyi da gyeŋ nyi akpaa da sola e te ke yɛɛ ↄ kegyaebii man na waa yɛɛ fa daa. 15Akpaa da gyeŋ nyi da sola e kolo ke gbɛɛ dↄↄ te ↄ ne yɛɛ fa daa na, kenaŋ na da gyeŋ nyi de nyiŋmaa te kaŋ ŋan dↄↄ sola e nɛ. 16Akpaa n naa n dↄↄ ne yɛɛ dukum keŋ be gyae ke tira ŋon na Wurubuarɛ nsana kekpaa ya nɛ, sola Wurubuarɛ fa e. N sola Wurubuarɛ fa e nɛ, waa fa e nyeedoŋ kekpaa. Baŋ be dukum be gyae ke yela baŋ na Wurubuarɛ nsana ke tira kekpaa ya nɛ baŋ yaa me dana. Mↄna dukum daale kyaa keŋ ŋolo de yɛɛ na, gyae ke tale tira walaŋ ŋonaŋ na Wurubuarɛ nsana kekpaa. Na walaŋ ŋon waa yɛɛ dukum kei dinↄↄ yaa me kpa yaa sola Wurubuarɛ fa e ya. 17Ŋan pou walaŋ ne yɛɛ te be dei ya nɛ yɛɛ dukum ke, mↄna nombiakumɛɛ ŋaale kyaa keŋ ŋe bee tira walaŋ na Wurubuarɛ nsana kekpaa ya. 18Da gyeŋ nyi Wurubuarɛ bu kamasɛ bee doo dukum keyɛɛ man ya, nawolo nyi Wurubuarɛ bu ŋon ne gyee e mena dↄↄ ↄbↄnsam be gyae waa tale nyiŋ e ya. 19Ↄbↄnsam ne di doŋ tɛɛle kei pou balaŋ dↄↄ, mↄna daa dↄↄ da gyeŋ nyi de yɛɛ Wurubuarɛ biawↄ. 20Da gyeŋ mↄ nyi Wurubuarɛ bu ŋon te kↄŋ kaa yela de ta gyeŋ Wurubuarɛ gbagba ŋon. Keŋ daa na ↄ bu Yesu Kristo dana nↄↄdokoloŋ dↄↄ, daa na Wurubuarɛ gbagba kei mↄ dana nↄↄdokoloŋ. Ŋon waageŋ yɛna Wurubuarɛ gbagba ŋon ↄ ne fa deniwalaŋ nyeedoŋ kekpaa keŋ. 21Me bia kpaakpaa, ɛ wↄŋ ɛ wose lee bɛɛneŋ ↄsom man.

http://www.bible.is/NTRWBT/1John/1/D

Nenhum comentário:

Postar um comentário