sexta-feira, 12 de fevereiro de 2016

1 John: Wali (Ghana)


1 John 11Unani ang daang bibe a 'yi a 'munpiileeng, u yeliyaga ting 'wong ni. Unani ting nye aning ti 'ningbie, una ting Iiinhi ka ti 'nuuhi fiinhi ni ming nyivori yelihung ni ting yera bila. 2'Bojung a 'nyivori daang 'yiye gbanggbali, ting nyiu, a 'dire 'sieree, a 'wuniye a 'nyivori ni ang ba tari baahibu ni. Unang bi a Ba seng, a 'yi gbanggbali a 'kuti ni. 3Bila ni ting nye aning bila ni ting 'wong, bila ting yera 'kuriye, ka ye ming tan lang taa yelitarihi aniti. Yeliminga, ti tariye lang taa yelitarihi aning a Ba aning u 'Bi-dau Yesu 'Kristo. 4Ti seuriye a yela nga 'kuriye ka ti niye nyengka paali. 5A 'duoho ting 'wong a 'yi u seng a yera 'kuriye ni la nga, ka Naangmini iye chaanii. Sagiluu 'chi u ingang fling jaa. 6Ka tinuung yeli ka ti niu tariye lang taa yelitarihi, che 'chene sagiluu 'puong, ti ngmaariye 'girii, a ba di a yeliminga tuna ning tuma. 7Che ka tinuung 'chene a chaanii 'puong a'wo ung bi a chaanii 'puong bila, ti tariye lang taa yelitarihi taa seng. Ka u 'Bi-dau 'Yesu 'Kristo jiing pegiriti a 'yire yelibeu jaang. 8Ka tinuung yeli ka ti ba tan beu, ti benniye ti miihi, ka a yeliminga ba 'bi ti iinhing. 9Ka tinuung die ti yelibee saangbu, u iye limanpaalii daana a i sun'tuuro ka u veng ti yelibee 'kuti a pegiti a 'yi beu'tuubu jaang. 10Ka tinuung yeli ka ti ba i yelibee, ti buonuung 'giri-ngmaara, ka u yelihung 'chi ti iinhing.

1 John 21N bibilii, n seuriye a yela nga 'kuriye ka ye to ira yelibee 'jung. Ka nie jaang i yelibeu, ti tariye suhi'kuro a Ba seng, una la 'Yesu 'Kristo a sun'tuuro. 2U iye sarika a 'ku ti yelibee, ti 'yong yelibee naani ung i sarika 'ku. U iye sarika ku a donee jaa ming yelibee. 3A 'tuuro ngaang ingang la ting mang bang ka ti bamuung, ka tinuung 'tuuro u nuori 'kuubuhi. 4Unani ang yera: N bamuung. A che ba 'tuuro u nuori 'kuubuhi, u iye 'giri-ngmaara, ka a yeliminga ba bi u ingang. 5Che unani jaa ang 'tuuro u yelihung, u ingang la ka Naangmini nungbu paali yeliminga. A 'tuuro ngaang ingang la ting bang ka ti 'biye u ingang. 6Unani ang yera ka u 'biye u ingang, a sigiyeng ka u ming minga 'chene bila ni 'Yesu ang daang 'cheng ni. 7Babiihi, n ba seura nuori 'kuubu ang i paalaa 'kuriye. N seuriye nuori 'kuubu ang i 'koree 'kuriye. Una yeng tari a 'yi a 'munpiileeng ni. A nuori kuubu ang i 'koree la a yelihung yeng 'wong a 'yi a 'munpiileeng ni. 8Che n la seuriye nuori kuubu ang i paalaa a 'kuriye. U iye yeliminga u ingang, aning ye iinhing. 'Bojung a sagiluu para garang, ka a yeliminga chaanii ni chaana pampana. 9Unani ang yera ka u biye u chaanii 'puong a che haara u babie, u 'Nye sagiluu 'puong a waana a wagiri ngang. 10Unani ang nunna u ba'bie, u daana 'Nye chaanii 'puong, ka yeli ang na veng ka u saang ba bi u ingang. 11Che unani ang haara u ba'bie, u 'Nye sagiluu 'puong, a 'chene sagiluu 'puong, a ba banna jie ni ung gara. 'Bojung a sagiluu jongye u 'ningbie. 12N seura 'kuriyeng, bibilii, bojung Naangmini vengye ye yelibee kuye u 'yuori 'jung. 13N seura 'kuriyeng, ba'mine, bojung ye bangye unani ang 'bibe a 'yi a 'munpiileeng ni. N seura kuriyeng, 'bi-pola, 'bojung ye tuongye a bungbeu ni. N seura 'kuriyeng, bibilii, 'bojung ye bangye a Ba. 14N seuyeng a 'kuye, ba'mine, bojung ye bangye unani ang bibe a 'yi a 'munpiileeng ni. N seuyeng a kuye, bi-pola, bojung ye tariye fanga, ka Naangmini yelihung ni 'bi ye iinhing. Yeng tuong a bungbeu ni. 15Ye to nung dunee, bii buunhu ang bi a dunee 'puong. Ka nie jaang nung dunee, a Ba nungbu ba bi u daana ingang. 16'Bojung bung jaa ang 'bi dunee 'puong, inggbani bobeu ni, 'ningbie bobeu ni, 'nyivori jigihibu ni, a ba 'yire a Ba seng. A 'yireye donee seng. 17Ka dunee aning u bobeu ni para gara, che unani ang tuna Naangmini buobu biriyebe a gara wagiri jaang. 18'Bibilii, a baahaa wagiri la nga. A'wo yeng 'wong ka 'Kristo-chiiha daang na wang ni. 'Haali pampana 'Kristo-chiihiba yaga 'ihiyeng. Bilang la ting bang ka a baahaa wagiri la nga. 19Ba 'yiye ti seng, che ba daang ba i ti chelee. ‘bojung ka banang da i ti chelee, ba danang biye ti seng a gara. Che ba 'yiye ti seng ka ba 'wuli pielaang ka ba kanga jaa ba i ti kanga. 20Che ye tariye a buo-ingbu a 'yi Bungpegi'yiruu ni ingang, yeng bang yela jaa. 21N ba seu 'kuye yeng ba bang a yeliminga 'jung. N seu 'kuyeng yeng bamuu 'jung, aning 'girii ang ba 'yire yeliminga ingang 'jung. 22Ning'buo la 'giri-ngmaara? Unani ang chiiha a yera ka 'Yesu naani 'Kristo ni. Una la Kristo-chiiha ni ang chiiha a Ba aning a 'Bi-dau. 23Unani jaa ang chiiha a 'Bi-dau, u daana ning u ju ba tan a Ba. Che unani ang sagira a 'Bi-dau, u tariye a Ba ming. 24Bila 'jung ye veng ka bila ni yeng 'wong a 'yi a 'munpiileeng ni bi ye iinhing a gara. Ka bila ni yeng 'wong a 'yi a 'munpiileeng ning bi ye iinhing a gara, ye ming na 'Nye a 'Bi-dau ingang aning a Ba ingang a gara. 25A no'binnuu ung 'bing kuti ni la nga, una la 'nyivori ang ba tari baahibu ni. 26N seuye a yela nga 'kuye a'wo banani ang benniye ni yela. 27Che a buo-ingbu ni yeng die 'yi u seng ni biye ye iinhing. Ye ba hiena ka nie jaa 'wuliye. Che a'wo u buo-ingbu ni ang 'wuniye yela jaa, a i yeliminga a ba i 'girii ni, a'wo ung turi 'wuliye bila ni, ye 'bi u ingang bila. 28Pampana, 'bibilii, ye 'bi u ingang a gara. Sanga ni ung daang na 'yi gbanggbali, ka titan nyeu, a ta 'di 'vii u 'ningbi-tooring u waa ingang. 29Ka yenang bang ka u iye sun'tuuro, ye bangyeng ka nie jaa ang tuna sun'tuubu tuma, unang doguu.

1 John 31Ye nye bila ni nungbu a Ba ang 'wuli ti iinhing, ka ba buoniti Naangmini 'biihi, bila liti. Bila 'jung ka dune ba bangti, 'bojung u daang ba bang a Ba. 2N nunginiba, pampana ti iye Naangmini 'biihi, che a nang ba 'yi gbanggbali bila ni ting daang na 'be. Che ti bangyeng ka sanga ni ung na 'yi gbanggbali, ti na 'wonuung. 'Bojung ti daang na nyiung a'wo ung 'wo bila ni. 3Nie jaa ang tari a tamaa nga u ingang, u daana pegiriye u minga, 'haali a'wo ung pegi bila ni. 4Nie jaa ang tuna beu, u saaniye a begu ming, 'bojung beu la a begu saangbu. 5Ye bangyeng ka u daang 'yiye gbanggbali ka u di ti yelibee ti bahi. U ingang beu 'chibe. 6Nie ni jaa ang 'bi u ingang, u daana ba ira yelibee. Nie ni jaa ang ira yelibee, u ba nyiu bii a bamuu. 7'Bibilii, ye ta veng ka nie belingye. Unani ang tuna sun'tuubu tuma, u iye sun'tuuro, a'wo ung i sun'tuuro bila ni. 8Unani ang ira beu, u 'yiye Deevul seng, 'bojung a Deevul iriye yelibee a 'yi a 'mtmpiileeng. Bila nga yela la ka Naangmini 'Bi-dau ni daang 'yi gbanggbali, ka u nyuong a Deevul tuma ni. 9Unani jaa Naangmini ang dogi, u daana ba ira beu, 'bojung Naangmini berihtmg 'biye u daana ingang a gara. U kung tuong ira beu, 'bojung Naangmini doguung. 10A bila nga 'puong la ka Naangmini 'biihi mang 'yi gbanggbali, ka Deevul ming biihi mang 'yi gbanggbali. Nie ni jaa ang ba tuna sun'tuubu tuma, u ba 'yi Naangmini seng. Unani ming ang ba nunna u ba'bie, u ba 'yi Naangmini seng. 11A 'duoho yeng 'wong a 'yi a 'munpiileeng la nga, ka ti nung taa. 12Ti ta 'woning 'Keen, unang daang 'yi a btmgbeu ni seng, a daang ku u yau ni. Wala 'jung ung daang kuu? Una minga tuma ang daang i bee ka u yau ni tuma i sun'tuubu tuma 'jung la. 13Ye ta ira nomaa, n ba'biihi, ka duneeng haye. 14Ti bangyeng ka ti 'yiye 'kutmg seng a gaa 'nyivori seng, 'bojung ti nungye a ba'biihi. Unani ang ba nung u ba'bie, u 'Nye 'kuung 'puong. 15Unani jaa ang haara u babie, u daana iye ningkuura. Yeng bang ka ningkuura ba tari 'nyivori ang ba tan baahibu ung bira u ingang. 16A 'tuuro ngaang la ting bang Naangmini nungbu. 'Bojung u diye u 'nyivori a 'bing 'tengeng 'kuti. Ting ming i a'wo ka ti di ti 'nyivoe a 'bing 'tengeng ku a ba'biihi. 17Che ka nie jaang tan donee nga buunhu, a nyira u ba'bie ang 'bi hiengbu 'puong, che ka u ba jora u nimboo, wala ka Naangmini nungbu na bi u ingang. 18N 'bibilii, ye ta veng ka ti nunna yeliyaga 'puong bii jinti 'puong. Che ye veng ka ti nunna tuma 'puong aning yeliminga 'puong. 19A 'tuuro ngaang la ting bang ka ti iye a yeliminga niba, ting daang na veng ka ti 'sikie kung ira 'sige fling jaa u 'ningbi-tooring. 20'Bojung ka ti 'sikieng yeli ka ti boriyeng Naangmini soring, Naangmining i kpong gaa ti 'sikie, a bang yela jaa. 21N nunginiba, ka ti 'sikieng ba yera ka ti boriyeng Naangmini soring, bila yeng ti tariye nyeu Naangmini 'ningbi-tooring. 22Bung jaa ting suha ti mang nyiriye a bungbalaa a 'yire u seng. 'Bojung ti 'tuuriye u nuori 'kuubu, a ira yela ni ang pena 'puo u 'ningbiring. 23U nuori 'kuubu la nga, ka ti sagi u 'Bi-dau 'Yesu 'Kristo 'yuori, a nung taa ming a'wo ung 'kuti nuori bila ni. 24Nie ni ang 'tuuro u nuori 'kuubu, u daana 'biriye u ingang, ung ming 'bira u daana ingang. A 'tuuro ngaang la ting bang ka u 'Nye ti iinhing. Ti bangye bila a 'tuuro a Sie ni ung di 'kuti ni ingang.

1 John 41N nunginiba, ye ta sagira sie la sie jaa, ye 'pigihe a siihi a nye ka a 'yiye Naangmini seng bii. 'Bojung 'girii dangyeriba yaga 'yi kpeye dunee. 2Ngaang yeng na 'tu a bang Naangmini Sie ni. Sie jaa ang sagira ka 'Kristo wayeng inggbani 'puong, a sibalaa 'yiye Naangmini seng. 3Sie jaa ming ang ba sagira ka 'Yesu 'Kristo wayeng inggbani 'puong, a sibalaa ba 'yi Naangmini seng. 'Kristo-chiiha sie ni la bila. U yela yeng 'wong ka u waanang ni. 'Haali pampana u biye a dunee 'puong. 4'Bibilii, ye 'yiye Naangmini seng, a tuongba, 'bojung unani ang bi ye iinhing ning i kpong gaa unani ang bi a chime 'puong. 5Ba 'yiye dunee, bila 'jung bang yera dunee yela, ka dunee 'wono ba yeliyaga. 6Ti 'yiye Naangmini seng. Unani ang bang Naangmini, u 'woniye ti yeliyaga. Unani ang ba 'yi Naangmini seng, u ba 'wono ti yeliyaga. Ngaang ting mang 'tu bang yeliminga sie ni, a bang belingbu sie ni. 7N nunginiba, ye veng ka ti nung taa, 'bojung nungbu 'yiye Naangmini seng. Nie ni jaa ang tari nungbu, Naangmini dogiye u daana, ung ming bang Naangmini. 8Nie ni ang ba tari nungbu, u ba banna Naangmini, bojung Naangmini la nungbu. 9Ngaang 'puong la ka Naangmini nungbu daang 'yi gbanggbali a 'kuti, 'bojung Naangmini tungye u 'Bi-dau dogiruu bung'yeni a ing a donee 'puong ka titan 'nyivori a 'tuuro u ingang. 10Nungbu la nga, a ba i 'wo ka tinuung nung Naangmini, unang nungti a tung u 'Bi-dau ka u wa i sarika ti yelibee 'jung. 11N nunginiba, ka Naangmining nungti bila, ti ming iyeng ka ti nung taa. 12Nie jaa nang ba nye Naangmini wagiri jaang. Ka tinuung nung taa, Naangmini kpieriye ti iinhing, ka u nungbu paali ti iinhing. 13Ngaang la ting 'tu bang ka ti kpieriye u ingang, ung ming kpiera ti iinhing, bojung u 'kuting u Sie. 14Ting nye, a 'dire 'sieree, ka a Ba tungye a 'Bi-dau ka u wa i a dunee Diera. 15Nie ni jaa ang na sagi ka 'Yesu iye Naangmini 'Bi-dau ni, Naangmini kpieriye u daana ingang. Ung ming kpiera Naangmini ingang. 16Ting bang a sagi a nungbu ni ming Naangmini ang tari ti iinhing ni. Naangmini la nungbu. Unani ang kpiera nungbu 'puong, u kpieriye Naangmini ingang, ka Naangmini ming kpiera u ingang. 17A ngaang 'puong la ka nungbu paali ti seng, ka ti tari nyeu saree 'diibu 'beu ning. 'Bojung bila ni ung 'wo ni, bila ting ming 'wo a donee nga 'puong. 18Dabieng 'chi nungbu 'puong. Nungbu paalii mang 'ihiye dabieng loo bahi, bojung dabieng tariye dogihibu. Unani ang fora dabieng, u ba paali nungbu 'puong. 19Ti numuung, bojung unang nungti fora. 20Ka nieng yeli: N nungye Naangmini, a che haara u balie, u iye 'giri-ngmaara. 'Bojung unani ang ba nunna u ba'bie ung nye, wala ung na tuong nunna Naangmini ung ba nye? 21Ti nyiye a nuori 'kuubu nga a 'yi u seng, ka unani ang nunna Naangmini, u nunna u balie ming.

1 John 51Nie jaa ang sagi ka 'Yesu la a 'Kristo, Naangmini dogiye u daana. Unani ming jaa ang nunna a Ba, u nungye unani ming a Ba ang dogi ni. 2A 'tuuro ngaang la ting bang ka ti nungye Naangmini biihi ni, sanga ni ting mang nung Naangmini a 'tuuro u nuori 'kuubu ni ming. 3'Bojung Naangmini nungbu la nga, ka ti 'tuuro u nuori 'kuubu. U nuori 'kuubu ba i too. 4'Bojung bung jaa Naangmini ang dogi, u daana tuongye donee. A tuongbu ang tuona dunee la nga, ti limaniye. 5Ning'buo la unani ang tuona dunee, ka unani ang sagira ka 'Yesu la Naangmini 'Bi-dau ni naani? 6U iye nie nga ang 'tu kuong inga aning jiing inga a wa, 'Yesu 'Kristo. U ba 'tu kuong 'yong inga a wa, u 'tuye kuong inga aning jiing inga a wa. A Sieng ming 'dire 'sieree, bojung a Sie la a yeliminga. 7'Bojung atang 'dire 'sieree, 8a Sie, a kuong, aning a jiing. A ata tariye nuori 'yeni. 9Ka tinuung diera ninsaaliba 'sieree,Naangmini 'sieree ning i tiinhuu gaa ninsaaliba 'sieree. Bojung Naangmini 'sieree la nga ung 'di u 'Bi-dau yela. 10Unani ang sagi Naangmini Bi-dau ni, u daana tariye 'sieree u minga ingang. Unani ang ba sagi Naangmini, u daana buomuung 'giri-ngmaara. 'Bojung u ba sagi 'sieree ni Naangmini ang 'ku a'wo u 'Bi-dau yela ni. 11A 'sieree la nga, ka Naangmini 'kuting 'nyivori ang ba tari baahibu. A 'nyivori nga Nye u 'Bi-dau ingang. 12Unani ang tari a 'Bi-dau, u tariye a 'nyivori. Unani ming ang ba tari Naangmini 'Bi-dau ni, u ba tari a 'nyivori. 13N seuye a yela nga 'ku ye banani ang sagi Naangmini 'Bi-dau 'yuori ni, ka ye bang ka ye tariye 'nyivori ang ba tari baahibu. 14Sagi'diibu ni ting tari u ingang ni la nga, ka ka tinuung suhi yeli jaa ang 'tu u buobu, u 'woniye ti suhibu. 15Ka tinuung bang ka u 'woniye ti suhibu, yela jaa ting suha, ti bangyeng ka ti mang nyiye suhibu ni ting mang suhi a 'yi u seng ni. 16Ka nie jaang nye u babie ang ira yelibeu ang ba waananing 'kuung, u na suhiye Naangmini, Naangmini na 'lulling 'nyivori. N yeriye banani ang ba ira yelibee ang waananing 'kuung ni. Beu ang waananing 'kuung 'bi beng. N ba yera ka u 'puoho Naangmini una yela. 17Beu'tuubu jaa iye yelibeu, che ka yelibeu bibe a waananing 'kuung. 18Ti bangyeng ka ka Naangmining dogi nie jaa, u daana ba ira yelibee. Che unani Naangmini ang dogi ni mang kaaraye u minga, ka a bungbeu ni ba mang fiinhuu. 19Ti bangyeng ka ti iye Naangmini 'suobu, ka a dunee jaa jeng beulung 'puong. 20Ting bang ka Naangmini 'Bi-dau ni wayeng, a wa 'kuti 'ningbiyuo, ka ti bang unani ang i yeliminga daana. Ting 'bi unani ang i yeliminga daana ingang. U 'Bi-dau 'Yesu 'Kristo ingang ting 'be. Naangmini minga ni la bila, 'nyivori ang ba tari baahibu ming la bila. 21'Bibilii, ye ngmaa ye miihi a 'yi bagang. Ami.

http://www.bible.is/WLXBIV/1John/1/D

Nenhum comentário:

Postar um comentário