quinta-feira, 4 de fevereiro de 2016

1-е ИОАННА: UDMURT

 
1-е ИОАННА 11Мар вал кутсконысеныз ик, мае ми кылӥмы, мае ас синмынымы адӟимы, мае учкимы-чакламы, асьме киын йӧтӥськылӥмы, – улонлэн Кылыз сярысь, – тӥни мар сярысь гожъяськомы. 2Улон лыктӥз но, ми адӟыса шара ивортӥськомы, та бырисьтэм улон сярысь тодытӥськомы, со Атай дорын вал, асьме доры лыктӥз, – 3мае ми адӟимы, мае кылӥмы, тӥледлы но ивортӥськомы, тӥ но милемын огазе мед кариськоды шуыса; нош ми Атаен но Солэн Пиеныз Иисус Христосэн огазьын улӥськомы. 4Тае тӥледлы гожтӥськомы, пачыл шумпотонэн мед улоды шуыса. 5Тани та ивор, кудзэ ми Иисус Христослэсь кылӥмы но тӥледлы тодытӥськомы: Инмар – со югытлык, Со бордын нокыӵе но пеймытлык ӧвӧл. 6Ми Соин огазьын улӥськом шуиськомы ке, нош асьмеос пеймытын улӥськомы ке, соку асьмеос ӧрекчаськись луиськомы, зэмлыклы тупамон ум лэсьтылӥське. 7Нош югытын улӥськомы ке, кызьы Со югытын улэ, соку ваньмы огазьын улӥськомы. Соку Солэн Пиезлэн Иисус Христослэн Вирыз котькыӵе но сьӧлыклэсь асьмеды сузя. 8Сьӧлыкмы ӧвӧл шуиськомы ке, соку асьмемыз асьмеос ӧрекчаськомы, асьмелэн пушкамы Инмарлэн зэмлыкез ӧвӧл. 9Асьмелэсь сьӧлыкъёсмес ватытэк вераськомы ке, Со, оскиськымон, шонерлыко луись, сьӧлыкъёсмес куштэ. Вань шонертэм улонлэсь асьмеды сузя. 10Ми ӧм сьӧлыкалэ шуиськомы ке, Сое ӧрекчи луэ шуыса возьматӥськомы. Солэн кылыз асьме сюлмын ӧвӧл.

1-е ИОАННА 21Яратоно нылпиосы! Медад сьӧлыкалэ шуыса, тае мон тӥледлы гожтӥсько. Кин ке сьӧлыказ ке но, соку асьмелэн Атай азьын Дурбасьтӥсьмы, Шонер Улӥсь Иисус Христосмы, вань. 2Асьмеды гинэ сьӧлыкъёсмылэсь мозмытӥсь ӧвӧл, быдэс дуннеез Со сьӧлыкъёслэсь мозмытӥсь луэ. 3Солэсь курон-косонъёссэ быдэсъяса улӥськомы ке, со возьматэ ини, асьмеос Сое тодӥмы шуыса. 4Кин шуэ: «Мон Сое тодӥ», нош Солэсь курон-косонъёссэ уг ке быдэсъя, со ӧрекчи, со пушкын Инмарлэн зэмлыкез ӧвӧл. 5Нош кин Солэсь кылзэ быдэсъяса улэ, солэн сюлмаз Инмарлэн яратонэз зэм ик пачылмиз. Отысен тодӥськомы, асьмеос Со бордын улӥськомы шуыса. 6Кин шуэ: «Мон Инмар бордын улӥсько», кызьы Иисус Христос улӥз, со озьы улыны кулэ. 7Гажаноосы! Тӥледлы выль курон-косон уг гожтӥськы, вашкалазэ курон-косонэз гожтӥсько. Со кутсконысен ик тӥледлы тодмо вал: вашкала курон-косон луэ кыл, кудзэ тӥ кутсконысеныз ик кылӥды. 8Но озьы ке но, тӥледлы выль курон-косон гожтӥсько: со – зэмлык, со Со бордын но, тӥ бордын но улэ. Уго пеймытлык ортче но зэмос югыт пиштыны кутске. 9Кин шуэ: «Мон югытын улӥсько», нош агай-вынзэ адӟонтэм каре ке, со пеймытын улэ на. 10Кин агай-вынъёсты яратэ, со югытын улэ, со пыр визь сынаськон уг ни луы. 11Нош кин агай-вынзэ адӟонтэм каре, со пеймытын улэ, пеймыттӥ ик ветлэ. Кытчы мынэмзэ со уг тоды, малы ке шуоно пеймыт солэсь синзэ ӵоксаз. 12Пиналъёс, соин тӥледлы гожтӥсько: Солэн нимыз понна тӥляд сьӧлыкъёсты куштэмын. 13Атайёс, соин тӥледлы гожтӥсько: кутсконысеныз ик Улӥсез тӥ тодӥды. Егит пиос, соин тӥледлы гожтӥсько: тӥ уродлыклэсь кузёзэ вормиды. 14Пиналъёс, соин тӥледлы гожтӥ: тӥ Атаез тодӥды. Атайёс, соин тӥледлы гожтӥ: кутсконысеныз ик Улӥсез тӥ тодӥды. Егит пиос, соин тӥледлы гожтӥ: тӥ кужмоесь, тӥляд сюлмады Инмарлэн кылыз улэ, тӥ уродлыклэсь кузёзэ вормиды. 15Та дуннеез эн яратэ. Мар дунне вылын вань, сое но эн яратэ. Кин ке таизэ дуннеез яратэ, солэн сюлмаз Атайлэн яратонэз уг улы. 16Уго ваньмыз, мар вань дунне вылын – лулмугорлэн ортчыт кужмо кулэ каронъёсыз, синъёслэн уродлы синмаськонзы, вылтӥяськыса улон – Атайлэсь ӧвӧл, со та дуннелэсь луэ. 17Таиз дунне ортче-быре, солэн ортчыт кужмо кулэ каронъёсыз но быро, нош Инмарлэсь эриксэ быдэсъясь пумтэм вапумъёс улэ. 18Пиналъёс! Берпум вапумъёс ни. Тӥ кылӥды, антихрист лыктоз шуыса. Али ик трос антихристъёс потӥзы ни, – отысен асьмеос тодӥськомы, берпуметӥ вапум вуиз шуыса. 19Соос асьме пӧлысь потӥзы, но соос асьмелэнъёс ӧй вал. Соос асьмелэнъёс луысалзы ке, асьмемын огазе кыльысалзы; нош соос асьме пӧлысь потыса кошкизы. Соос ваньмыз ик асьмелэнъёс ӧвӧл шуыса тодмо луыны кулэ вал уго. 20Дун-Сьӧлыктэмлэн тӥледыз вӧйын зырӟемез вань, озьыен, тӥ ваньзэ тодӥськоды. 21Мон тӥледлы зэмлыкез ӧд тодэ шуыса ӧй гожты, гожтӥ соин: тӥ зэмлыкез тодӥськоды, озьы ик тодӥськоды, нокудӥз но ӧрекчаськон зэмлык бордысь уг поты шуыса. 22Ӧрекчаськись ӧвӧл-а со, кин Иисусэз Христос ӧвӧл шуыса лыдъя? Со – антихрист, Атаез но, Пиез но кулэтэм карись. 23Нокудӥзлэн но Пиез кулэтэм карисьлэн Атаез но ӧвӧл; нош Пиез кулэ карисьлэн Атаез но вань. 24Озьыен, кутсконысеныз ик мае тӥ кылӥды, со тӥляд сюлмады мед улоз. Кутсконысеныз ик кылэмды тӥляд сюлмады улӥз ке, соку тӥ но Атай бордын, Пи бордын улоды. 25Со асьмелы бырисьтэм улон сётыны сӥзиз. 26Тае мон тӥледыз йыромонэ нуись муртъёс сярысь гожтӥ. 27Христос дорысь басьтэм вӧйын зырӟон тӥ бордын улэ. Соин ик тӥледлы мукет дышетӥсьёс кулэ ӧвӧл ни. Та вӧйын зырӟон тӥледыз котьмалы дышетэ, – со зэмлыко, ӧрекчаськон ӧвӧл. Соин ик, кызьы Со тӥледыз дышетӥз, Со бордын озьы улэ. 28Озьыен, пиналъёс, Иисус Христос бордын улэ. Со лыктыку, Со азьын кышкано, возьдаськоно медад луэ. 29Иисус Христос шонер улӥсь шуыса тодӥськоды ке, соку тодэ тае но: котькудӥз шонер лэсьтӥсь мурт Инмарлэсь вордскемын.

1-е ИОАННА 31Учкелэ, Атай кыӵе юн асьмеды яратӥз, – Инмарлэн нылпиосыз шуыса нимаз, – Солэн нылпиосыз ик луиськомы но. Дунне Сое уг тоды бере, соин ик асьмемыз но уг тоды. 2Гажаноосы! Асьмеос табере Инмар нылпиос луиськомы; но али усьтэмын ӧвӧл на, кыӵеесь асьмеос луомы. Но тодӥськомы: Иисус Христос лыктэм бере Солы укшасесь луомы, малы ке шуоно Сое адӟомы сыӵеен, кыӵе Со вань. 3Котькудӥз, Сое тазьы оскиськонэн возьмась мурт, ассэ дун-чылкыт каре, уго Со дун-чылкыт. 4Котькудӥз, сьӧлык лэсьтӥсь мурт, законлы пумит уж лэсьтэ. Сьӧлык – со Инмар законлы пумит уж. 5Тӥ тодӥськоды, Со асьмемыз сьӧлыкъёсмылэсь мозмытыны лыктӥз шуыса. Со бордын нокыӵе но сьӧлык ӧвӧл. 6Нокудӥз но Со бордын улӥсь мурт уг сьӧлыка; одӥгез но сьӧлыкаса улӥсь мурт Сое ӧз адӟы, Сое ӧз тоды. 7Пиналъёс! Нокин но тӥлесьтыд визьдэс медаз туга. Кин шонер лэсьтэ, со шонер улӥсь Иисус Христос кадь ик шонер улӥсь луэ. 8Сьӧлыкаса улӥсь мурт диаволлэсь луэ, малы ке шуоно вапумъёслэн кутсконысенызы ик диавол сьӧлыказ. Диаволлэсь ужъёссэ куашкатон понна ик уго Инмар Пи лыктӥз. 9Инмарлэсь вордӥськем нокудӥз но адями сьӧлык уг лэсьты, малы ке шуоно Солэн кидысэз со пушкын улэ. Инмарлэсь со вордӥськемын бере, соин ик сьӧлыканы но со уг быгаты. 10Инмарлэсь нылпиоссэ но диаволлэсьсэ нылпиосты тазьы тодманы луоно: котькудӥз шонертэм уж лэсьтӥсь мурт, агай-вынъёссэ яратӥсьтэм мурт – Инмарлэсь ӧвӧл. 11Кутсконысеныз ик тӥ таӵе веранэз кылӥды: огмес огмы мед яратомы. 12Каин кадь ум улэ, со шайтанлэсь вал, аслэсьтыз вынзэ вииз. Нош мар понна сое вииз? Со понна: солэн ужъёсыз лекесь вал, нош вынызлэн – шонересь. 13Агай-вынъёсы, тӥледыз дунне адӟемпотостэм каре ке, эн паймелэ. 14Асьмеос тодӥськомы кулонысь улонэ выжимы шуыса, малы ке шуоно агай-вынъёсмес яратӥськомы. Агай-вынзэ яратӥсьтэм мурт кулон пӧлтӥ ветлэ. 15Агай-вынъёссэ адӟемпотостэм карись мурт адями виись луэ; нош тӥ тодӥськоды, адями виись мурт бордын бырисьтэм улон ӧвӧл. 16Иисус Христос асьме понна лулзэ сётӥз – отысен асьмеос яратонэз тодӥмы. Асьмеос но агай-вынъёсмы понна лулмес сётыны дасесь луыны кулэ. 17Кинлэн та дуннеын котьмаиз вань, нош братэзлэсь ёрмыса улэмзэ адӟыса вылысь солэсь палэнскыса сюлэмзэ со ворса ке, – кызьы сыӵе мурт бордын Инмарлэн яратонэз улоз? 18Яратоно пиналъёсы! Кыл вылын, вераськыса гинэ ум, вае кутскоме уж вылын зэмзэ ик яратыса улыны. 19Асьмеос зэмлык бордысь шуыса, соку тодомы но Инмар азьын сюлэмъёсмес буйгатомы. 20Маин ке асьмелэн сюлэммы асьмемыз судить каре ке, Инмар асьмелэн сюлэммылэсь бадӟымгес, Со ваньзэ тодэ. 21Гажаноосы! Асьмелэн сюлэммы асьмеды судить уг ке кары, соку асьмеос Инмар азьын кышкатэк улыны быгатӥськомы. 22Ваньзэ, мае куримы, Инмар дорысь басьтомы, уго Солэсь курон-косонъёссэ быдэсъяса, Солы ярамон ӟеч ужъёс лэсьтыса улӥськомы. 23Нош Инмарлэн курон-косонэз таӵе: Пиезлэн Иисус Христослэн нимызлы асьмеос мед оскомы но огмес огмы мед яратомы, кызьы Со асьмеды куриз-косӥз. 24Кин Инмарлэсь курон-косонъёссэ быдэсъяса улэ, со Инмар бордын улэ, нош Инмар – со бордын. Инмар асьме бордын улэ шуыса, Солэн асьмелы сётэм Духез тодытэ.

1-е ИОАННА 41Гажаноосы! Вань духъёслы эн оске, духъёсты эскере-чаклалэ – Инмарлэсь-а соос, малы ке шуоно дунне вылэ трос ӧрекчи пророкъёс потӥзы. 2Инмарлэсь Духсэ (но йыромытӥсьлэсь духсэ) тазьы висъяны луоно: Иисус Христос лулмугорын лыктӥз шуыса тодытӥсь дух Инмарлэсь луэ; 3нош Иисус Христос лулмугорын лыктӥз шуыса уг ке тодыты, со дух Инмарлэсь ӧвӧл, со антихристлэн духез. Тӥ кылӥды, со дух лыктоз шуыса, со али ик дунне вылын вань ини. 4Пиналъёс! Тӥ Инмар бордысь потэмын, тӥ соосты вормиды; уго тӥ пушкын Улӥсь бадӟымгес солэсь, кин дуннеын улэ. 5Соос та дуннелэн муртъёсыз, дунне вылысьёс кадь ик верасько но, дунне соосты кылзэ. 6Асьмеос – Инмар бордысь потэмъёс. Инмарез тодӥсь мурт асьмемыз кылзэ, кин Инмар бордысь потэмын ӧвӧл, со асьмемыз уг кылзы. Тазьы висъяны быгатӥськомы Зэмлыклэсь Духсэ йыромытӥсьлэн духезлэсь. 7Гажаноосы! Огмес огмы яратоме, уго яратон Инмар бордысь потэ. Котькудӥз яратӥсь мурт Инмарлэсь вордскемын, со Инмарез тодэ. 8Кинлэн яратонэз ӧвӧл, со Инмарез уг тоды, малы ке шуоно Инмар – со яратон. 9Инмар асьмемыз яратонзэ тазьы усьтӥз: Со Аслэсьтыз одӥг гинэ Пизэ дунне вылэ ыстӥз, Со пыр асьмеос улон мед басьтомы шуыса. 10Тани мар бордын яратон: Инмарез асьмеос ӧм, Со асьмеды яратӥз но Аслэсьтыз Пизэ асьмеды сьӧлыкъёсмылэсь мозмытон понна ыстӥз. 11Гажаноосы! Инмар асьмемыз озьы яратӥз бере, асьмеос но огмес огмы яратыны кулэ. 12Инмарез нокин но, ноку но ӧз адӟы. Огмес огмы яратӥськомы ке, соку Инмар асьме бордын улэ но, Солэн яратонэз асьмелэн сюлмамы пачылмиз. 13Асьмеос Инмар бордын, Со асьме бордын улэ шуыса, отысен тодӥськомы: Аслаз Духез бордысь Со асьмелы сётӥз. 14Асьмеос адӟимы но шара ивортӥськомы: Атай Пизэ дуннеез Утись луыны ыстӥз. 15Кин Иисус Инмар Пи луэ шуыса осконзэ шара вера ке, со бордын Инмар улэ, со – Инмар бордын. 16Инмарлэсь асьмеды яратэмзэ тодӥмы но солы оскимы. Инмар – со яратон. Сюлмаз яратонэн улӥсь Инмар бордын улэ, Инмар – со бордын. 17Асьмелэн сюлмамы Инмарлэн яратонэз пачылмиз, соин ик суд нуналэ кышкатэк улыны быгатомы, уго та дуннеын шонер улӥськомы, кызьы Со шонер улэ. 18Яратонэн улыку, кышкан ӧвӧл – пачылмем яратон кышканэз улля, малы ке шуоно кышканэн улон курадӟон вае. Кин кышканэн улэ, солэн яратонэз быдэ вуэмын ӧвӧл на. 19Инмарез яратоме, уго Со азьлогес асьмеды яратӥз. 20Кин шуэ: «Мон Инмарез яратӥсько», нош агай-вынзэ адӟемпотостэм каре, – со ӧрекчаськись. Уго агай-вынзэ адӟыса вылысь сое яратӥсьтэм мурт кызьы быгатоз Инмарез яратыны, Кудзэ со уг адӟы? 21Асьмелы Со таӵе курон-косон сётӥз: Инмарез яратӥсь мурт агай-вынъёсты но мед яратоз.

1-е ИОАННА 51Иисуслэн Христос луэмезлы оскись котькудӥз адями Инмарлэсь вордскемын; кин Вордскытӥсез яратэ, со Солэсь вордскисез но яратэ. 2Инмар нылпиосты яратэммес тодӥськомы соя: Инмарез яратӥськомы, Солэсь курон-косонъёссэ быдэсъяськомы ке. 3Инмарлэсь курон-косонъёссэ быдэсъяса улонмы возьматэ Инмарез яратэммес. Солэн курон-косонъёсыз секытэсь ӧвӧл. 4Инмарлэсь вордӥськем мурт дуннеез ворме. Асьмелэн осконмы дуннеез вормиз. 5Кин ворме дуннеез? Со гинэ, кин оске, Иисус Инмар Пи луэ шуыса. 6Иисус Христос вуэн, вирен, Духен лыктӥз. Вуэн гинэ ӧз лыкты, – вуэн но, вирен но Со лыктӥз, Дух Со сярысь шара ивортэ, уго Дух – со зэмлык. 7Инмын куинь шара Ивортӥсь: Атай, Кыл но Святой Дух. Соос куинез одӥг луо. 8Музъем вылын но куинь шара ивортӥсь: дух, ву но вир. Куиньназы ик огкылысь иворто. 9Адямиослэсь ивортэмзэс асьмеос кабыл басьтӥськомы ке, Инмарлэн ивортэмез – бадӟымгес. Уго Инмар Аслаз Пиез сярысь Ачиз шара ивортӥз. 10Инмар Пилы оскисьлэн пушказ та ивортон улэ. Инмарлы оскисьтэм мурт Инмарез ӧрекчаськись шуэ, малы ке шуоно Инмарлэн Аслаз Пиез сярысь шара ивортэмезлы уг оскы. 11Ивортон тае возьматэ: Инмар асьмелы пумтэм вапумъёслы улон сётӥз, та улон Солэн Пиез бордысь потэ. 12Инмар Пиез сюлмаз возись муртлэн улонэз вань; Инмар Пиез сюлмаз возисьтэм муртлэн улонэз ӧвӧл. 13Тае мон тӥледлы, Инмар Пилэн нимызлы оскисьёслы, гожтӥ. Тӥ мед тододы: Инмар Пилэн нимызлы осконды пыр тӥляд пумтэм вапумъёслы улонды вань. 14Инмар азе кышкатэк лыктыны быгатӥськомы: Солэн эрикезлы тэрытскыса, мае гинэ ум куриське, Со асьмеды кылзэ. 15Со асьмеды котьку но кылзэ шуыса тодӥськомы бере, соку тодӥськомы сое но: мае гинэ Солэсь ум куриське, ваньзэ басьтӥськомы. 16Кин ке агай-вынызлэсь кулонэ нуисьтэм сьӧлыкен сьӧлыкамзэ адӟе ке, со мед вӧсяськоз, соку Инмар солы, кулонэ нуисьтэм сьӧлыкен сьӧлыкасьлы, улон сётоз. Вань кулонэ нуись сьӧлык: со сярысь мед вӧсяськоз шуыса уг вераськы. 17Котькудӥз но шонертэм улон – со сьӧлык. Вань кулонэ нуисьтэм сьӧлык но. 18Асьмеос тодӥськомы, Инмарлэсь вордскем мурт уг сьӧлыка шуыса. Инмарлэсь вордскем мурт ассэ сьӧлыклэсь уте но, шайтан со борды уг йӧтӥськы. 19Асьмеос тодӥськомы, асьмеос Инмар бордын луиськомы, нош та дуннелэн адямиосыз шайтанлэн киулаз возисько шуыса. 20Озьы ик тодӥськомы, Инмар Пи лыктӥз но асьмелы (югытлык), визьлык сётӥз шуыса. Зэм Инмарез мед тодомы. Солэн зэм Пиез Иисус Христос бордын мед уломы. Со луэ зэм Инмар, пумтэм вапумъёсы улон. 21Пиналъёс! Асьтэдыз сульдэръёслэсь-идолъёслэсь уте. Аминь.

http://www.bible.is/UDMIBT/1John/1/D

Nenhum comentário:

Postar um comentário