sábado, 27 de fevereiro de 2016

1 YOANE: ZANDE (INDIVIDUAL LANGUAGE)


1 YOANE 11Ani na kẽ agu apai fu roni du tipa gu Pai nga unga, nga gu na ima du kina hõ rago a enge ni. Ani a gĩ he, ki bi he ni bangirani; ani a bi he ki zadi he ni be rani. 2Hõ i a yugu gi unga ni re, ani a bi he ni rengo, ki du ni adezire he; sidu ani a pe pa gu nyenye unga tini fu roni, nga gu na du nâ Bâ, i ki yugu he fu rani. 3Gu pai ani abi he ki gĩ he, si ani a pe pa ha fu roni â, wa ka oni du nâ ani â rogo gaani ngbanya du nâ Mbori, nga Bâ, nâ Wiri ko nga Yesu Kristo. 4Ani na ke agi apai re tipa gaani ngbarago maĩ pai. 5Gere nga gu pai ani a gĩ he ngba Wiri ko, ani a pe he awere fu roni: ya Mbori nga imarago, bitimo rogo ko yò wasãte. 6Ka ani ya ngbanya dagba rani nâ ko; ono ani ki ni ta rogo bitimo kindi, ani na gumba kina zire, ani a manga nga gu pai Mbori a kpinyamu he te. 7Ono ka ani a ta rogo imarago, wa du ko rogo imarago, ngbanya du adu dagba rani nâ ko, kure Yesu nga Wiri ko ki ni girisi rani ti ingaapai dũ. 8Ka ani ya ingaapai ti rani te, ani nangi tirani, rengo du nga ti rani te. 9Ono ka ani kusi gaani ingaapai fu Mbori, ko nga ira rengo, du nâ ruru pai, ko vu rani a vu ti gaani ingaapai, ki girisi rani be ira-ira apai dunduko. 10Ka ani ya ani a inga nga pai te, ani sa Mbori ni ira zire, ka gako pai a du nga rogo rani yò ya.

1 YOANE 21Ako, gimi agudee, mi na kẽ gi pai re fu roni tipa ka oni ingi nga pai ya; ono ka boro ingi pai, azarõ be rani yò du Mbori ni nga Bâ, nga Yesu Kristo, nga ruru boro. 2Kristo nga motumo gaani ingaapai; tipa kina gaani ingaapai sã te; ono tipa ga aboro zagino ingaapai dunduko â. 3Ka ani gĩ sangba ga Mbori andikä, si ka ani ini tini ya: ani ini ko. 4Gu nika ya; “Mi ini Mbori” ono ka ni a giã nga sangba gako Ndikä ya, ira zire nga ni, nâ rengo rogo ni yò wasãte. 5Ono guni ka gĩ gako pai ki ka kuti ni, gako nyamuse tini nirengo nzuũnzu. Si ani a ino tini ya ani nâ ngbanya dagba rani nâ Mbori. 6Gu nika ya ni nâ ngbanya kindi dagba ni nâ Mbori, ni raki wa kina gu Kristo a raki. 7Abadiangba re, gi ndikä mi a kẽ hẽ fu roni re, vovõ ndikä nga ha te; si nga kina gu kuru ndikä na ima du be roni ti tuna-tuna ha. Gu kuru ndikä re nga gu pai oni a ima giã ha mbata. 8Wa du he were tie, gu ndikä mi a kẽ hẽ awere fu roni si ni vovõ ho; bambiko i na bi ga ha rengo kina rogo Kristo yò, nâ rogo roni yò â. Bambiko bitimo na susa asusa kusayò, kina ndikidi imarago ki ni haãsi rago. 9Guni ka ya ni rogo imarago yò; ono ni ki ni sogo wirina ni, ni kindi kina rogo bitimo. 10Gu nika kpinyamu wirina ni, ni na raka rogo imarago; were, ka gu pai a du nga tini rengbe ka sa kura boro ni mangi ingaapai ya. 11Ono gu ni na soga wirina ni, ni rogo bitimo, ki ni ta kina rogo ho, ka ni a ino nga hõ ni a ndu kuo ni ya; bambiko bitimo ima sa ni, ni ira vurari. 12Mi na kẽ gi pai re fu roni, gimi agudee, bambiko Mbori ima mbupai fu roni ti gaoni aingaapai mbiko Kristo. 13Mi na kẽ gi pai fu roni re, aba agudee, bambiko oni ima ino gu ko na ima du hõ mbata rago nika enga. Mi na kẽ gi pai re fu roni, aparanga, bambiko oni a ima dia be gu Gbegberẽ ko. 14Mi na kẽ gi pai re fu roni, gimi agudee, bambiko oni ima ino Mbori nga Bâ. Mi na kẽ gi pai re fu roni, aba agudee, bambiko oni ima ino gu ko na ima du hõ mbata rago nika enga. Mi na kẽ gi pai re fu roni, aparanga, bambiko oni nyanyaki; ga Mbori pai na nye anye kpoto roni yò, nâ oni ima dia be gu Gbegberẽ ko. 15Ka oni kpi nga nyamu zagino, watadu agu aheẽ du rogo zagino ya. Ka oni kpinyamu zagino, oni a kpi nga nyemu Mbori nga Bâ te. 16Bambiko a gu aheẽ dunduko du zagino; nga agu aheẽ gu borose nga ga ingaapai a kpinyamu he, agu aheẽ aboro a ta bi he ni bangiri yo, kini idi he, agu aheẽ dunduko du rogo gi zagino re aboro a enda nâ ni, agi aheẽ dunduko re a ye nga be Mbori nga Bâ te; ono si na ye be kina gi zagino re. 17Gi zagino re nâ agu aheẽ dunduko du rogo nga gu aboro a kpinyamu he, nika go ago kusayò; ono gu ni nika manga gu pai Mbori a kpinyamu he, ni a nyeanye kindi 18Awire, digido apai na mbeda! Wa oni a gĩ hẽ ya Vura Kristo nika ye aye; ono awere tie, dungu avura Kristo ima kura, sidu ini ani he tini ya: digido apai na mbeda. 19Agi aboro re a ngia nga gaani aboro te, sidu i a guari tini dagba rani; bambiko ka i a ngia ndikidi gaani aboro, ka i nye nâ kina rani. Ono i a guari tipa si yugu gu pai a yugo nzuũnzu nga: gaani aboro na ngia yo te. 20Ono Kristo a ima keda Ziazia Toro fu roni kpaima, sidu ini oni agu apai tini dunduko nga rengo. 21Sidu tie, mi a kẽ nga gi pai re fu roni bambiko oni zanga ino rengo te; ono mi na kẽ hẽ bambiko gu pai nga oni ima ino rengo, nâ oni ima ino ho â wenengaĩ ya: zire hõ na ye be rengo te. 22Da du tie nga ira zire? Ni nga gu ni na ti kangu kiya: Yesu nga Masiya te. Gi ngbatunga boro re du nga vura Kristo; nga gu ni na ti kangu Mbori nga Bâ, nâ Wiri ko â. 23Bambiko gu ni na ti kangu Wiri, ni ti kangu Bâ ati â; gu ni na ida pa Wiri, Bâ du adu nâ ni â. 24Sidu tie, mi na zungodi roni ya: oni ka kuti agu apai ku ngbadu roni yò oni a ima giã ha ti tuna-tuna ha. Ka oni ka kuti agu apai re, oni nika nye anye kina sã nâ Wiri gbiãkuti Bâ. 25Nâ gu heẽ kina Kristo ni tiko a kido pa ha fu rani, si nga nyenye unga. 26Mi na kẽ agi apai re fu roni, tipa oni rugu tironi nâ agu yo na kpinyamu ka nanga roni. 27Ono tipa roni tigaoni, Kristo a ima fu gako Toro fu roni kpaima. Nâ wa du gako Toro nâ oni kindi, si a ida nga boro yugu pai fu roni te. Bambiko gako Toro na yugo apai fu roni dunduko; nâ gu pai ko a yugo ho nga kina rengo, a ngia nga zire ya. Sidu tie, oni gĩ sangba kina ga Toro yugopai, oni ki nye kina sã nâ Kristo. 28Ĩĩ, gimi agudee, oni nye rogo Kristo yò, tipa hõ ko nika ye ni berewe, ka zeẽ a manga nga roni nâ ko ya. 29Oni ima ino ho ya: Kristo ni ruru ko; sidu tie oni du wa ka oni ini he â ya, gu ni na manga kina ruru apai, ni nga wiri Mbori.

1 YOANE 31Oni bi nga ngbatunga gu nyamuse du be Mbori nga Bâ tipa rani! Ko na kpinyamu rani gbẽ, sidu ko a yamba rani tini nga awiri ko nâ kina boro wo du ani â. Gu pai zagino a ino nga rani tini ya, si nga bambiko si a ino nga Mbori te. 2Abadiangba re, ani nga awiri Mbori awere; ono i a ta yugo nga waĩ fu rani nzuũnzu ani ka du te. Ono ani ima ino ho ya: hõ Kristo nika ye ni berewe, ani nika du wa kina ko, bambiko ani nika bi ko wa kina gu du ko nzuũnzu. 3Gu boro maĩ bangiri ni koyò du Kristo ni tipa gi pai re, ni na banda tini abanda ziazia, wa kina gu â du Kristo ziazia. 4Guni ka ingi pai, ni na ti ga Mbori andikä, bambiko manga ingaapai nga basa sangba Mbori. 5Oni ima ino ho ya: Kristo a ye tipa ka dia aingaapai kusayò, nâ ingaapai ti ko te. 6Sidu tie, guni ka nye rogo Kristo yò, ni a ka nga kuti manga kina ingaapai kindi te; ono guni ka kina kuti manga ingaapai kindi, ni a ta bi nga ko watadu ino ko te. 7Ako, awire, ka boro ingisi nga roni ya! Guni kaa manga ruru apai, ni nga ruru boro, wa kina gu â du Kristo ni ruru ko. 8Gu boro ka kina kuti manga ingaapai kindi, ni nga ga Bakitingbanga ni, bambiko bakitingbanga a ima digo ni mangi ingaapai kina hõ rago aenge ni. Gu pai Wiri Mbori a ye tini si nga: ka gberesa agu apai kusayò Bakitingbanga a mangi he. 9Guni nga wiri Mbori, ni a ka nga kuti manga ingaapai kindi te, bambiko sino Mbori gu du rogo ni yò; nâ ni a rengba nga na ka kuti manga ingaapai kindi te bambiko Mbori nga Ba ni. 10Gu pai na kparaka awiri Mbori ti awiri Bakitingbanga, si nga: awiri Mbori nga agu yo na manga kina ruru apai kini kpinyamu akura yo. 11Gere nga gu pangbanga oni a gi he ti tuna-tuna ha nga: Oni kpinyamu akuarani. 12Si a ida nga ani du wa Kaina te; bambiko ko a du ni gu boro nga ga Bakitingbanga ni, ki imi wirina ko na ngia Ebere. Kaina a imi ko tipa gine? Ko a imi ko bambiko agu apai ko a manga ha ni tiko a ru nga te; ono agu apai wirina ko a manga ha a du ni ruru he. 13Sidu tie, awirinami, ka zagino a soga roni, ka si iriwo nga ti roni ya. 14Ani ima ino ho ya: ani a ima kura rogo kpio yò ku rogo unga; ani ini he bambiko ani na kpinyamu awirinarani. Gu ni a kpi nga nyamu akura ni ya, ni a ta kura nga rogo kpio yò te. 15Guni kaa sogo wirina ni, ni nga kina imi boro; nâ oni ima ino ho ya: nyenye unga rogo imi boro yò te. 16Ani ini gu he nga nyamuse mbiko gu pai nga: Kristo a fu gako unga tipa rani. Sidu tie, ani du wa ka ani fu gaani unga tipa awirina rani â! 17Gu ira kumuko ka bi wirina ni nâ zingo, ka nunga ni a du nga tini ya, ni a rengba nga ka ya ni na kpinyamu Mbori wasãte. 18Ako, awire, ka gaani nyamuse du nga gbua kina rogo fugo yò, auru ngba rani ya; ono si du ni ndikidi nyamuse, nga gu na yugu tihe rogo manga pai yò. 19Sidu tie, gi pai re ani ka ino tini ya ani nga ga rengo rani; mbiko gere, ani ki du na ngbadu rani yo sã ku bara bangiri Mbori. 20Abadiangba, ka ngbadu rani yò kiti ngbanga rani; ani ima ino ho ya Mbori kiĩ pa ko ti ngbadu rani yò, nâ ko ini apai dunduko. 21Wa du he were, ka ngbadu rani yò a kita nga ngbanga rani ya, ani du adu zuka-zuka koyò du Mbori ni. 22Gu heẽ ka ani hõ be ko, ko fu he afu fu rani, bambiko ani na giã sangba gako andikä agiã, kini mangi agu apai a manga â ngba ti ko. 23Gere nga gako ndikä: ya ani idi pa Wiri ko nga Yesu Kristo, kini kpinyamu akuarani, nga kina agu andikä â Kristo a ru he fu rani. 24Gu boro na giã sangba ga Mbori andikä, ni na raka nâ Mbori sã, Mbori ki ni raki tiga ko nâ ni â. Nâ ani na ino ho ya: Mbori na raka nâ ani, bambiko gu gako Toro ko a fu ko fu rani.

1 YOANE 41Abadiangba re, ka oni idi nga pa agu aboro dunduko na ya: Toro ti yo ya; ono oni asadi yo mbata ka ino si ngia gu toro du ti yo, ko na ye yò du Mbori ni. Bambiko badungu aira zire anebi ima gbandaka ku rogo arago dunduko. 2Gi pai re oni ka ino ga Mbori toro tini, nga kina agu yo nika kusa Yesu Kristo gbayaga ya, ko a ye ku ri gi zagino re ni boro, ni nâ gu Toro tini ni rengo na ye yò du Mbori ni. 3Ono guni ka ti kangu gi pai re tipa Yesu, ga Mbori Toro tini te. Gu toro du tini nga ga Vura Kristo ko; oni a ima giã ha mbata ya, Vura Kristo nika ye; ko ima ye tie awere ku zagino. 4Ono oni tigaoni nga ga Mbori aboro, awire; nâ oni ima dia be aira zire anebi; bambiko gu Toro du ti roni, ko kiĩ ome ko susi ga gu toro du ti aboro gi zagino re. 5Agu aira zire anebi re na gumba kina agu apai nga ga gi zagino re; aboro zagino ki ni gĩ kina sangba yo bambiko i nga aboro zagino. 6Ono ani ti gaani nga ga Mbori aboro. Guni ini Mbori, ni na giã sangba rani; ono gu ni a du nga ni ga Mbori ni ya, ni a giã nga sangba rani te. Sidu tie, gi pai re ani a ino gu Toro tini nga ga Mbori ko, nga rengo, nâ gu toro nga ga zire ko. 7Ako, abadiangba re, ani kpinyamu akuarani a kpi, bambiko nyamuse na ye yò du Mbori ni. Guni na kpinyamu akura ni, ni nga wiri Mbori, nâ ni ini Mbori â. 8Guni a kpi nga nyamu akura ni ya, ni a ino nga Mbori te, bambiko Mbori nga nyamuse. 9Nâ Mbori a yugu gako nyamuse tipa rani ni keda ko bangisã Wiri ko ku zagino, tipa ani du ni unga rani mbiko ko. 10Gi nga nyamuse re: a nga ani du na kpinyamu Mbori te; ono kina ko na kpinyamu rani, ki kedi Wiri ko ku du ni motumo tipa gaani ingaapai. 11Wene abadiangba re, ka nyamu rani du ti Mbori were, ani du wa ka kpinyamu akuarani. 12A nga boro hõ sã na bi Mbori te; ono ka ani a kpinyamu akuarani, si na yugo ho ya: Mbori na raka nâ ani, gako nyamuse ki du adu ti rani nzuũnzu. 13Ani ini he ni rengo ya: ani nye rogo Mbori yò, ko nye rogo rani yo â, bambiko ko a ima fu gako Toro fu rani. 14Ani ima bi gu pai ki du ni adezire he, nga: Mbori nga Bâ a kedi Wiri ko, ko du ni Batasi aboro zagino. 15Gu nika kusi Yesu gbayaga ya Wiri Mbori nga ko, Mbori nye anye rogo ni yò ni ki nye rogo Mbori yò. 16Ani ini he ti gaani, ki idi pa gu ga Mbori nyamuse du ti ko tipa rani Mbori nga nyamuse; nâ gu ni na kpinyamu kura ni, ni nye rogo Mbori yò, Mbori ki nye rogo ni yò. 17Mbori na sa gako nyamuse sidu rogo rani yò nzuũnzu, wa ka si nyakasi rani ti rago Sapa ngbanga; nâ ani nika du nâ gu nyamuse re ti rani, bambiko gaani raka ri gi zagino re wa kina ga Kristo. 18Gunde ti nyamuse te; ndikidi nyamuse na do gunde ado kusayò. Sidu tie, gu ni na gunde kindi, Mbori a ta sa nga gako nyamuse sidu rogo ni yò nzuũnzu te, bambiko gunde ni tihe nga kina mbusa. 19Ani na kpinyamu akuarani, bambiko kina Mbori na kpinyamu rani mbata. 20Ka boro ya wẽ, ni na kpinyamu Mbori; ono ni ki ni sogo awirinani, ni nga ira zire. Bambiko ka ni a kpi nga nyamu akuarani, ni a bi yo abi ni bangiri ni ya, ni a rengba nga ka kpinyamu Mbori, ni a bi nga ko ya te. 21Gu ndikä Kristo na fu he fu rani nga gere: ya gu ni na kpinyamu Mbori, ni du wa ka ni kpinyamu awirinani â.

1 YOANE 51Gu boro ka idi pa Yesu ya Masiya du nga ko, ni nga wiri Mbori; nâ gu boro na kpinyamu bagudee ni na kpinyamu wiri ni â. 2Gu pai ka ani ini he tini ya ani nga awiri Mbori, si nga: ani na kpinyamu ko ki ni gĩ sangba gako andikä. 3Bambiko kpinyamu Mbori nga giã sangba gako andikä; nâ gako andikä a nyaka nga anyaka ki susi ome rani te: 4bambiko gu boro nga wiri Mbori rengbe a rengba nâ dia be zagino. Nâ ani ima dia be zagino mbiko gaani idapase. 5Da rengbe nâ dia be zagino? Kina gu ni sã idi pa Yesu ya Wiri Mbori du nga ko. 6Kina boro gu Yesu Kristo na ye na gako ime batisimo nâ uka kure ko, kini kpi. Ko a ye nga nâ kina ime gbua te; ono ime gbiãkuti kure. Toro nga dezire gi pai re nirengo, bambiko toro nga Rengo. 7Adezire agi apai re biata: 8nga Toro, nâ ime, gbiãkuti kure, agi apai dunduko du biata re mongo ni fu kina gu bangisã dezirepai sã. 9Ani na ida ga aboro dezirepai a ida; ono ga Mbori dezirepai kiĩ pa ha ki susi ga aboro; nâ kina ko ni tiko nga dezire tipa Wiri ko. 10Sidu tie, gu boro ka idi pa Wiri Mbori, gi dezirepai re kina ngbadu ni yò; ono gu boro tiga ni a ida nga pa ko ya, ni ima sa Mbori ni ira zire, bambiko ni a ida nga kuti gu pai kina Mbori ni tiko a gumba ha tipa Wiri ko te. 11Gu dezire pai re nga gere: Mbori ima fu nyenye unga fu rani, nâ gi unga re na enga kina yò du Wiri ko ni. 12Gu boro na raka wa sã nâ Wiri, gako unga ti kina ni; ono gu boro tiga ni a raka nga wa sã nâ Wiri Mbori ya, gako unga tini te. 13Mi na kẽ gi pai re fu agu roni idi pa Wiri Mbori, tipa oni ini he ya: nyenye unga kina ti roni. 14Ani na kido kuti Mbori, mbiko ani ima ino ho ni rengo nga: Ko na giã gaani akpẽ; ka ani sana ko tipa gu heẽ ngba angba bangiri ko. 15Wa ini ani he ni rengo ya: Mbori na giã gaani kpẽ agiã hõ ani na sana ko ni tipa heẽ, ani ima ino ho â ni rengo ya: ko nika fu agu aheẽ afu fu rani ani a sana ko tipa ha. 16Ka mo bi wirinamu, na manga gu ingaapai a ndu nga sa kpio ya, mo du wa ka mo kpari fu Mbori tipa ni, ko ki fu unga fu ni. Gere tipa agu aboro gayo ingaapai a ndu nga nâ yo sa kpio ya. Ono ingaapai kina hõ nga gu na ndu nâ boro sa kpio; mi a ya nga foro mo kpari fu Mbori tipa gi te re. 17Ira-ira apai dunduko nga kina ingaapai; ono kura ingaapai kina hõ a ndu nga nâ boro sa kpio ya. 18Ani ima ino gu pai nga: wiri Mbori hõ ni boro na ka kuti manga ingaapai kindi te, bambiko gu Wiri Mbori nga Yesu na banda ni abanda, ka Bakitingbanga a rengba nga ka zada ni ya. 19Ani ima ino ho ti gaani ni rengo kiya: ani nga ga Mbori aboro. Zavura gu pai nga zagino du kina kuti be Bakitingbanga. 20Ani ima ino ho ni rengo ya: Wiri Mbori a ima ye ki fu rugatise nâ pai fu rani, ani ki ima ino da nga ndikidi Mbori. Ani na raka wa sã nâ gu ndikidi Mbori re; ki du kina sã nâ Kristo Yesu. Ko du nga ndikidi Mbori, nâ kina ko nga nyenye unga. 21Ako, awire, oni banda tironi wenengaĩ be aira zire ambori!

http://www.bible.is/ZNEBSS/1John/1/D

Nenhum comentário:

Postar um comentário